ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါမၢ်ၡး ၅–၁၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | မးသဲ ၂၀–၂၁
“ဖဲဒၣ်ပှၤလၢ တၢ်မိၣ်ကဲဒိၣ်အသး တဂၤဂၤလၢသုကျါန့ၣ်, မ်အကဲလၢသုခ့သုပှၤတက့ၢ်”
(မးသဲ ၂၀:၃) ဒီးလၢသၢနၣ်ရံၣ်ဃၣ်ဃၣ်န့ၣ်, ဟးထီၣ်ဝဲ, ဒီးထံၣ်ဘၣ်ပှၤဂၤလၢအဆၢထၢၣ် တမၤတၢ်နီတမံၤဘၣ်, လၢဖၠါပူၤ.
nwtsty မံဒံယါ
ဖၠါပူၤ
ဖၠါတနီၤနီၤန့ၣ် အိၣ်လၢကျဲကပၤ ဒီးရဲၣ်လီၤအသးလၢကျဲဒီဘိ ဒ်တၢ်ဂီၤအံၤပာ်ဖျါထီၣ်ဝဲအသိးလီၤ. ပှၤဆါတၢ်ဖိတဖၣ်အိၣ်ဝဲအါမး ဒီးပာ်လီၤဆါအတၢ်ဖိတၢ်လံၤတဖၣ် လၢကျဲအပူၤအဃိ ကျဲန့ၣ်ကတံာ်ကတူာ်ဒိၣ်မးလီၤ. ပှၤလၢအအိၣ်လၢ လီၢ်ကဝီၤဖဲန့ၣ်တဖၣ် ပှ့ၤဝဲဟံၣ်အတၢ်ပီးတၢ်လီတဖၣ်, လီခီဒီးသပၢၤဟီၣ်ခိၣ်တဖၣ်, လီခီဆှံအပီးအလီလၢ အပှ့ၤဒိၣ်တဖၣ် ဒီးတၢ်အီၣ်တၢ်အီတဖၣ်သ့ဝဲလီၤ. ခီဖျိလၢတၢ်ခုၣ်ဒၢတအိၣ်ဘၣ်အဃိ ပှၤဘၣ်လဲၤပှ့ၤတၢ် လၢဖၠါပူၤကိးနံၤဒဲးလီၤ. ဖဲန့ၣ်န့ၣ် ပှၤပှ့ၤတၢ်ဖိတဖၣ် နၣ်ဟူဘၣ်ဝဲတၢ်ကစီၣ်အသီလၢ ပှၤပနံၣ်တၢ်ကၤတၢ်တဖၣ် မ့တမ့ၢ် ပှၤတမှံၤတဖၣ်အအိၣ်, ပှၤဖိသၣ်တဖၣ် ဂဲၤလိာ်ကွဲ ဒီးပှၤတနီၤနီၤအိၣ်ခိးတၢ် ဒ်သိးပှၤကငါအီၤဒီးကမၤဘၣ်တၢ်မၤအဂီၢ်လီၤ. လၢဖၠါပူၤန့ၣ် ယ့ၣ်ၡူးမၤဘျါက့ၤ ပှၤဆူးပှၤဆါတဖၣ် ဒီးစီၤပီလူး စံၣ်တဲၤတဲလီၤတၢ်ဖဲန့ၣ်လီၤ. (မၤတၢ်. ၁၇:၁၇) မ့မ့ၢ် ပှၤကွဲးလံာ်ဒီး ပှၤဖၤရံၤၡဲလၢ အပာ်ထီၣ်ထီအသးတဖၣ်န့ၣ် အဲၣ်ဒိးလၢ ပှၤကပာ်သူၣ်ဘၣ်သးအီၤ ဒီးပှၤကဆၢဂ့ၤဆၢဝါအီၤ ဖဲဖၠါပူၤလီၤ.
(မးသဲ ၂၀:၂၀, ၂၁) တုၤနုၤတစု, စီၤစ့းဘ့းဒဲအဖိခွါတဖၣ် အမိၢ်ဟဲဒီးအဖိခွါဆူအအိၣ်, ဒီးတီၤလီၤကဒွံကျိာ်, ဒီးဃ့တၢ်တမံၤလၢအီၤလီၤ. ၂၁ ဒီးအဝဲဒၣ်စံးဘၣ်အီၤ, တၢ်မိၣ်န့ၢ်ဘၣ်နသးလၢမနုၤတမံၤလဲၣ်. ဒီးစံးဘၣ်အီၤ, မၤလိာ်လၢ်လၢ ယဖိခွါခံဂၤအံၤ ကဆ့ၣ်နီၤလၢနစုထွဲတဂၤ, ဒီးလၢနစုစ့ၣ်တဂၤ, လၢနဘီနမုၢ် အပူၤတက့ၢ်.
