နတၢ်အိၣ်မူခါဆူညါန့ၣ် သန့ၤထီၣ်အသးလၢ နတၢ်ဃုထၢအဖီခိၣ်
မ့ၢ်နအိၣ်ဒီးတၢ်သဘျ့လၢ နကဆၢတဲာ်တၢ်လၢ နတၢ်အိၣ်မူ ခါဆူညါအဂီၢ်ဧါ. ပှၤတနီၤနာ်ဝဲလၢ ပတၢ်အိၣ်မူခါဆူညါ ကမၤအသးဒ်လဲၣ်ဒ်လဲၣ်န့ၣ် တၢ်ပာ်ပနီၣ်အီၤဝံၤလံ. ဒီးပတၢ်အိၣ်မူခါဆူညါန့ၣ် တဒိးသန့ၤထီၣ်အသးလၢ ပနီၢ်ကစၢ်အတၢ်ဃုထၢအဖီခိၣ်ဘၣ်. အဃိ ဖဲအဝဲသ့ၣ် မၤတၢ်တခါခါ မ့ၢ်တကဲထီၣ်လိၣ်ထီၣ်ဘၣ်န့ၣ် ကတဲဝဲလၢ “ဘၣ်နီမံၤဘၣ် မ့ၢ်ဒၣ်ယတၢ်ဟဲဝံလီၤ.”
မ့မ့ၢ်ပှၤတနီၤနီၤန့ၣ် အဝဲသ့ၣ် ဂုာ်ကျဲးစၢးဒ်သိး အတၢ်အိၣ်မူ ကဂ့ၤထီၣ်အဂီၢ်လီၤ. ဘၣ်ဆၣ် အဝဲသ့ၣ် မ့ၢ်ဂုာ်ကျဲးစၢးဝဲ ထဲလဲၣ်သနာ်က့ ထံၣ်ဘၣ်ဒံးဝဲ တၢ်ဒုးတၢ်ယၤ, တၢ်အၢတၢ်သီ, န့ဆၢၣ်တၢ်ဘၣ်ဒိဘၣ်ထံး ဒီးတၢ်ဆူးတၢ်ဆါတဖၣ် တဘျီဝံၤတဘျီအဃိ အသးဟးဂီၤဝဲလီၤ. ဒီးအဝဲသ့ၣ်ကတဲစ့ၢ်ကီးဝဲလၢ ‘ဘၣ်လံ ယမ့ၢ်ဂုာ်ကျဲးစၢးသနာ်က့ အဘျုးတအိၣ်ဘၣ်.’
ခီဖျိလၢ ပတၢ်အိၣ်သးတဖၣ်အဃိ တဘျီတခီၣ် တၢ်တဟဲကဲထီၣ်အသးဒ် ပမုၢ်လၢ်အသိးဘၣ်. (စံၣ်တဲၤတဲလီၤတၢ် ၉:၁၁) ဒ်လဲၣ်ဂ့ၤဒ်လဲၣ်ဂ့ၤ ဘၣ်ဃးဒီး ပတၢ်အိၣ်မူခါဆူညါန့ၣ် ပအိၣ်ဒီး တၢ်သဘျ့လၢ ပကဃုထၢတၢ်လၢ ပနီၢ်ကစၢ်န့ၣ်လီၤ. လံာ်စီဆှံ ပာ်ဖျါထီၣ်န့ၢ်ပှၤလၢ ပတၢ်အိၣ်မူခါဆူညါန့ၣ် ဒိးသန့ၤထီၣ်အသးလၢ ပတၢ်ဆၢတဲာ်အဖီခိၣ်လီၤ. အဃိ ပကကွၢ်သကိး တၢ်ဂ့ၢ်တနီၤလၢ လံာ်စီဆှံအပူၤလီၤ.
