ကီၢ်အံၣ်စရ့လးအစီၤပၤ အဆိကတၢၢ် စီလူးအဂ့ၢ်

ကွၢ်လၢ ၡမူၤအ့လးလူလီၤသိလၢ ပှၤတဂၤအခိၣ်လိၤန့ၣ်တက့ၢ်. ပှၤတဂၤ တုၤမ့ၢ်တၢ်ဘၣ်ဃုထၢအီၤလၢ ကကဲစီၤပၤန့ၣ် တၢ်အလုၢ်အလၢ်အိၣ်လၢ ဘၣ်တၢ်မၤအီၤဒ်အံၤန့ၣ်လီၤ. ယဟိဝၤစံးဘၣ် ၡၤမူၤအ့လးလၢ ကဘၣ်လူလီၤသိ လၢစီလူးအခိၣ်ဖီခိၣ်န့ၣ်လီၤ. သိအဝဲန့ၣ် မ့ၢ်သိနၢမူလၢအလီၤဆီန့ၣ်လီၤ.

စီလူးဆိကမိၣ်လီၤအသးလၢ အတကြၢးကဲစီၤပၤဘၣ်. အဝဲဒၣ်စံးဘၣ်ၡမူၤအ့လးလၢ ‘ယမ့ၢ်ပှၤဘံၣ်ယၤမံၣ်ဖိ ပှၤကလုာ်အဆံးကတၢၢ် လၢပှၤအံၣ်စရ့လးဖိအကျါန့ၣ်လီၤ. ဘၣ်မနုၤအဃိ နစံးနဲလၢ ယကကဲထီၣ်စီၤပၤန့ၣ်လဲၣ်.’ န့ၣ်လီၤ. စီလူးန့ၣ် တၢ်ပာ်ဒိၣ်သးဒီးတၢ်ပာ်ထီၣ်ထီသး တအိၣ်ဘၣ်အဃိ ယဟိဝၤဘၣ်အသးလၢအီၤန့ၣ်လီၤ. လၢတၢ်န့ၣ်အဃိ ဘၣ်တၢ်ဃုထၢအီၤလၢ ကကဲစီၤပၤန့ၣ်လီၤ.

နီၢ်နီၢ်တခီန့ၣ် စီလူးတမ့ၢ်ပှၤဖှီၣ်ဖိယာ်ဖိဘၣ်. ဟဲလီၤစၢၤလၢ ဟံၣ်ဖိဃီဖိလၢအထူးအတီၤဒီးအဂီၤထီ, က့ၢ်ဘၣ်ဂီၤဂ့ၤဝဲဒၣ်န့ၣ်လီၤ. အဂီၤန့ၣ် ထီန့ၢ်ပှၤခဲလၢာ် လၢကီၢ်အံၣ်စရ့လးအပူၤ တတၢၤဒုၣ်န့ၣ်လီၤ. စီလူးန့ၣ် ဃ့ၢ်ဝဲချ့ချ့ကဲဒီး အဂံၢ်ဆူၣ်ဘါဆူၣ်စ့ၢ်ကီးန့ၣ်လီၤ. ယွၤဃုထၢစီလူးလၢ ကကဲစီၤပၤန့ၣ် ပှၤအါဂၤဘၣ်အသးအဃိ ကိးသသြီထီၣ်ဝဲသ့ၣ်လၢ ‘မ်စီၤပၤအိၣ်ကၢအိၣ်ခိးတက့ၢ်.

ပှၤအံၣ်စရ့လးဖိ အဒုၣ်အဒါတဖၣ်စ့ၢ်ကီး အဂံၢ်အဘါဆူၣ်ဒ်လၢညါအသိးန့ၣ်လီၤ. မၤနးမၤဖှီၣ်ဒံးဝဲ ပှၤအံၣ်စရ့လးဖိန့ၣ်လီၤ. ဖဲစီလူးကဲထီၣ်စီၤပၤတယံာ်ဒံးဘၣ်အခါန့ၣ် ပှၤဧၣ်မိၣ်ဖိတဖၣ်ဟဲဒုး ပှၤအံၣ်စရ့လးဖိတဖၣ်န့ၣ်လီၤ. ဘၣ်ဆၣ်သနာ်က့ စီလူးစူးဖှိၣ်ထီၣ် သုးမုၢ်ဖးဒိၣ်ဝံၤဒုးဝဲဒီးမၤနၢၤကွံာ် ပှၤဧၣ်မိၣ်ဖိတဖၣ်န့ၣ်လီၤ. လၢတၢ်န့ၣ်အဃိ ကမျၢၣ်တဖၣ်သးခုဒိၣ်မးလၢ စီလူးဟဲကဲထီၣ်စီၤပၤန့ၣ်လီၤ.

