၅ မိၤၡ့
၁ အဝဲအံၤ မ့ၢ်ဝဲ တၢ်ကတိၤတဖၣ်လၢ စီၤမိၤၡ့တဲဘၣ် ပှၤအံၣ်စရ့လးဖိ ခဲလၢာ် လၢအအိၣ်လၢ ယၢ်ဒ့ၣ် အဟီၣ်ကဝီၤ လၢပှၢ်မုၢ်ကနၢ အပူၤလီၤ. တၢ်လီၢ်အံၤ အိၣ်ဖဲတၢ်ပၢၤခိၣ်လၢ အအိၣ်လၢ စူးအမဲာ်ညါ ဘူးဒီးပၤရၣ်, တိဖလး, လၤဘၣ်, ဃစ့ရိၤ ဒီးဒံစၤဟးလီၤ. ၂ ပှၤမ့ၢ်အိၣ်လၢ ဃိၤရ့း ဒီးလဲၤဆူ ကၤဒ့ၣ်ဘၢ်န့+ လၢကစၢၢ်စ့ဧၢ် အကျဲန့ၣ် ကယံာ်ဝဲ ၁၁ သီကျဲလီၤ. ၃ ဖဲအနံၣ် ၄၀ နံၣ်တနံၣ်,+ လါ ၁၁ လါ, လါထီၣ်တသီန့ၣ် စီၤမိၤၡ့ တဲဘၣ် ပှၤအံၣ်စရ့လးဖိတဖၣ်လၢ တၢ်ခဲလၢာ်လၢ ယဟိဝၤယွၤ မၢအတဲဘၣ် အဝဲသ့ၣ်န့ၣ်လီၤ. ၄ စီၤမိၤၡ့မၤဝဲဒ်န့ၣ် ဖဲအဝဲမၤနၢၤဝဲ ပှၤအမိၢ်ဖိ အစီၤပၤ စံဃိၣ်+ ဒီးဘၤၡၣ် အစီၤပၤဧိာ်+ ဖဲဝ့ၢ်အ့ဒြံၤ+ ဝံၤအလီၢ်ခံန့ၣ်လီၤ. စီၤပၤစံဃိၣ် အိၣ်ဟဲလၢ ဝ့ၢ်ဃ့ၡဘိၣ် ဒီးစီၤပၤဧိာ် အိၣ်ဟဲလၢ ဝ့ၢ်ဧၤၡတြိးလီၤ. ၅ လၢယၢ်ဒ့ၣ် အဟီၣ်ကဝီၤ လၢအအိၣ်လၢ ကီၢ်မိၤအး အပူၤန့ၣ် စီၤမိၤၡ့ တဲဖျါထီၣ်ဝဲ တၢ်သိၣ်တၢ်သီလီၤ.+ အဝဲတဲဝဲလၢ
၆ “ဖဲပအိၣ်လၢ ဃိၤရ့းအခါ ပကစၢ် ယဟိဝၤယွၤ တဲပှၤလၢ ‘သုအိၣ်လၢ ကစၢၢ်ကလိအံၤအကျါ ယံာ်လံအဃိ+ ၇ ဃၣ်သုသး ဒီးလဲၤဆူ ပှၤအမိၢ်ဖိ အကစၢၢ်ကလိကျါ+ ဒီးလဲၤဆူ တၢ်လီၢ်တဖၣ် လၢအဘူးဒီးအီၤ လၢအမ့ၢ် ဧၤရဘၤ,+ ဟီၣ်ကဝီၤလၢ ကစၢၢ်ကလိကျါ, ၡ့ဖလၣ်, နဲကဲၤ, ပီၣ်လဲၣ်နံၤ,+ ပှၤကနၤဧၣ်ဖိအကီၢ် ဒီးတုၤလီၤလၢ လဘၤနိၣ်ဒီး+ ထံကျိဖးဒိၣ် ဖရၤသးန့ၣ်တက့ၢ်.+ ၈ ယပာ်လီၤ ကီၢ်တဘ့ၣ်အံၤ လၢသုမဲာ်ညါလီၤ. ယၤ ယဟိဝၤယွၤ အၢၣ်လီၤ သုဖုဖးဒိၣ်တဖၣ် လၢအမ့ၢ် စီၤအၤဘြၤဟၣ်, စီၤအံၤစဲး+ ဒီးစီၤယၤကိာ်လၢ+ ယကဟ့ၣ်လီၤ အဝဲသ့ၣ် ဒီးအဝဲသ့ၣ် အစၢၤအသွဲၣ်တဖၣ်လၢ ကီၢ်တဘ့ၣ်အံၤ အဃိ လဲၤနုာ်လီၤ မၤန့ၢ်အီၤတက့ၢ်.’+
၉ “ဖဲန့ၣ်အဆၢကတီၢ် ယတဲဘၣ် သုလၢ ‘ယယိးသု ထဲတဂၤ တန့ၢ်ဘၣ်.+ ၁၀ မ့ၢ်လၢ ယဟိဝၤယွၤ မၤအါထီၣ် သုနီၣ်ဂံၢ်အဃိ ခဲအံၤ သုအိၣ်အါ ထဲသိးဒီး ဆၣ်တဖၣ် လၢမူခိၣ်အသိးလီၤ.+ ၁၁ မ်သုမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤ မၤအါထီၣ်သု+ အစးတကထိ ဒီးဆိၣ်ဂ့ၤသု ဒ်အအၢၣ်လီၤပာ်စၢၤသု အသိးန့ၣ်တက့ၢ်.+ ၁၂ သုတၢ်ဝံတၢ်ယိးတဖၣ် ဒီးသုတၢ်ကီတၢ်ခဲတဖၣ် ဒီးသုတၢ်အ့ၣ်လိာ်ဆိးက့တဖၣ်န့ၣ် အါတလၢအဃိ ယယိးအီၤလၢ ယနီၢ်ကစၢ် ကသ့ဒ်လဲၣ်.+ ၁၃ ဃုထၢထီၣ် ပှၤပိာ်ခွါတဖၣ်လၢ သုဒူၣ်တဖၣ်အကျါ လၢအမ့ၢ် ပှၤကူၣ်တၢ်သ့ လၢအသူၣ်ဆးသးဆး ဒီးလၢအတၢ်လဲၤခီဖျိ အိၣ်အါတဖၣ် ဒီးပာ်ထီၣ် အဝဲသ့ၣ်လၢ သုခိၣ်သုနၢ်တက့ၢ်.’+ ၁၄ ဒီးသုတဲဆၢယၤလၢ ‘တၢ်လၢ နတဲပှၤန့ၣ် ဂ့ၤလီၤ.’ ၁၅ အဃိ ယကိးန့ၢ် သုခိၣ်သုနၢ်လၢ သုဒူၣ်တဖၣ်အကျါ လၢအမ့ၢ် ပှၤကူၣ်တၢ်သ့လၢ အတၢ်လဲၤခီဖျိ အိၣ်အါတဖၣ် ဒီးယပာ်ထီၣ် အဝဲသ့ၣ်လၢ သုဖီခိၣ် ဒ်ပှၤတကထိအခိၣ်, ပှၤတကယၤအခိၣ်, ပှၤယဲၢ်ဆံအခိၣ်, ပှၤအဂၤတဆံအခိၣ် ဒီးပဒိၣ်တဖၣ်လၢ သုဒူၣ်တဖၣ်အကျါလီၤ.+
၁၆ “ဖဲန့ၣ်အဆၢကတီၢ် ယမၤလိာ် သုစံၣ်ညီၣ်ကွီၢ်တဖၣ်လၢ ‘တၢ်ဂ့ၢ်ကီမ့ၢ်အိၣ်ထီၣ်လၢ ပှၤအံၣ်စရ့လးဖိကဒဲကဒဲ အဘၢၣ်စၢၤမ့ၢ်ဂ့ၤ လၢပှၤအံၣ်စရ့လးဖိတဂၤ ဒီးပှၤထံဂၤကီၢ်ဂၤဖိလၢ အဟဲအိၣ်လၢသုကျါတဂၤ+ အဘၢၣ်စၢၤမ့ၢ်ဂ့ၤ ဖဲအဝဲသ့ၣ် ဟဲလၢသုအိၣ်အခါ သုကဘၣ် စံၣ်ညီၣ်န့ၢ် အဝဲသ့ၣ် တီတီလိၤလိၤလီၤ.+ ၁၇ ဖဲသုစံၣ်ညီၣ်တၢ်အခါ သုတဘၣ် ကွၢ်ဒိၣ်ဆံးအါစှၤတၢ်ဘၣ်.+ သုကဘၣ် ဒိကနၣ်န့ၢ် ပှၤလၢအဆံးတဂၤ ဒ်သုဒိကနၣ်န့ၢ် ပှၤလၢ အဒိၣ်တဂၤအသိးလီၤ.+ မ့ၢ်လၢ သုစံၣ်ညီၣ်န့ၢ်တၢ်လၢ ကစၢ်ယွၤအဂီၢ်အဃိ+ သုတဘၣ်ပျံၤ ပှၤကညီဘၣ်.+ ဘၣ်ဆၣ် တၢ်ဂ့ၢ်တခါခါ မ့ၢ်ကီတလၢလၢ သုဂီၢ်န့ၣ် သုကဘၣ်ပာ်ဖျါထီၣ် တၢ်ဂ့ၢ်လၢယအိၣ် ဒီးယက ကနၣ်အီၤလီၤ.’+ ၁၈ ဖဲန့ၣ်အဆၢကတီၢ် ယမၤလိာ်သု ဘၣ်ဃးဒီး တၢ်ခဲလၢာ်လၢ သုကဘၣ်မၤအီၤန့ၣ်လီၤ.
၁၉ “ဝံၤဒီး ပဟးထီၣ်လၢ ဃိၤရ့း ဒီးဒ်ပကစၢ် ယဟိဝၤယွၤ မၤလိာ်ပှၤအသိး ပလဲၤခီဂာ် ပှၢ်မုၢ်ကနၢ ဖးဒိၣ်လၢ အလီၤပျံၤလီၤဖုးလၢ+ သုထံၣ်ဘၣ်အီၤ ဖဲသုလဲၤလၢကျဲဆူ ပှၤအမိၢ်ဖိ အကစၢၢ်ကလိကျါလီၤ.+ ဒီးလၢခံ ပလဲၤတုၤလၢ ကၤဒ့ၣ်ဘၢ်န့လီၤ.+ ၂၀ ဖဲန့ၣ် ယတဲသုလၢ ‘သုဟဲတုၤလၢ ပှၤအမိၢ်ဖိ အကစၢၢ်ကလိကျါလၢ ပကစၢ် ယဟိဝၤယွၤ ကဟ့ၣ်လီၤပှၤလီၤ. ၂၁ ကွၢ်မီၤ, သုကစၢ် ယဟိဝၤယွၤ ဟ့ၣ်လီၤထံကီၢ်လၢ သုအိၣ်လီၤ. လဲၤထီၣ်မၤန့ၢ်အီၤ ဒ်သုမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤ မၢသုအသိး န့ၣ်တက့ၢ်.+ သုတဘၣ် ပျံၤတၢ်ဖုးတၢ်ဘၣ်.’
၂၂ “ဒီးသုဝဲခဲလၢာ် သုဟဲလၢယအိၣ် ဒီးသုတဲလၢ ‘ပျဲပဆှၢလီၤဆိ ပှၤပိာ်ခွါတဖၣ် လၢကလဲၤကွၢ်န့ၢ်ပှၤ ကီၢ်တဘ့ၣ်န့ၣ်တက့ၢ်. ဒီးအဝဲသ့ၣ် ကဟဲက့ၤတဲဘၣ်ပှၤလၢ ပကဘၣ်လဲၤလၢ ကျဲမနုၤလဲၣ် ဒီးဝ့ၢ်တဖၣ်လၢ ပကလဲၤနုာ်လီၤလၢ အပူၤန့ၣ် မၤသးဒ်လဲၣ် န့ၣ်တက့ၢ်.’+ ၂၃ ဒီးတၢ်ဟ့ၣ်ကူၣ်အဝဲန့ၣ် ဂ့ၤဘၣ်ယၤအဃိ ယဃုထၢထီၣ် ပှၤပိာ်ခွါ ၁၂ ဂၤ လၢပှၤတဒူၣ် စုာ်စုာ်အကျါ တဒူၣ်တဂၤ တဒူၣ်တဂၤလီၤ.+ ၂၄ အဝဲသ့ၣ် လဲၤထီၣ်ဝဲလၢ ကစၢၢ်ကလိအကျါ+ ဒီးလဲၤတုၤလၢ အ့ၡကိၤလး အတၢ်တြီၤ ဒီးလဲၤကွၢ်ဟုၣ်တၢ်လီၤ. ၂၅ အဝဲသ့ၣ် ဟံးန့ၢ်ဝဲ ကီၢ်တဘ့ၣ်န့ၣ် အတၤသူတၤသၣ် တနီၤ ဒီးဟဲက့ၤစိာ်ဝဲလၢ ပအိၣ်ဒီးအဝဲသ့ၣ် တဲဘၣ်ပှၤလၢ ‘ကီၢ်တဘ့ၣ်လၢ ပကစၢ် ယဟိဝၤယွၤ ကဟ့ၣ်လီၤပှၤန့ၣ် ဂ့ၤဝဲလီၤ.’+ ၂၆ ဘၣ်ဆၣ် သုတလဲၤထီၣ်ဘၣ် ဒီးသုထီဒါက့ၤ သုကစၢ် ယဟိဝၤယွၤ အတၢ်မၤလိာ်လီၤ.+ ၂၇ သုဆဲးကဒူးကဒ့ၣ်တၢ် လၢသုဒဲအပူၤ ဒီးသုတဲလၢ ‘မ့ၢ်လၢ ယဟိဝၤယွၤ သးဟ့ပှၤအဃိ အဝဲထုးထီၣ်ပှၤလၢ ကီၢ်အဲၤကူပတူး အပူၤ ဒ်သိး ကဟ့ၣ်လီၤပှၤလၢ ပှၤအမိၢ်ဖိ အစုပူၤ ဒီးကမၤဟးဂီၤပှၤ အဂီၢ်လီၤ. ၂၈ ပကဘၣ်လဲၤလၢ တၢ်လီၢ်မနုၤတခါလဲၣ်. ပဒီပုၢ်ဝဲၢ်တဖၣ် မၤလီၤစၢ်ပသး+ ခီဖျိတဲဝဲလၢ “ပှၤတဖၣ်န့ၣ် မ့ၢ်ပှၤလၢ အဒိၣ်န့ၢ်ထီန့ၢ်ပှၤ ဒီးအဝဲသ့ၣ် အဝ့ၢ်တဖၣ်န့ၣ် ဒိၣ်ဝဲ ဒီးအဒူၣ် လၢအကျၢၤတဖၣ်န့ၣ် ထီတုၤလၢမူခိၣ်ညါ.+ ဒီးပထံၣ်ဘၣ် ပှၤဧနးဖိတဖၣ်+ ဖဲန့ၣ်လီၤ.”’
၂၉ “အဃိ ယတဲသုလၢ ‘တဘၣ်ပျံၤတၢ် လၢအဝဲသ့ၣ် အဃိ တဂ့ၤ.+ ၃၀ သုကစၢ် ယဟိဝၤယွၤ ကလဲၤတၢ်လၢ သုမဲာ်ညါ ဒီးကဒုးတၢ် လၢသုဂီၢ်+ ဒ်အမၤဝဲလၢ ကီၢ်အဲၤကူပတူးအပူၤ လၢသုမဲာ်ညါ အသိးလီၤ.+ ၃၁ ဖဲသုလဲၤတၢ်လီၢ် ကိးတီၤဒဲး လၢပှၢ်မုၢ်ကနၢအပူၤ တုၤလီၤလၢ သုဟဲတုၤလၢ တၢ်လီၢ်ဖဲအံၤန့ၣ် သုထံၣ်ဘၣ်လၢ သုကစၢ် ယဟိဝၤယွၤ စိာ်သု ဒ်ပိာ်ခွါတဂၤ စိာ်ဝဲ အဖိခွါအသိးလီၤ.’ ၃၂ တၢ်မၤအသးဒ်န့ၣ် သနာ်က့ သုတနာ် သုကစၢ် ယဟိဝၤယွၤဘၣ်.+ ၃၃ လၢကျဲန့ၣ် အဝဲ လဲၤဆိဝဲလၢ သုမဲာ်ညါ ဒ်သိး ကဃုကွၢ် တၢ်လီၢ်လၢ သုကဆီလီၤ ဒဲကဝီၤ အဂီၢ်လီၤ. ဒ်သိး ကဒုးနဲၣ်သု ကျဲလၢ သုကဘၣ် လဲၤဝဲအဂီၢ် အဝဲ လီၣ်ဖျါထီၣ်အသး ခီဖျိလၢ မ့ၣ်အူ လၢမုၢ်နၤခီ ဒီးခီဖျိ တၢ်အၢၣ် လၢမုၢ်ဆါခီလီၤ.+
၃၄ “ဒီးယဟိဝၤယွၤ နၢ်ဟူ တၢ်လၢသုတဲတဖၣ်အဃိ အဝဲ သးဒိၣ်ထီၣ်တၢ် ဒီးအၢၣ်လီၤဝဲလၢ+ ၃၅ ‘သုဝဲ ပှၤအၢပှၤသီ တစိၤအံၤန့ၣ် သုတဘၣ် ထံၣ်ဘၣ် ကီၢ်လၢအဂ့ၤတဘ့ၣ် လၢယအၢၣ်လီၤလၢ ယကဟ့ၣ်လီၤ သုပၢ်တဖၣ်န့ၣ် နီတဂၤဘၣ်.+ ၃၆ ထဲဒၣ် စီၤယဖူန့ၤ အဖိခွါ စီၤကၤလ့းန့ၣ် ကထံၣ်ဘၣ်ဝဲလီၤ. မ့ၢ်လၢအဝဲ ဒိကနၣ် ယၤ, ယဟိဝၤယွၤ အကလုၢ်လၢ အသးဒီဖျၢၣ်အဃိ ယကဟ့ၣ်အီၤ ဒီးအစၢၤအသွဲၣ်တဖၣ်လၢ ကီၢ်လၢ အလဲၤတုၤဝဲတဘ့ၣ်န့ၣ်လီၤ.+ ၃၇ (လၢသုဃိန့ၣ် ယဟိဝၤယွၤ သးဒိၣ်ထီၣ်ယၤ စ့ၢ်ကီးလီၤ. ဒီးတဲဝဲလၢ “နၤစ့ၢ်ကီး နတလဲၤနုာ်လီၤဘၣ် ဖဲန့ၣ်ဘၣ်.+ ၃၈ စီၤနိၣ် အဖိခွါ စီၤယိၤၡူ လၢအဆၢထၢၣ်လၢ နမဲာ်ညါန့ၣ်+ မ့ၢ်ပှၤတဂၤလၢ အကလဲၤနုာ်လီၤလၢ ကီၢ်တဘ့ၣ်န့ၣ် အပူၤလီၤ.+ မ့ၢ်လၢအဝဲ ကတီခိၣ်ရိၤမဲ ပှၤအံၣ်စရ့လးဖိတဖၣ် ဒ်သိး ကန့ၢ်သါဘၣ် ကီၢ်တဘ့ၣ်န့ၣ် အဃိ ဒုးဆူၣ်ထီၣ် အဂံၢ်အဘါ*+ တက့ၢ်.”) ၃၉ ဒီးသုဖိလၢ သုတဲလၢ အကဘၣ် တၢ်ဂုာ်န့ၢ်ဆူၣ်အီၤ+ ဒီးသုဖိခွါတဖၣ်လၢ အတသ့ၣ်ညါ တၢ်ဂ့ၤဒီးတၢ်အၢ ဒံးဘၣ်န့ၣ် အဝဲသ့ၣ် ကလဲၤနုာ်လီၤဘၣ်ဝဲ လၢကီၢ်ပူၤ ဒီးယကဟ့ၣ် အဝဲသ့ၣ် လၢကီၢ်လီၤ.+ ၄၀ မ့မ့ၢ်သုန့ၣ် ဃၣ်ကဒါက့ၤသုသး ဒီးက့ၤကဒါက့ၤ လၢပှၢ်မုၢ်ကနၢ လၢပီၣ်လဲၣ်ဂီၤ အကျဲတက့ၢ်.’+
၄၁ “ဖဲန့ၣ်န့ၣ် သုတဲယၤလၢ ‘ပမၤကမၣ်ဘၣ် ယဟိဝၤယွၤလံ. ခဲအံၤန့ၣ် ပကလဲၤထီၣ် ဒုးတၢ် ဒ်ပကစၢ် ယဟိဝၤယွၤ မၤလိာ်ပှၤ အသိးလီၤ.’ အဃိ သုဝဲတဂၤစုာ်စုာ် သုဖီၣ်ထီၣ် သုတၢ်စုကဝဲၤ လၢတၢ်ဒုးအဂီၢ် ဒီးသုဆိကမိၣ်လၢ သုကလဲၤထီၣ် ကစၢၢ် ဒီးမၤနၢၤတၢ် ညီညီဖိလီၤ.+ ၄၂ ဘၣ်ဆၣ် ယဟိဝၤယွၤ တဲယၤလၢ ‘တဲအဝဲသ့ၣ်လၢ “မ့ၢ်လၢ ယတအိၣ်ဒီးသုဘၣ် အဃိ သုတဘၣ် လဲၤထီၣ်ဒုးတၢ်ဘၣ်.+ သုမ့ၢ်လဲၤန့ၣ် သုဒုၣ်သုဒါ ကမၤနၢၤသုလီၤ.”’ ၄၃ ဒီးယတဲသု ဘၣ်ဆၣ် သုတဒိကနၣ်ယၤဘၣ်. လၢတၢ်န့ၣ်အလီၢ် သုထီဒါ ယဟိဝၤယွၤ အတၢ်မၤလိာ် ဒီးလၢတၢ်ပာ်ထီၣ်ထီသး အပူၤန့ၣ် သုဂုာ်ကျဲးစၢး လဲၤထီၣ်လၢ ကစၢၢ်လိၤလီၤ. ၄၄ အဃိ ပှၤအမိၢ်ဖိ လၢအအိၣ်လၢ ကစၢၢ်ခိၣ်န့ၣ် ဟဲလီၤသဂၢၢ်သု ဒီးလူၤသုဒ် ကနဲအသိး ဒီးမၤလီၤပြံလီၤပြါသု လၢစ့ဧၢ် တုၤလၢ ဃိၢ်မါလီၤ. ၄၅ အဃိ သုဟဲက့ၤ ဟီၣ်လၢ ယဟိဝၤယွၤ အမဲာ်ညါ ဘၣ်ဆၣ် ယဟိဝၤယွၤ တကနၣ်ဃုာ်သုဘၣ်. ၄၆ လၢတၢ်န့ၣ်အဃိ သုဘၣ်အိၣ်လၢ ကၤဒ့ၣ်အပူၤ အါနံၤအါသီလီၤ.
၂ “ဒီးပဃၣ်ပသး ဒီးပလဲၤဆူ ပှၢ်မုၢ်ကနၢ လၢပီၣ်လဲၣ်ဂီၤအကျဲ ဒ်ယဟိဝၤယွၤ တဲယၤ အသိးလီၤ.+ ပလဲၤတၢ် အါနံၤအါသီ လၢကစၢၢ်စ့ဧၢ် အကပိာ်ကပၤလီၤ. ၂ လၢခံ ယဟိဝၤယွၤ တဲယၤလၢ ၃ ‘သုဟးတရံး ကစၢၢ်အံၤ ယံာ်လံ. အဃိ ဃၣ်သုခိၣ်လၢ ကလံၤစိးတခီ တက့ၢ်. ၄ ဒီးမၤလိာ် ပှၤဂီၢ်မုၢ်တဖၣ်လၢ “စီၤဧ့ၡီၤ အစၢၤအသွဲၣ် လၢအမ့ၢ် သုဒီပုၢ်ဝဲၢ်တဖၣ်န့ၣ်+ အိၣ်ဝဲလၢ ကီၢ်စ့ဧၢ်လီၤ.+ သုကလဲၤတၢ်လၢ အဝဲသ့ၣ် အကီၢ်ဆၢ ဒီးအဝဲသ့ၣ် ကပျံၤသု+ ဘၣ်ဆၣ် သုကဘၣ် ပလီၢ်သုသးဒိၣ်မးလီၤ. ၅ မ့ၢ်လၢ ယဟ့ၣ်လီၤ စီၤဧ့ၡီၤလၢ ကစၢၢ်စ့ဧၢ် ဒ်အတၢ်အသိးအဃိ ယတဟ့ၣ်လီၤသုလၢ အဝဲသ့ၣ် အဟီၣ်ကဝီၤ နီတစဲးဘၣ်, ထဲခီၣ်လီၢ်တကဝီၤ အဂီၢ်ဒၣ်လဲာ် ယတဟ့ၣ်သုဘၣ် အဃိ သုတဘၣ်ဒုး အဝဲသ့ၣ်ဘၣ်.+ ၆ တၢ်အီၣ်လၢ သုကအီၣ်အီၤန့ၣ် သုကဘၣ် ပှ့ၤအီၤလၢစ့ လၢအဝဲသ့ၣ် အအိၣ် ဒီးထံလၢ သုကအီအီၤန့ၣ် သုကဘၣ်ဟ့ၣ်အပှ့ၤ+ ၇ မ့ၢ်လၢ သုကစၢ် ယဟိဝၤယွၤ ယၤအံၤ ယဆိၣ်ဂ့ၤလံ ကယဲၢ်တၢ်လၢ သုမၤတ့ၢ်အီၤ ခဲလၢာ်အဃိလီၤ. သုတၢ်လဲၤတၢ်က့ၤလၢ ပှၢ်မုၢ်ကနၢဖးဒိၣ်အံၤ အပူၤန့ၣ် ယသ့ၣ်ညါဂ့ၤဂ့ၤလီၤ. ဖဲအနံၣ် ၄၀ အံၤ အတီၢ်ပူၤန့ၣ် သုကစၢ် ယဟိဝၤယွၤ ယၤအံၤ ယအိၣ်ဒီးသု ဒီးတၢ်လၢ အအိၣ်ဒီးသု တယၢဘၣ်န့ၣ်* တအိၣ်ဘၣ် နီတမံၤဘၣ်.”’+ ၈ အဃိ ပလဲၤတလၢ စီၤဧ့ၡီၤ အစၢၤအသွဲၣ် လၢအမ့ၢ် ပဒီပုၢ်ဝဲၢ်တဖၣ်+ အတၢ်အိၣ်တၢ်ဆိးအလီၢ် ကီၢ်စ့ဧၢ်န့ၣ်လီၤ. ပလဲၤယံၤထီၣ်ဒီး ဧၤရဘၤ အကျဲ ဒီးအ့လး ဒီးဧ့စယိၣ်က့းဘ့ၢ်လီၤ.+
“ဝံၤဒီး ပဃၣ်ပသးဒီး လဲၤလၢ ကျဲလၢ အလဲၤဝဲဆူ မိၤအး အပှၢ်မုၢ်ကနၢလီၤ.+ ၉ ယဟိဝၤယွၤ တဲယၤလၢ ‘သုတဘၣ်ဒုး ပှၤမိၤအးဖိဘၣ်. မ့ၢ်လၢ ယဟ့ၣ်လီၤ စီၤလိာ် အစၢၤအသွဲၣ်တဖၣ် လၢဝ့ၢ်ဧၢ် ဒ်အတၢ်အသိး အဃိ ယတဟ့ၣ်လီၤသုလၢ ပှၤမိၤအးဖိ အဟီၣ်ကဝီၤ နီတစဲးဘၣ်.+ ၁၀ (လၢညါ ပှၤအ့ၣ်မ့းဖိတဖၣ်+ အိၣ်ဝဲဖဲန့ၣ် ဒီးအဝဲသ့ၣ် အဂံၢ်ဆူၣ်ဝဲ, အနီၣ်ဂံၢ်အါဝဲ ဒီးအနီၢ်ထီဝဲ ဒ်ပှၤဧနးဖိ တဖၣ်လီၤ. ၁၁ ပှၤရၤဖၤဖိတဖၣ်စ့ၢ်ကီး+ ပှၤထံၣ်အဝဲသ့ၣ် ဒ်သိးဒီး ပှၤဧနးဖိလီၤ.+ ဒီးလၢညါန့ၣ် ပှၤမိၤအးဖိတဖၣ် ကိးအဝဲသ့ၣ်လၢ ပှၤအ့ၣ်မ့းဖိလီၤ. ၁၂ လၢညါန့ၣ် ပှၤဃိၢ်ဖိတဖၣ်+ အိၣ်ဝဲဖဲ စ့ဧၢ် ဘၣ်ဆၣ် စီၤဧ့ၡီၤ အစၢၤအသွဲၣ်တဖၣ် နီဟးထီၣ် အဝဲသ့ၣ် ဒီးမၤဟးဂီၤကွံာ် အဝဲသ့ၣ် ဝံၤဒီးအိၣ်က့ၤလၢ အဝဲသ့ၣ် အတၢ်လီၢ်လီၤ.+ အဝဲသ့ၣ်မၤဝဲ ဒ်ပှၤအံၣ်စရ့လးဖိတဖၣ် ကမၤဝဲကီၢ်လၢ ယဟိဝၤယွၤ ကဟ့ၣ်လီၤအဝဲသ့ၣ်လီၤ.) ၁၃ လဲၤခီဂာ် စၤရ့း အတၢ်တြီၤ တက့ၢ်.’ အဃိ ပလဲၤခီဂာ် စၤရ့း အတၢ်တြီၤလီၤ.+ ၁၄ စးထီၣ်လၢ ပဟးထီၣ်လၢ ကၤဒ့ၣ်ဘၢ်န့ တုၤလီၤလၢ ပခီဂာ် စၤရ့း အတၢ်တြီၤပူၤန့ၣ် ယံာ်ဝဲ ၃၈ နံၣ်လီၤ. ဖဲန့ၣ်အဆၢကတီၢ် ပှၤတစိၤလၢ အကဲသုးသ့န့ၣ် သံဝဲ ဒ်ယဟိဝၤယွၤ အၢၣ်လီၤပာ်စၢၤ အဝဲသ့ၣ် အသိးလီၤ.+ ၁၅ ယဟိဝၤယွၤ အစု ထီဒါအဝဲသ့ၣ် တုၤလၢ အဝဲသ့ၣ် ဟးဂီၤကွံာ် ဒ်သိး အကထုးထီၣ်ကွံာ် အဝဲသ့ၣ်လၢ ပကျါအဂီၢ်လီၤ.+
၁၆ “ဖဲပှၤလၢ အကဲသုးသ့ တဖၣ်အံၤ သံလၢာ်ဝဲအခါ+ ၁၇ ယဟိဝၤယွၤ တဲကဒီးယၤလၢ ၁၈ ‘တနံၤအံၤ, သုကဘၣ် လဲၤခီဂာ် ဧၢ် လၢအမ့ၢ် မိၤအးအကီၢ်ဆၢလီၤ. ၁၉ ဖဲသုလဲၤဘူးထီၣ်လၢ ပှၤဧၣ်မိၣ်ဖိတဖၣ် အအိၣ်အခါ သုတဘၣ် မၤကိၢ်မၤဂီၤ အဝဲသ့ၣ် ဒီးဃုအ့ၣ်လိာ်သးဒီး အဝဲသ့ၣ် တဂ့ၤ. မ့ၢ်လၢ ယဟ့ၣ်လီၤ စီၤလိာ် အစၢၤအသွဲၣ်တဖၣ်လၢ တၢ်လီၢ်အဝဲန့ၣ် ဒ်အတၢ်အသိး အဃိ ယတဟ့ၣ်လီၤသုလၢ ပှၤဧၣ်မိၣ်ဖိတဖၣ် အဟီၣ်ကဝီၤ နီတစဲးဘၣ်.+ ၂၀ လၢညါန့ၣ် တၢ်လီၢ် အဝဲန့ၣ် ဘၣ်တၢ်ပာ်ပနီၣ်အီၤလၢ ပှၤရၤဖၤဖိ အကီၢ်လီၤ.+ (လၢညါန့ၣ် ပှၤရၤဖၤဖိတဖၣ် အိၣ်ဝဲဖဲန့ၣ် ဒီးပှၤဧၣ်မိၣ်ဖိတဖၣ် ကိးအဝဲသ့ၣ်လၢ ပှၤစၤမစူၣ်ဖိလီၤ. ၂၁ အဝဲသ့ၣ်န့ၣ် အဂံၢ်ဆူၣ်ဘါဆူၣ်, အအိၣ်ဝဲ အါအါဂီၢ်ဂီၢ် ဒီးအနီၢ်ထီ ဒ်ပှၤဧနးဖိတဖၣ် အသိးလီၤ.+ ဘၣ်ဆၣ် ယဟိဝၤယွၤ မၤဟးဂီၤကွံာ် အဝဲသ့ၣ်လၢ ပှၤဧၣ်မိၣ်ဖိတဖၣ် အမဲာ်ညါ ဒီးပှၤဧၣ်မိၣ်ဖိတဖၣ် နီဟးထီၣ်ကွံာ် အဝဲသ့ၣ် ဒီးလဲၤနုာ်လီၤအိၣ်လၢ အဝဲသ့ၣ် အတၢ်လီၢ်တၢ်ကျဲလီၤ. ၂၂ လၢစီၤဧ့ၡီၤ အစၢၤအသွဲၣ်လၢ အအိၣ်ဝဲခဲအံၤလၢ ကီၢ်စ့ဧၢ်အပူၤအဂီၢ်န့ၣ်+ ယွၤမၤတ့ၢ်ဝဲဒ်န့ၣ်လီၤ. လၢညါ အဝဲမၤဟးဂီၤကွံာ်ဝဲ ပှၤဃိၢ်ဖိတဖၣ်လၢ+ စီၤဧ့ၡီၤ အစၢၤအသွဲၣ်တဖၣ် အမဲာ်ညါ ဒ်သိး စီၤဧ့ၡီၤ အစၢၤအသွဲၣ်တဖၣ် ကနီဟးထီၣ်ကွံာ် အဝဲသ့ၣ် ဒီးလဲၤနုာ်လီၤအိၣ်လၢ အဝဲသ့ၣ် အတၢ်လီၢ်တၢ်ကျဲ တုၤလၢ မုၢ်မဆါတနံၤအံၤလီၤ. ၂၃ လၢညါန့ၣ် ဒူသဝီတဖၣ်လၢ ပှၤဧ့ၤဝံဖိတဖၣ် အိၣ်ဝဲန့ၣ် အိၣ်ဝဲ ပၢၢ်တုၤလၢ ဝ့ၢ်ဂါစၤလီၤ.+ ဘၣ်ဆၣ် ပှၤကၤဖတိၢ်ဖိတဖၣ်လၢ+ အဟဲလၢ ကၤဖတိၢ်န့ၣ်* မၤဟးဂီၤကွံာ် အဝဲသ့ၣ် ဒီးလဲၤနုာ်လီၤ အိၣ်ဝဲလၢ အဝဲသ့ၣ် အတၢ်လီၢ်တၢ်ကျဲလီၤ.)
၂၄ “‘ဟးထီၣ် ဒီးလဲၤခီဂာ် အၢ်နိၣ် အတၢ်တြီၤပူၤ တက့ၢ်.+ ကွၢ်မီၤ, ဝ့ၢ်ဃ့ၡဘိၣ် အစီၤပၤ စံဃိၣ် လၢအမ့ၢ် ပှၤအမိၢ်ဖိန့ၣ် ယဟ့ၣ်လီၤအီၤ လၢသုစုပူၤလံ.+ အဃိ လဲၤဒုး အဝဲသ့ၣ် ဒီးဟံးန့ၢ် အဝဲသ့ၣ် အတၢ်လီၢ်တၢ်ကျဲ တက့ၢ်. ၂၅ စးထီၣ်လၢ တနံၤအံၤန့ၣ် ပှၤလၢ အအိၣ်လၢ ဟီၣ်ခိၣ်ချၢခဲလၢာ် လၢအနၢ်ဟူ သုကစီၣ်န့ၣ် ယကဒုးလီၤဘၣ် တၢ်ပျံၤတၢ်ဖုး ဒီးတၢ်သူၣ်ကိၢ်သးဂီၤ လၢအဝဲသ့ၣ် အဖီခိၣ်လီၤ. အဝဲသ့ၣ် ကသူၣ်ကိၢ်သးဂီၤတၢ် ဒီးကကနိးကစုာ် လၢသုဃိလီၤ.’+
၂၆ “ဒီးဖဲပအိၣ်လၢ ကဒ့မိး+ အပှၢ်မုၢ်ကနၢအခါ ယဆှၢလီၤ ပှၤစိာ်တၢ်ကစီၣ်ဖိ ဆူဝ့ၢ်ဃ့ၡဘိၣ် အစီၤပၤ စံဃိၣ် အအိၣ် ဒီးယမၢအဝဲသ့ၣ် တဲအီၤတၢ်ကတိၤလၢအမုာ်+ လၢအမ့ၢ် ၂၇ ‘ပျဲယလဲၤခီဂာ် နကီၢ်တက့ၢ်. ယကလဲၤတၢ်လၢ ကျဲမုၢ်ခိၣ် ဒီးယတဃၣ်ယသးလၢ အစ့ၣ်မ့ၢ်ဂ့ၤ အထွဲမ့ၢ်ဂ့ၤဘၣ်.+ ၂၈ ယကအီၣ်ဒၣ် တၢ်အီၣ် ဒီးအီဒၣ်ထံ လၢနကဆါန့ၢ်ယၤ တဖၣ်လီၤ. အိၣ်ဒၣ် ပျဲယလဲၤခီဂာ်တၢ် ၂၉ တုၤလၢ ယလဲၤခီဂာ် ထံကျိယၢ်ဒ့ၣ် ဒီးနုာ်လီၤလၢ ကီၢ်တဘ့ၣ်လၢ ယဟိဝၤယွၤ ကဟ့ၣ်ပှၤ န့ၣ်တက့ၢ်. စီၤဧ့ၡီၤ အစၢၤအသွဲၣ်တဖၣ် လၢအအိၣ်လၢ စ့ဧၢ် ဒီးပှၤမိၤအးဖိ တဖၣ်လၢ အအိၣ်လၢ ဧၢ်န့ၣ် မၤစၢၤယၤ ဒ်န့ၣ်လီၤ.’ ၃၀ ဘၣ်ဆၣ် ဝ့ၢ်ဃ့ၡဘိၣ် အစီၤပၤ စံဃိၣ်န့ၣ် တပျဲ ပလဲၤခီဂာ်တၢ်ဘၣ်. သုကစၢ် ယဟိဝၤယွၤန့ၣ် ဟ့ၣ်အခွဲးလၢ အခိၣ်ကကိၤ+ ဒီးအနၢ်ကက့ၣ် ဒ်သိး အကဟ့ၣ်လီၤအီၤလၢ သုစုပူၤ ဒ်လၢ မုၢ်မဆါတနံၤအံၤ အသိးလီၤ.+
၃၁ “ဒီးယဟိဝၤယွၤ တဲယၤလၢ ‘ကွၢ်မီၤ, ယဟ့ၣ်လီၤပာ်စၢၤ စီၤစံဃိၣ် ဒီးအတၢ်လီၢ် လၢနအိၣ်လံ. မၤန့ၢ် အဝဲသ့ၣ် အတၢ်လီၢ်တၢ်ကျဲတက့ၢ်.’+ ၃၂ ဖဲစီၤစံဃိၣ် ဒီးအပှၤခဲလၢာ် ဟဲဝဲဒ်သိး ကဒုးတၢ်ဒီးပှၤ လၢဝ့ၢ်ယါစၤအခါ+ ၃၃ ပကစၢ် ယဟိဝၤယွၤ ဟ့ၣ်လီၤအီၤလၢ ပစုပူၤ အဃိ ပမၤနၢၤအီၤ ဒီးအဖိခွါတဖၣ် ဒီးအပှၤ ခဲလၢာ်လီၤ. ၃၄ ဖဲန့ၣ်အဆၢကတီၢ် ပမၤန့ၢ် အဝဲသ့ၣ် အဝ့ၢ်တဖၣ် ဒီးမၤဟးဂီၤကွံာ်ဝ့ၢ် ကိးဖျၢၣ်ဒဲး ဃုာ်ဒီး ပိာ်မုၣ်, ပိာ်ခွါ ဒီးဖိသၣ်တဖၣ်လီၤ. ပတပာ်မူပှၤ နီတဂၤဘၣ်.+ ၃၅ ဒီးပဟံးန့ၢ် ထဲဒၣ် ဆၣ်ဖိကီၢ်ဖိတဖၣ် ဃုာ်ဒီး တၢ်ဖိတၢ်လံၤတဖၣ် လၢအအိၣ်လၢဝ့ၢ်လၢ ပမၤန့ၢ်အီၤတဖၣ်အပူၤလီၤ. ၃၆ စးထီၣ်လၢ ဝ့ၢ်ဧရိၤဧ့ၢ်+ လၢအအိၣ်လၢ အၢ်နိၣ် အတၢ်တြီၤ အကပၤ (ပၣ်ဃုာ်ဒီး ဝ့ၢ်တဖျၢၣ်လၢအအိၣ်လၢ တၢ်တြီၤပူၤ) တုၤလၢ ကံးလဧးန့ၣ် ဝ့ၢ်လၢ ပမၤဟးဂီၤအီၤ တန့ၢ်ဘၣ်န့ၣ် တအိၣ် နီတဖျၢၣ်ဘၣ်. ပကစၢ် ယဟိဝၤယွၤ ဟ့ၣ်လီၤ ဝ့ၢ်တဖၣ်အံၤ လၢပစုပူၤခဲလၢာ်လီၤ.+ ၃၇ ဘၣ်ဆၣ် ပတလဲၤနုာ်လီၤလၢ ပှၤဧၣ်မိၣ်ဖိ အထံအကီၢ်,+ ယးဘိးအတၢ်တြီၤ+ တကပၤဂ့ၤ တကပၤဂ့ၤ ဒီးဝ့ၢ်တဖၣ်လၢ အအိၣ်လၢ ကစၢၢ်ကလိအကျါ ဒီးတၢ်လီၢ်အဂၤ တတီၤဂ့ၤတတီၤဂ့ၤ လၢပကစၢ် ယဟိဝၤယွၤ တြီပှၤန့ၣ်ဘၣ်.
၃ “ဒီးပဃၣ်ပသး ဒီးပလဲၤထီၣ်လၢ ဘၤၡၣ်အကျဲလီၤ. ဒီးဘၤၡၣ် အစီၤပၤဧိာ်န့ၣ် ဟဲဝဲဒီးအပှၤခဲလၢာ် ဒ်သိး ကဒုးတၢ်ဒီးပှၤ လၢဝ့ၢ်အ့ဒြံၤလီၤ.+ ၂ ဒီးယဟိဝၤယွၤ တဲယၤလၢ ‘တဘၣ်ပျံၤအီၤတဂ့ၤ. အဝဲ ဒီးအပှၤခဲလၢာ် ဒီးအကီၢ်န့ၣ် ယကဟ့ၣ်လီၤ လၢနစုပူၤလီၤ. ဒီးနကမၤအီၤဒ် နမၤပှၤအမိၢ်ဖိ အစီၤပၤ စံဃိၣ်လၢ အအိၣ်ဟဲဝဲလၢ ဝ့ၢ်ဃ့ၡဘိၣ် အသိးလီၤ.’ ၃ ဒီးပကစၢ် ယဟိဝၤယွၤ ဟ့ၣ်လီၤဝဲ ဘၤၡၣ် အစီၤပၤဧိာ် ဒီးအပှၤခဲလၢာ် လၢပစုပူၤ ဒီးပမၤသံ အဝဲသ့ၣ် တုၤလၢ အလၢာ်လီၤ. ၄ ဝံၤဒီး ပလဲၤမၤန့ၢ် အဝ့ၢ်ခဲလၢာ်လီၤ. ဝ့ၢ်လၢ ပတမၤန့ၢ်ဘၣ်လၢ အဝဲသ့ၣ် အအိၣ်ဘၣ်န့ၣ် တအိၣ် နီတဖျၢၣ်ဘၣ်. အဃိ ပမၤန့ၢ် ဝ့ၢ်အဖျၢၣ် ၆၀ လၢအၢ်ကိး အဟီၣ်ကဝီၤအပူၤ လၢအမ့ၢ်ဝဲ စီၤဧိာ် အဘီမုၢ်လၢ ဘၤၡၣ် အပူၤလီၤ.+ ၅ ဝ့ၢ်သ့ၣ်တဖၣ်အံၤ ခဲလၢာ်န့ၣ် အိၣ်ဝဲဒီး အဒူၣ်ဖးထီ, အတြဲၤတဖၣ် ဒီးနီၣ်ဘိတဖၣ်လီၤ. တကးဒံးဘၣ် ပမၤန့ၢ် ဒူသဝီအါဖျၢၣ် စ့ၢ်ကီးလီၤ. ၆ ဘၣ်ဆၣ် ဒ်ပမၤစီၤပၤ စံဃိၣ်လၢ အအိၣ်ဟဲလၢ ဝ့ၢ်ဃ့ၡဘိၣ်အသိး ပမၤဟးဂီၤကွံာ်+ ဝ့ၢ်တဖၣ်အံၤ ခဲလၢာ် ဃုာ်ဒီး ပိာ်မုၣ်, ပိာ်ခွါ ဒီးဖိသၣ်တဖၣ်လီၤ.+ ၇ ဒီးပက့ၤစိာ် တၢ်ဖိတၢ်လံၤခဲလၢာ် ဃုာ်ဒီး ဆၣ်ဖိကီၢ်ဖိတဖၣ်လၢ အအိၣ်လၢ ဝ့ၢ်တဖၣ် အပူၤလီၤ.
၈ “ဖဲန့ၣ်အဆၢကတီၢ် ပမၤန့ၢ် ပှၤအမိၢ်ဖိ အစီၤပၤခံဂၤ+ အတၢ်လီၢ်လၢ ထံကျိယၢ်ဒ့ၣ် အဟီၣ်ကဝီၤ စးထီၣ်လၢ အၢ်နိၣ် အတၢ်တြီၤ တုၤလၢ ကစၢၢ်ဃ့ရမိၣ်လီၤ.+ ၉ (ကစၢၢ်တဖျၢၣ်န့ၣ် လၢညါ ပှၤစံဒိၣ်ဖိတဖၣ် ကိးဝဲလၢ စံးရယိၣ် ဒီးပှၤအမိၢ်ဖိတဖၣ်န့ၣ် ကိးဝဲလၢ စနံၢ်လီၤ.) ၁၀ ပမၤန့ၢ်စ့ၢ်ကီး ကယဲၢ် ဝ့ၢ်သ့ၣ်တဖၣ်လၢ တၢ်ပၢၤခိၣ်ထီၣ်ထီ, ကံးလဧး အဟီၣ်ကဝီၤ ဒီဘ့ၣ်ညါ ဒီးဘၤၡၣ် အတၢ်လီၢ်ခဲလၢာ် ပၢၢ်တုၤလၢ စၤလကး ဒီးအ့ဒြံၤ+ လၢအမ့ၢ် ဝ့ၢ်တဖၣ်လၢ အအိၣ်လၢ ဘၤၡၣ် အဟီၣ်ကဝီၤလၢ စီၤဧိာ် အဘီမုၢ်တၢ်ပၢ ဖီလာ်လီၤ. ၁၁ ဘၤၡၣ် အစီၤပၤဧိာ်န့ၣ် မ့ၢ်ဝဲ ပှၤရၤဖၤဖိ လၢအအိၣ်တ့ၢ် အလီၢ်ခံကတၢၢ် တဂၤလီၤ. အတလါန့ၣ်* ဘၣ်တၢ်တ့အီၤလၢထး ဒီးအိၣ်ဒံးဝဲဖဲ ပှၤဧၣ်မိၣ်ဖိ အဝ့ၢ်ရးဘးလီၤ. အတလါန့ၣ် အထီအိၣ်ဝဲ ၉ ပျၢ်* ဒီးအလဲၢ် အိၣ်ဝဲ ၄ ပျၢ်လီၤ. ၁၂ ဖဲန့ၣ်အဆၢကတီၢ် ပမၤန့ၢ် ကီၢ်တဘ့ၣ်အံၤ အတၢ်လီၢ် စးထီၣ်လၢ ဧရိၤဧ့ၢ်+ လၢအအိၣ်ဘူးဒီး အၢ်နိၣ် အတၢ်တြီၤ ဒီးကံးလဧး အကစၢၢ်ကလိ တဝာ်လီၤ. ဒီးယဟ့ၣ်တ့ၢ် ပှၤရူၤဘ့ၣ်ဖိတဖၣ် ဒီးပှၤကးဖိတဖၣ်လၢ ဝ့ၢ်ဖဲန့ၣ်တဖၣ်လီၤ.+ ၁၃ ဒီးယဟ့ၣ်လီၤ မနၤၡ့ၤ အဒူၣ်တဝာ်လၢ+ ကံးလဧး အဟီၣ်ကဝီၤ လၢအအိၣ်တ့ၢ်တဖၣ် ဒီးဘၤၡၣ်အတၢ်လီၢ်ခဲလၢာ် လၢအပၣ်ဃုာ်လၢ စီၤဧိာ် အဘီမုၢ်ပူၤလီၤ. အၢ်ကိး အဟီၣ်ကဝီၤခဲလၢာ် လၢအပၣ်ဃုာ်လၢ ဘၤၡၣ် အဟီၣ်ကဝီၤပူၤန့ၣ် ပှၤကိးအီၤလၢ ပှၤရၤဖၤဖိ အကီၢ်လီၤ.
၁၄ “စီၤယၤအံၢ်+ လၢအမ့ၢ် စီၤမနၤၡ့ၤ အစၢၤအသွဲၣ်န့ၣ် မၤန့ၢ်ဝဲ အၢ်ကိး အဟီၣ်ကဝီၤ+ တုၤလၢ ပှၤကၡူၢ်ဖိ ဒီးပှၤမၤကးဖိ+ အဟီၣ်ကဝီၤအဆၢ ဒီးအဝဲ ကိးဝဲ ဘၤၡၣ် အသဝီတဖၣ်န့ၣ် အမံၤလၢ ဃၤပိးယၤအံၢ်+ ဒ်အနီၢ်ကစၢ်အမံၤ အိၣ်ဝဲအသိးလီၤ. ပှၤကိးဝဲဒ်န့ၣ် တုၤလီၤလၢ မုၢ်မဆါတနံၤအံၤလီၤ. ၁၅ ဒီးယဟ့ၣ်လီၤ စီၤမၤကံၢ် လၢကံးလဧးလီၤ.+ ၁၆ မ့မ့ၢ် ပှၤရူၤဘ့ၣ်ဖိ ဒီးပှၤကးဖိတဖၣ်န့ၣ်+ ယကဟ့ၣ်လီၤ အဝဲသ့ၣ်တၢ်လီၢ် စးထီၣ်လၢ ကံးလဧး တုၤလၢ အၢ်နိၣ် အတၢ်တြီၤလီၤ. အၢ်နိၣ် အတၢ်တြီၤ အခၢၣ်သးန့ၣ် မ့ၢ်ဝဲ အဝဲသ့ၣ် အဟီၣ်ကဝီၤ အဆၢလီၤ. ဒီးယဟ့ၣ် အဝဲသ့ၣ်တၢ်လီၢ် တုၤလၢ ယးဘိးအတၢ်တြီၤ လၢအမ့ၢ် ပှၤဧၣ်မိၣ်ဖိ အကီၢ်ဆၢ ၁၇ ဒီးတုၤလၢ ဧၤရဘၤ ဒီးထံကျိယၢ်ဒ့ၣ် ဃုာ်ဒီး အကၢၢ်နံၤ စးထီၣ်လၢ ပီၣ်လဲၣ်ကံးန့ၤရ့သး တုၤလၢ ဧၤရဘၤ ပီၣ်လဲၣ် လၢအမ့ၢ် ပီၣ်လဲၣ်အံသၣ် လၢအအိၣ်လၢ ပံးစကၤ အတၢ်လီၤဘံ အခီၣ်ထံး လၢမုၢ်ထီၣ် တခီန့ၣ်လီၤ.+
၁၈ “ဖဲန့ၣ်အခါ ယဟ့ၣ်လီၤသု တၢ်မၤလိာ်ဒ်အံၤ ‘သုကစၢ် ယဟိဝၤယွၤ ဟ့ၣ်လီၤသု ကီၢ်တဘ့ၣ်အံၤ ဒ်သိးသုကလဲၤ မၤန့ၢ်အီၤအဂီၢ်လီၤ. သုဝဲလၢ အသးဒူ ကိးဂၤဒဲးန့ၣ် ဖီၣ်ထီၣ်စုကဝဲၤဒီး လဲၤခီဂာ်တၢ်လၢ သုဒီပုၢ်ဝဲၢ် ပှၤအံၣ်စရ့လးဖိ အမဲာ်ညါတက့ၢ်.+ ၁၉ ထဲဒၣ် သုဖိသုမါတဖၣ် ဒီးသုဆၣ်ဖိကီၢ်ဖိတဖၣ် (ယသ့ၣ်ညါ လၢသုအိၣ်ဒီး ဆၣ်ဖိကီၢ်ဖိအါမး) န့ၣ်ကအိၣ်တ့ၢ်လၢ ဝ့ၢ်တဖၣ်လၢ ယဟ့ၣ်သုအပူၤလီၤ. ၂၀ လၢခံ ယဟိဝၤယွၤ ကဒုးအိၣ်ဘှံး သုဒီပုၢ်ဝဲၢ်တဖၣ် ဒ်အဒုးအိၣ်ဘှံးသုအသိး ဒီးအဝဲသ့ၣ် ကမၤန့ၢ်ကီၢ်လၢ ယဟိဝၤယွၤ ကဟ့ၣ်လီၤအဝဲသ့ၣ်လၢ ထံကျိယၢ်ဒ့ၣ် အဝၢ်ဘးခီ တဘ့ၣ်လီၤ. ဖဲန့ၣ်အခါ သုဝဲတဂၤစုာ်စုာ် သုက့ၤလၢ တၢ်လီၢ်လၢ ယဟ့ၣ်လီၤသုသ့လီၤ.’+
၂၁ “ဒီးယမၤလိာ် စီၤယိၤၡူလၢ+ ‘သုကစၢ် ယဟိဝၤယွၤ မၤဝဲ စီၤပၤခံဂၤအံၤ ဒ်လဲၣ်န့ၣ် သုထံၣ်ဘၣ်လၢ သုမဲာ်လီၤ. ဘီမုၢ် အဂၤတဖၣ်လၢ သုကလဲၤနုာ်လီၤ လၢအပူၤန့ၣ် ယဟိဝၤယွၤ ကမၤ အဝဲသ့ၣ်ခဲလၢာ် ဒ်န့ၣ်လီၤ.+ ၂၂ မ့ၢ်လၢ သုကစၢ် ယဟိဝၤယွၤ မ့ၢ်ပှၤလၢ အဒုးတၢ်လၢ သုဂီၢ်အဃိ သုတဘၣ်ပျံၤ အဝဲသ့ၣ်ဘၣ်.’+
၂၃ “ဖဲန့ၣ်အဆၢကတီၢ် ယဃ့ကညး ယဟိဝၤယွၤလၢ ၂၄ ‘အိ တၢ်ပၢကစၢ် ယဟိဝၤယွၤဧၢ, နဒုးနဲၣ်ယၤလၢ နလၤကပီၤ ဒီးနစိနကမီၤ တစဲးဖိလံ.+ ယွၤလၢ မူခိၣ်မ့ၢ်ဂ့ၤ လၢဟီၣ်ခိၣ်မ့ၢ်ဂ့ၤ လၢအမၤတၢ်လၢ အဒိၣ်အမုၢ် ဒ်နမၤအသိးန့ၣ် တအိၣ်နီတဂၤဘၣ်.+ ၂၅ ဝံသးစူၤ ပျဲယလဲၤခီဂာ်တၢ် ဒ်သိး ယကထံၣ် ကီၢ်လၢ အဂ့ၤတဘ့ၣ်လၢ ထံကျိယၢ်ဒ့ၣ်အဝၢ်ဘးခီ လၢအမ့ၢ် ကစၢၢ်ကလိ အဟီၣ်ကဝီၤလၢ အဃံအလၤ ဒီးလဘၤနိၣ် အဂီၢ်တက့ၢ်.’+ ၂၆ ဘၣ်ဆၣ် ခီဖျိလၢ သုဃိန့ၣ် ယဟိဝၤယွၤ သးဒိၣ်ထီၣ်ယၤဒံးအဃိ+ အဝဲ တဒိကနၣ်ယၤဘၣ်. လၢတၢ်န့ၣ်အလီၢ် ယဟိဝၤယွၤ တဲယၤလၢ ‘ပှဲၤန့ၣ်ဘၣ်လံ. ဘၣ်ဃးဒီး တၢ်ဂ့ၢ်တခါအံၤန့ၣ် တဲယၤ နီတဘျီလၢၤတဂ့ၤ. ၂၇ နတလဲၤခီဂာ်ဘၣ် ထံကျိယၢ်ဒ့ၣ်လၢၤဘၣ်. အဃိ လဲၤထီၣ်လၢ ပံးစကၤ အဒီခိၣ်+ ဒီးကွၢ်စိလီၤ တၢ်လၢ မုၢ်နုာ်, ကလံၤစိး, ကလံၤထံး ဒီးမုၢ်ထီၣ် ဒီးကွၢ်လီၤ ကီၢ်တဘ့ၣ်န့ၣ် လၢနမဲာ်တက့ၢ်.+ ၂၈ စီၤယိၤၡူမ့ၢ်+ ပှၤတဂၤလၢ အကလဲၤခီဂာ်တၢ်လၢ+ ပှၤဂီၢ်မုၢ်တဖၣ်အံၤ အမဲာ်ညါ ဒီးအကတီခိၣ်ရိၤမဲ ပှၤဂီၢ်မုၢ်တဖၣ်အံၤ ဒ်သိးအဝဲသ့ၣ် ကန့ၢ်သါဘၣ် ကီၢ်လၢနကထံၣ်ဘၣ်အီၤ တဘ့ၣ်န့ၣ်လီၤ. အဃိ ဟ့ၣ်လီၤအီၤမူဒါ, ဟ့ၣ်ဂံၢ်ဟ့ၣ်ဘါအီၤ ဒီးဒုးဆူၣ်ထီၣ် အဂံၢ်အဘါ တက့ၢ်.’ ၂၉ တၢ်သ့ၣ်တဖၣ်အံၤ မၤအသးဖဲ ပအိၣ်လၢ တၢ်တြီၤ လၢအအိၣ်လၢ ဘ့ၤသပဧိၢ် အမဲာ်ညါန့ၣ်လီၤ.+
၄ “အိ အံၣ်စရ့လးဧၢ, ဒိကနၣ် တၢ်ဘျၢ ဒီးတၢ်သိၣ်တၢ်သီတဖၣ် လၢယသိၣ်လိသု လၢသုကမၤထွဲအီၤ အဂီၢ်တက့ၢ်. သုမ့ၢ်မၤ ဒ်န့ၣ်န့ၣ် သုကအိၣ်မူဘၣ်+ ဒီးသုကလဲၤနုာ် မၤန့ၢ် ကီၢ်တဘ့ၣ်လၢ သုမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤ ကဟ့ၣ်လီၤသုန့ၣ်လီၤ. ၂ တၢ်လၢ ယမၤလိာ်သုန့ၣ် သုတဘၣ် မၤအါထီၣ်အီၤ နီတမံၤဘၣ် ဒီးသုတဘၣ် မၤစှၤလီၤအီၤ နီတမံၤဘၣ်.+ မၤထွဲ သုကစၢ် ယဟိဝၤယွၤ အတၢ်မၤလိာ်တဖၣ် လၢယမၤလိာ်သု တက့ၢ်.
၃ “ဘၣ်ဃးဒီး ဘဧၤလးပဧိၢ်န့ၣ် ယဟိဝၤယွၤ မၤဝဲ ဒ်လဲၣ်ဒ်လဲၣ်န့ၣ် သုထံၣ်ဘၣ်လၢ သုမဲာ်လီၤ. ဖဲန့ၣ်အခါ သုကစၢ် ယဟိဝၤယွၤ မၤဟးဂီၤကွံာ် ပှၤလၢသုကျါ လၢအဘါထီၣ် ဘဧၤလးပဧိၢ် ကိးဂၤဒဲးလီၤ.+ ၄ ဘၣ်ဆၣ် သုဝဲလၢအတီဒီး သုကစၢ် ယဟိဝၤယွၤန့ၣ် သုအိၣ်မူဘၣ် တုၤလၢ ခဲအံၤလီၤ. ၅ ယသိၣ်လိတ့ၢ်သုလၢ တၢ်ဘျၢ ဒီးတၢ်သိၣ်တၢ်သီတဖၣ်+ ဒ်ယကစၢ် ယဟိဝၤယွၤ မၤလိာ်ယၤအသိးလီၤ. သုကဘၣ် မၤထွဲတၢ်သ့ၣ်တဖၣ်န့ၣ်လၢ ကီၢ်တဘ့ၣ်လၢ သုကမၤန့ၢ်အီၤ အပူၤလီၤ. ၆ ဒီးသုကဘၣ် မၤထွဲအီၤ လီၤတံၢ်လီၤဆဲးလီၤ.+ သုမ့ၢ်မၤ ဒ်န့ၣ်န့ၣ် ပှၤဂီၢ်မုၢ်တဖၣ်လၢ အကနၢ်ဟူဘၣ်ဝဲ ဘၣ်ဃးဒီး တၢ်ဘျၢတဖၣ်အံၤ ခဲလၢာ်န့ၣ် ကထံၣ်ဘၣ် သုတၢ်ကူၣ်သ့+ ဒီးသုတၢ်သ့ၣ်ညါနၢ်ပၢၢ်+ ဒီးအဝဲသ့ၣ် ကတဲဝဲလၢ ‘ပှၤတကလုာ်အံၤ မ့ၢ်ပှၤလၢ အကူၣ်တၢ်သ့ ဒီးအအိၣ်ဒီး တၢ်သ့ၣ်ညါနၢ်ပၢၢ် သပှၢ်တၢၢ်လီၤ.’+ ၇ ပှၤကလုာ်ဖးဒိၣ် လၢအအိၣ်ဒီး ယွၤတဖၣ်လၢ အအိၣ်ဘူးဒီးအီၤ ဒ်ပကစၢ် ယဟိဝၤယွၤ အိၣ်ဘူးဒီးပှၤ ဖဲပကိးထီၣ်အီၤ တဘျီဂ့ၤ တဘျီဂ့ၤအခါန့ၣ် မ့ၢ်အအိၣ်ဧါ.+ ၈ ဒီးပှၤကလုာ်ဖးဒိၣ် လၢအအိၣ်ဒီး တၢ်ဘျၢ ဒီးတၢ်သိၣ်တၢ်သီ လၢအတီအလိၤတဖၣ် ဒ်တၢ်သိၣ်တၢ်သီခဲလၢာ် လၢယဟ့ၣ်လီၤသုလၢ တနံၤအံၤန့ၣ် မ့ၢ်အအိၣ်ဧါ.+
၉ “ဒ်သိး သုသုတသးပ့ၤနီၣ် တၢ်လၢသုထံၣ်ဘၣ်အီၤ လၢသုမဲာ်တဂ့ၤ ဒီးဒ်သိး အသုတလီၤမၢ်ကွံာ် လၢသုသးပူၤ လၢသုတၢ်အိၣ်မူ ဒီတစိၤတဂ့ၤအဂီၢ် ပလီၢ်သုသးတက့ၢ်. ဒီးသုကဘၣ် ဒုးသ့ၣ်ညါ သုဖိသုလံၤတဖၣ် လၢတၢ်ဂ့ၢ်တဖၣ်န့ၣ်လီၤ.+ ၁၀ မုၢ်တနံၤဖဲ သုဆၢထၢၣ်လၢ သုကစၢ် ယဟိဝၤယွၤ အမဲာ်ညါလၢ ဃိၤရ့းန့ၣ် ယဟိဝၤယွၤ တဲယၤလၢ ‘ပာ်ဖှိၣ်ထီၣ် ပှၤဂီၢ်မုၢ်တဖၣ် လၢယအိၣ်တက့ၢ်. ယကဒုးနၢ်ဟူ အဝဲသ့ၣ် လၢယတၢ်ကတိၤတဖၣ်+ ဒ်သိး အဝဲသ့ၣ် ကပျံၤယၤလၢ+ အတၢ်အိၣ်မူ လၢဟီၣ်ခိၣ်ချၢ ဒီတစိၤ ဒီးကသိၣ်လိ အဖိတဖၣ် အဂီၢ်လီၤ.’+
၁၁ “အဃိ သုဟဲဘူးထီၣ် ဒီးဆၢထၢၣ်လၢ ကစၢၢ်ခီၣ်ထံး ဒီးမ့ၣ်အူအီၣ်တၢ် လၢကစၢၢ်ခိၣ် ဒီးမ့ၣ်အူလၣ်ထီၣ် တုၤလၢမူခိၣ် ဒီးတၢ်ခံးသူ, တၢ်အၢၣ် ဒီးတၢ်အၢၣ်ခံးသူ အိၣ်ဝဲလီၤ.+ ၁၂ ဒီးယဟိဝၤယွၤ တဲတၢ်ဒီးသုလၢ မ့ၣ်အူအကျါလီၤ.+ သုနၢ်ဟူ တၢ်ကတိၤသီၣ်ထီၣ် ဘၣ်ဆၣ် သုတထံၣ်ဘၣ် တၢ်အက့ၢ်အဂီၤ နီတမံၤဘၣ်,+ အိၣ်ထဲ တၢ်ကလုၢ်လီၤ.+ ၁၃ ဒီးအဝဲတဲဘၣ်သု လၢအတၢ်အၢၣ်လီၤအီလီၤ+ လၢအမၤလိာ်သုလၢ သုကဘၣ်မၤထွဲအီၤ လၢအမ့ၢ် တၢ်မၤလိာ် အဘီတဆံလီၤ.+ လၢခံ အဝဲကွဲးလီၤဝဲလၢ လၢၢ်ဘ့ၣ်ဘၣ်ခံဘ့ၣ် အလိၤလီၤ.+ ၁၄ ဖဲန့ၣ်အဆၢကတီၢ် ယဟိဝၤယွၤ မၤလိာ်ယၤလၢ ယကသိၣ်လိသုလၢ တၢ်ဘျၢ ဒီးတၢ်သိၣ်တၢ်သီတဖၣ် လၢသုကဘၣ်မၤထွဲအီၤ လၢကီၢ်တဘ့ၣ်လၢ သုကလဲၤနုာ်လီၤ မၤန့ၢ်အီၤအပူၤလီၤ.
