တၢ်အဲၣ်တၢ်ကွံန့ၣ် ကထိၣ်ဟူးထိၣ်ဂဲၤထီၣ်ပှၤလၢ ပကပာ်ဆိပှၤဂၤအတၢ်လိၣ်ဘၣ်တဖၣ်လၢ ပနီၣ်ကစၢ် တၢ်လိၣ်ဘၣ်အမဲာ်ညါလီၤ
ပပာ်ဖျါထီၣ် ပတၢ်အဲၣ်လၢ ပှၤဂၤအဖီခိၣ် ကသ့ဒ်လဲၣ်
ပဟဲလီၤစၢၤလီၤသွဲၣ်လၢ စီၤအၤဒၣ်ကိးဂၤဒဲးအဃိ ပမ့ၢ်ဟံၣ်ဖိဃီဖိခဲလၢာ်လီၤ. လၢဟံၣ်ဖိဃီဖိအပူၤန့ၣ် ပကဘၣ်အိၣ်ဒီး တၢ်အဲၣ်တၢ်ကွံ ဒီးတၢ်ပာ်ကဲလိာ်သး တဂၤဒီးတဂၤဘၣ်ဆၣ် မုၢ်မဆါတနံၤအံၤ ကီထီၣ်ဝဲလၢ ပှၤကအိၣ်ဒီး တၢ်အဲၣ်တၢ်ကွံန့ၣ်လီၤ. တၢ်အိၣ်သးကကဲထီၣ်သး ဒ်အံၤန့ၣ် တမ့ၢ်ဝဲ ပကစၢ်လၢအပှဲၤဒီး တၢ်အဲၣ်တၢ်ကွံတဂၤအံၤ အတၢ်တိာ်ပာ်ဘၣ်.
ဘၣ်ဃးဒီး တၢ်အဲၣ်တၢ်ကွံန့ၣ် လံာ်စီဆှံပာ်ဖျါထီၣ်န့ၢ်ပှၤဒ်လဲၣ်
“နဘၣ်အဲၣ်ပှၤလၢ နဃၢၤ ဒ်နကစၢ်ဒၣ်နဲအသိး.” —၃ မိၤၡ့ ၁၉:၁၈.
ဆဲး “အဲၣ်သုဒုၣ်သုဒါတက့ၢ်.”—မးသဲ ၅:၄၄.
နဘၣ်အဲၣ်ပှၤလၢ နဃၢၤန့ၣ် အခီပညီမ့ၢ် မနုၤလဲၣ်
ဘၣ်ဃးဒီးတၢ်အဲၣ်တၢ်ကွံန့ၣ် ကစၢ်ယွၤပာ်ဖျါထီၣ်န့ၢ်ပှၤလၢ အကလုၢ်ကထါအပူၤဒ်လဲၣ်န့ၣ် ပာ်သူၣ်ပာ်သးအီၤ ဖဲ ၁ ကရံၣ်သူး ၁၃:၄-၇ တက့ၢ်.
“တၢ်အဲၣ်တၢ်ကွံ ဝံသးစူၤတၢ်ဃဲးဃဲး, ဒီးမၤဂ့ၤတၢ်”
ဆိကမိၣ်ကွၢ်— ဖဲနမၤကမၣ်တၢ်အခါ ပှၤမ့ၢ်ပာ်ဖျါထီၣ် တၢ်ဝံသးစူၤဒီးတၢ်မၤဂ့ၤ ဒီးတပာ်ဖျါထီၣ် တၢ်သူၣ်ဒိၣ်သးဖျိးလၢ နဖီခိၣ်န့ၣ် နကတူၢ်ဘၣ်ဒ်လဲၣ်.
“တၢ်အဲၣ်တၢ်ကွံ တသးကါဘၣ်တၢ်ဘၣ်”
ဆိကမိၣ်ကွၢ်—ပှၤမ့ၢ်တနာ်အီၣ်နၤဒီး အိၣ်ဒီးတၢ်သးက့ၣ်လၢ နဖီခိၣ်န့ၣ် နကတူၢ်ဘၣ်ဒ်လဲၣ်.
