ဧ့ၤဘြံၤ

၆ အဃိ ခဲအံၤန့ၣ် ခီဖျိလၢ ပလဲၤပူၤကွံာ် တၢ်သိၣ်လိအခီၣ်ထံးခီၣ်ဘိ ဘၣ်ဃးဒီး ခရံာ်လံအဃိ မ်ပဂုာ်ကျဲးစၢး လဲၤဆူညါတုၤလၢ တၢ်ဒိၣ်တုာ်ခိၣ်ပှဲၤတက့ၢ်. မ်ပသုတဆဲးမၤလိကဒီး တၢ်အခီၣ်ထံးခီၣ်ဘိတဖၣ် တဘျီဝံၤတဘျီ လၢအမ့ၢ် တၢ်ပီၢ်ယၢ်လီၤက့ၤပသးလၢ တၢ်မၤကလီကလီတဖၣ်* ဒီးတၢ်နာ်ယွၤ, ၂ တၢ်သိၣ်လိဘၣ်ဃးဒီး တၢ်ဒိးဘျၢတဖၣ် ဒီးတၢ်ပာ်ထီၣ်စုလၢပှၤလိၤ ဒီးပှၤသံ အတၢ်ဂဲၤဆၢထၢၣ် သမူထီၣ်က့ၤ, ဒီးတၢ်စံၣ်ညီၣ် အထူအယိာ်န့ၣ်တဂ့ၤ. ၃ ဒီးကစၢ်ယွၤ မ့ၢ်ဟ့ၣ်အခွဲးန့ၣ် ပကဂုာ်ကျဲးစၢးလဲၤဆူညါ တုၤလၢ တၢ်ဒိၣ်တုာ်ခိၣ်ပှဲၤ တစုလီၤ.

၄ ပှၤလၢ အဘၣ်တၢ်ဒုးကပီၤထီၣ်တ့ၢ်လံအီၤတဖၣ်လၢ အလ့ၣ်ကွၢ်မူခိၣ် အတၢ်ဟ့ၣ်ကလီ ဒီးကဲထီၣ်ပှၤလၢ အဒိးန့ၢ်ဘၣ်သးစီဆှံ ၅ ဒီးလ့ၣ်ကွၢ်တ့ၢ် ကစၢ်ယွၤအကလုၢ်ကထါလၢအဂ့ၤ ဒီးတၢ်လၢအအိၣ်ဒီး တၢ်စိတၢ်ကမီၤလၢ အဘၣ်ထွဲဒီးခါဆူညါန့ၣ် ၆ တုၤလၢအဝဲသ့ၣ် လီၤတဲာ်ကွံာ်အခါန့ၣ် မ့ၢ်လၢ အဝဲသ့ၣ်ပျၤထီကဒီး ကစၢ်ယွၤအဖိခွါလၢ သ့ၣ်တၢၣ်အလိၤ ဒီးမၤမဲာ်ဆှးအီၤလၢ ကမျၢၢ်အမဲာ်ညါအဃိ တၢ်ဆှၢကဒါက့ၤ အဝဲသ့ၣ်ဆူ တၢ်ပီၢ်ယၢ်လီၤက့ၤအသး တသ့လၢၤဘၣ်. ၇ ဟီၣ်ခိၣ်ညၣ်န့ၣ် ဒိးန့ၢ်ဘၣ် တၢ်ဆိၣ်ဂ့ၤလၢ ကစၢ်ယွၤအအိၣ် ခီဖျိလၢ အအီဝဲတၢ်စူၤထံလၢ အလီၤဘၣ်လၢအလိၤ တလီၢ်လီၢ်တလီၢ်လီၢ် ဒီးလၢခံဒုးမဲထီၣ် တၢ်မုၢ်တၢ်ဘိလၢ အကဲဘျုးကဲဖှိၣ်လၢ ပှၤလၢအသူၣ်တၢ်ဖျးတၢ်တဂၤ အဂီၢ်န့ၣ်လီၤ. ၈ ဘၣ်ဆၣ် ဟီၣ်ခိၣ်ညၣ်အံၤ မ့ၢ်ဒုးမဲထီၣ် တၤဆှုၣ်တၤမဲ ဒီးနီၣ်တၤဆှုၣ်တဖၣ်န့ၣ် အကဘၣ်တၢ်ပာ်တ့ၢ်ကွံာ်အီၤ ဒီးဘူးထီၣ်လၢ တၢ်ကဆိၣ်အၢအီၤ ဒီးလၢခံကတၢၢ်န့ၣ် အကဘၣ် တၢ်ဒွဲၣ်အူထီၣ်ကွံာ်အီၤလီၤ.