၁၅ “ဖဲယဟိဝၤယွၤ တဲတၢ်ဒီးသုလၢ မ့ၣ်အူကျါ လၢကစၢၢ် ဃိၤရ့းအခါ သုတထံၣ်ဘၣ် တၢ်အက့ၢ်အဂီၤ နီတမံၤဘၣ် အဃိ ပလီၢ်သုသး ၁၆ ဒ်သိး သုသုတမၤတၢ်ဒဲးဘး ခီဖျိ သုတ့ထီၣ် တၢ်ဂီၤတၢ်ဖှီၣ်လၢ သုနီၢ်ကစၢ်အဂီၢ်လၢ အအိၣ်ဒီး တၢ်အက့ၢ်အဂီၤလၢ အလီၤဂာ်ဒီး ပိာ်မုၣ် အဂီၤမ့ၢ်ဂ့ၤ, ပိာ်ခွါ အဂီၤမ့ၢ်ဂ့ၤ,+ ၁၇ ဆၣ်ဖိကီၢ်ဖိလၢ အအိၣ်လၢ ဟီၣ်ခိၣ် အဂီၤမ့ၢ်ဂ့ၤ, ထိၣ်လၢ အယူၤလၢ မူခိၣ် အဂီၤမ့ၢ်ဂ့ၤ,+ ၁၈ တၢ်တမံၤဂ့ၤ တမံၤဂ့ၤလၢ အဟူးအဂဲၤလၢ ဟီၣ်ခိၣ်ချၢ အဂီၤမ့ၢ်ဂ့ၤ, ညၣ် လၢအအိၣ်လၢ ထံကျါ အဂီၤမ့ၢ်ဂ့ၤ န့ၣ်တဂ့ၤ.+ ၁၉ ဒီးဖဲ သုကွၢ်ထီၣ်တၢ် လၢမူခိၣ် ဒီးသုထံၣ်ဘၣ် မူခိၣ် အသုးမုၢ်ခဲလၢာ် လၢအမ့ၢ် မုၢ်, လါဒီးဆၣ်တဖၣ် အခါ သုတဘၣ်ပျဲလၢ တၢ်ကကွဲန့ၢ်လွဲန့ၢ်သုလၢ သုကဘူၣ်ထီၣ်ဘါထီၣ် တၢ်သ့ၣ်တဖၣ်န့ၣ် ဒီးမၤအတၢ် တဂ့ၤ.+ သုကစၢ် ယဟိဝၤယွၤ ဟ့ၣ်လီၤ တၢ်သ့ၣ်တဖၣ်န့ၣ်လၢ ပှၤခဲလၢာ်လၢ အအိၣ်ဝဲလၢ ဟီၣ်ခိၣ်ချၢ အဂီၢ်လီၤ. ၂၀ ဘၣ်ဆၣ် သုမ့ၢ်ပှၤလၢ ယဟိဝၤယွၤ ထုးထီၣ်အီၤလၢ ဖၣ်ကပူၤထး လၢအမ့ၢ် ကီၢ်အဲၤကူပတူးအပူၤ ဒ်သိး သုကကဲထီၣ် အတၢ်+ ဒ်မုၢ်မဆါတနံၤအံၤအသိးလီၤ.
၂၁ “လၢသုဃိန့ၣ် ယဟိဝၤယွၤ သးဒိၣ်ထီၣ်ယၤ+ ဒီးအဝဲအၢၣ်လီၤဝဲလၢ ယတဘၣ်လဲၤခီဂာ် ထံကျိယၢ်ဒ့ၣ် ဒီးနုာ်လီၤလၢ ကီၢ်လၢ အဂ့ၤတဘ့ၣ် လၢသုကစၢ် ယဟိဝၤယွၤ အၢၣ်လီၤဝဲလၢ အကဟ့ၣ်သု ဒ်သုတၢ်န့ၢ်သါ အသိးဘၣ်.+ ၂၂ မ့မ့ၢ်ယၤန့ၣ် ယကသံဖဲ တၢ်လီၢ်အံၤ ဒီးယတလဲၤခီဂာ်ဘၣ် ထံကျိယၢ်ဒ့ၣ်ဘၣ်.+ ဘၣ်ဆၣ် မ့မ့ၢ်သုန့ၣ် သုကလဲၤခီဂာ် ထံကျိယၢ်ဒ့ၣ် ဒီးမၤန့ၢ် ကီၢ်လၢအဂ့ၤတဘ့ၣ်အံၤလီၤ. ၂၃ ဒ်သိး သုသုတသးပ့ၤနီၣ် သုကစၢ် ယဟိဝၤယွၤ အတၢ်အၢၣ်လီၤအီလီၤလၢ အမၤဒီးသု တဂ့ၤအဂီၢ် ပလီၢ်သုသးတက့ၢ်.+ ဒီးတဘၣ်တ့ထီၣ် တၢ်ဂီၤတၢ်ဖှီၣ် လၢအမ့ၢ် တၢ်အက့ၢ်အဂီၤ တမံၤဂ့ၤတမံၤဂ့ၤ အဂီၤလၢ သုကစၢ် ယဟိဝၤယွၤ တြီဃာ်ဝဲန့ၣ်တဂ့ၤ.+ ၂၄ သုကစၢ် ယဟိဝၤယွၤန့ၣ် မ့ၢ်ဝဲ မ့ၣ်အူလၢ အအီၣ်ကွံာ်တၢ်+ ဒီးမ့ၢ်ယွၤတဂၤလၢ အမၤလိာ်ဝဲလၢ ပှၤကဘၣ်တီဒီးအီၤ လၢသးဒီဖျၢၣ်လီၤ.+
၂၅ “သုမ့ၢ်ထီၣ်ဖိထီၣ်လံၤ ဒီးအိၣ်ဘၣ်လၢ ကီၢ်န့ၣ်အပူၤ ဖးယံာ် သနာ်က့ သုမ့ၢ်မၤတၢ်ဒဲးဘး ဒီးတ့ထီၣ် တၢ်ဂီၤတၢ်ဖှီၣ်+ တမံၤဂ့ၤတမံၤဂ့ၤ ဒီးမၤတၢ်လၢ သုကစၢ် ယဟိဝၤယွၤ ထံၣ်ဝဲလၢအအၢ ဒ်သိး ကမၤဆါအသး အဂီၢ်န့ၣ်+ ၂၆ တနံၤအံၤ ယပာ်ပှၤအိၣ်လၢ မူခိၣ် ဒီးလၢဟီၣ်ခိၣ် ကိးဂၤဒဲးလၢ ယပှၤအုၣ်အသးတဖၣ်လၢ သုကဟးဂီၤကွံာ် ချ့ချ့လၢ ကီၢ်တဘ့ၣ်န့ၣ်အပူၤ သပှၢ်ကတၢၢ်လီၤ. သုကခီဂာ် ထံကျိယၢ်ဒ့ၣ် ဒီးနုာ်လီၤလၢ ကီၢ်တဘ့ၣ်န့ၣ်အပူၤ ဒ်သိး အကကဲထီၣ် သုတၢ်အဂီၢ် ဘၣ်ဆၣ် သုမ့ၢ်မၤ တၢ်သ့ၣ်တဖၣ်န့ၣ်န့ၣ် သုကဟးဂီၤကွံာ် လၢာ်လၢာ်ဆ့ဆ့ ဒီးသုတအိၣ်ဘၣ် ဖဲန့ၣ် ယံာ်ယံာ်ဘၣ်.+ ၂၇ ယဟိဝၤယွၤ ကနီဟးထီၣ်သု ဒီးယဟိဝၤယွၤ ကမၤလီၤပြံလီၤပြါသုလၢ ပှၤကလုာ်တဖၣ်အကျါ+ ဒီးဖဲန့ၣ်န့ၣ် သုကဆဲးမူဒံး ထဲစှၤဂၤလီၤ.+ ၂၈ ဒီးသုကဘၣ် ဘူၣ်ထီၣ်ဘါထီၣ် ယွၤသ့ၣ် ဒီးယွၤလၢၢ်တဖၣ်လၢ ပှၤကညီတ့အီၤ လၢအစု+ လၢအမ့ၢ် ယွၤလၢ အထံၣ်တၢ်, နၢ်ဟူတၢ်, အီၣ်တၢ် ဒီးနၢတၢ် တသ့ဘၣ်န့ၣ်လီၤ.
၂၉ “လၢတၢ်လီၢ်ဖဲန့ၣ်န့ၣ် သုမ့ၢ်ဃု သုကစၢ် ယဟိဝၤယွၤ ဒီးသုမ့ၢ် ဃုအီၤလၢ သုသးဒီဖျၢၣ်+ ဒီးသုဂံၢ်သုဘါ ခဲလၢာ်န့ၣ်* သုကထံၣ်န့ၢ်အီၤ သပှၢ်ကတၢၢ်လီၤ.+ ၃၀ ဖဲတၢ်သ့ၣ်တဖၣ်န့ၣ် ခဲလၢာ် ဟဲကဲထီၣ်အသးဒီးသု ဒီးသုဘၣ်ကိၢ်ဘၣ်ဂီၤ ဒိၣ်မးအခါ သုကဟဲက့ၤကဒါက့ၤလၢ သုကစၢ် ယဟိဝၤယွၤအအိၣ် ဒီးဒိကနၣ် အကလုၢ်လီၤ.+ ၃၁ သုကစၢ် ယဟိဝၤန့ၣ် မ့ၢ်ယွၤလၢ အသးကညီၤတၢ်လီၤ.+ အဝဲတပာ်တ့ၢ်သု ဒီးတဆှၢသုလၢ တၢ်ဟးဂီၤဘၣ်. ဒီးအဝဲ တသးပ့ၤနီၣ် တၢ်အၢၣ်လီၤအီလီၤ လၢအအၢၣ်လီၤဝဲ သုမိၢ်ပၢ်ဖံဖု လၢပျၢၤတဖၣ်ဘၣ်.+
၃၂ “ဆိကမိၣ်ထံ ဘၣ်ဃးဒီး တၢ်ဆၢကတီၢ်လၢ အပူၤကွံာ် တချုးလၢ သုအိၣ်မူဒံးဘၣ် စးထီၣ်လၢ ကစၢ်ယွၤတ့လီၤ ပှၤကညီလၢ ဟီၣ်ခိၣ်ချၢလံၤလံၤ ဒီးဃုကွၢ် စးထီၣ်လၢ မူခိၣ်လၢအံၤတခီ တုၤလၢ အဝဲတခီတက့ၢ်. မ့ၢ်တၢ်ကဲထီၣ်အသး လၢအလီၤဘီလီၤမုၢ် ဒ်အံၤ အိၣ်တဘျီဘျီဧါ. မ့ၢ်ပှၤနၢ်ဟူဘၣ် တၢ်ဒ်အံၤ အိၣ်တဘျီဘျီဧါ.+ ၃၃ ပှၤအဂၤလၢ အနၢ်ဟူဘၣ် ကစၢ်ယွၤ တဲတၢ်လၢ မ့ၣ်အူအကျါ ဒ်သိးဒီးသု ဒီးအဆဲးအိၣ်မူန့ၣ် မ့ၢ်အအိၣ်ဝဲဧါ.+ ၃၄ မ့တမ့ၢ် မ့ၢ်ကစၢ်ယွၤ ထုးထီၣ် ပှၤတကလုာ်လၢ ပှၤကလုာ်အဂၤတဒူၣ် အကျါန့ၣ် အိၣ်တဘျီဘျီဧါ. သုကစၢ် ယဟိဝၤယွၤ ပာ်ဖျါထီၣ် တၢ်စံၣ်ညီၣ်, တၢ်ပနီၣ်လီၤလးတဖၣ်, တၢ်လီၤလးတဖၣ်,+ တၢ်ဒုး,+ စုလၢ အဂံၢ်ဆူၣ်ဘါဆူၣ်,+ စုလၢ အယူာ်ဃီၤအသး ဒီးတၢ်မၤလၢအလီၤပျံၤ ဒိၣ်ဒိၣ်မုၢ်မုၢ်+ လၢသုဂီၢ် လၢကီၢ်အဲၤကူပတူးအပူၤ လၢသုမဲာ်ညါန့ၣ်လီၤ. ၃၅ တၢ်ပာ်ဖျါထီၣ်န့ၢ်သု လၢတၢ်သ့ၣ်တဖၣ်န့ၣ် ဒ်သိး သုကသ့ၣ်ညါလၢ ယဟိဝၤမ့ၢ် ယွၤလၢအမ့ၢ်အတီ+ ဒီးယွၤလၢအဂၤ တအိၣ်နီတဂၤဘၣ်.+ ၃၆ အဝဲဒုးနၢ်ဟူသုလၢ အကလုၢ် လၢမူခိၣ် ဒ်သိး ကဘှီဘၣ်ထီၣ်သု ဒီးလၢဟီၣ်ခိၣ်န့ၣ် အဝဲဒုးထံၣ်သု လၢအမ့ၣ်အူဖးဒိၣ် ဒီးသုနၢ်ဟူဘၣ် အတၢ်ကတိၤလၢ မ့ၣ်အူကျါလီၤ.+
၃၇ “မ့ၢ်လၢ အဝဲအဲၣ် သုမိၢ်ပၢ်ဖံဖု လၢပျၢၤတဖၣ် ဒီးဃုထၢထီၣ် အဝဲသ့ၣ် အစၢၤအသွဲၣ်တဖၣ်+ ဒ်အပှၤဂီၢ်မုၢ်အသိး အဃိ ဖဲအဝဲထုးထီၣ်သု လၢကီၢ်အဲၤကူပတူးအပူၤ လၢအစိအကမီၤ ဖးဒိၣ်အခါ အဝဲအိၣ်ဒီးသုထီဘိလီၤ. ၃၈ ပှၤကလုာ်တဖၣ်လၢ အဒိၣ်န့ၢ်ဒံးသု ဒီးအဂံၢ်ဆူၣ်ဘါဆူၣ် န့ၢ်ဒံးသုန့ၣ် အဝဲ နီဟးထီၣ်ကွံာ်ဝဲလၢ သုမဲာ်ညါ ဒ်သိး အဝဲကဆှၢနုာ်သု ဒီးဟ့ၣ်သု လၢအဝဲသ့ၣ် အကီၢ် ဒ်သုတၢ်န့ၢ်သါ အသိး ဒ်လၢ မုၢ်မဆါတနံၤအံၤ အသိးလီၤ.+ ၃၉ တနံၤအံၤန့ၣ် သုကဘၣ်သ့ၣ်ညါ ဒီးတိၢ်နီၣ်ဃာ် လၢသုသးပူၤ လၢယဟိဝၤမ့ၢ် ယွၤလၢ အမ့ၢ်အတီတဂၤ လၢမူခိၣ်ဒီးဟီၣ်ခိၣ် အဖီခိၣ်လီၤ.+ ပှၤဒ်သိးဒီးအီၤ တအိၣ်ဘၣ်.+ ၄၀ ဒ်သိး သုဒီးသုဖိသုလံၤတဖၣ် အတၢ်အိၣ်မူ ကလဲၤအသး ဂ့ၤဂ့ၤဘၣ်ဘၣ် ဒီးသုကအိၣ်မူဘၣ် လၢကီၢ်လၢ ယဟိဝၤယွၤ ကဟ့ၣ်သုတဘ့ၣ်န့ၣ်အပူၤ ဖးယံာ်အဂီၢ် သုကဘၣ် မၤထွဲ ကစၢ်ယွၤ အတၢ်ဘျၢ ဒီးအတၢ်မၤလိာ်တဖၣ် လၢယမၤလိာ်သု လၢတနံၤအံၤလီၤ.”+
၄၁ ဖဲန့ၣ်အဆၢကတီၢ် လၢထံကျိယၢ်ဒ့ၣ် အမုၢ်ထီၣ် တကပၤန့ၣ်+ စီၤမိၤၡ့ ပာ်လီၤဆီဝဲ ဝ့ၢ်သၢဖျၢၣ်လီၤ. ၄၂ ပှၤတဂၤဂ့ၤ တဂၤဂ့ၤ မ့ၢ်မၤသံဘၣ် ပှၤဂၤလၢ တၢ်တပာ်သူၣ်ပာ်သး အပူၤ ဒီးလၢညါ အဝဲ မ့ၢ်တသးဟ့အီၤဘၣ်န့ၣ်+ အဝဲ ကဘၣ်လဲၤဃ့ၢ် လၢဝ့ၢ်တဖၣ်န့ၣ် အကျါ တဖျၢၣ်ဖျၢၣ် ဒီးအကအိၣ်မူဘၣ်ဝဲလီၤ.+ ၄၃ ဝ့ၢ်အဆိကတၢၢ် တဖျၢၣ်န့ၣ် မ့ၢ်ဝဲ ဝ့ၢ်ဘ့စ့ၢ်+ လၢအအိၣ်လၢ ပှၢ်မုၢ်ကနၢအပူၤ လၢတၢ်ပၢၤခိၣ် ဒီးမ့ၢ်ဝဲလၢ ပှၤရူၤဘ့ၣ်ဖိ အဂီၢ်လီၤ. ခံဖျၢၣ်တဖျၢၣ်န့ၣ် မ့ၢ်ဝဲ ဝ့ၢ်ရၤမိး+ လၢအအိၣ်လၢ ကံးလဧးအဟီၣ်ကဝီၤပူၤ ဒီးမ့ၢ်ဝဲလၢ ပှၤကးဖိတဖၣ် အဂီၢ်လီၤ. ဒီးသၢဖျၢၣ်တဖျၢၣ်န့ၣ် မ့ၢ်ဝဲဝ့ၢ်ကိလၣ်+ လၢအအိၣ်လၢ ဘၤၡၣ်အပူၤ ဒီးမ့ၢ်ဝဲလၢ ပှၤမနၤၡ့ၤဖိတဖၣ် အဂီၢ်လီၤ.+
၄၄ စီၤမိၤၡ့ အတၢ်သိၣ်တၢ်သီ+ လၢအဟ့ၣ်လီၤဝဲ ပှၤအံၣ်စရ့လးဖိတဖၣ်န့ၣ် မ့ၢ်ဝဲ ဒ်အံၤလီၤ. ၄၅ တၢ်သ့ၣ်တဖၣ်အံၤ မ့ၢ်ဝဲ တၢ်ဒုးသ့ၣ်နီၣ်ထီၣ်တဖၣ်, တၢ်ဘျၢတဖၣ် ဒီးတၢ်သိၣ်တၢ်သီတဖၣ် လၢစီၤမိၤၡ့ ဟ့ၣ်လီၤဝဲ ပှၤအံၣ်စရ့လးဖိ ဖဲအဝဲသ့ၣ် ဟးထီၣ်လၢ ကီၢ်အဲၤကူပတူး ဝံၤအလီၢ်ခံလီၤ.+ ၄၆ ဒီးအဟ့ၣ်လီၤဝဲ ဖဲအဝဲသ့ၣ် အိၣ်ဝဲလၢ ယၢ်ဒ့ၣ်အဟီၣ်ကဝီၤပူၤ, ဖဲတၢ်တြီၤလၢ အအိၣ်ဝဲလၢ ဘ့ၤသပဧိၢ်+ အဝၢ်ဘးခီလၢ ပှၤဧၣ်မိၣ်ဖိတဖၣ် အစီၤပၤစံဃိၣ် အကီၢ်ပူၤလီၤ. လၢညါန့ၣ် စီၤပၤစံဃိၣ် အိၣ်ဝဲလၢ ဝ့ၢ်ဃ့ၡဘိၣ်+ ဒီးစီၤမိၤၡ့ ဒီးပှၤအံၣ်စရ့လးဖိ မၤနၢၤကွံာ်အီၤဖဲ အဝဲသ့ၣ် ဟးထီၣ်ကွံာ်လၢ ကီၢ်အဲၤကူပတူးပူၤ ဝံၤအလီၢ်ခံလီၤ.+ ၄၇ ဒီးအဝဲသ့ၣ် မၤန့ၢ် အတၢ်လီၢ်တၢ်ကျဲ ဒီးမၤန့ၢ် ဘၤၡၣ် အစီၤပၤဧိာ် အတၢ်လီၢ်စ့ၢ်ကီးလီၤ.+ စီၤပၤခံဂၤအံၤ မ့ၢ်ဝဲ ပှၤအမိၢ်ဖိ အစီၤပၤ လၢအအိၣ်လၢ ဟီၣ်ကဝီၤ လၢထံကျိယၢ်ဒ့ၣ် အမုၢ်ထီၣ်တကပၤ ၄၈ စးထီၣ်လၢ ဧရိၤဧ့ၢ်+ လၢအအိၣ်လၢ အၢ်နိၣ်အတၢ်တြီၤ အကပၤ တုၤလၢ ကစၢၢ်စံရယိၣ် လၢအမ့ၢ် ဃ့ရမိၣ်,+ ၄၉ ဒီးဧၤရဘၤ အဟီၣ်ကဝီၤ ခဲလၢာ် လၢအအိၣ် လၢဟီၣ်ကဝီၤလၢ ထံကျိယၢ်ဒ့ၣ် အမုၢ်ထီၣ်တခီ ဒီးတုၤလၢ ပီၣ်လဲၣ်ဧၤရဘၤ လၢအအိၣ်လၢ ပံးစကၤ အတၢ်လီၤဘံ အခီၣ်ထံးလီၤ.+
၅ စီၤမိၤၡ့ ကိးဖှိၣ်ဝဲ ပှၤအံၣ်စရ့လးဖိခဲလၢာ် ဒီးတဲ အဝဲသ့ၣ်လၢ “အိ အံၣ်စရ့လးဧၢ, ကနၣ် တၢ်ဘျၢ ဒီးတၢ်သိၣ်တၢ်သီတဖၣ် လၢယကတဲသုလၢ တနံၤအံၤတက့ၢ်. သုကဘၣ်မၤလိ တၢ်သ့ၣ်တဖၣ်န့ၣ် ဒီးမၤထွဲအီၤ လီၤတံၢ်လီၤဆဲးလီၤ. ၂ ပကစၢ် ယဟိဝၤယွၤ မၤတ့ၢ် တၢ်အၢၣ်လီၤအီလီၤဒီးပှၤ လၢဃိၤရ့းလီၤ.+ ၃ မ့ၢ်ဒၣ် ယဟိဝၤယွၤ မၤတၢ်အၢၣ်လီၤအီလီၤဒီး ပဝဲခဲလၢာ်လၢ အအိၣ်ဖဲအံၤ လၢတနံၤအံၤ ဒီးတမ့ၢ် အမၤဝဲဒီး ပမိၢ်ပၢ်ဖံဖု လၢပျၢၤတဖၣ်ဘၣ်. ၄ ယဟိဝၤယွၤ တဲတၢ်ဒီးသုလၢ မဲာ်သကိးမဲာ် လၢကစၢၢ်လိၤ လၢမ့ၣ်အူကျါလီၤ.+ ၅ ဖဲန့ၣ်အခါ သုပျံၤတၢ်လၢ မ့ၣ်အူအဃိ ဒီးသုတလဲၤထီၣ်လၢ ကစၢၢ်လိၤဘၣ်အဃိ+ ယဆၢထၢၣ်လၢ သုဒီးယဟိဝၤယွၤ အဘၢၣ်စၢၤ+ ဒ်သိး ယကတဲဘၣ်သု တၢ်လၢ ယဟိဝၤယွၤ တဲဝဲတဖၣ် အဂီၢ်လီၤ. အဝဲတဲဝဲလၢ
၆ “‘ယမ့ၢ်သုကစၢ် ယဟိဝၤယွၤ လၢအဒုးဟးထီၣ်သုလၢ ကီၢ်အဲၤကူပတူး ဖဲသုကဲကုၢ် အလီၢ်လီၤ.+ ၇ နကဘၣ် ဘူၣ်ထီၣ်ဘါထီၣ် ထဲယၤတဂၤ ဒီးနတဘၣ် ဘူၣ်ထီၣ်ဘါထီၣ် ယွၤအဂၤတဖၣ် နီတဘျီဘၣ်. +
၈ “‘နတဘၣ်တ့ထီၣ် တၢ်အက့ၢ်အဂီၤ မ့တမ့ၢ် တၢ်ဂီၤတၢ်ဖှီၣ်လၢ+ အလီၤဂာ်ဒီး တၢ်အိၣ်လၢ မူခိၣ်ထးမ့ၢ်ဂ့ၤ, တၢ်အိၣ်လၢ ဟီၣ်ခိၣ်လာ်မ့ၢ်ဂ့ၤ, တၢ်အိၣ်လၢ ထံကျါမ့ၢ်ဂ့ၤ လၢနဂီၢ် နီတမံၤတဂ့ၤ. ၉ နတဘၣ်ဘါ တၢ်သ့ၣ်တဖၣ်အံၤ မ့တမ့ၢ် မၤအတၢ်တဂ့ၤ.+ နကစၢ် ယဟိဝၤယွၤ ယဲဒၣ်အံၤ မ့ၢ်ကစၢ်လၢ အမၤလိာ်ဝဲလၢ ပှၤကဘၣ် တီဒီးအီၤလၢ သးဒီဖျၢၣ်လီၤ.+ ဘၣ်ဃးဒီး ပှၤလၢ အသးဟ့ယၤန့ၣ် တၢ်စံၣ်ညီၣ်လၢ ပၢ်တဖၣ် အတၢ်ကမၣ် အဂီၢ်န့ၣ် ယကဒုးလီၤဘၣ်လၢ အဖိတဖၣ်အလိၤ ဒီးလၢ အလံၤအလိၤတဖၣ် အလိၤလီၤ.+ ၁၀ ဘၣ်ဆၣ် ပှၤလၢအအဲၣ်ယၤ ဒီးမၤထွဲ ယတၢ်မၤလိာ်တဖၣ်န့ၣ် ယကပာ်ဖျါထီၣ် တၢ်အဲၣ်လၢအတီ လၢအဝဲသ့ၣ် အဖီခိၣ် တုၤလီၤလၢ အစိၤလၢ အကထိလီၤ.
၁၁ “‘နတဘၣ်သူ နကစၢ် ယဟိဝၤယွၤ အမံၤလၢ တၢ်တပာ်ကဲဘၣ် အပူၤတဂ့ၤ.+ ပှၤလၢ အသူအမံၤလၢ တၢ်တပာ်ကဲဘၣ် အပူၤန့ၣ် ယဟိဝၤယွၤ တပျဲလၢ အဝဲသ့ၣ် ကပူၤဖျဲးဒီး တၢ်စံၣ်ညီၣ်ဘၣ်.+
၁၂ “‘ဒ်နကစၢ် ယဟိဝၤယွၤ မၤလိာ်နၤအသိး မၤထွဲ မုၢ်အိၣ်ဘှံးနံၤ အတၢ်သိၣ်တၢ်သီ ဒ်သိး နကပာ်စီဆှံအီၤ အဂီၢ်တက့ၢ်.+ ၁၃ နကဘၣ်မၤ နတၢ်မၤခဲလၢာ် လၢဃုသီ အတီၢ်ပူၤလီၤ.+ ၁၄ ဘၣ်ဆၣ် နွံသီတသီန့ၣ် မ့ၢ်ဝဲ မုၢ်အိၣ်ဘှံးနံၤလၢ နကစၢ် ယဟိဝၤယွၤ အဂီၢ်လီၤ.+ နတဘၣ် မၤတၢ်မၤ နီတမံၤတဂ့ၤ.+ နၤမ့ၢ်ဂ့ၤ, နဖိမုၣ်ဖိခွါမ့ၢ်ဂ့ၤ, နကုၢ်မုၣ်ကုၢ်ခွါမ့ၢ်ဂ့ၤ, နကျီၢ်ဖါမ့ၢ်ဂ့ၤ, နကသ့ၣ်ယီၤမ့ၢ်ဂ့ၤ, နဆၣ်ဖိကီၢ်ဖိ အဒၢ တမံၤဂ့ၤတမံၤဂ့ၤ မ့ၢ်ဂ့ၤ ဒီးပှၤထံဂၤကီၢ်ဂၤဖိလၢ အအိၣ်လၢ နဝ့ၢ်တဖၣ်အပူၤ မ့ၢ်ဂ့ၤန့ၣ် တဘၣ်မၤတၢ်မၤ နီတမံၤဘၣ်.+ နကုၢ်ပိာ်မုၣ် ဒီးကုၢ်ပိာ်ခွါတဖၣ်န့ၣ် ကဘၣ်အိၣ်ဘှံး ဒ်သိးနၤလီၤ.+ ၁၅ သ့ၣ်နီၣ်ထီၣ်လၢ နဘၣ်ကဲကုၢ်လၢ ကီၢ်အဲၤကူပတူး အပူၤ ဒီးနကစၢ် ယဟိဝၤယွၤ ထုးထီၣ်နၤဖဲန့ၣ် လၢစုလၢ အဂံၢ်ဆူၣ်ဘါဆူၣ် ဒီးစုလၢ အယူာ်ဃီၤအသးလီၤ.+ လၢတၢ်န့ၣ်အဃိ နကစၢ် ယဟိဝၤယွၤ မၤလိာ်နၤလၢ နကမၤထွဲ မုၢ်အိၣ်ဘှံးနံၤ အတၢ်သိၣ်တၢ်သီလီၤ.
၁၆ “‘ယူးယီၣ်ပာ်ကဲ နမိၢ်ဒီးနပၢ်+ ဒ်နကစၢ် ယဟိဝၤယွၤ မၤလိာ်နၤအသိး တက့ၢ်. နမ့ၢ်မၤ ဒ်န့ၣ်န့ၣ် ကီၢ်တဘ့ၣ်လၢ နကစၢ် ယဟိဝၤယွၤ ကဟ့ၣ်လီၤနၤန့ၣ် နကအိၣ်မူဘၣ်လၢအပူၤ ဖးယံာ်ညါ ဒီးနတၢ်အိၣ်မူ ကလဲၤအသး ဂ့ၤဂ့ၤဘၣ်ဘၣ်လီၤ.+
၁၇ “‘နတဘၣ် မၤသံ ပှၤနီတဂၤတဂ့ၤ.+
၁၈ “‘နတဘၣ် အဲၣ်ဘၢမါအဲၣ်ဘၢဝၤတဂ့ၤ.+
၁၉ “‘နတဘၣ် ဟုၣ်တၢ်တဂ့ၤ.+
၂၀ “‘နတဘၣ် အုၣ်နသး ကဘျံးကဘျၣ် ဘၣ်ဃးဒီး ပှၤအဂၤတဂ့ၤ.+
၂၁ “‘နတဘၣ် လီကီပှၤဂၤ အမါတဂ့ၤ.+ ပှၤဂၤ အဟံၣ်မ့ၢ်ဂ့ၤ, အစံာ်ပျီမ့ၢ်ဂ့ၤ, အကုၢ်မုၣ်မ့ၢ်ဂ့ၤ, အကုၢ်ခွါမ့ၢ်ဂ့ၤ, အကျီၢ်ဖါမ့ၢ်ဂ့ၤ, အကသ့ၣ်ယီၤမ့ၢ်ဂ့ၤ ဒီးတၢ်လၢအကဲ ပှၤဂၤအတၢ်န့ၣ် နတဘၣ်လီကီအီၤ နီတမံၤတဂ့ၤ.’+
၂၂ “လၢကစၢၢ်လိၤန့ၣ် ယဟိဝၤယွၤ တဲဘၣ်ဝဲ ပှၤဂီၢ်မုၢ်ခဲလၢာ်လၢ တၢ်မၤလိာ်တဖၣ်အံၤလီၤ. အဝဲတဲတၢ်လၢ အကလုၢ်ဖးဒိၣ် လၢမ့ၣ်အူ ဒီးတၢ်အၢၣ်ခံးသူအကျါ+ ဒီးအဝဲ တတဲဝဲ အါန့ၢ်ဒံး တၢ်ကတိၤတဖၣ်အံၤဘၣ်. ဝံၤဒီး အဝဲကွဲးလီၤဝဲ တၢ်ကတိၤတဖၣ်န့ၣ်လၢ လၢၢ်ဘ့ၣ်ဘၣ်ခံဘ့ၣ် အလိၤ ဒီးဟ့ၣ်လီၤယၤလီၤ.+
၂၃ “ဘၣ်ဆၣ် ဖဲမ့ၣ်အူအီၣ်တၢ်လၢ ကစၢၢ်ခိၣ် ဒီးသုနၢ်ဟူ တၢ်ကလုၢ်သီၣ်လၢ တၢ်ခံးကျါအခါ+ သုဒူၣ်အခိၣ်တဖၣ် ဒီးပှၤသူၣ်က့သးပှၢ်တဖၣ်န့ၣ် ဟဲလၢယအိၣ် ကိးဂၤဒဲးလီၤ. ၂၄ ဒီးသုတဲလၢ ‘ယဟိဝၤယွၤ ပာ်ဖျါထီၣ်န့ၢ်ပှၤလၢ အလၤကပီၤ ဒီးအစိကမီၤ ဒီးပနၢ်ဟူဘၣ် အကလုၢ် လၢမ့ၣ်အူကျါလီၤ.+ တနံၤအံၤန့ၣ် ပထံၣ်ဘၣ်လၢ ကစၢ်ယွၤ တဲတၢ်ဒီး ပှၤဟီၣ်ခိၣ်ဖိသနာ်က့ အဝဲသ့ၣ် ဆဲးအိၣ်မူ သ့ဒံးလီၤ.+ ၂၅ ပတအဲၣ်ဒိးသံ ခဲအံၤဒံးဘၣ်. ဘၣ်သ့ၣ်သ့ၣ် မ့ၣ်အူဖးဒိၣ်အံၤ ကအီၣ်ကွံာ်ပှၤလီၤ. ပမ့ၢ်ဆဲးနၢ်ဟူဒံး ပကစၢ် ယဟိဝၤယွၤ အကလုၢ်န့ၣ် ပကသံ သပှၢ်ကတၢၢ်လီၤ. ၂၆ ပှၤဟီၣ်ခိၣ်ဖိ လၢအနၢ်ဟူ ယွၤလၢ အမူဝဲတဂၤ အကလုၢ်သီၣ် လၢမ့ၣ်အူကျါ ဒ်ပနၢ်ဟူအသိး ဒီးဆဲးအိၣ်မူဝဲန့ၣ် တအိၣ်ဘၣ်. ၂၇ အဃိ နကဘၣ် လဲၤသုးဘူးနသး လၢနကဒိကနၣ် တၢ်လၢ ပကစၢ် ယဟိဝၤယွၤ တဲဝဲလီၤ. ဒီးနကဘၣ် ဟဲက့ၤတဲဘၣ်ပှၤ တၢ်လၢ ပကစၢ် ယဟိဝၤယွၤ တဲနၤခဲလၢာ် ဒီးပကဒိကနၣ် ဒီးမၤထွဲအီၤလီၤ.’+
၂၈ “ယဟိဝၤယွၤ နၢ်ဟူ တၢ်လၢသုတဲယၤ ဒီးယဟိဝၤယွၤ တဲယၤလၢ ‘ယနၢ်ဟူ တၢ်လၢ ပှၤဂီၢ်မုၢ်တဖၣ်အံၤ တဲနၤလီၤ. တၢ်လၢ အဝဲသ့ၣ် တဲဝဲန့ၣ် ဂ့ၤဝဲခဲလၢာ်လီၤ.+ ၂၉ အဝဲသ့ၣ် မ့ၢ်အိၣ်ဘၣ်ဖုးဒီး သးလၢ အအဲၣ်ဒိးပျံၤယၤဒ်အံၤ+ ဒီးမၤထွဲ ယတၢ်မၤလိာ်ခဲလၢာ် ထီဘိန့ၣ်+ တၢ်ကလဲၤအသး ဂ့ၤဂ့ၤဘၣ်ဘၣ်လၢ အဝဲသ့ၣ်အဂီၢ် ဒီးလၢ အဝဲသ့ၣ် အဖိအလံၤတဖၣ်အဂီၢ် လီၤထူလီၤယိာ်လီၤ.+ ၃၀ က့ၤတဲ အဝဲသ့ၣ်လၢ “က့ၤလၢ သုဒဲတက့ၢ်.” ၃၁ ဘၣ်ဆၣ် မ့မ့ၢ်နၤန့ၣ် နကဘၣ် အိၣ်ဒီးယၤ ဖဲအံၤ ဒီးယကတဲဘၣ်နၤ တၢ်မၤလိာ်တဖၣ်, တၢ်ဘျၢတဖၣ် ဒီးတၢ်သိၣ်တၢ်သီတဖၣ် လၢနကဘၣ် သိၣ်လိ အဝဲသ့ၣ်လီၤ. အဝဲသ့ၣ် ကဘၣ်မၤထွဲဝဲ တၢ်သ့ၣ်တဖၣ်န့ၣ် ဖဲအဝဲသ့ၣ်အိၣ်ဝဲလၢ ကီၢ်တဘ့ၣ်လၢ အဝဲသ့ၣ် ကလဲၤမၤန့ၢ်ဝဲ အပူၤလီၤ.’ ၃၂ အဃိ သုဝဲသ့ၣ်အံၤ သုကဘၣ်ပလီၢ်သုသး ဒ်သိး သုကမၤဒ် သုကစၢ် ယဟိဝၤယွၤ မၤလိာ်သုအသိး လီၤတံၢ်လီၤဆဲးလီၤ.+ ဒီးသုတဘၣ် ဃၣ်ကွံာ်သုသးလၢ ကျဲလၢ သုစုစ့ၣ်မ့ၢ်ဂ့ၤ လၢသုစုထွဲမ့ၢ်ဂ့ၤဘၣ်.+ ၃၃ သုကဘၣ် လဲၤပိာ်ကျဲ ဒ်သုကစၢ် ယဟိဝၤယွၤ မၤလိာ်သုအသိး ခဲလၢာ်+ ဒ်သိး သုကဘီၣ်ထီၣ်ညီထီၣ် ဒီးအိၣ်မူဘၣ် ယံာ်ယံာ်လၢ ကီၢ်တဘ့ၣ်လၢ သုကမၤန့ၢ်အီၤအပူၤ အဂီၢ်လီၤ.+
၆ “တၢ်တဖၣ်အံၤ မ့ၢ်ဝဲ တၢ်မၤလိာ်တဖၣ်, တၢ်ဘျၢတဖၣ် ဒီးတၢ်သိၣ်တၢ်သီတဖၣ်လၢ သုကစၢ် ယဟိဝၤယွၤ ဟ့ၣ်လီၤဝဲ ဒ်သိး အကသိၣ်လိသု အဂီၢ်လီၤ. ဖဲသုလဲၤနုာ်လီၤလၢ ကီၢ်တဘ့ၣ်လၢ သုကမၤန့ၢ်အီၤ အပူၤအခါန့ၣ် သုကဘၣ်မၤထွဲ တၢ်သ့ၣ်တဖၣ်အံၤလီၤ. ၂ လၢသုတၢ်အိၣ်မူ ဒီတစိၤန့ၣ် သုဒီး သုဖိသုလံၤတဖၣ် ကဘၣ်ပျံၤ သုကစၢ် ယဟိဝၤယွၤ ဒီးမၤထွဲ အတၢ်ဘျၢတဖၣ် ဒီးအတၢ်မၤလိာ်တဖၣ် လၢယမၤလိာ်သုလီၤ.+ သုမ့ၢ်မၤ ဒ်န့ၣ်န့ၣ် သုကအိၣ်မူဘၣ် ဖးယံာ်ညါလီၤ.+ ၃ အိ အံၣ်စရ့လးဧၢ, သုကဘၣ် ဒိကနၣ် ဒီးမၤထွဲ တၢ်သ့ၣ်တဖၣ်န့ၣ် လီၤတံၢ်လီၤဆဲးလီၤ. သုမ့ၢ်မၤ ဒ်န့ၣ်န့ၣ် သုတၢ်အိၣ်မူ ကလဲၤအသး ဂ့ၤဂ့ၤဘၣ်ဘၣ် ဒီးသုကအါထီၣ်ဂီၢ်ထီၣ်လၢ ကီၢ်တဘ့ၣ်လၢ တၢ်နုၢ်ထံဒီး ကနဲစီ ယွၤလီၤဝဲလၢအပူၤ ဒ်သုမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤ အၢၣ်လီၤသုအသိးလီၤ.
၄ “အံၣ်စရ့လးဧၢ, ဒိကနၣ်တက့ၢ်. ပကစၢ် ယဟိဝၤယွၤန့ၣ် မ့ၢ်ဝဲ ယဟိဝၤယွၤ ထဲတဂၤဧိၤလီၤ.+ ၅ နကဘၣ် အဲၣ်နကစၢ် ယဟိဝၤယွၤ လၢနသးဒီဖျၢၣ်, လၢနတၢ်အိၣ်မူ ကိးသနၢၣ်ဒဲးအပူၤ+ ဒီးလၢနဂံၢ်နဘါ ခဲလၢာ်လီၤ.+ ၆ တၢ်ကတိၤလၢ ယမၤလိာ်နၤ လၢတနံၤအံၤန့ၣ် ကဘၣ်အိၣ်လၢ နသးပူၤ ၇ ဒီးနကဘၣ်ကွဲးလီၤ* တၢ်ကတိၤတဖၣ်အံၤလၢ နဖိတဖၣ် အသးလိၤ+ ဒီးဖဲနဆ့ၣ်နီၤလၢ နဟံၣ်ပူၤ အခါမ့ၢ်ဂ့ၤ, ဖဲနဟးလၢ ကျဲအခါမ့ၢ်ဂ့ၤ, ဖဲနမံနီၤအခါမ့ၢ်ဂ့ၤ, ဖဲနဂဲၤထၢၣ် အခါမ့ၢ်ဂ့ၤ နကဘၣ်တဲဘၣ် အဝဲသ့ၣ် ဘၣ်ဃးဒီး တၢ်ကတိၤတဖၣ်အံၤလီၤ.+ ၈ စၢဃာ်တၢ်ကတိၤတဖၣ်အံၤလၢ သုစုလိၤ ဒ်တၢ်ဒုးသ့ၣ်နီၣ်ထီၣ်တၢ် တမံၤအသိး ဒီးတၢ်ကတိၤတဖၣ်အံၤ ကဘၣ်မ့ၢ် ဒ်ခိၣ်ကျီၤလၢ သုမဲာ်တူၢ်ခိၣ် အလိၤလီၤ.+ ၉ ကွဲးလီၤအီၤလၢ သုဟံၣ် အပဲတြီ အဒီခိၣ် ဒီးဝ့ၢ်အတြဲၤတဖၣ် အလိၤတက့ၢ်.
၁၀ “သုကစၢ် ယဟိဝၤယွၤ အၢၣ်လီၤ သုဖုဖးဒိၣ်တဖၣ် လၢအမ့ၢ် စီၤအၤဘြၤဟၣ်, စီၤအံၤစဲး ဒီးစီၤယၤကိာ်လၢ အကဟ့ၣ်လီၤသု လၢကီၢ်တဘ့ၣ် ဒီးအဝဲ ကဆှၢနုာ်သုလၢ ကီၢ်တဘ့ၣ်န့ၣ်အပူၤလီၤ.+ ဒီးဖဲန့ၣ်န့ၣ် ကအိၣ်ဒီး ဝ့ၢ်ဖးဒိၣ်လၢ အဖျါဂ့ၤ လၢသုတတ့ထီၣ်အီၤဘၣ်တဖၣ်,+ ၁၁ ဟံၣ်တဖၣ် လၢအပှဲၤဝဲဒီး တၢ်ဖိတၢ်လံၤလၢအဂ့ၤ အကလုာ်ကလုာ်လၢ သုတမၤတၢ် ဒ်သိး သုကဒိးန့ၢ်ဘၣ်အီၤဘၣ်, ထံကမါတဖၣ်လၢ သုတခူၣ်လီၤအီၤဘၣ်, ဒီးစပံးကျီးတဖၣ် ဒီးသ့ၣ်စၤယံးတဖၣ် လၢသုတသူၣ်လီၤအီၤဘၣ်လီၤ. ဒီးသုကအီၣ်ဘၣ်အီဘၣ် ဒီးသုကပှဲၤဒီး တၢ်သူၣ်မံသးမုာ်လီၤ.+ ၁၂ ဖဲန့ၣ်အခါ နကဘၣ် ပလီၢ်နသး ဒ်သိး နသုတသးပ့ၤနီၣ် ယဟိဝၤယွၤလၢ+ အဒုးဟးထီၣ်နၤလၢ ကီၢ်အဲၤကူပတူး ဖဲနကဲကုၢ် အလီၢ်န့ၣ် တဂ့ၤအဂီၢ်လီၤ. ၁၃ နကဘၣ်ပျံၤ နကစၢ် ယဟိဝၤယွၤ+ ဒီးနကဘၣ် ဘူၣ်ထီၣ်ဘါထီၣ်အီၤ+ ဒီးနကဘၣ် အၢၣ်လီၤတၢ် လၢအမံၤလီၤ.+ ၁၄ ယွၤအဂၤတဖၣ် လၢအမ့ၢ် ပှၤကလုာ်လၢ အအိၣ်ဝးတရံးသုတဖၣ် အယွၤ တဂၤဂ့ၤ တဂၤဂ့ၤန့ၣ် သုတဘၣ် ဘူၣ်ထီၣ်ဘါထီၣ်အီၤဘၣ်.+ ၁၅ သုကစၢ် ယဟိဝၤယွၤ လၢအအိၣ်လၢ သုကျါန့ၣ် မ့ၢ်ယွၤလၢ အမၤလိာ်ဝဲလၢ ပှၤကဘၣ် တီဒီးအီၤလၢ သးဒီဖျၢၣ်လီၤ.+ သုမ့ၢ်ဘူၣ်ထီၣ်ဘါထီၣ် ယွၤအဂၤတဖၣ်န့ၣ် သုကစၢ် ယဟိဝၤယွၤ ကသးဒိၣ်ထီၣ်သု+ ဒီးကမၤဟးဂီၤကွံာ်သု လၢဟီၣ်ခိၣ်ချၢလီၤ.+
၁၆ “သုတဘၣ်မၤကွၢ် သုကစၢ် ယဟိဝၤယွၤ ဒ်သုမၤကွၢ်အီၤလၢ+ မးစၤ* အပူၤတဂ့ၤ.+ ၁၇ သုကစၢ် ယဟိဝၤယွၤ အတၢ်မၤလိာ်, အတၢ်ဒုးသ့ၣ်နီၣ်ထီၣ်တဖၣ် ဒီးအတၢ်ဘျၢတဖၣ် လၢအမၤလိာ်သုန့ၣ် သုကဘၣ်မၤထွဲအီၤ လီၤတံၢ်လီၤဆဲးလီၤ. ၁၈ ဒ်သိး သုတၢ်အိၣ်မူ ကလဲၤအသး ဂ့ၤဂ့ၤဘၣ်ဘၣ် ဒီးသုကလဲၤနုာ် မၤန့ၢ်ဘၣ် ကီၢ်လၢ အဂ့ၤတဘ့ၣ် ဒ်ယဟိဝၤယွၤ အၢၣ်လီၤ သုမိၢ်ပၢ်ဖံဖု လၢပျၢၤတဖၣ် အသိးအဂီၢ် သုကဘၣ်မၤတၢ်လၢ ယဟိဝၤယွၤ ထံၣ်ဝဲလၢအဂ့ၤ ဒီးလၢအဘၣ်န့ၣ်လီၤ.+ ၁၉ ဒီးသုကနီဟးထီၣ်ကွံာ် သုဒုၣ်သုဒါတဖၣ် လၢသုမဲာ်ညါ ဒ်ယဟိဝၤယွၤ အၢၣ်လီၤဝဲအသိးလီၤ.+
၂၀ “ခါဆူညါန့ၣ် သုဖိခွါတဖၣ် ကသံကွၢ်သုလၢ ‘ဘၣ်မနုၤအဃိ ပကစၢ် ယဟိဝၤယွၤ ဟ့ၣ်လီၤပှၤ တၢ်ဒုးသ့ၣ်နီၣ်ထီၣ်တဖၣ်, တၢ်ဘျၢတဖၣ် ဒီးတၢ်သိၣ်တၢ်သီတဖၣ်အံၤလဲၣ်.’ ၂၁ ဖဲန့ၣ်အခါ သုကဘၣ်တဲ သုဖိခွါတဖၣ်လၢ ‘လၢညါ ပဘၣ်ကဲ ဖၤရိၤအကုၢ်လၢ ကီၢ်အဲၤကူပတူး အပူၤလီၤ. ဘၣ်ဆၣ် ယဟိဝၤယွၤ ထုးထီၣ်ကွံာ်ပှၤ လၢကီၢ်အဲၤကူပတူး အပူၤ လၢစုလၢ အဂံၢ်ဆူၣ်ဘါဆူၣ်လီၤ. ၂၂ ယဟိဝၤယွၤ ပာ်ဖျါထီၣ် တၢ်ပနီၣ်လီၤလးတဖၣ် ဒီးတၢ်လီၤလး အဒိၣ်အမုၢ်တဖၣ် လၢအမၤနးမၤဖှီၣ် ပှၤအဲၤကူပတူးဖိ,+ ဖၤရိၤ ဒီးပှၤလၢအအိၣ်လၢ အဟံၣ်ပူၤ ကိးဂၤဒဲးလီၤ.+ ၂၃ ဒီးအဝဲ ထုးထီၣ်ကွံာ်ပှၤဖဲန့ၣ် ဒီးဆှၢပှၤဖဲအံၤ ဒ်သိး ကဟ့ၣ်လီၤပှၤလၢ ကီၢ်တဘ့ၣ်လၢ အဝဲ အၢၣ်လီၤဝဲလၢ အကဟ့ၣ်လီၤ ပမိၢ်ပၢ်ဖံဖု လၢပျၢၤတဖၣ်လီၤ.+ ၂၄ ဝံၤဒီး ယဟိဝၤယွၤ မၤလိာ်ပှၤလၢ ပကမၤထွဲ တၢ်ဘျၢတဖၣ်အံၤ ဒီးပကပျံၤ ပကစၢ် ယဟိဝၤယွၤ ဒ်သိး ပကန့ၢ်ဘၣ်အဘျုး ထီဘိအဂီၢ်+ ဒီးဒ်သိး ပကဆဲးအိၣ်မူ+ ဒ်လၢ မုၢ်မဆါတနံၤအံၤ အသိး အဂီၢ်လီၤ. ၂၅ ဒီးဒ် ပကစၢ် ယဟိဝၤယွၤ မၤလိာ်ပှၤ အသိး ပမ့ၢ်မၤထွဲ တၢ်မၤလိာ်တဖၣ်အံၤ ခဲလၢာ် လၢတၢ်ဒိကနၣ် အပူၤန့ၣ် အကပာ်ပနီၣ်ပှၤ ဒ်ပှၤတီပှၤလိၤအသိးလီၤ.’+
၇ “ဖဲသုကစၢ် ယဟိဝၤယွၤ ဆှၢနုာ်သုလၢ ထံကီၢ်လၢ သုကလဲၤနုာ်လီၤ မၤန့ၢ်အီၤအခါ+ အဝဲ ကနီဟးထီၣ်ကွံာ် ပှၤကလုာ်လၢ အနီၣ်ဂံၢ် အါတဖၣ် လၢသုမဲာ်ညါလီၤ.+ ပှၤနွံကလုာ်လၢ အနီၣ်ဂံၢ်အါန့ၢ်သု ဒီးအဆူၣ်န့ၢ်သုတဖၣ်အံၤန့ၣ်+ မ့ၢ်ဝဲ ပှၤဃ့ၤသးဖိ, ပှၤကံၢ်ကၣ်ဖိ, ပှၤအမိၢ်ဖိ,+ ပှၤကနၤဧၣ်ဖိ, ပှၤပရးစၤဖိ, ပှၤဃံၤဝံဖိ ဒီးပှၤယဘူၣ်ဖိတဖၣ်လီၤ.+ ၂ သုကစၢ် ယဟိဝၤယွၤ ကဟ့ၣ်လီၤ အဝဲသ့ၣ်လၢ သုစုပူၤ ဒီးသုကမၤနၢၤ အဝဲသ့ၣ်လီၤ.+ သုကဘၣ် မၤဟးဂီၤကွံာ် အဝဲသ့ၣ် သပှၢ်ကတၢၢ်လီၤ.+ သုတဘၣ်မၤ တၢ်အၢၣ်လီၤအီလီၤဒီး အဝဲသ့ၣ် နီတခါဘၣ် ဒီးသုတဘၣ် သးကညီၤ အဝဲသ့ၣ် စ့ၢ်ကီးဘၣ်.+ ၃ သုတဘၣ် ဒီဒိၣ်လိာ်သး ဒီးအဝဲသ့ၣ်တဂ့ၤ. သုတဘၣ်ဟ့ၣ် သုဖိမုၣ်တဖၣ်လၢ အဝဲသ့ၣ် အဖိခွါတဖၣ် အဂီၢ်ဘၣ်. ဒီးအဝဲသ့ၣ် အဖိမုၣ်တဖၣ်န့ၣ် သုတဘၣ် ဟံးန့ၢ်အီၤလၢ သုဖိခွါတဖၣ်အဂီၢ် စ့ၢ်ကီးဘၣ်.+ ၄ အဝဲသ့ၣ် ကဒုးဃၣ်ကွံာ် သုဖိခွါတဖၣ် ဒ်သိး အသုတဒိကနၣ် ယွၤအကလုၢ်တဂ့ၤအဂီၢ် ဒီးကမၤယွၤလၢ အဂၤတဖၣ် အတၢ်လီၤ.+ ဖဲန့ၣ်န့ၣ် ယဟိဝၤယွၤ ကသးဒိၣ်ထီၣ်သု ဒီးကမၤဟးဂီၤသု ချ့ချ့လီၤ.+
၅ “လၢတၢ်န့ၣ်အလီၢ် သုကဘၣ်မၤ အဝဲသ့ၣ် ဒ်အံၤလီၤ. မၤလီၤပှီၢ်ကွံာ် အဝဲသ့ၣ် အတၢ်လုၢ်လီၢ်တဖၣ်, မၤကၢ်ကွံာ် အဝဲသ့ၣ် အလၢၢ်ထူၣ်စီဆှံတဖၣ်+ ဒီးကျီကွံာ် အဝဲသ့ၣ် အတၢ်စီဆှံ အထူၣ်တဖၣ်+ ဒီးဒွဲၣ်အူထီၣ်ကွံာ် အဝဲသ့ၣ် အတၢ်ဂီၤတၢ်ဖှီၣ် တဖၣ်တက့ၢ်.+ ၆ သုမ့ၢ် ပှၤစီဆှံတဒူၣ် လၢယဟိဝၤယွၤ အဂီၢ် ဒီးလၢ ပှၤဟီၣ်ခိၣ်ဖိ ခဲလၢာ်အကျါန့ၣ် သုကစၢ်ယဟိဝၤယွၤ ဃုထၢထီၣ်သု ဒ်အပှၤဂီၢ်မုၢ်အသိး ဒီးဒ်ပှၤလၢ အလုၢ်ဒိၣ်ပှ့ၤဒိၣ်တဒူၣ်* လၢအဂီၢ်လီၤ.+
၇ “ယဟိဝၤယွၤ ပာ်ဖျါထီၣ် တၢ်အဲၣ်တၢ်ကွံ လၢသုဖီခိၣ် ဒီးဃုထၢထီၣ်သုန့ၣ် တမ့ၢ်လၢ သုနီၣ်ဂံၢ် အါကတၢၢ် အဃိဘၣ်.+ နီၢ်ကီၢ်န့ၣ် လၢပှၤကလုာ်ခဲလၢာ်အကျါန့ၣ် သုမ့ၢ်ပှၤလၢ အနီၣ်ဂံၢ် စှၤကတၢၢ်လီၤ.+ ၈ မ့ၢ်လၢ ယဟိဝၤယွၤ အဲၣ်သု ဒီးမၤလၢပှဲၤဝဲ အတၢ်အၢၣ်လီၤလၢ အမၤဝဲဒီး သုမိၢ်ပၢ်ဖံဖု လၢပျၢၤတဖၣ်အဃိ+ ယဟိဝၤယွၤ ဒုးဟးထီၣ်သု ခီဖျိ စုလၢအပှဲၤဒီး တၢ်စိတၢ်ကမီၤ ဒ်သိး ကမၤပူၤဖျဲးသုလၢ ကုၢ်အလီၢ်+ လၢအဲၤကူပတူး အစီၤပၤဖၤရိၤ အတၢ်စိတၢ်ကမီၤ အဖီလာ်အဂီၢ်လီၤ. ၉ သုဝဲသ့ၣ်အံၤ သုသ့ၣ်ညါ ဂ့ၤဂ့ၤလၢ သုကစၢ် ယဟိဝၤယွၤန့ၣ် မ့ၢ်ယွၤလၢ အမ့ၢ်အတီတဂၤ ဒီးယွၤလၢ အသးတီတဂၤလၢ အမၤလၢပှဲၤဝဲ အတၢ်အၢၣ်လီၤအီလီၤ ဒီးပာ်ဖျါထီၣ် တၢ်အဲၣ်လၢအတီလၢ ပှၤလၢ အအဲၣ်အီၤ ဒီးမၤထွဲ အတၢ်မၤလိာ်တဖၣ် အဖီခိၣ် တုၤလီၤလၢ ပှၤအစိၤ တကထိလီၤ.+ ၁၀ မ့မ့ၢ်ပှၤလၢ အသးဟ့အီၤန့ၣ် အကဟ့ၣ်ကၣ်က့ၤ အဝဲသ့ၣ်လၢ တၢ်ဟးဂူာ်ဟးဂီၤလီၤ.+ ဒီးအတကဘှၢလၢ ကစံၣ်ညီၣ် ပှၤလၢ အသးဟ့အီၤတဖၣ်ဘၣ်, အကဟ့ၣ်ကၣ်က့ၤ အဝဲသ့ၣ်လီၤ. ၁၁ အဃိ ပလီၢ်နသးဒ်သိး နကမၤထွဲ တၢ်မၤလိာ်တဖၣ်, တၢ်ဘျၢတဖၣ် ဒီးတၢ်သိၣ်တၢ်သီလၢ ယမၤလိာ်နၤလၢ တနံၤအံၤတက့ၢ်.
၁၂ “သုမ့ၢ် ဆဲးဒိကနၣ် တၢ်သိၣ်တၢ်သီတဖၣ်အံၤ ဒီးအိၣ်မူမၤထွဲအီၤန့ၣ် သုကစၢ် ယဟိဝၤယွၤ ကမၤလၢထီၣ်ပှဲၤထီၣ် အတၢ်အၢၣ်လီၤအီလီၤ ဒီးပာ်ဖျါထီၣ် တၢ်အဲၣ်လၢအတီ ဒ်အအၢၣ်လီၤဝဲ သုမိၢ်ပၢ်ဖံဖု လၢပျၢၤတဖၣ်အသိးလီၤ. ၁၃ အဝဲ ကအဲၣ်နၤ ဒီးကဆိၣ်ဂ့ၤနၤ ဒီးကမၤအါထီၣ်ဂီၢ်ထီၣ် နဖိနလံၤလီၤ. ဖဲနအိၣ်ဘၣ်လၢကီၢ်လၢ အအၢၣ်လီၤဝဲ နမိၢ်ပၢ်ဖံဖု လၢပျၢၤတဖၣ် လၢအကဟ့ၣ်နၤ အခါန့ၣ်+ အဝဲကဆိၣ်ဂ့ၤနၤ အဃိ နဖိကအိၣ် အါအါဂီၢ်ဂီၢ်+ ဒီးအဝဲ ကဆိၣ်ဂ့ၤတၢ်လၢ အမဲထီၣ်သၣ်ထီၣ် လၢနဟီၣ်ခိၣ်, နဘု, နစပံးထံအသီ, နသိဧိၤချါဧိၤ,+ နကျီၢ်ဖိတဖၣ်, နသိဖိတဖၣ်လီၤ. ၁၄ လၢပှၤခဲလၢာ် အကျါန့ၣ် သုကကဲထီၣ် ပှၤလၢ အဘၣ်ဆိၣ်ဂ့ၤ အါကတၢၢ်လီၤ.+ အဃိ လၢသုကျါန့ၣ် ပိာ်မုၣ်မ့ၢ်ဂ့ၤ, ပိာ်ခွါမ့ၢ်ဂ့ၤ, ဆၣ်ဖိကီၢ်ဖိတဖၣ်မ့ၢ်ဂ့ၤ လၢအကတူာ်ဖိန့ၣ် တအိၣ်ဘၣ်.+ ၁၅ ယဟိဝၤယွၤ ကထုးထီၣ်ကွံာ် တၢ်ဆူးတၢ်ဆါ ခဲလၢာ်လၢ သုကျါ ဒီးတၢ်ဆူးတၢ်ဆါ လၢအနးတဖၣ်လၢ သုထံၣ်ဘၣ်အီၤလၢ ကီၢ်အဲၤကူပတူး အပူၤန့ၣ် အတဒုးလီၤဘၣ်ဝဲလၢ သုလိၤဘၣ်.+ လၢတၢ်န့ၣ်အလီၢ် အကဒုးလီၤဘၣ်ဝဲလၢ ပှၤလၢ အသးဟ့သု ကိးဂၤဒဲး အလိၤလီၤ. ၁၆ ပှၤလၢ ယဟိဝၤယွၤ ဟ့ၣ်လီၤအီၤလၢ သုစုပူၤန့ၣ် သုကဘၣ် မၤဟးဂီၤကွံာ် အဝဲသ့ၣ် ကိးကလုာ်ဒဲးလီၤ.+ သုတဘၣ် သးကညီၤ အဝဲသ့ၣ်ဘၣ်+ ဒီးသုတဘၣ် မၤအဝဲသ့ၣ် အယွၤတဖၣ် အတၢ်ဘၣ်,+ မ့ၢ်လၢ အကကဲထီၣ် ပျံၤသကွီၤ လၢသုဂီၢ် အဃိလီၤ.+
၁၇ “ဘၣ်သ့ၣ်သ့ၣ် လၢသုသးပူၤန့ၣ် သုကတဲဘၣ်ဖုးလၢ ‘ပှၤအကလုာ်တဖၣ်အံၤ အပှၤနီၣ်ဂံၢ် အိၣ်အါန့ၢ်ဒံးပှၤအဃိ ပနီဟးထီၣ်ကွံာ် အဝဲသ့ၣ် ကသ့ဒ်လဲၣ်.’+ ၁၈ ဘၣ်ဆၣ် သုတဘၣ်ပျံၤ အဝဲသ့ၣ်ဘၣ်.+ သုကဘၣ် ဒုးသ့ၣ်နီၣ်ထီၣ်က့ၤသုသးလၢ သုကစၢ် ယဟိဝၤယွၤ မၤဝဲ ဖၤရိၤ ဒီးပှၤအဲၤကူပတူးဖိ ခဲလၢာ် ဒ်လဲၣ်န့ၣ်လီၤ.+ ၁၉ အဝဲ ဒုးလီၤဘၣ် တၢ်စံၣ်ညီၣ်ဖးဒိၣ်, တၢ်ပနီၣ်လီၤလးတဖၣ် ဒီးတၢ်လီၤလးတဖၣ်လၢ+ သုထံၣ်ဘၣ်အီၤ လၢသုမဲာ်လီၤ. ဒီးသုကစၢ် ယဟိဝၤယွၤ ယူာ်ဃီၤအစု ဒီးဒုးဟးထီၣ်ကွံာ်သု ခီဖျိလၢ စုလၢအပှဲၤဒီး တၢ်စိကမီၤလီၤ.+ ပှၤလၢသုပျံၤအီၤ သ့ၣ်တဖၣ်န့ၣ် သုကစၢ် ယဟိဝၤယွၤ ကမၤ အဝဲသ့ၣ်ခဲလၢာ် ဒ်န့ၣ်လီၤ.+ ၂၀ အဝဲသ့ၣ်အသး ကဟးဂီၤဆိပာ်စၢၤလၢ နကစၢ် ယဟိဝၤယွၤအဃိလီၤ. ဒီးပှၤလၢ အအိၣ်တ့ၢ်တဖၣ်+ ဒီးပှၤလၢ အအိၣ်ခူသူၣ်နၤန့ၣ် ကဟးဂီၤကွံာ်လီၤ. ၂၁ မ့ၢ်လၢ နကစၢ် ယဟိဝၤယွၤ လၢအမ့ၢ် ယွၤလၢအဒိၣ်အမုၢ် ဒီးလၢ အလီၤယူးယီၣ်ပာ်ကဲတဂၤန့ၣ်+ အိၣ်ဒီးနၤအဃိ တဘၣ်ပျံၤတၢ်လၢ အဝဲသ့ၣ်အဃိတဂ့ၤ.+
၂၂ “နကစၢ် ယဟိဝၤယွၤ ကနီဟးထီၣ်ကွံာ် ပှၤကလုာ်တဖၣ်အံၤ လၢနမဲာ်ညါ တစဲးဘၣ်တစဲး သပှၢ်ကတၢၢ်လီၤ.+ ဒ်သိး ဆၣ်ဖိကီၢ်ဖိ အမံၤ လၢတၢ်ပျီပူၤတဖၣ် သုတအါထီၣ်ဂီၢ်ထီၣ် ဒီးကဲထီၣ် တၢ်လီၤဘၣ်ယိၣ်လၢ နသးသမူ တဂ့ၤအဂီၢ် တၢ်တဟ့ၣ်နၤအခွဲးလၢ နကမၤဟးဂီၤကွံာ် ပှၤကလုာ်တဖၣ်အံၤ ချ့ချ့ဘၣ်. ၂၃ ယဟိဝၤယွၤ ကဟ့ၣ်လီၤ အဝဲသ့ၣ် လၢနစုပူၤ ဒီးကမၤနၢၤကွံာ် အဝဲသ့ၣ် ခဲလၢာ်ခဲဆ့ တုၤလၢ အဝဲသ့ၣ် ဟးဂီၤကွံာ်ဝဲ တစုလီၤ.+ ၂၄ အဝဲ ကဟ့ၣ်လီၤ အဝဲသ့ၣ် အစီၤပၤတဖၣ်လၢ နစုပူၤ+ ဒီးနကထူးသံကွံာ် အဝဲသ့ၣ် အမံၤလၢ မူခိၣ်အဖီလာ်လီၤ.+ တချုးလၢ နမၤဟးဂီၤကွံာ် အဝဲသ့ၣ် ခဲလၢာ်ဒံးဘၣ်န့ၣ်+ ပှၤထီဒါနၤတန့ၢ် နီတဂၤဘၣ်.+ ၂၅ သုကဘၣ် ဒွဲၣ်အူကွံာ် အဝဲသ့ၣ် အယွၤတဖၣ် လၢအမ့ၢ် တၢ်ဂီၤတၢ်ဖှီၣ်တဖၣ် လၢမ့ၣ်အူလီၤ.+ နတဘၣ်လီကီ စ့ညၣ်ဒီးထူ လၢအအိၣ်လၢ တၢ်ဂီၤတၢ်ဖှီၣ်တဖၣ်အံၤ အလိၤဘၣ်.+ ဒီးတဘၣ်ဟံးန့ၢ်အီၤလၢ နနီၢ်ကစၢ် အဂီၢ်တဂ့ၤ. တၢ်သ့ၣ်တဖၣ်န့ၣ် မ့ၢ်ဝဲ တၢ်လၢအလီၤသးဘၣ်အၢ လၢယဟိဝၤယွၤအဂီၢ် ဒီးကကဲထီၣ် ပျံၤသကွီၤလၢနဂီၢ်လီၤ.+ ၂၆ တၢ်လၢ အလီၤသးဘၣ်အၢ တမံၤဂ့ၤတမံၤဂ့ၤန့ၣ် နတဘၣ် ဟဲက့ၤစိာ်နုာ်အီၤ လၢနဟံၣ်ပူၤဘၣ်. နမ့ၢ်မၤဒ်န့ၣ်န့ၣ် ကစၢ်ယွၤကမၤဟးဂီၤ တၢ်တခါန့ၣ် ဃုာ်ဒီးနၤစ့ၢ်ကီးလီၤ. မ့ၢ်လၢ အမ့ၢ်ဝဲ တၢ်လၢ အကဘၣ် တၢ်မၤဟးဂီၤအီၤအဃိ နကဘၣ် သးဘၣ်အၢအီၤ သပှၢ်ကတၢၢ်လီၤ.
