ဖဲနသးသမူတံၤသကိးတဂၤ တတီဒီးနၤအခါ

မရံယၤ လၢအိၣ်လၢကီၢ်စပ့ၣ် တဲဒ်အံၤ “ဖဲယဝၤတဲဘၣ်ယၤလၢ အကပာ်တ့ၢ်ယၤခီဖျိလၢ အဝဲအဲၣ်ဒိးဟံးန့ၢ် ပိာ်မုၣ်လၢအသးစၢ်တဂၤအခါန့ၣ် ယတအဲၣ်ဒိးအိၣ်မူလၢၤဘၣ်. ဒီးယဘၣ်တူၢ်ဆါသး လၢအဂီၢ်ထဲလဲၣ်န့ၣ် ယနီၣ်ဘၣ်က့ၤ အဃိအမၤတၢ်န့ၣ်တတီနီတစဲးဘၣ်.”

ဘ့(လ်) လၢအိၣ်လၢကီၢ်စပ့ၣ် တဲဝဲလၢ “ဖဲယမါပာ်တ့ၢ်ကွံာ်ယၤအခါ လၢယသးပူၤန့ၣ် လီၤဂာ်လၢတၢ်လီၤဟိအိၣ်ဝဲတမံၤမံၤန့ၣ်လီၤ. အဃိ ပဖီတၢၣ်, ပတၢ်မုၢ်လၢ် ဒီးပတၢ်တိာ်ပာ်သ့ၣ်တဖၣ်န့ၣ် ဟးဂီၤကွံာ်ဝဲခဲလၢာ်န့ၣ်လီၤ. ဒီးတဘျီတခီၣ် ယတူၢ်ဘၣ်လၢ ယတၢ်ကိၢ်တၢ်ဂီၤန့ၣ် လီၤမၢ်လံ, သနာ်က့ လၢခံ ယတၢ်တူၢ်ဘၣ်တဖၣ်န့ၣ် ဟဲက့ၤကဒါ ဒီးယသးဘၣ်ဒိဒိၣ်မးလီၤ.”

ဖဲနသးသမူတံၤသကိး တတီဒီးနၤအခါ နသးကဟးဂီၤဒိၣ်မးလီၤ. ဘၣ်ဆၣ် ပှၤတနီၤနီၤန့ၣ် ပျၢ်ကွံာ်အသးသမူတံၤသကိး တၢ်ကမၣ် ခီဖျိလၢ အပီၢ်ယၢ်လီၤက့ၤအသးအဃိ ဒီးမၤဂ့ၤထီၣ်က့ၤဝဲ အတၢ်ဆီဟံၣ်ဆီဃီန့ၣ်လီၤ.a ဘၣ်ဆၣ် အတၢ်ဆီဟံၣ်ဆီဃီ ဂၢၢ်ကျၢၤမ့ၢ်ဂ့ၤ တဂၢၢ်ကျၢၤမ့ၢ်ဂ့ၤ ဖဲအဝဲသ့ၣ် သ့ၣ်ညါလၢအသးသမူတံၤသကိး တတီဘၣ်အခါန့ၣ် အဝဲသ့ၣ်သးဟးဂီၤဝဲဒိၣ်မးလီၤ. အဃိ ပှၤလၢတူၢ်ဘၣ်တၢ်ဒ်အံၤတဖၣ် လဲၤခီဖျိဝဲကန့ၢ်ဒ်လဲၣ်.

လံာ်စီဆှံအဆၢတဖၣ်လၢ မၤစၢၤပှၤသ့

သးသမူတံၤသကိး လၢအတီတဖၣ်န့ၣ် အသးမ့ၢ်ဘၣ်ဒိသနာ်က့ လံာ်စီဆှံ မၤမုာ်ထီၣ်က့ၤအသးသ့ဝဲလီၤ. ဒီးအဝဲသ့ၣ်သ့ၣ်ညါထီၣ်လၢ ကစၢ်ယွၤထံၣ်အဝဲသ့ၣ်မဲာ်ထံမဲာ်နိ ဒီးဒိသူၣ်ဒိသးအဝဲသ့ၣ်န့ၣ်လီၤ.—မၤလကံ ၂:၁၃-၁၆.

“ဖဲယဘၣ်ယိၣ်ဘၣ်ဘီတၢ် ဒီးယသူၣ်ကိၢ်သးဂီၤအခါန့ၣ်, နမၤမုာ်ယၤ ဒီးမၤသးခုယၤလီၤ.”—စံးထီၣ်ပတြၢၤ ၉၄:၁၉, ခ့ခါစှီၤကျိာ်.