၉ ဘၣ်ဆၣ် ယပှၤသးဘိသ့ၣ်ဧၢ, ပမ့ၢ်တဲတၢ်လၢ ကျဲဒ်အံၤသနာ်က့ ဘၣ်ဃးဒီးသုန့ၣ် ပနာ်သပှၢ်ကတၢၢ်လၢ သုတၢ်အိၣ်သး ကမ့ၢ်တၢ်လၢ အဂ့ၤန့ၢ်အန့ၣ် ဒီးသုမၤတၢ်လၢ အကကဲထီၣ် တၢ်အုၣ်က့ၤခီၣ်က့ၤ လၢသုဂီၢ်လီၤ. ၁၀ ကစၢ်ယွၤန့ၣ် တမ့ၢ်ပှၤလၢ အတတီတလိၤဘၣ်. လၢတၢ်န့ၣ်အဃိ အဝဲတသးပ့ၤနီၣ် သုတၢ်မၤဒီးတၢ်အဲၣ်လၢ သုပာ်ဖျါထီၣ်လၢ အမံၤအဖီခိၣ် ခီဖျိလၢ သုမၤစၢၤတ့ၢ် ပှၤစီဆှံတဖၣ် ဒီးသုဆဲးမၤစၢၤ အဝဲသ့ၣ်အဃိဘၣ်. ၁၁ ဒီးပအဲၣ်ဒိးလၢ သုဝဲတဂၤစုာ်စုာ် ကပာ်ဖျါထီၣ် တၢ်သးဆူၣ်အံၤ ဒ်သိးသုကနာ်န့ၢ် သုတၢ်မုၢ်လၢ် လီၤတံၢ်လီၤဆဲး တုၤလၢအကတၢၢ်လီၤ. ၁၂ ပတအဲၣ်ဒိးလၢ သုကကဲထီၣ် ပှၤလၢအကၢၣ်ဘၣ်. မ့မ့ၢ် ကွၢ်လိမၤဒိး ပှၤလၢအနာ်တၢ် ဒီးဝံသးစူၤတၢ် အဃိန့ၢ်သါဘၣ် တၢ်စံးပာ်တဖၣ်န့ၣ်တက့ၢ်.

၁၃ မ့ၢ်လၢ ပှၤလၢအဒိၣ်န့ၢ်ကစၢ်ယွၤ တအိၣ် နီတဂၤဘၣ်အဃိ ဖဲကစၢ်ယွၤအၢၣ်လီၤ စီၤအၤဘြၤဟၣ်အခါ အဝဲပာ်ဂၢၢ်ပာ်ကျၢၤဝဲ* လၢအနီၢ်ကစၢ် အမံၤအပူၤလီၤ. ၁၄ ဒီးတဲဝဲလၢ “ယကဆိၣ်ဂ့ၤနၤ သပှၢ်ကတၢၢ် ဒီးယကမၤအါထီၣ် နချံနသၣ် သပှၢ်ကတၢၢ်လီၤ.” ၁၅ အဃိ စီၤအၤဘြၤဟၣ် ပာ်ဖျါထီၣ် တၢ်ဝံသးစူၤ ဒီးလၢခံန့ၣ် အဒိးန့ၢ်ဘၣ် တၢ်စံးပာ်အံၤလီၤ. ၁၆ ပှၤဟီၣ်ခိၣ်ဖိ ပာ်ဂၢၢ်ပာ်ကျၢၤ အတၢ်အၢၣ်လီၤတဖၣ်လၢ ပှၤလၢအဒိၣ်န့ၢ်အီၤတဂၤ အမံၤအပူၤဒီးမ့ၢ်လၢ တၢ်အဝဲအံၤ ကဲတၢ်အုၣ်ကီၤ လီၤတံၢ်လီၤဆဲးအဃိ အမၤကတၢၢ်ကွံာ် တၢ်ဂ့ၢ်လိာ်ဘှီလိာ်ခဲလၢာ်လီၤ. ၁၇ ဒ်န့ၣ်အသိး ဖဲကစၢ်ယွၤ ဆၢတဲာ်လီၤအသးလၢ အကဟ့ၣ်ပှၤလၢ အကန့ၢ်သါဘၣ် တၢ်စံးပာ်တဖၣ်န့ၣ်လၢ တၢ်အုၣ်အသး အါန့ၢ်အလီၢ်လၢ အဘၣ်ဃးဒီး အတၢ်တိာ်ပာ် ဆီတလဲတသ့ဘၣ်အခါန့ၣ် အဝဲပာ်ဂၢၢ်ပာ်ကျၢၤဝဲ အတၢ်စံးပာ်လီၤ. ၁၈ ဒီးခီဖျိလၢ ကစၢ်ယွၤတဲလံၣ်တဲလီတၢ်လၢ တၢ်ခံမံၤအံၤအဖီခိၣ် တသ့ဘၣ် ဒီးတၢ်ခံမံၤအံၤ ဆီတလဲအသး တသ့စ့ၢ်ကီးဘၣ်အဃိ ပဝဲလၢ အဃ့ၢ်ဆူ တၢ်ပူၤဖျဲးအလီၢ်န့ၣ် ပန့ၢ်ဘၣ် တၢ်ဂံၢ်တၢ်ဘါဒိၣ်မး ဒ်သိးပကဟံးဃာ် တၢ်မုၢ်လၢ်လၢ အအိၣ်ပာ်လီၤအသးလၢ ပမဲာ်ညါ ဃံးဃံးအဂီၢ်လီၤ. ၁၉ ပအိၣ်ဒီးတၢ်မုၢ်လၢ်အံၤ ဒ်ပသးသမူ အနီၣ်သက့ၤအသိးလီၤ. တၢ်မုၢ်လၢ်အံၤ မ့ၢ်တၢ်လၢအလီၤတံၢ်ဒီး ဂၢၢ်ကျၢၤဝဲ ဒီးအလဲၤနုာ်လီၤ ပၢၢ်တုၤလၢအတလၢကွံာ် ယၣ်ဘျးသဒၢ ၂၀ ဖဲတၢ်လီၢ်လၢ ယ့ၣ်ၡူးလဲၤနုာ်လီၤဆိဝဲလၢ ပဂီၢ်လီၤ. အဝဲမ့ၢ် ပှၤလုၢ်တၢ်ခိၣ် အဒိၣ်ကတၢၢ် ဒ်စီၤမၤလကံစဒ့းအသိး လီၤထူလီၤယိာ်လီၤ.