အဒိ လၢညါ စီၤမိၤၡ့တီခိၣ်ရိၤမဲဝဲ ပှၤအံၣ်စရ့လးဖိတဖၣ်ဒီး ဘူးထီၣ်လၢ အဝဲသ့ၣ်ကနုာ်လီၤလၢ ကီၢ်တၢ်စံးပာ်အခါ ယဟိဝၤယွၤထိးဘၣ်စီၤမိၤၡ့အသးလၢ ကတဲဘၣ် ပှၤအံၣ်စရ့လးဖိတဖၣ်ဒ်အံၤလီၤ. “ယပာ်လီၤလံတၢ်မူဒီးတၢ်သံ, တၢ်ဆိၣ်ဂ့ၤဒီးတၢ်ဆိၣ်အၢ, လၢသုမဲာ်ညါလံ. ဒီးဃုထၢတၢ်မူ, ဒ်သိးနဲဒၣ်ဒီးနချံနသၣ်ကမူ, ဒ်သိးနကအဲၣ်ယွၤနကစၢ်, ဒ်သိးနကဒိကနၣ်အကလုၢ်, ဒ်သိးနကစဲဘူးဒီးအီၤ” အဂီၢ်လီၤ.—၅ မိၤၡ့ ၃၀:၁၅, ၁၉, ၂၀.
“ယပာ်လီၤလံတၢ်မူဒီးတၢ်သံ, တၢ်ဆိၣ်ဂ့ၤဒီးတၢ်ဆိၣ်အၢ, လၢသုမဲာ်ညါလံ. ဒီးဃုထၢတၢ်မူ” တက့ၢ်.—၅ မိၤၡ့ ၃၀:၁၉
ကစၢ်ယွၤ မၤထူၣ်ဖျဲးထီၣ်ဝဲ ပှၤအံၣ်စရ့လးဖိတဖၣ် လၢကုၢ်အလီၢ် လၢကီၢ်အဲၤကူပတူးအပူၤ ဒီးကဟ့ၣ်လီၤအဝဲသ့ၣ်လၢ ကီၢ်တၢ်စံးပာ် ဒ်သိးအဝဲသ့ၣ် ကအိၣ်မူဘၣ်မုာ်မုာ်ခုၣ်ခုၣ် ဒီးပှဲၤဒီးတၢ်သဘျ့အဂီၢ်လီၤ. ဘၣ်ဆၣ် အဝဲသ့ၣ်တဒိးန့ၢ်ဘၣ် တၢ်ဆိၣ်ဂ့ၤတဖၣ်အံၤ တဘျီဃီဘၣ်. ဒ်သိးကဒိးန့ၢ်ဘၣ်ဝဲ တၢ်ဆိၣ်ဂ့ၤတဖၣ်အံၤအဂီၢ် အဝဲသ့ၣ်ကဘၣ်ဃုထၢဝဲ “တၢ်မူ” အကျဲန့ၣ်လီၤ. အဝဲသ့ၣ် ကဘၣ်မၤဝဲတၢ်မနုၤလဲၣ်. အဝဲသ့ၣ် ‘ကဘၣ်အဲၣ်ယွၤ, ဒ်သိးကဒိကနၣ်အကလုၢ်, ဒ်သိးကစဲဘူးဒီးအီၤ’ အဂီၢ်လီၤ.
အဃိ မုၢ်မဆါတနံၤအံၤစ့ၢ်ကီး နတၢ်အိၣ်မူခါဆူညါန့ၣ် ဒိးသန့ၤထီၣ်အသးလၢ နတၢ်ဃုထၢအဖီခိၣ်လီၤ. နမ့ၢ်ဃုထၢလၢ နကအဲၣ်ကစၢ်ယွၤ, ဒိကနၣ်အကလုၢ် ဒီးစဲဘူးဒီးအီၤန့ၣ် မ့ၢ်ဒၣ်နဃုထၢ တၢ်မူအကျဲ ဒီးခါဆူညါန့ၣ် နကအိၣ်မူဘၣ် လီၤထူလီၤယိာ်လၢ ဟီၣ်ခိၣ်ပၤရဒံစူးအပူၤလီၤ. ဘၣ်ဆၣ် နအဲၣ်ကစၢ်ယွၤ, ဒိကနၣ်အကလုၢ် ဒီးစဲဘူးဒီးအီၤ ကသ့ဒ်လဲၣ်.