ဘ့(လ်) အဝဲတဲက့ၤဝဲဒ်အံၤ “ဖဲယဖးဘၣ်လံာ်စီဆှံတဆၢန့ၣ်အခါ ယထံၣ်တမှံကွၢ်လၢ ယဟိဝၤယွၤမ့ၢ်ကစၢ်တဂၤလၢ အမၤမုာ်ထီၣ်က့ၤယသး ဒ်ပၢ်လၢအိၣ်ဒီး တၢ်သးကညီၤတဂၤအသိးန့ၣ်လီၤ.”

“နတီဒီးပှၤလၢအတီဒီးနၤ.”—စံးထီၣ်ပတြၢၤ ၁၈:၂၅, ခ့ခါစှီၤကျိာ်.

ခါမဲၤ အဝၤန့ၣ် တတီဒီးအီၤ ယံာ်လၢအလါတဖၣ်ညါလီၤ. အဝဲတဲလၢ “ယဝၤန့ၣ် တတီဒီးယၤနီတစဲးဘၣ်. ဘၣ်ဆၣ် ယနာ်န့ၢ်ယဟိဝၤယွၤသ့လၢ အကတီဒီးယၤထီဘိ ဒီးတပာ်တ့ၢ်ယၤ နီတဘျီဘၣ်.”

“သုတဘၣ်ယိၣ်တၢ်နီတမံၤတဂ့ၤ. မ့မ့ၢ်လၢတၢ်ကိးမံၤဒဲးန့ၣ်လၢတၢ်ထုကဖၣ်, ဒီးလၢတၢ်ဃ့ကညး . . . ဘိးဘၣ်သ့ၣ်ညါယွၤ လၢသုတၢ်အဲၣ်ဒိးတဖၣ်န့ၣ်တက့ၢ်. ဒီးယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်န့ၣ် ကပၢၤသုသူၣ်သုသး.”—ဖံလံးပံၤ ၄:၆, ၇.

မ့မ့ၢ် ၡါၡၢၤန့ၣ် တဲဝဲလၢ “လံာ်စီဆှံတဆၢအံၤန့ၣ် ယဖးဝံၤဖးက့ၤအီၤလီၤ. ခီဖျိလၢ ယဃ့ထုကဖၣ် အါထီၣ်မးအါထီၣ်အဃိ ကစၢ်ယွၤဟ့ၣ်ယၤတၢ်သူၣ်မံသးမုာ် လၢယတၢ်အိၣ်မူပူၤလီၤ.”

ဒ်ပဖးတ့ၢ်ပှၤဂ့ၢ်လၢထးတဖၣ်န့ၣ် တဘျီတခီၣ်အဝဲသ့ၣ်ကိးဂၤဒဲး တူၢ်ဘၣ်လၢ အဲၣ်ဒိးတူၢ်ၡူကွံာ်အသးလီၤ. ဘၣ်ဆၣ် အဝဲသ့ၣ်နာ်ယဟိဝၤယွၤ ဒီးဒိးန့ၢ်ဘၣ်တၢ်ဂံၢ်တၢ်ဘါ လၢယွၤအကလုၢ်ကထါအပူၤန့ၣ်လီၤ. ဘ့(လ်) တဲဝဲဒ်အံၤ “ဖဲတၢ်ခဲလၢာ် လဲၤတပျာ်အသးလၢ ယတၢ်အိၣ်မူပူၤအခါ ယတၢ်နာ်န့ၣ် မၤစၢၤယၤလၢ ယတၢ်အိၣ်မူန့ၣ် အိၣ်ပှဲၤဒီးအခီပညီဒံးန့ၣ်လီၤ. လၢညါယလဲၤတ့ၢ်ဒ် ‘တၢ်သံအကဒုအကစၢၢ်ကဆူးပူၤဒၣ်လဲာ်န့ၣ်,’ ကစၢ်ယွၤအိၣ်ဒီးယၤလီၤ.”—စံးထီၣ်ပတြၢၤ ၂၃:၄.

a ဒ်သိးနကသ့ၣ်ညါအါထီၣ်တၢ်ဂ့ၢ်ဘၣ်ဃးဒီး မ့ၢ်နကြၢးပျၢ်အတၢ်ကမၣ်ဧါ တကြၢးပျၢ်ဧါန့ၣ် ကွၢ်လံာ်လၢအမ့ၢ် ပၢၢ်ထီၣ် (Awake!) လါအ့ဖြ့ၣ် ၂၂, ၁၉၉၉ တဘ့ၣ်န့ၣ်တက့ၢ်. အခိၣ်တီမ့ၢ်ဝဲ “ဖဲနသးသမူတံၤသကိး တတီဒီးနၤအခါ.” ကွၢ်ကဘျံးပၤ ၃, ၅ ဒီး ၉ တက့ၢ်.

