ဧ့ၤဘြံၤ

၉ မ့မ့ၢ် တၢ်အၢၣ်လီၤအီလီၤ လၢညါတခါန့ၣ် အိၣ်ဒီးတၢ်သိၣ်တၢ်သီတဖၣ် လၢတၢ်မၤစီဆှံအဂီၢ် ဒီးအိၣ်ဒီးဒဲစီဆှံလၢ ဟီၣ်ခိၣ်ချၢလီၤ. ၂ ဒီးဒၢးအဆိကတၢၢ်တတီၤ လၢအဘၣ်တၢ်တ့ထီၣ်အီၤ လၢဒဲပူၤန့ၣ် တၢ်ကိးအီၤလၢ တၢ်လီၢ်စီဆှံလီၤ. ဖဲန့ၣ်အိၣ်ဝဲဒီး မ့ၣ်အူဒၢ, စီၢ်နီၤခိၣ် ဒီးကိၣ်လၢ တၢ်လုၢ်ထီၣ်တၢ်အဂီၢ်လီၤ. ၃ ဘၣ်ဆၣ် ဒၢးတဖျၢၣ်လၢ ယၣ်ဘျးသဒၢ ခံဘ့ၣ်တဘ့ၣ် အလီၢ်ခံန့ၣ် ဘၣ်တၢ်ကိးအီၤလၢ တၢ်လီၢ်လၢ အစီဆှံကတၢၢ်န့ၣ်လီၤ. ၄ ဖဲန့ၣ်အိၣ်ဝဲဒီး တၢ်ဆိၣ်ကဲၤတၢ်နၢမူ အဒၢထူ ဒီးတၢ်အၢၣ်လီၤအီလီၤ အတလါစီဆှံလၢ အဘၣ်တၢ်ကျးအီၤဒီး ထူကဘျၣ်ဒီဖျၢၣ် ဒီးလၢအပူၤန့ၣ် အိၣ်ဒီးသပၢၤထူလၢ ကိၣ်မၤနၤအိၣ်လၢအပူၤ ဒီးစီၤအၤဟရိၣ် အနီၣ်ထိးဘိ လၢအဒိးထီၣ် ဒီးတၢ်အၢၣ်လီၤအီလီၤ အလၢၢ်ဘ့ၣ်ဘၣ်တဖၣ်န့ၣ်လီၤ. ၅ ဒီးတၢ်လၤကပီၤအခ့ရူာ်တဖၣ် အိၣ်ဝဲလၢ တလါအံၤအဖီခိၣ် ဒီးအကဒုလီၤဘၣ်လၢ တၢ်မၤဃူမၤဖိးတၢ် အခိၣ်ကၢၢ်အလိၤန့ၣ်လီၤ. ဘၣ်ဆၣ် ခဲအံၤန့ၣ် တမ့ၢ်တၢ်ဆၢကတီၢ်လၢ ပကတဲဖျါထီၣ် တၢ်ဂ့ၢ်တဖၣ်အံၤ လီၤတံၢ်လီၤဆဲးဘၣ်.

၆ တၢ်သ့ၣ်တဖၣ်အံၤ ဘၣ်တၢ်တ့အီၤဒ်အံၤ ဝံၤအလီၢ်ခံ ပှၤလုၢ်တၢ်ဒိၣ်တဖၣ် လဲၤနုာ်လီၤဝဲလၢ ဒၢးအဆိကတၢၢ်တတီၤအပူၤထီဘိ ဒ်သိး ကမၤဝဲ တၢ်မၤစီဆှံအဂီၢ်လီၤ. ၇ ဘၣ်ဆၣ် မ့မ့ၢ် လၢဒၢးခံတီၤတတီၤအပူၤန့ၣ် ပှၤလုၢ်တၢ်ခိၣ်အဒိၣ်ကတၢၢ် လဲၤနုာ်လီၤဝဲ ထဲတဂၤဧိၤ တနံၣ်တသီ ဒီးကဘၣ် လဲၤစိာ်ဃုာ်ဒီးတၢ်သွံၣ် ဒ်သိးအကလုၢ်ထီၣ်တၢ်လၢ အနီၢ်ကစၢ်အဂီၢ် ဒီးလၢတၢ်ဒဲးဘးလၢ ပှၤမၤဘၣ်ဝဲလၢ တၢ်တပာ်သူၣ်ပာ်သးအပူၤအဂီၢ်လီၤ. ၈ လၢတၢ်န့ၣ်အဃိ သးစီဆှံ ပာ်ဖျါထီၣ်ဝဲလၢ ဖဲဒဲအဆိကတၢၢ်တဖျၢၣ် အိၣ်ဒံးအခါ တၢ်တပာ်ဖျါထီၣ်ကျဲလၢ ပှၤကနုာ်လီၤဆူ တၢ်စီဆှံအလီၢ်ဒံးဘၣ်. ၉ ဒဲအံၤ မ့ၢ်တၢ်အဒိအတဲာ်လၢ ဆၢကတီၢ်ခဲအံၤအဂီၢ် ဒီးဒ်တၢ်ရဲၣ်တၢ်ကျဲၤအံၤ အိၣ်ဝဲအသိးန့ၣ် တၢ်ဟ့ၣ်ဒီး တၢ်လုၢ်တၢ်ပာ်တဖၣ် ဘၣ်တၢ်ဟ့ၣ်လုၢ်ထီၣ်အီၤလီၤ. ဘၣ်ဆၣ် တၢ်သ့ၣ်တဖၣ်အံၤ မၤလၢထီၣ်ပှဲၤထီၣ် ပှၤလၢအမၤ တၢ်စီဆှံတဖၣ်န့ၣ် အသးလၢအသ့ၣ်ညါဒၣ်တၢ် တသ့ဘၣ်. ၁၀ ဒီးမ့ၢ်ဒၣ်ထဲတၢ်လၢ အဘၣ်ထွဲလိာ်သးဒီး တၢ်အီၣ်ဒီးတၢ်အီ ဒီးတၢ်မၤကဆှီထီၣ် အလုၢ်အလၢ် အကလုာ်ကလုာ်လီၤ. ဒီးမ့ၢ်ဒၣ် တၢ်သိၣ်တၢ်သီတဖၣ် လၢအဘၣ်ထွဲဒီး နီၢ်ခိတခီ ဒီးပှၤဘၣ်မၤထွဲအီၤ တုၤလၢတၢ်ဆၢကတီၢ်လၢ အဘၣ်တၢ်ပာ်ပနီၣ်အီၤလၢ တၢ်ကမၤဘၣ်ထီၣ်က့ၤတၢ် ဘၣ်ဝဲအခါလီၤ.

၁၁ ဘၣ်ဆၣ် ခရံာ်ဟဲဒ် ပှၤလုၢ်တၢ်ခိၣ် အဒိၣ်ကတၢၢ်တဂၤ ဒ်သိးကဒုးအိၣ်ထီၣ် တၢ်ဂ့ၤလၢ အအိၣ်ဒီးပှၤခဲအံၤ ဒီးအဝဲလဲၤနုာ်လီၤဝဲလၢ ဒဲလၢအဂ့ၤဒိၣ် ဒီးလၢအလၢပှဲၤဒိၣ်ဝဲလီၤ. ဒဲအံၤတမ့ၢ်တၢ်ဘၣ်တ့ လၢဟီၣ်ခိၣ်အံၤဘၣ်. ဒီးတမ့ၢ်လၢ ပှၤဟီၣ်ခိၣ်ဖိတ့အီၤ လၢအစုဘၣ်. ၁၂ အဝဲလဲၤနုာ်လီၤလၢ တၢ်စီဆှံအလီၢ် ဘၣ်ဆၣ် တလဲၤစိာ်မဲာ်တဲးလဲး ဒီးကျီၢ်ဖါဖိတဖၣ် အသွံၣ်ဘၣ်. မ့ၢ်အလဲၤစိာ်ဝဲ အနီၢ်ကစၢ်အသွံၣ် ထဲတဘျီဧိၤ ဒီးမၤပူၤဖျဲးပှၤ လီၤထူလီၤယိာ်န့ၣ်လီၤ. ၁၃ မဲာ်တဲးလဲး ဒီးကျီၢ်ဖါအသွံၣ် ဒီးကျီၢ်မိၢ်အဖၣ်ဆါလၢ အဘၣ်တၢ်ဖှံလီၤအီၤလၢ ပှၤလၢ အတကဆှီဘၣ်တဖၣ်အလိၤန့ၣ် မၤစီဆှံထီၣ် အဝဲသ့ၣ် အဖံးအညၣ်လၢ ယွၤအမဲာ်ညါလီၤ. ၁၄ ဘၣ်ဆၣ် ခရံာ်အသွံၣ်န့ၣ် အလုၢ်ဒိၣ်ပှ့ၤဒိၣ်န့ၢ် အန့ၣ်တက့ၢ်လီၤ. ဒီးခီဖျိ သးစီဆှံလၢ အအိၣ်ဝဲ လီၤထူလီၤယိာ် အတၢ်ဟံးစုနဲၣ်ကျဲအဃိ အဝဲဟ့ၣ်လုၢ်ထီၣ် အနီၢ်ကစၢ်လၢ အတအိၣ်ဒီး တၢ်လီၤတူာ်လီၤကာ်ဘၣ်လၢ ကစၢ်ယွၤအအိၣ်လီၤ. ခရံာ်အသွံၣ်န့ၣ် မၤကဆှီထီၣ် ပသးလၢ အသ့ၣ်ညါဒၣ်တၢ် လၢတၢ်မၤကလီကလီတဖၣ်* ဒ်သိးပကမၤ ကစၢ်ယွၤလၢ အမူဝဲတဂၤ အတၢ်မၤစီဆှံအဂီၢ်လီၤ.