တၢ်အဲၣ်တၢ်ကွံ “တဃုဘၣ် အတၢ်ဒၣ်ဝဲဘၣ်”
ဆိကမိၣ်ကွၢ်—ပှၤမ့ၢ်ပာ်ကဲ နတၢ်ထံၣ်ဒီး တကွၢ်ထဲအနီၢ်ကစၢ်ဒၣ်ဝဲ အတၢ်ထံၣ်န့ၣ် နတူၢ်ဘၣ်ဒ်လဲၣ်.
တၢ်အဲၣ်တၢ်ကွံ “တဆိကမိၣ်ဘၣ် တၢ်အၢတၢ်သီဘၣ်”
ဆိကမိၣ်ကွၢ်— ပှၤလၢမၤဘၣ်တၢ်ကမၣ် ဒီးပီၢ်ယၢ်လီၤသးနီၢ်နီၢ်န့ၣ် ကစၢ်ယွၤပျၢ်ကွံာ်ဝဲအဝဲသ့ၣ် တၢ်ကမၣ်လီၤ. ကစၢ်ယွၤန့ၣ် “တသိၣ်ဃီၣ်တၢ် တထံၣ်ဃီဘၣ်. တပာ်တၢ် လီၤထူလီၤယိာ်ဘၣ်.” (စံးထီၣ်ပတြၢၤ ၁၀၃:၉) ဖဲပမၤကမၣ်ဘၣ် ပှၤတဂၤဒီး အဝဲသ့ၣ် ပျၢ်ကွံာ် ပတၢ်ကမၣ်အခါ ပသးခုဒိၣ်မးလီၤ. အဃိ ပဝဲစ့ၢ်ကီး ဖဲပှၤဂၤမၤကမၣ်ပှၤအခါ ပကြၢးပျၢ်ကွံာ်အဝဲသ့ၣ် တၢ်ကမၣ်န့ၣ်လီၤ.—စံးထီၣ်ပတြၢၤ ၈၆:၅.
တၢ်အဲၣ်တၢ်ကွံန့ၣ် “အသးတခုဘၣ်လၢ တၢ်တတီတလိၤအပူၤဘၣ်”
ဆိကမိၣ်ကွၢ်— ဖဲပလဲၤခီဖျိဘၣ် တၢ်အိၣ်သးလၢ အတဂ့ၤဘၣ်အခါ ပတအဲၣ်ဒိးလၢ ပှၤဂၤကသးခု ခီဖျိလၢ ပတူၢ်ဘၣ်တၢ်ကီတၢ်ခဲ အဃိဘၣ်. လၢတၢ်န့ၣ်အဃိ ပဝဲစ့ၢ်ကီး ပှၤလၢအတရ့ဒီး ပှၤမူာ်မူာ်နီၢ်နီၢ်တဖၣ် ဖဲအဝဲသ့ၣ်ထံၣ်ဘၣ်ဒီး တၢ်နးတၢ်ဖှီၣ်အခါ ပတသးခုဘၣ်.
ဒ်သိးပကဒိးန့ၣ်ဘၣ် ကစၢ်ယွၤတၢ်ဆိၣ်ဂ့ၤအဂီၢ် ပှၤအသးနံၣ်, အကလုာ် ဒီးတၢ်ဘူၣ်တၢ်ဘါ မ့ၢ်တဒ်သိးဒၣ်လဲၣ် ပကဘၣ်အဲၣ် အဝဲသ့ၣ်ကိးဂၤဒဲးန့ၣ်လီၤ. ကျဲတဘိလၢ ပပာ်ဖျါထီၣ် ပတၢ်အဲၣ်သ့န့ၣ် မ့ၢ်ဝဲပမၤစၢၤ ပှၤလၢအလိၣ်ဘၣ် တၢ်မၤစၢၤတဖၣ်န့ၣ်လီၤ.