၂ ၡမူၤအ့လး
၂ လၢခံ စီၤဒၤဝံး သံကွၢ် ယဟိဝၤယွၤလၢ+ “ယဘၣ်လဲၤလၢ ယူဒၤအဝ့ၢ်တဖၣ် တဖျၢၣ်ဖျၢၣ်ဧါ.” ယဟိဝၤယွၤ တဲဆၢက့ၤအီၤလၢ “လဲၤ.” ဝံၤဒီးစီၤဒၤဝံး သံကွၢ်ဝဲလၢ “ယဘၣ်လဲၤလၢ ဝ့ၢ်ဖဲလဲၣ်တဖျၢၣ်လဲၣ်.” ကစၢ်ယွၤ တဲဆၢက့ၤလၢ “လၢဝ့ၢ်ဃ့ဘြိၣ်.”+ ၂ အဃိ စီၤဒၤဝံး လဲၤထီၣ်ဝဲဖဲန့ၣ်ဒီး အမါခံဂၤ လၢအမ့ၢ် နီၢ်အဃံနိၣ်+ လၢအဟဲလၢ ဝ့ၢ်ယံးစရ့လး ဒီးပှၤကၢ်မ့ၤလးဖိ နီၢ်အဘံၤကါယံးလး+ လၢအမ့ၢ်တ့ၢ် စီၤနၤဘလး အမါန့ၣ်လီၤ. ၃ ဒီးစီၤဒၤဝံး လဲၤကိးဃုာ်ဝဲ အပှၤလၢအအိၣ်ဒီးအီၤတဖၣ်+ ဃုာ်ဒီး အဝဲသ့ၣ်တဂၤစုာ်စုာ် အဟံၣ်ဖိဃီဖိလီၤ. ဒီးအဝဲသ့ၣ် အိၣ်ဝဲဆိးဝဲလၢ ဝ့ၢ်ဃ့ဘြိၣ် ဒီးဝ့ၢ်လၢအအိၣ်လၢ အခိၣ်အဃၢၤတဖၣ်န့ၣ်လီၤ. ၄ ဒီးပှၤပိာ်ခွါတဖၣ်လၢ ယူဒၤအဒူၣ်ကျါန့ၣ် ဟဲဝဲဒီး ဖဲန့ၣ်အဝဲသ့ၣ် ဒိးဖှူစီၤဒၤဝံး လၢစီၤပၤ လၢယူဒၤ အဒူၣ်အဖီခိၣ်လီၤ.+
ပှၤတဲဘၣ် စီၤဒၤဝံးလၢ “ပှၤပိာ်ခွါတဖၣ်လၢ ဝ့ၢ်ယၤဘ့ၣ်ကံးလဧးန့ၣ် မ့ၢ်ပှၤလၢ အခူၣ်လီၤကွံာ်ဝဲ စီၤစီလူးလီၤ.” ၅ အဃိ စီၤဒၤဝံး ဆှၢလီၤ ပှၤစိာ်တၢ်ကစီၣ်ဖိတဖၣ် ဒ်သိးကတဲဘၣ်ဝဲ ပှၤပိာ်ခွါလၢ ဝ့ၢ်ယၤဘ့ၣ် လၢကံးလဧးဟီၣ်ကဝီၤအပူၤလၢ “သုပာ်ဖျါထီၣ် တၢ်အဲၣ်လၢအတီလၢ သုကစၢ် စီၤစီလူးအဖီခိၣ် ခီဖျိ သုခူၣ်လီၤကွံာ်အီၤအဃိ မ်ယဟိဝၤယွၤ ဆိၣ်ဂ့ၤသုတက့ၢ်.+ ၆ ဒီးမ်ယဟိဝၤယွၤ ပာ်ဖျါထီၣ်တၢ်အဲၣ်လၢအတီ ဒီးတၢ်သးတီလၢ သုဖီခိၣ်တက့ၢ်. ဒီးမ့ၢ်လၢသုမၤဒ်န့ၣ်အဃိ ယၤစ့ၢ်ကီး ယကပာ်ဖျါထီၣ် တၢ်သးကညီၤလၢ သုဖီခိၣ်လီၤ.+ ၇ သုကစၢ် စီၤစီလူး သံလံ သနာ်က့ ယူဒၤအဒူၣ် ဒိးဖှူယၤ ဒ်စီၤပၤတဂၤအသိး လၢအဝဲသ့ၣ်အဖီခိၣ်လံ. အဃိ ခဲအံၤ ပာ်ဆူၣ်ထီၣ်သုသး ဒီးအိၣ်ဒီးတၢ်သးဒူတက့ၢ်.”
