ဧ့ၤဘြံၤ

၈တၢ်လၢပတဲန့ၣ် အတၢ်ဂ့ၢ်မိၢ်ပှၢ်မ့ၢ်ဒ်အံၤ, ပအိၣ်ဒီး ပှၤလုၢ်တၢ်ခိၣ် အဒိၣ်ကတၢၢ် ဒ်အံၤတဂၤလၢ အဆ့ၣ်နီၤဝဲလၢမူခိၣ် လၢတၢ်ကဟုကညီၢ်ကစၢ်တဂၤ အလီၢ်ပစိာ် အစုထွဲတခီလီၤ. ၂ ဒီးအဝဲမ့ၢ်ဝဲ တၢ်စီဆှံအလီၢ် လၢအဘၣ်ဃးဒီး ဒဲနီၢ်ကီၢ်န့ၣ် အခ့အပှၤလီၤ. ဒဲအံၤ ယဟိဝၤယွၤ သူၣ်ထီၣ်ဝဲဒီး တမ့ၢ်လၢ ပှၤဟီၣ်ခိၣ်ဖိ သူၣ်ထီၣ်ဝဲဘၣ်. ၃ ပှၤလုၢ်တၢ်ခိၣ်အဒိၣ်ကတၢၢ် ကိးဂၤဒဲးန့ၣ် ဘၣ်တၢ်ပာ်ထီၣ်အီၤ ဒ်သိး အကလုၢ်ထီၣ်တၢ်ဟ့ၣ် ဒီးတၢ်လုၢ်တၢ်ပာ်တဖၣ်န့ၣ်လီၤ. လၢတၢ်န့ၣ်အဃိ အဝဲတဂၤအံၤစ့ၢ်ကီး လိၣ်လၢအကလုၢ်ထီၣ် တၢ်တမံၤမံၤလီၤ. ၄ ဘၣ်ဆၣ် အဝဲမ့ၢ်အိၣ်လၢ ဟီၣ်ခိၣ်ချၢန့ၣ် အတကဲထီၣ်ဘၣ် ပှၤလုၢ်တၢ်ဒိၣ်ဘၣ်, မ့ၢ်လၢ ပှၤလၢ အလုၢ်ထီၣ်တၢ်ဟ့ၣ် ဒ်စီၤမိၤၡ့ အတၢ်သိၣ်တၢ်သီအသိးန့ၣ် အိၣ်ပာ်စၢၤလံအဃိလီၤ. ၅ တၢ်မၤစီဆှံလၢ အဝဲသ့ၣ် မၤဝဲတဖၣ်န့ၣ် ကဲဝဲတၢ်အဒိ ဒီးတၢ်အကဒုလၢ အပာ်ဖျါထီၣ် တၢ်လၢအဘၣ်ဃးဒီးမူခိၣ်န့ၣ်လီၤ. တၢ်အဝဲအံၤ ဘၣ်တၢ်ပာ်ဖျါထီၣ်အီၤ ဖဲစီၤမိၤၡ့ ကတ့ထီၣ်ဒဲအခါ အဒိးန့ၢ်ဘၣ် တၢ်မၤလိာ်လၢယွၤအအိၣ်လၢ “ဒ်သိးနကသူၣ်ထီၣ်ဘှီထီၣ် တၢ်ခဲလၢာ်ဒ်တၢ်အဒိ လၢအဘၣ်တၢ်ဒုးနဲၣ်နၤလၢ ကစၢၢ်အလိၤအဂီၢ်န့ၣ် ပလီၢ်နသးတက့ၢ်.” ၆ မ့မ့ၢ်ခဲအံၤန့ၣ် ယ့ၣ်ၡူးဒိးန့ၢ်ဘၣ် တၢ်မၤလၢအဂ့ၤဒိၣ်ဝဲ မ့ၢ်လၢ အဝဲမ့ၢ်စ့ၢ်ကီး ပှၤလၢအမၤစၢၤတၢ်လၢ ပှၤခံခီအဘၢၣ်စၢၤ လၢအဘၣ်ဃးဒီး တၢ်အၢၣ်လီၤအီလီၤလၢ အဂ့ၤဒိၣ်ဝဲအဃိလီၤ. တၢ်အၢၣ်လီၤအီလီၤအံၤ ဘၣ်တၢ်ဒုးအိၣ်ထီၣ်အီၤ ဒ်တၢ်သိၣ်တၢ်သီအိၣ်ဝဲအသိး ဒီးတၢ်သူၣ်ထီၣ်အီၤလၢ တၢ်စံးပာ်လၢ အဂ့ၤဒိၣ်ဝဲတဖၣ် အဖီခိၣ်န့ၣ်လီၤ.