ဒ်နံၣ်တဖၣ်လဲၤပူၤကွံာ်ဝဲအခါ စီလူးပၢဆှၢ အံၣ်စရ့လးဖိလၢ တၢ်မၤနၢၤဒုၣ်ဒါတဖၣ် အဘျီဘျီန့ၣ်လီၤ. စီလူးန့ၣ် အိၣ်ဒီးအဖိခွါ ပှၤဒူပှၤဃိၤတဂၤ လၢတၢ်ကိးအီၤလၢ ယိၤနၤသၣ်န့ၣ်လီၤ. ယိၤနၤသၣ်စ့ၢ်ကီး ကဲတၢ်မၤစၢၤဒိၣ်မးလၢ ပှၤအံၣ်စရ့လးဖိ ကနၢၤတၢ်ဒုးအဂီၢ်န့ၣ်လီၤ. ပှၤဖလ့ၡသးဖိတဖၣ်န့ၣ် မ့ၢ်ပှၤအံၣ်စရ့လးဖိတဖၣ်အဒုၣ်ဒါလၢ အအၢကတၢၢ်ဒံးန့ၣ်လီၤ. ဘၣ်မုၢ်တနံၤန့ၣ် ပှၤဖလ့ၡသးဖိလၢအကထိလၢအကလး ဟဲထီၣ်ဒုးပှၤအံၣ်စရ့လးဖိန့ၣ်လီၤ.

ၡမူအ့လးမၤလိာ်စီလူးလၢ အကခိးအီၤ တုၤလီၤလၢအဟဲလုၢ်တၢ်လၢ ယဟိဝၤတစုန့ၣ်လီၤ. ဘၣ်ဆၣ် ၡမူၤအ့လးဟဲစဲၤခံဝဲန့ၣ်လီၤ. စီလူးပျံၤလၢ ပှၤဖလ့ၡသးဖိ ကစးထီၣ်တၢ်ဒုးအဃိ လဲၤလုၢ်ထီၣ်တၢ် လၢအကစၢ်ဒၣ်ဝဲန့ၣ်လီၤ. ဖဲၡမူၤအ့လးဟဲတုၤဝဲအခါ အတၢ်စံးအီၤလၢ နတၢ်ဒိကနၣ်တၢ်တအိၣ်ဘၣ်လီၤ. ၡမူၤအ့လးတဲအီၤလၢ ‘ယဟိဝၤစံးဝဲဒၣ် သါကဃုထၢပှၤအဂၤတဂၤ လၢကပၢပှၤအံၣ်စရ့လးဖိတဖၣ်န့ၣ်လီၤ.’

လၢခံတဘျီစ့ၢ်ကီး စီလူးတဒိကနၣ်တၢ်ဘၣ်. တုၤနုၤတစု, ၡမူအ့လးစံးဝဲ ‘တၢ်ဒိကနၢ်ယွၤအကလုၢ်ကထါန့ၣ် ဂ့ၤန့ၢ်ဒံးတၢ်လုၢ်ထီၣ်ယွၤလၢ သိအဂ့ၤကတၢၢ်န့ၣ်လီၤ. မ့ၢ်လၢနတဒိကနၢ်ယဟိဝၤ အတၢ်ကတိၤအဃိ ယဟိဝၤစ့ၢ်ကီး တမ့ၢ်ကပာ်နၤလၢ အံၣ်စရ့လးအစီၤပၤအလီၢ်လၢၤဘၣ်’ န့ၣ်လီၤ.

လၢတၢ်ဂ့ၢ်အဝဲအံၤအဃိ ပဒိးန့ၢ်တၢ်မၤလိဂ့ၤဂ့ၤဘၣ်ဘၣ်သ့န့ၣ်လီၤ. ပာ်ဖျါထီၣ် တၢ်ဒိကနၢ်ယဟိဝၤအကလုၢ်ထီဘိန့ၣ် အကါဒိၣ်ဝဲဆံးဒိၣ်န့ၣ်လီၤ. ဝံၤဒီးပာ်ဖျါစ့ၣ်ကီးဝဲလၢ စီလူးလၢအမ့ၢ်ပှၤဂ့ၤတဂၤအံၤ ဟဲကဲထီၣ်ဝဲပှၤအၢသ့န့ၣ်လီၤ. ပတအဲၣ်ဒိးကဲထီၣ် ပှၤအၢနီတဘျီဘၣ်, တမ့ၢ်ဘၣ်ဧါ.