၈ စီၤစီလူး အသုးခိၣ်ကျၢၢ် စီၤအဘံန့ၢ်+ လၢအမ့ၢ် စီၤန့ၢ်အဖိခွါန့ၣ် လဲၤကိးဝဲ စီၤစီလူး အဖိခွါ စီၤအံၤၡဘိၡ့း+ ဒီးလဲၤခီဂာ်ဝဲ ထံကျိ ဒီးလဲၤဝဲဆူ မၤဃန့ၤလီၤ.+ ၉ ဒီးအဝဲပာ်ထီၣ်အီၤလၢ စီၤပၤလၢ ကံးလဧးအဟီၣ်ကဝီၤ,+ ပှၤအၤၡူၢ်ဖိ, ယံးစရ့လး,+ ပှၤအ့ဖရဲၣ်ဖိ,+ ပှၤဘံၣ်ယၤမံၣ်ဖိ ဒီးလၢအံၣ်စရ့လးခဲလၢာ် အဖီခိၣ်လီၤ. ၁၀ ဖဲစီၤစီလူး အဖိခွါ စီၤအံၤၡဘိၡ့း ကဲထီၣ်အံၣ်စရ့လးအစီၤပၤအခါ အဝဲအိၣ်အနံၣ် ၄၀ လီၤ. ဒီးအဝဲပၢဘၣ်တၢ် ခံနံၣ်လီၤ. မ့မ့ၢ် ယူဒၤအဒူၣ်န့ၣ် ဆီၣ်ထွဲဝဲ စီၤဒၤဝံးလီၤ.+ ၁၁ စီၤဒၤဝံး ကဲဝဲ ယူဒၤအဒူၣ် အစီၤပၤ လၢဝ့ၢ်ဃ့ဘြိၣ်အပူၤ အိၣ်ဝဲ နွံနံၣ် ဒီးဃုလါလီၤ.+
၁၂ ဒီးလၢခံ စီၤန့ၢ်အဖိခွါ စီၤအဘံန့ၢ် ဒီးစီၤစီလူးအဖိခွါ စီၤအံၤၡဘိၡ့း အခ့အပှၤတဖၣ်လၢ အအိၣ်လၢမၤဃန့ၤန့ၣ်+ လဲၤဝဲလၢ ဝ့ၢ်ကံးဘိၣ်လီၤ.+ ၁၃ ဒီးနီၢ်စရူယၤ+ အဖိခွါ စီၤယိၤအာ်+ ဃုာ်ဒီးစီၤဒၤဝံး အခ့အပှၤတဖၣ်စ့ၢ်ကီး လဲၤထီၣ်ဝဲ ဒီးထံၣ်လိာ်အသးဒီး အဝဲသ့ၣ်လၢ ဝ့ၢ်ကံးဘိၣ် ကမါအကပၤလီၤ. အဃိ အဝဲသ့ၣ်တဒူၣ်န့ၣ် ဆ့ၣ်နီၤဝဲလၢ ကမါအကပၤ လၢအံၤတခီ ဒီးလၢအဝဲတဒူၣ်န့ၣ် ဆ့ၣ်နီၤဝဲလၢ အဝဲတခီလီၤ. ၁၄ လၢခံ စီၤအဘံန့ၢ် တဲဘၣ် စီၤယိၤအာ်လၢ “မ်ပိာ်ခွါသးစၢ်တဖၣ် ဆၢထၢၣ်ဒီး ဒုးပြၢလိာ်အသးလၢ တၢ်မဲာ်ညါတက့ၢ်.” ဒီးစီၤယိၤအာ် တဲဝဲဒၣ် “ဂ့ၤလံ, ပကမၢအဝဲသ့ၣ်ပြၢသၢၤ.” ၁၅ ဒီးအဝဲသ့ၣ်လဲၤထီၣ်ဝဲ အနီၢ်ဂံၢ်ပှဲၤသိးသိးလီၤ. လၢစီၤစီလူး အဖိခွါ စီၤအံၤၡဘိၡ့း အအိၣ်တခီန့ၣ် ပှၤဘံၣ်ယၤမံၣ်ဖိ ၁၂ ဂၤ လဲၤထီၣ်ဝဲ ဒီးလၢအဝဲတခီန့ၣ် စီၤဒၤဝံးအခ့အပှၤ ၁၂ ဂၤလဲၤထီၣ်ဝဲလီၤ. ၁၆ ဒီးအဝဲသ့ၣ်တဂၤဒီးတဂၤ ဖ့ၣ်ထုးလိာ်သး ခိၣ်သၣ်ဃံ ဒီးအဝဲသ့ၣ်တဂၤစုာ်စုာ် ဆဲးဝဲအဒုၣ်အဒါ အကပၤလၢနး ဒီးအဝဲသ့ၣ်ခဲလၢာ် လီၤဃံၢ်သံဝဲဒ်သိးသိးလီၤ. အဃိ တၢ်လီၢ်အဝဲန့ၣ် ပှၤကိးအီၤလၢ ဃ့လကးဟစူရံၣ် ဒီးအအိၣ်ဝဲလၢ ဝ့ၢ်ကံးဘိၣ်အပူၤန့ၣ်လီၤ.