၈ “သုကဘၣ် ပလီၢ်သုသးလၢ သုကမၤထွဲ တၢ်မၤလိာ်တဖၣ်လၢ ယဟ့ၣ်လီၤသုလၢ တနံၤအံၤ ကိးထံၣ်ဒဲး ဒ်သိး သုကဆဲး အိၣ်မူဘၣ်+ ဒီးအါထီၣ်ဂီၢ်ထီၣ် ဒီးလဲၤနုာ်လီၤမၤန့ၢ် ကီၢ်တဘ့ၣ်လၢ ယဟိဝၤယွၤ အၢၣ်လီၤပာ်စၢၤ သုမိၢ်ပၢ်ဖံဖု လၢပျၢၤတဖၣ် အဂီၢ်လီၤ.+ ၂ သ့ၣ်နီၣ်ထီၣ်က့ၤ ကျဲဖးထီတဘိလၢ သုကစၢ် ယဟိဝၤယွၤ ဒုးဟးသု လၢပှၢ်မုၢ်ကနၢအပူၤ အနံၣ် ၄၀ တက့ၢ်.+ အဝဲ မၤဝဲဒ်န့ၣ် ဒ်သိး သုကဆီၣ်လီၤသုသး ဒီးအမၤကွၢ်သု+ ဒ်သိး ကသ့ၣ်ညါဝဲ တၢ်မနုၤအိၣ်လၢ သုသးပူၤလဲၣ်+ ဒီးမ့ၢ် သုကဒိကနၣ် အတၢ်မၤလိာ်တဖၣ်ဧါ တဒိကနၣ်ဘၣ်ဧါ န့ၣ်လီၤ. ၃ အဝဲ မၤဝဲ ဒ်သိး သုကဆီၣ်လီၤသုသး ဒီးပျဲလၢ သုလီၤဘဲ+ ဒီးဒုးအီၣ်သု ကိၣ်မၤနၤ+ လၢသုမ့ၢ်ဂ့ၤ သုပၢ်တဖၣ်မ့ၢ်ဂ့ၤ တထံၣ်ဘၣ်ဝဲ နီတဘျီဘၣ်. အဝဲ မၤဝဲဒ်န့ၣ် ဒ်သိးသုကသ့ၣ်ညါလၢ ပှၤဟီၣ်ခိၣ်ဖိ တမူဝဲထဲလၢ ကိၣ်အဃိဘၣ်. အဝဲသ့ၣ် မူဝဲလၢ ကယဲၢ် တၢ်ကတိၤလၢ အဟဲထီၣ်လၢ ယဟိဝၤယွၤ အထးခိၣ်န့ၣ်လီၤ.+ ၄ လၢအနံၣ် ၄၀ အတီၢ်ပူၤန့ၣ် သုတၢ်ကူတၢ်ကၤတဖၣ် တလီၢ်လံၤဘၣ် ဒီးသုခီၣ် တညိးထီၣ်ဘၣ်.+ ၅ သုသ့ၣ်ညါ ဂ့ၤဂ့ၤလၢ သုကစၢ် ယဟိဝၤယွၤ ဘှီဘၣ်ထီၣ်က့ၤသု ဒ်ပှၤတဂၤ ဘှီဘၣ်ထီၣ်က့ၤ အဖိခွါအသိးလီၤ.+
၆ “ခဲအံၤန့ၣ် သုကဘၣ်မၤထွဲ သုကစၢ် ယဟိဝၤယွၤ အတၢ်မၤလိာ်တဖၣ် ခီဖျိလၢ သုဒိကနၣ် အကလုၢ် ဒီးပျံၤအီၤ အဃိန့ၣ်လီၤ. ၇ သုကစၢ် ယဟိဝၤယွၤန့ၣ် ကဆှၢနုာ်သုလၢ ကီၢ်လၢ အဂ့ၤတဘ့ၣ်လၢ+ အအိၣ်ဒီး ထံကျိဖိတဖၣ် ဒီးထံထီၣ်ပၢၢ်တဖၣ်လၢ အယွၤလီၤဝဲလၢ တၢ်တြီၤတဖၣ် ဒီးကစၢၢ်ကလိတဖၣ် အကျါလီၤ. ၈ ကီၢ်တဘ့ၣ်န့ၣ် အိၣ်ဒီး ဘုကၠူၣ်, ဘုမုယီၤ, စပံးမုၢ်တဖၣ်, ချၢၣ်ဒၢထူၣ်တဖၣ်, သလဲသၣ်တဖၣ်,+ သ့ၣ်စၤယံးအသိ ဒီးကနဲစီလီၤ.+ ၉ ဒီးကီၢ်တဘ့ၣ်န့ၣ် တမ့ၢ်ကီၢ်လၢ တၢ်အီၣ်တၢ်အီ ကၤဝဲန့ၣ်ဘၣ် ဒီးတၢ်လၢ အကအိၣ်ဒီးသု တယၢဘၣ်န့ၣ်* တအိၣ်နီတမံၤဘၣ်. လၢၢ်တဖၣ်လၢ ကီၢ်တဘ့ၣ်န့ၣ်အပူၤ ကအိၣ်ပှဲၤဝဲဒီးထး ဒီးသုကခူၣ် တိၢ်ဘီလၢ ကစၢၢ်ကလိလၢ အအိၣ်ဖဲန့ၣ်တဖၣ် အကျါလီၤ.
၁၀ “ဖဲသုအီၣ်တၢ် ဒီးသူၣ်တံၤသးတံၤအခါ သုကဘၣ် စံးထီၣ်ပတြၢၤ သုကစၢ် ယဟိဝၤယွၤ ခီဖျိလၢ အဟ့ၣ်လီၤသု ကီၢ်လၢအဂ့ၤတဘ့ၣ် အဃိလီၤ.+ ၁၁ ပလီၢ်သုသး ဒ်သိး သုသုတသးပ့ၤနီၣ် သုကစၢ် ယဟိဝၤယွၤ ခီဖျိ သုတအိၣ်မူမၤထွဲ အတၢ်မၤလိာ်, အတၢ်သိၣ်တၢ်သီ ဒီးအတၢ်ဘျၢတဖၣ် လၢယမၤလိာ်သု လၢတနံၤအံၤဘၣ် န့ၣ်တဂ့ၤ. ၁၂ လၢခံ သုကအီၣ်ဘၣ်အီဘၣ် တုၤလၢ သုသူၣ်တံၤသးတံၤ ဒီးသုကတ့ထီၣ် ဟံၣ်လၢအဂ့ၤတဖၣ် ဒီးအိၣ်ဘၣ်လၢအပူၤ,+ ၁၃ ဒီးသုကျီၢ် ဒီးသုသိဒီး မဲာ်တဲးလဲးတဖၣ် ကအါထီၣ်ဝဲ, ဒီးသုစ့ညၣ် ဒီးထူသ့ၣ်တဖၣ် ကအါထီၣ်ဝဲ ဒီးတၢ်ခဲလၢာ် ကအိၣ်ဒီးသု အါအါဂီၢ်ဂီၢ်လီၤ. ၁၄ ဖဲန့ၣ်အခါ တဘၣ် ပာ်ထီၣ်ထီသုသးတဂ့ၤ.+ သုမ့ၢ်မၤဒ်န့ၣ်န့ၣ် သုကသးပ့ၤနီၣ်ကွံာ် သုကစၢ် ယဟိဝၤယွၤလၢ အထုးထီၣ်ကွံာ်သု လၢကီၢ်အဲၤကူပတူးအပူၤ ဖဲသုကဲကုၢ် အလီၢ်န့ၣ်လီၤ.+ ၁၅ အဝဲ မ့ၢ်ပှၤလၢ အဒုးဟးသုလၢ ပှၢ်မုၢ်ကနၢဖးဒိၣ်လၢ အလီၤပျံၤလီၤဖုး+ လၢအအိၣ်ဒီး ဂုၢ်လၢအစုၣ်အၢတဖၣ်, ပတ့ၤချဲးတဖၣ် ဒီးတၢ်လီၢ်ဃ့ထီလၢ ထံတအိၣ်ဘၣ်န့ၣ်လီၤ. အဝဲ ဒုးယွၤလီၤ ထံလၢ လၢၢ်လၢအကိၤတဖျၢၣ်အပူၤ*+ ၁၆ ဒီးဒုးအီၣ်သု လၢကိၣ်မၤနၤ+ လၢပှၢ်မုၢ်ကနၢ လၢသုပၢ်တဖၣ် တသ့ၣ်ညါဝဲဘၣ် အပူၤလီၤ. အဝဲ မၤဝဲဒ်န့ၣ် ဒ်သိး သုကဆီၣ်လီၤသုသး+ ဒီးဒ်သိး ကမၤကွၢ်သု ဒ်သိး အကကဲဘျုးလၢသုဂီၢ် လၢခါဆူညါလီၤ.+ ၁၇ ဘၣ်သ့ၣ်သ့ၣ် လၢနသးပူၤ နကတဲလၢ ‘ယကဲဒိၣ်ထီၣ် ခီဖျိလၢ ယနီၢ်ကစၢ် အဂံၢ်အဘါ ဒီးယတၢ်သ့တၢ်ဘၣ် အဃိလီၤ.’+ ၁၈ ဘၣ်ဆၣ် သ့ၣ်နီၣ်ထီၣ်လၢ ပှၤလၢအဟ့ၣ်နၤ တၢ်ဂံၢ်တၢ်ဘါလၢ နကကဲဒိၣ်ထီၣ်န့ၣ် မ့ၢ်ဝဲ နကစၢ် ယဟိဝၤယွၤလီၤ.+ အဝဲမၤဝဲ ဒ်န့ၣ်န့ၣ် မ့ၢ်ဒ်သိး အကမၤလၢပှဲၤထီၣ် အတၢ်အၢၣ်လီၤအီလီၤ လၢအအၢၣ်လီၤဝဲ နမိၢ်ပၢ်ဖံဖု လၢပျၢၤတဖၣ် ဒ်လၢမုၢ်မဆါတနံၤအံၤ အသိးလီၤ.+
၁၉ “တနံၤအံၤ ယကဟ့ၣ်ပလီၢ်သုလၢ သုမ့ၢ်သးပ့ၤနီၣ် သုကစၢ် ယဟိဝၤယွၤ ဒီးဘူၣ်ထီၣ်ဘါထီၣ် ယွၤအဂၤတဖၣ် ဒီးမၤအတၢ်န့ၣ် သုကတုၤလၢ တၢ်ဟးဂီၤ သပှၢ်ကတၢၢ်လီၤ.+ ၂၀ မ့ၢ်လၢ သုတဒိကနၣ် သုကစၢ် ယဟိဝၤယွၤ အကလုၢ်ဘၣ်အဃိ သုကဘၣ် တၢ်မၤဟးဂီၤသု ဒ်ပှၤကလုာ်တဖၣ် လၢယဟိဝၤယွၤ ကမၤဟးဂီၤကွံာ်ဝဲလၢ သုမဲာ်ညါလီၤ.+
၉ “ပှၤအံၣ်စရ့လးဖိသ့ၣ်ဧၢ, ဒိကနၣ်တက့ၢ်. ခဲအံၤန့ၣ် ဘူးထီၣ်လၢ သုကလဲၤခီဂာ် ထံကျိယၢ်ဒ့ၣ်+ ဒီးသုကလဲၤနုာ်လီၤ ဒီးနီဟးထီၣ် ပှၤကလုာ်တဖၣ်လၢ အဒိၣ်န့ၢ်သု ဒီးအဆူၣ်န့ၢ်သုလီၤ.+ အဝဲသ့ၣ် အဝ့ၢ်တဖၣ်န့ၣ် ဒိၣ်ဝဲဒီး အိၣ်ဒီး အဒူၣ်လၢ အထီဝဲ တုၤလၢ မူခိၣ်လီၤ.+ ၂ ပှၤဧနးဖိလၢ အအိၣ်ဖဲန့ၣ်တဖၣ် မ့ၢ်ပှၤတကလုာ်လၢ အနီၢ်ဒိၣ်နီၢ်ထီလီၤ.+ သုသ့ၣ်ညါ အဝဲသ့ၣ် အဂ့ၢ်လံ ဒီးသုနၢ်ဟူဘၣ် ပှၤတဲ အဝဲသ့ၣ် အဂ့ၢ်လၢ ‘မတဂၤ တြီဆၢ ပှၤဧနးဖိတဖၣ် ကသ့လဲၣ်.’ ၃ အဃိ သုကဘၣ်သ့ၣ်ညါလၢ သုကစၢ် ယဟိဝၤယွၤ ကလဲၤခီဂာ်ဆိ တၢ်လၢ သုမဲာ်ညါလီၤ.+ အဝဲမ့ၢ်ဝဲ မ့ၣ်အူလၢ အအီၣ်ကွံာ်တၢ်+ ဒီးအဝဲ ကမၤဟးဂီၤကွံာ် အဝဲသ့ၣ်လီၤ. အကမၤနၢၤကွံာ် အဝဲသ့ၣ်လၢ သုမဲာ်ညါ ဒ်သိး သုကနီဟးထီၣ်ကွံာ် အဝဲသ့ၣ် ချ့ချ့ ဒီးမၤဟးဂီၤကွံာ် အဝဲသ့ၣ် ဒ်ယဟိဝၤယွၤ အၢၣ်လီၤပာ်စၢၤသု အသိးလီၤ.+
၄ “ဖဲယဟိဝၤယွၤ နီဟးထီၣ်ကွံာ် အဝဲသ့ၣ်လၢ နမဲာ်ညါအခါ လၢနသးပူၤန့ၣ် နတဘၣ်တဲလၢ ‘မ့ၢ်လၢ ယတီယလိၤအဃိ ယဟိဝၤယွၤ ဆှၢယၤ ဒ်သိး ယကမၤန့ၢ် ကီၢ်တဘ့ၣ်အံၤ’ တဂ့ၤ.+ နီၢ်ကီၢ်န့ၣ် မ့ၢ်လၢ ပှၤကလုာ်တဖၣ်အံၤ အၢသီအဃိ+ ယဟိဝၤယွၤ ကနီဟးထီၣ်ကွံာ် အဝဲသ့ၣ် လၢနမဲာ်ညါလီၤ. ၅ နကမၤန့ၢ် အဝဲသ့ၣ် အကီၢ်န့ၣ် တမ့ၢ်လၢ နတၢ်တီတၢ်လိၤ မ့တမ့ၢ် နတၢ်သူၣ်ဘျၢသးဘျၢအဃိဘၣ်. မ့ၢ်လၢ ပှၤကလုာ်တဖၣ်အံၤ အၢသီအဃိ နကစၢ် ယဟိဝၤယွၤ ကနီဟးထီၣ်ကွံာ် အဝဲသ့ၣ် လၢနမဲာ်ညါ+ ဒီးမ့ၢ်လၢ ယဟိဝၤယွၤ အဲၣ်ဒိးမၤလၢပှဲၤ အတၢ်အၢၣ်လီၤဒီး နဖုဖးဒိၣ်တဖၣ်လၢ အမ့ၢ် စီၤအၤဘြၤဟၣ်,+ စီၤအံၤစဲး+ ဒီးစီၤယၤကိာ် အဃိလီၤ.+ ၆ နဘၣ် သ့ၣ်ညါလၢ တမ့ၢ်လၢ နတီနလိၤ အဃိ ယဟိဝၤယွၤ မၢနလဲၤနုာ်လီၤ မၤန့ၢ် ကီၢ်လၢအဂ့ၤ တဘ့ၣ်အံၤဘၣ်. နီၢ်ကီၢ်န့ၣ် နမ့ၢ်ပှၤလၢ အခိၣ်ကိၤလီၤ.+
၇ “သုမၤသးထီၣ် သုကစၢ် ယဟိဝၤယွၤလၢ ပှၢ်မုၢ်ကနၢပူၤ ဒ်လဲၣ်န့ၣ် သုကဘၣ် နီၣ်ဘၣ်ထီဘိ ဒီးသုတဘၣ် သးပ့ၤနီၣ် နီတဘျီတဂ့ၤ.+ သုထီဒါက့ၤ ယဟိဝၤယွၤ စးထီၣ်လၢ မုၢ်နံၤလၢ သုဟးထီၣ်လၢ ကီၢ်အဲၤကူပတူးအပူၤ တုၤလၢ သုဟဲတုၤလၢ တၢ်လီၢ်ဖဲအံၤလီၤ.+ ၈ ဖဲကစၢၢ် ဃိၤရ့းဒၣ်လဲာ် သုမၤသးထီၣ် ယဟိဝၤယွၤ ဒီးယဟိဝၤယွၤ သးပှံၢ်ထီၣ်သုဒိၣ်မး တုၤလၢ အဘူး ကမၤဟးဂီၤကွံာ်သုလီၤ.+ ၉ ယလဲၤထီၣ် ကစၢၢ် ဒ်သိး ယကဒိးန့ၢ်ဘၣ် လၢၢ်ဘ့ၣ်ဘၣ်တဖၣ်+ လၢအမ့ၢ် လၢၢ်ဘ့ၣ်ဘၣ်တဖၣ် လၢအဘၣ်ဃးဒီး တၢ်အၢၣ်လီၤအီလီၤ လၢယဟိဝၤယွၤ မၤဒီးသုလီၤ.+ ဒီးယအိၣ်တ့ၢ်လၢ ကစၢၢ်လိၤ အနံၤ ၄၀ အနၤ ၄၀+ ဒီးယတအီၣ်တၢ်အီၣ် ဒီးအီထံ နီတစဲးဘၣ်. ၁၀ ဒီးယဟိဝၤယွၤ ဟ့ၣ်လီၤယၤ လၢၢ်ဘ့ၣ်ဘၣ်ခံဘ့ၣ်လၢ ယွၤကွဲးဝဲလၢ အစုနၢ ဒီးလၢလၢၢ်ဘ့ၣ်ဘၣ်တဖၣ် အလိၤန့ၣ် အိၣ်ဝဲဒီး ကယဲၢ် တၢ်ကတိၤလၢ ယဟိဝၤယွၤ တဲသုလၢ ကစၢၢ်လိၤလၢ မ့ၣ်အူကျါ ဖဲသုပာ်ဖှိၣ်ထီၣ် သုသး အနံၤန့ၣ်လီၤ.+ ၁၁ ဒီးဖဲအနံၤ ၄၀ အနၤ ၄၀ ဝံၤအလီၢ်ခံ ယဟိဝၤယွၤ ဟ့ၣ်လီၤယၤ လၢၢ်ဘ့ၣ်ဘၣ် ခံဘ့ၣ် လၢအမ့ၢ် တၢ်အၢၣ်လီၤအီလီၤ အလၢၢ်ဘ့ၣ်ဘၣ်တဖၣ် ၁၂ ဒီးယဟိဝၤယွၤ တဲယၤလၢ ‘ဂဲၤဆၢထၢၣ်, က့ၤလီၤမ့ၢ်ချ့. နပှၤဂီၢ်မုၢ်လၢ နဒုးဟးထီၣ်အီၤလၢ ကီၢ်အဲၤကူပတူးအပူၤန့ၣ် မၤတၢ်အၢအၢသီသီလံ.+ အဝဲသ့ၣ် ပာ်တ့ၢ်ကွံာ် ယတၢ်မၤလိာ်တဖၣ် ချ့ချ့လီၤ. အဝဲသ့ၣ် တ့ထီၣ်ဝဲ တၢ်ဂီၤတၢ်ဖှီၣ်တဒုလီၤ.’+ ၁၃ ဝံၤဒီး ယဟိဝၤယွၤ တဲယၤလၢ ‘ယကွၢ်န့ၣ် ပှၤသ့ၣ်တဖၣ်အံၤ မ့ၢ်ပှၤလၢ အခိၣ်ကိၤမး.+ ၁၄ ပျဲယမၤဟးဂီၤ အဝဲသ့ၣ် တုၤအလၢာ် ဒီးထူးသံကွံာ် အဝဲသ့ၣ် အမံၤလၢ မူခိၣ်အဖီလာ် ဒီးပျဲ ယဒုးကဲထီၣ်နၤလၢ ပှၤတကလုာ်လၢ အဆူၣ်န့ၢ်ဒံး အဝဲသ့ၣ် ဒီးအါန့ၢ်ဒံး အဝဲသ့ၣ်တက့ၢ်.’+
၁၅ “ဒီးယဃၣ်ယသး ဒီးယဟဲက့ၤလီၤလၢ ကစၢၢ်လိၤ ဖဲမ့ၣ်အူအီၣ်တၢ်လၢ ကစၢၢ်လိၤ အခါလီၤ.+ ဒီးလၢယစု ခံခီလၢာ်န့ၣ် အိၣ်ဒီး တၢ်အၢၣ်လီၤအီလီၤ အလၢၢ်ဘ့ၣ်ဘၣ်ခံဘ့ၣ်လီၤ.+ ၁၆ ယကွၢ် ဒီးယထံၣ်လၢ သုမၤကမၣ်ဘၣ်သုကစၢ် ယဟိဝၤယွၤလီၤ. သုတ့ထီၣ် ကျီၢ်ဖိတဒုအဂီၤ ဒီးသုပာ်တ့ၢ်ကွံာ် ယဟိဝၤယွၤ အတၢ်မၤလိာ်တဖၣ် ချ့ချ့လီၤ.+ ၁၇ အဃိ ယယၤထီၣ် လၢၢ်ဘ့ၣ်ဘၣ်ခံဘ့ၣ်န့ၣ် ဒီးယကွံာ်လီၤအီၤ လၢယစု ခံခီလၢာ် ဒီးမၤသ့ၣ်ဖးအီၤ လၢသုမဲာ်ညါလီၤ.+ ၁၈ မ့ၢ်လၢ သုမၤတၢ်ဒဲးဘးအါမး ဒီးသုမၤတၢ်လၢ ယဟိဝၤယွၤထံၣ်ဝဲလၢအအၢ ဒီးသုမၤဆါအသးအဃိ ဒ်လၢညါအသိး ယဘၣ် ထိၣ်လီၤပှီၤယသး လၢယဟိဝၤယွၤ အမဲာ်ညါ အနံၤ ၄၀ အနၤ ၄၀ ဒီးယတအီၣ်တၢ်အီၣ် ဒီးအီထံဘၣ်.+ ၁၉ မ့ၢ်လၢ ယဟိဝၤယွၤ သးထီၣ်သုသပှၢ်တၢၢ် တုၤလၢ အဘူးကမၤဟးဂီၤသုအဃိ+ ယပျံၤတၢ်ဖုးတၢ်ဒိၣ်မးလီၤ. ဘၣ်ဆၣ် တၢ်တဘျီန့ၣ်စ့ၢ်ကီး ယဟိဝၤယွၤ ဒိကနၣ်ယၤလီၤ.+
၂၀ “ယဟိဝၤယွၤ သးထီၣ် စီၤအၤဟရိၣ်ဒိၣ်မး တုၤလၢ အဘူး ကမၤဟးဂီၤကွံာ်အီၤလီၤ.+ ဘၣ်ဆၣ် တၢ်တဘျီန့ၣ် ယဃ့ကညးန့ၢ်တၢ်လၢအဂီၢ် စ့ၢ်ကီးလီၤ. ၂၁ ဒီးကျီၢ်ဖိတဒုလၢ သုတ့ထီၣ်အီၤ လၢအကဲထီၣ် တၢ်ဒဲးဘး လၢသုဂီၢ်န့ၣ်+ ယဟံးန့ၢ်အီၤ ဒီးယဒွဲၣ်အူထီၣ်ကွံာ်အီၤ လၢမ့ၣ်အူလီၤ. ဒီးယမၤလီၤသဘှံးအီၤ ဒီးယမၤလီၤကမူၣ်အီၤ လၢာ်လၢာ်ဆ့ဆ့ ဒီးယဖှံလီၤတၢ်ကမူၣ်တဖၣ်လၢ ထံကျိဖိလၢ အဟဲယွၤလီၤလၢ ကစၢၢ်ခိၣ်လီၤ.+
၂၂ “ဒီးလၢ တးဘဧ့ရၤ,+ မးစၤ,*+ ဒီးကံးဘြိၤဟးတဝၤန့ၣ်+ သုမၤသးထီၣ် ယဟိဝၤယွၤလီၤ. ၂၃ ဒီးယဟိဝၤယွၤ ဒုးဟးထီၣ်သုလၢ ကၤဒ့ၣ်ဘၢ်န့+ ဒီးတဲသုလၢ ‘လဲၤထီၣ်မၤန့ၢ် ကီၢ်တဘ့ၣ်လၢ ယကဟ့ၣ်လီၤသု န့ၣ်တက့ၢ်.’ ဖဲန့ၣ်အခါ သုထီဒါ သုကစၢ် ယဟိဝၤယွၤ အတၢ်ကတိၤ+ ဒီးသုတနာ်အီၤဘၣ်+ ဒီးသုတဒိကနၣ် အကလုၢ်ဘၣ်. ၂၄ စးထီၣ်လၢ ယသ့ၣ်ညါသုန့ၣ် သုထီဒါ ယဟိဝၤယွၤ ထီဘိလီၤ.
၂၅ “အဃိ ယထိၣ်လီၤပှီၤယသးလၢ ယဟိဝၤယွၤ အမဲာ်ညါ အနံၤ ၄၀ အနၤ ၄၀ လီၤ.+ မ့ၢ်လၢ ယဟိဝၤယွၤ တဲဝဲလၢ အကမၤဟးဂီၤသုအဃိ ယထိၣ်လီၤပှီၤယသး ဒ်န့ၣ်လီၤ. ၂၆ ဒီးယဃ့ကညး ယဟိဝၤယွၤလၢ ‘တၢ်ပၢကစၢ် ယဟိဝၤယွၤဧၢ, တဘၣ်မၤဟးဂီၤ နပှၤဂီၢ်မုၢ်တဖၣ်တဂ့ၤ. အဝဲသ့ၣ် မ့ၢ်နတၢ်+ ဒီးမ့ၢ်ပှၤလၢ နမၤပူၤဖျဲးအီၤခီဖျိလၢ နစိနကမီၤ ဒီးနထုးထီၣ်အဝဲသ့ၣ်လၢ ကီၢ်အဲၤကူပတူးအပူၤ လၢနစုလၢ အဂံၢ်ဆူၣ်ဘါဆူၣ်လီၤ.+ ၂၇ သ့ၣ်နီၣ်ထီၣ် နခ့နပှၤ စီၤအၤဘြၤဟၣ်, စီၤအံၤစဲး ဒီးစီၤယၤကိာ်တက့ၢ်.+ တဘၣ်သးစၢၢ်ဆၢ ပှၤဂီၢ်မုၢ် လၢအခိၣ်ကိၤတဖၣ်အံၤ အတၢ်အၢတၢ်သီ ဒီးအတၢ်ဒဲးဘးတဂ့ၤ.+ ၂၈ မ့တမ့ၢ်ဘၣ်န့ၣ် ကီၢ်လၢ နထုးထီၣ်ပှၤလၢအပူၤ အထံဖိကီၢ်ဖိတဖၣ်န့ၣ် ကတဲဝဲလၢ “ယဟိဝၤယွၤ လဲၤဆှၢ ပှၤသ့ၣ်တဖၣ်န့ၣ် လၢကီၢ်လၢ အအၢၣ်လီၤဝဲလၢ အကဟ့ၣ်လီၤ အဝဲသ့ၣ် တန့ၢ်ဘၣ် ဒီးအသးဟ့ဝဲ ပှၤသ့ၣ်တဖၣ်န့ၣ် အဃိ အဝဲထုးထီၣ်ကွံာ် အဝဲသ့ၣ် ဒ်သိး ကမၤသံကွံာ် အဝဲသ့ၣ်လၢ ပှၢ်မုၢ်ကနၢအပူၤလီၤ.”+ ၂၉ အဝဲသ့ၣ် မ့ၢ်နပှၤဂီၢ်မုၢ်, နတၢ်+ ဒီးမ့ၢ်ပှၤလၢ နထုးထီၣ်အီၤခီဖျိလၢ နစိနကမီၤလၢ အဒိၣ် ဒီးနစုလၢ အယူာ်ဃီၤအသးလီၤ.’+
၁၀ “ဖဲန့ၣ်အဆၢကတီၢ် ယဟိဝၤယွၤ တဲယၤလၢ ‘တ့ထီၣ် လၢၢ်ဘ့ၣ်ဘၣ်ခံဘ့ၣ် ဒ်အခီၣ်ထံးခံဘ့ၣ်အသိး+ ဒီးဟဲထီၣ်လၢယအိၣ် လၢကစၢၢ်လိၤတက့ၢ်. ဒီးနကဘၣ် တ့ထီၣ် စ့ၢ်ကီး တလါတဖျၢၣ် လၢသ့ၣ်လီၤ. ၂ ဒီးတၢ်ကတိၤလၢ အအိၣ်လၢ လၢၢ်ဘ့ၣ်ဘၣ် အခီၣ်ထံးခံဘ့ၣ် လၢနမၤသ့ၣ်ဖးအီၤအလိၤန့ၣ် ယကကွဲးလီၤအီၤလၢ လၢၢ်ဘ့ၣ်ဘၣ် ခံဘ့ၣ်အံၤအလိၤ ဒီးနကဘၣ် ပာ်လီၤလၢၢ်ဘ့ၣ်ဘၣ် ခံဘ့ၣ်အံၤလၢ တလါအပူၤလီၤ.’ ၃ အဃိ ယတ့ထီၣ် တလါတဖျၢၣ် လၢသ့ၣ်ဖှ့ၡံးတၤ ဒီးယတ့ထီၣ် လၢၢ်ဘ့ၣ်ဘၣ်ခံဘ့ၣ် ဒ်အခီၣ်ထံးခံဘ့ၣ် အသိးလီၤ. ဒီးယလဲၤထီၣ် လၢကစၢၢ်လိၤ ဒီးလၢၢ်ဘ့ၣ်ဘၣ် ခံဘ့ၣ် အိၣ်လၢ ယစုပူၤလီၤ.+ ၄ ဒီးလၢ လၢၢ်ဘ့ၣ်ဘၣ်တဖၣ်အလိၤန့ၣ် ယဟိဝၤယွၤ ကွဲးလီၤ တၢ်ကတိၤတဖၣ် ဒ်လၢညါ အကွဲးတ့ၢ်ဝဲအသိး+ လၢအမ့ၢ် တၢ်မၤလိာ် အဘီတဆံ+ လၢအဝဲတဲသု လၢကစၢၢ်လိၤ လၢမ့ၣ်အူအကျါ+ ဖဲသုပာ်ဖှိၣ်ထီၣ် သုသးအနံၤလီၤ.+ ဒီးယဟိဝၤယွၤ ဟ့ၣ်လီၤယၤ လၢၢ်ဘ့ၣ်ဘၣ်တဖၣ်အံၤလီၤ. ၅ ဒီးယဃၣ်ကဒါက့ၤယသး ဒီးက့ၤလီၤလၢ ကစၢၢ်လိၤလီၤ.+ ဒီးဒ်ယဟိဝၤယွၤ မၤလိာ်ယၤ အသိး ယပာ်လီၤ လၢၢ်ဘ့ၣ်ဘၣ်တဖၣ်န့ၣ် လၢတလါလၢ ယတ့ထီၣ်အီၤတဖျၢၣ်အပူၤလီၤ. လၢၢ်ဘ့ၣ်ဘၣ်တဖၣ်န့ၣ် အိၣ်ဝဲဖဲန့ၣ် တုၤလၢခဲအံၤလီၤ.
၆ “ဒီးပှၤအံၣ်စရ့လးဖိတဖၣ် ဟးထီၣ်လၢ ဘအ့ရိး ဘန့ယၤကၣ် ဒီးလဲၤလၢ မိၤစ့ရိးလီၤ. ဖဲန့ၣ်န့ၣ် စီၤအၤဟရိၣ် သံဝဲ ဒီးပှၤခူၣ်လီၤအီၤလီၤ.+ ဒီးအဖိခွါ စီၤအလၤဧစၢ် ကဲထီၣ် ပှၤလုၢ်တၢ်ဒိၣ် လၢအလီၢ်လီၤ.+ ၇ အဝဲသ့ၣ် ဟးထီၣ်ဖဲန့ၣ် ဒီးလဲၤဝဲလၢ ကူးဒကိဒၤ ဒီးအဝဲသ့ၣ် ဟးထီၣ်လၢ ကူးဒကိဒၤ ဒီးလဲၤဝဲလၢ ယးတဘၤသၤ+ လၢအမ့ၢ် တၢ်လီၢ်လၢ ထံကျိဖိတဖၣ် ယွၤလီၤလၢအပူၤလီၤ.
၈ “ဖဲန့ၣ်အဆၢကတီၢ် ယဟိဝၤယွၤ ပာ်လီၤဆီဝဲ ပှၤလ့ၤဝံဖိအဒူၣ်+ ဒ်သိး ကယိးဝဲ ယဟိဝၤယွၤ အတၢ်အၢၣ်လီၤအီလီၤ အတလါ+ ဒီးကဆၢထၢၣ်လၢ ယဟိဝၤယွၤ အမဲာ်ညါ ဒ်သိး ကမၤအတၢ် ဒီးကဆိၣ်ဂ့ၤတၢ် လၢယွၤအမံၤ+ ဒ်အဝဲသ့ၣ်မၤဝဲ တုၤလၢ မုၢ်မဆါတနံၤအံၤ အသိးလီၤ. ၉ လၢတၢ်န့ၣ်အဃိ ပှၤလ့ၤဝံဖိ အဒူၣ်န့ၣ် တဒိးန့ၢ်ဘၣ် တၢ်စုလီၢ်ခီၣ်ခိၣ် ဒီးတၢ်န့ၢ်သါ ဒ်သိးဒီး အဒီပုၢ်ဝဲၢ်တဖၣ်ဘၣ်. ယဟိဝၤယွၤ မ့ၢ်အဝဲသ့ၣ် အတၢ်န့ၢ်သါ ဒ်နကစၢ် ယဟိဝၤယွၤ တဲဘၣ် အဝဲသ့ၣ် အသိးလီၤ.+ ၁၀ ယအိၣ်လၢ ကစၢၢ်လိၤ အနံၤ ၄၀ အနၤ ၄၀ ဒ်ယအိၣ်တ့ၢ်လၢ အခီၣ်ထံးတဘျီအသိး+ ဒီးဖဲတၢ်တဘျီန့ၣ်စ့ၢ်ကီး ယဟိဝၤယွၤ ဒိကနၣ်ယၤအဃိ+ ယဟိဝၤယွၤ တအဲၣ်ဒိး မၤဟးဂီၤသုလၢၤဘၣ်. ၁၁ ဒီးယဟိဝၤယွၤ တဲယၤလၢ ‘ကတဲာ်ကတီၤထီၣ် သုသး လၢသုကဟးထီၣ်အဂီၢ် ဒီးလဲၤလၢ ပှၤဂီၢ်မုၢ် အမဲာ်ညါ ဒ်သိး အဝဲသ့ၣ် ကလဲၤနုာ်လီၤ မၤန့ၢ်ကီၢ်လၢ ယအၢၣ်လီၤ အမိၢ်ပၢ်ဖံဖု လၢပျၢၤတဖၣ် လၢယကဟ့ၣ်လီၤ အဝဲသ့ၣ် န့ၣ်တက့ၢ်.’+
၁၂ “အံၣ်စရ့လးဧၢ, ယဟိဝၤယွၤ အဲၣ်ဒိးလၢ သုကမၤတၢ်မနုၤလဲၣ်.+ နကစၢ် ယဟိဝၤယွၤ အဲၣ်ဒိးလၢ နကပျံၤအီၤ,+ မၤအတၢ်ဘၣ်သးထီဘိ,+ နကအဲၣ်အီၤ ဒီးနကမၤ နကစၢ် ယဟိဝၤယွၤအတၢ် လၢနသးဒီဖျၢၣ် ဒီးလၢနတၢ်အိၣ်မူ ကိးသနၢၣ်ဒဲးအပူၤ+ ၁၃ ဒီးနကမၤထွဲ ယဟိဝၤယွၤ အတၢ်မၤလိာ်တဖၣ် ဒီးအတၢ်ဘျၢတဖၣ် လၢယမၤလိာ်နၤ လၢတနံၤအံၤ ဒ်သိး နကဘၣ်ဆိၣ်ဂ့ၤ အဂီၢ်လီၤ.+ ၁၄ ကွၢ်မီၤ, မူခိၣ် ဒီးမူခိၣ်လၢ အထီကတၢၢ်ဒၣ်လဲာ် ဒီးဟီၣ်ခိၣ် ဒီးတၢ်အိၣ်လၢ အပူၤခဲလၢာ်န့ၣ် မ့ၢ်နကစၢ် ယဟိဝၤယွၤ အတၢ်လီၤ.+ ၁၅ ဘၣ်ဆၣ် ယဟိဝၤယွၤ သုးဘူးအသး ထဲလၢသုမိၢ်ပၢ်ဖံဖု လၢပျၢၤတဖၣ်အအိၣ် ဒီးပာ်ဖျါထီၣ် အတၢ်အဲၣ်လၢ အဝဲသ့ၣ် အဖီခိၣ်လီၤ. ဒီးအဝဲဃုထၢထီၣ် သုဝဲသ့ၣ် လၢအမ့ၢ် အဝဲသ့ၣ် အစၢၤအသွဲၣ်တဖၣ်+ လၢပှၤကလုာ် ခဲလၢာ်အကျါ ဒ်လၢ မုၢ်မဆါတနံၤအံၤ အသိးလီၤ. ၁၆ သုကဘၣ် မၤကဆှီထီၣ်* သုသူၣ်သုသး+ ဒီးတဘၣ် မၤကိၤသုခိၣ်လၢၤတဂ့ၤ.+ ၁၇ သုကစၢ် ယဟိဝၤယွၤန့ၣ် မ့ၢ်ယွၤတဖၣ် အကစၢ်ယွၤ,+ ကစၢ်တဖၣ် အကစၢ်, ကစၢ်ယွၤလၢအဒိၣ်, အဂံၢ်ဆူၣ်ဘါဆူၣ်, အလီၤယူးယီၣ်ပာ်ကဲ ဒီးတကွၢ်ဒိၣ်ဆံးအါစှၤ ပှၤနီတဂၤဘၣ်.+ ဒီးအဝဲတမၤ တၢ်တတီတလိၤ ဒ်စံၣ်ညီၣ်ကွီၢ်လၢ အတူၢ်လိာ် တၢ်ထီးကျိၣ်ထီးစ့* န့ၣ်ဘၣ်. ၁၈ အဝဲ စံၣ်ညီၣ်တၢ် တီတီလိၤလိၤလၢ ဖိၣ်ဃဲ ဒီးမုၣ်ကမဲအဂီၢ်+ ဒီးအဲၣ်ဝဲ ပှၤထံဂၤကီၢ်ဂၤဖိ+ ဒီးဟ့ၣ်လီၤအဝဲသ့ၣ် တၢ်အီၣ် ဒီးတၢ်ကူတၢ်သိးလီၤ. ၁၉ သုဝဲစ့ၢ်ကီး သုကဘၣ်အဲၣ် ပှၤထံဂၤကီၢ်ဂၤဖိတဖၣ်, မ့ၢ်လၢ သုကဲတ့ၢ် ပှၤထံဂၤကီၢ်ဂၤဖိ လၢကီၢ်အဲၤကူပတူးအပူၤ အဃိလီၤ.+
၂၀ “နကဘၣ်ပျံၤ နကစၢ် ယဟိဝၤယွၤ ဒီးနကဘၣ် ဘူၣ်ထီၣ်ဘါထီၣ်အီၤ,+ နကဘၣ်အိၣ်ဘူးဒီးအီၤ ဒီးနကဘၣ် အၢၣ်လီၤတၢ် လၢအမံၤလီၤ. ၂၁ အဝဲမ့ၢ် ပှၤတဂၤလၢ နကဘၣ် စံးထီၣ်ပတြၢၤအီၤလီၤ.+ ဒီးအမ့ၢ် နကစၢ်ယွၤ လၢအမၤတၢ်လၢ အဒိၣ်အမုၢ် ဒီးတၢ်လၢ အလီၤကမၢကမၣ်တဖၣ်အံၤ ခဲလၢာ်လၢနဂီၢ်လၢ နထံၣ်တ့ၢ်အီၤ လၢနမဲာ်လီၤ.+ ၂၂ နမိၢ်ပၢ်ဖံဖု လၢပျၢၤတဖၣ်လၢ အလဲၤလီၤလၢ ကီၢ်အဲၤကူပတူး အပူၤန့ၣ် အိၣ်ဝဲအဂၤ ၇၀+ ဘၣ်ဆၣ် မ့မ့ၢ် ခဲအံၤန့ၣ် ယဟိဝၤယွၤ မၤအါထီၣ် နနီၣ်ဂံၢ် ထဲသိးဒီး ဆၣ်တဖၣ်လၢမူခိၣ် အသိးလီၤ.+
၁၁ “နကဘၣ်အဲၣ် နကစၢ်ယဟိဝၤယွၤ+ ဒီးမၤလၢပှဲၤ နမူဒါ ဒ်အမၤလိာ်နၤအသိး ထီဘိ ဒီးမၤထွဲ အတၢ်ဘျၢ, အတၢ်သိၣ်တၢ်သီ ဒီးအတၢ်မၤလိာ်တဖၣ်လီၤ. ၂ သုသ့ၣ်ညါလၢ တနံၤအံၤန့ၣ် ယတဲတၢ်ဒီးသု ဒီးတမ့ၢ်လၢ ယတဲတၢ်ဒီး သုဖိတဖၣ်လၢ အတသ့ၣ်ညါ ဒီးတထံၣ်ဘၣ် သုကစၢ်ယဟိဝၤယွၤ အတၢ်သိၣ်ဃီၣ်,+ အစိအကမီၤ,+ အစုလၢ အဂံၢ်ဆူၣ်ဘါဆူၣ်+ ဒီးအစုလၢ အယူာ်ဃီၤအသးန့ၣ်ဘၣ်. ၃ အဝဲသ့ၣ် တထံၣ်ဘၣ် ကစၢ်ယွၤ အတၢ်ပနီၣ်လီၤလးတဖၣ် ဒီးအတၢ်မၤတဖၣ် လၢအမၤဝဲ အဲၤကူပတူး အစီၤပၤဖၤရိၤ လၢကီၢ်အဲၤကူပတူးအပူၤ ဒီးတၢ်လၢအအိၣ်လၢ ကီၢ်ပူၤခဲလၢာ်န့ၣ်ဘၣ်.+ ၄ ဒီးကစၢ်ယွၤ မၤဝဲ အဲၤကူပတူး အသုးမုၢ်သံၣ်ဘိတဖၣ်, ဖၤရိၤ အကသ့ၣ်တဖၣ် ဒီးအလ့ၣ်ကဟၣ်သုးတဖၣ် ဒ်လဲၣ်န့ၣ် သုဖိတဖၣ် တထံၣ်ဘၣ်ဝဲဘၣ်. ဖဲပှၤအဲၤကူပတူးဖိတဖၣ် လူၤသုအခါ ယဟိဝၤယွၤ မၤလီၤဘျၢ အဝဲသ့ၣ်လၢ ပီၣ်လဲၣ်ဂီၤ ဒီးမၤဟးဂီၤကွံာ် အဝဲသ့ၣ် တဘျီဃီခဲလၢာ်လီၤ.+ ၅ ဒီးသုဖိတဖၣ် တထံၣ်ဘၣ် တၢ်လၢ ကစၢ်ယွၤမၤန့ၢ်သုလၢ ပှၢ်မုၢ်ကနၢအပူၤ တုၤလၢ သုဟဲတုၤလၢ တၢ်လီၢ်ဖဲအံၤဘၣ်. ၆ ဒီးတၢ်လၢ အမၤ စီၤဒၤသၣ် ဒီးစီၤအဘံရၣ်န့ၣ် အဝဲသ့ၣ်တထံၣ်ဘၣ်ဝဲဘၣ်. ဟီၣ်ခိၣ် အိးထီၣ်အသး ဒီးယူၢ်လီၤကွံာ် အဝဲသ့ၣ်လၢ ပှၤအံၣ်စရ့လးဖိ အကျါ ဃုာ်ဒီး အဝဲသ့ၣ်အဟံၣ်ဖိဃီဖိ, အဝဲသ့ၣ် အဒဲတဖၣ် ဒီးဆၣ်ဖိကီၢ်ဖိ ဒီးပှၤလၢအပိာ်အဝဲသ့ၣ်အခံ ခဲလၢာ်လီၤ. စီၤဒၤသၣ် ဒီးစီၤအဘံရၣ်န့ၣ် မ့ၢ်ဝဲ စီၤအလံအာ် အဖိခွါတဖၣ် ဒီးစီၤအလံအာ် န့ၣ်ဟဲလီၤစၢၤလၢ စီၤရူၤဘ့ၣ်လီၤ.+ ၇ မ့မ့ၢ်သုန့ၣ် သုထံၣ်ဘၣ် ယဟိဝၤယွၤ အတၢ်မၤလၢ အဒိၣ်အမုၢ်တဖၣ် လၢသုမဲာ်လီၤ.
၈ “သုကဘၣ်မၤထွဲ တၢ်မၤလိာ်ခဲလၢာ်လၢ ယဟ့ၣ်လီၤသုလၢ တနံၤညါအံၤ ဒ်သိး သုဂံၢ်ဘါ ကဆူၣ်ထီၣ် ဒီးသုကလဲၤနုာ်လီၤမၤန့ၢ် ကီၢ်တဘ့ၣ်န့ၣ် ၉ ဒီးဒ်သိး သုကအိၣ်မူဘၣ် ယံာ်ယံာ်လၢ+ ကီၢ်တဘ့ၣ်လၢ တၢ်နုၢ်ထံ ဒီးကနဲစီ ယွၤလီၤဝဲလၢ အပူၤလီၤ.+ ယဟိဝၤယွၤ အၢၣ်လီၤပာ်စၢၤဝဲလၢ ကဟ့ၣ်လီၤဝဲ သုမိၢ်ပၢ်ဖံဖု လၢပျၢၤတဖၣ် ဒီးအဝဲသ့ၣ် အစၢၤအသွဲၣ်တဖၣ်+ လၢကီၢ်တဘ့ၣ်အံၤလီၤ.
၁၀ “ကီၢ်လၢ သုကလဲၤမၤန့ၢ်အီၤ တဘ့ၣ်န့ၣ် တဒ်သိးဒီး ကီၢ်အဲၤကူပတူးလၢ သုဟးထီၣ်လၢ အပူၤဘၣ်. ဖဲကီၢ်အဲၤကူပတူးန့ၣ် သုဖှံလီၤတၢ်ချံ ဒီးသုဘၣ် မၤဘၣ်စီၣ်ဟီၣ်ခိၣ် လၢသုခီၣ် ဒ်သုမၤတၢ်ဒိးတၢ်လၣ် အကရၢၢ်အသိးလီၤ. ၁၁ မ့မ့ၢ် ကီၢ်လၢ သုကလဲၤနုာ် မၤန့ၢ်အီၤ တဘ့ၣ်န့ၣ် အိၣ်ဒီး ကစၢၢ်ကလိ ဒီးတၢ်တြီၤတဖၣ်လီၤ.+ ဒီးတၢ်လီၢ်သ့ၣ်တဖၣ်န့ၣ် ဒိးန့ၢ်ဘၣ် ထံထီဘိ ခီဖျိ မူခိၣ်စူၤထံလီၤ.+ ၁၂ ဒီးမ့ၢ်ဝဲ ကီၢ်တဘ့ၣ်လၢ နကစၢ် ယဟိဝၤယွၤ အံးထွဲကွၢ်ထွဲဝဲ ဂ့ၤဂ့ၤလီၤ. စးထီၣ်လၢ နံၣ်အခီၣ်ထံး ဒီးတုၤလီၤလၢ နံၣ်ကတၢၢ်န့ၣ် နကစၢ် ယဟိဝၤယွၤ ကွၢ်ထွဲအီၤထီဘိလီၤ.
၁၃ “ယတၢ်မၤလိာ်တဖၣ် လၢယဟ့ၣ်လီၤသု တနံၤညါအံၤန့ၣ် သုမ့ၢ်ဒိကနၣ်အီၤ သပှၢ်ကတၢၢ် ဒီးသုမ့ၢ်အဲၣ်သုကစၢ် ယဟိဝၤယွၤ ဒီးမၤအတၢ်လၢ သုသးဒီဖျၢၣ် ဒီးလၢသုတၢ်အိၣ်မူ ကိးသနၢၣ်ဒဲး အပူၤန့ၣ်+ ၁၄ အဝဲ* ကဒုးစူၤလီၤ မူခိၣ်ထံလၢ သုကီၢ်ပူၤ ဒ်အဆၢကတီၢ်ဒၣ်ဝဲ အသိး ဖဲတၢ်ဂိၢ်ထီၣ်သီ အကတီၢ် ဒီးတၢ်ကိၢ်ထီၣ်သီ အကတီၢ်လီၤ. ဒီးသုကပာ်ဖှိၣ်ထီၣ် သုဘု, စပံးထံအသီ ဒီးသုသိလီၤ.+ ၁၅ ဒီးအဝဲကဒုးမဲထီၣ် တၢ်မုၢ်တၢ်ဘိတဖၣ် လၢသုတၢ်ပျီအပူၤလၢ သုဆၣ်ဖိကီၢ်ဖိတဖၣ် အဂီၢ် ဒီးသုက အီၣ်ဘၣ်အီဘၣ်တၢ် တုၤလၢ သုသူၣ်တံၤသးတံၤလီၤ.+ ၁၆ ဘၣ်ဆၣ် ဒ်သိး သုသုတဘၣ် တၢ်ကွဲန့ၢ်လွဲန့ၢ်သု လၢသုကလဲၤကမၣ်ကျဲ ဒီးဘူၣ်ထီၣ်ဘါထီၣ် ယွၤအဂၤတဖၣ် တဂ့ၤအဂီၢ် သုကဘၣ် ပလီၢ်သုသးလီၤ.+ ၁၇ မ့တမ့ၢ်ဘၣ်န့ၣ် ယဟိဝၤယွၤ ကသးဒိၣ်ထီၣ် ဘၣ်ဖုးသု ဒီးအဝဲ ကကးတံာ်ဃာ်မူခိၣ် ဒ်သိး တၢ်သုတဟဲစူၤ တဂ့ၤအဂီၢ်လီၤ.+ ဒီးဟီၣ်ခိၣ် မ့ၢ်တဟ့ၣ်ထီၣ် အတၤသူတၤသၣ် လၢၤဘၣ်န့ၣ် သုကဟးဂီၤကွံာ်ချ့ချ့လၢ ကီၢ်လၢအဂ့ၤတဘ့ၣ်လၢ ယဟိဝၤယွၤ ဟ့ၣ်လီၤသုန့ၣ်လီၤ.+
၁၈ “သုကဘၣ်တိၢ်နီၣ်ဃာ် ယတၢ်ကတိၤတဖၣ်အံၤ လၢသုသးအပူၤ ဒီးလၢသုတၢ်ဆိကမိၣ်အပူၤ ဒီးစၢဃာ်အီၤလၢ သုစုလိၤ ဒ်တၢ်ဒုးသ့ၣ်နီၣ်ထီၣ်တၢ် တမံၤအသိးလီၤ. ဒီးတၢ်ကတိၤတဖၣ်အံၤကဘၣ်မ့ၢ် ဒ်ခိၣ်ကျီၤလၢ သုမဲာ်တူၢ်ခိၣ် အလိၤလီၤ.+ ၁၉ ဖဲနဆ့ၣ်နီၤလၢ နဟံၣ်ပူၤအခါမ့ၢ်ဂ့ၤ, ဖဲနဟးလၢ ကျဲအခါမ့ၢ်ဂ့ၤ, ဖဲနမံနီၤအခါမ့ၢ်ဂ့ၤ, ဖဲနဂဲၤထၢၣ်အခါမ့ၢ်ဂ့ၤ နကဘၣ်တဲဒီးသိၣ်လိ နဖိတဖၣ် လၢတၢ်ကတိၤတဖၣ်အံၤလီၤ.+ ၂၀ ဒီးနကဘၣ် ကွဲးလီၤအီၤလၢ နဟံၣ်အပဲတြီ အဒီခိၣ် ဒီးဝ့ၢ်အတြဲၤတဖၣ် အလိၤလီၤ. ၂၁ သုမ့ၢ်မၤဒ်န့ၣ်န့ၣ် သုဒီးသုဖိတဖၣ် ကအိၣ်မူဘၣ် ယံာ်ယံာ်လၢ+ ကီၢ်လၢ ယဟိဝၤယွၤ အၢၣ်လီၤဝဲလၢ အကဟ့ၣ်လီၤဝဲ သုမိၢ်ပၢ်ဖံဖု လၢပျၢၤတဖၣ်အပူၤလီၤ.+ သုကဆဲးအိၣ်ဘၣ် ဖဲန့ၣ်ယံာ်ဝဲ ထဲသိးဒီး မူခိၣ်ကဆဲးအိၣ်လၢ ဟီၣ်ခိၣ်အဖီခိၣ်န့ၣ်လီၤ.
၂၂ “သုမ့ၢ်မၤထွဲ တၢ်မၤလိာ်လၢ ယဟ့ၣ်လီၤသု လီၤတံၢ်လီၤဆဲး ဒီးဒိကနၣ်အီၤ ဒီးသုမ့ၢ်အဲၣ် သုကစၢ် ယဟိဝၤယွၤ+ ဒီးမၤအတၢ်ဘၣ်သးထီဘိ ဒီးအိၣ်ဘူးဒီးအီၤန့ၣ်+ ၂၃ ယဟိဝၤယွၤ ကနီဟးထီၣ်ကွံာ် ပှၤကလုာ်တဖၣ်အံၤ ခဲလၢာ်လၢ သုမဲာ်ညါ+ ဒီးသုကမၤနၢၤကွံာ် ပှၤကလုာ်လၢ အဒိၣ်န့ၢ်သု ဒီးအနီၣ်ဂံၢ်အါန့ၢ်သုလီၤ.+ ၂၄ တၢ်လီၢ်လၢ သုယီၢ်လီၤလၢ သုခီၣ်န့ၣ် ကကဲထီၣ် သုတၢ်လီၤ.+ ဒီးသုကီၢ်ဆၢန့ၣ် ကစးထီၣ်လၢ ပှၢ်မုၢ်ကနၢ တုၤလၢ လဘၤနိၣ်ကစၢၢ်ကလိကျါ ဒီးစးထီၣ်လၢ ထံကျိဖရၤသး တုၤလၢ ပီၣ်လဲၣ်လၢ မုၢ်နုာ်တကပၤလီၤ.+ ၂၅ ပှၤထီဒါသုတန့ၢ် နီတဂၤဘၣ်.+ ဒ်ယဟိဝၤယွၤ အၢၣ်လီၤသုအသိး ပှၤလၢအအိၣ်လၢ ကီၢ်ဒီဘ့ၣ်အပူၤန့ၣ် ကပျံၤတၢ်ဖုးတၢ် ဒီးကသူၣ်ကိၢ်သးဂီၤ လၢသုဃိလီၤ.+
၂၆ “ကွၢ်မီၤ, တနံၤအံၤန့ၣ် ယပာ်လီၤ တၢ်ဆိၣ်ဂ့ၤ ဒီးတၢ်ဆိၣ်အၢ လၢသုမဲာ်ညါလီၤ.+ ၂၇ သုမ့ၢ်ဒိကနၣ် သုကစၢ် ယဟိဝၤယွၤ အတၢ်မၤလိာ်လၢ ယမၤလိာ်သု လၢတနံၤအံၤန့ၣ် သုကဘၣ်ဆိၣ်ဂ့ၤလီၤ.+ ၂၈ ဘၣ်ဆၣ် သုမ့ၢ်တဒိကနၣ် သုကစၢ် ယဟိဝၤယွၤ အတၢ်မၤလိာ်တဖၣ်ဘၣ်+ ဒီးသုမ့ၢ်လဲၤကပာ်ကွံာ် ကျဲလၢယမၤလိာ်သု လၢတနံၤအံၤ ဒီးသုမ့ၢ်ဘူၣ်ထီၣ်ဘါထီၣ် ယွၤတဖၣ်လၢ သုတသ့ၣ်ညါအီၤဘၣ်န့ၣ် သုကဘၣ်ဆိၣ်အၢလီၤ.
၂၉ “ဖဲနကစၢ် ယဟိဝၤယွၤ ဆှၢနၤလၢ ကီၢ်တဘ့ၣ်လၢ နကန့ၢ်ဘၣ်အီၤအခါ လၢကစၢၢ် ကရံးစံၣ်အလိၤန့ၣ် နကဘၣ်ဘိးဘၣ်သ့ၣ်ညါလီၤ တၢ်ဆိၣ်ဂ့ၤ ဒီးလၢကစၢၢ် ဧ့ၤဘါလးအလိၤန့ၣ် နကဘၣ်ဘိးဘၣ်သ့ၣ်ညါလီၤ တၢ်ဆိၣ်အၢလီၤ.+ ၃၀ ကစၢၢ်ခံဖျၢၣ်အံၤ အိၣ်ဝဲလၢ ပှၤကနၤဧၣ်ဖိ အအိၣ်တၢ်လီၢ်လၢ အအိၣ်လၢ ဧၤရဘၤအပူၤလီၤ. ဒီးကစၢၢ်ခံဖျၢၣ်အံၤ အိၣ်ဝဲလၢ ထံကျိယၢ်ဒ့ၣ် အဝၢ်ဘးခီ လၢမုၢ်နုာ် တကပၤလီၤ. ဒီးအိၣ်ဝဲလၢကံးလကၤလးအမဲာ်ညါ ဘူးဒီး မိၤရံယၤ အသ့ၣ်ထူၣ်ဖးဒိၣ်တဖၣ်လီၤ.+ ၃၁ သုကလဲၤခီဂာ် ထံကျိယၢ်ဒ့ၣ်ဒီး လဲၤမၤန့ၢ် ထံကီၢ်လၢ သုကစၢ် ယဟိဝၤယွၤ ကဟ့ၣ်လီၤသုလီၤ.+ ဖဲသုမၤန့ၢ်အီၤ ဒီးအိၣ်လၢအပူၤအခါ ၃၂ သုကဘၣ် ပလီၢ်သုသး လၢသုကမၤထွဲ တၢ်ဘျၢ ဒီးတၢ်သိၣ်တၢ်သီ ခဲလၢာ် လၢယဟ့ၣ်လီၤသုလၢ တနံၤအံၤလီၤ.+
၁၂ “ဖဲသုအိၣ်ဘၣ်လၢ ကီၢ်တဘ့ၣ်လၢ သုမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤ ကဟ့ၣ်လီၤသု အပူၤအခါ သုကဘၣ်မၤထွဲ တၢ်ဘျၢ ဒီးတၢ်သိၣ်တၢ်သီတဖၣ်အံၤ လီၤတံၢ်လီၤဆဲး လၢသုတၢ်အိၣ်မူအပူၤ ကိးနံၤဒဲးလီၤ. ၂ ပှၤကလုာ်လၢ သုကနီဟးထီၣ်အီၤတဖၣ်န့ၣ် ဘူၣ်ထီၣ်ဘါထီၣ် အယွၤတဖၣ်လၢ ကစၢၢ်ဖးထီတဖၣ် အလိၤ, တၢ်လူၢ်တဖၣ်အလိၤ ဒီးသ့ၣ်လါဟ့တဖၣ် လၢအပှဲၤဒီးအလၣ် အခီၣ်ထံးလီၤ. သုကဘၣ် မၤဟးဂီၤကွံာ် တၢ်လီၢ်တဖၣ်အံၤ ခဲလၢာ်ခဲဆ့လီၤ.+ ၃ သုကဘၣ် မၤလီၤပှီၢ်ကွံာ် အဝဲသ့ၣ် အတၢ်လုၢ်လီၢ်တဖၣ်, မၤကၢ်ကွံာ် အဝဲသ့ၣ် အလၢၢ်ထူၣ်စီဆှံတဖၣ်,+ ဒွဲၣ်အူထီၣ်ကွံာ် အတၢ်စီဆှံ အထူၣ်တဖၣ်, ကျီကွံာ် အယွၤတဖၣ်အဂီၤ+ ဒီးမၤလီၤမၢ်ကွံာ် အဝဲသ့ၣ် အယွၤတဖၣ် အမံၤလၢ တၢ်လီၢ်ဖဲန့ၣ်လီၤ.+
၄ “မ့မ့ၢ်သုန့ၣ် သုတဘၣ် ဘူၣ်ထီၣ်ဘါထီၣ် သုကစၢ် ယဟိဝၤယွၤ လၢကျဲဒ်န့ၣ်ဘၣ်.+ ၅ လၢတၢ်န့ၣ်အလီၢ် သုကဘၣ် လဲၤဘူၣ်ထီၣ်ဘါထီၣ် သုကစၢ် ယဟိဝၤယွၤ ဖဲတၢ်လီၢ်လၢ အဝဲဃုထၢထီၣ်ဝဲလၢ အမံၤအဂီၢ် ဒီးလၢအတၢ်အိၣ်တၢ်ဆိးအလီၢ် လၢသုဝဲ ပှၤအံၣ်စရ့လးဖိ အဒူၣ်တဖၣ် အကျါလီၤ.+ ၆ သုတၢ်လုၢ်ဒွဲၣ်အူတဖၣ်,+ သုတၢ်လုၢ်တဖၣ်, သုတၢ်ဆံဆဲၣ်ပူတပူ,+ သုတၢ်မၤဘူၣ်တဖၣ်,+ သုတၢ်လုၢ်လၢ တၢ်အၢၣ်လီၤအဂီၢ် ဒီးသုတၢ်လုၢ်လၢ တၢ်သးအိၣ်အပူၤ+ ဒီးသုကျီၢ် ဒီးသုသိ ဒီးသုမဲာ်တဲးလဲး အဝဲၢ်ကိတဖၣ်န့ၣ် သုကဘၣ် လဲၤစိာ်အီၤဖဲန့ၣ်လီၤ.+ ၇ သုဒီးပှၤလၢအအိၣ်လၢ သုဟံၣ်ပူၤတဖၣ် ကဘၣ်အီၣ် တၢ်လုၢ်တဖၣ်ဖဲန့ၣ် လၢသုကစၢ် ယဟိဝၤယွၤ အမဲာ်ညါလီၤ.+ ဒီးဖဲန့ၣ်န့ၣ် သုကဘၣ်သူၣ်ဖှံသးညီ လၢတၢ်ခဲလၢာ်လၢ သုမၤတ့ၢ်အီၤတဖၣ်အပူၤ,+ မ့ၢ်လၢသုကစၢ် ယဟိဝၤယွၤ ဆိၣ်ဂ့ၤသုအဃိလီၤ.
၈ “ဖဲန့ၣ်အခါ သုတဘၣ်မၤ ဒ်ပမၤလၢ ဆၢကတီၢ်ခဲအံၤဘၣ်. ခဲအံၤ ပှၤကိးဂၤဒဲး မၤဝဲဒ် အဆိကမိၣ်လၢ အဘၣ် အသိးလီၤ. ၉ သုမၤဒ်န့ၣ်န့ၣ် မ့ၢ်လၢ သုတလဲၤနုာ်လီၤဘၣ်ဒံးလၢ တၢ်အိၣ်ဘှံးအလီၢ်+ ဒီးကီၢ်လၢ သုကစၢ် ယဟိဝၤယွၤ ကဟ့ၣ်လီၤသုအဃိလီၤ. ၁၀ ဖဲသုလဲၤခီဂာ် ထံကျိယၢ်ဒ့ၣ်+ ဒီးအိၣ်ဘၣ်လၢ ကီၢ်တဘ့ၣ်လၢ သုကစၢ် ယဟိဝၤယွၤ ကဟ့ၣ်သု ဒ်တၢ်န့ၢ်သါအသိး အခါ အဝဲ ကဒီသဒၢသုလၢ သုဒုၣ်သုဒါလၢ အအိၣ်ဝးတရံးသု ဒီးသုကအိၣ်ဘၣ် ဘံၣ်ဘံၣ်ဘၢဘၢလီၤ.+ ၁၁ သုကဘၣ် လဲၤစိာ် ကယဲၢ်တၢ်လၢ ယမၤလိာ်သု ဆူတၢ်လီၢ်လၢ သုကစၢ် ယဟိဝၤယွၤ ဃုထၢဝဲလၢ အမံၤကအိၣ် အလီၢ်န့ၣ်လီၤ.+ သုကဘၣ်လဲၤစိာ် သုတၢ်လုၢ်ဒွဲၣ်အူတဖၣ်, သုတၢ်လုၢ်တဖၣ်, သုတၢ်ဆံဆဲၣ်ပူတပူ,+ သုတၢ်မၤဘူၣ်တဖၣ် ဒီးကယဲၢ် တၢ်လုၢ်လၢ တၢ်အၢၣ်လီၤအဂီၢ် လၢသုအၢၣ်လီၤ ယဟိဝၤယွၤလီၤ. ၁၂ သုဒီး သုဖိမုၣ်ဖိခွါတဖၣ်, သုကုၢ်မုၣ်ကုၢ်ခွါတဖၣ်န့ၣ် ကသူၣ်ဖှံသးညီလၢ သုကစၢ် ယဟိဝၤယွၤ အမဲာ်ညါ+ ဃုာ်ဒီး ပှၤလ့ၤဝံဖိလၢ အအိၣ်လၢ သုဝ့ၢ်တဖၣ်အပူၤ, မ့ၢ်လၢ ပှၤလ့ၤဝံဖိန့ၣ် တဒိးန့ၢ်ဘၣ် တၢ်စုလီၢ်ခီၣ်ခိၣ် ဒီးတၢ်န့ၢ်သါ ဒ်သိးဒီးသုဘၣ် အဃိလီၤ.+ ၁၃ ဘၣ်ဆၣ် ပလီၢ်နသး ဒ်သိး နသုတလုၢ်ထီၣ် တၢ်လုၢ်ဒွဲၣ်အူလၢ တၢ်လီၢ်အဂၤလၢ နထံၣ်ဘၣ်အီၤ တတီၤဂ့ၤတတီၤဂ့ၤ တဂ့ၤအဂီၢ်န့ၣ်တက့ၢ်.+ ၁၄ လၢသုဝဲ ပှၤအံၣ်စရ့လးဖိ အဒူၣ်တဖၣ် အဟီၣ်ကဝီၤအကျါန့ၣ် ယဟိဝၤယွၤ ကဃုထၢထီၣ် တၢ်လီၢ်တတီၤ ဒီးသုကဘၣ်လုၢ်ထီၣ် တၢ်လုၢ်ဒွဲၣ်အူတဖၣ် ထဲလၢ တၢ်လီၢ်ဖဲန့ၣ်လီၤ. ဒီးဖဲတၢ်လီၢ်အဝဲန့ၣ် သုကဘၣ်မၤဒ် တၢ်လၢ ယမၤလိာ်သုအသိး ခဲလၢာ်လီၤ.+
၁၅ “ဖဲသုအဲၣ်ဒိးအီၣ် တၢ်ညၣ်တဘျီဂ့ၤ တဘျီဂ့ၤန့ၣ် သုမၤသံ သုဆၣ်ဖိကီၢ်ဖိ ဒီးဒ်သုကစၢ် ယဟိဝၤယွၤ ဟ့ၣ်လီၤသုအသိးန့ၣ် သုအီၣ်အီၤလၢ+ သုဝ့ၢ်တဖၣ်အပူၤ သ့ဝဲလီၤ. ပှၤလၢ အကဆှီမ့ၢ်ဂ့ၤ ပှၤလၢ အတကဆှီဘၣ်မ့ၢ်ဂ့ၤ အဝဲသ့ၣ် အီၣ်ဝဲ ဒ်သုအီၣ် တၤဃီၤ ဒီးတၤဟိအသိး သ့ဝဲလီၤ. ၁၆ ဘၣ်ဆၣ် သုတဘၣ်အီၣ် တၢ်သွံၣ်ဘၣ်.+ သုကဘၣ် လူလီၤအီၤလၢ ဟီၣ်ခိၣ်လိၤ ဒ်ထံအသိးလီၤ.+ ၁၇ သုတၢ်လုၢ်ဘု ဆံဆဲၣ်ပူတပူ, သုစပံးထံအသီ, သုသိဧိၤချါဧိၤ, သုကျီၢ် ဒီးသုသိ ဒီးသုမဲာ်တဲးလဲး အဝဲၢ်ကိတဖၣ်,+ သုတၢ်လုၢ်လၢ တၢ်အၢၣ်လီၤအဂီၢ်, သုတၢ်လုၢ်လၢ တၢ်သးအိၣ်အပူၤ ဒီးတၢ်လၢ သုမၤဘူၣ်လီၤအီၤတဖၣ်န့ၣ် တၢ်တဟ့ၣ်သုအခွဲး လၢသုကအီၣ်အီၤ လၢသုဝ့ၢ်တဖၣ်အပူၤဘၣ်. ၁၈ လၢတၢ်န့ၣ်အလီၢ် သုဒီး သုဖိမုၣ်ဖိခွါတဖၣ်, သုကုၢ်မုၣ် ကုၢ်ခွါတဖၣ် ဒီးပှၤလ့ၤဝံဖိတဖၣ် လၢအအိၣ်လၢ သုဝ့ၢ်တဖၣ်အပူၤန့ၣ် ကဘၣ်အီၣ်ဝဲ တၢ်သ့ၣ်တဖၣ်အံၤ လၢသုကစၢ်ယဟိဝၤယွၤ အမဲာ်ညါ ဖဲတၢ်လီၢ်လၢ သုကစၢ် ယဟိဝၤယွၤ ကဃုထၢဝဲလီၤ.+ ဒီးသုကသူၣ်ဖှံသးညီလၢ သုကစၢ် ယဟိဝၤယွၤ အမဲာ်ညါ လၢတၢ်ခဲလၢာ်လၢ သုမၤတ့ၢ်အီၤတဖၣ်အဃိလီၤ. ၁၉ ဖဲသုအိၣ်မူလၢ သုကီၢ်ပူၤ ဒီတကတီၢ်န့ၣ် ပလီၢ်သုသး ဒ်သိးသုသု တကွၢ်ကပာ်ကွံာ် ပှၤလ့ၤဝံဖိ တဂ့ၤအဂီၢ်တက့ၢ်.+
၂၀ “ဖဲယဟိဝၤယွၤ မၤလဲၢ်ထီၣ် နဟီၣ်ကဝီၤ+ ဒ်အအၢၣ်လီၤတ့ၢ်နၤအသိး+ ဒီးဖဲနအဲၣ်ဒိး အီၣ်တၢ်ညၣ် ဒီးနတဲလၢ ‘ယအဲၣ်ဒိးအီၣ် တၢ်ညၣ်’ အခါ နအီၣ် တၢ်ညၣ်လၢ နအဲၣ်ဒိးအီၣ်အီၤ တဘျီဂ့ၤတဘျီဂ့ၤ သ့လီၤ.+ ၂၁ သုမ့ၢ်အိၣ်ဖးယံၤဒီး တၢ်လီၢ်လၢ ယဟိဝၤယွၤ ဃုထၢထီၣ်ဝဲလၢ အမံၤအဂီၢ်န့ၣ်+ သုကဘၣ် မၤသံသုကျီၢ် မ့တမ့ၢ် သုသိဒီးမဲာ်တဲးလဲး တနီၤလၢ ယဟိဝၤယွၤ ဟ့ၣ်လီၤသု ဒ်ယမၤလိာ်သု အသိးလီၤ. ဒီးသုကဘၣ်အီၣ်အီၤ လၢသုဝ့ၢ်တဖၣ်အပူၤ ဖဲသုအဲၣ်ဒိးအီၣ်အီၤ တဘျီဂ့ၤတဘျီဂ့ၤလီၤ. ၂၂ ပှၤလၢ အကဆှီမ့ၢ်ဂ့ၤ ပှၤလၢ အတကဆှီဘၣ်မ့ၢ်ဂ့ၤ အဝဲသ့ၣ် အီၣ်အီၤ ဒ်သုအီၣ် တၤဃီၤ ဒီးတၤဟိအသိး သ့ဝဲလီၤ.+ ၂၃ ဘၣ်ဆၣ် သုကဘၣ် ပာ်လီၤသုသး ဂၢၢ်ဂၢၢ်ကျၢၤကျၢၤလၢ သုတအီၣ် တၢ်သွံၣ်ဘၣ်+ မ့ၢ်လၢ တၢ်သွံၣ်န့ၣ် မ့ၢ်သးသမူ အဃိလီၤ.+ သုတဘၣ်အီၣ် တၢ်ညၣ် လၢအပၣ်ဃုာ်ဒီး သးသမူန့ၣ်ဘၣ်. ၂၄ သုတဘၣ်အီၣ် တၢ်သွံၣ်ဘၣ်. သုကဘၣ်လူလီၤအီၤလၢ ဟီၣ်ခိၣ်လိၤ ဒ်ထံအသိးလီၤ.+ ၂၅ သုတဘၣ် အီၣ်အီၤဘၣ်. သုမ့ၢ်မၤထွဲဒ်န့ၣ်န့ၣ် မ့ၢ်ဒၣ် သုမၤတၢ်လၢအဘၣ် လၢယဟိဝၤယွၤ အမဲာ်ညါအဃိ သုဒီး သုဖိသုလံၤတဖၣ် အတၢ်အိၣ်မူ ကလဲၤအသး ဂ့ၤဂ့ၤဘၣ်ဘၣ်လီၤ. ၂၆ ဖဲနလဲၤလၢ တၢ်လီၢ်လၢ ယဟိဝၤယွၤ ဃုထၢထီၣ်ဝဲအခါ နကဘၣ် လဲၤစိာ်ထဲ တၢ်လၢအစီဆှံလၢ အကဲနတၢ် ဒီးနတၢ်လုၢ်လၢ တၢ်အၢၣ်လီၤ အဂီၢ်လီၤ. ၂၇ ဖဲန့ၣ်န့ၣ် နကဘၣ်လုၢ်ထီၣ် နတၢ်လုၢ်ဒွဲၣ်အူတဖၣ် လၢအပၣ်ဃုာ်ဒီး တၢ်ညၣ် ဒီးတၢ်သွံၣ်+ လၢနကစၢ် ယဟိဝၤယွၤ အတၢ်လုၢ်လီၢ် အလိၤလီၤ. ဒီးနတၢ်လုၢ်အဂၤတဖၣ် အသွံၣ်န့ၣ် ကဘၣ်တၢ်လူလီၤအီၤလၢ နကစၢ် ယဟိဝၤယွၤ အတၢ်လုၢ်လီၢ် အကပၤ+ ဒီးမ့မ့ၢ်အညၣ်န့ၣ် နအီၣ်အီၤသ့လီၤ.
၂၈ “ပလီၢ်နသး ဒ်သိး နကမၤထွဲ တၢ်ကတိၤတဖၣ်အံၤ လၢယမၤလိာ်နၤ ခဲလၢာ်တက့ၢ်. နမ့ၢ်မၤ ဒ်န့ၣ်န့ၣ် မ့ၢ်ဝဲ နမၤတၢ်လၢနကစၢ် ယဟိဝၤယွၤ ထံၣ်ဝဲလၢအဂ့ၤ ဒီးလၢအဘၣ် အဃိ နၤဒီးနဖိနလံၤ လၢခံတဖၣ် အတၢ်အိၣ်မူ ကလဲၤအသး ဂ့ၤဂ့ၤဘၣ်ဘၣ်လီၤ.
၂၉ “လၢခံ နကစၢ် ယဟိဝၤယွၤ ကမၤဟးဂီၤကွံာ် ပှၤကလုာ်တဖၣ် လၢနကဘၣ် နီဟးထီၣ်ကွံာ်အီၤ+ ဒီးနကအိၣ်လၢ အဝဲသ့ၣ် အကီၢ်ပူၤလီၤ. ၃၀ ဘၣ်ဆၣ် ဖဲအဝဲသ့ၣ် ဘၣ်တၢ်မၤဟးဂီၤကွံာ်အီၤ လၢနမဲာ်ညါ ဝံၤအလီၢ်ခံ ဒ်သိးနသု တမၤပိာ် အဝဲသ့ၣ်အခံ တဂ့ၤအဂီၢ် ပလီၢ်နသးတက့ၢ်. နတဘၣ် သံကွၢ်သံဒိး အဝဲသ့ၣ် အကစၢ်ယွၤ အဂ့ၢ်ဘၣ် ဒီးနတဘၣ်တဲလၢ ‘ပှၤကလုာ်တဖၣ်အံၤ ဘူၣ်ထီၣ်ဘါထီၣ် အယွၤတဖၣ်လၢ ကျဲဒ်လဲၣ်, ယအဲၣ်ဒိး မၤဒ်န့ၣ်စ့ၢ်ကီး’ န့ၣ်ဘၣ်.+ ၃၁ ဖဲအဝဲသ့ၣ် ဘူၣ်ထီၣ်ဘါထီၣ်အယွၤတဖၣ် အခါ အဝဲသ့ၣ် မၤဝဲတၢ်လၢ အလီၤသးဘၣ်အၢ ကိးမံၤဒဲး လၢယဟိဝၤယွၤ သးဟ့ဝဲတဖၣ် ဒီးအဝဲသ့ၣ် လုၢ်ထီၣ် အဖိမုၣ်ဖိခွါတဖၣ် လၢမ့ၣ်အူ လၢအယွၤတဖၣ်အအိၣ် ဒၣ်လဲာ်လီၤ. နတဘၣ် ဘူၣ်ထီၣ်ဘါထီၣ် နကစၢ် ယဟိဝၤယွၤ လၢကျဲဒ်န့ၣ်ဘၣ်.+ ၃၂ တၢ်ကတိၤလၢ ယမၤလိာ်သု ခဲလၢာ်န့ၣ် သုကဘၣ် မၤထွဲအီၤ လီၤတံၢ်လီၤဆဲးလီၤ.+ သုတဘၣ် မၤအါထီၣ်အီၤဘၣ် ဒီးသုတဘၣ် မၤစှၤလီၤအီၤစ့ၢ်ကီးဘၣ်.+
၁၃ “ဘၣ်သ့ၣ်သ့ၣ် ဝံတဂၤ မ့တမ့ၢ် ပှၤတဂၤလၢ အတဲဆိပာ်စၢၤတၢ် ခီဖျိလၢ တၢ်မံမီၢ်တဖၣ် ကဟဲအိၣ်ထီၣ်လၢသုကျါ ဒီးကတဲဆိပာ်စၢၤဝဲ တၢ်ပနီၣ်လီၤလး တမံၤမံၤလီၤ. ၂ ဒီးဘၣ်သ့ၣ်သ့ၣ် တၢ်ပနီၣ်လီၤလး လၢအတဲဝဲန့ၣ် ကဟဲလၢထီၣ်ပှဲၤထီၣ်ဝဲ ဒီးအကတဲသုလၢ ‘ပကလဲၤဘူၣ်ထီၣ်ဘါထီၣ် ယွၤအဂၤတဖၣ် လၢသုတသ့ၣ်ညါဘၣ် ဒီးပကမၤ ယွၤတဖၣ်အံၤ အတၢ်သၢၤ.’ ၃ ဘၣ်ဆၣ် သုတဘၣ်ဒိကနၣ် ဝံ မ့တမ့ၢ် ပှၤလၢ အတဲဆိပာ်စၢၤတၢ်တဂၤန့ၣ် အကလုၢ်ဘၣ်.+ မ့ၢ်ဒၣ် သုကစၢ် ယဟိဝၤယွၤ မၤကွၢ်သု+ ဒ်သိး ကသ့ၣ်ညါဝဲလၢ မ့ၢ်သုအဲၣ် သုကစၢ် ယဟိဝၤယွၤ လၢသုသးဒီဖျၢၣ် ဒီးလၢသုတၢ်အိၣ်မူ ကိးသနၢၣ်ဒဲးအပူၤဧါ တအဲၣ်ဘၣ်ဧါ န့ၣ်လီၤ.+ ၄ သုကဘၣ် ဘူၣ်ထီၣ်ဘါထီၣ် သုကစၢ် ယဟိဝၤယွၤ, သုကဘၣ်ပျံၤအီၤ, သုကဘၣ်မၤထွဲ အတၢ်မၤလိာ်တဖၣ်, သုကဘၣ် ဒိကနၣ် အကလုၢ်, သုကဘၣ် မၤအတၢ် ဒီးသုကဘၣ် အိၣ်စဲဘူး* ဒီးအီၤလီၤ.+ ၅ ဘၣ်ဆၣ် ဝံ မ့တမ့ၢ် ပှၤလၢ အတဲဆိပာ်စၢၤတၢ်တဂၤန့ၣ် ဆီၣ်ထွဲ သုလၢ သုကထီဒါက့ၤ သုကစၢ် ယဟိဝၤယွၤ လၢအထုးထီၣ်ကွံာ်သုလၢ ကီၢ်အဲၤကူပတူး ဖဲသုကဲကုၢ် အလီၢ်လီၤ. တကးဒံးဘၣ် အဝဲအဲၣ်ဒိး ကွဲန့ၢ်လွဲန့ၢ်သု ဒ်သိး သုသုတလူၤပိာ်ထွဲကျဲလၢ သုကစၢ်ယဟိဝၤယွၤ မၤလိာ်သုလၢ သုကဘၣ်လဲၤန့ၣ် တဂ့ၤအဂီၢ်လီၤ. လၢတၢ်န့ၣ်အဃိ သုကဘၣ် မၤသံအီၤ+ ဒီးသုကဘၣ်မၤလီၤမၢ်ကွံာ် တၢ်အၢတၢ်သီလၢ ပှၤဂီၢ်မုၢ် အကျါလီၤ.+
၆ “ဘၣ်သ့ၣ်သ့ၣ် နဒီပုၢ်ဝဲၢ်ခွါမ့ၢ်ဂ့ၤ, နဖိမုၣ်မ့ၢ်ဂ့ၤ, နဖိခွါမ့ၢ်ဂ့ၤ, နမါလၢ နအဲၣ်အီၤ ဒိၣ်မးတဂၤမ့ၢ်ဂ့ၤ, နသကိး လၢနအဲၣ်အီၤ အဒိၣ်ကတၢၢ်တဂၤ မ့ၢ်ဂ့ၤ ကကွဲန့ၢ်လွဲန့ၢ်နၤလၢ တၢ်ခူသူၣ်အပူၤ ဒီးအကတဲနၤလၢ ‘ပကလဲၤ ဘူၣ်ထီၣ်ဘါထီၣ် ယွၤအဂၤတဖၣ်သၢၤ.’+ ဒီးယွၤတဖၣ်အံၤ မ့ၢ်ယွၤတဖၣ်လၢ နၤဒီးနမိၢ်ပၢ်ဖံဖု လၢပျၢၤတဖၣ် တသ့ၣ်ညါဝဲဘၣ်. ၇ ဒီးမ့ၢ်ဝဲ ပှၤလၢအအိၣ်ဝးတရံးနၤ လၢအအိၣ်ဘူးမ့ၢ်ဂ့ၤ လၢအအိၣ်ယံၤမ့ၢ်ဂ့ၤ အယွၤတဖၣ် လၢအအိၣ်လၢ ထံကီၢ် တတီၤဂ့ၤတတီၤဂ့ၤန့ၣ်လီၤ. ၈ ဘၣ်ဆၣ် ပှၤလၢအတဲနၤ ဒ်န့ၣ်န့ၣ် နတဘၣ်တူၢ်လိာ်ဘၣ် ဒီးနတဘၣ် ဒိကနၣ် အကလုၢ်ဘၣ်.+ နတဘၣ် သးကညီၤအီၤဘၣ် ဒီးနတဘၣ် ဒီသဒၢအီၤဘၣ်. ၉ လၢတၢ်န့ၣ်အလီၢ် နကဘၣ် မၤသံအီၤ သပှၢ်ကတၢၢ်လီၤ.+ ဒ်သိး ကမၤသံအီၤအဂီၢ် နကဘၣ်ကဲ ပှၤအဆိကတၢၢ်တဂၤလၢ ကကွံာ်အီၤလၢလၢၢ် ဝံၤဒီး ပှၤအဂၤတဖၣ် ကကွံာ်အီၤလီၤ.+ ၁၀ နကဘၣ် ကွံာ်အီၤလၢလၢၢ် ဒီးအဝဲ ကဘၣ်သံ+ မ့ၢ်လၢ အဝဲအဲၣ်ဒိး မၤယံၤထီၣ်နၤဒီး နကစၢ် ယဟိဝၤယွၤလၢ အဒုးဟးထီၣ်နၤလၢ ကီၢ်အဲၤကူပတူးအပူၤ ဖဲနကဲ ကုၢ်အလီၢ် အဃိန့ၣ်လီၤ. ၁၁ နမ့ၢ်မၤဒ်န့ၣ်န့ၣ် ပှၤအံၣ်စရ့လးဖိခဲလၢာ် ကနၢ်ဟူဘၣ်ဝဲ ဒီးကပျံၤတၢ်လီၤ. ဒီးလၢခံ အဝဲသ့ၣ် တမၤတၢ်အၢတၢ်သီ ဒ်အံၤ လၢသုကျါ နီတဘျီလၢၤဘၣ်.+
၁၂ “လၢဝ့ၢ်တဖၣ်လၢ ယဟိဝၤယွၤ ကဟ့ၣ်လီၤသု အပူၤန့ၣ် ဘၣ်သ့ၣ်သ့ၣ် သုကနၢ်ဟူ ပှၤတဲလၢ ၁၃ ‘ပှၤအၢပှၤသီတဖၣ် ဟဲအိၣ်ထီၣ်လၢ သုကျါ ဒီးအဝဲသ့ၣ် အဲၣ်ဒိးကွဲန့ၢ်လွဲန့ၢ် ပှၤလၢအအိၣ်လၢ အဝဲသ့ၣ် အဝ့ၢ်ပူၤ ဒ်သိးကလဲၤ ဘူၣ်ထီၣ်ဘါထီၣ် ယွၤအဂၤတဖၣ်လၢ သုတသ့ၣ်ညါအီၤဘၣ်န့ၣ်လီၤ.’ ၁၄ ဖဲန့ၣ်အခါ သုကဘၣ် ဃုသ့ၣ်ညါ တၢ်ဂ့ၢ်တခါအံၤ ဒီးသံကွၢ်သံဒိး ပှၤဂၤတဖၣ် လီၤတံၢ်လီၤဆဲး+ ဒီးသုမ့ၢ်သ့ၣ်ညါလီၤတံၢ်လၢ တၢ်လၢအလီၤသးဘၣ်အၢ တခါအံၤဟဲကဲထီၣ်အသး လၢသုကျါလံန့ၣ် ၁၅ သုကဘၣ်မၤသံ ပှၤလၢအအိၣ်လၢ ဝ့ၢ်ပူၤတဖၣ် လၢနး သပှၢ်ကတၢၢ်လီၤ.+ ဝ့ၢ် ဒီးတၢ်လၢအအိၣ်လၢ ဝ့ၢ်ပူၤခဲလၢာ် ဃုာ်ဒီး ဆၣ်ဖိကီၢ်ဖိတဖၣ်န့ၣ် သုကဘၣ်မၤဟးဂီၤကွံာ်အီၤ+ လၢနးလီၤ. ၁၆ တၢ်လၢ ပှၤဂုာ်န့ၢ်ဆူၣ်အီၤ လၢဝ့ၢ်တဖျၢၣ်အံၤ အပူၤန့ၣ် သုကဘၣ် ပာ်ဖှိၣ်ထီၣ်အီၤလၢ ဝ့ၢ်အံၤ အတၢ်ဆါတၢ်ပှ့ၤအလီၢ် အခၢၣ်သး ဒီးဒွဲၣ်အူထီၣ် ဝ့ၢ်လၢ မ့ၣ်အူလီၤ. ဒီးတၢ်လၢ ပှၤဂုာ်န့ၢ်ဆူၣ်အီၤ တဖၣ်အံၤန့ၣ် ကလီၤဂာ်ဒ် တၢ်လုၢ်ဒွဲၣ်အူ လၢသုကစၢ် ယဟိဝၤယွၤ အဂီၢ်လီၤ. ဒီးဝ့ၢ်တဖျၢၣ်န့ၣ် ကကဲထီၣ် တၢ်လၢ အဘၣ် တၢ်မၤဟးဂီၤအီၤ လီၤထူလီၤယိာ်လီၤ. ဒီးပှၤတသူၣ်ထီၣ်က့ၤအီၤ နီတဘျီလၢၤဘၣ်. ၁၇ ဒ်သိး ယဟိဝၤယွၤ အတၢ်သးထီၣ် ကခုၣ်လီၤအဂီၢ် ဒီးဒ်သိး အကပာ်ဖျါထီၣ် တၢ်သးကညီၤ လၢသုဖီခိၣ် ဒီးကမၤ အါထီၣ်ဂီၢ်ထီၣ်သု ဒ်အအၢၣ်လီၤဝဲ သုမိၢ်ပၢ်ဖံဖု လၢပျၢၤတဖၣ်အသိး+ အဂီၢ် သုတဘၣ် ဟံးန့ၢ် တၢ်လၢ အကဘၣ် တၢ်မၤဟးဂီၤကွံာ်အီၤတဖၣ် နီတမံၤဘၣ်.+ ၁၈ သုကဘၣ် ဒိကနၣ် သုကစၢ် ယဟိဝၤယွၤအကလုၢ် ခီဖျိ သုမၤထွဲ အတၢ်မၤလိာ်လၢ ယမၤလိာ်သုလၢ တနံၤအံၤ ခဲလၢာ်လီၤ. သုမ့ၢ်မၤဒ်န့ၣ်န့ၣ် မ့ၢ်ဒၣ် သုမၤတၢ်လၢ သုကစၢ် ယဟိဝၤယွၤ ထံၣ်ဝဲလၢအဂ့ၤလီၤ.+
၁၄ “သုမ့ၢ်သုကစၢ် ယဟိဝၤယွၤ အဖိတဖၣ်လီၤ. သုတဘၣ် ကူးလီၤသုညၣ်မ့ၢ်ဂ့ၤ+ လူၤသုမဲာ်တူၢ်မ့ၢ်ဂ့ၤ* လၢပှၤသံအဃိတဂ့ၤ.+ ၂ သုမ့ၢ် ပှၤစီဆှံတဒူၣ်+ လၢယဟိဝၤယွၤအဂီၢ် ဒီးလၢ ပှၤဟီၣ်ခိၣ်ဖိ ခဲလၢာ်အကျါန့ၣ် ယဟိဝၤယွၤ ဃုထၢထီၣ်သု ဒ်အပှၤဂီၢ်မုၢ်အသိး ဒီးဒ်ပှၤလၢ အလုၢ်ဒိၣ်ပှ့ၤဒိၣ် တဒူၣ်* လၢအဂီၢ်လီၤ.+
၃ “သုတဘၣ်အီၣ် တၢ်လၢ အလီၤသးဘၣ်အၢ နီတမံၤဘၣ်.+ ၄ ဆၣ်ဖိကီၢ်ဖိလၢ သုအီၣ်အီၤန့ၢ်န့ၣ်+ မ့ၢ်ဝဲ ကျီၢ်, သိ, မဲာ်တဲးလဲး, ၅ တၤဟိ, တၤဃီၤ, တၤယုၢ်ယးဃမိၢ်, မဲာ်တဲးလဲးမံၤ, တၤဖးဒံၡၣ်, သိမံၤ ဒီးသိလၢ ကစၢၢ်ခိၣ်လီၤ. ၆ ဒီးဆၣ်ဖိကီၢ်ဖိတဖၣ်လၢ အခီၣ်မ့ၣ် သ့ၣ်ဖးဝဲ လၢာ်လၢာ်ဆ့ဆ့ ဒီးကလိာ်ထီၣ်ဝဲ* အဆၣ် ဒီးဂံာ်အီၣ်က့ၤဝဲတဖၣ်န့ၣ် သုအီၣ်အီၤ န့ၢ်ဝဲလီၤ. ၇ ဘၣ်ဆၣ် ဆၣ်ဖိကီၢ်ဖိလၢ အကလိာ်ထီၣ်အဆၣ် ဒီးဂံာ်အီၣ်က့ၤဝဲ မ့တမ့ၢ် ဆၣ်ဖိကီၢ်ဖိလၢ အခီၣ်မ့ၣ် သ့ၣ်ဖးဝဲ လၢာ်လၢာ်ဆ့ဆ့ လၢသုတဘၣ်အီၣ်အီၤဘၣ်န့ၣ် အိၣ်ဝဲလီၤ. ကီၤလၤအူး, ပဒဲ, ယုၢ်ၡဖၣ်န့ၣ်* ကလိာ်ထီၣ်အဆၣ် ဒီးဂံာ်အီၣ်က့ၤဝဲ ဘၣ်ဆၣ် အခီၣ်မ့ၣ် တသ့ၣ်ဖး လၢာ်လၢာ်ဆ့ဆ့ဘၣ်အဃိ အတကဆှီဘၣ် လၢသုဂီၢ်ဘၣ်.+ ၈ ဒီးထိးန့ၣ် အခီၣ်မ့ၣ် သ့ၣ်ဖး လၢာ်လၢာ်ဆ့ဆ့ ဘၣ်ဆၣ် တကလိာ်ထီၣ်အဆၣ်ဘၣ် အဃိ အတကဆှီဘၣ် လၢသုဂီၢ်ဘၣ်. သုတဘၣ်အီၣ် ဆၣ်ဖိကီၢ်ဖိတဖၣ်န့ၣ် အညၣ်ဘၣ် ဒီးသုတဘၣ်ထိး အစိၣ်ဘၣ်.
၉ “ကယဲၢ်တၢ်အိၣ်လၢ ထံကျါ လၢအအိၣ်ဒီး အရု ဒီးအသဘျံးန့ၣ် သုအီၣ်အီၤသ့လီၤ.+ ၁၀ ဘၣ်ဆၣ် တၢ်လၢ အတအိၣ်ဒီး အရု ဒီးအသဘျံးဘၣ်န့ၣ် သုတဘၣ်အီၣ်အီၤဘၣ်. အမ့ၢ် တၢ်လၢ အတကဆှီဘၣ် လၢသုဂီၢ်လီၤ.
၁၁ “သုအီၣ် ထိၣ်လၢအကဆှီ ကိးကလုာ်ဒဲး န့ၢ်ဝဲလီၤ. ၁၂ ဘၣ်ဆၣ် ထိၣ်လၢ သုတဘၣ်အီၣ်ဘၣ်န့ၣ် မ့ၢ်ဝဲ လံာ်ကြီကြာ်, လံာ်မိၢ်ဃး, လီၤကတာ်သူ,+ ၁၃ လံာ်ဂီၤ, လံာ်သူ, လံာ်ကိးကလုာ်ဒဲး, ၁၄ စိးဝၣ်ဃး ကိးကလုာ်ဒဲး, ၁၅ ထိၣ်ကီၤလၤအူး, ဒိကအိ, ထိၣ်ၡဃး, လံာ်လ့ ကိးကလုာ်ဒဲး, ၁၆ ဒိကအိဆံးဆံးဖိ, ဒိကအိထီနၢ်, ထိၣ်တၤမံၤ, ၁၇ ထိၣ်ဒိၣ်ဖုၣ်ခီၣ်, လီၤကတာ်, ထိၣ်စီၢ်မီ, ၁၈ ထိၣ်ထီကိာ်, ထိၣ်လဲၤဝါ ကိးကလုာ်ဒဲး, ထိၣ်ဘီစံၣ်ဃီၣ် ဒီးဘျါလီၤ. ၁၉ ကယဲၢ် တၢ်ဖိဃၢ်လၢ အအိၣ်ဒီးအဒံးန့ၣ် ကဘၣ်မ့ၢ်တၢ်လၢ အတကဆှီဘၣ် လၢသုဂီၢ် ဒီးသုတဘၣ်အီၣ်အီၤဘၣ်. ၂၀ တၢ်သးသမူလၢ အယူၤဝဲလၢ အကဆှီတဖၣ်န့ၣ် သုအီၣ်အီၤသ့လီၤ.
၂၁ “ဆၣ်ဖိကီၢ်ဖိလၢ ပှၤထံၣ်န့ၢ်အီၤ လၢအသံန့ၣ် သုတဘၣ်အီၣ်အီၤဘၣ်.+ သုဟ့ၣ်လီၤအီၤလၢ ပှၤထံဂၤကီၢ်ဂၤဖိတဂၤလၢ အအိၣ်လၢ သုဝ့ၢ်ပူၤသ့ ဒီးအဝဲအီၣ်ဝဲ သ့လီၤ. မ့တမ့ၢ် သုဆါန့ၢ် ပှၤထံဂၤကီၢ်ဂၤဖိတဖၣ် သ့ဝဲစ့ၢ်ကီးလီၤ. လၢသုကစၢ် ယဟိဝၤယွၤ အမဲာ်ညါန့ၣ် သုမ့ၢ် ပှၤစီဆှံတဒူၣ်လီၤ.
“သုတဘၣ် ချီ မဲာ်တဲးလဲးဖိလၢ အမိၢ်နုၢ်ထံကျါတဂ့ၤ.+
၂၂ “တနံၣ်ဘၣ် တနံၣ်န့ၣ် နတၢ်ချံ လၢအမဲထီၣ်သၣ်ထီၣ်လၢ ပျီပူၤ ဆံဆဲၣ်ပူတပူန့ၣ် နကဘၣ်ဟ့ၣ်လီၤအီၤ သပှၢ်တၢၢ်လီၤ.+ ၂၃ ဒ်သိး နကမၤလိ တၢ်ပျံၤ ယဟိဝၤယွၤ ထီဘိအဂီၢ်+ တၢ်ဆံဆဲၣ်ပူတပူလၢ နဘု, နစပံးထံအသီ ဒီးနသိဧိၤချါဧိၤအကျါ ဒီးနကျီၢ်, နသိဒီးနမဲာ်တဲးလဲး အဖိဝဲၢ်ကိတဖၣ်န့ၣ် နကဘၣ် အီၣ်အီၤလၢ နကစၢ် ယဟိဝၤယွၤ အမဲာ်ညါ ဖဲတၢ်လီၢ်လၢ အဃုထၢဝဲလၢ အမံၤကအိၣ်ဝဲ အလီၢ်န့ၣ်လီၤ.+
၂၄ “ဘၣ်ဆၣ် ဘၣ်သ့ၣ်သ့ၣ် တၢ်လီၢ်လၢ နကစၢ် ယဟိဝၤယွၤ ဃုထၢထီၣ်ဝဲလၢ အမံၤအဂီၢ်န့ၣ်+ ကအိၣ်ယံၤဒီးနၤ ဒီးမ့ၢ်လၢ နကစၢ် ယဟိဝၤယွၤ ဆိၣ်ဂ့ၤနၤအဃိ နလဲၤစိာ် တၢ်သ့ၣ်တဖၣ်န့ၣ်လၢ တၢ်လီၢ်ဖဲန့ၣ် တန့ၢ်ဘၣ်. ၂၅ မ့မ့ၢ်ဒ်န့ၣ်န့ၣ် နကဘၣ် ဆါကွံာ်အီၤ ဒီးစ့လၢ နန့ၢ်ဘၣ်အီၤန့ၣ် နကဘၣ် လဲၤစိာ်အီၤလၢ တၢ်လီၢ်လၢ နကစၢ် ယဟိဝၤယွၤ ဃုထၢအီၤန့ၣ်လီၤ. ၂၆ ဒီးတၢ်လၢ နလီကီ တမံၤဂ့ၤတမံၤဂ့ၤန့ၣ် နပှ့ၤအီၤလၢ စ့အဝဲန့ၣ်သ့လီၤ. နပှ့ၤ ကျီၢ်တဖၣ်, သိတဖၣ်, မဲာ်တဲးလဲးတဖၣ်, စပံးထံ, သံးအဂုၤအဂၤ တမံၤဂ့ၤတမံၤဂ့ၤ ဒီးတၢ်လၢ နလီကီ အဂုၤအဂၤ တမံၤဂ့ၤတမံၤဂ့ၤ သ့လီၤ. ဒီးဖဲန့ၣ်န့ၣ် နၤဒီး နဟံၣ်ဖိဃီဖိ ကဘၣ် အီၣ်သကိးတၢ်လၢ ယဟိဝၤယွၤ အမဲာ်ညါ လၢတၢ်သူၣ်ဖှံသးညီ အပူၤလီၤ.+ ၂၇ ပှၤလ့ၤဝံဖိတဖၣ်လၢ အအိၣ်လၢ သုဝ့ၢ်တဖၣ်အပူၤန့ၣ်+ တဒိးန့ၢ်ဘၣ် တၢ်စုလီၢ်ခီၣ်ခိၣ် ဒီးတၢ်န့ၢ်သါ ဒ်သိးဒီးသုဘၣ် အဃိ တဘၣ်ကွၢ်ကပာ် အဝဲသ့ၣ်တဂ့ၤ.+
၂၈ “ဖဲသၢနံၣ်တနံၣ် အကတၢၢ် ကိးဘျီဒဲးန့ၣ် သုကဘၣ်လဲၤစိာ် တၢ်လၢအမဲထီၣ်သၣ်ထီၣ် လၢသၢနံၣ်တနံၣ်အတီၢ်ပူၤ ကိးမံၤဒဲး ဆံဆဲၣ်ပူတပူ ဒီးပာ်လီၤအီၤလၢ သုဝ့ၢ်တဖၣ်အပူၤလီၤ.+ ၂၉ ဒီးပှၤလ့ၤဝံဖိ လၢအတဒိးန့ၢ်ဘၣ် တၢ်စုလီၢ်ခီၣ်ခိၣ် ဒီးတၢ်န့ၢ်သါ ဒ်သိးဒီးသုဘၣ်, ပှၤထံဂၤကီၢ်ဂၤဖိတဖၣ်, ဖိၣ်ဃဲ ဒီးမုၣ်ကမဲလၢ အအိၣ်လၢ သုဝ့ၢ်တဖၣ်အပူၤန့ၣ် ကဟဲအီၣ်ဝဲ ဘျဲဘျဲလီၤ.+ သုမ့ၢ်မၤဒ်န့ၣ်န့ၣ် သုကစၢ် ယဟိဝၤယွၤ ကဆိၣ်ဂ့ၤတၢ်လၢ သုမၤအီၤကိးမံၤဒဲးလီၤ.+
၁၅ “ဖဲနွံနံၣ်တနံၣ် ကိးဘျီဒဲးန့ၣ် နကဘၣ် မၤလီၤတူာ်ကွံာ် ပှၤဂၤအဒ့ၣ်ကမၢ်တဖၣ်လီၤ.+ ၂ နကဘၣ် မၤလီၤတူာ်ကွံာ် ပှၤဂၤ အဒ့ၣ်ကမၢ်တဖၣ် လၢကျဲဒ်အံၤလီၤ. ပှၤလၢ အဟ့ၣ်လိၢ်တၢ် တဂၤဂၤန့ၣ် ကဘၣ် မၤလီၤတူာ်ကွံာ် ပှၤလၢအဃၢၤ အဒ့ၣ်ကမၢ် လၢအကဘၣ်ဟ့ၣ်အီၤလီၤ. မ့ၢ်လၢ တၢ်ဘိးဘၣ်သ့ၣ်ညါ အိၣ်ဝဲလၢ ပှၤကဘၣ် မၤလီၤတူာ်ကွံာ် ပှၤဂၤအဒ့ၣ်ကမၢ်တဖၣ် ဒ်ယဟိဝၤယွၤ မၤလိာ်ဝဲအသိးအဃိ အဝဲ တဘၣ် ဃ့က့ၤစ့လၢ ပှၤလၢအဃၢၤ မ့တမ့ၢ် အသကိး အအိၣ်လၢၤဘၣ်.+ ၃ မ့မ့ၢ် ပှၤထံဂၤကီၢ်ဂၤဖိ အဒ့ၣ်ကမၢ် လၢအကဘၣ်ဟ့ၣ်နၤန့ၣ် နဃ့က့ၤအီၤသ့+ ဘၣ်ဆၣ် မ့မ့ၢ် နသကိး ပှၤအံၣ်စရ့လးဖိ ကဒဲကဒဲ အဒ့ၣ်ကမၢ်လၢ အကဘၣ်ဟ့ၣ်နၤန့ၣ် နကဘၣ် မၤလီၤတူာ်ကွံာ် န့ၢ်အီၤလီၤ. ၄ ဖဲကီၢ်လၢသုကစၢ် ယဟိဝၤယွၤ ကဟ့ၣ်လီၤသု ဒ်တၢ်န့ၢ်သါအသိးန့ၣ် ယဟိဝၤယွၤ ကဆိၣ်ဂ့ၤသု သပှၢ်ကတၢၢ်အဃိ+ လၢသုကျါန့ၣ် ပှၤဖှီၣ်ဖိယာ်ဖိ တဘၣ်အိၣ်ဝဲ နီတဂၤဘၣ်. ၅ ဘၣ်ဆၣ် သုကဘၣ်ဒိကနၣ် သုကစၢ် ယဟိဝၤယွၤ အကလုၢ် လီၤတံၢ်လီၤဆဲး ဒီးမၤပိာ်ထွဲ အတၢ်မၤလိာ် ခဲလၢာ် လၢယဟ့ၣ်လီၤသု တနံၤအံၤန့ၣ်လီၤ.+ ၆ သုကစၢ် ယဟိဝၤယွၤ ကဆိၣ်ဂ့ၤသု ဒ်အအၢၣ်လီၤသုအသိးလီၤ. အဃိ သုကဟ့ၣ်လိၢ် တၢ်လၢ ပှၤကလုာ် အဂၤတဖၣ် ဒီးသုတလိၣ် ဃ့လိၢ်တၢ်ဘၣ်.+ ဒီးသုကဒိၣ်စိလၢ ပှၤကလုာ် အဂၤတဖၣ် အဖီခိၣ် ဘၣ်ဆၣ် အဝဲသ့ၣ် တဒိၣ်စိလၢ သုဖီခိၣ်ဘၣ်.+
၇ “လၢဝ့ၢ်တဖၣ်လၢ အအိၣ်လၢ ကီၢ်လၢ ယဟိဝၤယွၤ ဟ့ၣ်လီၤသုအပူၤ နသကိးတဂၤဂၤ မ့ၢ်ဖှီၣ်လီၤန့ၣ် တဘၣ်မၤကိၤနသး ဒီးပံဒံ* လၢနသကိးတဂၤအံၤ အဖီခိၣ်တဂ့ၤ.+ ၈ နကဘၣ် သးအိၣ်ဟ့ၣ်အီၤတၢ်+ ဒီးဟ့ၣ်လိၢ်အီၤ တၢ်လၢအလိၣ်ဘၣ်ဝဲ ခဲလၢာ်လီၤ. ၉ နကဆိမိၣ်ဘၣ်လၢ ‘နွံနံၣ်တနံၣ် လၢအမ့ၢ် တၢ်ပူၤဖျဲးအနံၣ် ဘူးကတုၤလံ’+ အဃိ နကပံဒံလၢ နသကိး အဖီခိၣ် ဒီးနတဟ့ၣ်အီၤ တၢ်နီတမံၤဘၣ်. ပလီၢ်နသး ဒ်သိး နသုတဆိကမိၣ် တၢ်အၢတၢ်သီ ဒ်န့ၣ် လၢနသးပူၤတဂ့ၤ. နမ့ၢ်မၤ ဒ်န့ၣ်န့ၣ် အဝဲကကိးထီၣ် ယဟိဝၤယွၤ ဒီးတၢ်ဒဲးဘး ကလီၤတီလၢ နဖီခိၣ်လီၤ.+ ၁၀ နကဘၣ်ဟ့ၣ်အီၤတၢ်လၢ တၢ်သူၣ်အိၣ်သးအိၣ်အပူၤ+ ဒီးနတဘၣ်ဟ့ၣ်အီၤတၢ်လၢ တၢ်သူၣ်တအိၣ်သးတအိၣ် အပူၤန့ၣ်ဘၣ်. နမ့ၢ်မၤဒ်န့ၣ်န့ၣ် နကစၢ် ယဟိဝၤယွၤ ကဆိၣ်ဂ့ၤ တၢ်လၢနမၤအီၤခဲလၢာ်လီၤ.+ ၁၁ ပှၤဖှီၣ်ဖိယာ်ဖိတဖၣ် ကအိၣ်လၢ သုကီၢ်ပူၤထီဘိလီၤ.+ လၢတၢ်န့ၣ်အဃိ ယမၤလိာ်သုလၢ ‘သုသကိးလၢ အဘၣ်နးဘၣ်ဖှီၣ် ဒီးအဖှီၣ်အယာ်န့ၣ် သုကဘၣ် သးအိၣ်ဟ့ၣ်အီၤတၢ်လီၤ.’*+
၁၂ “နသကိး တဂၤဂၤလၢ အမ့ၢ် ပှၤဧ့ၤဘြံၤဖိ အပိာ်မုၣ်မ့ၢ်ဂ့ၤ အပိာ်ခွါမ့ၢ်ဂ့ၤ မ့ၢ်ဘၣ်တၢ်ဆါလီၤကွံာ်အီၤလၢ နအိၣ် ဒီးအမ့ၢ် မၤနတၢ်ဃုနံၣ်န့ၣ် ဖဲနွံနံၣ်တနံၣ်န့ၣ် နကဘၣ် ပျၢ်ကွံာ်အီၤလီၤ.+ ၁၃ ဒီးနမ့ၢ်ပျၢ်ကွံာ်အီၤန့ၣ် နတဘၣ် ပျဲက့ၤအီၤ ခီလီလီဘၣ်. ၁၄ လၢတၢ်သူၣ်အိၣ်သးအိၣ်အပူၤ နကဘၣ် ဟ့ၣ်လီၤအီၤ နသိ ဒီးမဲာ်တဲးလဲး, နဘု, နစပံးထံ ဒီးနသိ တနီၤလီၤ. ဒ်နကစၢ် ယဟိဝၤယွၤ ဆိၣ်ဂ့ၤနၤအသိး နကဘၣ် ဟ့ၣ်လီၤအီၤလီၤ. ၁၅ သ့ၣ်နီၣ်ထီၣ်လၢ သုဘၣ်ကဲကုၢ်လၢ ကီၢ်အဲၤကူပတူးအပူၤ ဒီးသုကစၢ် ယဟိဝၤယွၤ မၤပူၤဖျဲးသုလီၤ. လၢတၢ်န့ၣ်အဃိ တနံၤအံၤ ယမၤလိာ်သုလၢ သုကမၤ ဒ်န့ၣ်လီၤ.
၁၆ “ဘၣ်ဆၣ် ဘၣ်သ့ၣ်သ့ၣ် ကုၢ်တဂၤ ကအဲၣ်နၤဒီးနဟံၣ်ဖိဃီဖိ ဒီးအိၣ်ဒီးနၤမုာ်အဃိ အကတဲနၤလၢ ‘ယတအဲၣ်ဒိး ဟးထီၣ်လၢနအိၣ်ဘၣ်.’+ ၁၇ မ့မ့ၢ်ဒ်န့ၣ်န့ၣ် နကဘၣ် ဟံးန့ၢ် ထးလူတဘိ ဒီးလဲၤကိးအီၤလၢ ပဲတြီအကပၤ ဒီးတုၢ်ဖျိ အနၢ်လီၤ. ဒီးအကကဲထီၣ် နကုၢ် တစိၤသးလီၤ. နကုၢ်မုၣ်စ့ၢ်ကီး နကဘၣ်မၤအီၤ ဒ်န့ၣ်လီၤ. ၁၈ ဖဲနပျၢ်လီၤကွံာ်အီၤ ဒီးအဝဲဟးထီၣ်ကွံာ်လၢ နအိၣ်အခါ တဘၣ်ဆိကမိၣ်လၢ အမ့ၢ်တၢ်ကီလၢ နဂီၢ်တဂ့ၤ. အဝဲမၤတၢ်လၢနဂီၢ် ဃုနံၣ်န့ၣ် လီၤလၢဝဲ ပှဲၤသိးဒီး ပှၤလၢအဒိးငါလီၤအသးတဂၤ ခံစး ဒီးနကစၢ် ယဟိဝၤယွၤ ဆိၣ်ဂ့ၤနၤ လၢတၢ်ကိးမံၤဒဲး အပူၤလံ.
၁၉ “နကဘၣ် ပာ်စီဆှံ နကျီၢ်ဖါ, သိဖါ ဒီးမဲာ်တဲးလဲးဖါ အဝဲၢ်ကိ ကိးဒုဒဲး လၢနကစၢ် ယဟိဝၤယွၤ အဂီၢ်လီၤ.+ နတဘၣ် မၢနကျီၢ် အဝဲၢ်ကိ မၤတၢ်မၤနီတမံၤဘၣ် ဒီးနတဘၣ် တံာ် နသိဒီးနမဲာ်တဲးလဲး အဝဲၢ်ကိ အဆူၣ်ဘၣ်. ၂၀ နၤဒီး ပှၤလၢ အအိၣ် ဟံၣ်တဖျၢၣ်ဃီဒီးနၤတဖၣ် ကဘၣ်အီၣ် ဆၣ်ဖိကီၢ်ဖိအံၤလၢ ယဟိဝၤယွၤ အမဲာ်ညါ ဖဲတၢ်လီၢ်လၢ ယဟိဝၤယွၤ ဃုထၢထီၣ်ဝဲအလီၢ် ကိးနံၣ်ဒဲးလီၤ.+ ၂၁ ဘၣ်ဆၣ် ဆၣ်ဖိကီၢ်ဖိလၢ အအိၣ်ဒီး တၢ်တလၢတပှဲၤ, အခီၣ်ဟးဂီၤ, အမဲာ်တထံၣ်တၢ် မ့တမ့ၢ်အအိၣ်ဒီး တၢ်တလၢတပှဲၤ လၢအနးဖးဒိၣ် အဂၤတမံၤမံၤန့ၣ် နတဘၣ် လုၢ်ထီၣ်အီၤလၢ နကစၢ် ယဟိဝၤယွၤ အအိၣ်ဘၣ်.+ ၂၂ နကဘၣ်အီၣ်အီၤ လၢနဝ့ၢ်တဖၣ် အပူၤလီၤ. ပှၤလၢ အတကဆှီဘၣ်မ့ၢ်ဂ့ၤ, အကဆှီမ့ၢ်ဂ့ၤ ကအီၣ်ဘၣ်ဝဲဒ် အအီၣ်တၤဃီၤ ဒီးတၤဟိအသိးလီၤ.+ ၂၃ ဘၣ်ဆၣ် နတဘၣ်အီၣ် အသွံၣ်ဘၣ်.+ နကဘၣ်လူလီၤအီၤ လၢဟီၣ်ခိၣ်လိၤ ဒ်ထံအသိးလီၤ.+
၁၆ “ဖဲလါအၤဘံာ်န့ၣ် နကစၢ် ယဟိဝၤယွၤ ထုးထီၣ်ကွံာ်နၤလၢ ကီၢ်အဲၤကူပတူးအပူၤ လၢမုၢ်နၤခီအဃိ+ သ့ၣ်နီၣ်ထီၣ်လၢ လါအၤဘံာ် မ့ၢ်တၢ်လၢအရ့ဒိၣ် ဒီးမၤဘူၣ်လဲၤကပာ် လၢယဟိဝၤယွၤ အဂီၢ်တက့ၢ်.+ ၂ လၢနသိဒီးမဲာ်တဲးလဲး ဒီးနကျီၢ်အကျါန့ၣ်+ နကဘၣ်ဟ့ၣ်လုၢ်ထီၣ် ဘူၣ်လဲၤကပာ် အတၢ်လုၢ်လၢ နကစၢ် ယဟိဝၤယွၤအအိၣ်+ ဖဲတၢ်လီၢ်လၢ ယဟိဝၤယွၤ ဃုထၢဝဲလၢ အမံၤကအိၣ် အလီၢ်န့ၣ်လီၤ.+ ၃ နတဘၣ်အီၣ် ဆၣ်ဖိကီၢ်ဖိတဖၣ်အံၤ ဃုာ်ဒီး တၢ်လၢအပၣ်ဒီးကိၣ်မံၣ် နီတမံၤဘၣ်.+ နကဘၣ်အီၣ် ကိၣ်လၢအတပၣ်ဒီး ကိၣ်မံၣ်ဘၣ် လၢအမ့ၢ် တၢ်နးတၢ်ဖှီၣ်အကိၣ် နွံသီ မ့ၢ်လၢ နဘၣ် ဟးထီၣ်လၢ ကီၢ်အဲၤကူပတူးအပူၤ ကရီကဒးအဃိလီၤ.+ ဖဲနအိၣ်မူ အဆၢကတီၢ် ဒ်သိးနကသ့ၣ်နီၣ်ထီၣ် မုၢ်နံၤလၢ နဟးထီၣ်လၢ ကီၢ်အဲၤကူပတူး အပူၤအဂီၢ် နကဘၣ် မၤဒ်န့ၣ်လီၤ.+ ၄ လၢသုဟီၣ်ကဝီၤ ခဲလၢာ်အပူၤန့ၣ် ကိၣ်မံၣ် တဘၣ်အိၣ်ဘၣ် နွံသီလီၤ.+ တၢ်ညၣ်လၢ နကလုၢ်ထီၣ်အီၤလၢ အဆိကတၢၢ်တနံၤ ဟါလီၤခီန့ၣ် နတဘၣ် ပာ်ဃာ်အီၤ ဒီတနၤ တုၤလၢ ဂီၤခီတဂ့ၤ.+ ၅ တၢ်တဟ့ၣ်နၤ အခွဲးလၢ နကလုၢ်ထီၣ် ဘူၣ်လဲၤကပာ် အတၢ်လုၢ်လၢ ဝ့ၢ်တဖျၢၣ်ဂ့ၤ တဖျၢၣ်ဂ့ၤ လၢယဟိဝၤယွၤ ဟ့ၣ်လီၤနၤ အပူၤန့ၣ်ဘၣ်. ၆ ပှၤကဘၣ်မၤအီၤ ဖဲတၢ်လီၢ်လၢ ယဟိဝၤယွၤ ဃုထၢဝဲလၢ အမံၤကအိၣ် အလီၢ်န့ၣ်လီၤ. နကဘၣ်လုၢ်ထီၣ် ဘူၣ်လဲၤကပာ် အတၢ်လုၢ် လၢဟါလီၤခီ မုၢ်လီၤနုာ် သီသီအဆၢကတီၢ်+ ဖဲတၢ်ဆၢကတီၢ် တသီဃီ လၢနဟးထီၣ်လၢ ကီၢ်အဲၤကူပတူးအပူၤန့ၣ်လီၤ. ၇ နကဘၣ် ဖီအီၤ ဒီးအီၣ်အီၤ+ ဖဲတၢ်လီၢ်လၢ ယဟိဝၤယွၤ ဃုထၢထီၣ်ဝဲ အလီၢ်လီၤ.+ ဖဲဂီၤခီန့ၣ် နက့ၤကဒါက့ၤလၢ နဒဲသ့လီၤ. ၈ နကဘၣ်အီၣ် ကိၣ်လၢအတပၣ်ဒီး ကိၣ်မံၣ်ဘၣ် ဃုသီလီၤ. ဖဲနွံသီတသီန့ၣ် တၢ်အိၣ်ဖှိၣ်စီဆှံ လၢယဟိဝၤယွၤအဂီၢ် ကအိၣ်ဝဲလီၤ. နတဘၣ်မၤ တၢ်မၤနီတမံၤဘၣ်.+
၉ “ဒီးသုကဘၣ် ဂံၢ်အါထီၣ် နွံနွံလီၤ. သုကဘၣ် စးထီၣ်ဂံၢ် တၢ်နွံနွံအံၤ ဖဲသုစးထီၣ်ကူးဘု လၢစံာ်ပျီပူၤလီၤ.+ ၁၀ ဝံၤဒီးသုကဘၣ်မၤ ဘူၣ်နွံတဖၣ်လၢ သုကစၢ် ယဟိဝၤယွၤအဂီၢ်+ ဒီးဟဲစိာ် တၢ်ဟ့ၣ်လၢ တၢ်သးအိၣ်အပူၤ အါထဲသိးဒီး သုကစၢ် ယဟိဝၤယွၤ ဆိၣ်ဂ့ၤသု အသိးန့ၣ်လီၤ.+ ၁၁ ဒီးသုကဘၣ် သးခုလၢ ယဟိဝၤယွၤ အမဲာ်ညါ ဃုာ်ဒီးသုဖိမုၣ် ဒီးသုဖိခွါ, သုကုၢ်ပိာ်မုၣ် ဒီးသုကုၢ်ပိာ်ခွါ, ပှၤလ့ၤဝံဖိလၢ အအိၣ်လၢ သုဝ့ၢ်ပူၤ, ပှၤထံဂၤကီၢ်ဂၤဖိ, ပှၤဖိၣ်ဃဲ ဒီးပှၤမုၣ်ကမဲ လၢအအိၣ်လၢသုကျါ ဖဲတၢ်လီၢ်လၢ သုကစၢ် ယဟိဝၤယွၤ ဃုထၢဝဲလၢ အမံၤကအိၣ်ဝဲ အလီၢ်န့ၣ်လီၤ.+ ၁၂ သ့ၣ်နီၣ်ထီၣ်လၢ နဘၣ်ကဲကုၢ်လၢ ကီၢ်အဲၤကူပတူး အပူၤ+ ဒီးအိၣ်မူမၤထွဲ တၢ်သိၣ်တၢ်သီတဖၣ်အံၤတက့ၢ်.
၁၃ “ဖဲနပာ်ဖှိၣ် နဘု, နစပံးထံ ဒီးနသိ ဝံၤအခါ နကဘၣ်မၤ ဘူၣ်ဒဲ နွံသီလီၤ.+ ၁၄ သုဒီးသုဖိမုၣ် ဒီးသုဖိခွါ, သုကုၢ်ပိာ်မုၣ် ဒီးသုကုၢ်ပိာ်ခွါ, ပှၤလ့ၤဝံဖိ, ပှၤထံဂၤကီၢ်ဂၤဖိ, ပှၤဖိၣ်ဃဲ ဒီးပှၤမုၣ်ကမဲ လၢအအိၣ်လၢ သုဝ့ၢ်တဖၣ်အပူၤန့ၣ် သုကဘၣ် သူၣ်ဖှံသးညီ ဖဲသုဘူၣ်ဘၣ် အခါလီၤ.+ ၁၅ နကစၢ် ယဟိဝၤယွၤ ကဆိၣ်ဂ့ၤ နတၤသူတၤသၣ်ခဲလၢာ် ဒီးတၢ်လၢ နမၤအီၤ ခဲလၢာ်အဃိ+ နကဘၣ် မၤဘူၣ်အံၤ+ လၢနကစၢ် ယဟိဝၤယွၤအဂီၢ် နွံသီ ဖဲတၢ်လီၢ်လၢ ယဟိဝၤယွၤ ဃုထၢထီၣ်ဝဲ ဒီးနကပှဲၤဒီး တၢ်သးခုလီၤ.+
၁၆ “ပှၤပိာ်ခွါ ကိးဂၤဒဲးန့ၣ် ကဘၣ် ဟဲပာ်ဖျါထီၣ်အသးလၢ နကစၢ် ယဟိဝၤယွၤ အမဲာ်ညါ ဖဲတၢ်လီၢ်လၢ ကစၢ်ယွၤ ဃုထၢထီၣ်ဝဲ အလီၢ် တနံၣ်သၢဘျီလီၤ. ဖဲဘူၣ်ကိၣ်လၢအတပၣ်ဒီး ကိၣ်မံၣ်ဘၣ်,+ ဘူၣ်နွံတဖၣ်+ ဒီးဘူၣ်ဒဲတဖၣ်+ ဘၣ်ဝဲအခါ အဝဲသ့ၣ် ကဘၣ် ဟဲပာ်ဖျါထီၣ်အသး ဒီးအဝဲသ့ၣ် မ့ၢ်တဟဲစိာ် တၢ်နီတမံၤဘၣ်န့ၣ် အဝဲသ့ၣ် တဘၣ် ဟဲပာ်ဖျါထီၣ်အသး လၢယဟိဝၤယွၤ အမဲာ်ညါ နီတဂၤဘၣ်. ၁၇ ဒီးပှၤတဂၤစုာ်စုာ် လၢအဟဲစိာ် တၢ်ဟ့ၣ်န့ၣ် ကဘၣ်ဟဲစိာ်ဝဲ အါထဲသိးဒီး အကစၢ် ယဟိဝၤယွၤ ဆိၣ်ဂ့ၤအီၤ အသိးန့ၣ်လီၤ.+
၁၈ “လၢဝ့ၢ်ကိးဖျၢၣ်ဒဲးလၢ သုကစၢ် ယဟိဝၤယွၤ ဟ့ၣ်လီၤသု အပူၤန့ၣ် သုကဘၣ် ဃုထၢထီၣ် စံၣ်ညီၣ်ကွီၢ်တဖၣ်+ ဒီးပဒိၣ်တဖၣ်လၢ ပှၤအံၣ်စရ့လးဖိ အဒူၣ် တဒူၣ်စုာ်စုာ် အဂီၢ်လီၤ. အဝဲသ့ၣ် ကဘၣ် စံၣ်ညီၣ်န့ၢ်တၢ်လၢ ပှၤဂီၢ်မုၢ်အဂီၢ် တီတီလိၤလိၤလီၤ. ၁၉ သုတဘၣ် မၤက့ၣ်မၤကူ တၢ်မ့ၢ်တၢ်တီဘၣ်,+ သုတဘၣ် ကွၢ်မဲာ်တၢ်ဘၣ်+ ဒီးသုတဘၣ် တူၢ်လိာ် တၢ်ထီးကျိၣ်ထီးစ့ဘၣ်,* မ့ၢ်လၢ တၢ်ထီးကျိၣ်ထီးစ့န့ၣ် မၤခံးပှၤကူၣ်တၢ်သ့အမဲာ်+ ဒ်သိး ပှၤသုတမၤတၢ်လၢ အဘၣ်တဂ့ၤအဂီၢ် ဒီးမၤက့ၣ်မၤကူ ပှၤတီပှၤလိၤ အတၢ်ကတိၤအဃိလီၤ. ၂၀ ဒ်သိး သုကဆဲးအိၣ်မူဘၣ် ဒီးဒိးန့ၢ်ဘၣ် ကီၢ်တဘ့ၣ်လၢ သုကစၢ် ယဟိဝၤယွၤ ကဟ့ၣ်လီၤသုအဂီၢ် သုကဘၣ် လူၤပိာ်ထွဲ တၢ်စံၣ်ညီၣ်တီအကျဲလီၤ.+
၂၁ “လၢသုကစၢ် ယဟိဝၤယွၤ အတၢ်လုၢ်လီၢ် လၢသုကတ့ထီၣ်အီၤ အကပၤန့ၣ် သုတဘၣ်သူၣ်လီၤ သ့ၣ်ဒ် တၢ်စီဆှံအထူၣ်*+ အသိး နီတထူၣ်ဘၣ်.
၂၂ “သုတဘၣ်ဆီလီၤ လၢၢ်ထူၣ်စီဆှံ လၢသုနီၢ်ကစၢ် အဂီၢ်စ့ၢ်ကီးဘၣ်.+ အမ့ၢ်တၢ်လၢ သုကစၢ် ယဟိဝၤယွၤ သးဟ့ဝဲလီၤ.
၁၇ “သုတဘၣ် ဟ့ၣ်လုၢ်ထီၣ် ကျီၢ်ဖါ ဒီးသိလၢ အအိၣ်ဒီး တၢ်တလၢတပှဲၤ တမံၤမံၤလၢ ယဟိဝၤယွၤအအိၣ်န့ၣ်ဘၣ်. အမ့ၢ်ဝဲ တၢ်လၢ အလီၤသးဘၣ်အၢ လၢယဟိဝၤယွၤအဂီၢ်လီၤ.+
၂ “ဘၣ်သ့ၣ်သ့ၣ် ဖဲနဝ့ၢ်တဖျၢၣ်ဖျၢၣ်လၢ နကစၢ် ယဟိဝၤယွၤ ကဟ့ၣ်လီၤနၤ အပူၤန့ၣ် နကထံၣ်ဘၣ်ပိာ်မုၣ်တဂၤဂၤ မ့တမ့ၢ် ပိာ်ခွါတဂၤဂၤလၢ အမၤတၢ်အၢလၢ နကစၢ် ယဟိဝၤယွၤ အမဲာ်ညါ ဒီးမၤဟးဂီၤ ယွၤအတၢ်အၢၣ်လီၤအီလီၤန့ၣ်လီၤ.+ ၃ ဒီးအဝဲ ဟးဖျိးကျဲ ဒီးယတဟ့ၣ်အခွဲးဘၣ်+ သနာ်က့ အဝဲ ဘူၣ်ထီၣ်ဘါထီၣ် ယွၤအဂၤတဖၣ် မ့တမ့ၢ် မုၢ်, လါ ဒီးဆၣ်တဖၣ် လၢမူခိၣ်လီၤ.+ ၄ ဖဲပှၤဟဲတဲနၤ မ့တမ့ၢ် နနၢ်ဟူဘၣ် ဒ်န့ၣ်အခါ နကဘၣ် ဃုသ့ၣ်ညါ တၢ်ဂ့ၢ်တခါအံၤ လီၤတံၢ်လီၤဆဲးလီၤ. နမ့ၢ်သ့ၣ်ညါ လီၤတံၢ်လီၤဆဲးလၢ+ တၢ်လၢ အလီၤသးဘၣ်အၢ တခါအံၤ ကဲထီၣ်အသးလၢ အံၣ်စရ့လးအကီၢ်ပူၤန့ၣ် ၅ နကဘၣ် လဲၤကိးထီၣ် ပိာ်မုၣ် မ့တမ့ၢ် ပိာ်ခွါလၢ အမၤတၢ်အၢတၢ်သီ တဂၤအံၤ ဆူဝ့ၢ်အတြဲၤ အမဲာ်ညါ ဒီးကွံာ်သံအီၤလၢလၢၢ်လီၤ.+ ၆ ပှၤအုၣ်အသး မ့ၢ်အိၣ်ခံဂၤ မ့တမ့ၢ် သၢဂၤမး+ ပှၤကဘၣ် မၤသံအီၤလီၤ. ဘၣ်ဆၣ် ပှၤအုၣ်အသး မ့ၢ်အိၣ်ထဲတဂၤန့ၣ် ပှၤတဘၣ် မၤသံအီၤဘၣ်.+ ၇ ဒ်သိး ကမၤသံအီၤအဂီၢ် အဆိကတၢၢ်န့ၣ် ပှၤအုၣ်အသးတဖၣ် ကဘၣ်ကွံာ်အီၤလၢလၢၢ်, မ့ၢ်ဝံၤန့ၣ် ပှၤအဂၤတဖၣ် ကမၤဝဲဒ်န့ၣ်လီၤ. သုကဘၣ် ထုးထီၣ်ကွံာ် တၢ်လၢအအၢအသီ လၢသုကျါလီၤ.+
၈ “လၢသုဝ့ၢ် တဖျၢၣ်ဖျၢၣ်အပူၤန့ၣ် တၢ်ဂ့ၢ်ကီ မ့ၢ်အိၣ်ထီၣ် ဒ်သိးဒီး တၢ်မၤသံ ပှၤကညီမ့ၢ်ဂ့ၤ,+ တၢ်ဂ့ၢ်လၢ အဘၣ်ထွဲဒီး တၢ်မူးတၢ်ရၢ်မ့ၢ်ဂ့ၤ, တၢ်မၤဆူၣ်မၤစိးမ့ၢ်ဂ့ၤ မ့တမ့ၢ် တၢ်ဂ့ၢ်လိာ်ဘှီလိာ်လၢ အဂၤတဖၣ် ဒီးတၢ်ဂ့ၢ်အံၤ မ့ၢ်ကီတလၢ လၢသုကစံၣ်ညီၣ်ဆၢတဲာ်တၢ်အဂီၢ်န့ၣ် သုကဘၣ် လဲၤလၢ တၢ်လီၢ်လၢ သုကစၢ် ယဟိဝၤယွၤ ဃုထၢထီၣ်ဝဲန့ၣ်လီၤ.+ ၉ သုကဘၣ်လဲၤလၢ ပှၤလုၢ်တၢ်ဒိၣ်တဖၣ်* ဒီးစံၣ်ညီၣ်ကွီၢ်လၢ+ အကဲစံၣ်ညီၣ်ကွီၢ် လၢတၢ်ဆၢကတီၢ်ဖဲန့ၣ် အအိၣ် ဒီးသံကွၢ်သံဒိးတၢ် ဒီးအဝဲသ့ၣ် ကဆၢတဲာ်န့ၢ်တၢ် လၢသုဂီၢ်လီၤ.+ ၁၀ ဒ်တၢ်လၢ အဝဲသ့ၣ် ဆၢတဲာ်န့ၢ်သု ဖဲတၢ်လီၢ်လၢ ယဟိဝၤယွၤ ဃုထၢထီၣ်ဝဲ အလီၢ်န့ၣ် သုကဘၣ်မၤထွဲဒ်န့ၣ်လီၤ. ပလီၢ်သုသးလၢ သုကမၤဒ် ကယဲၢ်တၢ်လၢ အဝဲသ့ၣ် ဟံးစုနဲၣ်ကျဲသုအသိး လီၤတံၢ်လီၤဆဲးတက့ၢ်. ၁၁ သုကဘၣ်မၤ ဒ်တၢ်သိၣ်တၢ်သီလၢ အဝဲသ့ၣ် ဒုးနဲၣ်သု ဒီးဒ်တၢ်ဆၢတဲာ်လၢ အဝဲသ့ၣ် တဲဘၣ်သုလီၤ.+ သုကဘၣ် မၤပိာ်ထွဲဒ် တၢ်လၢအဝဲသ့ၣ် ကဆၢတဲာ်န့ၢ်သုအသိး လီၤတံၢ်လီၤဆဲးလီၤ.+ ၁၂ ပှၤတဂၤ မ့ၢ်ပာ်ထီၣ်ထီအသး ဒီးမ့ၢ်တဒိကနၣ် ပှၤလုၢ်တၢ်ဒိၣ် လၢအမၤသုကစၢ် ယဟိဝၤယွၤ အတၢ်မၤ မ့တမ့ၢ် စံၣ်ညီၣ်ကွီၢ် အကလုၢ်ဘၣ်န့ၣ် ကဘၣ်သံလီၤ.+ သုကဘၣ် ထုးထီၣ်ကွံာ် တၢ်လၢအအၢအသီ လၢပှၤအံၣ်စရ့လးဖိအကျါလီၤ.+ ၁၃ သုမ့ၢ်မၤဒ်န့ၣ်န့ၣ် ပှၤခဲလၢာ် ကနၢ်ဟူဘၣ်ဝဲ ဒီးကပျံၤတၢ်လီၤ. ဒီးလၢခံ အဝဲသ့ၣ် တပာ်ထီၣ်ထီအသး ဒ်အံၤ နီတဘျီလၢၤဘၣ်.+
၁၄ “ဖဲသုလဲၤနုာ်လီၤလၢ ကီၢ်တဘ့ၣ်လၢ သုကစၢ် ယဟိဝၤယွၤ ကဟ့ၣ်လီၤသု ဒီးဖဲသုမၤန့ၢ်အီၤ ဒီးအိၣ်ဝဲဆိးဝဲလၢ အပူၤအခါ သုကတဲလၢ ‘မ်ပပာ်ထီၣ် စီၤပၤ ဒ်ပှၤကလုာ်တဖၣ်လၢ အအိၣ်ဝးတရံးပှၤ အသိးန့ၣ်တက့ၢ်.’+ ၁၅ တၢ်မ့ၢ်ကဲထီၣ်အသး ဒ်န့ၣ်န့ၣ် ပှၤလၢ သုကပာ်ထီၣ်အီၤလၢ စီၤပၤတဂၤန့ၣ် ကဘၣ်မ့ၢ် ပှၤတဂၤလၢ သုကစၢ် ယဟိဝၤယွၤ ဃုထၢအီၤလီၤ.+ ဒီးစီၤပၤလၢ သုကပာ်ထီၣ်အီၤ တဂၤန့ၣ် ကဘၣ်မ့ၢ် ပှၤလၢ သုဒီပုၢ်ဝဲၢ်အကျါ တဂၤလီၤ. ပှၤထံဂၤကီၢ်ဂၤဖိလၢ အတမ့ၢ် သုဒီပုၢ်ဝဲၢ်ဘၣ်န့ၣ် သုတဘၣ် ပာ်ထီၣ်အီၤဘၣ်. ၁၆ ဘၣ်ဆၣ် စီၤပၤတဂၤအံၤ တဘၣ်ပာ်ဖှိၣ် ကသ့ၣ်အါဒုလၢ အနီၢ်ကစၢ် အဂီၢ်ဘၣ်.+ ဒီးမ့ၢ်လၢ ယဟိဝၤယွၤ တဲတ့ၢ်သုလၢ ‘သုတဘၣ် က့ၤကဒါက့ၤလၢ ကျဲတဘိန့ၣ် နီတဘျီလၢၤဘၣ်’ အဃိ အဝဲ တဘၣ်မၢ ပှၤက့ၤလၢ ကီၢ်အဲၤကူပတူးအပူၤ ဒ်သိး ကပှ့ၤအါထီၣ် ကသ့ၣ်အဂီၢ်ဘၣ်.+ ၁၇ ဒီးဒ်သိး အသုတဘၣ်တၢ်ကွဲန့ၢ်လွဲန့ၢ်အီၤ တဂ့ၤအဂီၢ် အဝဲ တဘၣ်ဟံးအမါ အါဂၤဘၣ်.+ တကးဒံးဘၣ် အဝဲ တဘၣ်ပာ်ဖှိၣ်ထီၣ် ထူဒီးစ့ အါအါဂီၢ်ဂီၢ် လၢအနီၢ်ကစၢ်အဂီၢ်ဘၣ်.+ ၁၈ ဖဲအဝဲ ကဲထီၣ်စီၤပၤအခါ အဝဲကဘၣ်ကွဲးကူဝဲ လံာ်တၢ်သိၣ်တၢ်သီအံၤလၢ ပှၤလုၢ်တၢ်ဒိၣ်တဖၣ်* ပာ်ဃာ်ဝဲလီၤ. ဒီးအကဘၣ်ကွဲးကူဝဲလၢ လံာ်တဘ့ၣ်အပူၤ လၢအနီၢ်ကစၢ်အဂီၢ်လီၤ.+
၁၉ “အဝဲ ကဘၣ်ပာ်ဃာ်ဝဲ ဒီးကဘၣ်ဖးဝဲ လၢအတၢ်အိၣ်မူ ဒီတစိၤ+ ဒ်သိး အကပျံၤ အကစၢ် ယဟိဝၤယွၤ ဒီးကမၤထွဲဝဲ တၢ်ကတိၤတဖၣ် ဒီးတၢ်ဘျၢတဖၣ် လၢအအိၣ်လၢ လံာ်တၢ်သိၣ်တၢ်သီအံၤအပူၤ ခဲလၢာ်လီၤ.+ ၂၀ အမ့ၢ်မၤဝဲဒ်န့ၣ်န့ၣ် တမ့ၢ်လၢ အဝဲ ကပာ်ထီၣ်ထီအသးလၢ အဒီပုၢ်ဝဲၢ်တဖၣ် အဖီခိၣ်ဘၣ် ဒီးတမ့ၢ်လၢ အကလဲၤကပာ်ကွံာ် တၢ်မၤလိာ်တဖၣ် လၢစုစ့ၣ်မ့ၢ်ဂ့ၤ စုထွဲမ့ၢ်ဂ့ၤဘၣ်. ဒီးအဝဲ ဒီးအဖိအလံၤတဖၣ် ကပၢဘၣ်တၢ် လၢပှၤအံၣ်စရ့လးဖိအကျါ ဖးယံာ်လီၤ.