၁၅ အဃိ အဝဲမ့ၢ်ပှၤလၢ အမၤစၢၤတၢ်လၢ ပှၤခံခီအဘၢၣ်စၢၤ လၢအဘၣ်ဃးဒီး တၢ်အၢၣ်လီၤအီလီၤအသီ ဒ်သိးပှၤလၢအဘၣ် တၢ်ကိးအီၤတဖၣ်န့ၣ် ကဒိးန့ၢ်ဘၣ် တၢ်စံးပာ်လၢအမ့ၢ် တၢ်န့ၢ်သါလီၤထူလီၤယိာ်လီၤ. တၢ်ကဲထီၣ်အသးဒ်အံၤ သ့ခီဖျိလၢ အဝဲသံဝဲဒ် တၢ်ပှ့ၤက့ၤအသိး လၢအဝဲသ့ၣ် ကထူၣ်ဖျဲးထီၣ်ကွံာ်လၢ တၢ်ကမၣ်လၢ အမၤဝဲဖဲ အဝဲသ့ၣ်အိၣ်လၢ တၢ်အၢၣ်လီၤအီလီၤ လၢညါတခါ အဖီလာ်လီၤ. ၁၆ ပှၤဟီၣ်ခိၣ်ဖိတဂၤ မ့ၢ်မၤတၢ်အၢၣ်လီၤအီလီၤ ဒီးကစၢ်ယွၤန့ၣ် ပှၤလၢအမၤ တၢ်အၢၣ်လီၤအီလီၤတဂၤန့ၣ် ကဘၣ်သံဝဲ, ၁၇ မ့ၢ်လၢ တၢ်အၢၣ်လီၤအီလီၤန့ၣ် တၢ်ပာ်ဂၢၢ်ပာ်ကျၢၤအီၤ ဖဲပှၤတဂၤသံဝဲအခါန့ၣ်လီၤ. မ့မ့ၢ် ဖဲပှၤဟီၣ်ခိၣ်ဖိတဂၤ လၢအမၤ တၢ်အၢၣ်လီၤအီလီၤ မူဒံးဝဲအဆၢကတီၢ်န့ၣ် တၢ်အၢၣ်လီၤအီလီၤအံၤ တဘၣ် တၢ်ပာ်ဂၢၢ်ပာ်ကျၢၤအီၤဒံးဘၣ်. ၁၈ အဃိ တၢ်သွံၣ် မ့ၢ်တပၣ်ဘၣ်န့ၣ် တၢ်အၢၣ်လီၤအီလီၤ လၢညါတခါစ့ၢ်ကီး တဘၣ် တၢ်ပာ်ဂၢၢ်ပာ်ကျၢၤအီၤဘၣ်. ၁၉ ဖဲစီၤမိၤၡ့ တဲဘၣ်ပှၤခဲလၢာ်လၢ တၢ်မၤလိာ်ကိးခါဒဲးလၢ တၢ်သိၣ်တၢ်သီအပူၤ ဝံၤဒီးအဝဲဟံးန့ၢ် ကျီၢ်ဖါဖိ ဒီးမဲာ်တဲးလဲးတဖၣ် အသွံၣ်ဃုာ်ဒီး ထံ, သိအဆူၣ်ဂီၤ, ဒီးသ့ၣ်ကဖျီၣ်အ့စိး ဒီးဖှံလီၤဝဲလၢ လံာ်ထူဒီးပှၤဂီၢ်မုၢ်ခဲလၢာ်အလိၤ ၂၀ ဒီးတဲဝဲလၢ “အဝဲအံၤ မ့ၢ်တၢ်အၢၣ်လီၤအီလီၤ အသွံၣ်လၢ ကစၢ်ယွၤမၤလိာ်သုလၢ သုကဘၣ် မၤလၢပှဲၤအီၤန့ၣ်လီၤ.” ၂၁ ဒ်န့ၣ်အသိး အဝဲဖှံလီၤဝဲ တၢ်သွံၣ်လၢ ဒဲစီဆှံ ဒီးတၢ်ဖိတၢ်လံၤခဲလၢာ် လၢအဘၣ်တၢ်သူအီၤလၢ တၢ်မၤစီဆှံအဂီၢ်န့ၣ် အလိၤလီၤ. ၂၂ မ့ၢ်လီၤ, ဒ်စီၤမိၤၡ့ အတၢ်သိၣ်တၢ်သီ အိၣ်ဝဲအသိး တၢ်ခဲလၢာ်ဃၣ်ဃၣ်န့ၣ် ကဆှီထီၣ်ဝဲသ့ ခီဖျိလၢတၢ်သွံၣ်လီၤ. တၢ်မ့ၢ်တလူလီၤ တၢ်သွံၣ်ဘၣ်န့ၣ် တၢ်ပျၢ်ကွံာ်တၢ်ဒဲးဘး တသ့ဘၣ်.