၁၇ ဖဲတၢ်တနံၤန့ၣ် တၢ်ဒုးကဲထီၣ်ဝဲ ဖးဆူၣ်ညါ ဒီးစီၤဒၤဝံး အခ့အပှၤတဖၣ် မၤနၢၤကွံာ်ဝဲ စီၤအဘံန့ၢ်ဒီး အံၣ်စရ့လး အသုးဖိန့ၣ်လီၤ. ၁၈ ဒီးနီၢ်စရူယၤ+ အဖိခွါသၢဂၤ လၢအမ့ၢ် စီၤယိၤအာ်,+ စီၤအဘံၡဲၤ+ ဒီးစီၤဧစၤအ့လး+ အိၣ်ဝဲဖဲန့ၣ်လီၤ. ဒီးစီၤဧစၤအ့လးန့ၣ် ဃ့ၢ်ဝဲချ့ထဲသိးဒီး တၤဟိလၢ ပျီပူၤလီၤ. ၁၉ စီၤဧစၤအ့လး လူၤဝဲ စီၤအဘံန့ၢ် ဒီးတပတုာ်ဝဲဘၣ်. ၂၀ ဖဲစီၤအဘံန့ၢ် ကွၢ်လီၤအလီၢ်ခံအခါ အဝဲသံကွၢ်ဝဲလၢ “နကဲ စီၤဧစၤအ့လးဧါ.” ဒီးစီၤဧစၤအ့လး တဲဆၢအီၤလၢ “မ့ၢ်, ယၤလီၤ.” ၂၁ ဒီးစီၤအဘံန့ၢ် တဲအီၤလၢ “လူၤယၤလၢၤတဂ့ၤ, လူၤဖီၣ် ပှၤသးစၢ်တဂၤဂၤ ဒီးဟံးန့ၢ်တၢ်လၢ အအိၣ်ဒီးအီၤတဖၣ်တက့ၢ်.” ဘၣ်ဆၣ် စီၤဧစၤအ့လး ဆဲးလူၤအီၤဒံးလီၤ. ၂၂ အဃိ စီၤအဘံန့ၢ် တဲကဒီး စီၤဧစၤအ့လးလၢ “လူၤယၤလၢၤတဂ့ၤ. နမ့ၢ်လူၤယၤဒံးန့ၣ် ယကမၤသံဘၣ်ဖုးနၤ. ယမ့ၢ်မၤသံဘၣ်နၤန့ၣ် ယကွၢ်နဒီပုၢ်ဝဲၢ်ခွါ စီၤယိၤအာ် အမဲာ်ကဘူၣ်ဒ်လဲၣ်.” ၂၃ ဘၣ်ဆၣ် စီၤဧစၤအ့လး တပတုာ်ဝဲဘၣ်. အဃိ စီၤအဘံန့ၢ် ဆဲးအဟၢဖၢလၢ ဘီအခံ+ ဒီးဘီဖျိထီၣ်ဝဲလၢ အချၢဃံတကပၤ ဒီးအဝဲလီၤဃံၢ်သံဝဲ ဖဲန့ၣ်လီၤ. ပှၤတဂၤဂ့ၤ တဂၤဂ့ၤလၢ အလဲၤတုၤဖဲ တၢ်လီၢ်လၢ စီၤဧစၤအ့လး လီၤဃံၢ်သံဝဲန့ၣ် အဝဲသ့ၣ် အိၣ်ပတုာ်ဝဲ တစိၢ်ဖိလီၤ.