nwtsty တၢ်မၤနီၣ် မး. ၂၀:၂၀, ၂၁
စီၤစ့းဘ့းဒဲအဖိခွါတဖၣ် အမိၢ်– အဝဲမ့ၢ် တၢ်မၢဖိယၤကိာ်ဒီး ယိၤဟၣ်အမိၢ်လီၤ. ပမ့ၢ်ကွၢ်လၢ လံာ်မၢ်ကူးအပူၤန့ၣ် ပှၤလၢအသုးဘူးအသးဆူ ယ့ၣ်ၡူးအအိၣ်န့ၣ်မ့ၢ်ဝဲ စီၤယၤကိာ်ဒီး စီၤယိၤဟၣ်လီၤ. အဃိပသ့ၣ်ညါဘၣ်လၢ ပှၤလၢအဃ့ဝဲတၢ်အလီၢ်အလၤလၢ ယ့ၣ်ၡူးအအိၣ်န့ၣ် မ့ၢ်အဝဲသ့ၣ်လီၤ. ဘၣ်ဆၣ် အဝဲသ့ၣ်မၢဝဲ အမိၢ်နီၢ်စၤလိၣ်လၢ ကဃ့န့ၢ်အီၤတၢ်ခွဲးတၢ်ယာ်အံၤ လၢယ့ၣ်ၡူးအအိၣ်လီၤ. ဘၣ်သ့ၣ်သ့ၣ် နီၢ်စၤလိၣ်ကမ့ၢ် ယ့ၣ်ၡူးအမုၢ်ဂၢ်လီၤ.—မး. ၂၇:၅၅, ၅၆; မၢ်. ၁၅:၄၀, ၄၁; ယိၤ. ၁၉:၂၅.
ကဆ့ၣ်နီၤလၢ နစုထွဲတဂၤ, ဒီးလၢနစုစ့ၣ်တဂၤ– တၢ်လီၢ်ခံခါအံၤန့ၣ် ဒိလီၤဝဲ တၢ်လၤကပီၤဒီး တၢ်န့ၢ်စိန့ၢ်ကမီၤလီၤ. ဘၣ်ဆၣ် ထီဘိန့ၣ်တၢ်လီၢ်လၢစုထွဲတခီန့ၣ် အပတီၢ်ထီကတၢၢ်လီၤ.—စံး. ၁၁၀:၁; မၤတၢ်. ၇:၅၅, ၅၆; ရိ. ၈:၃၄.
(မးသဲ ၂၀:၂၅-၂၈) ဒီးယ့ၣ်ၡူးကိးဃီၤအီၤ ဆူအအိၣ်ဒီးစံးဝဲဒၣ်, သုသ့ၣ်ညါလၢပှၤကလုာ်တဖၣ် အခိၣ်တဖၣ် ပာ်ကစၢ်အသးလၢအဖီခိၣ်လီၤ. ဒီးပဒိၣ်ပပှၢ်မၤအီၤဒီးအစိကမီၤလီၤ. ၂၆ ဘၣ်ဆၣ်ဒီးတၢ်တဘၣ်မၤဘၣ်အသး ဒီးသုဒ်န့ၣ်အသိးဘၣ်. မ့မ့ၢ်ဖဲဒၣ်ပှၤလၢတၢ်မိၣ်ကဲဒိၣ်အသးတဂၤဂၤလၢသုကျါန့ၣ်, မ်အကဲလၢသုခ့သုပှၤတက့ၢ်. ၂၇ ဒီးဖဲဒၣ်ပှၤလၢတၢ်မိၣ် ကဲအသးလၢ အခိၣ်တဂၤဂၤ လၢသုကျါန့ၣ်, မ်အကဲလၢ သုကုၢ်တက့ၢ်. ၂၈ ဒ်န့ၣ်အသိး, ပှၤကညီဖိခွါအံၤ တဟဲဘၣ်ဒ်သိးပှၤကမၤအီၤလၢ အခ့အပှၤအတၢ်မၤဘၣ်. မ့ၢ်ဒ်သိးအကမၤ တၢ်အခ့အပှၤအတၢ်မၤ, ဒီးဟ့ၣ်လီၤအသးလၢ ပှၤကညီအါဂၤအပှ့ၤန့ၣ်လီၤ.
