ပမၤလိဘၣ် ကစၢ်ယွၤအဂ့ၢ် ခီဖျိလၢအဝံတဖၣ်
လၢအပူၤကွံာ်န့ၣ် ကစၢ်ယွၤဟ့ၣ်လီၤ အဝံတဖၣ်တၢ်ကစီၣ်အရ့ဒိၣ်လၢ ပှၤဟီၣ်ခိၣ်ဖိအဂီၢ်လီၤ. မ့ၢ်တၢ်ကစီၣ်တဖၣ် မၤစၢၤပှၤလၢ ပကဒိးန့ၢ်ဘၣ် ကစၢ်ယွၤအတၢ်ဆိၣ်ဂ့ၤဧါ. မ့ၢ်, အမၤစၢၤပှၤ. ပမၤလိန့ၢ်တၢ်လၢ ဝံလၢအသးတီသၢဂၤအအိၣ် သ့ဒ်လဲၣ်န့ၣ် ပကကွၢ်သကိးအီၤ.
စီၤအၤဘြၤဟၣ်
ကစၢ်ယွၤန့ၣ် တကွၢ်ဒိၣ်ဆံးအါစှၤတၢ် ဒီးအဲၣ်ဒိးဆိၣ်ဂ့ၤ ပှၤဟီၣ်ခိၣ်ဖိ ကိးဂၤဒဲး.
ကစၢ်ယွၤအၢၣ်လီၤ အဝံတဂၤလၢ အမ့ၢ် စီၤအၤဘြၤဟၣ်လၢ “ပှၤဟီၣ်ခိၣ်ဖိအဒူၣ်ခဲလၢာ် ကဘၣ်တၢ်ဆိၣ်ဂ့ၤလၢနပူၤလီၤ.”—၁ မိၤၡ့ ၁၂:၃.
ပဒိးန့ၢ်ဘၣ်တၢ် မၤလိမနုၤလဲၣ်. ကစၢ်ယွၤန့ၣ် အဲၣ်ပှၤဒိၣ်မး ဒီးအဲၣ်ဒိးဆိၣ်ဂ့ၤဝဲ ဟံၣ်ဖိဃီဖိအဒူၣ်ခဲလၢာ်လီၤ. အဒိ, ပိာ်မုၣ်, ပိာ်ခွါဒီး ဖိဒံဖိသၣ်လၢ ဒိကနၢ်အကလုၢ်တဖၣ်န့ၣ်လီၤ.
စီၤမိၤၡ့
ကစၢ်ယွၤန့ၣ် အိၣ်ဒီးတၢ်သးကညီၤ ဒီးပှၤလၢအဂုာ်ကျဲးစၢး ဃုသ့ၣ်ညါအီၤတဖၣ်န့ၣ် အဆိၣ်ဂ့ၤဝဲ.
သ့တၢ်လၢာ်ကစၢ်န့ၣ် ဟ့ၣ်လီၤဝဲ တၢ်စိတၢ်မီၤလၢ ဝံလၢ အမ့ၢ်စီၤမိၤၡ့တဂၤအအိၣ် ဒ်သိးကမၤဝဲတၢ်လီၤလးလၢ အလီၤတိၢ်လီၤဆီတဖၣ်န့ၣ်လီၤ. တကတီၢ်ဃီန့ၣ် စီၤမိၤၡ့ဃ့ထုကဖၣ်လၢ ကစၢ်ယွၤအအိၣ်ဒီး တဲဝဲလၢ “ဘိးဘၣ်သ့ၣ်ညါလၢ်ယၤ လၢနကျဲ ဒ်သိးယကသ့ၣ်ညါနၤ, လၢယကဘၣ်ဘျုး ဘၣ်ဖှိၣ်လၢနမဲာ်ညါတက့ၢ်.” (၂ မိၤၡ့ ၃၃:၁၃) ကစၢ်ယွၤန့ၣ် ဘၣ်သူၣ်ဘၣ်သးဝဲ စီၤမိၤၡ့အတၢ်ဃ့ အဃိ အဆိၣ်ဂ့ၤအါထီၣ်အီၤဒီး တၢ်သ့ၣ်ညါ, ဒီးတၢ်နၢ်ပၢၢ်တဖၣ် ဒ်သိး အကသ့ၣ်ညါထီၣ် အကျဲဒီး အတၢ်ဂ့ၤတၢ်ဝါတဖၣ်န့ၣ်လီၤ. အဒိ, စီၤမိၤၡ့သ့ၣ်ညါထီၣ်လၢ တၢ်ဘၣ်တ့ကစၢ်န့ၣ် မ့ၢ် “ကစၢ်ယွၤလၢ အသးအိၣ်တၢ်, ဒီးသးကညီၤတၢ်” တဂၤလီၤ.—၂ မိၤၡ့ ၃၄:၆, ၇.