၇ တၢ်အၢၣ်လီၤအီလီၤ အဆိကတၢၢ်တခါအံၤ အတၢ်လီၤတူာ်လီၤကာ် မ့ၢ်တအိၣ်ဘၣ်န့ၣ် တလိၣ်ဒုးအိၣ်ထီၣ်လၢ အဂၤတခါလၢၤဘၣ်. ၈ ဘၣ်ဆၣ် အဝဲပာ်တၢ်ကမၣ်လၢ ပှၤဂီၢ်မုၢ်အလိၤ ခီဖျိအတဲဝဲလၢ “ယဟိဝၤယွၤတဲဝဲလၢ ‘မုၢ်နံၤတဖၣ်ကဟဲဝဲ ဖဲယကမၤ တၢ်အၢၣ်လီၤအီလီၤအသီဒီး ပှၤအံၣ်စရ့လးဖိ ဒီးပှၤယူဒၤဖိန့ၣ်လီၤ.’ ၉ ဒီးယဟိဝၤယွၤ တဲဝဲလၢ ‘အတလီၤဂာ်ဒ်သိးဒီး တၢ်အၢၣ်လီၤအီလီၤလၢ ယမၤတ့ၢ်ဒီး အဝဲသ့ၣ် အမိၢ်ပၢ်ဖံဖု လၢပျၢၤတဖၣ် ဖဲမုၢ်နံၤလၢ ယဟံးဃာ်အဝဲသ့ၣ်အစု ဒီးထုးထီၣ်ကွံာ်အဝဲသ့ၣ်လၢ ကီၢ်အဲၤကူပတူးအပူၤဘၣ်. မ့ၢ်လၢ အဝဲသ့ၣ် ကွၢ်ကပာ်ကွံာ် ယတၢ်အၢၣ်လီၤအီလီၤအဃိ ယတသးအိၣ် အဝဲသ့ၣ်လၢၤဘၣ်.’

၁၀ “ယဟိဝၤယွၤ တဲဝဲလၢ ‘လၢမုၢ်နံၤတဖၣ်န့ၣ် ဝံၤအလီၢ်ခံ ယကမၤ တၢ်အၢၣ်လီၤအီလီၤအံၤ ဒီးပှၤအံၣ်စရ့လးဖိလီၤ. ယကပၢနုာ်လီၤ ယတၢ်သိၣ်တၢ်သီတဖၣ်လၢ အဝဲသ့ၣ် အတၢ်ဆိကမိၣ်အပူၤ ဒီးယကကွဲးလီၤအီၤလၢ အဝဲသ့ၣ်အသးလိၤလီၤ. ယကကဲထီၣ် အဝဲသ့ၣ်အကစၢ်ယွၤ ဒီးအဝဲသ့ၣ် ကကဲထီၣ် ယပှၤဂီၢ်မုၢ်လီၤ.’”

၁၁ “‘ဒီးအဝဲသ့ၣ်တသိၣ်လိ အပှၤထံဖိကီၢ်ဖိ ကဒဲကဒဲ ဒီးအဒီပုၢ်ဝဲၢ် ကဒဲကဒဲလၢ “သ့ၣ်ညါ ယဟိဝၤယွၤတက့ၢ်” န့ၣ်လၢၤဘၣ်, မ့ၢ်လၢ အဝဲသ့ၣ်ကိးဂၤဒဲး, စးထီၣ်လၢ ပှၤအဒိၣ်ကတၢၢ် တုၤလၢ ပှၤအဆံးကတၢၢ်န့ၣ် ကသ့ၣ်ညါယၤအဃိလီၤ. ၁၂ ဒီးလၢတၢ်သးကညီၤအပူၤ ယကပျၢ်ကွံာ် အဝဲသ့ၣ် အတၢ်တတီတလိၤတဖၣ် ဒီးယတသ့ၣ်နီၣ်ထီၣ် အဝဲသ့ၣ် အတၢ်ဒဲးဘးလၢၤဘၣ်.’”

၁၃ ခီဖျိ အတဲဝဲလၢ “တၢ်အၢၣ်လီၤအီလီၤအသီ” အဃိန့ၣ် မ့ၢ်ဒၣ်အဝဲဒုးကဲထီၣ် တၢ်အၢၣ်လီၤအီလီၤ လၢညါတခါလၢ တၢ်လၢအလီၢ်လံၤန့ၣ်လီၤ. ဒီးတၢ်တမံၤမံၤ မ့ၢ်လီၢ်လံၤဝဲ ဒီးပှၢ်ထီၣ်ဝဲလံန့ၣ် တယံာ်ဘၣ်ဒီး ကလီၤမၢ်ကွံာ်ဝဲလီၤ.