၁၈ “ပှၤလုၢ်တၢ်ဒိၣ်တဖၣ်* ဒီးလ့ၤဝံ အဒူၣ် ဒီတဒူၣ်န့ၣ် တဒိးန့ၢ်ဘၣ် တၢ်စုလီၢ်ခီၣ်ခိၣ် ဒီးတၢ်န့ၢ်သါ ဒ်သိးဒီး ပှၤအံၣ်စရ့လးဖိ အဂၤတဖၣ်ဘၣ်. အဝဲသ့ၣ် ကဘၣ်အီၣ်ဝဲ တၢ်လၢ ပှၤဟ့ၣ်လုၢ်ထီၣ်အီၤလၢ ယဟိဝၤယွၤအအိၣ် လၢအမ့ၢ် ယွၤအတၢ်လီၤ.+ ၂ အဝဲသ့ၣ် တဘၣ်ဒိးန့ၢ်ဘၣ် တၢ်န့ၢ်သါလၢ အဒီပုၢ်ဝဲၢ်တဖၣ် အကျါဘၣ်. ဒ်ယဟိဝၤယွၤ တဲပာ်စၢၤ အဝဲသ့ၣ်အသိး အကဟ့ၣ်လီၤတၢ်လၢ အဝဲသ့ၣ်လိၣ်ဘၣ်တဖၣ်လီၤ.
၃ “တၢ်လၢ ပှၤလုၢ်တၢ်ဒိၣ်တဖၣ် ကြၢးဒိးန့ၢ်ဘၣ်ဝဲလၢ ပှၤဂီၢ်မုၢ်တဖၣ် အအိၣ်န့ၣ် မ့ၢ်အအံၤလီၤ. ဖဲပှၤတဂၤဂၤ လုၢ်ထီၣ်ဝဲ ကျီၢ်ဖါတဒုမ့ၢ်ဂ့ၤ သိတဒုမ့ၢ်ဂ့ၤ အကဘၣ် ဟ့ၣ်လီၤဝဲ အဖံဘၣ်ခိၣ်, အခၣ် ဒီးအဟၢဖၢ လၢပှၤလုၢ်တၢ်ဒိၣ် အအိၣ်လီၤ. ၄ သုတၤသၣ်ဆိတဖၣ် လၢအမ့ၢ် သုဘု, သုစပံးထံအသီ, သုသိဧိၤချါဧိၤ ဒီးသုသိဆူၣ်လၢ သုတံာ်ဆိအီၤတဖၣ်န့ၣ် သုကဘၣ် ဟ့ၣ်လီၤ ပှၤလုၢ်တၢ်ဒိၣ်လီၤ.+ ၅ သုကစၢ် ယဟိဝၤယွၤ ဃုထၢထီၣ် စီၤလ့ၤဝံ ဒီးအဖိအလံၤတဖၣ်လၢ ပှၤအံၣ်စရ့လးဖိ အဒူၣ်တဖၣ်အကျါ ဒ်သိး ကမၤတၢ်လၢ ယဟိဝၤယွၤ အမံၤအပူၤထီဘိ အဂီၢ်လီၤ.+
၆ “ဘၣ်ဆၣ် ပှၤလ့ၤဝံဖိ တဂၤဂၤလၢ အအိၣ်လၢ သုဝ့ၢ်တဖျၢၣ်ဖျၢၣ် လၢကီၢ်အံၣ်စရ့လးအပူၤန့ၣ်+ မ့ၢ်ဟးထီၣ်ဒီး အဲၣ်ဒိးလဲၤအိၣ်လၢ တၢ်လီၢ်လၢ ယဟိဝၤယွၤ ဃုထၢဝဲန့ၣ်+ ၇ အဝဲ မၤတၢ်ဖဲန့ၣ်လၢ အကစၢ် ယဟိဝၤယွၤ အမံၤအပူၤ ဒ်အဒီပုၢ်ဝဲၢ် ပှၤလ့ၤဝံဖိတဖၣ်လၢ အမၤတၢ်လၢ ယဟိဝၤယွၤ အမဲာ်ညါအသိးန့ၣ် သ့ဝဲလီၤ.+ ၈ ဒီးအဝဲ ကဒိးန့ၢ်ဘၣ်တၢ်အီၣ်တၢ်အီ ထဲသိးဒီး အဝဲသ့ၣ်လီၤ.+ တကးဒံးဘၣ် တၢ်လၢ အဝဲဒိးန့ၢ်ဘၣ်ဝဲ ခီဖျိလၢ အဆါ တၢ်စုလီၢ်ခီၣ်ခိၣ်လၢ အန့ၢ်သါဘၣ်ဝဲလၢ အမိၢ်ပၢ်ဖံဖုတဖၣ် အအိၣ်န့ၣ် ကမ့ၢ်အတၢ်လီၤ.
၉ “ဖဲသုလဲၤနုာ်လီၤလၢ ကီၢ်လၢ သုကစၢ် ယဟိဝၤယွၤ ကဟ့ၣ်လီၤသုအခါ သုတဘၣ် ကွၢ်လိ ပှၤကလုာ်တဖၣ်န့ၣ် အလုၢ်အလၢ်လၢ အလီၤသးဘၣ်အၢတဖၣ်ဘၣ်.+ ၁၀ ပှၤလၢ အဒွဲၣ်ထီၣ်* အဖိမုၣ်ဖိခွါ လၢမ့ၣ်အူ,+ ပှၤလၢ အဖးတၢ်ကမၤအသး ခါဆူညါ,+ ပှၤလၢ အအူတၢ်သမူတၢ်,+ ပှၤလၢ အကၢ်တၢ်ဒွးတၢ်,+ ပှၤလၢ အအူတၢ်လိၣ်တၢ်န့ၣ်+ တဘၣ်အိၣ်လၢ သုကျါ နီတဂၤဘၣ်. ၁၁ ပှၤလၢ အအူပှၤကညီ, ပှၤလၢ အသံကွၢ်တၢ်လၢ ပှၤလၢအဆဲးကျိးဒီးပှၤသံ+ ဒီးပှၤလၢ အဟီဆိပာ်စၢၤတၢ်+ အအိၣ် ဒီးပှၤလၢ အသံကွၢ်တၢ်လၢ ပှၤသံအအိၣ်န့ၣ်+ တဘၣ်အိၣ်လၢ သုကျါ နီတဂၤဘၣ်. ၁၂ ပှၤလၢ အမၤတၢ် သ့ၣ်တဖၣ်အံၤန့ၣ် ယဟိဝၤယွၤ သးဘၣ်အၢအီၤလီၤ. မ့ၢ်လၢ လုၢ်လၢ်လၢ အလီၤသးဘၣ်အၢတဖၣ်အံၤအဃိ နကစၢ် ယဟိဝၤယွၤ နီဟးထီၣ်ကွံာ် ပှၤကလုာ်တဖၣ်န့ၣ် လၢနမဲာ်ညါလီၤ. ၁၃ ပာ်ဖျါထီၣ် လၢယဟိဝၤယွၤ အမဲာ်ညါ လၢနမ့ၢ်ပှၤလၢ တၢ်ပာ်ဒ့ၣ်ပာ်ကမၣ်အီၤ အလီၢ်တအိၣ်ဘၣ် န့ၣ်တက့ၢ်.+
၁၄ “ပှၤကလုာ်လၢ သုကနီဟးထီၣ်ကွံာ်အီၤတဖၣ်န့ၣ် ညီနုၢ်ဒိကနၣ်ဝဲ ပှၤကၢ်တၢ်ဒွးတၢ်+ ဒီးပှၤအူတၢ်သမူတၢ်+ အကလုၢ်လီၤ. ဘၣ်ဆၣ် သုကစၢ် ယဟိဝၤယွၤ တဟ့ၣ်အခွဲးလၢ သုကမၤ တၢ်ဒ်န့ၣ်အသိး နီတမံၤဘၣ်. ၁၅ လၢသုဒီပုၢ်ဝဲၢ်တဖၣ် အကျါန့ၣ် သုကစၢ် ယဟိဝၤယွၤ ကဃုထၢထီၣ်န့ၢ်သု ဝံတဂၤ လၢအလီၤဂာ်ဒီး ယၤလီၤ. သုကဘၣ် ဒိကနၣ် အကလုၢ်လီၤ.+ ၁၆ ဖဲသုအိၣ်ဖှိၣ် လၢဃိၤရ့း အနံၤန့ၣ်+ သုတဲ သုကစၢ် ယဟိဝၤယွၤလၢ ‘ပပျံၤလၢ ပကသံဘၣ်ဖုးအဃိ ပမ့ၢ်တနၢ်ဟူဘၣ် ပကစၢ် ယဟိဝၤယွၤ အကလုၢ် ဒီးပမ့ၢ်တထံၣ်ဘၣ် မ့ၣ်အူဖးဒိၣ်လၢၤဘၣ်န့ၣ် ကဂ့ၤလီၤ.’+ ၁၇ ဖဲန့ၣ်န့ၣ် ယဟိဝၤယွၤ တဲယၤလၢ ‘တၢ်လၢ အဝဲသ့ၣ် တဲဝဲန့ၣ် ဂ့ၤဝဲလီၤ. ၁၈ လၢအဝဲသ့ၣ် အဒီပုၢ်ဝဲၢ်တဖၣ်အကျါန့ၣ် ယကဃုထၢထီၣ်န့ၢ်အဝဲသ့ၣ် ဝံတဂၤ လၢအလီၤဂာ်ဒီးနၤလီၤ.+ ယကတဲဘၣ်အီၤ တၢ်လၢအကဘၣ် တဲဝဲတဖၣ်+ ဒီးအဝဲ ကတဲဘၣ်က့ၤအဝဲသ့ၣ် တၢ်ခဲလၢာ်လၢ ယမၤလိာ်အီၤန့ၣ်လီၤ.+ ၁၉ ပှၤတဂၤဂၤ မ့ၢ်တဒိကနၣ် တၢ်လၢ ဝံတဂၤအံၤ တဲဝဲလၢ ယမံၤအပူၤဘၣ်န့ၣ် ယကဟံးန့ၢ်အရ့လၢ အအိၣ်လီၤ.+
၂၀ “‘လၢတၢ်ပာ်ထီၣ်ထီသးအပူၤ ဝံတဂၤ မ့ၢ်တဲတၢ် တမံၤမံၤလၢ ယမံၤအပူၤ လၢယတမၤလိာ်အီၤဘၣ် မ့တမ့ၢ် မ့ၢ်တဲတၢ်လၢ ယွၤအဂၤတဖၣ် အမံၤအပူၤန့ၣ် ဝံတဂၤအံၤ ကဘၣ်သံလီၤ.+ ၂၁ ဘၣ်ဆၣ် လၢသုသးပူၤ ဘၣ်သ့ၣ်သ့ၣ် သုကဆိကမိၣ်ဘၣ်လၢ “တၢ်ကတိၤတထံၣ်အံၤ မ့ၢ်ယဟိဝၤယွၤ တဲဧါ တတဲဧါန့ၣ် ပကသ့ၣ်ညါ ဒ်လဲၣ်.” ၂၂ ဝံတဂၤ မ့ၢ်တဲတၢ်လၢ ယဟိဝၤယွၤ အမံၤပူၤ ဒီးတၢ်ကတိၤလၢ အတဲဝဲတထံၣ် မ့ၢ်တဟဲလၢထီၣ်ပှဲၤထီၣ်ဘၣ်န့ၣ် အခီပညီ မ့ၢ်ဝဲလၢ ယဟိဝၤယွၤ တတဲဝဲ တၢ်ကတိၤ တထံၣ်န့ၣ်ဘၣ်. မ့ၢ်ဒၣ် ဝံတဂၤန့ၣ် တဲဝဲလၢ တၢ်ပာ်ထီၣ်ထီသး အပူၤလီၤ. အဃိ သုတဘၣ်ပျံၤအီၤဘၣ်.’
၁၉ “လၢခံ သုကစၢ် ယဟိဝၤယွၤ ကမၤဟးဂီၤကွံာ် ပှၤကလုာ်တဖၣ်လၢ အအိၣ်လၢ ကီၢ်လၢသုကစၢ် ယဟိဝၤယွၤ ကဟ့ၣ်လီၤသု ဒီးသုကမၤနၢၤကွံာ် အဝဲသ့ၣ် ဒီးသုကအိၣ်လၢ အဝဲသ့ၣ် အဝ့ၢ်တဖၣ် ဒီးအဝဲသ့ၣ် အဟံၣ်တဖၣ်အပူၤလီၤ.+ ၂ ဖဲန့ၣ်အခါ လၢကီၢ်လၢ သုကစၢ် ယဟိဝၤယွၤ ကဟ့ၣ်လီၤသု ဒ်တၢ်န့ၢ်သါအသိးအပူၤန့ၣ် သုကဘၣ် ပာ်လီၤဆီ ဝ့ၢ်သၢဖျၢၣ်လီၤ.+ ၃ ဒီးဟီၣ်ကဝီၤလၢ အအိၣ်လၢ ကီၢ်လၢ သုကစၢ် ယဟိဝၤယွၤ ကဟ့ၣ်လီၤသု အပူၤန့ၣ် သုကဘၣ်နီၤဖးအီၤ သၢက့ ဒီးသုဘၣ် ကတဲာ်ကတီၤထီၣ်ကျဲတဖၣ် ဒ်သိး ပှၤတဂၤဂ့ၤတဂၤဂ့ၤလၢ အမၤသံဘၣ် ပှၤတဂၤဂၤန့ၣ် လဲၤဃ့ၢ်ဝဲလၢ ဝ့ၢ်တဖၣ်အံၤအကျါ တဖျၢၣ်ဖျၢၣ် ကန့ၢ်အဂီၢ်လီၤ.
၄ “ဖဲပှၤတဂၤ မၤသံဘၣ် ပှၤတဂၤဂၤအခါ ဒ်သိး အသးသမူ ကပူၤဖျဲးအဂီၢ် အကဘၣ် မၤဝဲဒ်အံၤလီၤ. ပှၤတဂၤဂၤ မ့ၢ်မၤသံဘၣ် ပှၤအဂၤတဂၤလၢ တၢ်တပာ်သူၣ်ပာ်သး အပူၤ ဒီးလၢညါ အဝဲ မ့ၢ်တသးဟ့အီၤဘၣ်န့ၣ် အကဘၣ်လဲၤဃ့ၢ် လၢဝ့ၢ်တဖၣ်န့ၣ် အကျါ တဖျၢၣ်ဖျၢၣ်လီၤ.+ ၅ အဒိ ဖဲပှၤတဂၤ လဲၤကျီသ့ၣ်မုၣ်ဒီး အသကိးလၢ ပှၢ်လၢ်ကျါ ဒီးဖဲအဝဲ ယၤထီၣ်အကွါ လၢကကူာ်လီၤသ့ၣ်အခါ အကွါကနၣ် လီၤဖျုလၢ ကွါအတိၢ်လိၤ ဒီးဖျိးဘၣ် အသကိးလီၤ. ဒီးအသကိးတဂၤအံၤ မ့ၢ်သံန့ၣ် ပှၤလၢအမၤသံဘၣ်တၢ်တဂၤ ကဘၣ် လဲၤဃ့ၢ်လၢ ဝ့ၢ်တဖၣ်န့ၣ်အကျါ တဖျၢၣ်ဖျၢၣ်လီၤ.+ ၆ အဝဲ မ့ၢ်တမၤဒ်န့ၣ်ဘၣ်န့ၣ် ပှၤလၢ အမၤကၣ်က့ၤတၢ်တဂၤ*+ ကလူၤအီၤလၢ တၢ်သူၣ်ဒိၣ်သးဖျိးအပူၤ ဒီးမ့ၢ်လၢ တၢ်ဒ့ၣ်စၢၤ လၢအလဲၤလၢ ဝ့ၢ်တဖျၢၣ်န့ၣ်န့ၣ် ယံၤတလၢအဃိ အကချုးန့ၢ်အီၤ ဒီးကမၤသံအီၤလီၤ. ဘၣ်ဆၣ် မ့ၢ်လၢ ပှၤလၢအမၤသံဘၣ် တၢ်တဂၤန့ၣ် လၢညါ အဝဲတသးဟ့ အသကိးဘၣ်အဃိ အဝဲတကြၢးသံဘၣ်.+ ၇ လၢတၢ်န့ၣ်အဃိ ယမၤလိာ်သုလၢ ‘ပာ်လီၤဆီ ဝ့ၢ်သၢဖျၢၣ်တက့ၢ်.’
၈ “သုကစၢ် ယဟိဝၤယွၤ မ့ၢ်မၤလဲၢ်ထီၣ် သုဟီၣ်ကဝီၤ ဒ်အအၢၣ်လီၤပာ်စၢၤ သုမိၢ်ပၢ်ဖံဖု လၢပျၢၤတဖၣ်အသိး+ ဒီးအမ့ၢ် ဟ့ၣ်လီၤသု ကီၢ်ဒီတဘ့ၣ် ဒ်အအၢၣ်လီၤလၢ အကဟ့ၣ်လီၤ သုမိၢ်ပၢ်ဖံဖု လၢပျၢၤတဖၣ်အသိးန့ၣ်+ ၉ သုကဘၣ် ပာ်လီၤဆီအါထီၣ် ဝ့ၢ်အဂၤသၢဖျၢၣ် ဒ်သုပာ်လီၤဆီ ဝ့ၢ်သၢဖျၢၣ်အံၤလီၤ.+ ဘၣ်ဆၣ် ဒ်သိး တၢ်ကကဲထီၣ်အသး ဒ်အံၤအဂီၢ် သုကဘၣ် အဲၣ်သုကစၢ် ယဟိဝၤယွၤ ဒီးမၤအတၢ်ဘၣ်သး ထီဘိ+ ဒ်ယမၤလိာ်သု တနံၤညါအံၤ အသိးလီၤ. ၁၀ သုမ့ၢ်မၤဒ်န့ၣ်န့ၣ် ပှၤလၢ အတၢ်ကမၣ်တအိၣ်ဘၣ်တဖၣ်န့ၣ် တဘၣ်တၢ်မၤသံအီၤလၢ+ ကီၢ်လၢ သုကစၢ် ယဟိဝၤယွၤ ကဟ့ၣ်လီၤသု ဒ်တၢ်န့ၢ်သါအသိး အပူၤဘၣ်. ဒီးတၢ်သွံၣ်တလီၤတီလၢ သုခိၣ်လိၤဘၣ်.+
၁၁ “ဘၣ်ဆၣ် ဘၣ်သ့ၣ်သ့ၣ် ပှၤတဂၤ ကသးဟ့ အသကိး+ ဒီးကအိၣ်ခိးအခိၣ်ဒ်သိး ကမၤဒၢၣ်မၤဆါအီၤအဂီၢ် ဒီးကမၤဒၢၣ် အသကိး နးမး ဒီးအသကိးကသံလီၤ. အဝဲမ့ၢ်လဲၤဃ့ၢ်လၢ ဝ့ၢ်တဖၣ်န့ၣ်အကျါ တဖျၢၣ်ဖျၢၣ် သနာ်က့ ၁၂ ပှၤတဂၤအံၤ အဝ့ၢ် အပှၤသူၣ်က့သးပှၢ်တဖၣ် ကမၢ ပှၤလဲၤကိးန့ၢ်အီၤ ဒီးအဝဲသ့ၣ်ကဘၣ် ဟ့ၣ်လီၤအီၤလၢ ပှၤလၢ အမၤကၣ်က့ၤတၢ်တဂၤ အစုပူၤ ဒီးပှၤလၢ အမၤကၣ်က့ၤတၢ်တဂၤန့ၣ် ကမၤသံအီၤလီၤ.+ ၁၃ သုတဘၣ် သးကညီၤအီၤဘၣ်. လၢပှၤအံၣ်စရ့လးဖိအကျါန့ၣ် သုကဘၣ် မၤလီၤမၢ်ကွံာ် တၢ်ဒဲးဘး လၢဘၣ်ဃးဒီး ပှၤလူလီၤ ပှၤလၢအတၢ်ကမၣ် တအိၣ်ဘၣ် အသွံၣ်န့ၣ်လီၤ.+ သုမ့ၢ်မၤဒ်န့ၣ်န့ၣ် တၢ်ကလဲၤအသးဒီးသု ဂ့ၤဂ့ၤဘၣ်ဘၣ်လီၤ.
၁၄ “ဖဲသုဒိးန့ၢ်ဘၣ် သုတၢ်န့ၢ်သါလၢ ကီၢ်လၢ သုကစၢ် ယဟိဝၤယွၤ ကဟ့ၣ်လီၤသု အပူၤအခါ သုတဘၣ် သုးကွံာ် ပှၤလၢသုဃၢၤတဖၣ် အဟီၣ်ခိၣ်အဆၢ+ လၢမိၢ်ပၢ်ဖံဖုတဖၣ် ပာ်ပနီၣ်ဃာ်ဝဲန့ၣ်ဘၣ်.
၁၅ “ပှၤအုၣ်အသး မ့ၢ်အိၣ်ထဲတဂၤန့ၣ် ပှၤစံၣ်ညီၣ်လၢ ပှၤတဂၤ မၤတၢ်ကမၣ် မ့တမ့ၢ် မၤတၢ်ဒဲးဘး တသ့ဘၣ်.+ တၢ်ဂ့ၢ်တမံၤဂ့ၤတမံၤဂ့ၤန့ၣ် ကဘၣ် ပာ်ဂၢၢ်ပာ်ကျၢၤအီၤလၢ ပှၤအုၣ်အသး ခံဂၤသၢဂၤ အတၢ်ကတိၤ အဃိလီၤ.+ ၁၆ ပှၤအုၣ်အသးလၢ အတတီတလိၤတဂၤ မ့ၢ်အုၣ်အသး ဒီးပာ်ဒ့ၣ်ပာ်ကမၣ် ပှၤတဂၤ ဘၣ်ဃးဒီး တၢ်ဂ့ၢ်တမံၤမံၤန့ၣ်+ ၁၇ ပှၤခံဂၤအံၤ ကဘၣ်ဆၢထၢၣ်လၢ ယဟိဝၤယွၤ, ပှၤလုၢ်တၢ်ဒိၣ်တဖၣ် ဒီးစံၣ်ညီၣ်ကွီၢ်လၢ အကဲစံၣ်ညီၣ်ကွီၢ် လၢဆၢကတီၢ်ဖဲန့ၣ်တဖၣ် အမဲာ်ညါလီၤ.+ ၁၈ ဒီးစံၣ်ညီၣ်ကွီၢ်တဖၣ် ကဃုသ့ၣ်ညါ တၢ်ဂ့ၢ်အံၤ လီၤတံၢ်လီၤဆဲး+ ဒီးပှၤအုၣ်အသးတဂၤအံၤ မ့မ့ၢ်ပှၤလၢ အအုၣ်အသး ကဘျံးကဘျၣ် ဒီးပာ်ဒ့ၣ်ပာ်ကမၣ် အသကိး တတီတလိၤဘၣ်န့ၣ် ၁၉ သုကဘၣ် မၤအီၤဒ် အဝဲကူၣ်ထီၣ်ဖးလီၤဝဲလၢ အကမၤ အသကိး အသိးလီၤ.+ သုကဘၣ် ထုးထီၣ်ကွံာ် တၢ်လၢအအၢအသီ လၢသုကျါလီၤ.+ ၂၀ သုမ့ၢ်မၤဒ်န့ၣ်န့ၣ် ပှၤအဂၤတဖၣ် ကနၢ်ဟူဘၣ်ဝဲ ဒီးကပျံၤတၢ်လီၤ. ဒီးလၢခံ အဝဲသ့ၣ် တမၤတၢ်အၢတၢ်သီ ဒ်အံၤ လၢသုကျါ နီတဘျီလၢၤဘၣ်.+ ၂၁ သုတဘၣ် သးကညီၤအီၤဘၣ်.+ သုကဘၣ်ဟ့ၣ် သးသမူလၢ သးသမူအဂီၢ်, မဲာ်ချံလၢ မဲာ်ချံအဂီၢ်, မဲလၢ မဲအဂီၢ်, စုလၢစုအဂီၢ် ဒီးခီၣ်လၢ ခီၣ်အဂီၢ်လီၤ.+
၂၀ “ဖဲသုလဲၤဒုး သုဒုၣ်သုဒါတဖၣ်အခါ သုမ့ၢ်ထံၣ်ဘၣ်လၢ အဝဲသ့ၣ် အကသ့ၣ်တဖၣ် ဒီးအလ့ၣ်ကဟၣ်တဖၣ် ဒီးအသုးမုၢ်သံၣ်ဘိတဖၣ် အိၣ်အါန့ၢ်ဒံးသု သနာ်က့ သုတဘၣ်ပျံၤ အဝဲသ့ၣ်ဘၣ်. သုကစၢ် ယဟိဝၤယွၤ လၢအထုးထီၣ်ကွံာ်သု လၢကီၢ်အဲၤကူပတူးအပူၤန့ၣ် အိၣ်ဒီးသုလီၤ.+ ၂ ဖဲသုဘူးထီၣ် ကလဲၤဒုးတၢ်အခါ ပှၤလုၢ်တၢ်ဒိၣ် ကဘၣ်ဟဲတဲတၢ်ဒီး ပှၤသုးဖိတဖၣ်လီၤ.+ ၃ အဝဲကဘၣ်တဲ အဝဲသ့ၣ်လၢ ‘အံၣ်စရ့လးဧၢ, ကနၣ်လၢအံၤ. သုကဘၣ်လဲၤဒုး သုဒုၣ်သုဒါ ဘူးထီၣ်လံ. အဃိ တဘၣ် သးလီၤစၢ်တဂ့ၤ, တဘၣ်ပျံၤတၢ်ဖုးတၢ် ဒီးကနိးကစုာ် လၢအဝဲသ့ၣ်အဃိတဂ့ၤ. ၄ သုကစၢ် ယဟိဝၤယွၤ ကလဲၤတၢ်ဒီးသု ဒ်သိး ကဒုးသုဒုၣ်သုဒါ ဒီးမၤပူၤဖျဲးသုအဂီၢ်လီၤ.’+
၅ “အံၣ်စရ့လး အပဒိၣ်တဖၣ် ကဘၣ်တဲ သုးဖိတဖၣ်လၢ ‘ပှၤလၢအတ့ထီၣ် ဟံၣ်အသီတဖျၢၣ် ဒီးအမ့ၢ်တလဲၤအိၣ်ဝဲဖဲန့ၣ် ဒံးဘၣ်န့ၣ် မ်အက့ၤလၢ အဟံၣ်တက့ၢ်. မ့တမ့ၢ်ဘၣ်န့ၣ် ဘၣ်သ့ၣ်သ့ၣ် အကသံလၢ တၢ်ဒုးအပူၤ ဒီးပှၤအဂၤတဂၤ ကလဲၤအိၣ်လၢ အဟံၣ်လီၤ. ၆ ပှၤတဂၤ မ့ၢ်သူၣ်လီၤ စပံးတကျီး ဒီးမ့ၢ်တဒဲးဘၣ်ဝဲ အသၣ်ဒံးဘၣ်န့ၣ် မ်အက့ၤလၢ အဟံၣ်တက့ၢ်. မ့တမ့ၢ်ဘၣ်န့ၣ် ဘၣ်သ့ၣ်သ့ၣ် အကသံလၢ တၢ်ဒုးအပူၤ ဒီးပှၤအဂၤတဂၤ ကလဲၤဒဲး အစပံးသၣ်လီၤ. ၇ ပှၤတဂၤ မ့ၢ်ဘၣ်တၢ်အဲၣ်တီအီၤဒီး ပိာ်မုၣ်တဂၤ ဒီးအဝဲ မ့ၢ်တဖျီဘၣ်အသး ဒံးဘၣ်န့ၣ် မ်အက့ၤလၢ အဟံၣ်တက့ၢ်.+ မ့တမ့ၢ်ဘၣ်န့ၣ် ဘၣ်သ့ၣ်သ့ၣ် အကသံလၢ တၢ်ဒုးအပူၤ ဒီးပှၤအဂၤတဂၤ ကဖျီအသးဒီး ပိာ်မုၣ်တဂၤန့ၣ်လီၤ.’ ၈ ပဒိၣ်တဖၣ် ကဘၣ်တဲ ပှၤသုးဖိတဖၣ်လၢ ‘ပှၤလၢအပျံၤတၢ် ဒီးအသးလီၤစၢ်တဖၣ်န့ၣ်+ မ်အက့ၤလၢ အဟံၣ်တက့ၢ်. မ့တမ့ၢ်ဘၣ်န့ၣ် အသကိးတဖၣ် အသးကလီၤစၢ် လၢအဃိလီၤ.’+ ၉ ဖဲပဒိၣ်တဖၣ် တဲတၢ်ဒီး သုးဖိတဖၣ် ဝံၤအလီၢ်ခံ အဝဲသ့ၣ် ကဘၣ် ဃုထၢထီၣ် သုးခိၣ်တဖၣ် လၢကတီခိၣ်ရိၤမဲဝဲ သုးဖိတဖၣ်အဂီၢ်လီၤ.
၁၀ “သုမ့ၢ်လဲၤလၢ ဝ့ၢ်တဖျၢၣ် ဒ်သိး သုကဒုးတၢ် အဂီၢ်န့ၣ် သုကဘၣ် ဘိးဘၣ်သ့ၣ်ညါဆိ ပှၤဝ့ၢ်ဖိတဖၣ်လၢ တၢ်ဘျၢလၢ ဘၣ်ဃးဒီး ပှၤကမၤတၢ်ဃူတၢ်ဖိး အဂီၢ်လီၤ.+ ၁၁ အဝဲသ့ၣ် မ့ၢ်တူၢ်လိာ် တၢ်ဘျၢ ဒီးမ့ၢ်အိးထီၣ်န့ၢ်သု ဝ့ၢ်အတြဲၤတဖၣ်န့ၣ် ပှၤဝ့ၢ်ဖိလၢ အအိၣ်ဖဲန့ၣ်တဖၣ် ကိးဂၤဒဲး ကကဲထီၣ် ဒ်သုကုၢ်တဖၣ်အသိး ဒီးကမၤသုတၢ်လီၤ.+ ၁၂ ဘၣ်ဆၣ် အဝဲသ့ၣ် မ့ၢ်တအဲၣ်ဒိး မၤတၢ်ဃူတၢ်ဖိးဒီးသုဘၣ် ဒီးမ့ၢ်အဲၣ်ဒိး ဒုးသုန့ၣ် သုကဘၣ် ကဝီၤဃာ် ဝ့ၢ်တဖျၢၣ်န့ၣ်လီၤ. ၁၃ ဒီးသုကစၢ် ယဟိဝၤယွၤ ကဟ့ၣ်လီၤသု ဝ့ၢ်တဖျၢၣ်အံၤ လၢသုစုပူၤ ဒီးသုကဘၣ် ကျီသံကွံာ် ပှၤပိာ်ခွါ ကိးဂၤဒဲး လၢနးလီၤ. ၁၄ ဘၣ်ဆၣ် ပှၤပိာ်မုၣ်တဖၣ်, ဖိသၣ်တဖၣ်, ဆၣ်ဖိကီၢ်ဖိတဖၣ် ဒီးတၢ်လၢအအိၣ်လၢ ဝ့ၢ်ပူၤ ကိးမံၤဒဲး လၢအမ့ၢ် ဝ့ၢ်အတၢ်ဖိတၢ်လံၤခဲလၢာ်န့ၣ် သုဂုာ်န့ၢ်ဆူၣ်အီၤ သ့လီၤ.+ ဒီးသုကဟံးန့ၢ် သုဒုၣ်သုဒါ အတၢ်ဖိတၢ်လံၤတဖၣ် လၢသုကစၢ် ယဟိဝၤယွၤ ကဟ့ၣ်လီၤသုလီၤ.+
၁၅ “ဝ့ၢ်တဖၣ်လၢ အအိၣ်ဖးယံၤဒီးသု လၢအတမ့ၢ် ပှၤကလုာ်လၢ အအိၣ်ဘူးဒီးသုတဖၣ် အဝ့ၢ်ဘၣ်န့ၣ် သုကဘၣ်မၤအီၤ ဒ်န့ၣ်လီၤ. ၁၆ ဘၣ်ဆၣ် လၢပှၤလၢ အအိၣ်ဘူးဒီးသုတဖၣ် အဝ့ၢ်လၢ သုကစၢ် ယဟိဝၤယွၤ ကဟ့ၣ်လီၤသုဒ် တၢ်န့ၢ်သါအသိးအပူၤန့ၣ် သုတဘၣ်ပာ်မူ တၢ်လၢအကသါဝဲ နီတမံၤဘၣ်.+ ၁၇ လၢတၢ်န့ၣ်အလီၢ် သုကဘၣ် မၤဟးဂီၤကွံာ် ပှၤဃ့ၤသးဖိ, ပှၤအမိၢ်ဖိ, ပှၤကနၤဧၣ်ဖိ, ပှၤပရးစၤဖိ, ပှၤဃံၤဝံဖိ ဒီးပှၤယဘူၣ်ဖိတဖၣ်+ ခဲလၢာ်ခဲဆ့ ဒ်သုကစၢ် ယဟိဝၤယွၤ မၤလိာ်သုအသိးလီၤ. ၁၈ သုမ့ၢ်မၤဒ်န့ၣ်န့ၣ် အဝဲသ့ၣ်သိၣ်လိသု လုၢ်လၢ်လၢ အလီၤသးဘၣ်အၢတဖၣ် လၢအဝဲသ့ၣ် မၤဝဲဖဲ အဝဲသ့ၣ် ဘူၣ်ထီၣ်ဘါထီၣ် အယွၤတဖၣ်အခါ တသ့လၢၤဘၣ်. ဒီးအဝဲသ့ၣ် ဆီၣ်ထွဲသုလၢ သုကမၤကမၣ်ဘၣ် သုကစၢ် ယဟိဝၤယွၤ တသ့လၢၤဘၣ်.+
၁၉ “သုမ့ၢ်လဲၤကဝီၤဃာ် ဝ့ၢ်တဖျၢၣ်ဖျၢၣ် ဒီးဒုးအီၤအါနံၤအါသီ ဒီးမၤန့ၢ်အီၤန့ၣ် သုတဘၣ်ကူာ်လီၤ ဝ့ၢ်အသ့ၣ်ထူၣ်တဖၣ်လၢ ကွါဘၣ်. သုအီၣ် သ့ၣ်တဖၣ်န့ၣ်အသၣ် သ့ဝဲ ဘၣ်ဆၣ် သုတဘၣ် ကူာ်လီၤ သ့ၣ်ထူၣ်တဖၣ်န့ၣ်ဘၣ်.+ သုတကြၢး မၤဟးဂီၤ သ့ၣ်ထူၣ်တဖၣ် ဒ်သုမၤဟးဂီၤ ပှၤကညီအသိးဘၣ်. ၂၀ ဘၣ်ဆၣ် သ့ၣ်လၢ အတသၣ်ထီၣ်ဘၣ် တကလုာ်ဂ့ၤ တကလုာ်ဂ့ၤန့ၣ် သုမၤဟးဂီၤကွံာ်အီၤ သ့လီၤ. သ့ၣ်တဖၣ်အံၤန့ၣ် သုကူာ်လီၤအီၤသ့ ဒီးသုဆီလီၤအီၤ ဒ်သိး သုကကဝီၤဃာ် ဝ့ၢ်လၢ သုဒုးအီၤတဖျၢၣ် တုၤလၢ သုမၤန့ၢ်ဝ့ၢ်တစု သ့ဝဲလီၤ.
၂၁ “လၢကီၢ်လၢ သုကစၢ် ယဟိဝၤယွၤ ကဟ့ၣ်လီၤသု ဒ်သုတၢ်န့ၢ်သါ အသိးန့ၣ် ပှၤမ့ၢ်ထံၣ်န့ၢ် ပှၤအစိၣ်လၢ ပျီပူၤ ဒီးပှၤမ့ၢ်တသ့ၣ်ညါလၢ မတဂၤ မၤသံအီၤလဲၣ်န့ၣ် ၂ သုပှၤသူၣ်က့သးပှၢ်တဖၣ် ဒီးစံၣ်ညီၣ်ကွီၢ်တဖၣ်+ ကဘၣ်လဲၤထိၣ်ဝဲ တၢ်ဒ့ၣ်စၢၤ လၢအအိၣ်လၢ ပှၤသံအစိၣ် ဒီးဝ့ၢ်တဖၣ်လၢ အအိၣ်ဝးတရံး ပှၤသံအစိၣ် အဘၢၣ်စၢၤလီၤ. ၃ ပှၤသူၣ်က့သးပှၢ်တဖၣ်လၢ အအိၣ်လၢ ဝ့ၢ်လၢ အအိၣ်ဘူးကတၢၢ်ဒီး ပှၤသံအစိၣ်န့ၣ် ကဘၣ်ဃုထၢထီၣ် ကျီၢ်မိၢ်ဖိတဒုလၢ အတမၤဘၣ်တၢ် နီတဘျီဒံးဘၣ် ဒီးတယိးဘၣ် နီၣ်ယိးဘိ နီတဘျီဒံးဘၣ်န့ၣ်လီၤ. ၄ ဒီးအဝဲသ့ၣ် ကဘၣ်လဲၤမူၤ ကျီၢ်မိၢ်ဖိ တဒုအံၤဆူ ထံယွၤလီၤ အလီၢ် ဖဲတၢ်တြီၤပူၤလၢ ပှၤတသူၣ်တၢ်ဖျးတၢ် လၢအပူၤနီတဘျီ ဒံးဘၣ် အလီၢ်န့ၣ်လီၤ. ဒီးအဝဲသ့ၣ် ကဘၣ်မၤကၢ် ကျီၢ်ဖိတဒုအံၤ အကိာ်ဘိဖဲန့ၣ်လီၤ.+
၅ “မ့ၢ်လၢယဟိဝၤယွၤ ဃုထၢထီၣ် ပှၤလုၢ်တၢ်ဒိၣ်တဖၣ်* လၢကမၤအတၢ်+ ဒီးကဆိၣ်ဂ့ၤတၢ်လၢ ယဟိဝၤယွၤ အမံၤပူၤ အဃိ+ အဝဲသ့ၣ်ကဘၣ် ဟဲစ့ၢ်ကီးလီၤ. အဝဲသ့ၣ် ကတဲဖျါထီၣ်ဝဲလၢ တၢ်ဂ့ၢ်လိာ်ဘှီလိာ်လၢ အပၣ်ဃုာ်ဒီး တၢ်မၤဆူၣ်မၤစိးန့ၣ် ပှၤကဘၣ်မၤဘၣ်ဂီၢ်အီၤ ဒ်လဲၣ်န့ၣ်လီၤ.+ ၆ ပှၤသူၣ်က့သးပှၢ်တဖၣ်လၢ အအိၣ်လၢ ဝ့ၢ်လၢ အအိၣ်ဘူးကတၢၢ်ဒီး ပှၤသံအစိၣ်န့ၣ် ကဘၣ်သ့လီၤအစုလၢ+ ကျီၢ်မိၢ်ဖိလၢ ပှၤမၤကၢ်အကိာ်တဒု အလိၤ ဖဲတၢ်တြီၤပူၤလီၤ. ၇ ဒီးအဝဲသ့ၣ် ကဘၣ်တဲဝဲလၢ ‘ပတမၤသံ ပှၤတဂၤအံၤဘၣ်* ဒီးဖဲပှၤမၤသံအီၤ အခါစ့ၢ်ကီး ပတထံၣ်ဘၣ်. ၈ ယဟိဝၤယွၤဧၢ, တဘၣ် ဟံးန့ၢ်အရ့လၢနပှၤဂီၢ်မုၢ် အံၣ်စရ့လး လၢနပှ့ၤက့ၤအီၤတဖၣ်အအိၣ်တဂ့ၤ.+ တဘၣ်ပာ်ဒ့ၣ်ပာ်ကမၣ် နပှၤဂီၢ်မုၢ် အံၣ်စရ့လး ခီဖျိ တၢ်လူလီၤဘၣ် ပှၤလၢအတၢ်ကမၣ် တအိၣ်ဘၣ်တဂၤ အသွံၣ်န့ၣ်တဂ့ၤ.’+ ဒီးတၢ်သွံၣ်တလီၤတီလၢ အဝဲသ့ၣ် အခိၣ်လိၤလၢၤဘၣ်. ၉ သုမ့ၢ်မၤဒ်န့ၣ်န့ၣ် မ့ၢ်ဝဲသုမၤ တၢ်အဘၣ်လၢ ယဟိဝၤယွၤ အမဲာ်ညါအဃိ တၢ်ဒဲးဘး လၢဘၣ်ဃးဒီး ပှၤလူလီၤ ပှၤလၢအတၢ်ကမၣ် တအိၣ်ဘၣ် အသွံၣ်န့ၣ် ကလီၤမၢ်ကွံာ်လၢ သုကျါလီၤ.
၁၀ “နမ့ၢ်လဲၤဒုး နဒုၣ်နဒါတဖၣ် ဒီးနကစၢ် ယဟိဝၤယွၤ မ့ၢ်မၤနၢၤကွံာ် အဝဲသ့ၣ် လၢနဂီၢ်န့ၣ် ဖဲနက့ၤဖီၣ် အဝဲသ့ၣ်အခါ+ ၁၁ နမ့ၢ်ထံၣ်ဘၣ် ပိာ်မုၣ်လၢ အဒိၣ်တၢ်ဂ့ၤတဂၤလၢ ပှၤလၢနက့ၤဖီၣ်အီၤတဖၣ် အကျါ ဒီးနကွၢ်အီၤမ့ၢ်ဂ့ၤ ဒီးနမ့ၢ်အဲၣ်ဒိး ဟံးန့ၢ်အီၤ လၢနမါန့ၣ် ၁၂ နဟဲက့ၤကိးအီၤ လၢနဟံၣ်သ့လီၤ. ဒီးပိာ်မုၣ်တဂၤန့ၣ် ကဘၣ်လူၤအခိၣ်ဆူၣ် ဒီးကဘၣ်တံာ်ကွံာ် အစုမ့ၣ် ၁၃ ဒီးကဘၣ် ဘ့ၣ်လီၤကွံာ် အတၢ်ကူတၢ်ကၤလၢ အသိးဝဲဖဲ ပှၤဟဲက့ၤဖီၣ်အီၤ အခါန့ၣ်လီၤ. ဝံၤဒီး အကအိၣ်ဝဲလၢ နဟံၣ်ပူၤလီၤ. ဒီးအဟီၣ်ဝဲလၢ အမိၢ်အပၢ်အဃိ ဒီတလါညါ+ မ့ၢ်ဝံၤမး နမံဃုာ်ဒီးအီၤသ့လီၤ. နကဲအဝၤ ဒီးအဝဲကဲ နမါလီၤ. ၁၄ ဘၣ်ဆၣ် နမ့ၢ် တဘၣ်သူၣ်ဘၣ်သးအီၤလၢၤဘၣ်န့ၣ် နကဘၣ် ပျၢ်ကွံာ်အီၤ+ ဒီးအကလဲၤတၢ်လီၢ် ဖဲအအဲၣ်ဒိး လဲၤဝဲလီၤ. မ့ၢ်လၢ နမၢဆူၣ်အီၤလၢ အကကဲနမါအဃိ နတဘၣ် ဆါကွံာ်အီၤလၢစ့ဘၣ် ဒီးနတဘၣ်ရ့အီၤ ဆူၣ်ဆူၣ်ကိၤကိၤ စ့ၢ်ကီးဘၣ်.
၁၅ “ဘၣ်သ့ၣ်သ့ၣ် ပှၤတဂၤ အမါကအိၣ်ခံဂၤ ဘၣ်ဆၣ် အအဲၣ်ဝဲဒိၣ်တဂၤ ဒီးအဲၣ်ဝဲ ဆံးတဂၤလီၤ. ဒီးဘၣ်သ့ၣ်သ့ၣ် အဝဲသ့ၣ် ခံဂၤလၢာ် ကအိၣ်ဖျဲၣ်ထီၣ်န့ၢ် အဖိခွါ ဘၣ်ဆၣ် ပိာ်မုၣ်လၢ အအဲၣ်ဝဲဆံးတဂၤ အဖိခွါန့ၣ် မ့ၢ်ဝဲ အဖိဝဲၢ်ကိလီၤ.+ ၁၆ ဖဲအဝဲ ကဘၣ်ဟ့ၣ်လီၤ တၢ်န့ၢ်သါလၢ အဖိခွါတဖၣ် အအိၣ်အခါန့ၣ် အဝဲ တဘၣ် ကွၢ်ကပာ်ကွံာ် အမါလၢ အအဲၣ်ဝဲဆံးတဂၤ အဖိခွါ လၢအမ့ၢ် ဖိဝဲၢ်ကိ ဒီးဟ့ၣ်လီၤ အမါလၢ အအဲၣ်ဝဲဒိၣ်တဂၤ အဖိခွါ လၢဖိဝဲၢ်ကိ အတၢ်ခွဲးတၢ်ယာ်ဘၣ်. ၁၇ အမါလၢ အအဲၣ်ဝဲ ဆံးတဂၤအံၤ အဖိခွါန့ၣ် မ့ၢ်ဝဲ အတၤသၣ်ဆိ ဘၣ်ဃးဒီး အတၢ်စိတၢ်ကမီၤလီၤ. အဃိ အဝဲ ကဘၣ်ပာ်ပနီၣ်အီၤဒ် အဖိဝဲၢ်ကိ ခီဖျိလၢ အဟ့ၣ်လီၤအီၤတၢ် အါန့ၢ်ဒံး အဖိအဂၤတဖၣ် ခံစး လၢတၢ်လၢအအိၣ်ဒီးအီၤ ခဲလၢာ် အကျါလီၤ. ဖိဝဲၢ်ကိ အတၢ်ခွဲးတၢ်ယာ်န့ၣ် မ့ၢ်ဝဲ ဖိခွါတဂၤအံၤ အတၢ်လီၤ.+
၁၈ “ပှၤတဂၤ မ့ၢ်အိၣ်ဒီး အဖိခွါလၢအခိၣ်ကိၤ ဒီးအနၢ်က့ၣ် ဒီးတဒိကနၣ် အမိၢ်ပၢ် အကလုၢ်ဘၣ် ဒီးအမိၢ်ပၢ်+ ဂုာ်ကျဲးစၢး ဘှီဘၣ်ထီၣ်က့ၤအီၤ ဘၣ်ဆၣ် အဝဲ မ့ၢ်တဒိကနၣ်ဝဲဘၣ်န့ၣ်+ ၁၉ အမိၢ်အပၢ် ကဘၣ်ဖီၣ်န့ၢ်အီၤ ဒီးလဲၤကိးအီၤလၢ ပှၤသူၣ်က့သးပှၢ်အအိၣ် ဖဲအဝ့ၢ်အတြဲၤလီၤ. ၂၀ ဒီးကဘၣ်တဲဘၣ် ဝ့ၢ်အပှၤသူၣ်က့သးပှၢ်တဖၣ်လၢ ‘ပဖိခွါတဂၤအံၤန့ၣ် အခိၣ်ကိၤ ဒီးအနၢ်က့ၣ် ဒီးတဒိကနၣ် ပကလုၢ်ဘၣ်. ဒီးအမ့ၢ်ပှၤလၢ အအီၣ်တၢ်အါတလၢ+ ဒီးအအီမူၤသံးလီၤ.’+ ၂၁ ဒီးပှၤပိာ်ခွါလၢ အဝ့ၢ်ပူၤ ကိးဂၤဒဲးန့ၣ် ကဘၣ်ကွံာ်သံအီၤလၢ လၢၢ်လီၤ. သုကဘၣ် ထုးထီၣ်ကွံာ် တၢ်လၢအအၢအသီလၢ သုကျါ ဒီးပှၤအံၣ်စရ့လးဖိခဲလၢာ် ကနၢ်ဟူဘၣ်ဝဲ ဒီးကပျံၤတၢ်လီၤ.+
၂၂ “ပှၤပိာ်ခွါတဂၤ မ့ၢ်မၤဘၣ် တၢ်ဒဲးဘး လၢအကြၢးဘၣ်တၢ်စံၣ်ညီၣ်သံအီၤ ဒီးပှၤမ့ၢ်မၤသံအီၤ+ ဒီးဘျးထီၣ်အီၤလၢ သ့ၣ်တၢၣ်အလိၤန့ၣ်+ ၂၃ အစိၣ်တဘၣ်အိၣ်လၢ သ့ၣ်တၢၣ်အလိၤ ဒီတနၤကျၢၤဘၣ်.+ ပှၤလၢ အဘၣ်တၢ်ဘျးထီၣ်အီၤလၢ သ့ၣ်တၢၣ်လိၤန့ၣ် မ့ၢ်ဝဲ တၢ်လၢ အဘၣ်ဆိၣ်အၢလၢ ကစၢ်ယွၤအဃိ သုကဘၣ် ခူၣ်လီၤအီၤ ဖဲတၢ်တနံၤန့ၣ် သပှၢ်ကတၢၢ်လီၤ.+ သုတဘၣ်မၤဘၣ်အၢ ကီၢ်လၢသုကစၢ် ယဟိဝၤယွၤ ကဟ့ၣ်လီၤသု ဒ်တၢ်န့ၢ်သါအသိးဘၣ်.+
၂၂ “သုမ့ၢ်ထံၣ် သုဒီပုၢ်ဝဲၢ်ခွါ* အကျီၢ် မ့တမ့ၢ် အသိ ဟးဖျိးကျဲန့ၣ် သုတဘၣ် ကွၢ်ကပာ်ကွံာ်အီၤဘၣ်.+ သုကဘၣ် လဲၤဆှၢအီၤလၢ သုဒီပုၢ်ဝဲၢ်အအိၣ် သပှၢ်ကတၢၢ်လီၤ. ၂ ဘၣ်ဆၣ် သုဒီပုၢ်ဝဲၢ် မ့ၢ်တအိၣ်ဘူးဒီးသုဘၣ် ဒီးသုမ့ၢ်တသ့ၣ်ညါအီၤဘၣ်န့ၣ် သုကဘၣ် ဟဲက့ၤမူၤ ဆၣ်ဖိကီၢ်ဖိအံၤလၢ သုဟံၣ် ဒီးသုကဘၣ် ပာ်ဃာ်အီၤ တုၤလၢ သုဒီပုၢ်ဝဲၢ် ဟဲဃုအီၤလီၤ. ဖဲန့ၣ်အခါသုကဘၣ် ဟ့ၣ်လီၤက့ၤ သုဒီပုၢ်ဝဲၢ် အဆၣ်ဖိကီၢ်ဖိလီၤ.+ ၃ သုဒီပုၢ်ဝဲၢ် အကသ့ၣ်ယီၤမ့ၢ်ဂ့ၤ, အတၢ်ကူတၢ်ကၤမ့ၢ်ဂ့ၤ, တၢ်အဂၤ တမံၤဂ့ၤတမံၤဂ့ၤ မ့ၢ်ဂ့ၤ မ့ၢ်လီၤမၢ် ဒီးသုမ့ၢ်ထံၣ်န့ၢ်အီၤန့ၣ် သုကဘၣ်မၤ ဒ်န့ၣ် ဒီးသုတဘၣ် ကွၢ်ကပာ်ကွံာ်အီၤဘၣ်.
၄ “သုမ့ၢ်ထံၣ်ဘၣ် သုဒီပုၢ်ဝဲၢ် အကသ့ၣ်ယီၤတဒု မ့တမ့ၢ် အကျီၢ်ဖါတဒု လီၤဃံၢ်လၢကျဲပူၤန့ၣ် သုတဘၣ် ကွၢ်ကပာ်ကွံာ်အီၤဘၣ်. သုကဘၣ် မၤစၢၤအီၤ ဒ်သိး အကဝံၢ်ဆၢထၢၣ်က့ၤ ဆၣ်ဖိကီၢ်ဖိ အဂီၢ်လီၤ.+
၅ “ပှၤပိာ်မုၣ်န့ၣ် တဘၣ်ကူကၤဝဲ ပှၤပိာ်ခွါ အကူအကၤဘၣ် ဒီးပှၤပိာ်ခွါစ့ၢ်ကီး တဘၣ်ကူကၤ ပိာ်မုၣ် အကူအကၤဘၣ်. ပှၤမ့ၢ်မၤ ဒ်န့ၣ်န့ၣ် မ့ၢ်တၢ်လၢ အလီၤသးဘၣ်အၢ လၢသုကစၢ် ယဟိဝၤယွၤ အဂီၢ်လီၤ.
၆ “ဖဲသုဟးလၢကျဲအခါ သုမ့ၢ်ထံၣ်န့ၢ် ထိၣ်အသွံလၢ သ့ၣ်ခံမ့ၢ်ဂ့ၤ လၢဟီၣ်ခိၣ်လိၤမ့ၢ်ဂ့ၤ ဒီးထိၣ်မိၢ်မ့ၢ်ဟုဃာ်အဖိ မ့တမ့ၢ် အဒံၣ်န့ၣ် သုတဘၣ် က့ၤစိာ် ထိၣ်မိၢ်ဃုာ်ဒီး အဖိဘၣ်.+ ၇ သုကဘၣ် ပျၢ်လီၤကွံာ် အမိၢ် ဒီးမ့မ့ၢ် အဖိတဖၣ်န့ၣ် သုက့ၤစိာ်အီၤသ့လီၤ. သုမ့ၢ်မၤဒ်န့ၣ်န့ၣ် တၢ်ကလဲၤအသးဒီးသု ဂ့ၤဂ့ၤဘၣ်ဘၣ် ဒီးသုကအိၣ်မူဘၣ် ဖးယံာ်လီၤ.
၈ “ဒ်သိး ပှၤသုတလီၤတဲာ်လၢ သုဟံၣ်ခိၣ် ဒီးတၢ်သွံၣ် သုတလီၤတီလၢ သုဟံၣ်ဖိဃီဖိ အခိၣ်လိၤ တဂ့ၤအဂီၢ် ဖဲသုတ့ထီၣ် ဟံၣ်သီသီအခါ သုကဘၣ်တ့ထီၣ် တၢ်အဒူၣ်ဝးတရံး သုဟံၣ်ခိၣ်ဒုးလီၤ.+
၉ “သုတဘၣ်ဖှံလီၤ တၢ်ချံခံခါလၢ အလီၤဆီလိာ်သးလၢ သုစပံးကျီး အပူၤဘၣ်.+ သုမ့ၢ်မၤ ဒ်န့ၣ်န့ၣ် တၢ်ချံလၢ အမဲထီၣ်သၣ်ထီၣ်တဖၣ် ဒီးသုစပံးသၣ်လၢ သုစပံးကျီးအပူၤခဲလၢာ်န့ၣ် တၢ်ကဟံးန့ၢ်ကွံာ်အီၤလၢ တၢ်စီဆှံအလီၢ်အဂီၢ်လီၤ.
၁၀ “ကျီၢ်ဖါ ဒီးကသ့ၣ်ယီၤန့ၣ် သုတဘၣ် ဒုးယိးအီၤ နီၣ်ယိးဘိ တပူၤဃီ ဒ်သိး သုကထဲၣ်တၢ် အဂီၢ်ဘၣ်.+
၁၁ “သုတဘၣ်ကူကၤ တၢ်ကူတၢ်ကၤလၢ ပှၤမၤအီၤလၢ သိဆူၣ်အလုၣ် ဒီးဖှီဝါကဆှၣ်အလုၣ် တပူၤဃီန့ၣ်ဘၣ်.+
၁၂ “သုကဘၣ်ထီထီၣ် တၢ်အနွံလၢ သုတၢ်ကူတၢ်သိး အနၢၣ်လွံၢ်နၢၣ် အလိၤလီၤ.+
၁၃ “ပှၤပိာ်ခွါတဂၤ မ့ၢ်ဟံးအမါ ဒီးမံဃုာ်ဒီးအီၤ ဒီးလၢခံ အမ့ၢ်သးဟ့* အမါ ၁၄ ဒီးအဝဲ မ့ၢ်ပာ်ဒ့ၣ်ပာ်ကမၣ်အီၤလၢ အတၢ်သကဲာ်ပဝး တဂ့ၤဘၣ် ဒီးမ့ၢ်မၤဟးဂီၤ အမံၤ ခီဖျိတဲဝဲလၢ ‘ယဟံးန့ၢ် ပိာ်မုၣ်တဂၤအံၤ ဘၣ်ဆၣ် ဖဲယမံဃုာ်ဒီးအီၤအခါ ယတထံၣ်န့ၢ် တၢ်အုၣ်အသးလၢ အဝဲမ့ၢ် မုၣ်ကနီၤဘၣ်’ န့ၣ် ၁၅ ပိာ်မုၣ်တဂၤအံၤ အမိၢ်အပၢ် ကဘၣ်လဲၤလၢ ဝ့ၢ်အတြဲၤလီၤ. ဒီးလၢဝ့ၢ်အပှၤသူၣ်က့သးပှၢ်တဖၣ် အမဲာ်ညါန့ၣ် အဝဲသ့ၣ် ကဘၣ်ပာ်ဖျါထီၣ်ဝဲ တၢ်အုၣ်အသးလၢ ပိာ်မုၣ်တဂၤအံၤ မ့ၢ်ဝဲ မုၣ်ကနီၤလီၤ. ၁၆ ပိာ်မုၣ်တဂၤအံၤအပၢ် ကဘၣ်တဲ ပှၤသူၣ်က့သးပှၢ်တဖၣ်လၢ ‘ယဟ့ၣ်ဒုးဖျီပှၤတဂၤအံၤ လၢယဖိမုၣ် ဘၣ်ဆၣ် အဝဲ သးဟ့* ယဖိမုၣ်လီၤ. ၁၇ ဒီးအဝဲ ပာ်ဒ့ၣ်ပာ်ကမၣ် ယဖိမုၣ်လၢ အတၢ်သကဲာ်ပဝး တဂ့ၤဘၣ် ဒီးတဲဝဲလၢ အတထံၣ်န့ၢ် တၢ်အုၣ်အသးလၢ ယဖိမုၣ်တဂၤအံၤ ကဲမုၣ်ကနီၤဘၣ်. အဝဲအံၤ မ့ၢ်ဝဲ တၢ်အုၣ်အသးလၢ ယဖိမုၣ်တဂၤအံၤ ကဲမုၣ်ကနီၤလီၤ.’ ဒီးတၢ်ကူတၢ်ကၤ လၢအမ့ၢ် တၢ်အုၣ်အသးန့ၣ် အဝဲသ့ၣ် ကသလၣ်ထီၣ် ဝဲလၢဝ့ၢ်အပှၤသူၣ်က့သးပှၢ်တဖၣ် အမဲာ်ညါလီၤ. ၁၈ ဒီးဝ့ၢ်အပှၤသူၣ်က့သးပှၢ်တဖၣ်+ ကကိးန့ၢ် ပိာ်ခွါတဂၤန့ၣ် ဒီးကသိၣ်က့ၤသီက့ၤအီၤလီၤ.+ ၁၉ မ့ၢ်လၢ အဝဲမၤဟးဂီၤ မုၣ်ကနီၤလၢ ပှၤအံၣ်စရ့လးဖိအကျါတဂၤ အမံၤအဃိ အဝဲသ့ၣ် ကအီၣ်လိးအီၤလၢ စ့ၡက့လး* ၁၀၀ ဒီးကဟ့ၣ်ဝဲ ပိာ်မုၣ်တဂၤန့ၣ် အပၢ်လီၤ.+ ဒီးပိာ်မုၣ်တဂၤအံၤ ကဘၣ်ဆဲးကဲ အမါလီၤ. ဒီးဖဲပိာ်ခွါတဂၤန့ၣ် အိၣ်မူဝဲ အဆၢကတီၢ် အဝဲတအိၣ်ဒီး တၢ်ခွဲးတၢ်ယာ်လၢ ကမၤကတၢၢ်ကွံာ် အတၢ်ဆီဟံၣ်ဆီဃီဒီးအီၤဘၣ်.
၂၀ “ဘၣ်ဆၣ် တၢ်ပာ်ဒ့ၣ်ပာ်ကမၣ် တခါအံၤ မ့မ့ၢ်တၢ်မ့ၢ်တၢ်တီ ဒီးတၢ်အုၣ်အသး မ့ၢ်တအိၣ်လၢ ပိာ်မုၣ်တဂၤအံၤ မ့ၢ်ဝဲ မုၣ်ကနီၤဘၣ်န့ၣ် ၂၁ အဝဲသ့ၣ် ကဘၣ်ဟဲကိးထီၣ် ပိာ်မုၣ်တဂၤအံၤလၢ အပၢ်အဟံၣ်မဲာ်ညါ ဒီးပှၤပိာ်ခွါလၢ အဝ့ၢ်ပူၤတဖၣ် ကဘၣ်ကွံာ်သံအီၤလၢလၢၢ် မ့ၢ်လၢ ပိာ်မုၣ်တဂၤအံၤ မၤကမၣ်မုၣ်ကမၣ်ခွါ ဖဲအအိၣ်ဒံးလၢ အပၢ်အဟံၣ်ပူၤ အခါအဃိလီၤ.+ အဝဲမၤတ့ၢ်တၢ်လၢ အလီၤမဲာ်ဆှး+ လၢပှၤအံၣ်စရ့လးဖိ အကျါ ဒီးသုကဘၣ် ထုးထီၣ်ကွံာ် တၢ်လၢအအၢအသီလၢ သုကျါလီၤ.+
၂၂ “ပိာ်ခွါတဂၤ မ့ၢ်မံဃုာ်ဒီး ပိာ်မုၣ်လၢ အဝၤအိၣ်လံန့ၣ် ပှၤပိာ်ခွါလၢ အမံဃုာ်ဒီး ပိာ်မုၣ်မ့ၢ်ဂ့ၤ ပှၤပိာ်မုၣ်တဂၤန့ၣ်မ့ၢ်ဂ့ၤ အဝဲသ့ၣ် ကဘၣ်သံခံဂၤလၢာ်လီၤ.+ သုကဘၣ် ထုးထီၣ်ကွံာ် တၢ်လၢအအၢအသီ လၢပှၤအံၣ်စရ့လးဖိ အကျါလီၤ.