ပဒိးန့ၢ်ဘၣ် တၢ်မၤလိမနုၤလဲၣ်. ကစၢ်ယွၤအဲၣ်ဒိးဆိၣ်ဂ့ၤ ပဝဲ, ပိာ်မုၣ်, ပိာ်ခွါ ဒီးဖိဒံဖိသၣ်လၢ အဲၣ်ဒိးသ့ၣ်ညါ အါထီၣ်အီၤတဖၣ်ကိးဂၤဒဲးလီၤ. လၢအတၢ်ကွဲးအသးစီဆှံအပူၤန့ၣ် အပာ်ဖျါထီၣ်န့ၢ်ပှၤလၢ ပကဘၣ် ဘူၣ်ထီၣ်ဘါထီၣ်အီၤဒ်လဲၣ်. တကးဒံးဘၣ် အသးအိၣ်ပှၤဒီး အဲၣ်ဒိးဆိၣ်ဂ့ၤပှၤ သပှၢ်ကတၢၢ်န့ၣ်လီၤ.
ယ့ၣ်ၡူး
လၢတၢ်သူကညီၤသးကညီၤအပူၤ ယ့ၣ်ၡူးမၤဘျါက့ၤဝဲ ကယဲၢ်ပှၤလၢအိၣ်ဒီး တၢ်ဆါအကလုာ်ကလုာ်တဖၣ်
ပမ့ၢ်မၤလိဘၣ်ဃး တၢ်လၢယ့ၣ်ၡူးမၤဝဲဒီး သိၣ်လိဝဲတဖၣ်န့ၣ် ပဒိးန့ၢ်ဘၣ် ကစၢ်ယွၤ အတၢ်ဆိၣ်ဂ့ၤတဖၣ် လီၤထူလီၤယိာ်သ့.
ယ့ၣ်ၡူး အတၢ်အိၣ်မူ ဒီးအတၢ်သိၣ်လိတဖၣ်န့ၣ် နထံၣ်န့ၢ်အီၤလၢ တၢ်ကွဲးအသးစီဆှံပူၤသ့ဝဲလီၤ. ကစၢ်ယွၤ ဟ့ၣ်ဝဲ ယ့ၣ်ၡူးတၢ်စိတၢ်ကမီၤလၢ ကမၤဝဲတၢ်လီၤလးတဖၣ် ဒ်သိးကမၤဘျါက့ၤဝဲ ပှၤမဲာ်ဘျီၣ်, ပှၤနၢ်တအၢ ဒီးပှၤအခီၣ်ဟးဂီၤတဖၣ်လီၤ. တကးဒံးဘၣ် အမၤမူထီၣ်စ့ၢ်ကီးဝဲ ပှၤသံန့ၣ်လီၤ. တၢ်လၢယ့ၣ်ၡူး မၤဝဲသ့ၣ်တဖၣ်အံၤ ပာ်ဖျါထီၣ်န့ၢ်ပှၤ တၢ်လၢကစၢ်ယွၤ ကမၤန့ၢ်ပှၤဟီၣ်ခိၣ်ဖိလၢ ခါဆူညါတဖၣ်လီၤ. ဒီးဒ်သိး ပကဒိးန့ၢ်ဘၣ် တၢ်ဆိၣ်ဂ့ၤတဖၣ်အံၤအဂီၢ် အတဲဝဲဒ်အံၤ “ဒီးတၢ်မူအထူအယိာ်န့ၣ် မ့ၢ်တၢ်သ့ၣ်ညါနၤ, ယွၤနီၢ်နီၢ်တဂၤဃီ, ဒီးယ့ၣ်ၡူးခရံာ်လၢ နမၢလီၤအီၤန့ၣ်လီၤ.”—ယိၤဟၣ် ၁၇:၃.