ဃုထၢလၢနကအဲၣ်ကစၢ်ယွၤ
တၢ်အဲၣ်န့ၣ်မ့ၢ်ဝဲ ကစၢ်ယွၤ အတၢ်ဂ့ၤတၢ်ဝါလၢ အဒိၣ်ကတၢၢ်တခါလီၤ. တၢ်မၢဖိယိၤဟၣ် ပာ်ဖျါထီၣ်န့ၢ်ပှၤလၢ “ယွၤမ့ၢ်တၢ်အဲၣ်တၢ်ကွံ” လီၤ. (၁ ယိၤဟၣ် ၄:၈) လၢတၢ်န့ၣ်အဃိ ဖဲပှၤသံကွၢ် ယ့ၣ်ၡူးလၢ တၢ်မၤလိာ်လၢ အဒိၣ်ကတၢၢ် မ့ၢ်ဖဲလဲၣ်တခါလဲၣ်န့ၣ်, ယ့ၣ်ၡူးတဲဝဲလၢ “အဲၣ်ယွၤနကစၢ်လၢ နသူၣ်ကံၢ်သးလဲ, ဒီးနသးဒီဖျၢၣ်ညါ, ဒီးနတၢ်ကူၣ်တၢ်ဖး တုၤအလၢာ်တက့ၢ်.” (မးသဲ ၂၂:၃၇) အဃိ ဒ်သိးပတၢ်ရ့လိာ်သးဒီး ယဟိဝၤယွၤကဂ့ၤအဂီၢ် တဘၣ်မ့ၢ်ထဲလၢ ပပျံၤအီၤ ဒီးဒိကနၣ်မူသူအကလုၢ်ဘၣ်. ကဘၣ်မ့ၢ်ခီဖျိလၢ ပအဲၣ်အီၤအဃိလီၤ. ဘၣ်မနုၤအဃိ ပဘၣ်ဃုထၢလၢ ပကအဲၣ်ကစၢ်ယွၤလဲၣ်.
ဒ်မိၢ်ပၢ်တဖၣ်အဲၣ်အဖိအသိး ယဟိဝၤယွၤစ့ၢ်ကီး အဲၣ်ပှၤဟီၣ်ခိၣ်ဖိဒ်န့ၣ်အသိးလီၤ. ပမ့ၢ်ကွၢ်န့ၣ် မိၢ်ပၢ်တဖၣ် တလၢတပှဲၤဘၣ် သနာ်က့ အဝဲသ့ၣ် ဟံးစုနဲၣ်ကျဲ, ဟ့ၣ်ဂံၢ်ဟ့ၣ်ဘါ, ဆီၣ်ထွဲမၤစၢၤ, ဒီးသိၣ်က့ၤသီက့ၤ အဖိတဖၣ် ဒ်သိးအဝဲသ့ၣ်အတၢ်အိၣ်မူကလဲၤထီၣ်လဲၤထီ ဒီးကပှဲၤဒီးတၢ်သးခုအဂီၢ်လီၤ. မ့ၢ်မိၢ်ပၢ်တဖၣ်န့ၣ် မုၢ်လၢ်က့ၤတၢ်မနုၤလၢ အဖိတဖၣ်အအိၣ်လဲၣ်. အဝဲသ့ၣ်မုၢ်လၢ်ဝဲလၢ အဖိတဖၣ် ကအဲၣ်ဆၢက့ၤအီၤ ဒီးအဲၣ်ဒိးလၢ အဖိတဖၣ်ကသ့ၣ်ညါဝဲလၢ တၢ်လၢအဝဲသ့ၣ်မၤဝဲတဖၣ်န့ၣ် ကကဲဘျုးလၢ အဖိတဖၣ်အဂီၢ်လီၤ. ဒ်န့ၣ်အသိး ပပၢ်အိၣ်လၢမူခိၣ်နာ်က့ မုၢ်လၢ်ဝဲလၢ ပကအဲၣ်ဆၢက့ၤအီၤ ဒီးပာ်လုၢ်ပာ်ပှ့ၤတၢ်လၢ အမၤန့ၢ်ပှၤတဖၣ်န့ၣ်လီၤ.
ဒိကနၣ်အကလုၢ်
ဒ်သိးပကဒိကနၣ် ကစၢ်ယွၤအကလုၢ်အဂီၢ်န့ၣ် ပကဘၣ်ဃုသ့ၣ်ညါ အကလုၢ်ကထါ ဒီးအိၣ်မူမၤထွဲအီၤလီၤ. ဒီးဒ်ပသ့ၣ်ညါအသိး တမ့ၢ်လၢပကနၢ်ဟူ ကစၢ်ယွၤ အကလုၢ်နီၢ်ကီၢ်ဘၣ်. ပဒိကနၣ်အကလုၢ် သ့ခီဖျိ ပဖးလံာ်စီဆှံ ဒီးအိၣ်မူမၤထွဲဒ် အကလုၢ်ကထါ တဲဝဲအသိးလီၤ.—၁ ယိၤဟၣ် ၅:၃.
