လီၣ်ဖျါ
၁ အဝဲအံၤ မ့ၢ်ယ့ၣ်ၡူးခရံာ် အတၢ်လီၣ်ဖျါလၢ ကစၢ်ယွၤဟ့ၣ်လီၤအီၤ ဒ်သိး ကဒုးနဲၣ်အကုၢ်တဖၣ်လၢ တယံာ်တမီၢ် တၢ်လၢ အကဘၣ်မၤအသးန့ၣ်လီၤ. ဒီးအဝဲဆှၢလီၤ အမူခိၣ်ကလူးဆူ အကုၢ်စီၤယိၤဟၣ်အအိၣ် ဒ်သိးကပာ်ဖျါထီၣ်န့ၢ်အီၤ တၢ်လၢအကမၤအသးတဖၣ်အံၤ ခီဖျိလၢ တၢ်ပနီၣ်တဖၣ်လီၤ. ၂ ဒီးစီၤယိၤဟၣ်အုၣ်အသး ဘၣ်ဃးဒီး ကစၢ်ယွၤအကလုၢ်ကထါ ဒီးယ့ၣ်ၡူးခရံာ် အတၢ်အုၣ်အသး လၢအမ့ၢ် တၢ်ခဲလၢာ်လၢ အထံၣ်ဘၣ်ဝဲ အဂ့ၢ်အကျိၤလီၤ. ၃ မ့ၢ်လၢ တၢ်ဆၢကတီၢ်လၢ အဘၣ်တၢ်ပာ်ပနီၣ်အီၤန့ၣ် ဘူးထီၣ်လံအဃိ ပှၤလၢအဖးဝဲ တၢ်ကတိၤတဖၣ်လၢ ဝံအတၢ်စံးပာ်အံၤအပူၤလၢ အကလုၢ်ဖးဒိၣ် ဒီးပှၤလၢအနၢ်ဟူ ဒီးမၤထွဲဝဲ ဝံအတၢ်စံးပာ်အံၤ အတၢ်ကွဲးအသးတဖၣ်န့ၣ် ကသးခုဝဲလီၤ.
၄ ယၤ, စီၤယိၤဟၣ် ယကွဲးလံာ်အံၤဆူ တၢ်အိၣ်ဖှိၣ်နွံဖျၢၣ်လၢ အအိၣ်လၢ အၤစံကီၢ်ရ့ၣ်အပူၤလီၤ.
မ်သုဒိးန့ၢ်ဘၣ် တၢ်သးကညီၤဒိၣ်ဒိၣ်မုၢ်မုၢ် ဒီးတၢ်ဃူတၢ်ဖိးလၢ “ပှၤလၢအအိၣ်ဝဲ, လၢအအိၣ်ပာ်စၢၤဝဲ, လၢအကဟဲဝဲတဂၤ” အအိၣ် ဒီးလၢသးနွံဖျၢၣ်လၢ အအိၣ်လၢ အလီၢ်ပစိာ်အမဲာ်ညါန့ၣ် အအိၣ် ၅ ဒီးလၢ ယ့ၣ်ၡူးခရံာ်အအိၣ်တက့ၢ်. အဝဲမ့ၢ် “ပှၤအုၣ်အသးလၢ အသးတီတဂၤ,” “ပှၤလၢအဂဲၤဆၢထၢၣ်က့ၤလၢ တၢ်သံ အပှၤဝဲၢ်ကိ” ဒီး “ဟီၣ်ခိၣ်အစီၤပၤတဖၣ် အခိၣ်တဂၤ” လီၤ.
အဝဲအဲၣ်ပှၤဒီး မၤထူၣ်ဖျဲးထီၣ်ကွံာ်ပှၤလၢ ပတၢ်ဒဲးဘး ခီဖျိလၢ အနီၢ်ကစၢ်အသွံၣ် ၆ ဒီးအဝဲဒုးကဲထီၣ်ပှၤလၢ ဘီမုၢ်ဒီးအပၢ်ကစၢ်ယွၤ အပှၤလုၢ်တၢ်ဒိၣ်တဖၣ်လီၤ. မ်တၢ်လၤကပီၤ ဒီးတၢ်ဂံၢ်တၢ်ဘါ အိၣ်ဒီးအီၤ လီၤထူလီၤယိာ်တက့ၢ်. အၤမ့ၣ်.