၂၃ “မုၣ်ကနီၤတဂၤ မ့ၢ်ဘၣ်တၢ်အဲၣ်တီအီၤဒီး ပှၤပိာ်ခွါတဂၤ ဒီးပှၤပိာ်ခွါအဂၤတဂၤ မ့ၢ်ထံၣ်အီၤလၢဝ့ၢ်ပူၤ ဒီးမံဃုာ်ဒီးအီၤန့ၣ် ၂၄ သုကဘၣ်ဟဲကိး အဝဲသ့ၣ် ခံဂၤလၢာ် လၢဝ့ၢ်တဖျၢၣ်န့ၣ်အတြဲၤလီၤ. ဒီးသုကဘၣ် ကွံာ်သံအဝဲသ့ၣ် လၢလၢၢ် မ့ၢ်လၢ ပိာ်မုၣ်တဂၤန့ၣ် အိၣ်လၢဝ့ၢ်ပူၤဘၣ်ဆၣ် တကိးပသူဘၣ် ဒီးမ့ၢ်လၢ ပှၤပိာ်ခွါ တဂၤအံၤန့ၣ် မၤမဲာ်ဆှး အသကိး အမါအဃိလီၤ.+ သုကဘၣ် ထုးထီၣ်ကွံာ် တၢ်လၢအအၢအသီလၢ သုကျါလီၤ.
၂၅ “ပိာ်ခွါတဂၤ မ့ၢ်ထံၣ်ဘၣ် ပိာ်မုၣ်လၢ အဘၣ် တၢ်အဲၣ်တီအီၤ ဝံၤတဂၤ လၢဝ့ၢ်ချၢ ဒီးပိာ်ခွါ တဂၤအံၤ မ့ၢ်ဖီၣ်ဆူၣ်မံဃုာ်အီၤန့ၣ် ထဲပိာ်ခွါတဂၤန့ၣ် ကဘၣ်တၢ်မၤသံအီၤလီၤ. ၂၆ ဘၣ်ဆၣ် သုတဘၣ် မၤပှၤပိာ်မုၣ် တဂၤအံၤ နီတမံၤဘၣ်. ပိာ်မုၣ်တဂၤအံၤ တမၤဘၣ် တၢ်ဒဲးဘးဘၣ် အဃိ အတကြၢးသံဘၣ်. တၢ်ဂ့ၢ်ကီ ဒ်အံၤန့ၣ် လီၤဂာ်ဒ်သိးဒီး ဖဲပှၤပိာ်ခွါတဂၤ မၤသံ ပှၤတဂၤဂၤ အခါန့ၣ်လီၤ.+ ၂၇ ပိာ်မုၣ်လၢ အဘၣ်တၢ်အဲၣ်တီအီၤ ဝံၤတဂၤအံၤ တကြၢးသံဘၣ် မ့ၢ်လၢ ပှၤပိာ်ခွါတဂၤန့ၣ် ထံၣ်ဘၣ်အီၤလၢ ဝ့ၢ်ချၢ ဒီးပိာ်မုၣ်အံၤ ကိးပသူထီၣ် သနာ်က့ ပှၤလၢ အကဟဲမၤပူၤဖျဲးအီၤ တအိၣ်နီတဂၤဘၣ်အဃိလီၤ.
၂၈ “ပှၤပိာ်ခွါတဂၤ မ့ၢ်ထံၣ်ဘၣ် ပိာ်မုၣ်လၢ အတဘၣ် တၢ်အဲၣ်တီအီၤဒံးဘၣ်တဂၤ ဒီးမ့ၢ်ဖီၣ်ဆူၣ်မံဃုာ်ဒီးအီၤ ဒီးပှၤမ့ၢ် သ့ၣ်ညါထွဲန့ၣ်+ ၂၉ ပှၤပိာ်ခွါ လၢအမံဃုာ်ဒီး ပိာ်မုၣ်န့ၣ် ကဘၣ်ဟ့ၣ်ဝဲ ပိာ်မုၣ်တဂၤန့ၣ် အပၢ်လၢ စ့ၡက့လး ၅၀ ဒီးပိာ်မုၣ်တဂၤန့ၣ် ကကဲထီၣ် အမါလီၤ.+ မ့ၢ်လၢ အဝဲမၤမဲာ်ဆှး ပိာ်မုၣ်တဂၤန့ၣ်အဃိ ဖဲအအိၣ်မူဒံး အဆၢကတီၢ် အဝဲတအိၣ်ဒီး တၢ်ခွဲးတၢ်ယာ်လၢ ကမၤကတၢၢ်ကွံာ် အတၢ်ဆီဟံၣ်ဆီဃီဒီးအီၤဘၣ်.
၃၀ “ပှၤတဂၤဂ့ၤ တဂၤဂ့ၤန့ၣ် တဘၣ်ဟံးန့ၢ် အပၢ်အမါဘၣ်. အမ့ၢ်မၤဝဲဒ်န့ၣ်န့ၣ် မ့ၢ်အမၤဟးဂီၤ အပၢ်အလၤကပီၤလီၤ.+
၂၃ “ပိာ်ခွါလၢ အဒံၣ်ချံ ဘၣ်တၢ်မၤသဘှံးအီၤမ့ၢ်ဂ့ၤ ပိာ်ခွါလၢ အက့ၢ်အဂီၤ ဘၣ်တၢ်ဒီၣ်တဲာ်ကွံာ်အီၤမ့ၢ်ဂ့ၤ နုာ်လီၤလၢ ယဟိဝၤယွၤ အတၢ်အိၣ်ဖှိၣ်အပူၤ တန့ၢ်နီတဂၤဘၣ်.+
၂ “ဖိခွါလၢ ပှၤဒၢဘၢထီၣ်အီၤန့ၣ် နုာ်လီၤလၢ ယဟိဝၤယွၤ အတၢ်အိၣ်ဖှိၣ်အပူၤ တန့ၢ်နီတဂၤဘၣ်.+ ပှၤဒ်န့ၣ်တဂၤ အစၢၤအသွဲၣ် တုၤလီၤလၢ အစိၤတဆံဒၣ်လဲာ် နုာ်လီၤလၢ ယဟိဝၤယွၤ အတၢ်အိၣ်ဖှိၣ်အပူၤ တန့ၢ်နီတဂၤဘၣ်.
၃ “ပှၤဧၣ်မိၣ်ဖိ ဒီးပှၤမိၤအးဖိန့ၣ် နုာ်လီၤလၢ ယဟိဝၤယွၤ အတၢ်အိၣ်ဖှိၣ်အပူၤ တန့ၢ်နီတဂၤဘၣ်.+ အဝဲသ့ၣ် အစၢၤအသွဲၣ် တုၤလီၤလၢ အစိၤတဆံဒၣ်လဲာ် နုာ်လီၤလၢ ယဟိဝၤယွၤ အတၢ်အိၣ်ဖှိၣ်အပူၤ တန့ၢ်နီတဂၤဘၣ်, ၄ မ့ၢ်လၢ ဖဲသုဟးထီၣ်လၢ ကီၢ်အဲၤကူပတူး အပူၤအခါ အဝဲသ့ၣ် တဟ့ၣ်မၤစၢၤသုလၢ တၢ်အီၣ်တၢ်အီဘၣ်.+ တကးဒံးဘၣ် အဝဲသ့ၣ် ငါဝဲ စီၤဘဧိၢ် အဖိခွါ စီၤဘံးလၣ်လၢ ကဆိၣ်အၢသု အဂီၢ်လီၤ. စီၤဘံးလၣ်န့ၣ် အိၣ်ဟဲလၢ ပသူၢ် လၢကီၢ်မ့းစပတၤမံလီၤ.+ ၅ ဘၣ်ဆၣ် သုကစၢ် ယဟိဝၤယွၤ တဒိကနၣ် စီၤဘံးလၣ်ဘၣ်.+ လၢတၢ်န့ၣ်အလီၢ် မ့ၢ်လၢ သုကစၢ် ယဟိဝၤယွၤ အဲၣ်သုအဃိ+ သုကစၢ် ယဟိဝၤယွၤ ဆီတလဲက့ၤ တၢ်ဆိၣ်အၢ လၢတၢ်ဆိၣ်ဂ့ၤလီၤ.+ ၆ သုတဘၣ်မၤစၢၤ အဝဲသ့ၣ် ဒ်သိး အဝဲသ့ၣ် ကအိၣ်ဘၣ် မုာ်မုာ်ခုၣ်ခုၣ် ဒီးအိၣ်ဘၣ် ဘီၣ်ဘီၣ်ညီညီဘၣ်.+
၇ “ပှၤအဒိၣ်ဖိန့ၣ် မ့ၢ်သုဒီပုၢ်ဝဲၢ်အဃိ သုတဘၣ် သးဟ့အီၤဘၣ်.+
“သုကဲတ့ၢ် ပှၤထံဂၤကီၢ်ဂၤဖိလၢ ကီၢ်အဲၤကူပတူး အဃိ သုတဘၣ်သးဟ့ ပှၤအဲၤကူပတူးဖိတဖၣ်ဘၣ်.+ ၈ ပှၤသၢစိၤတစိၤ လၢအမ့ၢ် အဝဲသ့ၣ် အလိၤန့ၣ် နုာ်လီၤလၢ ယဟိဝၤယွၤ အတၢ်အိၣ်ဖှိၣ်အကျါသ့လီၤ.
၉ “ဖဲသုလဲၤထီၣ် ဆီလီၤသုသးလၢ သုကဒုး သုဒုၣ်သုဒါအခါ သုကဘၣ်ဟးဆှဲး တၢ်လၢအအၢအသီ* ခဲလၢာ်လီၤ.+ ၁၀ ပှၤပိာ်ခွါတဂၤ မ့ၢ်ကဲထီၣ် ပှၤလၢအတကဆှီဘၣ် ခီဖျိလၢ အချံအသၣ်အထံ ဟးထီၣ်လၢ မုၢ်နၤခီအဃိန့ၣ်+ အဝဲကဘၣ် ဟးထီၣ်လၢ ဒဲကဝီၤအချၢ ဒီးတဘၣ် ဟဲက့ၤနုာ်လီၤလၢ ဒဲကဝီၤအပူၤဘၣ်. ၁၁ ဖဲဟါလီၤခီန့ၣ် အဝဲကဘၣ် လုၢ်ထံ ဒီးကဘၣ်ဟဲက့ၤနုာ်လီၤ လၢဒဲပူၤ ဖဲမုၢ်လီၤနုာ်အဆၢကတီၢ်လီၤ.+ ၁၂ သုကဘၣ် ပာ်ပနီၣ် တၢ်လီၢ်တတီၤလၢဒဲကဝီၤအချၢ ဒ်သိး သုကလဲၤထီၣ် တၢ်ဟးလီၢ်အဂီၢ်လီၤ. ၁၃ လၢသုတၢ်ပီးတၢ်လီတဖၣ် အကျါန့ၣ် ဘီကဆု ကဘၣ်အိၣ်ဝဲလီၤ. ဖဲသုလဲၤထီၣ်လၢ တၢ်ချၢ ဒ်သိး သုကအ့ၣ်ဆါအဂီၢ်အခါ သုကဘၣ် ခူၣ်လီၤတၢ်ပူၤလၢ ဘီကဆုလီၤ. မ့ၢ်ဝံၤန့ၣ် သုကဘၣ်မၤဘၢကွံာ် သုအ့ၣ်လီၤ. ၁၄ သုကစၢ် ယဟိဝၤယွၤ အိၣ်လၢ သုဒဲကဝီၤအပူၤ+ ဒ်သိး ကမၤပူၤဖျဲးသု ဒီးဟ့ၣ်လီၤသုဒုၣ်သုဒါလၢ သုစုပူၤလီၤ. အဃိ သုဒဲကဝီၤန့ၣ် ကဘၣ်စီဆှံဝဲ+ ဒ်သိးကစၢ်ယွၤ သုတထံၣ် တၢ်လၢ အတကဆှီဘၣ်လၢ သုကျါ ဒီးဃၣ်ကွံာ်အသးလၢ သုအိၣ်တဂ့ၤအဂီၢ်လီၤ.
၁၅ “ဖဲကုၢ်တဂၤ ဃ့ၢ်ပူၤဖျဲးအသး လၢအကစၢ်အအိၣ် ဒီးဟဲလၢသုအိၣ်အခါ သုတဘၣ် ဆှၢကဒါက့ၤအီၤလၢ အကစၢ်အအိၣ်ဘၣ်. ၁၆ တၢ်လီၢ်တတီၤဂ့ၤ တတီၤဂ့ၤ လၢအဘၣ်သူၣ်ဘၣ်သး ဒီးအဃုထၢဝဲ လၢသုဝ့ၢ်တဖျၢၣ်ဖျၢၣ်အပူၤန့ၣ် အဝဲ အိၣ်ဝဲဖဲန့ၣ်သ့လီၤ. သုတဘၣ် မၤအၢမၤသီအီၤဘၣ်.+
၁၇ “အံၣ်စရ့လးမုၣ်မ့ၢ်ဂ့ၤ အံၣ်စရ့လးခွါမ့ၢ်ဂ့ၤ တဘၣ်ကဲ ပှၤလၢအဆါလီၤအီၣ်အသး* နီတဂၤဘၣ်.+ ၁၈ တၢ်အပှ့ၤလၢ ပိာ်မုၣ်မ့ၢ်ဂ့ၤ ပိာ်ခွါမ့ၢ်ဂ့ၤ ဒိးန့ၢ်ဘၣ်ဝဲ ခီဖျိလၢ အဆါလီၤအီၣ်အသး အဃိန့ၣ် ပှၤတဘၣ် ဟဲစိာ်လၢ သုကစၢ် ယဟိဝၤယွၤ အတၢ်လုၢ်ဟံၣ် ဒ်သိး ပှၤကမၤလၢပှဲၤ တၢ်အၢၣ်လီၤအဂီၢ်ဘၣ်, မ့ၢ်လၢ အဝဲသ့ၣ်န့ၣ် မ့ၢ်ပှၤလၢ အလီၤသးဘၣ်အၢ လၢသုကစၢ် ယဟိဝၤယွၤ အဂီၢ်လီၤ.
၁၉ “သုမ့ၢ်ဟ့ၣ်လိၢ် သုဒီပုၢ်ဝဲၢ်တဖၣ်လၢ ကျိၣ်စ့မ့ၢ်ဂ့ၤ, တၢ်အီၣ်မ့ၢ်ဂ့ၤ, တၢ်တမံၤဂ့ၤတမံၤဂ့ၤ မ့ၢ်ဂ့ၤ သုတဘၣ်ဃ့က့ၤ အအ့ၣ်ဘၣ်.+ ၂၀ လၢပှၤထံဂၤကီၢ်ဂၤဖိတဖၣ်အအိၣ်န့ၣ် သုဃ့စ့အအ့ၣ်သ့+ ဘၣ်ဆၣ် မ့မ့ၢ် သုဒီပုၢ်ဝဲၢ်တဖၣ်န့ၣ် သုတဘၣ်ဃ့ အဝဲသ့ၣ် စ့အအ့ၣ်ဘၣ်.+ သုမ့ၢ်မၤထွဲဒ်အံၤန့ၣ် သုကစၢ် ယဟိဝၤယွၤ ကဆိၣ်ဂ့ၤ တၢ်လၢသုမၤအီၤခဲလၢာ် လၢကီၢ်လၢ သုကလဲၤမၤန့ၢ်အီၤအပူၤလီၤ.+
၂၁ “နမ့ၢ်အၢၣ်လီၤ ယဟိဝၤယွၤ တၢ်တမံၤမံၤန့ၣ်+ တဘၣ်မၤယံာ်မၤနီၢ် နသးလၢ နကမၤလၢပှဲၤနတၢ်အၢၣ်လီၤ အဂီၢ်တဂ့ၤ.+ နမ့ၢ်တမၤလၢပှဲၤ နတၢ်အၢၣ်လီၤဘၣ်န့ၣ် ယဟိဝၤယွၤ ကဟံးန့ၢ်နၤ အရ့သပှၢ်တၢၢ် အဃိ တၢ်ဒဲးဘး ကလီၤတီလၢ နခိၣ်လိၤလီၤ.+ ၂၂ ဘၣ်ဆၣ် နမ့ၢ်တမၤတၢ်အၢၣ်လီၤဘၣ်န့ၣ် တၢ်ဒဲးဘး တလီၤတီလၢ နခိၣ်လိၤဘၣ်.+ ၂၃ နကဘၣ်မၤဒ် တၢ်ကတိၤလၢ အဟးထီၣ် လၢနထးခိၣ်အသိးလီၤ.+ တၢ်လၢ နအၢၣ်လီၤ နကစၢ် ယဟိဝၤယွၤ လၢနကိာ်ပူၤ ဒ်တၢ်လုၢ်လၢ တၢ်သးအိၣ်အပူၤအသိးန့ၣ် နကဘၣ် မၤလၢပှဲၤအီၤလီၤ.+
၂၄ “ဖဲသုလဲၤနုာ်လီၤလၢ ပှၤလၢသုဃၢၤ အစပံးကျီးပူၤအခါ သုအီၣ် စပံးသၣ်တဖၣ် ဘျဲဘျဲသ့လီၤ.* ဘၣ်ဆၣ် သုတဘၣ် ပၢနုာ် စပံးသၣ်တဖၣ်လၢ သုတၢ်ဒၢအပူၤ နီတဖျၢၣ်ဘၣ်.+
၂၅ “ဖဲသုလဲၤနုာ်လီၤလၢ ပှၤလၢသုဃၢၤ အစံာ်ပူၤအခါ သုဒဲးဘုချုၣ်* လၢအမံတဖၣ် လၢသုစုန့ၣ်သ့လီၤ. ဘၣ်ဆၣ် သုတဘၣ်ကူး ပှၤလၢသုဃၢၤ အဘုလၢ သုထါဂဲာ်ဘၣ်.+
၂၄ “ပိာ်ခွါတဂၤ မ့ၢ်ဆီဟံၣ်ဆီဃီဒီး ပိာ်မုၣ်တဂၤ ဒီးအဝဲ မ့ၢ်တဘၣ်သူၣ်ဘၣ်သးဝဲ ပိာ်မုၣ်တဂၤအံၤဘၣ် ခီဖျိလၢ အထံၣ်န့ၢ် တၢ်တဂ့ၤတဘၣ် တမံၤမံၤလၢ အအိၣ်န့ၣ် အဝဲ ကဘၣ်ကွဲးန့ၢ်အီၤ လံာ်လီၤဖးလီၤ.*+ ဒီးအဝဲ ကဟ့ၣ်လီၤဝဲ ပိာ်မုၣ်တဂၤအံၤ ဝံၤဒီး အကမၢအဟးထီၣ်လၢ အဟံၣ်လီၤ.+ ၂ ဖဲပိာ်မုၣ်တဂၤန့ၣ် ဟးထီၣ်လၢ ဟံၣ်တဖျၢၣ်အံၤ ဝံၤအလီၢ်ခံ အဝဲ ကဲထီၣ် ပှၤအဂၤတဂၤ အမါသ့လီၤ.+ ၃ အဝၤ လၢခံတဂၤအံၤ မ့ၢ်သးဟ့အီၤ* ဒီးမ့ၢ်ကွဲးန့ၢ်အီၤ လံာ်လီၤဖး ဒီးမ့ၢ်ဟ့ၣ်လီၤအီၤ လံာ်လီၤဖး ဒီးမ့ၢ်မၢအဟးထီၣ် လၢအဟံၣ် မ့တမ့ၢ် အဝၤတဂၤအံၤ မ့ၢ်သံန့ၣ် ၄ အဝၤလၢညါ လၢအနီဟးထီၣ်ကွံာ်အီၤ တဂၤန့ၣ် တအိၣ်ဒီး တၢ်ခွဲးတၢ်ယာ် လၢကဟံးန့ၢ်က့ၤအီၤ ဒ်အမါအသိးလၢၤဘၣ်, မ့ၢ်လၢ ပိာ်မုၣ်တဂၤအံၤ တကဆှီလၢၤဘၣ် လၢအဂီၢ် အဃိလီၤ. အမ့ၢ်မၤဝဲဒ်န့ၣ်န့ၣ် အမ့ၢ် တၢ်လၢ အလီၤသးဘၣ်အၢ လၢယဟိဝၤယွၤ အဂီၢ်လီၤ. လၢကီၢ်လၢ သုကစၢ် ယဟိဝၤယွၤ ကဟ့ၣ်လီၤသု ဒ်တၢ်န့ၢ်သါ အသိးန့ၣ် သုတဘၣ် ဒုးအိၣ်ထီၣ် တၢ်ဒဲးဘး လၢအပူၤဘၣ်.
၅ “ဖဲပှၤပိာ်ခွါတဂၤ ဆီဟံၣ်ဆီဃီ သီသီအခါ အဝဲတဘၣ် လဲၤဒုးတၢ်ဘၣ် ဒီးပှၤတဘၣ် ဟ့ၣ်လီၤအီၤ မူဒါအဂၤ နီတမံၤဘၣ်. အဝဲ ကဘၣ်အိၣ်ဘှံးလၢ အမူဒါခဲလၢာ် တနံၣ် ဒီးကဘၣ်အိၣ် လၢဟံၣ် ဒီးမၤသးခုအမါအသးလီၤ.+
၆ “သုတဘၣ်ဟံးန့ၢ် ဆၢၣ်ဂူာ် ဒ်တၢ်အုၣ်အသး တမံၤလၢ ပှၤကဘၣ်လိးက့ၤ အဒ့ၣ်ကမၢ်အသိးန့ၣ်တဂ့ၤ.+ သုမ့ၢ်ဟံးန့ၢ်အီၤန့ၣ် လီၤဂာ်ဒ် သုဟံးန့ၢ် ပှၤသးသမူလီၤ.
၇ “ပှၤတဂၤဂၤ မ့ၢ်စံၣ်စိာ်န့ၢ်ဆူၣ် အဒီပုၢ်ဝဲၢ် ပှၤအံၣ်စရ့လးဖိ တဂၤဂၤ ဒီးမ့ၢ်မၤအၢမၤနးအီၤ ဒီးဆါလီၤအီၣ်ကွံာ်အီၤန့ၣ်+ ပှၤလၢ အစံၣ်စိာ်န့ၢ်ဆူၣ်တၢ်တဂၤ ကဘၣ်သံလီၤ.+ သုကဘၣ် ထုးထီၣ်ကွံာ် တၢ်လၢအအၢအသီ လၢသုကျါလီၤ.+
၈ “ဘၣ်ဃးဒီး တၢ်ဆါအၢန့ၣ် ပလီၢ်သုသး သပှၢ်တၢၢ် လၢသုကမၤ ဒ်ပှၤလုၢ်တၢ်ဒိၣ်တဖၣ်* ဟံးစုနဲၣ်ကျဲသုအသိး ခဲလၢာ်တက့ၢ်.+ ပလီၢ်သုသး ဒ်သိး သုကမၤဒ် ယမၤလိာ် အဝဲသ့ၣ် အသိး လီၤတံၢ်လီၤဆဲး တက့ၢ်. ၉ သ့ၣ်နီၣ်ထီၣ်က့ၤ တၢ်လၢ သုကစၢ် ယဟိဝၤယွၤ မၤဝဲ နီၢ်မံးရယၣ် ဖဲသုဟးထီၣ် လၢကီၢ်အဲၤကူပတူး အလီၢ်ခံန့ၣ်တက့ၢ်.+
၁၀ “နမ့ၢ်ဟ့ၣ်လိၢ်ဆိ ပှၤလၢနဃၢၤ တၢ်တမံၤမံၤ+ ဒီးအဝဲမ့ၢ် ကဟ့ၣ်လီၤနၤ တၢ်တမံၤမံၤ ဒ်တၢ်အုၣ်အသးလၢ အဝဲကလိးက့ၤ အဒ့ၣ်ကမၢ် အသိးန့ၣ် နတဘၣ် လဲၤနုာ်လီၤန့ၢ်ဆူၣ် လၢအဟံၣ်ပူၤ ဒ်သိး နကဟံးန့ၢ်အီၤ အဂီၢ်ဘၣ်. ၁၁ နကဘၣ် ဆၢထၢၣ်လၢတၢ်ချၢ ဒီးပှၤလၢနဟ့ၣ်လိၢ်ဆိအီၤ တၢ်တဂၤန့ၣ် ကဟဲထီၣ်လၢတၢ်ချၢ ဒီးကဟ့ၣ်လီၤနၤ တၢ်တမံၤ ဒ်တၢ်အုၣ်အသးလၢ အဝဲကလိးက့ၤနၤ အဒ့ၣ်ကမၢ် အသိးန့ၣ်လီၤ. ၁၂ ပှၤတဂၤ မ့ၢ်ဖှီၣ်န့ၣ် နတဘၣ် ဟံးဃာ် တၢ်ကူတၢ်ကၤလၢ အဝဲဟ့ၣ်လီၤနၤ ဒ်တၢ်အုၣ်အသးလၢ အဝဲကလိးက့ၤနၤ အဒ့ၣ်ကမၢ်အသိး တုၤလၢ လၢခံတဂီၤန့ၣ်ဘၣ်.+ ၁၃ နကဘၣ် ဟ့ၣ်က့ၤအီၤ အတၢ်ကူတၢ်ကၤအံၤ ဖဲမုၢ်လီၤနုာ် အဆၢကတီၢ်လီၤ. ဒီးအဝဲ ကမံလုးဘၣ်ဝဲ အတၢ်ကူတၢ်ကၤအံၤအဃိ+ အကဃ့တၢ်ဆိၣ်ဂ့ၤ လၢနဂီၢ်လီၤ. ဒီးနကစၢ် ယဟိဝၤယွၤ ကထံၣ်ဝဲ တၢ်လၢနမၤအီၤအံၤ ဒ်တၢ်လၢ အတီအလိၤလီၤ.
၁၄ “ပှၤလၢ အဒိးငါလီၤအသး လၢအဖှီၣ်န့ၣ် အမ့မ့ၢ် နဒီပုၢ်ဝဲၢ်မ့ၢ်ဂ့ၤ, ပှၤထံဂၤကီၢ်ဂၤဖိ လၢအအိၣ်လၢ ဝ့ၢ်တဖျၢၣ်ဖျၢၣ် လၢနကီၢ်ပူၤ မ့ၢ်ဂ့ၤန့ၣ် နတဘၣ် မၤအီၤတတီတလိၤဘၣ်.+ ၁၅ မ့ၢ်လၢ အဝဲလိၣ်ဘၣ် တၢ်မၤစၢၤ ဒီးအသးသမူန့ၣ် ဒိးသန့ၤထီၣ်အသးလၢ အဘူးအလဲအဃိ နကဘၣ်ဟ့ၣ်အီၤ အဘူးအလဲ တနံၤဃီ+ တချုးလၢ မုၢ်လီၤနုာ်ဒံးဘၣ် န့ၣ်လီၤ. မ့တမ့ၢ်ဘၣ်န့ၣ် အဝဲ ကကိးပသူထီၣ် လၢယဟိဝၤယွၤအအိၣ် လၢနဃိ ဒီးတၢ်ဒဲးဘး ကလီၤတီလၢ နခိၣ်လိၤလီၤ.+
၁၆ “ပှၤတဘၣ်မၤသံ ပၢ်တဖၣ် ခီဖျိ တၢ်လၢ အဖိတဖၣ် မၤဝဲအဃိဘၣ်. ဒီးပှၤတဘၣ်မၤသံ ဖိတဖၣ် ခီဖျိတၢ်လၢ အပၢ်တဖၣ် မၤဝဲအဃိဘၣ်.+ ပှၤတဂၤ ကဘၣ်တၢ်မၤသံအီၤ ထဲဒၣ်လၢ အနီၢ်ကစၢ် အတၢ်ဒဲးဘးအဃိလီၤ.+
၁၇ “ပှၤထံဂၤကီၢ်ဂၤဖိ ဒီးပှၤဖိၣ်ဃဲတဖၣ်န့ၣ် သုတဘၣ် စံၣ်ညီၣ်န့ၢ်တၢ်လၢ အဝဲသ့ၣ်အဂီၢ် တတီတလိၤတဂ့ၤ.+ ဒီးသုတဘၣ်ဟံးန့ၢ် ပှၤမုၣ်ကမဲ အတၢ်ကူတၢ်ကၤ ဒ်တၢ်အုၣ်အသး တမံၤလၢ အဝဲကဘၣ်လိးက့ၤ အဒ့ၣ်ကမၢ်အသိးန့ၣ်တဂ့ၤ.+ ၁၈ သ့ၣ်နီၣ်ထီၣ်လၢ သုဘၣ်ကဲကုၢ်လၢ ကီၢ်အဲၤကူပတူးအပူၤ ဒီးသုကစၢ် ယဟိဝၤယွၤ မၤပူၤဖျဲးသု ဖဲန့ၣ်လီၤ.+ လၢတၢ်န့ၣ်အဃိ ယမၤလိာ်သုလၢ သုကမၤ ဒ်အံၤလီၤ.
၁၉ “ဖဲသုကူးဘု လၢသုစံာ်ပျီပူၤ အခါ သုမ့ၢ်သးပ့ၤနီၣ် ဘုကဒိၣ်လၢ သုစံာ်ပျီပူၤန့ၣ် သုတဘၣ် က့ၤဟံးန့ၢ်က့ၤအီၤဘၣ်. သုကဘၣ်ပာ်တ့ၢ်အီၤလၢ ပှၤထံဂၤကီၢ်ဂၤဖိ, ပှၤဖိၣ်ဃဲ ဒီးမုၣ်ကမဲအဂီၢ်လီၤ.+ သုမ့ၢ်မၤ ဒ်န့ၣ်န့ၣ် သုကစၢ် ယဟိဝၤယွၤ ကဆိၣ်ဂ့ၤသု လၢတၢ်လၢသုမၤအီၤ ခဲလၢာ်အပူၤလီၤ.+
၂၀ “ဖဲသုတီၢ်လီၤတဲာ် သ့ၣ်စၤယံး အသၣ်လၢ အထူၣ်လိၤ ဝံၤအလီၢ်ခံ သုတဘၣ် တီၢ်လီၤတဲာ်ကဒီး တၢ်လၢအအိၣ်တ့ၢ်လၢ အဒ့အလိၤလၢၤဘၣ်. တၢ်လၢ အအိၣ်တ့ၢ်တဖၣ်န့ၣ် ကဘၣ်မ့ၢ်ဝဲလၢ ပှၤထံဂၤကီၢ်ဂၤဖိ, ပှၤဖိၣ်ဃဲ ဒီးမုၣ်ကမဲအဂီၢ်လီၤ.+
၂၁ “ဖဲသုဒဲးစပံးသၣ် လၢသုစပံးကျီး ပူၤအခါ သုတဘၣ် ဒဲးက့ၤ စပံးသၣ် အဘျဲၣ်အစဲၢ် လၢအအိၣ်တ့ၢ်တဖၣ်ဘၣ်. ပှၤကဘၣ် ပာ်တ့ၢ်အီၤလၢ ပှၤထံဂၤကီၢ်ဂၤဖိ, ပှၤဖိၣ်ဃဲ ဒီးမုၣ်ကမဲ အဂီၢ်လီၤ. ၂၂ သ့ၣ်နီၣ်ထီၣ်လၢ သုကဲကုၢ်လၢ ကီၢ်အဲၤကူပတူး အပူၤတက့ၢ်. လၢတၢ်န့ၣ်အဃိ ယမၤလိာ်သုလၢ သုကမၤ ဒ်အံၤန့ၣ်လီၤ.
၂၅ “ဖဲတၢ်အ့ၣ်လိာ်ဆိးက့ ဟဲအိၣ်ထီၣ်လၢ ပှၤပိာ်ခွါခံဂၤ အဘၢၣ်စၢၤအခါ အဝဲသ့ၣ် လဲၤလၢ စံၣ်ညီၣ်ကွီၢ်တဖၣ်အအိၣ် သ့လီၤ.+ စံၣ်ညီၣ်ကွီၢ်တဖၣ် ကစံၣ်ညီၣ်န့ၢ်တၢ်လၢ အဝဲသ့ၣ်အဂီၢ် ဒီးကဆၢတဲာ်ဝဲလၢ မတဂၤ အတၢ်ကမၣ်အိၣ် ဒီးမတဂၤ အတၢ်ကမၣ် တအိၣ်ဘၣ်လဲၣ်န့ၣ်လီၤ.+ ၂ ပှၤလၢအတၢ်ကမၣ်အိၣ်တဂၤ မ့ၢ်ကြၢးဘၣ် တၢ်တီၢ်အီၤန့ၣ်+ စံၣ်ညီၣ်ကွီၢ် ကမၢအမံနီၤ ဒီးပှၤကတီၢ်အီၤလၢ စံၣ်ညီၣ်ကွီၢ် အမဲာ်ညါလီၤ. ပှၤကတီၢ်အီၤ အထံၣ်ထဲလဲၣ်န့ၣ် ဒိးသန့ၤထီၣ်အသးလၢ အမၤတၢ်ကမၣ် အၢထဲလဲၣ် အဖီခိၣ်လီၤ. ၃ ပှၤတီၢ်အီၤ တုၤလၢအထံၣ် ၄၀ သ့လီၤ.+ ဘၣ်ဆၣ် ပှၤတဘၣ်တီၢ်အီၤ အါန့ၢ်အန့ၣ်ဘၣ်. ပှၤမ့ၢ်ဆဲးတီၢ်အီၤ အါန့ၢ်အထံၣ် ၄၀ န့ၣ်သုဒီပုၢ်ဝဲၢ်တဂၤအံၤ ကတူၢ်ဘၣ်တၢ်မဲာ်ဆှး လၢသုမဲာ်ညါလီၤ.
၄ “ဖဲကျီၢ်ဖါ ယီၢ်ဘုအခါ နတဘၣ်ဖျီၣ်ဃာ် အကိာ်ပူၤတဂ့ၤ.+
၅ “ပှၤဒီပုၢ်ဝဲၢ်ခွါတဖၣ် မ့ၢ်အိၣ်တၢ်လီၢ် တတီၤဃီ ဒီးအဝဲသ့ၣ် မ့ၢ်သံတဂၤဂၤ ဒီးအဖိခွါမ့ၢ်တအိၣ် နီတဂၤဘၣ်န့ၣ် ပှၤလၢအသံတဂၤအံၤအမါ တဘၣ်ဆီဟံၣ်ဆီဃီဒီး ပှၤလၢအတအိၣ်လၢ ဒူၣ်ဖိထၢဖိ တဒူၣ်အံၤ အကျါန့ၣ်ဘၣ်. လၢတၢ်န့ၣ်အလီၢ် အဝၤ အဒီပုၢ်ဝဲၢ်ခွါ ကဘၣ်လဲၤလၢအအိၣ်, ဟံးန့ၢ်အီၤ ဒ်အမါ ဒီးမၤလၢပှဲၤ အမူဒါ ခီဖျိလၢ ဆီဟံၣ်ဆီဃီဒီး အဒီပုၢ်ဝဲၢ်ခွါလၢ အသံတဂၤန့ၣ် အမါလီၤ.+ ၆ ဒီးဖိဝဲၢ်ကိ လၢပိာ်မုၣ်တဂၤအံၤ အိၣ်ဖျဲၣ်ထီၣ်ဝဲန့ၣ် ကဘၣ်ဟံးန့ၢ်ဝဲ ပှၤလၢအသံတဂၤန့ၣ် အမံၤလီၤ.+ အဃိ ပှၤတဂၤအံၤ အမံၤ တလီၤမၢ်ကွံာ် လၢပှၤအံၣ်စရ့လးဖိ အကျါလၢၤဘၣ်.+
၇ “ပှၤပိာ်ခွါတဂၤန့ၣ် မ့ၢ်တအဲၣ်ဒိး ဆီဟံၣ်ဆီဃီဒီး အဒီပုၢ်ဝဲၢ်ခွါ အမါတဂၤအံၤဘၣ်န့ၣ် ပိာ်မုၣ်တဂၤအံၤ ကဘၣ်လဲၤလၢ ပှၤသူၣ်က့သးပှၢ်အအိၣ် လၢဝ့ၢ်အတြဲၤလီၤ. ဒီးအဝဲ ကဘၣ်တဲဝဲလၢ ‘ယဝၤ အဒီပုၢ်ဝဲၢ်ခွါန့ၣ် တအဲၣ်ဒိးလၢ ပှၤကသ့ၣ်နီၣ်ထီၣ် အဒီပုၢ်ဝဲၢ်အမံၤ လၢပှၤအံၣ်စရ့လးဖိ အကျါဘၣ်. ယမ့ၢ် အဒီပုၢ်ဝဲၢ်လၢ အသံတဂၤ အမါ ဘၣ်ဆၣ် အဝဲတအဲၣ်ဒိး မၤလၢပှဲၤအမူဒါ ဒီးဆီဟံၣ်ဆီဃီဒီးယၤဘၣ်.’ ၈ ဒီးပိာ်ခွါတဂၤအံၤ အဝ့ၢ် အပှၤသူၣ်က့သးပှၢ်န့ၣ် ကကိးန့ၢ်အီၤ ဒီးတဲတၢ်ဒီးအီၤလီၤ. ဒီးအဝဲ မ့ၢ်တဲဝဲလၢ အတအဲၣ်ဒိး ဆီဟံၣ်ဆီဃီဒီး ပိာ်မုၣ်တဂၤအံၤဘၣ်န့ၣ် ၉ အဒီပုၢ်ဝဲၢ်ခွါ အမါအံၤ ကလဲၤလၢအအိၣ် လၢပှၤသူၣ်က့သးပှၢ် အမဲာ်ညါ ဒီးကဘ့ၣ်လီၤကွံာ် ပှၤပိာ်ခွါတဂၤန့ၣ် အခီၣ်ဖံး+ ဒီးကထူးပှဲာ်အမဲာ်လီၤ. ဒီးကတဲဝဲလၢ ‘ပှၤလၢ အတအဲၣ်ဒိး သူၣ်ထီၣ် အဒီပုၢ်ဝဲၢ်ခွါ အဟံၣ်ဖိဃီဖိဘၣ်န့ၣ် ပှၤကဘၣ်မၤအီၤ ဒ်အံၤလီၤ.’ ၁၀ ဝံၤဒီး လၢကီၢ်အံၣ်စရ့လးအပူၤ ပှၤတဂၤအံၤ အဟံၣ်ဖိဃီဖိအမံၤန့ၣ် ကဘၣ်တၢ်ကိးအီၤလၢ ‘ပှၤလၢအခီၣ်ဖံး ဘၣ်တၢ်ဘ့ၣ်လီၤအီၤတဂၤ အဟံၣ်ဖိဃီဖိလီၤ.’
၁၁ “ဖဲပှၤပိာ်ခွါခံဂၤ ထိလိာ်အသးအခါ အဝဲတဂၤအမါ မ့ၢ်လဲၤနုာ်လီၤ ဒ်သိး ကဒီသဒၢအဝၤလၢ ပှၤလၢအထိ အဝၤတဂၤ အစုပူၤ ဒီးပိာ်မုၣ်တဂၤအံၤ မ့ၢ်ဖ့ၣ်ထုး ပိာ်ခွါအဝဲတဂၤ အတၢ်န့ၣ် ၁၂ သုကဘၣ် ဒီၣ်တဲာ်ကွံာ် ပိာ်မုၣ်တဂၤန့ၣ် အစု* ဒီးသုတဘၣ် သးကညီၤအီၤဘၣ်.
၁၃ “လၢနထၢၣ်ပူၤန့ၣ် နတဘၣ်ဖၢနုာ်လီၤ စီၤပီၢ်သၣ်ခံဖျၢၣ်လၢ အတယၢၢ်ဃၢဖှံလိာ်သးဘၣ်.+ ၁၄ လၢပှၤကထိၣ်တၢ်စီၤတၢ်အဂီၢ်န့ၣ် သုတဘၣ်ပာ် နာ်ခံဖျၢၣ်* လၢအတြီၢ်တၢ်အါတဖျၢၣ် ဒီးအတြီၢ်တၢ်စှၤတဖျၢၣ်လၢ သုဟံၣ်ပူၤဘၣ်.+ ၁၅ သုကဘၣ် ပာ်ဃာ် စီၤပီၢ်သၣ် ဒီးတၢ်ထိၣ်တၢ်စီၤတဖၣ် လၢအဘၣ် ဒီးအတီအလိၤလီၤ. သုမ့ၢ်မၤဒ်န့ၣ်န့ၣ် လၢကီၢ်လၢ သုကစၢ် ယဟိဝၤယွၤ ကဟ့ၣ်လီၤသု အပူၤန့ၣ် သုကအိၣ်မူဘၣ် ဖးယံာ်လီၤ.+ ၁၆ ပှၤလၢအမၤ တၢ်တတီတလိၤ ဒ်န့ၣ်တဖၣ်န့ၣ် မ့ၢ်တၢ်လၢ အလီၤသးဘၣ်အၢ လၢသုကစၢ် ယဟိဝၤယွၤ အဂီၢ်လီၤ.+
၁၇ “သ့ၣ်နီၣ်ထီၣ်က့ၤ တၢ်လၢ ပှၤဧမၤလ့းဖိတဖၣ် မၤသု ဖဲသုဟးထီၣ် လၢကီၢ်အဲၤကူပတူးအခါ န့ၣ်တက့ၢ်.+ ၁၈ လၢကျဲန့ၣ် အဝဲသ့ၣ် ဟဲထံၣ်လိာ်အသးဒီးသု ဒီးဖဲသုလီၤဘှံးလီၤတီၤအခါ အဝဲသ့ၣ် ဒုးဝဲ ပှၤလၢအဂံၢ်လီၤစၢ်လၢအအိၣ်တ့ၢ် လၢလီၢ်ခံတဖၣ် ဒ်လဲၣ်န့ၣ် သ့ၣ်နီၣ်ထီၣ်က့ၤတက့ၢ်. အဝဲသ့ၣ် တပျံၤ ကစၢ်ယွၤဘၣ်. ၁၉ လၢကီၢ်လၢ သုကစၢ် ယဟိဝၤယွၤ ကဟ့ၣ်လီၤသု ဒ်တၢ်န့ၢ်သါအသိး အပူၤန့ၣ်+ ဖဲသုကစၢ် ယဟိဝၤယွၤ မၤပူၤဖျဲးသု လၢသုဒုၣ်သုဒါ လၢအအိၣ်ဝးတရံးသု ခဲလၢာ် အစုပူၤ ဝံၤအလီၢ်ခံ သုကဘၣ် မၤလီၤမၢ်ကွံာ် ပှၤဧမၤလ့းဖိတဖၣ် လၢမူခိၣ် အဖီလာ်လီၤ.+ သုတဘၣ် သးပ့ၤနီၣ်တဂ့ၤ.
၂၆ “လၢခံ သုကလဲၤနုာ်လၢ ကီၢ်လၢ သုကစၢ် ယဟိဝၤယွၤ ကဟ့ၣ်လီၤသု ဒ်တၢ်န့ၢ်သါအသိး ဒီးမၤန့ၢ်ကီၢ်တဘ့ၣ်န့ၣ် အတၢ်လီၢ်တၢ်ကျဲ ဒီးအိၣ်ဆိးလၢအပူၤလီၤ. ၂ ဖဲန့ၣ်အခါ သုကဘၣ်ဟံးန့ၢ် သုတၤသၣ်ဆိတနီၤလၢ သုပာ်ဖှိၣ်အီၤ လၢကီၢ်လၢ သုကစၢ် ယဟိဝၤယွၤ ကဟ့ၣ်လီၤသုအပူၤ ဒီးဖၢနုာ်အီၤလၢ နာ်ပူၤလီၤ. ဒီးသုကဘၣ် လဲၤစိာ်အီၤလၢ တၢ်လီၢ်လၢ သုကစၢ် ယဟိဝၤယွၤ ဃုထၢထီၣ်ဝဲလၢ အမံၤကအိၣ်ဝဲလီၤ.+ ၃ သုကဘၣ်လဲၤလၢ ပှၤလၢအကဲ ပှၤလုၢ်တၢ်ဒိၣ် လၢဆၢကတီၢ်ဖဲန့ၣ် အအိၣ် ဒီးတဲအီၤလၢ ‘ဒ်ယဟိဝၤယွၤ အၢၣ်လီၤ ပမိၢ်ပၢ်ဖံဖု လၢပျၢၤတဖၣ်လၢ အကဟ့ၣ်လီၤပှၤ ကီၢ်တဘ့ၣ်အံၤအသိးန့ၣ် ခဲအံၤ ယအိၣ်ဘၣ်လၢ ကီၢ်တဘ့ၣ်အံၤအပူၤလံ. အဃိ တနံၤအံၤ ယဟဲပာ်ဖျါထီၣ် တၢ်စံးဘျုးစံးဖှိၣ် လၢပကစၢ် ယဟိဝၤယွၤအအိၣ်လီၤ.’+
၄ “ဒီးပှၤလုၢ်တၢ်ဒိၣ် ကဟံးန့ၢ် နာ်လၢ နစုပူၤ ဒီးကပာ်ဝဲလၢ နကစၢ် ယဟိဝၤယွၤ အတၢ်လုၢ်လီၢ် အမဲာ်ညါလီၤ. ၅ ဒီးလၢနကစၢ် ယဟိဝၤယွၤ အမဲာ်ညါန့ၣ် နကဘၣ်တဲလၢ ‘ယဖုဖးဒိၣ် မ့ၢ်ပှၤစူၤရံဖိတဂၤလၢ အဟးဝ့ၤဝီၤတၢ်လီၤ.+ ဖဲအလဲၤလီၤလၢ ကီၢ်အဲၤကူပတူးအပူၤ+ ဒ်ပှၤထံဂၤကီၢ်ဂၤဖိအခါ အလဲၤအိၣ်ဝဲဒီး အဒူၣ်ဖိထၢဖိ စှၤဂၤလီၤ.+ ဘၣ်ဆၣ် အစၢၤအသွဲၣ်တဖၣ် အါထီၣ်ဂီၢ်ထီၣ်ဖဲန့ၣ် ဒီးကဲထီၣ်က့ၤဝဲ ပှၤကလုာ်ဖးဒိၣ် တကလုာ်လၢ အဂံၢ်ဆူၣ်ဘါဆူၣ်လီၤ.+ ၆ ပှၤအဲၤကူပတူးဖိတဖၣ် မၤအၢမၤနးပှၤ, ဆီၣ်တံၢ်မၤနၢၤပှၤ ဒီးဒုးကဲကုၢ်ပှၤ နးနးကျံၤကျံၤလီၤ.+ ၇ အဃိ ပဃ့တၢ်မၤစၢၤလၢ ပမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤအအိၣ် ဒီးယဟိဝၤယွၤ နၢ်ဟူပကလုၢ် ဒီးထံၣ်ဝဲ တၢ်နးတၢ်ဖှီၣ်, တၢ်ကီတၢ်ခဲ ဒီးတၢ်ဆီၣ်တံၢ်မၤနၢၤ လၢပတူၢ်ဘၣ်အီၤန့ၣ်လီၤ.+ ၈ လၢခံ ယဟိဝၤယွၤ ပာ်ဖျါထီၣ် အစုလၢအဂံၢ်ဆူၣ်ဘါဆူၣ်, စုလၢအယူာ်ဃီၤအသး ဒီးတၢ်မၤလၢ အလီၤပျံၤ ဒိၣ်ဒိၣ်မုၢ်မုၢ်+ ဒီးတၢ်ပနီၣ်လီၤလးတဖၣ် ဒီးတၢ်လီၤလးတဖၣ် ဒ်သိးကထုးထီၣ်ကွံာ် ပှၤလၢ ကီၢ်အဲၤကူပတူးအပူၤလီၤ.+ ၉ ဒီးအဝဲ ဆှၢပှၤလၢ တၢ်လီၢ်ဖဲအံၤ ဒီးဟ့ၣ်လီၤပှၤ ကီၢ်လၢတၢ်နုၢ်ထံ ဒီးကနဲစီ ယွၤလီၤဝဲလၢအပူၤ တဘ့ၣ်အံၤလီၤ.+ ၁၀ ခဲအံၤ ယဟဲစိာ် တၤသၣ်ဆိ လၢအမဲထီၣ်သၣ်ထီၣ်လၢ ဟီၣ်ခိၣ်လၢ ယဟိဝၤယွၤ ဟ့ၣ်လီၤယၤ အပူၤလီၤ.’+
“ဒီးသုကဘၣ် ပာ်လီၤအီၤလၢ သုကစၢ် ယဟိဝၤယွၤ အမဲာ်ညါ ဒီးသုကဘၣ် ဆုးလီၤသုခိၣ်လၢ သုကစၢ်ယဟိဝၤယွၤ အမဲာ်ညါလီၤ. ၁၁ ဖဲန့ၣ်န့ၣ် သုဒီးပှၤလ့ၤဝံဖိတဖၣ် ဒီးပှၤထံဂၤကီၢ်ဂၤဖိ လၢအအိၣ်လၢ သုကျါန့ၣ် ကသူၣ်ဖှံသးညီ ခီဖျိလၢ ယဟိဝၤယွၤ ဟ့ၣ်သု ဒီးပှၤလၢအအိၣ်လၢ သုဟံၣ်ပူၤ တၢ်လၢအဂ့ၤ အါမးအဃိလီၤ.+
၁၂ “လၢသၢနံၣ်တနံၣ်န့ၣ် ဖဲသုပာ်ဖှိၣ်ထီၣ် သုတၤသူတၤသၣ် ကိးမံၤဒဲး ဆံဆဲၣ်ပူတပူအခါ+ သုကဘၣ်ဟ့ၣ်လီၤ ပှၤလ့ၤဝံဖိ, ပှၤထံဂၤကီၢ်ဂၤဖိ, ပှၤဖိၣ်ဃဲ ဒီးပှၤမုၣ်ကမဲ ဒီးအဝဲသ့ၣ် ကအီၣ်ဘၣ်ဘျဲဘျဲ လၢသုဝ့ၢ်သ့ၣ်တဖၣ် အပူၤလီၤ.+ ၁၃ ဒီးလၢသုကစၢ် ယဟိဝၤယွၤ အမဲာ်ညါန့ၣ် သုကတဲလၢ ‘ဒ်နမၤလိာ်ယၤအသိး ယထုးထီၣ်ကွံာ် တၢ်လၢအစီဆှံတဖၣ်အံၤလၢ ယဟံၣ်ပူၤ ဒီးယဟ့ၣ်လီၤ ပှၤလ့ၤဝံဖိတဖၣ်, ပှၤထံဂၤကီၢ်ဂၤဖိတဖၣ်, ပှၤဖိၣ်ဃဲ ဒီးပှၤမုၣ်ကမဲတဖၣ်လံ.+ အဃိ ယတမၤကမၣ် နတၢ်သိၣ်တၢ်သီတဖၣ်ဘၣ် ဒီးယတကွၢ်ကပာ်အီၤ စ့ၢ်ကီးဘၣ်. ၁၄ ဖဲယဟီၣ်တၢ်ယၢၤတၢ် အခါ ယတအီၣ်တၢ်လၢ အကဆှီတဖၣ်အံၤ နီတမံၤဘၣ်, ဖဲယတကဆှီဘၣ်အခါ ယတထိး တၢ်လၢအကဆှီ နီတမံၤဘၣ်, ယတဟ့ၣ်လီၤ တၢ်လၢအကဆှီတဖၣ်အံၤ လၢပှၤသံအဂီၢ်ဘၣ်. ယဒိကနၣ် ယကစၢ် ယဟိဝၤယွၤ အကလုၢ် ဒီးယမၤထွဲ တၢ်ခဲလၢာ် လၢအမၤလိာ်ယၤလီၤ. ၁၅ ကွၢ်လီၤတၢ်လၢ မူခိၣ် လၢအမ့ၢ် နတၢ်အိၣ်တၢ်ဆိးအလီၢ်စီဆှံ ဒီးဆိၣ်ဂ့ၤ နပှၤဂီၢ်မုၢ် အံၣ်စရ့လးဖိတဖၣ် ဒီးကီၢ်လၢတၢ်နုၢ်ထံဒီး ကနဲစီ ယွၤဝဲလၢ အပူၤန့ၣ်တက့ၢ်.+ နဟ့ၣ်လီၤပှၤ ကီၢ်တဘ့ၣ်အံၤ+ ဒ်နအၢၣ်လီၤ ပမိၢ်ပၢ်ဖံဖု လၢပျၢၤတဖၣ်အသိးလီၤ.’+
၁၆ “တနံၤအံၤန့ၣ် သုကစၢ် ယဟိဝၤယွၤ မၤလိာ်သုလၢ သုကအိၣ်မူမၤထွဲ တၢ်ဘျၢတဖၣ် ဒီးတၢ်သိၣ်တၢ်သီတဖၣ်အံၤလီၤ. သုကဘၣ် အိၣ်မူမၤထွဲအီၤလၢ သုသးဒီဖျၢၣ်+ ဒီးလၢသုတၢ်အိၣ်မူ ကိးသနၢၣ်ဒဲး အပူၤလီၤ. ၁၇ တနံၤအံၤန့ၣ် ယဟိဝၤယွၤ အၢၣ်လီၤသုလၢ သုမ့ၢ်မၤအတၢ်ဘၣ်သး, မၤထွဲ အတၢ်ဘျၢ,+ အတၢ်မၤလိာ်,+ အတၢ်သိၣ်တၢ်သီတဖၣ်+ ဒီးဒိကနၣ် အကလုၢ်န့ၣ် အဝဲ ကကဲသုကစၢ်ယွၤလီၤ. ၁၈ ဒီးတနံၤညါအံၤ သုအၢၣ်လီၤလၢ ယဟိဝၤယွၤ အမဲာ်ညါလၢ သုကကဲထီၣ် အပှၤဂီၢ်မုၢ်, ပှၤလၢ အလုၢ်ဒိၣ်ပှ့ၤဒိၣ်တဒူၣ်* လၢအဂီၢ်လီၤ.+ ဒီးသုကကဲထီၣ် အပှၤဂီၢ်မုၢ် ဒ်အအၢၣ်လီၤသုအသိး ဒီးသုကဒိကနၣ် အတၢ်မၤလိာ် ခဲလၢာ်လီၤ. ၁၉ ဒီးသုမ့ၢ်ပာ်ဖျါထီၣ်လၢ သုမ့ၢ်ပှၤစီဆှံတဒူၣ် လၢသုကစၢ် ယဟိဝၤယွၤ အဂီၢ်န့ၣ်+ ဒ်ယွၤအၢၣ်လီၤဝဲအသိး အဝဲ ကပာ်သုလၢ ပှၤကလုာ်အဂၤလၢ အဝဲတ့လီၤဝဲတဖၣ် အဖီခိၣ်+ ဒီးသုကဒိးန့ၢ်ဘၣ် တၢ်စံးပတြၢၤ, တၢ်မံၤဟူသၣ်ဖျါ ဒီးတၢ်လၤကပီၤလီၤ.”
၂၇ စီၤမိၤၡ့ ဒီးအံၣ်စရ့လး အပှၤသူၣ်က့သးပှၢ်တဖၣ် ဆၢထၢၣ်လၢ ပှၤဂီၢ်မုၢ်တဖၣ် အမဲာ်ညါ ဒီးစီၤမိၤၡ့ တဲဝဲလၢ “မၤထွဲ တၢ်မၤလိာ် ခဲလၢာ် လၢယဟ့ၣ်လီၤသု လၢတနံၤအံၤတက့ၢ်. ၂ ဖဲသုလဲၤခီဂာ် ထံကျိယၢ်ဒ့ၣ် ဒီးလဲၤနုာ်လီၤလၢ ကီၢ်တဘ့ၣ်လၢ သုကစၢ် ယဟိဝၤယွၤ ကဟ့ၣ်လီၤသု အခါ သုကဘၣ်ဆီလီၤ လၢၢ်ဖးဒိၣ်တဖၣ် ဒီးဖှူဝါထီၣ်အီၤလၢ ထူၣ်လီၤ.+ ၃ ဖဲသုခီဂာ် ထံကျိယၢ်ဒ့ၣ်ဝံၤအခါ သုကဘၣ်ကွဲးလီၤ တၢ်ကတိၤခဲလၢာ် လၢအပၣ်ဃုာ်လၢ တၢ်သိၣ်တၢ်သီအံၤအပူၤ* လၢလၢၢ်တဖၣ်အံၤ အလိၤလီၤ. သုမၤဒ်န့ၣ်မ့ၢ်ဝံၤမး သုလဲၤနုာ်လီၤဘၣ်လၢ ကီၢ်လၢ သုကစၢ်ယဟိဝၤယွၤ ကဟ့ၣ်သုအပူၤ ကသ့လီၤ. ဒ်သုမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤ အၢၣ်လီၤသုအသိး ကီၢ်တဘ့ၣ်အံၤန့ၣ် တၢ်နုၢ်ထံဒီး ကနဲစီ ယွၤလီၤဝဲလၢ အပူၤလီၤ.+ ၄ ဖဲသုခီဂာ် ထံကျိယၢ်ဒ့ၣ်အခါ သုကဘၣ်ဆီလီၤ လၢၢ်တဖၣ်အံၤလၢ ကစၢၢ်ဧ့ၤဘါလး အလိၤ+ ဒီးဖှူဝါထီၣ်အီၤ လၢထူၣ် ဒ်ယမၤလိာ်သု လၢတနံၤအံၤအသိးလီၤ. ၅ သုကဘၣ်တ့ထီၣ် တၢ်လုၢ်လီၢ်လၢလၢၢ် လၢသုကစၢ် ယဟိဝၤယွၤ အဂီၢ်ဖဲန့ၣ်လီၤ. သုတဘၣ်သူ တၢ်ပီးတၢ်လီထး ဒ်သိး သုကမၤတဲာ် လၢၢ်တဖၣ်အံၤအဂီၢ်ဘၣ်.+ ၆ သုကဘၣ်တ့ထီၣ် သုကစၢ် ယဟိဝၤယွၤ အတၢ်လုၢ်လီၢ်လၢ လၢၢ်လၢအတဘၣ် တၢ်ကူးတဲာ်အီၤဘၣ်တဖၣ် ဒီးသုကဘၣ်လုၢ်ထီၣ် တၢ်လုၢ်ဒွဲၣ်အူတဖၣ် လၢသုကစၢ် ယဟိဝၤယွၤအအိၣ် လၢတၢ်လုၢ်လီၢ်အံၤ အဖီခိၣ်လီၤ. ၇ ဒီးသုကဘၣ်လုၢ်ထီၣ် တၢ်လုၢ်အိၣ်ဃူအိၣ်ဖိးတဖၣ်+ ဒီးအီၣ်အီၤဖဲန့ၣ်+ ဒီးသုက သူၣ်ဖှံသးညီလၢ သုကစၢ် ယဟိဝၤယွၤ အမဲာ်ညါလီၤ.+ ၈ ဒီးသုကဘၣ်ကွဲးလီၤ တၢ်ကတိၤခဲလၢာ်လၢ အအိၣ်လၢ တၢ်သိၣ်တၢ်သီအံၤအပူၤ* လၢလၢၢ်တဖၣ်န့ၣ်အလိၤ ၡဲၡဲလီၤ.”+
၉ စီၤမိၤၡ့ ဒီးပှၤလုၢ်တၢ်ဒိၣ်တဖၣ်* တဲတၢ်ဒီး ပှၤအံၣ်စရ့လးဖိ ခဲလၢာ် ဒီးတဲဝဲလၢ “အိ ပှၤအံၣ်စရ့လးဖိသ့ၣ်ဧၢ, အိၣ်ဘှီၣ် ဒီးဒိကနၣ်တက့ၢ်. တနံၤအံၤန့ၣ် သုကဲထီၣ် သုကစၢ် ယဟိဝၤယွၤ အပှၤဂီၢ်မုၢ်လံ.+ ၁၀ သုကဘၣ် ဒိကနၣ် သုကစၢ် ယဟိဝၤယွၤ အကလုၢ် ဒီးအိၣ်မူမၤထွဲ အတၢ်မၤလိာ်+ ဒီးအတၢ်ဘျၢတဖၣ် လၢယမၤလိာ်သု လၢတနံၤအံၤလီၤ.”
၁၁ ဖဲတၢ်တနံၤန့ၣ် စီၤမိၤၡ့ မၤလိာ် ပှၤဂီၢ်မုၢ်တဖၣ်လၢ ၁၂ “ဖဲသုလဲၤခီဂာ် ထံကျိယၢ်ဒ့ၣ်အခါ စူၤမ့းအိၣ်အဒူၣ်, လ့ၤဝံအဒူၣ်, ယူဒၤအဒူၣ်, ယံးစၣ်ကၢ်အဒူၣ်, ယိၤသးအဒူၣ် ဒီးဘံၣ်ယၤမံၣ်အဒူၣ်န့ၣ် ကဘၣ်ဆၢထၢၣ်လၢ ကစၢၢ်ကရံးစံၣ်အလိၤ+ ဒ်သိးကဆိၣ်ဂ့ၤ ပှၤဂီၢ်မုၢ်တဖၣ်အဂီၢ်လီၤ. ၁၃ ဒီးရူၤဘ့ၣ်အဒူၣ်, ကးအဒူၣ်, အၤၡ့ၢ်အဒူၣ်, စဘူလိၣ်အဒူၣ်, ဒၣ်အဒူၣ် ဒီးနးသၤလံအဒူၣ်န့ၣ် ကဘၣ်ဆၢထၢၣ်လၢ ကစၢၢ်ဧ့ၤဘါလး အလိၤ+ ဒ်သိး ကတဲဖျါထီၣ် တၢ်ဆိၣ်အၢအဂီၢ်လီၤ. ၁၄ ဒီးပှၤလ့ၤဝံဖိတဖၣ်န့ၣ် ကဘၣ်တဲဝဲ ပှၤအံၣ်စရ့လးဖိ ခဲလၢာ်လၢ အကလုၢ်ဖးဒိၣ်လၢ+
၁၅ “‘ပှၤလၢအတ့ထီၣ် တၢ်ဂီၤတၢ်ဖှီၣ်+ ဒီးပာ်ခူသူၣ်ဝဲန့ၣ် မ်အဘၣ် တၢ်ဆိၣ်အၢတက့ၢ်. ပှၤစုသ့ဖိ* အစုတၢ်မၤတဖၣ်အံၤ မ့ၢ်တၢ်လၢ ယဟိဝၤယွၤ သးဘၣ်အၢဝဲလီၤ.’+ (ဒီးပှၤခဲလၢာ် ကစံးဆၢဝဲလၢ ‘အၤမ့ၣ်.’*)
၁၆ “‘ပှၤလၢ အတပာ်ကဲ အမိၢ်အပၢ်ဘၣ်န့ၣ် မ်အဘၣ် တၢ်ဆိၣ်အၢတက့ၢ်.’+ (ဒီးပှၤခဲလၢာ် ကစံးဆၢဝဲလၢ ‘အၤမ့ၣ်.’)
၁၇ “‘ပှၤလၢအသုးကွံာ် ပှၤလၢအဃၢၤတဖၣ် အဟီၣ်ခိၣ်အဆၢန့ၣ် မ်အဘၣ် တၢ်ဆိၣ်အၢတက့ၢ်.’+ (ဒီးပှၤခဲလၢာ် ကစံးဆၢဝဲလၢ ‘အၤမ့ၣ်.’)
၁၈ “‘ပှၤလၢ အမၤဝဲဒ်သိး ပှၤမဲာ်တထံၣ်တၢ် ကဟးဖျိးကျဲန့ၣ် မ်အဘၣ် တၢ်ဆိၣ်အၢတက့ၢ်.’+ (ဒီးပှၤခဲလၢာ် ကစံးဆၢဝဲလၢ ‘အၤမ့ၣ်.’)
၁၉ “‘ပှၤလၢ အစံၣ်ညီၣ်န့ၢ်တၢ်လၢ+ ပှၤထံဂၤကီၢ်ဂၤဖိ ဒီးပှၤဖိၣ်ဃဲ ဒီးမုၣ်ကမဲအဂီၢ် တတီတလိၤဘၣ်န့ၣ် မ်အဘၣ် တၢ်ဆိၣ်အၢတက့ၢ်.’+ (ဒီးပှၤခဲလၢာ် ကစံးဆၢဝဲလၢ ‘အၤမ့ၣ်.’)
၂၀ “‘ပှၤလၢအမံဃုာ်ဒီး အပၢ်အမါန့ၣ် မ့ၢ်ဝဲ အမၤမဲာ်ဆှးအပၢ်အဃိ မ်အဘၣ် တၢ်ဆိၣ်အၢတက့ၢ်.’+ (ဒီးပှၤခဲလၢာ် ကစံးဆၢဝဲလၢ ‘အၤမ့ၣ်.’)
၂၁ “‘ပှၤလၢအမံဃုာ်ဒီး ဆၣ်ဖိကီၢ်ဖိ တဒုဒုန့ၣ် မ်အဘၣ် တၢ်ဆိၣ်အၢတက့ၢ်.’+ (ဒီးပှၤခဲလၢာ် ကစံးဆၢဝဲလၢ ‘အၤမ့ၣ်.’)
၂၂ “‘ပှၤလၢအမံဃုာ်ဒီး အဒီပုၢ်ဝဲၢ်မုၣ် လၢအမ့ၢ် အပၢ် အဖိမုၣ်မ့ၢ်ဂ့ၤ, အမိၢ် အဖိမုၣ်မ့ၢ်ဂ့ၤန့ၣ် မ်အဘၣ် တၢ်ဆိၣ်အၢ တက့ၢ်.’+ (ဒီးပှၤခဲလၢာ် ကစံးဆၢဝဲလၢ ‘အၤမ့ၣ်.’)
၂၃ “‘ပှၤလၢအမံဃုာ်ဒီး အမံၤပှၢ်ပိာ်မုၣ်န့ၣ် မ်အဘၣ် တၢ်ဆိၣ်အၢတက့ၢ်.’+ (ဒီးပှၤခဲလၢာ် ကစံးဆၢဝဲလၢ ‘အၤမ့ၣ်.’)
၂၄ “‘ပှၤလၢအအိၣ်ခိး ခူသူၣ် ပှၤလၢအဃၢၤ ဒီးမၤသံအီၤန့ၣ် မ်အဘၣ် တၢ်ဆိၣ်အၢတက့ၢ်.’+ (ဒီးပှၤခဲလၢာ် ကစံးဆၢဝဲလၢ ‘အၤမ့ၣ်.’)
၂၅ “‘ပှၤလၢအတူၢ်လိာ် တၢ်ထီးကျိၣ်ထီးစ့* လၢပှၤကမၤသံ ပှၤလၢအတၢ်ကမၣ် တအိၣ်ဘၣ်န့ၣ် မ်အဘၣ် တၢ်ဆိၣ်အၢတက့ၢ်.’+ (ဒီးပှၤခဲလၢာ် ကစံးဆၢဝဲလၢ ‘အၤမ့ၣ်.’)
၂၆ “‘ပှၤလၢ အတအိၣ်မူမၤထွဲ တၢ်သိၣ်တၢ်သီအံၤဘၣ်န့ၣ်* မ်အဘၣ် တၢ်ဆိၣ်အၢတက့ၢ်.’+ (ဒီးပှၤခဲလၢာ် ကစံးဆၢဝဲလၢ ‘အၤမ့ၣ်.’)