nwtsty တၢ်မၤနီၣ် မးသဲ ၂၀:၂၆, ၂၈
တၢ်အခ့အပှၤ– လံာ်စီဆှံသူဝဲ ကြံး (စ်) အတၢ်ကတိၤ ဒၤအၤခိၤနိ (di·aʹko·nos) အါဘျီလီၤ. တၢ်ကတိၤအံၤ အဲၣ်ဒိးစံးဝဲ ပှၤလၢအမၤတၢ်လၢ ပှၤဂၤအဂီၢ်လၢ တၢ်ဆီၣ်လီၤသးအပူၤလီၤ. ဒီးတၢ်ကတိၤအံၤ ပှၤသူအီၤဖဲ ပှၤတဲနၢ်ပၢၢ်တၢ်ဂ့ၢ်လၢ ဘၣ်ဃးဒီးယ့ၣ်ၡူး (ရိ. ၁၅:၈), ခရံာ်အခ့အပှၤ (၁ ကရံၣ်. ၃:၅-၇; ကလီး. ၁:၂၃), တၢ်အိၣ်ဖှိၣ်အခ့အပှၤတဖၣ် (ဖံလံး. ၁:၁; ၁ တံၤ. ၃:၈), ပှၤမၤတၢ်အခ့အပှၤအတၢ်မၤလၢဟံၣ်အပူၤ (ယိၤ. ၂:၅, ၉) ဒီးပဒိၣ်ပပှၢ်တဖၣ်လီၤ (ရိ. ၁၃:၄).
တဟဲဘၣ်ဒ်သိးပှၤကမၤအီၤလၢ အခ့အပှၤအတၢ်မၤဘၣ်. မ့ၢ်ဒ်သိးအကမၤ တၢ်အခ့အပှၤအတၢ်မၤ– မ့တမ့ၢ် “တမ့ၢ်လၢ ပှၤကမၤန့ၢ်အီၤတၢ်အဂီၢ်ဘၣ်, မ့ၢ်ဒ်သိး ကမၤန့ၢ်ပှၤတၢ်အဂီၢ်လီၤ.”
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(မးသဲ ၂၁:၉) ဒီးပှၤဂီၢ်မုၢ်လၢအလဲၤလၢညါဒီးပှၤလဲၤလၢခံတဖၣ်န့ၣ် ကိးပသူထီၣ်ဒီးစံးဝဲဒၣ်, စီၤဒၤဝံးအဖိခွါဧၢ, အုၣ်က့ၤခီၣ်က့ၤခဲကနံၣ်အံၤတက့ၢ်. ပှၤလၢအဟဲလၢယွၤအမံၤတဂၤအံၤ, မ်အဘၣ်တၢ်ဆိၣ်ဂ့ၤတက့ၢ်. အုၣ်က့ၤခီၣ်က့ၤခဲကနံၣ်အံၤ, လၢတၢ်ထီကတၢၢ်တက့ၢ်.
nwtsty တၢ်မၤနီၣ် မးသဲ ၂၁:၉
အုၣ်က့ၤခီၣ်က့ၤ, ပဃ့ထုကဖၣ်လီၤ– “ဟီစနၤ (Hosanna).” ကြံး(စ်) အတၢ်ကတိၤအံၤ ဟဲလီၤစၢၤလၢ ဧ့ၤဘြံၤအကျိာ် ဒီးအခီပညီမ့ၢ် “အုၣ်က့ၤခီၣ်က့ၤခဲကနံၣ်အံၤတက့ၢ်, ပဃ့ထုကဖၣ်လီၤ” မ့တမ့ၢ် “ဝံသးစူၤ အုၣ်က့ၤခီၣ်က့ၤတက့ၢ်.” ဖဲအံၤသူဝဲတၢ်ကတိၤဒ်သိး ပှၤဃ့ကညးတၢ်လၢယွၤအအိၣ် လၢတၢ်အုၣ်က့ၤခီၣ်က့ၤအဂီၢ် မ့တမ့ၢ် ပှၤကမၤနၢၤတၢ်အဂီၢ်လီၤ. ဘၣ်သ့ၣ်သ့ၣ် ကအဲၣ်ဒိးတဲဝဲ “ဝံသးစူၤ ဟ့ၣ်လီၤအီၤ တၢ်အုၣ်က့ၤခီၣ်က့ၤတက့ၢ်.” ဒီးမ့ၢ်ဝဲတၢ်ကတိၤလၢ ပှၤဃ့ဘါထုကဖၣ်တၢ် ဒီးပှၤစံးထီၣ်ပတြၢၤတၢ်န့ၣ်လီၤ. ဧ့ၤဘြံၤအတၢ်ကတိၤအံၤ နကထံၣ်ဘၣ်အီၤဖဲ စံး. ၁၁၈:၂၅ ပၣ်ဃုာ်လၢ ဟၣ်လဲ (Hallel) အထါသးဝံၣ်စံးထီၣ်ပတြၢၤ လၢပှၤသးဝံၣ်အီၤဖဲ ဘူၣ်လဲၤကပာ်အဆၢကတီၢ်န့ၣ်လီၤ. ဖဲပှၤဂီၢ်မုၢ်တဖၣ် ထံၣ်ဘၣ်ယ့ၣ်ၡူးအခါ သ့ၣ်နီၣ်ထီၣ်က့ၤဝဲ တၢ်ကတိၤအံၤအဃိ ကိးပသူထီၣ်ဝဲဒ်န့ၣ်လီၤ. ကျဲတဘိလၢ ကစၢ်ယွၤစံးဆၢက့ၤ အဝဲသ့ၣ် အတၢ်ထုကဖၣ်န့ၣ် မ့ၢ်ဝဲမၤဂဲၤဆၢထၢၣ်သမူထီၣ်က့ၤ စီၤဒၤဝံးအဖိခွါ ယ့ၣ်ၡူးလၢ တၢ်သံန့ၣ်လီၤ. ဖဲ မး. ၂၁:၄၂ န့ၣ်ယ့ၣ်ၡူးသူဝဲ စံး. ၁၁၈:၂၂, ၂၃ ဒီးတဲဖျါထီၣ်ဝဲလၢ လံာ်စီဆှံအဆၢအံၤ ဘၣ်ဃးဒီး မ့းၡံအၤန့ၣ်လီၤ.
