အံၣ်စရ့လးအစီၤပၤ အဆိကတၢၢ်တဂၤ

ယဟိဝၤယွၤ ဃုထၢထီၣ်​ စံၣ်ညီၣ်ကွီၢ်တဖၣ်​ ဒ်သိး ကကဲခိၣ်ကဲနၢ်လၢ ပှၤအံၣ်စရ့လးဖိတဖၣ်​ အဖီခိၣ်. ဘၣ်ဆၣ်​ ပှၤအံၣ်စရ့လးဖိတဖၣ်​ လီကီဝဲ စီၤပၤတဂၤ. အဝဲသ့ၣ်​ တဲဘၣ်စီၤၡမူၤအ့လးလၢ ‘ကယဲၢ်ထံကီၢ်လၢ အအိၣ်ဝးတရံးပှၤန့ၣ်​ အဝဲသ့ၣ်​ အိၣ်ဒီးအစီၤပၤ. ပအဲၣ်ဒိးအိၣ်ဒီး စီၤပၤတဂၤမီၤ.’ စီၤၡမူၤအ့လး သ့ၣ်ညါဝဲလၢ ပှၤအံၣ်စရ့လးဖိတဖၣ်​ ဃ့ထီၣ်ဝဲစီၤပၤန့ၣ်​ မ့ၢ်တၢ်လၢ အကမၣ်ဝဲအဃိ အဝဲဃ့ဘါထုကဖၣ်တၢ်လၢ ယဟိဝၤယွၤအအိၣ်. ဒီးယဟိဝၤယွၤ တဲဘၣ်စီၤၡမူၤအ့လးလၢ ‘ပှၤဂီၢ်မုၢ်တဖၣ်န့ၣ်​ တပာ်တ့ၢ်ကွံာ်နၤဘၣ်​ မ့ၢ်အဝဲသ့ၣ်​ ပာ်တ့ၢ်ကွံာ်ယၤ. ဒီးတဲဘၣ်​ ပှၤအံၣ်စရ့လးဖိတဖၣ်လၢ အဝဲသ့ၣ်​ ကဒိးန့ၢ်ဘၣ်ဝဲ စီၤပၤတဂၤ, ဘၣ်ဆၣ်​ စီၤပၤကဃ့တၢ်လၢ အဝဲသ့ၣ်အအိၣ်​ အါမး.’ ပှၤဂီၢ်မုၢ်တဖၣ်​ တဲဆၢက့ၤဝဲလၢ ‘တဘၣ်နီတမံၤဘၣ်. ပအဲၣ်ဒိးအိၣ်ဒီး စီၤပၤတဂၤ.’

ယဟိဝၤယွၤ တဲဘၣ်စီၤၡမူၤအ့လးလၢ ပိာ်ခွါတဂၤလၢ အမံၤမ့ၢ် စီၤစီလူးန့ၣ်​ ကကဲထီၣ်ဘၣ်ဝဲ ပှၤအံၣ်စရ့လးဖိတဖၣ်​ အစီၤပၤ အဆိကတၢၢ်တဂၤ. ဖဲစီၤစီလူး လဲၤအိၣ်သကိး စီၤၡမူၤအ့လးလၢ ဝ့ၢ်ရၤမါအခါ စီၤၡမူၤအ့လး ဖှူဝဲစီၤစီလူး အခိၣ်လၢသိ ဒ်သိး အဝဲကကဲထီၣ်​ စီၤပၤအဂီၢ်.

လၢခံန့ၣ်​ စီၤၡမူၤအ့လး ကိးဖှိၣ်ဝဲ ပှၤအံၣ်စရ့လးဖိတဖၣ်​ ဒ်သိး ကဒုးနဲၣ်အဝဲသ့ၣ်​ လၢမတၤတဂၤ ကမ့ၢ်စီၤပၤလဲၣ်. ဘၣ်ဆၣ်​ ပှၤဃုစီၤစီလူး တဘၣ်နီတပူၤဘၣ်. ဘၣ်မနုၤအဃိလဲၣ်န့ၣ်​ မ့ၢ်နသ့ၣ်ညါဧါ. မ့ၢ်လၢ စီၤစီလူးအိၣ်ခူသူၣ်လၢ တၢ်ဘံၣ်တၢ်ဘိၣ်အကျါ. ဒီးဖဲအဝဲသ့ၣ်​ ထံၣ်စီၤစီလူးအခါ ပှၤမၢစီၤစီလူး ဂဲၤဆၢထၢၣ်လၢ ပှၤဂီၢ်မုၢ်တဖၣ်​ အခၢၣ်သး. ဖဲစီၤစီလူး ဂဲၤဆၢထၢၣ်အခါ အနီၢ်ထီန့ၢ်ဒံး ပှၤကိးဂၤဒဲး ဒီးဒိၣ်တၢ်ဂ့ၤဒိၣ်မး. ဒီးစီၤၡမူၤအ့လး တဲဝဲလၢ ‘ပှၤတဂၤအံၤ မ့ၢ်ပှၤလၢ ယဟိဝၤယွၤ ဃုထၢထီၣ်အီၤ.’ ပှၤဂီၢ်မုၢ်တဖၣ်​ ကိးပသူထီၣ်ဝဲလၢ ‘မ်စီၤပၤ အိၣ်မူဘၣ်ဖးယံာ်တက့ၢ်.’