၇ ကွၢ်မီၤ, အဝဲကဟဲဒီးတၢ်အၢၣ်တဖၣ် ဒီးပှၤအမဲာ်ခဲလၢာ် ကထံၣ်အီၤ ဒီးပှၤလၢအဆဲးအီၤ ကထံၣ်အီၤ စ့ၢ်ကီးလီၤ. ပှၤကလုာ်ဒူၣ်ခဲလၢာ်လၢ အအိၣ်လၢ ဟီၣ်ခိၣ်ချၢန့ၣ် ကဒဲလီၤအသးနါပှၢ် လၢတၢ်သူၣ်အုးသးအုးအပူၤ လၢအဝဲအဃိလီၤ. မ့ၢ်လံ, အၤမ့ၣ်.
၈ ယဟိဝၤယွၤ တဲဝဲလၢ “ယမ့ၢ် ကဒီးဧ,* ဒီးပှၤလၢအအိၣ်ဝဲ, လၢအအိၣ်ပာ်စၢၤဝဲ, လၢအကဟဲဝဲတဂၤ ဒီးသ့တၢ်လၢာ်ကစၢ်လီၤ.”
၉ ယၤ, စီၤယိၤဟၣ် လၢအမ့ၢ် သုဒီပုၢ်ဝဲၢ်ခွါလၢ အတူၢ်ဃုာ်တၢ်ဒီးသုလၢ တၢ်နးတၢ်ဖှီၣ်အပူၤ ဒီးလၢတၢ်တူၢ်န့ၢ်ခီၣ်ကဲအပူၤ ဒီးလၢအကန့ၢ်ဃုာ် ဘီမုၢ်ဒီးသု ဒ်ယ့ၣ်ၡူးအပျဲၢ်အသိးလီၤ. မ့ၢ်လၢယတဲတၢ် ဘၣ်ဃးဒီး ကစၢ်ယွၤအဂ့ၢ် ဒီးအုၣ်ယသးလၢ ယ့ၣ်ၡူးအဂ့ၢ်အဃိ ယအိၣ်ဘၣ်လၢ ကီးတဖျၢၣ်လၢ အဘၣ်တၢ်ကိးအီၤလၢ ပးမူးလီၤ. ၁၀ ခီဖျိ သးစီဆှံအဃိ တၢ်ဆှၢယၤဆူ ကစၢ်အမုၢ်နံၤအတီၢ်ပူၤ ဒီးယနၢ်ဟူ တၢ်ကလုၢ်ဖးဒိၣ်လၢ ယလီၢ်ခံလၢ အသီၣ်လီၤဂာ် ဒ်ကွဲၤသီၣ်ဝဲအသိး ၁၁ ဒီးတဲဝဲလၢ “တၢ်လၢနထံၣ်အီၤန့ၣ် ကွဲးလီၤအီၤလၢ လံာ်ထူအပူၤ ဒီးဆှၢအီၤဆူ တၢ်အိၣ်ဖှိၣ်နွံဖျၢၣ်လၢ အအိၣ်လၢ ဝ့ၢ်အ့းဖ့းစူး, ဝ့ၢ်စမူရနၤ, ဝ့ၢ်ပ့ၢ်ကမူး, ဝ့ၢ်သူၤအတံရၤ, ဝ့ၢ်စၢ်ဒံ, ဝ့ၢ်ဖံၤလဒ့းလဖံ ဒီးဝ့ၢ်လီၤဒံၤကံန့ၣ်တက့ၢ်.”