စီၤဒၤဝံးအဖိခွါ– တၢ်ကတိၤအံၤပာ်ဖျါထီၣ်ဝဲလၢ ယ့ၣ်ၡူးဟဲလီၤစၢၤလီၤသွဲၣ်လၢမတၤလဲၣ် ဒီးမ့ၢ်ဝဲ မ့းၡံအၤလၢ ဘၣ်တၢ်တဲဆိပာ်စၢၤအီၤန့ၣ်လီၤ.
(မးသဲ ၂၁:၁၈, ၁၉) ဒီးလၢမုၢ်ဆ့ၣ်ထီၣ်န့ၣ်, က့ၤကဒါက့ၤဝဲဆူ ဝ့ၢ်ပူၤအဖၢမုၢ်ဒီး, တၢ်သၣ်ဝံၤအသးလီၤ. ၁၉ ဒီးထံၣ်ဘၣ်ချၢၣ်ဒၢအိၣ်လၢ ကျဲဃၢၤတထံး, ဒီးလဲၤဃီၤဆူအအိၣ်, ဒီးတထံၣ်န့ၢ်ဘၣ်တၢ်လၢအလိၤနီတမံၤဘၣ်, ထံၣ်န့ၢ်ထဲအဒိးအလၣ် လၢအလိၤလီၤ. ဒီးစံးဘၣ်အီၤ, မ်နသုတသၣ်ထီၣ်လၢၤ နီတခီၣ်တဂ့ၤ. ဒီးချၢၣ်ဒၢန့ၣ်ဃ့ထီကွံာ် တကီၢ်ခါလီၤ.
jy ကဘျံးပၤ ၂၄၄ အဆၢ ၄-၆
ချၢၣ်ဒၢအထူၣ် ဘၣ်တၢ်သူအီၤလၢ ပှၤကဟ့ၣ်တၢ်သိၣ်လိလၢ ဘၣ်ဃးဒီးတၢ်နာ်
ဘၣ်မနုၤအဃိ ယ့ၣ်ၡူးမၤဃ့ထီဝဲ သ့ၣ်ထူၣ်လဲၣ်. ဘၣ်ဃးဒီးတၢ်ဂ့ၢ်အံၤန့ၣ် အဝဲတဲဝဲလၢ “ယစံးဘၣ်တဲဘၣ်သုတီတီအံၤ, သုမ့ၢ်အိၣ်ဒီးတၢ်နာ်, ဒီးသုသးမ့ၢ်တဒ့ဒီဘၣ်ဒီး, တမ့ၢ်ဘၣ် သုကမၤထဲ တၢ်မၤအသး လၢချၢၣ်ဒၢန့ၣ်ဧိၤဘၣ်. သုမ့ၢ်စံးဘၣ် ကစၢၢ်အံၤ, သုးကွံာ်နသး, ဒီးကွံာ်တ့ၢ်ကွံာ်နသးဆူပီၣ်လဲၣ်ပူၤတက့ၢ်ဒီး, တၢ်ကမၤအသးလီၤ. ဒီးသုမ့ၢ်စူၢ်က့ၤနာ်က့ၤတၢ်ဒီး, ဖဲဒၣ်သုဃ့တၢ်လၢ သုတၢ်ဘါထုကဖၣ် အပူၤတဖၣ်န့ၣ်, သုကန့ၢ်ဘၣ်ခဲလၢာ်လီၤ.” (မးသဲ ၂၁:၂၁, ၂၂) အဝဲက့ၤတဲဝဲတၢ်ကတိၤလၢ အပူၤကွံာ်အတဲဝဲ ဘၣ်ဃးဒီး ပှၤမ့ၢ်အိၣ်ဒီးတၢ်နာ်န့ၣ် ပှၤသုးကွံာ် ကစၢၢ်သ့ဝဲအဂ့ၢ်န့ၣ်လီၤ.—မးသဲ ၁၇:၂၀.