၂၄ ဝံၤဒီးစီၤယိၤအာ် ဒီးစီၤအဘံၡဲၤ လဲၤလူၤစီၤအဘံန့ၢ်လီၤ. ဖဲမုၢ်ကလီၤနုာ်အခါ အဝဲသ့ၣ်လဲၤတုၤဝဲလၢ အးမၤ အတၢ်လူၢ်ခိၣ်လီၤ. ဒီးတၢ်လူၢ်န့ၣ် အမဲာ်ကွၢ်ဃီၤတၢ်ဆူ ကံၤဃး ဖဲပှၤလဲၤကျဲဆူ ဝ့ၢ်ကံးဘိၣ် အပှၢ်မုၢ်ကနၢန့ၣ်လီၤ. ၂၅ ဒီးဖဲန့ၣ်န့ၣ် ပှၤဘံၣ်ယၤမံၣ်ဖိ ပာ်ဖှိၣ်ထီၣ်အသးဒီး စီၤအဘံန့ၢ် ဒ်ပှၤတဒူၣ်ဃီအသိးလီၤ. ဒီးအဝဲသ့ၣ် ဆၢထၢၣ်ဝဲလၢ တၢ်လူၢ်တလူၢ် အခိၣ်ဒီလီၤ. ၂၆ ဒီးစီၤအဘံန့ၢ် ကိးထီၣ်ဝဲလၢ စီၤယိၤအာ် အအိၣ်လၢ “ပမၤသံလိာ်သး ကဒဲကဒဲဒ်အံၤ တကတၢၢ်နီတဘျီလၢၤဧီၤ. လၢခံကတၢၢ်န့ၣ် အကကဲထီၣ် ထဲတၢ်လၢ အတမုာ်ဘၣ်န့ၣ် နတသ့ၣ်ညါဧီၤ. နကမၢပှၤတဖၣ် ပတုာ်လူၤအဒီပုၢ်ဝဲၢ်တဖၣ် ဆံးယံာ်လဲၣ်.” ၂၇ ဒီးစီၤယိၤအာ် တဲဝဲလၢ “ယအၢၣ်လီၤလၢ ယွၤလၢအမ့ၢ်အတီတဂၤ အမဲာ်ညါလၢ နမ့ၢ်တတဲဆိဒ်န့ၣ်ဘၣ်န့ၣ် အဝဲသ့ၣ်ကဆဲးလူၤဝဲ အဒီပုၢ်ဝဲၢ်တုၤလၢ မုၢ်ဝါထီၣ်လီၤ.” ၂၈ ဒီးစီၤယိၤအာ် အူထီၣ်ကွဲၤ ဒီးအပှၤတဖၣ်န့ၣ် တလူၤပှၤအံၣ်စရ့လးဖိလၢၤဘၣ် ဒီးတၢ်ဒုးပတုာ်ဝဲလီၤ.
၂၉ စီၤအဘံန့ၢ် ဒီးအပှၤတဖၣ် ဟးဝဲလၢ ဧၤရဘၤ+ ဒီတနၤကျၢၤ ဒီးခီဂာ်ဝဲ ထံကျိယၢ်ဒ့ၣ် ဒီးခီဂာ်ဝဲ တၢ်တြီၤ ဝံၤဒီးလဲၤတုၤဝဲလၢ မၤဃန့ၤလီၤ.+ ၃၀ ဖဲစီၤယိၤအာ် လူၤဝဲ စီၤအဘံန့ၢ် ဝံၤဟဲက့ၤဝဲအခါ အဝဲကိးဖှိၣ် အပှၤခဲလၢာ်လီၤ. ဒီးအထံၣ်ဘၣ်ဝဲလၢ စီၤဧစၤအ့လး ဒီးစီၤဒၤဝံး အခ့အပှၤ ၁၉ ဂၤ လီၤမၢ်ဝဲလီၤ. ၃၁ ဘၣ်ဆၣ် စီၤဒၤဝံး အခ့အပှၤတဖၣ် မၤနၢၤဝဲ ပှၤဘံၣ်ယၤမံၣ်ဖိ ဒီးစီၤအဘံန့ၢ် အပှၤလီၤ. ဒီးအဝဲသ့ၣ်အပှၤန့ၣ် သံဝဲ အဂၤ ၃၆၀ လီၤ. ၃၂ ဒီးစီၤဒၤဝံး အခ့အပှၤတဖၣ် ဟံးန့ၢ် စီၤဧစၤအ့လးအစိၣ်+ ဒီးခူၣ်လီၤကွံာ်အီၤလၢ အပၢ်အတၢ်သွၣ်ခိၣ် လၢအအိၣ်လၢ ဘ့ၤသလ့ဃ့ၣ်န့ၣ်လီၤ.+ ဝံၤဒီးစီၤယိၤအာ် ဒီးအပှၤတဖၣ် ဟးဝဲဒီတနၤကျၢၤ ဒီးဖဲမုၢ်ဝါထီၣ် ကယီကယီအခါ အဝဲသ့ၣ် တုၤဝဲလၢ ဝ့ၢ်ဃ့ဘြိၣ်လီၤ.+