ဆဲးဃ့ဘါထုကဖၣ်​ ဒ်သိးနကဒိးန့ၢ်ဘၣ်​ ကစၢ်ယွၤအတၢ်ဘၣ်သး

ကစၢ်ယွၤဟ့ၣ်ပှၤ တၢ်ဟ့ၣ်လီၤဆီတခါလၢ အမ့ၢ် တၢ်ဃ့ထုကဖၣ်​ ဒ်သိးပကတဲတၢ်ဒီးအီၤ ဒီးပာ်ဖျါထီၣ်​ ပတၢ်တူၢ်ဘၣ်တဖၣ်န့ၣ်လီၤ. ဝံတဂၤလၢ အမ့ၢ်စီၤဒၤဝံးန့ၣ်​ ဃ့ဘါထုကဖၣ်လၢ ကစၢ်ယွၤအအိၣ်ဒီး တဲဝဲလၢ “ပှၤလၢအနၢ်ဟူ တၢ်ဘါထုကဖၣ်ဧၢ, တၢ်ညၣ်ခဲလၢာ် ကဟဲဆူနအိၣ်လီၤ.” (စံးထီၣ်ပတြၢၤ ၆၅:၂) ဒ်သိးကစၢ်ယွၤ ကဒိကနၣ်​ ပတၢ်ထုကဖၣ်ဒီး ကဆိၣ်ဂ့ၤပှၤအဂီၢ် ပကဘၣ်မၤဒ်လဲၣ်.

ဃ့ဘါထုကဖၣ်လၢ သးဒီဖျၢၣ်လၢ အပှဲၤဒီးတၢ်ဆီၣ်လီၤသး

နနီၢ်ကစၢ်တၢ်ဃ့ဘါထုကဖၣ်န့ၣ်​ မၤစၢၤနၤဒ်သိး န ‘ကလူလီၤနသးလၢ [ယွၤ] အမဲာ်ညါ’ ဒီးတဲဖျါထီၣ်​ နတၢ်တူၢ်ဘၣ်နီၢ်နီၢ်တဖၣ်လီၤ. (စံးထီၣ်ပတြၢၤ ၆၂:၈) သ့တၢ်လၢာ်ကစၢ် ပာ်လုၢ်ပာ်ပှ့ၤဝဲ တၢ်ဃ့ဘါထုကဖၣ်လၢ အဟဲထီၣ်လၢ ပသးပူၤနီၢ်နီၢ်န့ၣ်လီၤ.

ဖဲနဃ့ဘါထုကဖၣ်အခါ သူကစၢ်ယွၤအမံၤတက့ၢ်

ကစၢ်ယွၤန့ၣ်​ အမံၤလၤသၣ်ကပီၤ အိၣ်ဝဲအါမး ဘၣ်ဆၣ်​ အနီၢ်ကစၢ်အမံၤန့ၣ်​ အိၣ်ဝဲထဲတဖျၢၣ်ဧိၤန့ၣ်လီၤ. “ယဲဒၣ်အံၤ ယမ့ၢ် [“ယဟိဝၤ”, NWT] ယွၤလီၤ. အဝဲန့ၣ်မ့ၢ် ယမံၤလီၤ.” (ယၡါယၤ ၄၂:၈) လၢလံာ်စီဆှံပူၤန့ၣ်​ မံၤလၢ အမ့ၢ် ယဟိဝၤယွၤန့ၣ်​ ဘၣ်တၢ်ပာ်ဖျါအီၤ အိၣ်လၢအဘျီ ၇,၀၀၀ ဃၣ်ဃၣ်ညါလီၤ. ဖဲဝံအါဂၤ ဃ့ဘါထုကဖၣ်လၢ ကစၢ်ယွၤအိၣ်အခါ အဝဲသ့ၣ်သူဝဲ ကစၢ်ယွၤအမံၤန့ၣ်လီၤ. စီၤအၤဘြၤဟၣ်​ တဲဝဲလၢ “ယွၤဧၢ [“ယဟိဝၤ”, NWT] ဝံသးစူၤ . . . ယကဘၣ်စံးကဒီးယဲ [တၢ်ဒီးနၤ].” (၁ မိၤၡ့ ၁၈: ၃၀, ခ့ခါစှီၤကျိာ်) အဃိ ဖဲပဃ့ဘါထုကဖၣ်အခါ ပကြၢးသူ ကစၢ်ယွၤအမံၤ လၢအမ့ၢ် ယဟိဝၤယွၤန့ၣ်လီၤ.

နဃ့ဘါထုကဖၣ်လၢ နနီၢ်ကစၢ်ကျိာ်သ့

ပမ့ၢ်ဃ့ဘါထုကဖၣ်လၢ ကျိာ်တကျိာ်ဂ့ၤတကျိာ်ဂ့ၤန့ၣ်​ ကစၢ်ယွၤနၢ်ပၢၢ်ဝဲ ပတၢ်ဆိကမိၣ်ဒီး ပတၢ်တူၢ်ဘၣ်ခဲလၢာ်န့ၣ်လီၤ. အကလုၢ်ကထါ ပာ်ဖျါထီၣ်န့ၢ်ပှၤလၢ “ယွၤတကွၢ်ဒိၣ်ဆံး အါစှၤဘၣ်ပှၤကညီဘၣ်. မ့ၢ်အတူၢ်လိာ် ပှၤလၢအပျံၤအီၤ, ဒီးမၤတၢ်တီတၢ်လိၤလၢ ပှၤကိးကလုာ်ဒဲးအကျါလီၤ.”—မၤတၢ် ၁၀:၃၄, ၃၅.

ဘၣ်ဆၣ်​ ဒ်သိးကစၢ်ယွၤ ကဆိၣ်ဂ့ၤပှၤအဂီၢ် ထဲဒၣ်ပဃ့ဘါထုကဖၣ်န့ၣ်​ တလၢပှဲၤဒံးဘၣ်. တၢ်ဂ့ၢ်လၢခံတခါန့ၣ်​ ပကတဲသကိး ပဘၣ်မၤမနုၤလဲၣ်န့ၣ်လီၤ.