ယ့ၣ်ၡူးမၤဃ့ထီကွံာ် သ့ၣ်ထူၣ်ဒီးအဝဲ အဲၣ်ဒိးပာ်ဖျါထီၣ်ဝဲလၢ အပျဲၢ်အဘီၣ်တဖၣ် လိၣ်ဘၣ်တၢ်နာ်ကစၢ်ယွၤအဂ့ၢ်လီၤ. အဝဲတဲဝဲလၢ “ဖဲဒၣ်သုဃ့ဘါထုကဖၣ်ဒီး ဃ့တၢ်တဖၣ် ခဲလၢာ်န့ၣ်, နာ်လၢ သုဒိးန့ၢ် အီၤတက့ၢ်. ဒီးကကဲထီၣ်န့ၢ်သုဂီၢ်လီၤ.” (မၢ်ကူး ၁၁:၂၄) ပှၤလၢအပိာ်ယ့ၣ်ၡူးအခံတဖၣ် ဒိးန့ၢ်ဘၣ်တၢ်မၤလိမနုၤလဲၣ်. တၢ်အဒိအံၤကကဲဘျုးလၢ တၢ်မၢဖိတဖၣ်အဂီၢ်ဒိၣ်မး, မ့ၢ်လၢတယံာ်ဘၣ်န့ၣ် အဝဲသ့ၣ် ကကွၢ်ဆၢၣ်မဲာ်ဘၣ် တၢ်မၤကွၢ်အဃိလီၤ. ချၢၣ်ဒၢအထူၣ်လၢ အဃ့ထီဒီး တၢ်နာ်န့ၣ်ဘၣ်ထွဲလိာ်အသး လၢကျဲအဂၤတမံၤဒံးလီၤ.
ဒ်ချၢၣ်ဒၢအထူၣ်အံၤအသိး ပှၤအံၣ်စရ့လးဖိတဖၣ်န့ၣ် ဖျါဂ့ၤဒၣ်လၢခိလီၤ. ကစၢ်ယွၤအပှၤကလုာ်လၢ အမၤတၢ်အၢၣ်လီၤအီလီၤဒီးအီၤတဖၣ်အံၤ ဖျါလၢအဝဲသ့ၣ် ဒိကနၣ်ကစၢ်ယွၤ အတၢ်သိၣ်တၢ်သီလီၤ. ဘၣ်ဆၣ် နမ့ၢ်ကွၢ်က့ၤ အဝဲသ့ၣ်ဒီကလုာ်န့ၣ် အတၢ်နာ်စှၤ ဒီးတသၣ်ထီၣ် တၤသၣ်လၢအဂ့ၤဘၣ်. ယွၤအဖိခွါဒၣ်လဲာ်န့ၣ် အဝဲသ့ၣ်တတူၢ်လိာ်ဝဲဘၣ်. ယ့ၣ်ၡူးမၤဃ့ထီကွံာ် ချၢၣ်ဒၢလၢအတသၣ်ထီၣ်ဘၣ်န့ၣ် အဲၣ်ဒိးပာ်ဖျါထီၣ်ဝဲ ပှၤအံၣ်စရ့လးအကလုာ်လၢ တသၣ်ထီၣ်ဒီး တအိၣ်ဒီးတၢ်သးတီတဖၣ်အံၤ အတၢ်ကတၢၢ်န့ၣ် ကမၤအသးဒ်န့ၣ်လီၤ.