ဖဲစီၤစီလူး ကဲထီၣ်စီၤပၤ သီသီအခါ အဝဲဒိကနၣ်​ စီၤၡမူၤအ့လး ဒီးယဟိဝၤယွၤအကလုၢ်. ဘၣ်ဆၣ်​ လၢခံန့ၣ်​ စီၤစီလူး အတၢ်ပာ်သူၣ်ပာ်သး ဆီတလဲဝဲ. အဒိ တၢ်လၢစီၤပၤန့ၣ်​ တအိၣ်ဒီး တၢ်ခွဲးတၢ်ယာ်လၢ ကလုၢ်ထီၣ်တၢ်ဘၣ်. ဘၣ်တဘျီန့ၣ်​ စီၤၡမူၤအ့လး မၢစီၤစီလူး အိၣ်ခိးအီၤ ဘၣ်ဆၣ်​ စီၤၡမူၤအ့လး ဟဲဝဲတတုၤ တဘျီဃီဘၣ်. အဃိ စီၤစီလူး လုၢ်ထီၣ်တၢ်လၢ အနီၢ်ကစၢ်. စီၤၡမူၤအ့လးထံၣ်ဝဲ စီၤစီလူးဒ်လဲၣ်. စီၤၡမူၤအ့လး တဲဘၣ်စီၤစီလူးလၢ ‘ဘၣ်မနုၤအဃိ နတဒိကနၣ်​ ယဟိဝၤယွၤ အကလုၢ်လဲၣ်.’ စီၤစီလူး မၤကမၣ်တၢ် ဝံၤအလီၢ်ခံ မ့ၢ်အဝဲဟံးန့ၢ် တၢ်မၤလိစ့ၢ်ကီးဧါ.

လၢခံန့ၣ်​ ဖဲစီၤစီလူး လဲၤဒုးဝဲ ပှၤဧမၤလ့းဖိအခါ စီၤၡမူၤအ့လး တဲဘၣ်စီၤစီလူးလၢ နကဘၣ်မၤသံ အဝဲသ့ၣ်ခဲလၢာ်. ဘၣ်ဆၣ်​ စီၤစီလူးတမၤသံဝဲ စီၤပၤအၤကးဘၣ်. အဃိ ယဟိဝၤယွၤ တဲဘၣ်​ စီၤၡမူၤအ့လးလၢ ‘စီၤစီလူး ပာ်တ့ၢ်ကွံာ်ယၤလံ. ဒီးအဝဲ တဒိကနၣ်​ ယကလုၢ်ဘၣ်.’ စီၤၡမူၤအ့လး သးအုးဝဲဒိၣ်မး ဒီးတဲဘၣ်စီၤစီလူးလၢ ‘ခီဖျိလၢ နတဒိကနၣ်​ ယဟိဝၤယွၤ အကလုၢ်လၢၤဘၣ်​ အဃိ ကစၢ်ယွၤ ကဃုထၢထီၣ်​ စီၤပၤလၢ အသီတဂၤ.’ ဖဲစီၤၡမူၤအ့လး ဃၣ်တရံးအသး ဒ်သိး ကက့ၤဝဲအခါ စီၤစီလူးဖ့ၣ်ထုးဝဲ အဆ့ကၤခီၣ်ထံး တုၤလၢအညာ်ကွံာ်ဝဲ. ဝံၤဒီး စီၤၡမူၤအ့လး တဲဘၣ်စီၤစီလူးလၢ ‘ယဟိဝၤယွၤ ဖှီညာ်ကွံာ် ဘီမုၢ်လၢနအိၣ်လံ. ဒီးယဟိဝၤယွၤ ကဟ့ၣ်လီၤက့ၤ ဘီမုၢ်အံၤလၢ ပှၤလၢအအဲၣ်ယဟိဝၤယွၤ ဒီးဒိကနၣ်​ အကလုၢ်.’