ဘၣ်တဘျီ ယ့ၣ်ၡူးပာ်ဖျါန့ၢ်ပှၤလၢ တၢ်ဒိကနၣ် ကစၢ်ယွၤအကလုၢ်န့ၣ် မ့ၢ်တၢ်လၢ အရ့ဒိၣ်ဝဲဒိၣ်မးလီၤ. အဝဲတဲဝဲလၢ “ပှၤကညီကမူဝဲထဲလၢကိၣ်န့ၣ်တမ့ၢ်ဘၣ်. မ့ၢ်လၢကယဲၢ်တၢ်ကတိၤလၢ အဟဲထီၣ်လၢယွၤအထးခိၣ်လီၤ.” (မးသဲ ၄:၄) နီၢ်ခိတၢ်အီၣ်တၢ်အီ အရ့ဒိၣ်လၢပဂီၢ်ဘၣ်ဆၣ် ပတၢ်သ့ၣ်ညါနၢ်ပၢၢ် ကစၢ်ယွၤအဂ့ၢ်န့ၣ် အရ့ဒိၣ်န့ၢ်ဒံး နီၢ်ခိအတၢ်အီၣ်န့ၣ်လီၤ. ဘၣ်မနုၤအဃိ ပတဲဒ်န့ၣ်သ့လဲၣ်. စီၤပၤၡလိၤမိၤတဲဝဲလၢ “တၢ်ကူၣ်သ့မ့ၢ်တၢ်တဒီတၢ်, ဒီးစ့မ့ၢ်တၢ်တဒီတၢ်လီၤ. မ့မ့ၢ်တၢ်သ့ၣ်ညါ မ့ၢ်အဂ့ၤကတၢၢ်လီၤ. အဂ့ၢ်ဒ်အံၤ, တၢ်ကူၣ်သ့ဟ့ၣ်လီၤ တၢ်သးသမူလၢ ပှၤလၢအအိၣ်ဝဲဒီးအီၤလီၤ.” (စံၣ်တဲၤတဲလီၤတၢ် ၇:၁၂) အဃိ တၢ်ကူၣ်သ့ ဒီးတၢ်သ့ၣ်ညါ လၢအဟဲလၢ ယွၤအအိၣ်န့ၣ် ကကဲထီၣ် တၢ်ဒီသဒၢလၢပဂီၢ် လၢမုၢ်မဆါတနံၤအံၤ ဒ်သိးပကဃုထၢ ကျဲလၢအဆှၢပှၤဆူ တၢ်မူအထူအယိာ်န့ၣ်လီၤ.
စဲဘူးဒီးအီၤ
သ့ၣ်နီၣ်ထီၣ်က့ၤ ယ့ၣ်ၡူးအတၢ်ကတိၤလၢ ပပာ်ဖျါထီၣ်တ့ၢ်လၢထးန့ၣ်တက့ၢ်. ယ့ၣ်ၡူးတဲဝဲလၢ “ကျဲစၢၤမ့ၢ်အအံၣ်, ဒီးကျဲမ့ၢ်အဆံးလၢ အဆှၢဝဲဆူတၢ်မူန့ၣ်, ဒီးပှၤလၢအထံၣ်န့ၢ်အီၤတဖၣ် အိၣ်စှၤဂၤလီၤ.” (မးသဲ ၇:၁၃, ၁၄) ဒ်သိး ပလဲၤလၢကျဲအံၣ်အံၤ တုၤလၢအကတၢၢ် ဒီးဒိးန့ၢ်ဘၣ် တၢ်မူအထူအယိာ်ကသ့အဂီၢ် ပလိၣ်ဘၣ်ပှၤလၢ အနဲၣ်လိပှၤကျဲ သ့ဂ့ၤဂ့ၤတဂၤန့ၣ်လီၤ. အဃိပကဘၣ် စဲဘူးဒီးကစၢ်ယွၤထီဘိလီၤ. (စံးထီၣ်ပတြၢၤ ၁၆:၈) ပစဲဘူးဒီးကစၢ်ယွၤ ကသ့လၢကျဲဒ်လဲၣ်.