၁၂ ဒီးဒ်သိးယကထံၣ်လၢ မ့ၢ်မတၤတဂၤ တဲတၢ်ဒီးယၤလဲၣ်အဂီၢ် ယဃၣ်ဃီၤယသးလီၤ. ဒီးဖဲယဃၣ်ဃီၤယသးအခါ ယထံၣ်ဘၣ် မ့ၣ်အူဒၢထူနွံဖျၢၣ် ၁၃ ဒီးလၢမ့ၣ်အူဒၢတဖၣ်အကျါန့ၣ် ပှၤအိၣ်ဝဲတဂၤ လၢအလီၤဂာ်ဒီး ပှၤကညီဖိခွါလီၤ. အဝဲသိးဝဲဆ့ဖးထီတဘ့ၣ်လၢ အတုၤလီၤလၢ အခီၣ်လၣ် ဒီးသိးဝဲ ယီၢ်တကိးထူလၢ အသးနါပှၢ်လီၤ. ၁၄ တကးဒံးဘၣ် အခိၣ် ဒီးအခိၣ်ဆူၣ်န့ၣ် ဝါဝဲဒ်သိအဆူၣ် လၢအဝါ ဒီးဝါဝဲဒ် မူခိၣ်ဖီအသိးလီၤ. ဒီးအမဲာ်ချံန့ၣ်လီၤဂာ်ဒ် မ့ၣ်အူလၣ်အသိးလီၤ. ၁၅ ဒီးအခီၣ်လၣ်န့ၣ် လီၤဂာ်ဒ် တိၢ်ဘီလၢအဂ့ၤလၢ အကပီၤထီၣ်ဝဲ ဖဲအဘၣ်တၢ်ပှံၢ်အီၤဒီး မ့ၣ်အူအခါ ဒီးအကလုၢ်န့ၣ် လီၤဂာ်ဒ် ထံအါအါဂီၢ်ဂီၢ် သီၣ်ဝဲအသိးန့ၣ်လီၤ. ၁၆ ဒီးဆၣ်နွံဖျၢၣ် အိၣ်လၢအစုထွဲအပူၤ ဒီးနးဖးထီတဘ့ၣ်လၢ အကနၣ်အိၣ်ဝဲခံကပၤ ဒီးအကနၣ်အ့ၣ်ဂ့ၤဂ့ၤန့ၣ် ဟဲဖျိးထီၣ်လၢ အကိာ်ပူၤလီၤ. ဒီးအမဲာ်သၣ်န့ၣ် မၤအသးဒ်မုၢ် ဖဲအကပီၤထီၣ် အဆူၣ်ကတၢၢ် အခါန့ၣ်လီၤ. ၁၇ ဖဲယထံၣ်ဘၣ်အီၤအခါ ယလီၤဃံၢ် လၢအခီၣ်ထံး ဒ်ပှၤသံတဂၤအသိးလီၤ.
ဒီးအဝဲပာ်လီၤ အစုထွဲလၢယလိၤ ဒီးတဲဝဲလၢ “ပျံၤတၢ်တဂ့ၤ. ယမ့ၢ်တၢ်အဆိကတၢၢ် ဒီးတၢ်အလီၢ်ခံကတၢၢ် ၁၈ ဒီးပှၤလၢ အမူဝဲတဂၤလီၤ. ယသံတ့ၢ် ဘၣ်ဆၣ် ကွၢ်မီၤ, ခဲအံၤယမူလံ ဒီးယကမူ အစိၤစိၤဃၣ်ဃၣ် လီၤထူလီၤယိာ်လီၤ. ဒီးယအိၣ်ဒီး တၢ်သံဒီးတၢ်သွၣ်ခိၣ် အသီးခွဲးတဖၣ်လီၤ. ၁၉ အဃိ ကွဲးလီၤတၢ်လၢ နထံၣ်တ့ၢ်အီၤတဖၣ် ဒီးတၢ်လၢအအိၣ်ဝဲတဖၣ် ဒီးတၢ်လၢအကမၤအသး လၢခံတဖၣ်န့ၣ်တက့ၢ်. ၂၀ မ့မ့ၢ် ဆၣ်နွံဖျၢၣ်လၢ နထံၣ်လၢ ယစုထွဲအပူၤ ဒီးမ့ၣ်အူဒၢထူနွံဖျၢၣ်န့ၣ် မ့ၢ်ဝဲ တၢ်ခူသူၣ်စီဆှံလီၤ. ဆၣ်နွံဖျၢၣ် အခီပညီမ့ၢ်ဝဲ တၢ်အိၣ်ဖှိၣ်နွံဖျၢၣ် အကလူးတဖၣ် ဒီးမ့ၣ်အူဒၢနွံဖျၢၣ်န့ၣ် အခီပညီမ့ၢ်ဝဲ တၢ်အိၣ်ဖှိၣ်နွံဖျၢၣ်န့ၣ်လီၤ.