ဖဲနတူၢ်ဘၣ် တၢ်ဆူးတၢ်ဆါ နးဒိၣ်မးအခါ
နၤ မ့တမ့ၢ် ပှၤလၢနအဲၣ် ဘၣ်အီၤတဂၤ မ့ၢ်အိၣ်ဒီးတၢ်ဆါ လၢအမၤသံပှၤကညီသ့န့ၣ် တၢ်သူၣ်ကိၢ်သးဂီၤ ကဘၣ်နၤထဲလဲၣ်န့ၣ်နသ့ၣ်ညါလီၤ. တမ့ၢ်ထဲလၢ နဘၣ်တူၢ် တၢ်ဆါနးမးတခါအံၤဘၣ် နကတူၢ်ဘၣ်လၢ နၤဒီးနဟံၣ်ဖိဃီဖိ အသးဂံၢ်ဘါလီၤစၢ်စ့ၢ်ကီးန့ၣ်လီၤ. ခီဖျိလၢ နကဘၣ်လဲၤထံၣ်လိာ်သး ဒီးကသံၣ်ကရၣ်, နကဒိးန့ၢ်ဘၣ်တၢ်ကူစါယါဘျါ ကကီဝဲလၢနဂီၢ် မ့တမ့ၢ် ကသံၣ်ကသီလၢနအီၣ်တဖၣ် ကမၤဘၣ်ဒိက့ၤနၤသ့လၢ ကျဲအဂၤတဖၣ်အဃိ တၢ်ပျံၤတၢ်ဖုးဒီးတၢ်သူၣ်ကိၢ်သးဂီၤတဖၣ် ကအါထီၣ်ဝဲလီၤ. နမ့ၢ်အိၣ်ဒီး တၢ်ဆူးတၢ်ဆါလၢအနးတခါန့ၣ် နကအိၣ်စ့ၢ်ကီးဒီးတၢ်ကိၢ်တၢ်ဂီၤ သပှၢ်ကတၢၢ်လီၤ. ဒီးခီဖျိလၢ တၢ်ကိၢ်တၢ်ဂီၤတဖၣ်အံၤအဃိ နကဆိကမိၣ်လၢ နဆဲးတူၢ်တၢ်တန့ၢ်လၢၤဘၣ်န့ၣ်လီၤ.
နဒိးန့ၢ်တၢ်မၤစၢၤကသ့ဖဲလဲၣ်. ပှၤအါဂၤဒိးန့ၢ်ဘၣ် တၢ်မၤမုာ်ထီၣ်က့ၤ ခီဖျိအဝဲသ့ၣ်သန့ၤ အသးလၢယွၤအအိၣ်လၢ တၢ်ဃ့ဘါထုကဖၣ် ဒီးတၢ်ဖးလံာ်စီဆှံအဃိန့ၣ်လီၤ. ဒီးတၢ်မၤစၢၤအဂၤတခါန့ၣ် ကဟဲလၢ နဟံၣ်ဖိဃီဖိ ဒီးနတံၤသကိးတဖၣ် အတၢ်အဲၣ်ဒီးအတၢ်ဆီၣ်ထွဲမၤစၢၤန့ၣ်လီၤ.
ပှၤတနီၤ လဲၤခီဖျိဝဲန့ၢ်ဒ်လဲၣ်
ရီဘၢၤ လၢအသးအိၣ် ၅၈ နံၣ်ဟ့ၣ်ကူၣ်ဝဲဒ်အံၤ “အိၣ်ဒီးတၢ်နာ်ကစၢ်ယွၤ ဒ်သိးအကမၤစၢၤနၤလၢ နဆဲးတူၢ်တၢ်ကကဲအဂီၢ် ဒီးဃ့ဘါထုကဖၣ်လၢ ယဟိဝၤယွၤအအိၣ်လီၤ. နတၢ်တူၢ်ဘၣ်အိၣ်ဒ်လဲၣ်န့ၣ် ဒုးသ့ၣ်ညါကစၢ်ယွၤ ဒီးဃ့အသးစီဆှံတက့ၢ်. ဒီးဃ့ကစၢ်ယွၤတၢ်မၤစၢၤလၢ ဒ်သိးနဟ့ၣ်ဂံၢ်ဟ့ၣ်ဘါ နဟံၣ်ဖိဃီဖိကသ့အဂီၢ် တကးဒံးဘၣ် ဒ်သိးနဆဲးတူၢ်တၢ်ဆါလၢ တၢ်သးစူၤပူၤကန့ၢ်အဂီၢ်တက့ၢ်.”
“ဖဲနဟံၣ်ဖိဃီဖိ နၢ်ပၢၢ်စၢၤနတၢ်တူၢ်ဘၣ်အခါ ကဲဘျုးဒိၣ်မးန့ၣ်လီၤ.” “ဒီးကိးနံၤဒဲးန့ၣ် ပှၤကိးယၤလၢလီတဲဆိ ဒီးကသံကွၢ်ယၤလၢ ‘မ့ၢ်နအိၣ်ဆူၣ်ဧါ.’ အဃိ ယဒိးန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါလၢ ယသကိးတဖၣ်အအိၣ်လီၤ. မ့ၢ်လၢအဝဲသ့ၣ် ဟ့ၣ်ဆူၣ်ထီၣ်ယဂံၢ်ယဘါအဃိ မၤစၢၤယၤလၢ ယဆဲးတူၢ်တၢ်ကန့ၢ်အဂီၢ်လီၤ.”
နမ့ၢ်လဲၤအိၣ်သကိး နတံၤသကိးလၢ အအိၣ်တဆူၣ်တချ့ဘၣ်တဂၤန့ၣ် လ့ဒၤ တဲဝဲဒ်အံၤ “သ့ၣ်နီၣ်ထီၣ်လၢ ပှၤလၢအဆိးက့တဂၤန့ၣ် ကအဲၣ်ဒိးအိၣ်မူဝဲဒ်ပှၤဂၤအသိးစ့ၢ်ကီး အဃိတမ့ၢ်လၢအကအဲၣ်ဒိး တဲတၢ်ဘၣ်ဃးဒီး တၢ်ဆူးတၢ်ဆါအဂ့ၢ်ထီဘိဘၣ်. လၢတၢ်န့ၣ်အလီၢ် မ့ၢ်သ့န့ၣ်တဲသကိး တၢ်ဂ့ၢ်လၢနညီနုၢ်တဲအီၤတဖၣ်န့ၣ်တက့ၢ်.”
ပမ့ၢ်တူၢ်ဘၣ် တၢ်ဆူးတၢ်ဆါလၢအနးဒိၣ်မး သနာ်က့ ခီဖျိလၢကစၢ်ယွၤအတၢ်ဂံၢ်တၢ်ဘါ, တၢ်မၤမုာ်ထီၣ်က့ၤဟဲလၢ လံာ်စီဆှံအပူၤ ဒီးတၢ်မၤစၢၤလၢ ပဟံၣ်ဖိဃီဖိဒီးပတံၤသကိးတဖၣ်အအိၣ်အဃိ ပနာ်သ့လၢ ပတၢ်အိၣ်မူန့ၣ် အလုၢ်အပှ့ၤအိၣ်ဒံးဝဲလီၤ.