၂၈ “သုမ့ၢ်ဒိကနၣ် သုကစၢ် ယဟိဝၤယွၤ အကလုၢ် သပှၢ်ကတၢၢ် ခီဖျိလၢ သုမၤထွဲ တၢ်မၤလိာ်ခဲလၢာ် လၢယမၤလိာ်သု လၢတနံၤအံၤ လီၤတံၢ်လီၤဆဲးန့ၣ် သုကစၢ် ယဟိဝၤယွၤ ကပာ်ထီၣ်ထီသုလၢ ပှၤကလုာ်ခဲလၢာ် လၢဟီၣ်ခိၣ်ချၢအဖီခိၣ် သပှၢ်ကတၢၢ်လီၤ.+ ၂ သုမ့ၢ်ဆဲးဒိကနၣ် သုကစၢ် ယဟိဝၤယွၤ အကလုၢ်န့ၣ် တၢ်ဆိၣ်ဂ့ၤတဖၣ်အံၤ ကလီၤဘၣ်သု အါအါဂီၢ်ဂီၢ်လီၤ.+
၃ “လၢဝ့ၢ်ပူၤမ့ၢ်ဂ့ၤ, လၢခိခိၣ်မ့ၢ်ဂ့ၤ သုကဒိးန့ၢ်ဘၣ် တၢ်ဆိၣ်ဂ့ၤလီၤ.+
၄ “သုကဘၣ်ဆိၣ်ဂ့ၤ ခီဖျိ သုကဒိးန့ၢ်ဘၣ် သုဖိတဖၣ်,+ သုဟီၣ်ခိၣ်အတၤသၣ် ဒီးသုကျီၢ်ဖိ ဒီးသိဖိ အါအါဂီၢ်ဂီၢ်လီၤ.+
၅ “အဝဲကဆိၣ်ဂ့ၤ သုနာ်*+ ဒီးသုတၢ်စံၢ်ကိၣ် အကျိးလီၤ.+
၆ “သုကဘၣ်ဆိၣ်ဂ့ၤ လၢတၢ်လၢ သုမၤအီၤခဲလၢာ်အပူၤလီၤ.
၇ “ဒုၣ်ဒါတဖၣ်လၢ အဟဲဒုးသုန့ၣ် ယဟိဝၤယွၤ ကမၤနၢၤကွံာ် အဝဲသ့ၣ် လၢသုမဲာ်ညါလီၤ.+ အဝဲသ့ၣ် ကဟဲထီၣ်ဒုးသု လၢကျဲတဘိဃီ ဘၣ်ဆၣ် အဝဲသ့ၣ် ကက့ၤဃ့ၢ်မုၢ်ပြံပြါဝဲလၢ ကျဲနွံဘိလီၤ.+ ၈ ယဟိဝၤယွၤ ကဆိၣ်ဂ့ၤ သုဘုဖီတဖၣ် ဒီးတၢ်လၢ သုမၤအီၤခဲလၢာ်လီၤ.+ သုကစၢ် ယဟိဝၤယွၤ ကဆိၣ်ဂ့ၤသုဖဲ ကီၢ်လၢအက ဟ့ၣ်လီၤသုအပူၤ သပှၢ်ကတၢၢ်လီၤ. ၉ သုမ့ၢ် ဆဲးဒိကနၣ် သုကစၢ် ယဟိဝၤယွၤ အကလုၢ် ဒီးမၤအတၢ်ဘၣ်သးန့ၣ် ယဟိဝၤယွၤ ကဒုးကဲထီၣ်သု လၢအပှၤစီဆှံ တကလုာ်+ ဒ်အအၢၣ်လီၤသုအသိးလီၤ.+ ၁၀ ပှၤဟီၣ်ခိၣ်ဖိခဲလၢာ် ကထံၣ်ဘၣ်ဝဲလၢ သုဘၣ်တၢ်ကိးသု လၢယဟိဝၤယွၤအမံၤ+ ဒီးအဝဲသ့ၣ် ကပျံၤသုလီၤ.+
၁၁ “လၢကီၢ်လၢ ယဟိဝၤယွၤ အၢၣ်လီၤ သုမိၢ်ပၢ်ဖံဖု လၢပျၢၤတဖၣ် လၢအကဟ့ၣ်လီၤသု အပူၤန့ၣ်+ ယဟိဝၤယွၤ ကဟ့ၣ်လီၤသု လၢသုဖိ အါအါဂီၢ်ဂီၢ်, သုဆၣ်ဖိကီၢ်ဖိ ဒီးသုဟီၣ်ခိၣ် အတၤသူတၤသၣ် အါအါဂီၢ်ဂီၢ်လီၤ.+ ၁၂ ယဟိဝၤယွၤ ကအိးထီၣ်န့ၢ်သုမူခိၣ် ဒ်ပှၤတဂၤ အိးထီၣ်ဝဲ အဘုဖီလၢ အဂ့ၤတဖျၢၣ် ဒ်သိးသုကီၢ် ကဒိးန့ၢ်ဘၣ် တၢ်စူၤထံလၢ အဆၢကတီၢ်ဒၣ်ဝဲ+ ဒီးဒ်သိး ကဆိၣ်ဂ့ၤသုလၢ တၢ်လၢသုမၤအီၤ ခဲလၢာ်အပူၤလီၤ. သုကဟ့ၣ်လိၢ်တၢ်လၢ ပှၤကလုာ်အဂၤတဖၣ် ဒီးသုတလိၣ် ဃ့လိၢ်တၢ်ဘၣ်.+ ၁၃ သုမ့ၢ်ဆဲးဒိကနၣ် သုကစၢ် ယဟိဝၤယွၤ အတၢ်မၤလိာ်တဖၣ်လၢ ယမၤလိာ်သု တနံၤအံၤ လၢသုကဘၣ်ဒိကနၣ်အီၤ ဒီးမၤထွဲအီၤန့ၣ် ယဟိဝၤယွၤ ကဒုးကဲထီၣ်သုလၢ တၢ်အခိၣ် ဒီးတမ့ၢ်လၢ တၢ်အခံမဲၢ်ဘၣ်. ဒီးသုကအိၣ်ဘၣ်လၢ ပှၤဖီခိၣ်+ ဒီးသုတအိၣ်ဘၣ်လၢ ပှၤဖီလာ်ဘၣ်. ၁၄ တၢ်မၤလိာ်တဖၣ်လၢ ယမၤလိာ်သု လၢတနံၤအံၤန့ၣ် သုတဘၣ် လဲၤကပာ်ကွံာ်အီၤလၢ စုစ့ၣ်မ့ၢ်ဂ့ၤ စုထွဲမ့ၢ်ဂ့ၤဘၣ်,+ သုတဘၣ်မၤ ယွၤအဂၤတဖၣ် အတၢ်ဘၣ်.+
၁၅ “ဘၣ်ဆၣ် သုမ့ၢ်တဒိကနၣ် သုကစၢ် ယဟိဝၤယွၤ အကလုၢ် ခီဖျိ သုတအိၣ်မူမၤထွဲ အတၢ်မၤလိာ်ခဲလၢာ် ဒီးအတၢ်သိၣ်တၢ်သီ လၢယမၤလိာ်သု လၢတနံၤအံၤဘၣ်န့ၣ် တၢ်ဆိၣ်အၢတဖၣ်အံၤ ကလီၤဘၣ်လၢသုလိၤ ခဲလၢာ်လီၤ.+
၁၆ “လၢဝ့ၢ်ပူၤမ့ၢ်ဂ့ၤ, လၢခိခိၣ်မ့ၢ်ဂ့ၤ သုကဘၣ် ဆိၣ်အၢလီၤ.+
၁၇ “အဝဲကဆိၣ်အၢ သုနာ်+ ဒီးသုတၢ်စံၢ်ကိၣ် အကျိးလီၤ.+
၁၈ “သုကဘၣ်ဆိၣ်အၢ ခီဖျိ သုကဒိးန့ၢ်ဘၣ် သုဖိတဖၣ်,+ သုဟီၣ်ခိၣ် အတၤသၣ် ဒီးသုကျီၢ်ဖိ ဒီးသိဖိ ထဲစှၤစှၤဖိလီၤ.+
၁၉ “သုကဘၣ်ဆိၣ်အၢ လၢတၢ်လၢ သုမၤအီၤခဲလၢာ် အပူၤလီၤ.
၂၀ “ယဟိဝၤယွၤ ကဒုးလီၤဘၣ် တၢ်ဆိၣ်အၢလၢ သုလိၤ ဒီးသုခိၣ်နူာ် ကဘံဘူ ဒီးသုကဘၣ် တၢ်သိၣ်ဃီၣ်သုလၢ တၢ်လၢသုမၤအီၤ ခဲလၢာ်အပူၤ အဃိ သုကဟးဂီၤကွံာ် ချ့ချ့လီၤ. တၢ်ကကဲထီၣ်အသးဒ်န့ၣ် ခီဖျိလၢ သုမၤတၢ်အၢဒီး သုပာ်တ့ၢ်ကွံာ်အီၤ* အဃိလီၤ.+ ၂၁ လၢကီၢ်လၢ သုကလဲၤမၤန့ၢ်အီၤ အပူၤန့ၣ် ယဟိဝၤယွၤ ကဒုးဘၣ်သုလၢ တၢ်ဆူးတၢ်ဆါလၢ အလီၤပျံၤလီၤဖုး တုၤလၢ သုသံခဲလၢာ်လီၤ.+ ၂၂ ယဟိဝၤယွၤ ကသိၣ်ဃီၣ်သုလၢ တၢ်ပသိၣ်ဆါ, တၢ်လိၤကိၢ်ဒိၣ်ဒိၣ်,+ တၢ်ညိး, တၢ်လိၤကိၢ် အတၢ်ဆါ, တၢ်ဒုး,+ တၢ်မုၢ်တၢ်ဘိ ဟးဂီၤ, ဘုအဃၢ်လီၤ+ ဒီးသုကတူၢ်ဘၣ် တၢ်သ့ၣ်တဖၣ်အံၤ တုၤလၢ သုသံလီၤ. ၂၃ ယကကးတံာ်ဃာ် သုမူခိၣ်* ဒ်သိး တၢ်သုတစူၤလီၤတဂ့ၤအဂီၢ် ဒီးယတဒုးမဲထီၣ် သၣ်ထီၣ်တၢ် လၢသုဟီၣ်ခိၣ်လိၤဘၣ်.*+ ၂၄ ယဟိဝၤယွၤ ကဒုးစူၤလီၤန့ၢ်သု လၢမဲး ဒီးဖၣ်ဆါကမူၣ် လၢမူခိၣ် တုၤလၢ သုဟးဂီၤကွံာ်လီၤ. ၂၅ ယဟိဝၤယွၤ ကပျဲလၢ သုဒုၣ်သုဒါ ကမၤနၢၤသုလီၤ.+ သုကလဲၤထီၣ်ဒုး အဝဲသ့ၣ် လၢကျဲတဘိဃီ ဘၣ်ဆၣ် သုကက့ၤ ဃ့ၢ်မုၢ်ပြံပြါလၢ ကျဲနွံဘိလီၤ. ဘီမုၢ်ခဲလၢာ်လၢ ဟီၣ်ခိၣ်ချၢန့ၣ် ဖဲအထံၣ်ဘၣ် တၢ်အၢတၢ်သီလၢ အလီၤဘၣ်သုအခါ အဝဲသ့ၣ် ကပျံၤတၢ်ဒိၣ်မးလီၤ.+ ၂၆ သုစိၣ်တဖၣ်န့ၣ် ကကဲထီၣ် ထိၣ်လၢမူခိၣ်တဖၣ် ဒီးဆၣ်ဖိကီၢ်ဖိလၢ ဟီၣ်ခိၣ်တဖၣ် အတၢ်အီၣ်လီၤ. ဒီးပှၤလၢ အကနီဟးထီၣ်ကွံာ်အီၤန့ၣ် တအိၣ်နီတဂၤဘၣ်.+
၂၇ “ယဟိဝၤယွၤ ကသိၣ်ဃီၣ်သုလၢ ကီၢ်အဲၤကူပတူး အတၢ်ဝ့, အ့ၣ်ကီၢ်တၢ်ဆါ, တၢ်သးဃ့ ဒီးတၢ်ပူၤလီၢ်လၢ ဖံးဘ့ၣ်အလိၤ လၢသုမၤဘျါအီၤ တန့ၢ်ဘၣ်န့ၣ်လီၤ. ၂၈ ယဟိဝၤယွၤ ကသိၣ်ဃီၣ်သု တုၤလၢသုလီၤဂာ် ပှၤပျုၢ် ဒီးပှၤမဲာ် တထံၣ်တၢ်ဘၣ်+ ဒီးသုခိၣ်နူာ် ကဘံဘူလီၤ. ၂၉ သုကဟး ပလၢၢ်တၢ်လၢ မုၢ်ဆါခီ ဒ်ပှၤမဲာ်တထံၣ်တၢ် ဟးပလၢၢ်တၢ်လၢ တၢ်ခံးကျါအသိး+ ဒီးတၢ်လၢ သုမၤအီၤ တမံၤဂ့ၤ တမံၤဂ့ၤန့ၣ် တကဲထီၣ်လိၣ်ထီၣ်ဘၣ်. ထီဘိန့ၣ် ပှၤကလံၣ်အီၣ်လီအီၣ်သု ဒီးကတမျာ်သု ဘၣ်ဆၣ် ပှၤလၢ အမၤပူၤဖျဲးသု တအိၣ်နီတဂၤဘၣ်.+ ၃၀ သုမ့ၢ်ဘၣ် တၢ်အဲၣ်တီသုဒီး ပိာ်မုၣ်တဂၤ ဘၣ်ဆၣ် ပှၤအဂၤတဂၤ ကဖီၣ်ဆူၣ်အီၤလီၤ. သုမ့ၢ်သူၣ်ထီၣ် ဟံၣ်ဘၣ်ဆၣ် သုတအိၣ်ဘၣ်လၢ အပူၤဘၣ်.+ သုမ့ၢ်သူၣ်လီၤ စပံးတကျီး ဘၣ်ဆၣ် သုတအီၣ်ဘၣ် အသၣ်ဘၣ်.+ ၃၁ ပှၤကမၤသံ သုကျီၢ်ဖါ လၢသုမဲာ်ညါ ဒီးသုတအီၣ်ဘၣ်အီၤ နီတစဲးဘၣ်. ပှၤကဟုၣ်န့ၢ် သုကသ့ၣ်ယီၤ လၢသုမဲာ်ညါ ဒီးသုတဒိးန့ၢ်ဘၣ်က့ၤအီၤဘၣ်. သုဒုၣ်သုဒါတဖၣ် ကဟံးန့ၢ် သုသိ ဒီးပှၤလၢအကမၤစၢၤသု တအိၣ်ဘၣ်. ၃၂ ပှၤအဂၤ ကဟံးန့ၢ် သုဖိမုၣ်ဖိခွါတဖၣ် လၢသုမဲာ်ညါ+ ဒီးသုကခိးကွၢ်လၢ် အဝဲသ့ၣ် အကျဲထီဘိ ဘၣ်ဆၣ် သုမၤတသ့ နီတမံၤဘၣ်. ၃၃ သုဟီၣ်ခိၣ် အတၤသၣ် ဒီးတၢ်လၢ အမဲထီၣ်သၣ်ထီၣ် ခဲလၢာ်န့ၣ် ပှၤလၢ သုတသ့ၣ်ညါဘၣ်တဖၣ် ကအီၣ်ဝဲ+ ဒီးသုကဘၣ် တၢ်လံၣ်အီၣ်လီအီၣ်သု ဒီးပှၤကမၤနၢၤအီၣ်ဃီၣ်သု ထီဘိလီၤ. ၃၄ ခီဖျိ တၢ်လၢသုထံၣ်အီၤတဖၣ်အဃိ သုကကဲထီၣ် ဒ်တၢ်ပျုၢ်အသိးလီၤ.
၃၅ “ယဟိဝၤယွၤ ကသိၣ်ဃီၣ်သုလၢ တၢ်ဝ့လၢ အဆါဒိၣ်မး ဒီးအဘျါတန့ၢ်ဘၣ် လၢသုခီၣ်လ့ၣ်ခိၣ် ဒီးသုခီၣ်တဖၣ်အလိၤ ဒီးစးထီၣ်လၢ သုခိၣ်တုၤလၢသုခီၣ်လီၤ. ၃၆ သုဒီးသုစီၤပၤ လၢသုကပာ်ထီၣ်အီၤ လၢသုဖီခိၣ်န့ၣ် ယဟိဝၤယွၤ ကနီဟးထီၣ်ကွံာ်သုဆူ ပှၤတကလုာ်လၢ သုဒီးသုမိၢ်ပၢ်ဖံဖု လၢပျၢၤတဖၣ် တသ့ၣ်ညါအီၤဘၣ် အအိၣ်လီၤ.+ ဒီးဖဲန့ၣ်န့ၣ် သုကဘၣ်မၤ ယွၤအဂၤတဖၣ် လၢအမ့ၢ် ယွၤသ့ၣ် ဒီးယွၤလၢၢ် အတၢ်လီၤ.+ ၃၇ ဖဲယဟိဝၤယွၤ နီဟးထီၣ်ကွံာ်သု ဒီးသုလဲၤတုၤလၢ တၢ်လီၢ်အဂၤအခါ ပှၤလၢ အအိၣ်ဖဲန့ၣ်တဖၣ်န့ၣ် ကပျံၤတၢ် ခီဖျိ တၢ်လၢ အကဲထီၣ်အသးဒီးသု အဃိလီၤ. ဒီးအဝဲသ့ၣ် ကဆိကမိၣ်ဆံးသု ဒီးကတဲဆါသုလီၤ.+
၃၈ “သုကဖှံလီၤ တၢ်ချံလၢ စံာ်ပူၤဒီဒူၣ် ဘၣ်ဆၣ် သုကဒိးန့ၢ်ဘၣ်က့ၤ ထဲတစဲးဖိ+ မ့ၢ်လၢ ဒွဲၣ်တဖၣ် ကဟဲအီၣ်ကွံာ်အီၤ အဃိလီၤ. ၃၉ သုကသူၣ်လီၤဖျးလီၤတၢ် လၢသုစပံးကျီးပူၤ ဘၣ်ဆၣ် သုတအီဘၣ် စပံးထံဘၣ် ဒီးသုတဒိးန့ၢ်ဘၣ် တၢ်နီတမံၤဘၣ်+ မ့ၢ်လၢ အဃၢ် ကအီၣ်အီၤ အဃိလီၤ. ၄၀ သ့ၣ်စၤယံး အထူၣ်တဖၣ် ကအိၣ်ဝဲလၢ သုဟီၣ်ကဝီၤ ဒီဘ့ၣ်အပူၤ ဘၣ်ဆၣ် မ့ၢ်လၢ အသၣ်တဖၣ် ကလီၤဆှုကွံာ်ဝဲ အဃိ တမ့ၢ်လၢ သုကဖှူဘၣ် သုလိၤဒီး အသိဘၣ်. ၄၁ သုဖိမုၣ်ဖိခွါတဖၣ် ကဟဲအိၣ်ဖျဲၣ်ထီၣ် ဘၣ်ဆၣ် တမ့ၢ်လၢ အဝဲသ့ၣ် ကဆဲးအိၣ်ဘၣ်ဒီးသုဘၣ် မ့ၢ်လၢ ပှၤကက့ၤဖီၣ် အဝဲသ့ၣ် အဃိလီၤ.+ ၄၂ သုသ့ၣ်ထူၣ်ခဲလၢာ် ဒီးသုဟီၣ်ခိၣ် အတၤသူတၤသၣ်တဖၣ်န့ၣ် ကအိၣ်ထဲ အဃၢ် လဲလဲလီၤ. ၄၃ ပှၤထံဂၤကီၢ်ဂၤဖိလၢ အအိၣ်လၢ သုကျါန့ၣ် အစိကမီၤ ကဒိၣ်ထီၣ်ဒိၣ်ထီၣ် ဒီးမ့မ့ၢ်သုန့ၣ် သုစိကမီၤ ကစှၤလီၤ စှၤလီၤလီၤ. ၄၄ အဝဲသ့ၣ် ကဟ့ၣ်လိၢ်တၢ် လၢသုအိၣ် ဒီးသုတဟ့ၣ်လိၢ်တၢ်လၢ အဝဲသ့ၣ် အအိၣ်ဘၣ်.+ အဝဲသ့ၣ် ကကဲထီၣ် တၢ်အခိၣ် ဒီးသုကကဲထီၣ် တၢ်အခံမဲၢ်လီၤ.+
၄၅ “သုမ့ၢ်တဒိကနၣ် သုကစၢ် ယဟိဝၤယွၤ အကလုၢ် ခီဖျိလၢ သုတမၤထွဲ အတၢ်မၤလိာ် ဒီးအတၢ်သိၣ်တၢ်သီတဖၣ် လၢအမၤလိာ်သုဘၣ်န့ၣ်+ သုကဘၣ်ဆိၣ်အၢ သပှၢ်ကတၢၢ်+ ဒီးတၢ်လၢအတဂ့ၤတဘၣ် ခဲလၢာ်အံၤ ကလီၤဘၣ်လၢ သုလိၤ တုၤလၢ သုသံခဲလၢာ်လီၤ.+ ၄၆ တၢ်သ့ၣ်တဖၣ်အံၤ ကလီၤဘၣ်သု ဒီးသုစၢၤသုသွဲၣ်တဖၣ် ဒီးကမ့ၢ်ဝဲ တၢ်ပနီၣ် ဒီးတၢ်ဟ့ၣ်ပလီၢ် အစိၤစိၤအဃၣ်ဃၣ်,+ ၄၇ မ့ၢ်လၢ ဖဲသု တၢ်အိၣ်အါအါဂီၢ်ဂီၢ် အခါ သုတမၤ သုကစၢ် ယဟိဝၤယွၤ အတၢ်လၢ တၢ်သူၣ်ဖှံသးညီ ဒီးတၢ်သးခု အပူၤဘၣ် အဃိလီၤ.+ ၄၈ ယဟိဝၤယွၤ ကဆှၢလီၤ သုဒုၣ်သုဒါ လၢအကဒုးသုလီၤ. ဒီးသုကဘၣ် မၤန့ၢ်တၢ်လၢ အဝဲသ့ၣ်အဂီၢ်+ ဖဲသုလီၤဘဲ,+ သုဘၣ်သးအီထံ, သုတၢ်ကူတၢ်သိး တယၢဘၣ်* ဒီးတၢ်အဂၤ တယၢလၢသုဂီၢ် နီတမံၤဘၣ် အခါလီၤ. အဝဲ ကတီၣ်ထီၣ် နီၣ်ယိးဘိထး လၢသုဖံဘၣ်ခိၣ် တုၤလၢ သုသံခဲလၢာ်လီၤ.
၄၉ “ယဟိဝၤယွၤ ကဆှၢလီၤဝဲ ပှၤတကလုာ်လၢ အအိၣ်ယံၤဒီးသု လၢအကဒုးသု အဂီၢ်လီၤ.+ အဝဲသ့ၣ် ကအိၣ်လၢ ဟီၣ်ခိၣ်အနၢၣ်အကတၢၢ်လီၤ. ဒီးပှၤတကလုာ် လၢသုတနၢ်ပၢၢ် အကျိာ်ဘၣ်အံၤန့ၣ်+ ကစှီၤသုဒ် လံာ်ကြီကြာ် အသိးလီၤ.+ ၅၀ ပှၤတကလုာ် လၢအသူၣ်အၢသးသီအံၤန့ၣ် တပာ်ကဲ ပှၤသးပှၢ်ဘၣ် ဒီးတသးကညီၤ ပှၤသးစၢ်ဘၣ်.+ ၅၁ အဝဲသ့ၣ် ကအီၣ်ဝဲ သုဆၣ်ဖိကီၢ်ဖိ အဒံၣ်အဖိတဖၣ် ဒီးသုဟီၣ်ခိၣ် အတၤသူတၤသၣ် တုၤလၢ သုသံခဲလၢာ်လီၤ. အဝဲသ့ၣ် တပာ်တ့ၢ် ဘု, စပံးထံအသီ, သိဧိၤချါဧိၤ, ကျီၢ်ဖိဒီးသိဖိ လၢသုဂီၢ် နီတစဲးဘၣ်. အဝဲသ့ၣ် ကမၤဝဲဒ်န့ၣ် တုၤလၢ သုသံခဲလၢာ်လီၤ.+ ၅၂ အဝဲသ့ၣ် ကကဝီၤဃာ်သု ဒီးတပျဲဟးထီၣ်သုလၢ သုဝ့ၢ်ခဲလၢာ်လၢ သုကီၢ်ပူၤဘၣ်. ဒီးသုဝ့ၢ်ဒူၣ် လၢအထီ ဒီးအကျၢၤ လၢသုနာ်န့ၢ်အီၤတဖၣ် ကလီၤပှီၢ်ကွံာ်ဝဲလီၤ. လၢကီၢ်လၢ ယဟိဝၤယွၤ ဟ့ၣ်လီၤသု အပူၤန့ၣ် အဝဲသ့ၣ် ကကဝီၤဃာ်ဝဲ သုဝ့ၢ်ခဲလၢာ် လၢသုအိၣ်လၢအပူၤ သပှၢ်ကတၢၢ်လီၤ.+ ၅၃ မ့ၢ်လၢ သုဒုၣ်သုဒါတဖၣ်အံၤ ကကဝီၤဃာ် သုဝ့ၢ်တဖၣ် ဒီးကမၤကီမၤခဲသု နးမးအဃိ သုဖိမုၣ်ဖိခွါတဖၣ်+ လၢသုကစၢ် ယဟိဝၤယွၤ ဟ့ၣ်လီၤသုန့ၣ် သုကအီၣ်ကွံာ် အဝဲသ့ၣ်အညၣ်လီၤ.
၅၄ “ပိာ်ခွါလၢ အသူၣ်ကပုာ်သးကပုာ် ဒိၣ်ကတၢၢ် ဒီးလၢအသးဘၣ်ဒိ ညီကတၢၢ်တဂၤလၢ သုကျါဒၣ်လဲာ် တသးကညီၤဝဲ အဒီပုၢ်ဝဲၢ်ခွါ ဒီးအမါလၢ အအဲၣ်ဝဲ ဒီးအဖိခွါလၢ အအိၣ်တ့ၢ်တဖၣ်လၢၤဘၣ်. ၅၅ ဒီးမ့ၢ်လၢ သုဒုၣ်သုဒါတဖၣ် ကကဝီၤဃာ် သုဝ့ၢ်တဖၣ် ဒီးကမၤကီမၤခဲ ပှၤအိၣ်လၢသုဝ့ၢ်ပူၤတဖၣ် နးမးအဃိ ပိာ်ခွါတဂၤအံၤ ကအီၣ်တၢ်အဂီၢ် တၢ်တအိၣ်နီတမံၤလၢၤဘၣ်. အဝဲ ကအီၣ်က့ၤဝဲ အဖိအညၣ် ဘၣ်ဆၣ် အတဒုးအီၣ် ပှၤဂၤနီတစဲးဘၣ်.+ ၅၆ ပိာ်မုၣ်လၢ အသူၣ်ကပုာ်သးကပုာ် ဒိၣ်ကတၢၢ် ဒီးလၢအသးဘၣ်ဒိ ညီကတၢၢ် တုၤဒၣ်လဲာ် အယီၢ်လီၤဟီၣ်ခိၣ်မး တဘူၣ်ဘၣ် တဂၤန့ၣ်+ တသးကညီၤဝဲ အဝၤလၢ အအဲၣ်ဝဲ ဒီးအဖိမုၣ်ဖိခွါ နီတစဲးလၢၤဘၣ်. ၅၇ မ့ၢ်လၢ သုဒုၣ်သုဒါတဖၣ် ကကဝီၤဃာ် သုဝ့ၢ်တဖၣ် ဒီးကမၤကီမၤခဲ ပှၤအိၣ်လၢသုဝ့ၢ်ပူၤတဖၣ် နးမးအဃိ ပိာ်မုၣ်တဂၤအံၤ တသးကညီၤ အဖိခွါလၢ အအိၣ်ဖျဲၣ်ထီၣ် သီသီဒၣ်လဲာ်ဘၣ် ဒီးအဝဲ ကအီၣ်ခူသူၣ်ဝဲ အဖိခွါ ဃုာ်ဒီး အဟံၣ်လီၢ်* လၢအဟးထီၣ်လၢ အခီၣ်ကဆူးလီၤ.
၅၈ “သုမ့ၢ်တမၤထွဲ တၢ်ကတိၤခဲလၢာ်လၢ အအိၣ်လၢ တၢ်သိၣ်တၢ်သီအံၤအပူၤ* လၢအဘၣ်တၢ်ကွဲးလီၤအီၤလၢ လံာ်တဘ့ၣ်အံၤအပူၤဘၣ်+ ဒီးသုမ့ၢ်တပာ်ကဲ သုကစၢ် ယဟိဝၤယွၤ အမံၤလၢ+ အအိၣ်ဒီးအလၤကပီၤ ဒီးအလီၤယူးယီၣ်ပာ်ကဲဘၣ်န့ၣ်+ ၅၉ ယဟိဝၤယွၤ ကဒုးလီၤဘၣ် တၢ်နးတၢ်ဖှီၣ်ဖးဒိၣ်တဖၣ် ဒီးတၢ်ဆူးတၢ်ဆါ ယံာ်ယံာ်ထၢထၢ လၢအနးဒိၣ်မးတဖၣ် လၢသုဒီးသုဖိသုလံၤ အဖီခိၣ်လီၤ.+ ၆၀ အဲၤကူပတူး အတၢ်ဆူးတၢ်ဆါ ခဲလၢာ်လၢ သုပျံၤအီၤတဖၣ်န့ၣ် အဝဲ ကဒုးလီၤဘၣ်လၢ သုလိၤ ဒီးတၢ်ဆါတဖၣ်အံၤ ကဘၣ်သု သပှၢ်ကတၢၢ်လီၤ. ၆၁ တကးဒံးဘၣ် တၢ်ဆူးတၢ်ဆါ ဒီးတၢ်နးတၢ်ဖှီၣ် ကိးမံၤဒဲးလၢ ပှၤတကွဲးလီၤအီၤ လၢတၢ်သိၣ်တၢ်သီအံၤ* အပူၤဘၣ်န့ၣ် ယဟိဝၤယွၤ ကဒုးလီၤဘၣ်အီၤလၢသုဖီခိၣ် တုၤလၢ သုသံခဲလၢာ်လီၤ. ၆၂ သုမ့ၢ်တဒိကနၣ် သုကစၢ် ယဟိဝၤယွၤ အကလုၢ်ဘၣ်န့ၣ် သုနီၣ်ဂံၢ် မ့ၢ်အိၣ်အါထဲသိးဒီး ဆၣ်တဖၣ်+ ဘၣ်ဆၣ် သုကအိၣ်တ့ၢ်က့ၤထဲ တစဲးဖိလီၤ.+
၆၃ “ဒီးဒ်လၢညါ ယဟိဝၤယွၤ အဲၣ်ဒိးဒုးဘီၣ်ထီၣ်ညီထီၣ်သု ဒီးမၤအါထီၣ်သုအသိး ယဟိဝၤယွၤ ကအဲၣ်ဒိး မၤဟးဂီၤသု ခဲလၢာ်ခဲဆ့လီၤ. ဒီးတၢ်ကထဲးထီၣ်ကွံာ်သုလၢ ကီၢ်လၢ သုကလဲၤအိၣ်တဘ့ၣ်အံၤ အပူၤလီၤ.
၆၄ “ယဟိဝၤယွၤ ကမၤလီၤပြံလီၤပြါသုလၢ ပှၤကလုာ်တဖၣ် အကျါ စးထီၣ်လၢ ဟီၣ်ခိၣ်အနၢၣ် အကတၢၢ် လၢအံၤတကပၤ တုၤလၢ ဟီၣ်ခိၣ်အနၢၣ်အကတၢၢ် လၢအဝဲတကပၤလီၤ.+ ဒီးဖဲန့ၣ်န့ၣ် ယွၤအဂၤတဖၣ် လၢအမ့ၢ် ယွၤသ့ၣ် ဒီးယွၤလၢၢ် လၢသုဒီးသုမိၢ်ပၢ်ဖံဖု လၢပျၢၤတဖၣ် တသ့ၣ်ညါအီၤဘၣ်န့ၣ် သုကဘၣ်မၤ အတၢ်လီၤ.+ ၆၅ ဒီးလၢ ပှၤကလုာ်တဖၣ်န့ၣ် အကျါန့ၣ် သုတအိၣ်ဒီး တၢ်မုာ်တၢ်ခုၣ်ဘၣ်+ ဒီးတၢ်အိၣ်ဘှံးအလီၢ် လၢသုဂီၢ်န့ၣ် တအိၣ်ဘၣ်. လၢတၢ်န့ၣ်အလီၢ် ယဟိဝၤယွၤ ကဟ့ၣ်လီၤသုလၢ သးလၢအပှဲၤဒီး တၢ်သူၣ်ကိၢ်သးဂီၤ,+ မဲာ်ချံလၢ အကဒု ဒီးတၢ်သူၣ်ပျံၤသးဖုးလီၤ.+ ၆၆ သုတၢ်အိၣ်မူ ကပှဲၤဒီး တၢ်လီၤဘၣ်ယိၣ်ဖးဒိၣ် ဒီးသုကဘၣ် ပျံၤတၢ်ဖုးတၢ်လၢ မုၢ်ဆါတုၤလၢမုၢ်နၤ ဒီးသုကဆဲးမူဧါ တမူဧါ သုတသ့ၣ်ညါဘၣ်. ၆၇ မ့ၢ်လၢ သုသးပူၤ ကပှဲၤဝဲဒီး တၢ်ပျံၤတၢ်ဖုး ဒီးတၢ်လၢ သုကထံၣ်ဘၣ်အီၤ လၢသုမဲာ်ချံတဖၣ်အဃိ ဖဲဂီၤခီန့ၣ် သုကတဲလၢ ‘မုၢ်ကဟါလီၤ ဆံးယံာ်လဲၣ်’ ဒီးဖဲဟါလီၤခီန့ၣ် သုကတဲလၢ ‘မုၢ်ကဝါထီၣ် ဆံးယံာ်လဲၣ်.’ ၆၈ ယဟိဝၤယွၤ ကဆှၢက့ၤသုလၢ ကီၢ်အဲၤကူပတူးအပူၤ လၢကဘီ ဒီးကဆှၢသုလၢ ကျဲလၢ ယတဲသုလၢ ‘သုတထံၣ်ဘၣ် ကဒီးအီၤ နီတဘျီလၢၤဘၣ်’ န့ၣ်လီၤ. ဖဲန့ၣ်န့ၣ် သုကဘၣ် ဆါလီၤကွံာ်သုသးလၢ သုဒုၣ်သုဒါ အစုပူၤ ဒ်ကုၢ်ပိာ်မုၣ် ကုၢ်ပိာ်ခွါတဖၣ်အသိး ဘၣ်ဆၣ် ပှၤပှ့ၤသုတအိၣ် နီတဂၤဘၣ်.”
၂၉ ကစၢ်ယွၤ မၤတ့ၢ် တၢ်အၢၣ်လီၤအီလီၤဒီး ပှၤအံၣ်စရ့လးဖိတဖၣ် လၢဃိၤရ့းလီၤ. ဖဲကီၢ်မိၤအးအပူၤ စ့ၢ်ကီး ယဟိဝၤယွၤ မၤလိာ်စီၤမိၤၡ့ လၢကမၤဝဲ တၢ်အၢၣ်လီၤအီလီၤဒီး ပှၤအံၣ်စရ့လးဖိတဖၣ် ဒ်အံၤလီၤ.+
၂ စီၤမိၤၡ့ ကိးဖှိၣ် ပှၤအံၣ်စရ့လးဖိ ခဲလၢာ် ဒီးတဲဝဲလၢ “လၢကီၢ်အဲၤကူပတူး အပူၤန့ၣ် သုထံၣ်ဘၣ် တၢ်ခဲလၢာ်လၢ ယဟိဝၤယွၤမၤဝဲ ဖၤရိၤ ဒီးအခ့အပှၤခဲလၢာ် ဒီးအကီၢ်ဒီဘ့ၣ်န့ၣ်လီၤ.+ ၃ တၢ်စံၣ်ညီၣ်လၢအနး လၢအမ့ၢ် တၢ်ပနီၣ်လီၤလးဖးဒိၣ် ဒီးတၢ်လီၤလးတဖၣ်န့ၣ် သုထံၣ်ဘၣ်အီၤလၢ သုမဲာ်လီၤ.+ ၄ ဘၣ်ဆၣ် ယဟိဝၤယွၤ တဟ့ၣ်လီၤသု သးလၢ အသ့ၣ်ညါနၢ်ပၢၢ်တၢ်, မဲာ်ချံလၢ အထံၣ်တၢ် ဒီးနၢ်လၢ အနၢ်ဟူတၢ်ဘၣ် တုၤလီၤလၢ မုၢ်မဆါတနံၤအံၤလီၤ.+ ၅ ‘ဖဲယဟံးစုနဲၣ်ကျဲသု လၢပှၢ်လၢ်ကျါ အနံၣ် ၄၀ အတီၢ်ပူၤန့ၣ်+ သုတၢ်ကူတၢ်ကၤ ဒီးသုခီၣ်ဖံးတဖၣ် တလီၢ်လံၤဘၣ်.+ ၆ သုတအီၣ်ဘၣ် ကိၣ် ဒီးသုတအီဘၣ် စပံးထံ ဒီးတၢ်လၢ အပၣ်ဃုာ်ဒီးသံး တမံၤဂ့ၤတမံၤဂ့ၤဘၣ်. ဘၣ်ဆၣ် ယကွၢ်ထွဲသု ဒ်သိး သုကသ့ၣ်ညါလၢ ယမ့ၢ်သုကစၢ် ယဟိဝၤယွၤလီၤ.’ ၇ လၢခံ သုဟဲတုၤလၢ တၢ်လီၢ်ဖဲအံၤ ဒီးဃ့ၡဘိၣ် အစီၤပၤ စံဃိၣ်+ ဒီးဘၤၡၣ်အစီၤပၤဧိာ်+ ဟဲထီၣ်ဒုးပှၤ ဘၣ်ဆၣ် ပမၤနၢၤကွံာ် အဝဲသ့ၣ်လီၤ.+ ၈ ဒီးပမၤန့ၢ် အဝဲသ့ၣ် အတၢ်လီၢ်တၢ်ကျဲ ဒီးပဟ့ၣ်လီၤ ပှၤရူၤဘ့ၣ်ဖိ, ပှၤကးဖိ ဒီးပှၤမနၤၡ့ၤဖိ အဒူၣ်တဝာ်လၢ တၢ်လီၢ်တၢ်ကျဲ တဖၣ်အံၤ ဒ်အဝဲသ့ၣ် အတၢ်န့ၢ်သါအသိးလီၤ.+ ၉ လၢတၢ်န့ၣ်အဃိ မၤထွဲ တၢ်အၢၣ်လီၤအီလီၤအံၤ ဒီးဒိကနၣ်အီၤတက့ၢ်. သုမ့ၢ်မၤဒ်န့ၣ်န့ၣ် တၢ်လၢသုမၤအီၤခဲလၢာ် ကလဲၤအသး ဂ့ၤဂ့ၤဘၣ်ဘၣ်လီၤ.+
၁၀ “သုဝဲခဲလၢာ်လၢ အဆၢထၢၣ်လၢ သုကစၢ် ယဟိဝၤယွၤ အမဲာ်ညါ လၢတနံၤအံၤန့ၣ် ပၣ်ဃုာ်ဒီး သုဒူၣ်အခိၣ်တဖၣ်, ပှၤသူၣ်က့သးပှၢ်တဖၣ်, သုပဒိၣ်တဖၣ်, ပှၤပိာ်ခွါလၢ အံၣ်စရ့လးအပူၤ ခဲလၢာ်, ၁၁ သုဖိသုလံၤတဖၣ်, သုမါတဖၣ်,+ ပှၤထံဂၤကီၢ်ဂၤဖိလၢ အဟဲအိၣ်လၢ+ သုဒဲကဝီၤအပူၤ လၢအထၢဖှိၣ်သ့ၣ်မုၣ် လၢသုဂီၢ် ဒီးဒၢၣ်န့ၢ်သုထံလီၤ. ၁၂ သုဟဲဖဲအံၤ ဒ်သိး သုကအၢၣ်လီၤတူၢ်လိာ် သုကစၢ် ယဟိဝၤယွၤ အတၢ်အၢၣ်လီၤအီလီၤ အဂီၢ်လီၤ. တနံၤအံၤန့ၣ် သုကစၢ် ယဟိဝၤယွၤ ကမၤ တၢ်အၢၣ်လီၤအီလီၤဒီးသု+ ၁၃ ဒ်သိး အကပာ်ဂၢၢ်ပာ်ကျၢၤသု ဒ်အပှၤဂီၢ်မုၢ် အသိး လၢတနံၤအံၤ+ ဒီးဒ်သိးအဝဲ ကကဲထီၣ် သုကစၢ်ယွၤလီၤ.+ အဃိ အဝဲကမၤဝဲ ဒ်အအၢၣ်လီၤသု ဒီးဒ်အအၢၣ်လီၤ သုဖုဖးဒိၣ်တဖၣ် လၢအမ့ၢ် စီၤအၤဘြၤဟၣ်,+ စီၤအံၤစဲး+ ဒီးစီၤယၤကိာ်အသိးလီၤ.+
၁၄ “ယမၢ သုအၢၣ်လီၤတၢ် ဒ်အံၤန့ၣ် တမ့ၢ်လၢယ* ကမၤတၢ်အၢၣ်လီၤအီလီၤဒီးသု ထဲသုဝဲတဒူၣ်ဘၣ်. ၁၅ လၢပကစၢ် ယဟိဝၤယွၤ အမဲာ်ညါန့ၣ် တနံၤအံၤ ယကမၤ တၢ်အၢၣ်လီၤအီလီၤအံၤဒီး ပှၤလၢ အဆၢထၢၣ်ဃုာ်ဒီးပှၤဖဲအံၤ ဒီးယကမၤအီၤစ့ၢ်ကီးဒီး ပှၤလၢ အကဟဲလၢ ခါဆူညါတဖၣ်လီၤ.* ၁၆ (ပအိၣ်ဘၣ်လၢ ကီၢ်အဲၤကူပတူးအပူၤ ဒ်လဲၣ် ဒီးလၢပတၢ်လဲၤကျဲန့ၣ် ပလဲၤခီဖျိဘၣ်တၢ်လၢ ပှၤအကလုာ်ကလုာ်အကျါ ဒ်လဲၣ်န့ၣ် သုသ့ၣ်ညါ ဂ့ၤဂ့ၤလီၤ.+ ၁၇ ဒီးလၢအဝဲသ့ၣ် အကျါန့ၣ် သုထံၣ်ဘၣ် အဝဲသ့ၣ် အတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်+ လၢပှၤတ့အီၤလၢ သ့ၣ်, လၢၢ်, စ့ညၣ် ဒီးထူလီၤ.) ၁၈ ပလီၢ်သုသးဒ်သိး ပှၤပိာ်မုၣ်ပိာ်ခွါ, ဟံၣ်ဖိဃီဖိ ဒီးပှၤအဒူၣ်လၢ အအိၣ်လၢသုကျါ လၢတနံၤအံၤန့ၣ် အသုတဃၣ်ကွံာ်အသးလၢ ပကစၢ် ယဟိဝၤယွၤအအိၣ် ဒီးမၤပှၤကလုာ်အဂၤ အယွၤတဖၣ် အတၢ်တဂ့ၤ.+ ပှၤလၢအမၤဒ်န့ၣ်န့ၣ် လီၤဂာ်ဒ် တၢ်အဂံၢ် လၢအဒုးမဲထီၣ် တၢ်မုၢ်တၢ်ဘိလၢ အခၣ် ဒီးအဒုးအိၣ်ထီၣ် တၤသၣ်လၢ အအိၣ်ဒီး အစုၣ်အပျၢ်လီၤ.+
၁၉ “ပှၤတဂၤ မ့ၢ်နၢ်ဟူ တၢ်အၢၣ်လီၤအံၤ ဘၣ်ဆၣ် အမ့ၢ် ပာ်ထီၣ်ထီအသး ဒီးမ့ၢ်တဲဝဲလၢ အသးပူၤလၢ ‘ယမ့ၢ်မၤဖဲ ယသးသနာ်က့ ယတဘၣ်တၢ်နီတမံၤဘၣ်’ န့ၣ်ပှၤလၢအအိၣ်ဘူးဒီးအီၤ ကိးဂၤဒဲး ကဟးဂီၤလၢ အဃိလီၤ. ၂၀ ဒီးတမ့ၢ်လၢ ကစၢ် ယဟိဝၤယွၤ ကသးအိၣ်ပျၢ် အတၢ်ကမၣ်ဘၣ်.+ လၢတၢ်န့ၣ်အလီၢ် ယဟိဝၤယွၤ အတၢ်သးဒိၣ် ကလီၤဘၣ်အီၤ ဒီးတၢ်ဆိၣ်အၢလၢ လံာ်တဘ့ၣ်အံၤ အပူၤခဲလၢာ်န့ၣ် ကလီၤဘၣ်အီၤ သပှၢ်တၢၢ်လီၤ.+ ဒီးယဟိဝၤယွၤ ကထူးသံကွံာ်အမံၤလၢ မူခိၣ်အဖီလာ် သပှၢ်ကတၢၢ်လီၤ. ၂၁ ဒီးလၢပှၤအံၣ်စရ့လးဖိ အဒူၣ်ခဲလၢာ် အကျါန့ၣ် ယဟိဝၤယွၤ ကပာ်လီၤဆီအီၤ ဒီးဒုးလီၤဘၣ် တၢ်ကီတၢ်ခဲလၢအလိၤ ဒ်တၢ်ဆိၣ်အၢ ခဲလၢာ်လၢ အဘၣ်တၢ်ကွဲးလီၤအီၤလၢ လံာ်တၢ်သိၣ်တၢ်သီအံၤအပူၤ အိၣ်ဝဲအသိးလီၤ.
၂၂ “ဒီးသုဖိခွါလၢ အကဟဲလၢခံတဖၣ် ဒီးပှၤထံဂၤကီၢ်ဂၤဖိလၢ အအိၣ်လၢ ကီၢ်လၢအယံၤတဘ့ၣ်န့ၣ် ကထံၣ်ဝဲ တၢ်နးတၢ်ဖှီၣ် လၢယဟိဝၤယွၤ ဒုးလီၤဘၣ်ဝဲလၢ ကီၢ်အံၤ အပူၤလီၤ. ၂၃ အဝဲ ကဆှၢလီၤဝဲ ကး, အံသၣ် ဒီးမ့ၣ်အူ အဃိ လၢကီၢ်ဒီဘ့ၣ် အပူၤန့ၣ် ပှၤဖှံလီၤတၢ် တန့ၢ်ဘၣ် ဒီးတၢ်တမဲထီၣ်ဘၣ် ဒီးတၢ်မုၢ်တၢ်ဘိ တအိၣ်နီတမံၤဘၣ်. ဒီးအကလီၤဂာ်ဒ် စဒိၣ်, ဂမိရၤ,+ အၤဒမၤ ဒီးစဘိအံၣ်+ လၢယဟိဝၤယွၤ မၤဟးဂီၤကွံာ်အီၤ လၢအတၢ်သးထီၣ် အဃိန့ၣ်လီၤ. ၂၄ ဖဲန့ၣ်အခါ သုဖိခွါ ဒီးပှၤထံဂၤကီၢ်ဂၤဖိတဖၣ် ကတဲဝဲလၢ ‘ကီၢ်တဘ့ၣ်အံၤန့ၣ် ဘၣ်မနုၤအဃိ ယဟိဝၤယွၤ မၤအီၤ ဒ်အံၤလဲၣ်,+ ဘၣ်မနုၤအဃိ အဝဲသးဒိၣ်ထီၣ်တၢ် ထဲအံၤလဲၣ်.’ ၂၅ ဒီးပှၤကတဲဆၢဝဲလၢ ‘မ့ၢ်လၢအဝဲသ့ၣ် မၤဟးဂီၤအမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤ အတၢ်အၢၣ်လီၤအီလီၤ+ အဃိလီၤ. ကစၢ်ယွၤ မၤဝဲ တၢ်အၢၣ်လီၤအီလီၤအံၤဒီး အဝဲသ့ၣ် ဖဲအဒုးဟးထီၣ် အဝဲသ့ၣ် လၢကီၢ်အဲၤကူပတူး အခါလီၤ.+ ၂၆ ဘၣ်ဆၣ် အဝဲသ့ၣ်မၤဝဲ ယွၤအဂၤတဖၣ် လၢအဝဲသ့ၣ် တသ့ၣ်ညါဝဲဘၣ် အတၢ် ဒီးဘူၣ်ထီၣ်ဘါထီၣ်ဝဲလီၤ. နီၢ်ကီၢ်န့ၣ် အဝဲသ့ၣ် တအိၣ်ဒီးတၢ်ခွဲးတၢ်ယာ်လၢ ကဘူၣ်ထီၣ်ဘါထီၣ် ယွၤတဖၣ်အံၤဘၣ်.+ ၂၇ ဒီးယဟိဝၤယွၤ သးဒိၣ်ထီၣ် ပှၤလၢအအိၣ်လၢကီၢ်ပူၤ ဒီးတၢ်ဆိၣ်အၢခဲလၢာ်လၢ အအိၣ်လၢ လံာ်အံၤအပူၤန့ၣ် ကစၢ်ယွၤ ဒုးလီၤဘၣ်ဝဲ လၢအဝဲသ့ၣ်အလိၤလီၤ.+ ၂၈ အဃိ လၢတၢ်သူၣ်ဒိၣ်သးဖျိးအပူၤ ယဟိဝၤယွၤ ထဲးထီၣ်ကွံာ် အဝဲသ့ၣ်လၢ အဝဲသ့ၣ် အဟီၣ်ခိၣ်လိၤ+ ဒီးနီဟးထီၣ်ကွံာ် အဝဲသ့ၣ် ဆူကီၢ်အဂၤတဘ့ၣ် ဒီးအဝဲသ့ၣ်အိၣ်ဝဲဖဲန့ၣ် တုၤလၢ မုၢ်မဆါတနံၤအံၤလီၤ.’+
၂၉ “ယဟိဝၤယွၤသ့ၣ်ညါ တၢ်လၢအအိၣ်ခူသူၣ်တဖၣ် ခဲလၢာ်လီၤ.+ ဒီးအဝဲ ပာ်ဖျါထီၣ်န့ၢ်ပှၤ ဒီးပစၢၤပသွဲၣ် တစိၤဘၣ်တစိၤလၢ တၢ်လၢအအဲၣ်ဒိး ပာ်ဖျါထီၣ်ဝဲ ဒ်သိး ပအိၣ်မူမၤထွဲ တၢ်ကတိၤခဲလၢာ်လၢ အအိၣ်လၢ တၢ်သိၣ်တၢ်သီအံၤ* အပူၤကသ့အဂီၢ်လီၤ.+
၃၀ “ဖဲတၢ်ကတိၤတဖၣ် လၢအဘၣ်ဃးဒီး တၢ်ဆိၣ်ဂ့ၤဒီးတၢ်ဆိၣ်အၢလၢ ယပျဲသုဃုထၢအီၤအံၤ ဟဲလၢထီၣ်ပှဲၤထီၣ်အခါ+ ဒီးဖဲသုအိၣ်လၢ ပှၤကလုာ်တဖၣ်လၢ ယဟိဝၤယွၤ မၤလီၤပြံလီၤပြါသုအကျါအခါ+ သုကသ့ၣ်နီၣ်ထီၣ် တၢ်ကတိၤတဖၣ်အံၤလီၤ.+ ၂ ဒီးသုကဟဲက့ၤကဒါက့ၤလၢ သုကစၢ် ယဟိဝၤယွၤအအိၣ်+ ဒီးသုဒီးသုဖိခွါတဖၣ် ကဒိကနၣ် ကစၢ်ယွၤအကလုၢ် ဒီးတၢ်ခဲလၢာ် လၢယမၤလိာ်သု လၢတနံၤအံၤ လၢသုသးဒီဖျၢၣ် ဒီးလၢသုတၢ်အိၣ်မူ ကိးသနၢၣ်ဒဲး အပူၤလီၤ.+ ၃ ဖဲန့ၣ်အခါ သုကစၢ် ယဟိဝၤယွၤ ကဒုးဟးထီၣ်သုလၢ တၢ်လီၢ်လၢ ပှၤက့ၤဖီၣ်သု+ ဒီးအကပာ်ဖျါထီၣ် တၢ်သးကညီၤလၢ သုဖီခိၣ်လီၤ.+ ဒီးဖဲသုအိၣ်လၢ ပှၤကလုာ်တဖၣ်အကျါ လၢတၢ်လီၢ်လၢ ကစၢ်ယွၤ မၤလီၤပြံလီၤပြါသုအခါ သုကစၢ် ယဟိဝၤယွၤ ကပာ်ဖှိၣ်ထီၣ်က့ၤသုလီၤ.+ ၄ သုမ့ၢ်လီၤပြံလီၤပြါ တုၤလၢ ဟီၣ်ခိၣ်အနၢၣ် အကတၢၢ် သနာ်က့ သုကစၢ် ယဟိဝၤယွၤ ကပာ်ဖှိၣ်ထီၣ်က့ၤ သုဖဲန့ၣ် ဒီးကကိးန့ၢ်ကဒါက့ၤသုလီၤ.+ ၅ သုကစၢ် ယဟိဝၤယွၤ ကဒုးဟဲက့ၤသုလၢ ကီၢ်လၢသုပၢ်တဖၣ် မၤန့ၢ်ဝဲ ဒီးသုကန့ၢ်ဘၣ် ကီၢ်တဘ့ၣ်အံၤလီၤ. ဒီးအဝဲကမၤဝဲဒ်သိး သုတၢ်အိၣ်မူ ကလဲၤအသး ဂ့ၤဂ့ၤဘၣ်ဘၣ် ဒီးကဒုးအါထီၣ်ဂီၢ်ထီၣ်သု အါန့ၢ်သုပၢ်တဖၣ်လီၤ.+ ၆ သုကစၢ် ယဟိဝၤယွၤ ကမၤကဆှီထီၣ်* သုဒီးသုဖိသုလံၤတဖၣ်အသး+ ဒ်သိးသုကအဲၣ် သုကစၢ် ယဟိဝၤယွၤ လၢသုသးဒီဖျၢၣ်, လၢသုတၢ်အိၣ်မူ ကိးသနၢၣ်ဒဲး အပူၤ ဒီးသုကဆဲး အိၣ်မူဘၣ်လီၤ.+ ၇ ဒီးသုကစၢ်ယဟိဝၤယွၤ ကဒုးလီၤဘၣ် တၢ်ဆိၣ်အၢတဖၣ်အံၤခဲလၢာ် လၢသုဒုၣ်သုဒါ လၢအသးဟ့သု ဒီးအမၤအၢမၤနးသုတဖၣ် အလိၤလီၤ.+
၈ “ဖဲန့ၣ်အခါ သုကဟဲက့ၤကဒါက့ၤ လၢသုကစၢ် ယဟိဝၤယွၤအအိၣ် ဒီးသုကဒိကနၣ် အကလုၢ် ဒီးသုကမၤထွဲ အတၢ်မၤလိာ်ခဲလၢာ်လၢ ယမၤလိာ်သု လၢတနံၤအံၤလီၤ. ၉ ယဟိဝၤယွၤ ကသးခုကဒီးလၢ သုဖီခိၣ် ဒ်အသးခုလၢ သုမိၢ်ပၢ်ဖံဖု လၢပျၢၤတဖၣ် အဖီခိၣ်အသိး ဒီးအဝဲ ကအဲၣ်ဒိး ဒုးထူးဒုးတီၤထီၣ်သုလီၤ.+ အဃိ တၢ်လၢသုမၤအီၤခဲလၢာ်န့ၣ် သုကစၢ် ယဟိဝၤယွၤ ကဆိၣ်ဂ့ၤအီၤ ထူးထူးတီၤတီၤလီၤ. ကစၢ်ယွၤ ကမၤအါထီၣ် သုဖိသုလံၤ, သုဆၣ်ဖိကီၢ်ဖိ ဒီးသုဟီၣ်ခိၣ် အတၤသူတၤသၣ် တဖၣ်လီၤ.+ ၁၀ ဒီးသုကဒိကနၣ် သုကစၢ် ယဟိဝၤယွၤ အကလုၢ် ဒီးသုကမၤထွဲ အတၢ်မၤလိာ် ဒီးအတၢ်ဘျၢလၢ အဘၣ်တၢ်ကွဲးလီၤအီၤလၢ လံာ်တၢ်သိၣ်တၢ်သီအံၤ* အပူၤလီၤ. ဒီးသုကဟဲက့ၤလၢ သုကစၢ် ယဟိဝၤယွၤအအိၣ် လၢသုသးဒီးဖျၢၣ် ဒီးလၢသုတၢ်အိၣ်မူ ကိးသနၢၣ်ဒဲးအပူၤလီၤ.+
၁၁ “တၢ်မၤလိာ်လၢ ယမၤလိာ်သု လၢတနံၤအံၤန့ၣ် တကီတလၢ လၢသုဂီၢ်ဘၣ် ဒီးတအိၣ်ယံၤတလၢ တုၤသုဖီၣ်အီၤတတုၤဘၣ်န့ၣ်ဘၣ်.+ ၁၂ ဒီးအတအိၣ်လၢမူခိၣ်ဘၣ် အဃိ သုတလိၣ်တဲလၢ ‘ဒ်သိး ပကနၢ်ဟူ ဒီးမၤထွဲအီၤအဂီၢ် မ့ၢ်မတဂၤ ကလဲၤထီၣ်ဟံးန့ၢ်ပှၤလၢ မူခိၣ်လဲၣ်’ န့ၣ်ဘၣ်.+ ၁၃ ဒီးအတအိၣ်လၢ ပီၣ်လဲၣ် အဝၢ်ဘးခီဘၣ်အဃိ သုတလိၣ်တဲလၢ ‘ဒ်သိး ပကနၢ်ဟူ ဒီးမၤထွဲအီၤအဂီၢ် မ့ၢ်မတဂၤ ကလဲၤခီဂာ်ပီၣ်လဲၣ်ဒီး ဟံးန့ၢ်ပှၤလဲၣ်’ န့ၣ်ဘၣ်. ၁၄ တၢ်ကတိၤအံၤ အိၣ်လၢသုထးခိၣ် ဒီးသုသးပူၤအဃိ အအိၣ်ဘူးဒီးသုဒိၣ်မးလီၤ.+ အဃိ သုမၤထွဲအီၤန့ၢ်ဝဲလီၤ.+
၁၅ “တနံၤအံၤ ယပာ်လီၤန့ၢ်သု တၢ်ဃုထၢခံခါလၢအမ့ၢ် တၢ်မူဒီးတၢ်ဂ့ၤ အကျဲ ဒီးတၢ်သံဒီးတၢ်အၢ အကျဲလီၤ.+ ၁၆ သုမ့ၢ်ဒိကနၣ် သုကစၢ် ယဟိဝၤယွၤ အတၢ်မၤလိာ် လၢယမၤလိာ်သု လၢတနံၤအံၤ ခီဖျိလၢ သုအဲၣ် သုကစၢ်ယဟိဝၤယွၤ,+ မၤအတၢ်ဘၣ်သး, မၤထွဲ အတၢ်မၤလိာ်, အတၢ်ဘျၢ ဒီးအတၢ်သိၣ်တၢ်သီတဖၣ်န့ၣ် သုကအိၣ်မူဘၣ်+ ဒီးသုကအါထီၣ်ဂီၢ်ထီၣ်လီၤ. ဒီးသုကစၢ် ယဟိဝၤယွၤ ကဆိၣ်ဂ့ၤသု လၢကီၢ်လၢ သုကလဲၤမၤန့ၢ်အီၤအပူၤလီၤ.+
၁၇ “ဘၣ်ဆၣ် သုမ့ၢ်ဃၣ်ကွံာ်သုသး+ လၢကစၢ်ယွၤအအိၣ် ဒီးသုမ့ၢ်တဒိကနၣ် အကလုၢ်လၢၤဘၣ် ဒီးပှၤမ့ၢ်ကွဲန့ၢ်လွဲန့ၢ်သု ဒီးသုမ့ၢ်ဘူၣ်ထီၣ်ဘါထီၣ် ယွၤအဂၤတဖၣ် ဒီးမၤအတၢ်န့ၣ်+ ၁၈ တနံၤအံၤ ယကတဲသုလၢ သုကတုၤလၢ တၢ်ဟးဂီၤ သပှၢ်ကတၢၢ်လီၤ.+ ဒီးသုမ့ၢ်လဲၤခီဂာ် ထံကျိယၢ်ဒ့ၣ် ဒီးမၤန့ၢ်ထံကီၢ်သနာ်က့ သုတအိၣ်မူဘၣ်ဖဲန့ၣ် ယံာ်ယံာ်ဘၣ်. ၁၉ ယပာ်လီၤ တၢ်သံဒီးတၢ်မူ, တၢ်ဆိၣ်အၢ ဒီးတၢ်ဆိၣ်ဂ့ၤလၢ သုမဲာ်ညါလီၤ.+ ဘၣ်ဃးဒီး တၢ်ဂ့ၢ်အံၤန့ၣ် တနံၤအံၤ ယပာ်ပှၤအိၣ်လၢမူခိၣ် ဒီးဟီၣ်ခိၣ် ကိးဂၤဒဲးလၢ ယပှၤအုၣ်အသးတဖၣ်လီၤ. ဒ်သိး သုဒီးသုစၢၤသုသွဲၣ်တဖၣ်+ ကမူဝဲအဂီၢ် သုကဘၣ်ဃုထၢ တၢ်မူလီၤ.+ ၂၀ သုမၤဒ်န့ၣ် ကသ့ခီဖျိ သုအဲၣ် သုကစၢ် ယဟိဝၤယွၤ,+ ဒိကနၣ်အကလုၢ် ဒီးတီဒီးအီၤထီဘိလီၤ.+ ယဟိဝၤယွၤ မ့ၢ်ပှၤလၢ အဟ့ၣ်သုသးသမူ ဒီးခီဖျိလၢအီၤအဃိ သုကအိၣ်မူဘၣ် ဖးယံာ်လၢ ကီၢ်တဘ့ၣ်လၢ အဝဲအၢၣ်လီၤပာ်စၢၤလၢ အကဟ့ၣ် သုဖုဖးဒိၣ်တဖၣ် လၢအမ့ၢ် စီၤအၤဘြၤဟၣ်, စီၤအံၤစဲး ဒီးစီၤယၤကိာ်လီၤ.”+
၃၁ စီၤမိၤၡ့ တဲဘၣ် ပှၤအံၣ်စရ့လးဖိခဲလၢာ်လၢ ၂ “ခဲအံၤ ယအိၣ်အနံၣ် ၁၂၀ လံ.+ မ့ၢ်လၢ ယဟိဝၤယွၤ တဲယၤလၢ ‘နတလဲၤခီဂာ်ဘၣ် ထံကျိယၢ်ဒ့ၣ်ဘၣ်’ အဃိ ယလဲၤဆှၢသု တန့ၢ်လၢၤဘၣ်.+ ၃ သုကစၢ် ယဟိဝၤယွၤ ကလဲၤခီဂာ်တၢ် လၢသုမဲာ်ညါ ဒီးကမၤဟးဂီၤကွံာ် ပှၤကလုာ်တဖၣ်န့ၣ် လၢသုမဲာ်ညါ ဒီးကနီဟးထီၣ်ကွံာ် အဝဲသ့ၣ်လီၤ.+ ဒီးဒ်ယဟိဝၤယွၤ မၤလိာ်ဝဲအသိး စီၤယိၤၡူ ကတီခိၣ်ရိၤမဲသု လၢသုကလဲၤခီဂာ်တၢ် အဂီၢ်လီၤ.+ ၄ ယဟိဝၤယွၤ ကမၤဟးဂီၤ အဝဲသ့ၣ် ဒ်အမၤဟးဂီၤဝဲ ပှၤအမိၢ်ဖိ အစီၤပၤစံဃိၣ်+ ဒီးဧိာ်+ ဃုာ်ဒီးအဝဲသ့ၣ် အတၢ်လီၢ်အသိးလီၤ.+ ၅ ယဟိဝၤယွၤ ကမၤနၢၤကွံာ် အဝဲသ့ၣ် လၢသုဂီၢ် ဒီးသုကဘၣ်မၤ အဝဲသ့ၣ် ဒ်ယမၤလိာ်သုအသိး ခဲလၢာ်လီၤ.+ ၆ ပာ်ဆူၣ်သုသးဒီး အိၣ်ဒီးတၢ်သူၣ်ဒူသးဒူတက့ၢ်.+ သုကစၢ် ယဟိဝၤယွၤ ကလဲၤတၢ်ဒီးသုအဃိ တဘၣ်ပျံၤတၢ်တဂ့ၤ+ ဒီးတဘၣ်ကနိးကစုာ်တဂ့ၤ. အဝဲတပာ်တ့ၢ်သုဘၣ် ဒီးအတလဲၤသဒၣ်သုဘၣ်.”+
၇ စီၤမိၤၡ့ ကိးန့ၢ်စီၤယိၤၡူ ဒီးတဲအီၤလၢ ပှၤအံၣ်စရ့လးဖိ ခဲလၢာ်အမဲာ်ညါလၢ “ပာ်ဆူၣ်နသးဒီး အိၣ်ဒီး တၢ်သူၣ်ဒူသးဒူတက့ၢ်.+ နမ့ၢ်ပှၤလၢ အကလဲၤဆှၢနုာ် ပှၤဂီၢ်မုၢ်အံၤလၢ ကီၢ်တဘ့ၣ်လၢ ယဟိဝၤယွၤ အၢၣ်လီၤအဝဲသ့ၣ် အမိၢ်ပၢ်ဖံဖု လၢပျၢၤတဖၣ် လၢအကဟ့ၣ်လီၤ အဝဲသ့ၣ်လီၤ. ဒီးနကဘၣ်ဟ့ၣ်လီၤ အဝဲသ့ၣ်လၢ ကီၢ်တဘ့ၣ်အံၤ ဒ်တၢ်န့ၢ်သါအသိးလီၤ.+ ၈ ယဟိဝၤယွၤ မ့ၢ်ပှၤလၢ အလဲၤတၢ်လၢ နမဲာ်ညါ ဒီးအဝဲ ကဆဲးအိၣ်ဒီးနၤလီၤ.+ အဝဲ တပာ်တ့ၢ်နၤဘၣ် ဒီးအတလဲၤသဒၣ်နၤဘၣ်. အဃိ တဘၣ်ပျံၤတၢ်တဂ့ၤ.”+
၉ ဒီးစီၤမိၤၡ့ ကွဲးလီၤဝဲ တၢ်သိၣ်တၢ်သီအံၤ*+ ဒီးဟ့ၣ်လီၤဝဲ ပှၤလုၢ်တၢ်ဒိၣ်တဖၣ်* လၢအယိးဝဲ ယဟိဝၤယွၤ အတလါစီဆှံ ဒီးအံၣ်စရ့လး အပှၤသူၣ်က့သးပှၢ်ခဲလၢာ်လီၤ. ၁၀ ဒီးစီၤမိၤၡ့ မၤလိာ်အဝဲသ့ၣ်လၢ “ပှၤကမၤတူာ်ကွံာ် ပှၤဂၤအဒ့ၣ်ကမၢ် ဖဲနွံနံၣ်တနံၣ် ပှဲၤထီၣ်ကိးဘျီဒဲး ဒီးဖဲတၢ်ဆၢကတီၢ်လၢ ဘၣ်တၢ်ပာ်ပနီၣ်အီၤ ဘၣ်အခါ+ ပှၤကမၤ ဘူၣ်ဒဲလီၤ.+ ၁၁ ဖဲန့ၣ်အဆၢကတီၢ် ပှၤအံၣ်စရ့လးဖိခဲလၢာ် ကဟဲပာ်ဖျါထီၣ်အသးလၢ သုကစၢ် ယဟိဝၤယွၤ အမဲာ်ညါ+ ဖဲတၢ်လီၢ်လၢ အဃုထၢထီၣ်ဝဲ ဒီးသုကဘၣ်ဖး တၢ်သိၣ်တၢ်သီအံၤ ဒ်သိးပှၤအံၣ်စရ့လးဖိခဲလၢာ် ကနၢ်ဟူဝဲ အဂီၢ်လီၤ.+ ၁၂ သုကဘၣ် ကိးဖှိၣ်ပှၤခဲလၢာ်+ လၢအမ့ၢ် ပှၤပိာ်မုၣ်ပိာ်ခွါ, ဖိဒံဖိသၣ် ဒီးပှၤထံဂၤကီၢ်ဂၤဖိ လၢအအိၣ်လၢ သုဝ့ၢ်တဖၣ်အပူၤ ဒ်သိး အဝဲသ့ၣ် ကဒိကနၣ်တၢ် ဒီးကမၤလိ သုကစၢ် ယဟိဝၤယွၤအဂ့ၢ် ဒီးပျံၤအီၤ ဒီးဒ်သိး အဝဲသ့ၣ်ကအိၣ်မူမၤထွဲ တၢ်ကတိၤလၢ အအိၣ်လၢ တၢ်သိၣ်တၢ်သီအံၤအပူၤ ခဲလၢာ်အဂီၢ်လီၤ. ၁၃ သုမ့ၢ်မၤဒ်န့ၣ်န့ၣ် အဝဲသ့ၣ်အဖိတဖၣ်လၢ အတသ့ၣ်ညါ တၢ်သိၣ်တၢ်သီအံၤဘၣ်န့ၣ် ကနၢ်ဟူဘၣ်ဝဲလီၤ.+ ဒီးအဝဲသ့ၣ် ကမၤလိတၢ်ပျံၤ ယဟိဝၤယွၤထီဘိ ဖဲသုလဲၤအိၣ်လၢ ကီၢ်လၢ ထံကျိယၢ်ဒ့ၣ် အဝၢ်ဘးခီ အခါလီၤ.”+
၁၄ ယဟိဝၤယွၤ တဲစီၤမိၤၡ့လၢ “ခဲအံၤန့ၣ် တၢ်ဆၢကတီၢ်ဘူးထီၣ်လၢ နကသံလံ.+ အဃိ ကိးန့ၢ် စီၤယိၤၡူ ဒီးသုကဘၣ် လဲၤပာ်ဖျါထီၣ် သုသးလၢ တၢ်အိၣ်ဖှိၣ်အဒဲ ဒ်သိး ယကဟ့ၣ်လီၤအီၤ မူဒါအဂီၢ်လီၤ.”+ အဃိ စီၤမိၤၡ့ ဒီးစီၤယိၤၡူ လဲၤပာ်ဖျါထီၣ်အသး လၢတၢ်အိၣ်ဖှိၣ်အဒဲလီၤ. ၁၅ ဒီးယဟိဝၤယွၤ လီၣ်ဖျါထီၣ်အသး ဖဲတၢ်အိၣ်ဖှိၣ်အဒဲလၢ တၢ်အၢၣ်အထူၣ်ပူၤ ဒီးတၢ်အၢၣ်အထူၣ်န့ၣ် အိၣ်ဆၢထၢၣ်လၢ တၢ်အိၣ်ဖှိၣ်အဒဲ အတၢ်နုာ်လီၤအလီၢ်လီၤ.+
၁၆ ယဟိဝၤယွၤ တဲစီၤမိၤၡ့လၢ “ခဲအံၤန့ၣ် ဘူးထီၣ်လၢ နကသံလံ. ပှၤသ့ၣ်တဖၣ်အံၤ ကဘူၣ်ထီၣ်ဘါထီၣ်* ယွၤအဂၤတဖၣ်လၢ အအိၣ်လၢ ကီၢ်လၢအဝဲသ့ၣ် ကလဲၤဝဲ အပူၤလီၤ.+ အဝဲသ့ၣ် ကပာ်တ့ၢ်ကွံာ်ယၤ+ ဒီးကမၤဟးဂီၤကွံာ် တၢ်အၢၣ်လီၤအီလီၤလၢ ယမၤဒီးအဝဲသ့ၣ်လီၤ.+ ၁၇ ဖဲန့ၣ်အဆၢကတီၢ် ယကသးဒိၣ်ထီၣ် အဝဲသ့ၣ်+ ဒီးပာ်တ့ၢ်ကွံာ် အဝဲသ့ၣ်လီၤ.+ ယကဃၣ်ကွံာ်ယမဲာ် လၢအဝဲသ့ၣ်အအိၣ်+ တုၤလၢ အဝဲသ့ၣ် ဟးဂီၤကွံာ် တစုလီၤ. ဒီးဖဲ တၢ်ကီတၢ်ခဲ ဒီးတၢ်ကိၢ်တၢ်ဂီၤ ဟဲဘၣ်အဝဲသ့ၣ်+ အါမံၤဝံၤအလီၢ်ခံ အဝဲသ့ၣ် ကတဲဝဲလၢ ‘တၢ်ကီတၢ်ခဲသ့ၣ်တဖၣ် ဘၣ်ပှၤန့ၣ် မ့ၢ်လၢ ပကစၢ်ယွၤ တအိၣ်လၢပကျါလၢၤဘၣ်အဃိ တမ့ၢ်ဧီၤ.’+ ၁၈ ဘၣ်ဆၣ် မ့ၢ်လၢ အဝဲသ့ၣ် မၤတၢ်အၢတၢ်သီအါမး ခီဖျိလဲၤလၢ ယွၤအဂၤတဖၣ်အအိၣ်အဃိ ဖဲနံၤအဝဲန့ၣ်န့ၣ် ယကဃၣ်ကွံာ်ယမဲာ် လၢအဝဲသ့ၣ် အအိၣ်လီၤ.+
၁၉ “ခဲအံၤန့ၣ် ကွဲးလီၤ တၢ်သးဝံၣ်တယုၢ်အံၤ လၢသုဂီၢ်+ ဒီးသိၣ်လိက့ၤ ပှၤအံၣ်စရ့လးဖိတဖၣ်တက့ၢ်.+ မၢအဝဲသ့ၣ် တိၢ်ရူး တၢ်သးဝံၣ်အံၤ ဒ်သိး တၢ်သးဝံၣ်အံၤ ကဒုးသ့ၣ်နီၣ်ထီၣ်က့ၤ ပှၤအံၣ်စရ့လးဖိလၢ ယတၢ်ဟ့ၣ်ပလီၢ်တဖၣ်အဂီၢ်တက့ၢ်.+ ၂၀ ဖဲယဆှၢအဝဲသ့ၣ်လၢ ကီၢ်လၢယအၢၣ်လီၤ အမိၢ်ပၢ်ဖံဖု လၢပျၢၤတဖၣ်+ လၢအမ့ၢ် ကီၢ်လၢ တၢ်နုၢ်ထံဒီးကနဲစီ ယွၤလီၤဝဲလၢအပူၤအခါ+ အဝဲသ့ၣ် ကအီၣ်ဘၣ်တၢ် ဘျဲဘျဲ ဒီးအတၢ်အိၣ်မူ ကလဲၤအသး ဂ့ၤဂ့ၤဘၣ်ဘၣ်လီၤ.+ ဖဲန့ၣ်အခါ အဝဲသ့ၣ် ကလဲၤလၢ ယွၤအဂၤတဖၣ်အအိၣ်, ကမၤအဝဲသ့ၣ်အတၢ် ဒီးတပာ်ကဲယၤဘၣ် ဒီးကမၤဟးဂီၤကွံာ် ယတၢ်အၢၣ်လီၤအီလီၤလီၤ.+ ၂၁ တချုးလၢ ယလဲၤကိးနုာ် အဝဲသ့ၣ် လၢကီၢ်လၢ ယအၢၣ်လီၤ အဝဲသ့ၣ် တဘ့ၣ်ဒံးဘၣ်အခါ ယသ့ၣ်ညါဆိပာ်စၢၤ အဝဲသ့ၣ် အတၢ်ပာ်သူၣ်ပာ်သးလီၤ.+ အဃိ ဖဲတၢ်ကီတၢ်ခဲ ဒီးတၢ်ကိၢ်တၢ်ဂီၤ ဟဲဘၣ်အဝဲသ့ၣ်+ အါမံၤအခါ တၢ်သးဝံၣ် တယုၢ်အံၤ ကဒုးသ့ၣ်နီၣ်ထီၣ်က့ၤ အဝဲသ့ၣ်လၢ ယတၢ်ဟ့ၣ်ပလီၢ်တဖၣ်လီၤ. (အဝဲသ့ၣ် အစၢၤအသွဲၣ်တဖၣ် တဘၣ်သးပ့ၤနီၣ် တၢ်သးဝံၣ်အံၤဘၣ်.)”