တၢ်ဖးလံာ်စီဆှံ
(မးသဲ ၂၀:၁-၁၉) အဂ့ၢ်ဒ်အံၤ, တၢ်လၢမူခိၣ် အဘီအမုၢ်န့ၣ်, မၤသးဒ်ဟံၣ်ကစၢ်လၢ အဟးထီၣ်လၢဂီၤဂီၤ, ဒ်သိးအကမၢလဲပှၤမၤတၢ်ဖိတဖၣ် လၢအစပံးလီၢ်အဂီၢ်လီၤ. ၂ ဒီးအၢၣ်လီၤအီလီၤဝဲဒီး ပှၤမၤတၢ်ဖိတဖၣ်လၢ အကန့ၢ်စ့ဒန့ၤရံၤတဘ့ၣ်လၢတနံၤအဂီၢ်ဝံၤဒီး, မၢအလဲၤဆူအစပံးလီၢ်ပူၤလီၤ. ၃ ဒီးလၢသၢနၣ်ရံၣ်ဃၣ်ဃၣ်န့ၣ်, ဟးထီၣ်ဝဲ, ဒီးထံၣ်ဘၣ်ပှၤဂၤလၢအဆၢထၢၣ် တမၤတၢ်နီတမံၤဘၣ်, လၢဖၠါပူၤ, ၄ ဒီးစံးဘၣ်အီၤ, လဲၤသုဝဲစ့ၢ်ကီးဆူစပံးလီၢ်တက့ၢ်. ဒီးဖဲအတီအဘၣ်န့ၣ်, ယကဟ့ၣ်သုလီၤ. ဒီးလဲၤဝဲလီၤ. ၅ မၤကဒီးတစု, လၢဃုနၣ်ရံၣ်, ဒီးလၢခွံနၣ်ရံၣ်ဃၣ်ဃၣ်န့ၣ်ဟးထီၣ်ဝဲ, ဒီးမၤဝဲဒ်န့ၣ်အသိးလီၤ. ၆ ဒီးလၢ တဆံတနၣ်ရံၣ်ဃၣ်ဃၣ်န့ၣ်, ဟးထီၣ်ဝဲ, ဒီးထံၣ်န့ၢ်ပှၤဂၤတဖၣ်ဆၢထၢၣ်, ဒီးစံးဘၣ်အီၤ, သုဆၢထၢၣ်ဖဲအံၤ, သုတမၤတၢ်နီတမံၤဘၣ် သ့တနံၤကျၢၤဘၣ်မနုၤလဲၣ်. ၇ ဒီးစံးဘၣ်အီၤ, အဂ့ၢ်ဒ်အံၤ, ပှၤတမၢလဲပှၤနီတဂၤဘၣ်. ဒီးစံးဘၣ်အီၤ, လဲၤစ့ၢ်ကီးသုဝဲဆူစပံးလီၢ်ပူၤန့ၣ်တက့ၢ်. ဒီးဖဲအတီအဘၣ်န့ၣ်သုကဒိးန့ၢ်ဘၣ်လီၤ. ၈ ဒီးတုၤမုၢ်ဟါလီၤဒီး, စပံးလီၢ်အကစၢ် စံးဘၣ်အပှၤကွၢ်တၢ်တဂၤ, ကိးန့ၢ်ပှၤမၤတၢ်ဖိတဖၣ်တက့ၢ်, ဒီးပှၤလဲၤမၤတၢ်လၢ ခံကတၢၢ်တဖၣ်, ပၢၢ်လၢပှၤမၤဆိတၢ်တဖၣ်န့ၣ်, ဟ့ၣ်လီၤအီၤလၢအဘူးအလဲတက့ၢ်. ၉ ဒီးတုၤပှၤလၢအလဲၤမၤတၢ်လၢ တဆံတနၣ်ရံၣ်တဖၣ်ဟဲဝဲဒီး, ဒိးန့ၢ်ဘၣ်စ့ဒန့ၤရံၤတဂၤတဘ့ၣ် တဂၤတဘ့ၣ်လီၤ. ၁၀ ဒီးတုၤပှၤလၢအလဲၤဆိတဖၣ်န့ၣ်, ဟဲဃီၤဝဲဒီး အဝဲသ့ၣ်ဆိကမိၣ်ဝဲလၢ အကန့ၢ်ဘၣ်တၢ်အါန့ၢ်အန့ၣ်တက့ၢ်လီၤ. ဘၣ်ဆၣ်ဒီး န့ၢ်ဘၣ်စ့ၢ်ကီးစ့ဒန့ၤရံၤ တဂၤတဘ့ၣ် တဂၤတဘ့ၣ်လီၤ. ၁၁ ဒီးဒိးန့ၢ်ဝဲဝံၤဒီး, ကဒူးကဒ့ၣ်တၢ်လၢ ဟံၣ်ကစၢ်အလိၤ. ၁၂ ဒီးစံးဝဲဒၣ်, ပဝဲဒၣ်အံၤ, ပဘၣ်တၢ်ဝံတၢ်ယိး, ဒီးတၢ်ကိၢ်တၢ်ဂီၤသ့တနံၤကျၢၤ, ဒီးနပာ်ပှၤကတၢၢ်လၢ အမၤတၢ်တနၣ်ရံၣ်ဧိၤတဖၣ်အံၤ, ထဲသိးဒီးပဝဲဒၣ်အံၤမးလဲၣ်. ၁၃ ဒီးအဝဲဒၣ်စံးဆၢတၢ်, ဒီးစံးဘၣ်ပှၤလၢအကျါတဂၤ, တခွါဧၢ, ယတမၤဘၣ်နၤလၢ တၢ်တတီဘၣ်နီတမံၤဘၣ်. နအၢၣ်လီၤအီလီၤတၢ်ဒီးယၤလၢစ့ဒန့ၤရံၤတဘ့ၣ်, တမ့ၢ်ဘၣ်ဧါ. ၁၄ ဟံးန့ၢ်နတၢ်ဒီးဟးထီၣ်တက့ၢ်. ပှၤအကတၢၢ်တဂၤအံၤ, ယသးအိၣ်လၢယကဟ့ၣ်အီၤဒ်နၤအသိးလီၤ. ၁၅ ယမၤယတၢ်ဒၣ်ယဲ, ဖဲဒၣ်ယသးအံၤ, တတီတဘၣ်ဘၣ်ဧါ. မ့ၢ်ယဂ့ၤဒီး, နသးကါစ့ၢ်ကီးဧါ. ၁၆ ဒ်န့ၣ်အသိး, ပှၤအိၣ်လၢခံတဖၣ်ကအိၣ်က့ၤလၢညါ, ဒီးပှၤလၢညါတဖၣ်, ကအိၣ်က့ၤလၢခံလီၤ, အဂ့ၢ်ဒ်အံၤ, ပှၤလၢ တၢ်ကိးအီၤတဖၣ်, အိၣ်အါဂၤလီၤ. မ့မ့ၢ်ပှၤလၢ တၢ်ဃုထၢအီၤတဖၣ်, အိၣ်စှၤဂၤလီၤ. ၁၇ ဒီးယ့ၣ်ၡူးလဲၤ ထီၣ်ဆူယရူၤၡလ့ၣ်, ဒီးအိၣ်လၢကျဲအဖၢမုၢ်ဒီး, ဟံးန့ၢ်အပျဲၢ်အဘီၣ်တဆံခံဂၤဆူတၢ်တဒၢ, ဒီးစံးဘၣ်အီၤ, ၁၈ ကွၢ်ကွၢ်, ပလဲၤထီၣ်ဆူယရူၤၡလ့ၣ်, ဒီးပှၤကညီဖိခွါအံၤကဘၣ်တၢ်ဟ့ၣ်လီၤကွံာ်အီၤဆူ ပှၤလုၢ်တၢ်အခိၣ်, ဒီးပှၤကွဲးလံာ် သ့ၣ်တဖၣ် အစုပူၤလီၤ. ၁၉ ဒီးအဝဲသ့ၣ်ကစံၣ်ညီၣ်ဘၢသံအီၤ, ဒီးကဟ့ၣ်လီၤကွံာ်အီၤဆူ ပှၤကလုာ်တဖၣ်အစုပူၤ, ဒ်သိးအကဒုၣ်ဒွဲၣ်အီၤ, ဒီးတီၢ်အီၤ, ဒီးပျၤထီအီၤလၢထူၣ်စုညါအလိၤလီၤ. ဒီးသၢနံၤတနံၤန့ၣ်, ကဂဲၤဆၢထၢၣ်က့ၤဝဲလီၤ.
လါမၢ်ၡး ၁၂–၁၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | မးသဲ ၂၂–၂၃
“မၤထွဲတၢ်မၤလိာ်လၢအဒိၣ်ကတၢၢ်ခံထံၣ်”
(မးသဲ ၂၂:၃၆-၃၈) သရၣ်ဧၢ, တၢ်မၤလိာ်ဖးဒိၣ်လၢတၢ်သိၣ်တၢ်သီအကျါ, မ့ၢ်ဖဲလဲၣ်တထံၣ်လဲၣ်. ၃၇ ဒီးယ့ၣ်ၡူးစံးဘၣ်အီၤ, အဲၣ်ယွၤနကစၢ်လၢနသူၣ်ကံၢ်သးလဲ, ဒီးနသးဒီဖျၢၣ်ညါ, ဒီးနတၢ်ကူၣ်တၢ်ဖးတုၤအလၢာ်တက့ၢ်, ၃၈ အအံၤမ့ၢ်တၢ်မၤလိာ်အခီၣ်ထံး, ဒီးအဖးဒိၣ် တထံၣ်လီၤ.
nwtsty တၢ်မၤနီၣ် မး. ၂၂:၃၇
သးဒီဖျၢၣ်– တၢ်ကတိၤလၢအမ့ၢ်သးန့ၣ် တဘျီတခီၣ် အဲၣ်ဒိးစံးဝဲ တၢ်အိၣ်လၢပကံၢ်ပူၤဒွဲပူၤလီၤ. တၢ်ကတိၤအံၤ ဘၣ်တၢ်သူဃုာ်အီၤဒီး တၢ်ကတိၤလၢအမ့ၢ် “သူၣ်ကံၢ်သးလဲ” ဒီး “တၢ်ကူၣ်တၢ်ဖး” အဃိ အခီပညီလီၤတံၢ်ဒိၣ်ထီၣ် ဒီးအဲၣ်ဒိးတဲဝဲလီၤဆီဒၣ်တၢ် ပှၤတဂၤ အတၢ်သူၣ်ဟူးသးဂဲၤ, အတၢ်တူၢ်ဘၣ်တဖၣ်ဒီး အတၢ်အဲၣ်ဒိးတဖၣ်လီၤ. တၢ်ကတိၤသၢဖျၢၣ်လၢအမ့ၢ် (သးဒီဖျၢၣ်, သူၣ်ကံၢ်သးလဲ, ဒီးတၢ်ကူၣ်တၢ်ဖးတုၤအလၢာ်) န့ၣ်အခီပညီ တလီၤဆီလိာ်အသးအါအါဘၣ်. ဒီးဘၣ်တၢ်သူအီၤသၢဖျၢၣ်လၢာ်အဃိ အဲၣ်ဒိးပာ်ဖျါထီၣ်ဝဲ လီၤတံၢ်လီၤဆဲးလၢ ပကဘၣ်အဲၣ်ကစၢ်ယွၤ လၢာ်လၢာ်ဆ့ဆ့, လၢာ်သးလီၤ.