ကိးနံၤဒဲး တၢ်လၢပကဘၣ်မၤန့ၣ် အိၣ်အါမး ဒီးတၢ်လၢပအဲၣ်ဒိးမၤန့ၣ် အိၣ်ဝဲဒီဒူၣ်စ့ၢ်ကီးလီၤ. တၢ်သ့ၣ်တဖၣ်အံၤ အီၣ်ကွံာ်ပတၢ်ဆၢကတီၢ် တုၤဒၣ်လဲာ် တဘျီတခီၣ် ပတၢ်ဆၢကတီၢ်လၢ ပကဃုသ့ၣ်ညါ ကစၢ်ယွၤ အတၢ်ဘၣ်သးန့ၣ် တအိၣ်လၢၤဘၣ်. အဃိ လံာ်စီဆှံ ဒုးသ့ၣ်နီၣ်ထီၣ်ပှၤလၢ “တိၢ်သုသးဒ်သိး သုကလဲၤကွၢ်ဟုၣ်ကွၢ်စုးတၢ်, တမ့ၢ်ဘၣ်ဒ်ပှၤဟးဂီၤဖိအသိးဘၣ်, မ့ၢ်ဒ်ပှၤကူၣ်တၢ်သ့အသိး န့ၣ်တက့ၢ်. ပှ့ၤက့ၤအဆၢကတီၢ်တက့ၢ်. အဂ့ၢ်ဒ်အံၤ, မုၢ်နံၤတဖၣ်န့ၣ် မ့ၢ်အအၢအသီလီၤ.” (အ့းဖ့းစူး ၅:၁၅, ၁၆) အဃိ ဒ်သိးပအိၣ်ဘူးဒီး ကစၢ်ယွၤ ထီဘိကသ့အဂီၢ် တၢ်အရ့ဒိၣ်ကတၢၢ်လၢ ပကဘၣ်ပာ်ဆိအီၤ လၢပတၢ်အိၣ်မူအပူၤန့ၣ် မ့ၢ်ပတၢ်ရ့လိာ်သး ဒီးကစၢ်ယွၤလီၤ.—မးသဲ ၆:၃၃.
နဘၣ်ဃုထၢတၢ်လၢ နနီၢ်ကစၢ်
တၢ်လၢအကဲထီၣ်အသးလၢ အပူၤကွံာ်တဖၣ်န့ၣ် ပမၤက့ၤတဘၣ်လၢၤဘၣ်. ဘၣ်ဆၣ် ဒ်သိးနၤဒီး ပှၤလၢနအဲၣ်တဖၣ် အတၢ်အိၣ်မူလၢခါဆူညါ ကဂ့ၤဝဲအဂီၢ် တၢ်လၢနမၤသ့န့ၣ် အိၣ်ဝဲလီၤ. လံာ်စီဆှံ ပာ်ဖျါန့ၢ်ပှၤလၢ ပပၢ်လၢမူခိၣ် ယဟိဝၤယွၤန့ၣ် အဲၣ်ပှၤဒိၣ်မး ဒီးအဝဲဟ့ၣ်လီၤပှၤ တၢ်ဟံးစုနဲၣ်ကျဲတဖၣ် ဒ်သိးပကမၤအတၢ်ဘၣ်သးအဂီၢ်လီၤ. အဃိ ဆိကမိၣ်ထံ ဝံမံကၤ အတၢ်ကတိၤ လၢအတဲဝဲလၢ–
“ပှၤကညီဧၢ, အဝဲဒၣ်ဒုးနဲၣ်တ့ၢ် နတၢ်လၢအဂ့ၤလီၤ. ဒီးမ့တမ့ၢ်ဘၣ် အမၢနမၤတၢ်တီတၢ်လိၤ, ဒီးအဲၣ်ဒိးတၢ်သးကညီၤ, ဒီးလဲၤတၢ်ဒီးနကစၢ်လၢ နသးစူၤန့ၣ်ဘၣ်ဒီး, မ့ၢ် အမၢနၤလၢမနုၤလဲၣ်.”—မံကၤ ၆:၈.
ယဟိဝၤယွၤ ကွဲမုာ်နၤလၢ နကလဲၤတၢ်ဒီးအီၤ ဒီးဒိးန့ၢ်ဘၣ်တၢ်ဆိၣ်ဂ့ၤတဖၣ်လၢ အဝဲကတဲာ်ကတီၤန့ၢ်ပှၤလၢ အဒိကနၣ်အကလုၢ်အဂီၢ်လီၤ. မ့ၢ်နကတူၢ်လိာ် အတၢ်ကွဲမုာ်အံၤဧါ တတူၢ်လိာ်ဧါန့ၣ် မ့ၢ်ဒၣ်နတၢ်ဃုထၢလီၤ.