၂၃ အဃိ တၢ်အဒိတဖၣ် လၢအပာ်ဖျါထီၣ် တၢ်အိၣ်လၢမူခိၣ်န့ၣ် ဘၣ်တၢ်မၤကဆှီထီၣ်အီၤ ခီဖျိလၢ ဆၣ်ဖိကီၢ်ဖိ အတၢ်လုၢ်တၢ်ပာ်တဖၣ်လီၤ. မ့မ့ၢ် တၢ်လၢ အဘၣ်ဃးဒီးမူခိၣ်န့ၣ် လိၣ်ဘၣ်တၢ်လုၢ်တၢ်ပာ် လၢအဂ့ၤန့ၢ်အန့ၣ် စၢၢ်တလၢၢ်လီၤ. ၂၄ ခရံာ်တလဲၤနုာ်လီၤဘၣ်လၢ တၢ်စီဆှံအလီၢ်လၢ ပှၤတ့ထီၣ်လၢပှၤစု, လၢအမ့ၢ် တၢ်အဒိလၢ တၢ်နီၢ်ကီၢ်တခါအဂီၢ်ဘၣ်, မ့မ့ၢ် အလဲၤနုာ်ဝဲလၢမူခိၣ် ဒ်သိးအကအိၣ်ဖျါထီၣ်လၢ ကစၢ်ယွၤအမဲာ်ညါ လၢပဂီၢ်လီၤ. ၂၅ ဘၣ်ဆၣ် အဝဲတလိၣ်ဟ့ၣ်လုၢ်ထီၣ်အသး အါဘျီဒ် ပှၤလုၢ်တၢ်ခိၣ် အဒိၣ်ကတၢၢ်လၢ အဟံးန့ၢ် ဆၣ်ဖိကီၢ်ဖိအသွံၣ် ဒီးလဲၤနုာ်လီၤဝဲလၢ တၢ်စီဆှံအလီၢ် တနံၣ်ဘၣ်တနံၣ် အသိးန့ၣ်ဘၣ်. ၂၆ မ့တမ့ၢ်ဘၣ်န့ၣ် စးထီၣ်ဖဲတချုး ပှၤဟီၣ်ခိၣ်ဖိ အိၣ်ဖျဲၣ်ထီၣ်လၢ ဟီၣ်ခိၣ်ချၢဒံးဘၣ် လံၤလံၤန့ၣ်* အဝဲကဘၣ်တူၢ်တၢ် ခဲအံၤခဲအံၤလီၤ. ဘၣ်ဆၣ် ခဲအံၤ ဖဲတၢ်အစိၤလၢ အလီၢ်ခံကတၢၢ်အံၤန့ၣ် အဝဲပာ်ဖျါထီၣ်အသး ထဲတဘျီဧိၤ ဒ်သိးအကမၤလီၤမၢ်ကွံာ် တၢ်ဒဲးဘး ခီဖျိလၢ အတၢ်ဟ့ၣ်လုၢ်ထီၣ်အသးလီၤ. ၂၇ ဒီးတၢ်ပာ်ပှၤဟီၣ်ခိၣ်ဖိလၢ အကသံဝဲထဲတဘျီဧိၤ ဒီးလၢခံ ကဒိးန့ၢ်ဘၣ်တၢ်စံၣ်ညီၣ်လီၤ. ၂၈ ဒ်န့ၣ်အသိး တၢ်ဟ့ၣ်လုၢ်ထီၣ်ခရံာ် ထဲတဘျီဧိၤ ဒ်သိးကဟံးထီၣ်ကွံာ် ပှၤအါဂၤအတၢ်ဒဲးဘးအဂီၢ်လီၤ. ဒီးဖဲအဝဲအိၣ်ဖျါထီၣ် ခံဘျီတဘျီန့ၣ် တမ့ၢ်လၢ အကမၤဘၣ်ဃးအသးဒီး တၢ်ဒဲးဘးဘၣ်. ဒီးပှၤလၢအခိးကွၢ်လၢ်အီၤလၢ တၢ်သးဆူၣ်အပူၤ ဒ်သိးကန့ၢ်ဘၣ် တၢ်အုၣ်က့ၤခီၣ်က့ၤအဂီၢ်န့ၣ် ကထံၣ်အီၤလီၤ.