၂၂ ဖဲတၢ်တနံၤန့ၣ် စီၤမိၤၡ့ ကွဲးလီၤဝဲ တၢ်သးဝံၣ်တယုၢ်အံၤလီၤ. ဒီးအဝဲ သိၣ်လိဝဲ ပှၤအံၣ်စရ့လးဖိတဖၣ် လၢတၢ်သးဝံၣ်အံၤလီၤ.
၂၃ ဒီးကစၢ်ယွၤ ဟ့ၣ်လီၤ စီၤနိၣ် အဖိခွါ စီၤယိၤၡူလၢမူဒါ+ ဒီးတဲဝဲလၢ “ပာ်ဆူၣ်နသးဒီး အိၣ်ဒီး တၢ်သူၣ်ဒူသးဒူတက့ၢ်.+ နမ့ၢ်ပှၤလၢ အကလဲၤဆှၢနုာ် ပှၤဂီၢ်မုၢ်အံၤလၢ ကီၢ်တဘ့ၣ်လၢ ယအၢၣ်လီၤ အဝဲသ့ၣ်လီၤ.+ ဒီးယကဆဲးအိၣ်ဒီးနၤလီၤ.”
၂၄ ဖဲစီၤမိၤၡ့ ကွဲးလီၤဝဲ တၢ်သိၣ်တၢ်သီအံၤ လၢလံာ်အပူၤ ဝံၤဝဲခဲလၢာ် အခါ+ ၂၅ စီၤမိၤၡ့ မၤလိာ် ပှၤလ့ၤဝံဖိတဖၣ်လၢ အယိးယဟိဝၤယွၤ အတၢ်အၢၣ်လီၤအီလီၤ အတလါ ဒ်အံၤလီၤ. အဝဲတဲဝဲလၢ ၂၆ “ဟံးန့ၢ် လံာ်တၢ်သိၣ်တၢ်သီအံၤ+ ဒီးပာ်လီၤအီၤလၢ သုကစၢ် ယဟိဝၤယွၤ အတၢ်အၢၣ်လီၤအီလီၤ အတလါ အကပၤ+ ဒီးအကကဲထီၣ် ဒ်တၢ်အုၣ်အသး လၢကစံၣ်ညီၣ်သုဝဲ ပှၤအံၣ်စရ့လးဖိအသိးလီၤ. ၂၇ သုမ့ၢ်ပှၤလၢ အထီဒါတၢ်+ ဒီးသုခိၣ်ကိၤန့ၣ်+ ယသ့ၣ်ညါ ဂ့ၤဂ့ၤလီၤ. ဖဲယအိၣ်ဒီးသုအခါ ဒၣ်လဲာ် သုထီဒါယဟိဝၤယွၤ သပှၢ်တၢၢ် အဃိ ဖဲယသံဝံၤအလီၢ်ခံဒု သုကမၤ နးန့ၢ်အလီၢ်ဒံးဧါသၢၤ. ၂၈ ကိးဖှိၣ်န့ၢ်ယၤ ပှၤသူၣ်က့သးပှၢ်တဖၣ်လၢ သုဒူၣ်တဖၣ်အကျါ, သုပဒိၣ်တဖၣ် ဒီးယကတဲဘၣ် အဝဲသ့ၣ်လၢ တၢ်ကတိၤတဖၣ်အံၤလီၤ. ဒီးဘၣ်ဃးဒီး တၢ်ဂ့ၢ်အံၤန့ၣ် ယကပာ် ပှၤအိၣ်လၢမူခိၣ်ဒီးဟီၣ်ခိၣ် ကိးဂၤဒဲးလၢ ယပှၤအုၣ်အသးတဖၣ်လီၤ.+ ၂၉ ဖဲယသံဝံၤအလီၢ်ခံ သုကမၤတၢ် အၢအၢသီသီ+ ဒီးဃၣ်ကွံာ်သုသးလၢ ကျဲလၢ ယမၤလိာ်သုန့ၣ် ယသ့ၣ်ညါ ဂ့ၤဂ့ၤလီၤ. ခါဆူညါန့ၣ် သုကမၤတၢ်အၢတၢ်သီ လၢယဟိဝၤယွၤ အမဲာ်ညါ ဒီးမၤဆါအသး ခီဖျိလၢ တၢ်လၢသုမၤလၢ သုစုအဃိ တၢ်ကီတၢ်ခဲ ကလီၤဘၣ်သု သပှၢ်ကတၢၢ်လီၤ.”+
၃၀ ဒီးလၢအံၣ်စရ့လး အတၢ်အိၣ်ဖှိၣ်ဒီတဖု အမဲာ်ညါန့ၣ် စီၤမိၤၡ့ တဲဖျါထီၣ်ဝဲ တၢ်သးဝံၣ် တယုၢ်အံၤ စးထီၣ်လၢ အခီၣ်ထံး တုၤလၢ အကတၢၢ်လီၤ.+
၃၂ “မ်မူခိၣ် ဒိကနၣ် တၢ်ကတိၤလၢ ယကတဲ
ဒီးမ်ဟီၣ်ခိၣ်နၢ်ဟူ တၢ်ကတိၤလၢ အဟဲထီၣ်လၢ ယထးခိၣ်တက့ၢ်.
၂ ယတၢ်ဟံးစုနဲၣ်ကျဲန့ၣ် ကဟဲစူၤလီၤ ဒ်မူခိၣ်စူၤထံအသိး
ဒီးယတၢ်ကတိၤတဖၣ် ကဟဲလီၤစီၤဝဲ ကဖီကဖီ ဒ်ပစီၤထံအသိး
ဒီးဒ်မူခိၣ်ထံ လီၤတဖှံၣ်ဝဲလၢ နီၣ်ဧိၤမံၤဧိၤအလိၤအသိး
ဒီးဒ်တၢ်စူၤထံ လီၤအါအါဂီၢ်ဂီၢ်လၢ တၢ်မုၢ်တၢ်ဘိတဖၣ် အလိၤ အသိးလီၤ.
အမ့ၢ် ကစၢ်ယွၤ လၢအသးတီ+ ဒီးအတစံၣ်ညီၣ်တၢ် တတီတလိၤ နီတဘျီဘၣ်.+
အဝဲမ့ၢ် ပှၤတီပှၤလိၤ ဒီးအသူၣ်ဘျၢသးဘျၢလီၤ.+
အဝဲသ့ၣ်မ့ၢ် ပှၤတစိၤလၢ သကဲာ်ပဝးဟးဂီၤ ဒီးအအၢအသီလီၤ.+
၆ ပှၤဟးဂီၤဖိ ဒီးပှၤလၢအတအိၣ်ဒီး တၢ်ကူၣ်သ့ဧၢ,+
မ့ၢ်သုကြၢးမၤ ယဟိဝၤယွၤ ဒ်အံၤဧါ.+
အဝဲ ကဲသုပၢ်လၢ အတ့လီၤသု တမ့ၢ်ဧီၤ,+
ဒီးအမ့ၢ်ပှၤလၢ အဒုးအိၣ်ထီၣ်သု ဒီးဒုးကဲထီၣ်သုဒ် ပှၤတကလုာ်အသိး တမ့ၢ်ဧီၤ.
၇ သ့ၣ်နီၣ်ထီၣ်က့ၤ မုၢ်နံၤလၢ အပူၤကွံာ်တဖၣ်,
ဆိကမိၣ်ကွၢ် ပှၤအစိၤလၢ အပူၤကွံာ်တဖၣ်တက့ၢ်.
သံကွၢ်သုပၢ် ဒီးအဝဲသ့ၣ် ကတဲဘၣ်သု,+
ဒီးပှၤသူၣ်က့သးပှၢ်တဖၣ် ကဒုးသ့ၣ်ညါသုလီၤ.
၈ ဖဲတၢ်ထီကတၢၢ်တဂၤ ဟ့ၣ်လီၤဝဲ ပှၤကလုာ်တဖၣ် အတၢ်န့ၢ်သါအခါ,+
ဖဲအဝဲ မၤလီၤပြံလီၤပြါ စီၤအၤဒၣ် အစၢၤအသွဲၣ်အခါ+
ဒ်ပှၤအံၣ်စရ့လးဖိတဖၣ် အနီၣ်ဂံၢ် အိၣ်ဝဲအသိး+
ကစၢ်ယွၤ ပာ်ပနီၣ် တၢ်လီၢ်တၢ်ကျဲလၢ ပှၤကလုာ်တဖၣ် အဂီၢ်လီၤ.+
၁၁ အဝဲမၤဝဲဒ်န့ၣ်န့ၣ် လီၤဂာ်ဒ် လံာ်ကြီကြာ်လၢ အသိၣ်လိအဖိလၢ ကယူၤဝဲအဂီၢ်
ဒီးယူၤဝဲလၢ အဖိတဖၣ်အဖီခိၣ် ဝံၤဒီး
သလၣ်ထီၣ် အဒံးဆ့ ဒီးယူၤစိာ် အဝဲသ့ၣ်
လၢအဒံးဆ့အလိၤအသိးလီၤ.+
အဝဲ ဒုးအီၣ်အီၤ ကနဲစီ လၢအအိၣ်လၢ လၢၢ်ဧိၤလ့ဧိၤ အကျါ
ဒီးဒုးအီၣ်အီၤ သိဧိၤချါဧိၤ လၢအဟဲ လၢလၢၢ်လၢ အကိၤတဖျၢၣ်* အပူၤလီၤ.
၁၄ ဒီးဒုးအီၣ်ဒုးအီအီၤလၢ ထီပး လၢပှၤတ့အီၤလၢ ကျီၢ်နုၢ်ထံ
ဒီးမဲာ်တဲးလဲး အနုၢ်ထံလီၤ.
ဒီးဒုးအီၣ်အီၤလၢ ဘၤၡၣ်အသိဖါ ဒီးမဲာ်တဲးလဲးဖါ
ဒီးဘုကၠူၣ်လၢ အဂ့ၤကတၢၢ်လီၤ.+
ဒီးသုအီဘၣ် စပံးထံလီၤ.
၁၅ ဖဲစီၤယၡူရိၣ်* ဘီၣ်ထီၣ်သိထီၣ်အခါ အဝဲထူက့ၤ အကစၢ်လီၤ.
အဝဲဘီၣ်ထီၣ်သိထီၣ်, ဒိၣ်ထီၣ် ဒီးဘီၣ်လုၤကုၤထီၣ်လံ.+
အဃိ အဝဲပာ်တ့ၢ် ကစၢ်ယွၤ လၢအတ့လီၤအီၤ+
ဒီးတပာ်ကဲ အတၢ်အုၣ်က့ၤခီၣ်က့ၤ အလၢၢ်လၢၤဘၣ်.
၁၇ အဝဲသ့ၣ်တလုၢ်ထီၣ်တၢ်လၢ ကစၢ်ယွၤအအိၣ်ဘၣ်. အဝဲသ့ၣ် လုၢ်ထီၣ်တၢ်လၢ တၢ်ဝံတၢ်နါတဖၣ်အအိၣ်,+
ယွၤလၢ အဝဲသ့ၣ် တသ့ၣ်ညါဝဲဘၣ်တဖၣ်အအိၣ်,
ယွၤတဖၣ်လၢ အဟဲပၢၢ်ထီၣ်သီသီ အအိၣ်,
ယွၤတဖၣ်လၢ အဝဲသ့ၣ် အမိၢ်ပၢ်ဖံဖု လၢပျၢၤတဖၣ် တသ့ၣ်ညါဝဲဘၣ်အအိၣ်လီၤ,
၁၈ သုသးပ့ၤနီၣ်လၢၢ်တဖျၢၣ်+ လၢအမ့ၢ်သုပၢ်,
ဒီးသုတသ့ၣ်နီၣ်ထီၣ် ကစၢ်ယွၤလၢ အဒုးအိၣ်ထီၣ်သုဘၣ်.+
၁၉ ယဟိဝၤယွၤ ထံၣ်ဝဲလၢ အဖိမုၣ်ဖိခွါတဖၣ် မၤဝဲဒ်န့ၣ် ဒီးမၤဆါ အသးအဃိ
အဝဲ စူးကွံာ်ညိကွံာ် အဝဲသ့ၣ်လီၤ.+
၂၀ အဃိ အဝဲတဲဝဲလၢ ‘ယကဃၣ်ကွံာ်ယမဲာ် လၢအဝဲသ့ၣ်အအိၣ်+
ဒီးတၢ်ကကဲထီၣ်အသးဒီး အဝဲသ့ၣ် ဒ်လဲၣ်န့ၣ် ယကကွၢ်တထံၣ်.
၂၁ အဝဲသ့ၣ် ထိၣ်ဟူးထိၣ်ဂဲၤထီၣ် ယတၢ်သးဒိၣ် ခီဖျိ ဘူၣ်ထီၣ်ဘါထီၣ် တၢ်လၢအတမ့ၢ်ယွၤဘၣ် အဃိလီၤ.+
ဒီးအဝဲသ့ၣ် မၤဆါယသးခီဖျိ တၢ်ဂီၤတၢ်ဖှီၣ် လၢအဘျုးတအိၣ်ဘၣ်တဖၣ် အဃိလီၤ.+
အဃိ ယၤစ့ၢ်ကီး ယကထိၣ်ဟူးထိၣ်ဂဲၤထီၣ် အဝဲသ့ၣ် အတၢ်သးက့ၣ် ခီဖျိပှၤတဖၣ်လၢ အတမ့ၢ် ပှၤတကလုာ်ဘၣ်လီၤ.+
ဒီးယကမၤဆါအဝဲသ့ၣ် အသး ခီဖျိလၢ ပှၤတကလုာ်လၢ အတၢ်နၢ်ပၢၢ် တအိၣ်ဘၣ်လီၤ.”+
ဒီးကအီၣ်ကွံာ်ဝဲ ဟီၣ်ခိၣ် ဒီးတၢ်လၢအမဲထီၣ်သၣ်ထီၣ် လၢအပူၤတဖၣ်
ဒီးကအီၣ်ကွံာ် ကစၢၢ်တဖၣ် အဂံၢ်ခီၣ်ထံးလီၤ.
၂၃ ယကမၤအါထီၣ် အဝဲသ့ၣ် အတၢ်ကီတၢ်ခဲ
ဒီးယကခးအဝဲသ့ၣ်လၢ ယပျၢ်တဖၣ် တုၤလၢအလၢာ်လီၤ.
၂၄ အဝဲသ့ၣ် ကလီၤဘဲလီၤဘှး+
ဒီးတၢ်လိၤကိၢ်ဒိၣ်ဒိၣ် ကအီၣ်အဝဲသ့ၣ် ဒီးအဝဲသ့ၣ်ကတုၤလၢတၢ်ဟးဂီၤ ခဲလၢာ်ခဲဆ့လီၤ.+
ယကဆှၢလီၤ ဆၣ်ဖိကီၢ်ဖိအမံၤ လၢအအိၣ်ဒီးအမဲဖးထီ+
ဒီးတၢ်လၢ အဘျိၣ်လၢ ဟီၣ်ခိၣ်ကမူၣ်ကျါ လၢအအိၣ်ဒီး အစုၣ်အပျၢ်တဖၣ်လီၤ.
၂၅ ပှၤလၢအအိၣ်လၢ ဟံၣ်ချၢန့ၣ်+ အဝဲသ့ၣ်အဖိ ကသံလၢနးလီၤ.+
ပှၤမုၣ်ကနီၤဖိၣ်သၣ်ခွါ မ့ၢ်ဂ့ၤ
ဖိသၣ်အီနုၢ် ဒီးပှၤသးပှၢ် လၢ အခိၣ်ဝါမ့ၢ်ဂ့ၤ
မ့ၢ်အိၣ်လၢ ဟံၣ်ပူၤနာ်က့ ကပျံၤတၢ်ဖုးတၢ်လီၤ.+
၂၆ ယဘူးကတဲလၢ “ယကမၤလီၤပြံလီၤပြါ အဝဲသ့ၣ်
တုၤလၢ ပှၤတသ့ၣ်နီၣ်ထီၣ် အဝဲသ့ၣ် နီတဘျီလၢၤဘၣ်.”
၂၇ ဘၣ်ဆၣ် ယဘၣ်ယိၣ်တၢ်လၢ ဒုၣ်ဒါတဖၣ်+
ကနၢ်ပၢၢ်ကမၣ်ဘၣ်ဖုး+
ဒီးအဝဲသ့ၣ် ကတဲဘၣ်ဖုးလၢ “ပဝဲဒၣ်အံၤ ပမၤနၢၤတၢ် လၢပနီၢ်ကစၢ် အဂံၢ်အဘါအဃိ+
ဒီးတမ့ၢ်လၢ ယဟိဝၤယွၤ မၤဝဲ ဒ်အံၤဘၣ်.”
၂၈ အံၣ်စရ့လးမ့ၢ် ပှၤတကလုာ်လၢ အတၢ်ကူၣ်တၢ်ဆး
ဒီးအတၢ်သ့ၣ်ညါနၢ်ပၢၢ် တအိၣ်ဘၣ်.+
၂၉ အဝဲသ့ၣ် မ့ၢ်အိၣ်ဒီး တၢ်ကူၣ်သ့န့ၣ်+ အဝဲသ့ၣ် ကဆိကမိၣ်ထံ တၢ်ဂ့ၢ်အံၤ+
ဒီးကဆိကမိၣ်ဝဲ တၢ်လၢ အကကဲထီၣ်အသး ဒီးအဝဲသ့ၣ်လီၤ.+
၃၀ မ့တမ့ၢ်လၢ အဝဲသ့ၣ်အလၢၢ် ပာ်တ့ၢ်ကွံာ် အဝဲသ့ၣ်+
ဒီးယဟိဝၤယွၤ ဟ့ၣ်လီၤ အဝဲသ့ၣ်လၢ အဒုၣ်အဒါ အစုပူၤ အဃိဘၣ်န့ၣ်
ပှၤတဂၤ လူၤပှၤအဂၤ ၁,၀၀၀
ဒီးပှၤခံဂၤ ဒုးဃ့ၢ်ကွံာ် ပှၤအဂၤ ၁၀,၀၀၀ ကသ့ဒ်လဲၣ်.+
၃၂ အံၣ်စရ့လး အစပံးမုၢ်န့ၣ် လီၤဂာ်ဒီး စဒိၣ် အစပံးမုၢ်
လၢဂမိရၤ အပျီပူၤလီၤ.+
အဝဲသ့ၣ် အစပံးသၣ်တဖၣ် အိၣ်ဒီးအစုၣ်
ဒီးအဝဲသ့ၣ်အစပံးချုၣ်တဖၣ်န့ၣ် ခၣ်ဝဲလီၤ.+
၃၃ အဝဲသ့ၣ် အစပံးထံန့ၣ် မ့ၢ်ဝဲဂုၢ်အၢအစုၣ်
ဒီးဂုၢ်သီအစုၣ်အၢလီၤ.
၃၄ ယကစဲပနီၣ်ဃာ် အဝဲသ့ၣ် အတၢ်မၤတဖၣ်
ဒီးယကပာ်ဃာ်အီၤလၢ ယတၢ်ပာ်ဖှိၣ်တၢ် အလီၢ်လီၤ.+
မုၢ်နံၤလၢ အဝဲသ့ၣ် ကဘၣ်ကီဘၣ်ခဲန့ၣ် ဟဲဘူးထီၣ်လံ
ဒီးတၢ်လၢ အအိၣ်ခိး အဝဲသ့ၣ်အခိၣ်န့ၣ် ကဟဲဝဲချ့ချ့လီၤ.’
၃၆ ဖဲကစၢ်ယွၤ ထံၣ်ဝဲလၢ အဝဲသ့ၣ် အဂံၢ်ဘါလီၤစၢ်
ဒီးအိၣ်တ့ၢ်က့ၤထဲ ပှၤလၢအပတီၢ်ဖုၣ်ကတၢၢ် ဒီးလၢအဂံၢ်စၢ်တဖၣ်အခါ
ယဟိဝၤယွၤ ကစံၣ်ညီၣ်န့ၢ်တၢ်လၢ အပှၤဂီၢ်မုၢ်အဂီၢ်+
ဒီးအကသးကညီၤဘၣ် အခ့အပှၤတဖၣ်လီၤ.+
၃၇ ဒီးကစၢ်ယွၤ ကသံကွၢ်ဝဲလၢ ‘အဝဲသ့ၣ် အယွၤတဖၣ်+
လၢအမ့ၢ် လၢၢ်လၢ အဝဲသ့ၣ်နာ်န့ၢ်ဝဲန့ၣ် အအိၣ်ဖဲလဲၣ်.
၃၈ ယွၤတဖၣ်လၢအအီၣ် အဝဲသ့ၣ် အတၢ်လုၢ် အသိအချါ
ဒီးအအီ အဝဲသ့ၣ်အစပံးထံ လၢအလုၢ်ထီၣ်ဝဲန့ၣ် အိၣ်ဖဲလဲၣ်.+
မၢယွၤတဖၣ်အံၤ ဆၢထၢၣ်မၤစၢၤ
ဒီးမၤပူၤဖျဲးသုတက့ၢ်.
ပှၤမၤပူၤဖျဲးပှၤလၢ ယစုပူၤ တသ့နီတဂၤဘၣ်.+
၄၀ ယယူာ်ထီၣ်ယစု လၢမူခိၣ်
ဒီးယအၢၣ်လီၤလၢ “ဒ်ယအိၣ်မူယဲ လီၤထူလီၤယိာ်အသိး”+
၄၁ ယကကျ့အ့ၣ်ထီၣ် ယနးလၢ အကပြုၢ်ကပြီၤတဘ့ၣ် အကနၣ်
ဒီးယကကတဲာ်ကတီၤထီၣ် ယသးလၢ ယကစံၣ်ညီၣ်တၢ်အဂီၢ်+
ယကဟ့ၣ်ကၣ်က့ၤ ယဒုၣ်ယဒါတဖၣ်+
ဒီးယကမၤဆၢက့ၤ ပှၤလၢအသးဟ့ယၤလီၤ.
၄၂ ယကဒုးအီမူၤ ယပျၢ်တဖၣ် လၢတၢ်သွံၣ်,
ဒီးယနးကအီၣ် တၢ်ညၣ်
ဃုာ်ဒီး ပှၤလၢ အဘၣ်တၢ်မၤသံအီၤ ဒီးပှၤလၢ အဘၣ်တၢ်ဖီၣ်န့ၢ်အီၣ်တဖၣ် အသွံၣ်
ဒီးဒုၣ်ဒါအခိၣ်အနၢ်တဖၣ် အခိၣ်သၣ်ဃံလီၤ.’
၄၃ ပှၤကလုာ်တဖၣ်လၢ အိၣ်ဒီး ယွၤအပှၤဂီၢ်မုၢ်သ့ၣ်ဧၢ, သးခုတက့ၢ်.+
အဝဲကမၤကၣ်တၢ်လၢ အခ့အပှၤတဖၣ် အသွံၣ်အဂီၢ်,+
အဝဲကဟ့ၣ်ကၣ် အဒုၣ်အဒါတဖၣ်+
ဒီးအဝဲ ကမၤကဆှီထီၣ်က့ၤ တၢ်ဒဲးဘးလၢ အအိၣ်လၢ အပှၤဂီၢ်မုၢ် အကီၢ်ပူၤလီၤ.”
၄၄ စီၤမိၤၡ့ ဒီးစီၤနိၣ်အဖိခွါ စီၤဟိၤၡ့* ဟဲဝဲ ဒီးစီၤမိၤၡ့+ တဲဖျါထီၣ်န့ၢ် ပှၤဂီၢ်မုၢ်တဖၣ် လၢတၢ်သးဝံၣ် တယုၢ်အံၤလီၤ.+ ၄၅ ဖဲစီၤမိၤၡ့ တဲဝဲ ပှၤအံၣ်စရ့လးဖိတဖၣ်လၢ တၢ်ကတိၤတဖၣ်အံၤ ဝံၤဝဲခဲလၢာ်အခါ ၄၆ အဝဲတဲအဝဲသ့ၣ်လၢ “တၢ်ကတိၤလၢ ယဟ့ၣ်ပလီၢ်သု လၢတနံၤအံၤန့ၣ် တိၢ်နီၣ်ဃာ်အီၤ လၢသုသးပူၤခဲလၢာ်တက့ၢ်.+ သုကဘၣ်မၤဒ်န့ၣ် ဒ်သိးသုသိၣ်လိ သုဖိတဖၣ်လၢ ကမၤထွဲဝဲ တၢ်ကတိၤလၢ အအိၣ်လၢ တၢ်သိၣ်တၢ်သီအံၤ* အပူၤခဲလၢာ် ကသ့အဂီၢ်လီၤ.+ ၄၇ တၢ်ကတိၤတဖၣ်အံၤ တမ့ၢ် တၢ်ကလီကလီဘၣ်, အမ့ၢ်ဝဲ တၢ်လၢအကဟ့ၣ်သု တၢ်မူလီၤ.+ ဒီးသုမ့ၢ်ဒိကနၣ် တၢ်ကတိၤတဖၣ်အံၤန့ၣ် ဖဲသုလဲၤခီဂာ် ထံကျိယၢ်ဒ့ၣ် ဒီးမၤန့ၢ်ထံကီၢ်ဝံၤအလီၢ်ခံ သုကအိၣ်မူဘၣ်လၢ အပူၤဖးယံာ်လီၤ.”
၄၈ ဖဲတၢ်တနံၤဃီန့ၣ် ယဟိဝၤယွၤ တဲစီၤမိၤၡ့လၢ ၄၉ “လဲၤထီၣ်လၢ ဧဘါရံၣ် အကစၢၢ်+ တုၤလၢ နဘိအဒီခိၣ်+ ဒီးကွၢ်စိလီၤ ကီၢ်ကနၤဧၣ်လၢ ယကဟ့ၣ်လီၤ ပှၤအံၣ်စရ့လးဖိ ဒ်တၢ်န့ၢ်သါအသိးတက့ၢ်. ကစၢၢ်အံၤ အိၣ်ဝဲလၢ ကီၢ်မိၤအးအပူၤ လၢဝ့ၢ်ယရံၤဃိ အမဲာ်ညါလီၤ.+ ၅၀ နကသံလၢ ကစၢၢ်လၢ နကလဲၤထီၣ်အီၤတဖျၢၣ်အံၤ အလိၤ ဒ်နဒီပုၢ်ဝဲၢ်ခွါ စီၤအၤဟရိၣ် သံလၢ ကစၢၢ်ဃိၢ်အသိး,+ ၅၁ မ့ၢ်လၢ ဖဲထံလၢမရံၤဘါ*+ လၢအအိၣ်လၢကၤဒ့ၣ် လၢစံၣ် အပှၢ်မုၢ်ကနၢပူၤန့ၣ် သုခံဂၤလၢာ်တတီဒီးယၤဘၣ် အဃိလီၤ. ဒီးဖဲန့ၣ်န့ၣ် သုတပာ်စီဆှံယၤ လၢပှၤအံၣ်စရ့လးဖိတဖၣ် အမဲာ်ညါဘၣ်.+ ၅၂ ကီၢ်လၢ ယကဟ့ၣ်လီၤ ပှၤအံၣ်စရ့လးဖိတဖၣ်န့ၣ် နကထံၣ်စိအီၤ လၢအယံၤ ဘၣ်ဆၣ် နတလဲၤနုာ်ဘၣ် လၢအပူၤဘၣ်.”+
၃၃ တချုးလၢ ယွၤလၢအမ့ၢ်အတီ အခ့အပှၤ စီၤမိၤၡ့တဂၤ သံဒံးဘၣ်န့ၣ် အဝဲဆိၣ်ဂ့ၤဝဲ ပှၤအံၣ်စရ့လးဖိတဖၣ် ဒ်အံၤလီၤ.+ ၂ အဝဲတဲဝဲလၢ
“ယဟိဝၤယွၤ ဟဲလၢ စံၤနါ,+
ဒီးကပီၤဘၣ် အပှၤဂီၢ်မုၢ် လၢ စ့ဧၢ်လီၤ.
လၢပၤရၣ် အကစၢၢ်ကလိန့ၣ် အလၤကပီၤ ကပီၤထီၣ်ဝဲ+
ဒီးမူခိၣ်ကလူးစီဆှံ လၢအကလးတဖၣ် အိၣ်ဒီးအီၤ,+
အသုးမုၢ်လၢ အဂံၢ်ဆူၣ်ဘါဆူၣ်လၢ အစုထွဲတခီလီၤ.+
ဒီးမ်နဟဲက့ၤကိးအီၤလၢ အပှၤကလုာ် အအိၣ်တက့ၢ်.
အဝဲသူ အတၢ်ဂံၢ်တၢ်ဘါ ဒ်သိး ကဒီသဒၢ တၢ်လၢအမ့ၢ်အတၢ်လီၤ.
မ်နမၤစၢၤအီၤ ဒ်သိး အကဒုးအဒုၣ်အဒါတဖၣ် အဂီၢ်တက့ၢ်.”+
၈ မ့မ့ၢ် ဘၣ်ဃးဒီး လ့ၤဝံန့ၣ် စီၤမိၤၡ့ တဲဝဲလၢ+
“ပှၤတဂၤလၢ အတီဒီးနၤန့ၣ်*+ နတူမံၣ် ဒီးနအူရံၣ်+ မ့ၢ်အဝဲဒၣ် အတၢ်လီၤ.
၉ ပှၤလ့ၤဝံဖိန့ၣ် မ့ၢ်လၢ အဒိကနၣ် နတၢ်ကတိၤ
ဒီးမၤထွဲ နတၢ်အၢၣ်လီၤအီလီၤအဃိ+
အဝဲသ့ၣ် တဲအမိၢ်အပၢ်လၢ ‘ယတဘၣ်ဃးဒီးသုဘၣ်.’
ဒီးအဝဲသ့ၣ် တကနၣ်ဃုာ် အဒီပုၢ်ဝဲၢ်တဖၣ်ဘၣ်,+
ဒီးတအိၣ်ဃူအဖိဘၣ်.
မ်အဝဲသ့ၣ် လုၢ်ထီၣ်န့ၢ်နၤ တၢ်နၢမူလၢ အမၤမုာ်နသး,+
မ်အဝဲသ့ၣ်လုၢ်ထီၣ် တၢ်လုၢ်ဒွဲၣ်အူ လၢနတၢ်လုၢ်လီၢ်အဖီခိၣ်တက့ၢ်.+
၁၁ အိ ယဟိဝၤယွၤဧၢ, ဆိၣ်ဂ့ၤအီၤ ဒီးဟ့ၣ်အီၤ တၢ်ဂံၢ်တၢ်ဘါတက့ၢ်.
ဒီးမ်နဘၣ်သူၣ်ဘၣ်သး အတၢ်မၤတဖၣ်တက့ၢ်.
မၤသဘှံး အဒုၣ်အဒါတဖၣ်အခီၣ်
ဒ်သိး ပှၤလၢအသးဟ့အီၤ သုတဟဲအိၣ်ထီၣ် လၢၤတဂ့ၤန့ၣ်တက့ၢ်.”
၁၂ ဘၣ်ဃးဒီး ဘံၣ်ယၤမံၣ်န့ၣ် စီၤမိၤၡ့ တဲဝဲလၢ+
“ပှၤလၢ ယဟိဝၤယွၤ အဲၣ်အီၤန့ၣ် မ်အအိၣ်ဘၣ် ဘံၣ်ဘံၣ်ဘၢဘၢ လၢအကပၤတက့ၢ်.
အဝဲကဒီသဒၢအီၤ ဒီတနံၤညါ
ဒီးအဝဲ ကအိၣ်ဝဲဆိးဝဲ လၢအဖံဘၣ်ခိၣ် အကဆူးလီၤ.”
၁၃ ဘၣ်ဃးဒီး ယိၤသးန့ၣ် စီၤမိၤၡ့ တဲဝဲလၢ+
“မ်ယဟိဝၤယွၤဆိၣ်ဂ့ၤ အတၢ်လီၢ်လၢ+
ပစီၤထံ ဒီးထံလၢ အဟဲထီၣ်လၢ ထံထီၣ်ပၢၢ်,+
ဒီးတၢ်အဂ့ၤတဖၣ် လၢအအိၣ် လၢမူခိၣ်,
၁၄ ဒီးတၢ်လၢ အဂ့ၤလၢ မုၢ်ဒုးဒိၣ်ထီၣ်ဝဲတဖၣ်,
ဒီးတၢ်လၢ အဂ့ၤလၢ အမဲထီၣ်ဝဲ ကိးလါဒဲး,+
၁၅ ဒီးတၢ်လၢ အဂ့ၤကတၢၢ်လၢ အဟဲလၢ ကစၢၢ်လၢပျၢၤတဖၣ်+
ဒီးတၢ်ဂ့ၤလၢ အအိၣ်လၢ တၢ်လူၢ်လၢ အအိၣ်ဖးယံာ်တဖၣ်,
၁၆ ဒီးတၢ်လၢအဂ့ၤလၢ ဟီၣ်ခိၣ်ချၢ ဒီးဟီၣ်ခိၣ် အတၢ်ထူးတၢ်တီၤ ခဲလၢာ်တက့ၢ်.+
ဒီးမ်ပှၤလၢ အလီၣ်ဖျါထီၣ်အသးလၢ သပှီာ်တၤဆှုၣ် အကျါတဂၤ ဘၣ်သူၣ်ဘၣ်သးအီၤတက့ၢ်.+
မ်တၢ်ဆိၣ်ဂ့ၤတဖၣ်အံၤ လီၤဘၣ်လၢ ယိၤသး အခိၣ်လိၤ,
ဒီးမ်အစီၢ်လီၤလၢ ပှၤလၢအဘၣ်တၢ်ဃုထၢထီၣ်အီၤလၢ အဒီပုၢ်ဝဲၢ်အကျါ တဂၤအံၤ အခိၣ်လိၤတက့ၢ်.+
၁၇ အတၢ်ဂံၢ်တၢ်ဘါ လီၤဂာ်ဒ် ကျီၢ်ဖါ အဝဲၢ်ကိတဒု အတၢ်ဂံၢ်တၢ်ဘါ အသိးန့ၣ်လီၤ.
အနၢၤတဖၣ်န့ၣ် မ့ၢ်ဝဲ ကျီၢ်မံၤဖါ အနၢၤတဖၣ်လီၤ.
ဒီးအကဟးဘျၢၣ် ပှၤခဲလၢာ်လၢအနၢၤ
ပၢၢ်တုၤလၢ ဟီၣ်ခိၣ်အနၢၣ် အကတၢၢ်လီၤ.
အနၢၤတဖၣ်န့ၣ် မ့ၢ်ဝဲ အ့ဖရဲၣ်အပှၤလၢ အကလးတဖၣ်+
ဒီးမ့ၢ်ဝဲ မနၤၡ့ၤ အပှၤလၢ အကထိတဖၣ်လီၤ.”
၁၈ ဘၣ်ဃးဒီး စဘူလိၣ်န့ၣ် အဝဲတဲဝဲလၢ+
“မ်စဘူလိၣ် န့ၢ်ဘၣ်တၢ်သးခု ဖဲအလဲၤပနံာ်တၢ်ကၤတၢ်တက့ၢ်.
မ်ယံးစၣ်ကၢ် အိၣ်ဒီးတၢ်သးခု လၢအဒဲတဖၣ် အပူၤတက့ၢ်.+
၁၉ မ့ၢ်လၢ အဝဲသ့ၣ် ကဒိးန့ၢ်ဘၣ် ပီၣ်လဲၣ် အတၢ်ထူးတၢ်တီၤတဖၣ် အါအါဂီၢ်ဂီၢ်
ဒီးတၢ်လုၢ်ဒိၣ်ပှ့ၤဒိၣ်လၢ အအိၣ်ခူသူၣ်လၢမဲးကျါ အါအါဂီၢ်ဂီၢ်အဃိ
အဝဲသ့ၣ် ကကိးထီၣ် ပှၤဂၤ ဆူ ကစၢၢ်ခိၣ်လီၤ.
ဒီးဖဲန့ၣ်န့ၣ် အဝဲသ့ၣ်ကလုၢ်ထီၣ်တၢ် လၢတၢ်တီတၢ်လိၤ အပူၤလီၤ.”
အဝဲ ကကိာ်လီၤဒ် ခ့ယုၢ်တဒု
ဒီးကအ့ၣ်ဖှီဝဲ ဆၣ်ဖိကီၢ်ဖိ အစု ဒီးအခိၣ်လီၤ.
၂၁ အဝဲကဃုထၢ တၢ်လီၢ်လၢ အဂ့ၤကတၢၢ်လၢ အနီၢ်ကစၢ် အဂီၢ်လီၤ.+
တၢ်လီၢ်အံၤမ့ၢ်ဝဲ တၢ်လီၢ်လၢ ပှၤလၢအဟ့ၣ်လီၤ တၢ်သိၣ်တၢ်သီတဂၤ ပာ်ပနီၣ်န့ၢ်အီၤလီၤ.+
ပှၤဂီၢ်မုၢ်အခိၣ်အနၢ်တဖၣ် ကပာ်ဖှိၣ်ထီၣ်အသးလီၤ.
အဝဲကမၤ ဒ်ယဟိဝၤယွၤ အတၢ်တီတၢ်လိၤအသိး
ဒီးမၤထွဲဝဲဒ် အတၢ်စံၣ်ညီၣ်ဆၢတဲာ်တဖၣ် အိၣ်ဝဲအသိးလၢ အံၣ်စရ့လးအဂီၢ်လီၤ.”
အဝဲကဖုထီၣ်လၢ ဘၤၡၣ် အပူၤလီၤ.”+
၂၃ မ့မ့ၢ် ဘၣ်ဃးဒီး နးသၤလံန့ၣ် စီၤမိၤၡ့ တဲဝဲလၢ+
“နးသၤလံန့ၣ် သးမံဝဲ မ့ၢ်လၢ ယဟိဝၤယွၤ ဘၣ်သူၣ်ဘၣ်သး အီၤအဃိ
ဒီးအဝဲ ဒိးန့ၢ်ဘၣ် ယွၤအတၢ်ဆိၣ်ဂ့ၤ အါအါဂီၢ်ဂီၢ်လီၤ.
လဲၤမၤန့ၢ် တၢ်လီၢ်လၢ မုၢ်နုာ် ဒီးကလံၤထံးတခီ တက့ၢ်.”
၂၄ ဘၣ်ဃးဒီး အၤၡ့ၢ်န့ၣ် စီၤမိၤၡ့ တဲဝဲလၢ+
“ကစၢ်ယွၤ ဆိၣ်ဂ့ၤ အၤၡ့ၢ် လၢ အဖိခွါ အါအါဂီၢ်ဂီၢ်လံ.
မ်အဒီပုၢ်ဝဲၢ်တဖၣ် ဘၣ်သူၣ်ဘၣ်သးအီၤတက့ၢ်.
ဒီးမ်အဘျၢလီၤဘၣ် အခီၣ်လၢ သိအကျါတက့ၢ်.
၂၅ နတြဲၤအဘိတဖၣ်န့ၣ် မ့ၢ်ဝဲထးဒီး တိၢ်ဘီ,+
ဒီးနကအိၣ်ဘၣ် ဘံၣ်ဘံၣ်ဘၢဘၢလၢ နတၢ်အိၣ်မူတစိၤသးလီၤ.
၂၆ ပှၤလၢအလီၤဂာ်ဒီး ယၡူရိၣ်+ အယွၤ လၢအမ့ၢ်အတီတဂၤန့ၣ် တအိၣ်နီတဂၤဘၣ်.+
လၢတၢ်ကဟုကညီၢ်အပူၤ အဝဲလဲၤဒိးဝဲ တၢ်အၢၣ်လၢမူခိၣ်
ဒ်သိးကမၤစၢၤသုအဂီၢ်လီၤ.+
အဝဲ ကနီဟးထီၣ်ကွံာ် ဒုၣ်ဒါတဖၣ်လၢ သုမဲာ်ညါလီၤ.+
ဒီးအကတဲသုလၢ ‘မၤဟးဂီၤကွံာ် အဝဲသ့ၣ်တက့ၢ်.’+
၂၈ အံၣ်စရ့လး ကအိၣ်ဘၣ် ဘံၣ်ဘံၣ် ဘၢဘၢ
ဒီးစီၤယၤကိာ် အစၢၤအသွဲၣ်တဖၣ် ကအိၣ်ဘၣ်ပူၤပူၤဖျဲးဖျဲး
လၢကီၢ်လၢ အပှဲၤဒီးဘုဧိၤဟုဧိၤ ဒီးစပံးထံအသီ+
ဒီးမူခိၣ်အပစီၤထံ လီၤဘၣ်လၢ အပူၤလီၤ.+
၂၉ အံၣ်စရ့လးဧၢ, သုမ့ၢ်ပှၤလၢ အသးခုလီၤ.+
သုဒိးန့ၢ်ဘၣ် တၢ်အုၣ်က့ၤခီၣ်က့ၤလၢ ယဟိဝၤယွၤ အအိၣ်လီၤ.+
အဝဲမ့ၢ် သုကတီၤလၢ အဒီသဒၢသု+
ဒီးသုနးတဘ့ၣ်လၢ အလီၤဘီ လီၤမုၢ်လီၤ.
အဃိမ့ၢ်မတဂၤ လီၤဂာ်ဒီးသုလဲၣ်.+
၃၄ စီၤမိၤၡ့ အိၣ်လၢ မိၤအးအပှၢ်လၢ်ကျါ ဒီးလဲၤထီၣ်လၢ ကစၢၢ်နဘိ+ လၢပံးစကၤ အဒီခိၣ်လၢ+ အအိၣ်လၢ ယရံၤဃိ အမဲာ်ညါလီၤ.+ ဒီးယဟိဝၤယွၤ ဒုးထံၣ်အီၤ ကီၢ်ဒီဘ့ၣ် စးထီၣ်လၢကံးလဧး တုၤလၢဒၣ်,+ ၂ ဒီးနးသၤလံ အတၢ်လီၢ်ခဲလၢာ်, အ့ဖရဲၣ်ဒီးမနၤၡ့ၤ အတၢ်လီၢ်ခဲလၢာ် ဒီးယူဒၤ အတၢ်လီၢ်တၢ်ကျဲခဲလၢာ် တုၤလီၤလၢ ပီၣ်လဲၣ်လၢ မုၢ်နုာ်တခီ,+ ၃ ဒီးနဲကဲၤ+ ဒီးယၢ်ဒ့ၣ်အဟီၣ်ကဝီၤ+ လၢအပၣ်ဃုာ်ဒီး ယရံၤဃိ အတၢ်ပၢၤခိၣ်, ဝ့ၢ်သ့ၣ်စူၣ်ပလိၣ် ဒီးတုၤလၢ စိၤဧၢ်လီၤ.+
၄ ယဟိဝၤယွၤ တဲအီၤလၢ “အဝဲအံၤမ့ၢ် ကီၢ်လၢ ယအၢၣ်လီၤတ့ၢ် စီၤအၤဘြၤဟၣ်, စီၤအံၤစဲး ဒီးစီၤယၤကိာ်လီၤ. ယတဲအဝဲသ့ၣ်လၢ ယကဟ့ၣ်လီၤ အဝဲသ့ၣ်အချံအသၣ်လၢ ကီၢ်အံၤလီၤ.+ ယဒုးထံၣ်နၤလၢ ကီၢ်အံၤဘၣ်ဆၣ် နတလဲၤနုာ်လီၤဘၣ် လၢအပူၤဘၣ်.”+
၅ ဒီးဒ်ယဟိဝၤယွၤ တဲပာ်စၢၤဝဲအသိး ယဟိဝၤယွၤ အခ့အပှၤ စီၤမိၤၡ့ သံဝဲဖဲန့ၣ် လၢကီၢ်မိၤအးအပူၤလီၤ.+ ၆ ဒီးအဝဲ* ခူၣ်လီၤအီၤလၢ ဘ့ၤသပဧိၢ် အဝၢ်ဘးခီ လၢကီၢ်မိၤအး အတၢ်တြီၤပူၤလီၤ. ဒီးတုၤလီၤလၢ မုၢ်မဆါတနံၤအံၤန့ၣ် ပှၤတသ့ၣ်ညါ အသွၣ်ခိၣ်အလီၢ် နီတဂၤဘၣ်.+ ၇ ဖဲစီၤမိၤၡ့သံအခါ အသးနံၣ်အိၣ်ဝဲ ၁၂၀ လီၤ.+ ဖဲန့ၣ်အဆၢကတီၢ် အမဲာ်ချံ တကဒုဒံးဘၣ် ဒီးအဂံၢ်အဘါ ဆူၣ်ဒံးဝဲလီၤ. ၈ ဖဲကီၢ်မိၤအး အပှၢ်မုၢ်ကနၢ အပူၤန့ၣ် ပှၤအံၣ်စရ့လးဖိတဖၣ် ဟီၣ်ဝဲလၢ စီၤမိၤၡ့အဃိ အသီ ၃၀ လီၤ.+ ဒီးမုၢ်နံၤလၢ ပှၤဟီၣ်ဝဲယၢၤဝဲလၢ စီၤမိၤၡ့အဃိန့ၣ် ဝံၤဝဲလီၤ.
၉ ဒီးစီၤနိၣ်အဖိခွါ စီၤယိၤၡူန့ၣ် ပှဲၤဝဲဒီး တၢ်ကူၣ်သ့* မ့ၢ်လၢ စီၤမိၤၡ့ ပာ်ထီၣ်အစုလၢအလိၤ အဃိလီၤ.+ ဒီးပှၤအံၣ်စရ့လးဖိတဖၣ် မၤဝဲဒ် ယဟိဝၤယွၤ မၤလိာ်စီၤမိၤၡ့အသိး ဒီးဒိကနၣ် စီၤယိၤၡူ အကလုၢ်လီၤ.+ ၁၀ ဘၣ်ဆၣ် လၢပှၤအံၣ်စရ့လးဖိ အကျါန့ၣ် ဝံလၢ ယဟိဝၤယွၤ ရ့အီၤ ဘူးဘူးတံၢ်တံၢ်*+ ဒ်စီၤမိၤၡ့အသိးန့ၣ်+ တအိၣ်ထီၣ်ကဒီး နီတဂၤဒံးဘၣ်. ၁၁ လၢကီၢ်အဲၤကူပတူးအပူၤ, လၢဖၤရိၤ ဒီးအခ့အပှၤခဲလၢာ် အမဲာ်ညါ ဒီးလၢအကီၢ်ဒီဘ့ၣ်အပူၤန့ၣ် စီၤမိၤၡ့မၤဝဲ တၢ်ပနီၣ်လီၤလးတဖၣ် ဒီးတၢ်လီၤလးတဖၣ်လၢ ယဟိဝၤယွၤ မၢအမၤဝဲခဲလၢာ်လီၤ.+ ၁၂ ဒီးစီၤမိၤၡ့ ပာ်ဖျါထီၣ်ဝဲ တၢ်အစုလၢ အဂံၢ်ဆူၣ်ဘါဆူၣ် ဒီးတၢ်စိတၢ်ကမီၤလၢ အလီၤကမၢကမၣ် လၢပှၤအံၣ်စရ့လးဖိခဲလၢာ် အမဲာ်ညါလီၤ.+
ဘၣ်သ့ၣ်သ့ၣ် ကမ့ၢ် “ကစၢ်ယွၤ ဒုးဆူၣ်ထီၣ် အဂံၢ်အဘါ.”
မ့ၢ်စ့ၢ်ကီး “တလၢဘၣ်.”
မ့ၢ်ဝဲ ကီးကြ့တ့ၤ.
မ့ၢ်စ့ၢ်ကီး “တၢ်လၢပှၤသူအီၤ ဒ်သိးကစိာ်ဝဲ ပှၤသံအစိၣ်.”
ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
အခီပညီလိၤလိၤ “လၢသုတၢ်အိၣ်မူ ကိးသနၢၣ်ဒဲးအပူၤ.”
မ့ၢ်စ့ၢ်ကီး “တဲကဒါက့ၤ တဘျီဝံၤတဘျီ မ့တမ့ၢ် ဒုးစဲဘူးလၢ အသးပူၤ.”
အခီပညီမ့ၢ်ဝဲ “တၢ်မၤကွၢ်.”
မ့ၢ်စ့ၢ်ကီး “တၢ်စုလီၢ်ခီၣ်ခိၣ်လၢ အလုၢ်ဒိၣ်ပှ့ၤဒိၣ်တခါလၢအဂီၢ်.”
မ့ၢ်စ့ၢ်ကီး “တလၢဘၣ်.”
အခီပညီလိၤလိၤ “လၢၢ်မ့ၣ်.”
အခီပညီမ့ၢ်ဝဲ “တၢ်မၤကွၢ်.”
အခီပညီလိၤလိၤ “ကူးတရံး.”
မ့ၢ်စ့ၢ်ကီး “တၢ်ဟ့ၣ်.”
အခီပညီလိၤလိၤ “ယ.”
မ့ၢ်စ့ၢ်ကီး “ဘုးတာ်.”
မ့ၢ်စ့ၢ်ကီး “မဲာ်တူၢ်ခိၣ်.”
မ့ၢ်စ့ၢ်ကီး “တၢ်စုလီၢ်ခီၣ်ခိၣ်လၢ အလုၢ်ဒိၣ်ပှ့ၤဒိၣ်တခါလၢအဂီၢ်.”
မ့ၢ်စ့ၢ်ကီး “ထုးထီၣ်က့ၤ.”
ယုၢ်ၡဖၣ်န့ၣ် မ့ၢ်ဝဲ ဆၣ်ဖိကီၢ်ဖိ တကလုာ် လၢအလီၤဂာ်ဒ် ပဒဲအသိး ဒီးအခံမဲၢ်တအိၣ်ဘၣ် ဒီးအဝဲသ့ၣ်အိၣ်လၢ လၢၢ်ကဆူးလ့ကဆူး.
မ့ၢ်စ့ၢ်ကီး “ပံာ်သံကီသံ.”
အခီပညီလိၤလိၤ “သုကဘၣ် သလၣ်ထီၣ်သုစု လၢတၢ်သူၣ်အိၣ်သးအိၣ်အပူၤ.”
မ့ၢ်စ့ၢ်ကီး “တၢ်ဟ့ၣ်.”
ကွၢ် တၢ်ကတိၤအခီပညီ.
မ့ၢ်ဝဲ ပှၤလုၢ်တၢ်ဒိၣ်တဖၣ် လၢအဟဲလီၤစၢၤလၢ ပှၤလ့ၤဝံဖိ.
မ့ၢ်ဝဲ ပှၤလုၢ်တၢ်ဒိၣ်တဖၣ် လၢအဟဲလီၤစၢၤလၢ ပှၤလ့ၤဝံဖိ.
မ့ၢ်ဝဲ ပှၤလုၢ်တၢ်ဒိၣ်တဖၣ် လၢအဟဲလီၤစၢၤလၢ ပှၤလ့ၤဝံဖိ.
အခီပညီလိၤလိၤ “ဒုးလဲၤခီဂာ်.”
အခီပညီလိၤလိၤ “ပှၤလၢအမၤကၣ်က့ၤတၢ်လၢ တၢ်သွံၣ်အဂီၢ်.”
မ့ၢ်ဝဲ ပှၤလုၢ်တၢ်ဒိၣ်တဖၣ် လၢအဟဲလီၤစၢၤလၢ ပှၤလ့ၤဝံဖိ.
အခီပညီလိၤလိၤ “ပစုတလူလီၤ ပှၤတဂၤအံၤ အသွံၣ်ဘၣ်.”
မ့ၢ်ဝဲ ပှၤအံၣ်စရ့လးဖိ ကဒဲကဒဲ.
မ့ၢ်စ့ၢ်ကီး “ပာ်တ့ၢ်ကွံာ်အီၤ.”
မ့ၢ်စ့ၢ်ကီး “ပာ်တ့ၢ်ကွံာ်အီၤ.”
၁ ၡက့လးန့ၣ် အဃၢထဲသိးဒီး ၁၁.၄ ကြဲၣ်(မ်). ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
မ့ၢ်စ့ၢ်ကီး “တၢ်လၢအကမၤဘၣ်အၢလီၤသုသး.”
အခီပညီလိၤလိၤ “တၢ်လုၢ်ဟံၣ် အဃဲသဲမုၣ် ဒီးအဃဲသဲခွါ.”
မ့ၢ်စ့ၢ်ကီး “တုၤအလၢအီၣ်.”
မ့ၢ်စ့ၢ်ကီး “ဘုစဲၤ.”
မ့ၢ်ဝဲ လံာ်လၢ ပှၤကမၤကတၢၢ်ကွံာ် အတၢ်ဆီဟံၣ်ဆီဃီအဂီၢ်.
မ့ၢ်စ့ၢ်ကီး “ပာ်တ့ၢ်ကွံာ်အီၤ.”
မ့ၢ်ဝဲ ပှၤလုၢ်တၢ်ဒိၣ်တဖၣ် လၢအဟဲလီၤစၢၤလၢ ပှၤလ့ၤဝံဖိ.
အဲၣ်ဒိးတဲဝဲ အစုလၣ်.
ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
မ့ၢ်စ့ၢ်ကီး “တၢ်စုလီၢ်ခီၣ်ခိၣ်လၢ အလုၢ်ဒိၣ်ပှ့ၤဒိၣ်တခါလၢအဂီၢ်.”
မ့ၢ်ဝဲ စီၤမိၤၡ့အတၢ်သိၣ်တၢ်သီ.
မ့ၢ်ဝဲ စီၤမိၤၡ့အတၢ်သိၣ်တၢ်သီ.
မ့ၢ်ဝဲ ပှၤလုၢ်တၢ်ဒိၣ်တဖၣ် လၢအဟဲလီၤစၢၤလၢ ပှၤလ့ၤဝံဖိ.
မ့ၢ်စ့ၢ်ကီး “ပှၤလၢအမၤတၢ်ဒီး သ့ၣ်ဒီးထး.”
မ့ၢ်စ့ၢ်ကီး “မ်တၢ်မၤအသး ဒ်န့ၣ်တက့ၢ်.”
မ့ၢ်စ့ၢ်ကီး “တၢ်ဟ့ၣ်.”
မ့ၢ်ဝဲ စီၤမိၤၡ့အတၢ်သိၣ်တၢ်သီ.
မ့ၢ်စ့ၢ်ကီး “တီၣ်.”
အခီပညီလိၤလိၤ “ယၤ.”
အခီပညီလိၤလိၤ “မူခိၣ်လၢအအိၣ်လၢ သုဖီခိၣ်န့ၣ် ကကဲထီၣ်တိၢ်ဘီ.”
အခီပညီလိၤလိၤ “ဟီၣ်ခိၣ်လၢအိၣ်လၢ သုဖီလာ်န့ၣ် ကကဲထီၣ်ထး.”
မ့ၢ်စ့ၢ်ကီး “တလၢဘၣ်.”
မ့ၢ်ဝဲ တၢ်လၢအအိၣ်လၢ ပိာ်မုၣ်အဒၢလီၢ် လၢအဟးထီၣ် ဖဲအအိၣ်ဖျဲၣ်ထီၣ်အဖိအခါ.
မ့ၢ်ဝဲ စီၤမိၤၡ့အတၢ်သိၣ်တၢ်သီ.
မ့ၢ်ဝဲ စီၤမိၤၡ့အတၢ်သိၣ်တၢ်သီ.
ယဟိဝၤယွၤ မၤဝဲတၢ်အၢၣ်လီၤအီလီၤ ခီဖျိလၢ စီၤမိၤၡ့အဃိ “ယ” မ့ၢ်ဝဲ စီၤမိၤၡ့လီၤ.
အခီပညီလိၤလိၤ “ပှၤလၢအတအိၣ်ဒီးပှၤတနံၤညါအံၤဘၣ်.”
မ့ၢ်ဝဲ စီၤမိၤၡ့အတၢ်သိၣ်တၢ်သီ.
အခီပညီလိၤလိၤ “ကူးတရံး.”
မ့ၢ်ဝဲ စီၤမိၤၡ့အတၢ်သိၣ်တၢ်သီ.
မ့ၢ်ဝဲ စီၤမိၤၡ့အတၢ်သိၣ်တၢ်သီ.
မ့ၢ်ဝဲ ပှၤလုၢ်တၢ်ဒိၣ်တဖၣ် လၢအဟဲလီၤစၢၤလၢ ပှၤလ့ၤဝံဖိ.
အခီပညီလိၤလိၤ “တၢ်မၤကမၣ်မုၣ်ကမၣ်ခွါ လၢနီၢ်သးတခီ ဒ်ပိာ်မုၣ် ဆါလီၤအီၣ်သးအသိး.”
အခီပညီလိၤလိၤ “လၢၢ်မ့ၣ်.”
အခီပညီမ့ၢ်ဝဲ “ပှၤလၢ အသူၣ်တီသးလိၤ.” မ့ၢ်ဝဲ မံၤလၤသၣ်ကပီၤလၢ ပှၤအံၣ်စရ့လးဖိအဂီၢ်.
လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.
မ့ၢ်ဝဲ စီၤယိၤၡူအမံၤလၢညါ.
မ့ၢ်ဝဲ စီၤမိၤၡ့အတၢ်သိၣ်တၢ်သီ.
အခီပညီမ့ၢ်ဝဲ “တၢ်တဲအါတၢ်.”
အခီပညီလိၤလိၤ “စီၤယၤကိာ် အတၢ်အိၣ်ဖှိၣ်.”
အခီပညီမ့ၢ်ဝဲ “ပှၤလၢ အသူၣ်တီသးလိၤ.” မ့ၢ်ဝဲ မံၤလၤသၣ်ကပီၤလၢ ပှၤအံၣ်စရ့လးဖိအဂီၢ်.
“န” ဒီး “နၤ” လၢလံာ်စီဆှံ တဆၢအံၤအပူၤန့ၣ် အဲၣ်ဒိးတဲဝဲ ကစၢ်ယွၤလီၤ.
အခီပညီမ့ၢ်ဝဲ “တၢ်တဲအါတၢ်.”
မ့ၢ်ဝဲ စီၤမိၤၡ့အတၢ်သိၣ်တၢ်သီ.
ဘၣ်သ့ၣ်သ့ၣ် ကမ့ၢ် “တၢ်လီၢ်ထီၣ်ထီတဖၣ်.”
ဖျါလၢအဲၣ်ဒိးတဲဝဲ ကစၢ်ယွၤ.
မ့ၢ်စ့ၢ်ကီး “တၢ်ကူၣ်သ့လၢ အဟဲလၢ ယွၤအသးစီဆှံ.”
အခီပညီလိၤလိၤ “ပှၤလၢကစၢ်ယွၤ သ့ၣ်ညါအီၤလၢ မဲာ်သကိးမဲာ်.”