ယ့ၣ်ၡူးန့ၣ် မ့ၢ်ပှၤလၢအသးကညီၤတၢ်, သူၣ်အိၣ်သးအိၣ်တၢ် ဒီးအသးဂ့ၤဒိၣ်မးလီၤ. ပိာ်မုၣ်, ပိာ်ခွါ, ဖိဒံဖိသၣ် ဒီးပှၤသးပှၢ်တဖၣ် ဟဲလၢယ့ၣ်ၡူးအအိၣ် ဒီးတူၢ်လိာ်ဝဲအတၢ်ကွဲမုာ်လီၤ. ဒီးအတဲဝဲလၢ “မၤလိတၢ်လၢ ယၤတက့ၢ်. အဂ့ၢ်ဒ်အံၤ, ယသးစူၤ, ဒီးယသးဆီၣ်လီၤယသးလီၤ. ဒီးသုကထံၣ်န့ၢ် တၢ်အိၣ်ဘှံးလၢ သုသးအဂီၢ်လီၤ.” (မးသဲ ၁၁:၂၉) လၢယ့ၣ်ၡူးအစိၤန့ၣ် ပိာ်ခွါတဖၣ် ကွၢ်တလီၤဝဲ ပိာ်မုၣ်တဖၣ်လီၤ. မ့မ့ၢ်လၢယ့ၣ်ၡူးခီန့ၣ် အရ့ဒီးပိာ်မုၣ်လၢ တၢ်အဲၣ်တၢ်ကွံ, တၢ်ပာ်ကဲ ဒီးတၢ်ယူးယီၣ်အပူၤန့ၣ်လီၤ.
ပဒိးန့ၢ်ဘၣ် တၢ်မၤလိမနုၤလဲၣ်. ယ့ၣ်ၡူးပာ်ဖျါထီၣ်ဝဲ အတၢ်အဲၣ်လၢ ပှၤဂၤအဖီခိၣ်နီၢ်ကီၢ်န့ၣ်လီၤ. တကးဒံးဘၣ် အပာ်လီၤန့ၢ်ပှၤ အဒိဂ့ၤတဲာ်ဘၣ်လၢ ပကဘၣ်ရ့လိာ်သး တဂၤဒီးတဂၤဒ်လဲၣ်န့ၣ်လီၤ.
ယ့ၣ်ၡူးန့ၣ် တမ့ၢ်ယွၤဘၣ်
တၢ်ကွဲးအသးစီဆှံန့ၣ် သိၣ်လိဝဲ “လၢပဝဲဒၣ်ပဂီၢ်, ကစၢ်ယွၤအိၣ်ထဲတဂၤဧိၤ” ဒီးလၢတၢ်ဆီၣ်လီၤသးအပူၤ ယ့ၣ်ၡူးခရံာ်မ့ၢ် ပှၤဆှၢတၢ်ကစီၣ်လၢ ကစၢ်ယွၤအဂီၢ်န့ၣ်လီၤ. (၁ ကရံၣ်သူး ၈:၆, ခ့ခါစှီၤကျိာ်) တကးဒံးဘၣ် ယ့ၣ်ၡူးအနီၢ်စၢ်တဲဝဲလၢ ကစၢ်ယွၤန့ၣ် ဒိၣ်န့ၢ်အီၤ ဒီးဆှၢလီၤအီၤဆူ ဟီၣ်ခိၣ်န့ၣ်လီၤ.—ယိၤဟၣ် ၁၁:၄၁, ၄၂; ၁၄:၂၈.a
a ဒ်သိး နကသ့ၣ်ညါအါထီၣ် တၢ်ဂ့ၢ်ဘၣ်ဃးဒီး ယ့ၣ်ၡူးခရံာ်န့ၣ် ကွၢ်တၢ်မၤလိ ၈ ဒီး ၉ လၢလံာ် Real Faith—Your Key to a Happy Life ဒီးနဒိးန့ၢ်အီၤလၢ www.jw.org အပူၤသ့လီၤ.