ပှၤအမံၤလၢလံာ်စီဆှံပူၤ ဘၣ်တၢ်ဃုထံၣ်န့ၢ်အီၤလၢ ကတံၤလၢပျၢၤအလိၤ

ဖဲ ၂၀၁၂ နံၣ်န့ၣ် ပှၤဃုသ့ၣ်ညါတၢ်ဖိတၢ်လံၤလၢပျၢၤတဖၣ် ဃုထံၣ်န့ၢ်ဝဲ ကတံၤအက့တဖၣ် လၢအအိၣ်ယံာ်ဝဲအနံၣ် ၃,၀၀၀ လံန့ၣ်လီၤ. ပှၤဃုသ့ၣ်ညါတၢ်ဖိတၢ်လံၤလၢပျၢၤတဖၣ်အံၤ သးခုဝဲဒိၣ်မးလီၤ. ဘၣ်မနုၤအဃိလဲၣ်. တမ့ၢ်လၢ အဝဲသ့ၣ်ဃုထံၣ်န့ၢ်ဝဲ ကတံၤအက့တဖၣ်အဃိဘၣ်. မ့ၢ်လၢအဝဲသ့ၣ် ထံၣ်ဘၣ်ဝဲ လံာ်မဲာ်ဖျၢၣ်လၢ အအိၣ်ကွဲးအသးလၢ ကတံၤအက့တဖၣ် အလိၤအဃိန့ၣ်လီၤ.

ဒီးဖဲပှၤဃုသ့ၣ်ညါတၢ်ဖိတၢ်လံၤလၢပျၢၤတဖၣ် ထီထီၣ်က့ၤဝဲ တၢ်အက့တဖၣ်အံၤခဲလၢာ်အခါ အဝဲသ့ၣ်ဖးဝဲ လံာ်မဲာ်ဖျၢၣ်လၢ အအိၣ်လၢ ကတံၤတဖျၢၣ်အံၤအလိၤန့ၣ်သ့ဝဲလီၤ. လံာ်မဲာ်ဖျၢၣ်အံၤ ဘၣ်တၢ်ကွဲးအီၤလၢ ပှၤကနၤဧၣ်အကျိာ်လီၤ. လံာ်မဲာ်ဖျၢၣ်အံၤန့ၣ်တဲဝဲ– “အ့ၡဘဧၤလး ဘဲၤဘံဒၤ” ဒီးအခီပညီမ့ၢ်ဝဲ “အ့ၡဘဧၤလး, ဘံဒၤ အဖိခွါ” န့ၣ်လီၤ. ပှၤဃုသ့ၣ်ညါတၢ်ဖိတၢ်လံၤလၢပျၢၤတဖၣ် ဃုထံၣ်န့ၢ်ဝဲ မံၤတဖျၢၣ်အံၤလၢ ကတံၤအက့တဖၣ်အလိၤ အဆိကတၢၢ်တဘျီလီၤ.

ဒီးလၢလံာ်စီဆှံအပူၤန့ၣ် ပှၤအမံၤလၢ စီၤအ့ၡဘဧၤလး အိၣ်ဝဲစ့ၢ်ကီးလီၤ. အဝဲမ့ၢ်ဝဲ စီၤပၤစီၤစီလူးအဖိခွါတဂၤလီၤ. (၁ ကွဲးနီၣ်တၢ် ၈:၃၃; ၉:၃၉) ဖၠၣ်စိမိၤသရၣ်ဒိၣ်စိ ယိစဲၤ ကါဖံၤခိၤ လၢအမ့ၢ် ပှၤလၢအပၣ်ဃုာ်လၢ ပှၤလၢဃုထံၣ်န့ၢ် ကတံၤအက့ၤတဖၣ်အံၤအကျါတဂၤန့ၣ် စံးဝဲလၢ “လီၤကမၢကမၣ်ဒိၣ်မးလၢ မံၤလၢအမ့ၢ် အ့ၡဘဧၤလးန့ၣ် အိၣ်လၢ လံာ်စီဆှံအပူၤ ဒီးခဲအံၤ မံၤတဖျၢၣ်အံၤ ဘၣ်တၢ်ထံၣ်န့ၢ်အီၤလၢ တၢ်ဖိတၢ်လံၤလၢပျၢၤတဖၣ်အလိၤစ့ၢ်ကီးလီၤ. ဒီးမံၤတဖျၢၣ်အံၤ အိၣ်လၢတၢ်ဖိတၢ်လံၤလၢပျၢၤလၢ အဟဲလၢစီၤဒၤဝံးပၢတၢ်အစိၤန့ၣ်လီၤ.” တၢ်ဂ့ၢ်အဝဲအံၤ ပာ်ဖျါထီၣ်ကဒီးဝဲလၢ တၢ်ဂ့ၢ်လၢ ပှၤဃုထံၣ်န့ၢ်အီၤလၢ တၢ်ဖိတၢ်လံၤလၢပျၢၤတဖၣ်အလိၤန့ၣ် လီၤပလိာ်လိာ်သးဒီး တၢ်ဂ့ၢ်လၢ လံာ်စီဆှံအပူၤန့ၣ်လီၤ.

လၢလံာ်စီဆှံအပူၤ စီၤစီလူးအဖိခွါ အ့ၡဘဧၤလးန့ၣ် ဘၣ်တၢ်ကိးအီၤလၢ စီၤအံၤၡဘိၡ့း စ့ၢ်ကီးလီၤ. (၂ ၡမူၤအ့လး ၂:၁၀) ဘၣ်မနုၤအဃိ မံၤလၢအမ့ၢ် “ဘဧၤလး” န့ၣ် ဘၣ်တၢ်ကိးက့ၤအီၤလၢ “ဘိၡ့း” လဲၣ်. ပှၤလၢအဃုသ့ၣ်ညါတၢ်တဖၣ် တဲနၢ်ပၢၢ်ပှၤလၢ ဘၣ်သ့ၣ်သ့ၣ် ပှၤလၢအကွဲး ၂ ၡမူၤအ့လး န့ၣ် အဝဲတအဲၣ်ဒိးကွဲးလီၤမံၤလၢအမ့ၢ် အ့ၡဘဧၤလး မ့ၢ်လၢကဒုးသ့ၣ်နီၣ်ထီၣ်က့ၤ ပှၤအံၣ်စရ့လးဖိ ဘၣ်ဃးဒီး ကလံၤမုၢ်အယွၤဘဧၤလးလၢ ပှၤကနၤဧၣ်ဖိ ဘူၣ်ထီၣ်ဘါထီၣ်ဝဲန့ၣ်အဃိလီၤ. ဘၣ်ဆၣ်လၢ ၁ ကွဲးနီၣ်တၢ် အပူၤန့ၣ် အိၣ်ဒီးမံၤလၢအမ့ၢ် အ့ၡဘဧၤလးန့ၣ်လီၤ.