ပှၤတနီၤ လဲၤခီဖျိဝဲန့ၢ်ဒ်လဲၣ်

ဆိကမိၣ်ထံ လံာ်စီဆှံအဆၢတဖၣ်လၢ မၤမုာ်ထီၣ်က့ၤနသး.

ဘ့(လ်) တဲဝဲလၢ “ယဖးဘၣ်လံာ်ယိၤဘး ဒီးလံာ်စံးထီၣ်ပတြၢၤ ဒီးတၢ်လၢအဘၣ်ထွဲ ဒီးယတၢ်အိၣ်သးတဖၣ်န့ၣ် ယမၤနီၣ်ဃးအီၤကိးခါဒဲးလီၤ. ဒီးယသ့ၣ်ညါဘၣ်လၢ ပှၤကွဲးလံာ်စီဆှံဖိတဖၣ်န့ၣ် ထံၣ်ဘၣ်တၢ်သူၣ်အုးသးအုး ဒီးတၢ်ကိၢ်တၢ်ဂီၤ ဒ်သိးဒီးယၤန့ၣ်လီၤ.”

တၢ်သူၣ်ဝံၣ်သးဆၢန့ၣ် မၤမုာ်ထီၣ်က့ၤနၤသ့.

ခါမဲၤ တဲဝဲလၢ “ဖဲမုၢ်နၤခီအခါ ယမံမ့ၢ်တန့ၢ်ဘၣ်န့ၣ် ယဒိကနၣ်တၢ်သးဝံၣ်လီၤ. အဃိ မ့ၢ်ဝဲကျဲတဘိလၢ အမၤမုာ်ထီၣ်က့ၤယသးဒိၣ်မး.” မ့မ့ၢ်လၢ ဒဲနံၣ်ယၢၤန့ၣ်တဲဝဲလၢ “မ့ၢ်လၢတၢ်သူၣ်ဝံသးဆၢန့ၣ် မၤမုာ်ထီၣ်က့ၤယသး အဃိယမၤလိတၢ်ဒ့ကထါလီၤ.”

တဲဖျါထီၣ် နတၢ်တူၢ်ဘၣ်တဖၣ်.

ဒဲနံၣ်ယၢၤ တဲဝဲလၢ “ညီနုၢ်န့ၣ်ယတဲဖျါထီၣ် ယတၢ်တူၢ်ဘၣ်တဘူၣ်ဘၣ်. ဘၣ်ဆၣ် ယအိၣ်ဒီးတံၤသကိးလၢအဂ့ၤတနီၤ ဒီးယတဲတၢ်ဒီးအဝဲသ့ၣ် ကိးနံၤဒဲးလီၤ. ယဒုးသ့ၣ်ညါ အဝဲသ့ၣ် ယတၢ်တူၢ်ဘၣ်တဖၣ် ခီဖျိယကွဲးန့ၢ်အဝဲသ့ၣ်လံာ်ပရၢ ဒီးတဲတၢ်ဒီးအဝဲသ့ၣ် အဃိကဲထီၣ်တၢ်မၤစၢၤလၢ ယဂီၢ်ဒိၣ်မးလီၤ.” မ့မ့ၢ်လၢ ဆါၡၤ န့ၣ်တဲဝဲလၢ “ယဟံၣ်ဖိဃီဖိ အတၢ်မၤစၢၤန့ၣ် အရ့ဒိၣ်ဒိၣ်မးလၢယဂီၢ်လီၤ. ဒီးယမိန့ၣ် ဒိကနၣ်ယၤလၢတၢ်ဝံသးစူၤ ဒီးမၤစၢၤယၤထီဘိလီၤ. ယတူၢ်ဘၣ်လၢ ယပၢ်စ့ၢ်ကီး အဲၣ်ယၤ ဒီးအကဟုကယာ်ယၤဒိၣ်မး တကးဒံးဘၣ် မၤစၢၤယၤဒ်သိး ယတၢ်တူၢ်ဘၣ် ကကိညၢ်ထီၣ်က့ၤဝဲ ကယီကယီန့ၣ်လီၤ.”

ဃ့ဘါထုကဖၣ်ထီဘိ.

ခါမဲၤ တဲဝဲဒၣ်လၢ “ယဃ့ဘါထုကဖၣ်တၢ်ထီဘိအဃိ ယတူၢ်ဘၣ်လၢ ကစၢ်ယွၤအိၣ်လၢယကပၤ, ဒိကနၣ်ယၤ ဒီးမၤစၢၤယၤလီၤ. ယလဲၤခီဖျိဘၣ် တၢ်အိၣ်သးလၢအကီအခဲ နးမးဒၣ်လဲာ် ယသုးဘူးယသးဆူယွၤအအိၣ်လီၤ.”