သူၣ်ကံၢ်သးလဲ– မ့တမ့ၢ် “ပှၤနီၢ်ဒီဂၤ”
တၢ်ကူၣ်တၢ်ဖး– မ့ၢ်ဝဲတၢ်သ့ၣ်ညါ. ပှၤတဂၤကြၢးသူဝဲ အတၢ်သ့ၣ်ညါ ဒ်သိးကသ့ၣ်ညါထီၣ် ယဟိဝၤယွၤဒီး အတၢ်အဲၣ်အီၤကအါထီၣ်အဂီၢ်လီၤ. (ယိၤ. ၁၇:၃, ရိ. ၁၂:၁) ဒီးလံာ်စီဆှံအဆၢအံၤ ဘၣ်တၢ်ဟံးန့ၢ်အီၤဖဲ ၅ မိၤ. ၆:၅, လံာ်စီဆှံလၢ ဧ့ၤဘြံၤကျိာ်တကတြူၢ်အပူၤ ဒီးဖဲန့ၣ်သူဝဲတၢ်ကတိၤလၢအမ့ၢ် ‘သူၣ်ကံၢ်သးလဲ, သးဒီဖျၢၣ်ညါ ဒီးဂံၢ်ဘါခဲလၢာ်’ လီၤ. မ့မ့ၢ်လၢမးသဲအတၢ်ကွဲးနီၣ်လၢ ကြံး(စ်) အကျိာ်အပူၤသူက့ၤဝဲ တၢ်ကတိၤလၢအမ့ၢ် “တၢ်ကူၣ်တၢ်ဖး” လၢ ‘ဂံၢ်ဘါ’ အလီၢ်လီၤ. ဘၣ်သ့ၣ်သ့ၣ် ကမ့ၢ်လၢတၢ်ဂ့ၢ်အါမံၤအဃိ ပှၤကွဲးက့ၤဝဲဒ်အံၤလီၤ. တၢ်ဂ့ၢ်တၢတမံၤ, လၢဧ့ၤဘြံၤကျိာ်လၢပျၢၤန့ၣ် “တၢ်ကူၣ်တၢ်ဖး” အဂီၢ်န့ၣ်တၢ်ကတိၤတအိၣ်ဘၣ်. ဘၣ်ဆၣ် တၢ်ကတိၤအံၤန့ၣ် လီၤဂာ်ဒီး ဧ့ၤဘြံၤအတၢ်ကတိၤလၢအမ့ၢ် “သး” န့ၣ်လီၤ. တၢ်ကတိၤအံၤ ဖဲပှၤသူအီၤဒ်တၢ်အဒိအခါ အဲၣ်ဒိးစံးဝဲ တၢ်အိၣ်လၢပကံၢ်ပဒွဲပူၤ ပၣ်ဃုာ်ဒီး ပှၤတဂၤအတၢ်ဆိကမိၣ်, အတၢ်တူၢ်ဘၣ်, အတၢ်ပာ်သူၣ်ပာ်သး ဒီးအတၢ်သူၣ်ဟူးသဂဲၤတဖၣ်လီၤ. (၅ မိၤ. ၂၉:၄; စံး. ၂၆:၂; ၆၄:၆; လံာ်စီဆှံအဆၢအံၤအပူၤ ကွၢ်တၢ်မၤနီၣ်လၢဘၣ်ဃးဒီး တၢ်ကတိၤလၢအမ့ၢ် သး.) ဖဲလံာ်စီဆှံလၢ ဧ့ၤဘြံၤကျိာ်သူဝဲတၢ်ကတိၤလၢအမ့ၢ် “သး” အလီၢ်န့ၣ် ကြံးကျိာ် စဲးထူးကၠ့း (Septuagint) သူဝဲတၢ်ကတိၤလၢ အခီပညီလီၤဂာ်ဒ်သိးဒီးအီၤလၢအမ့ၢ် “တၢ်ကူၣ်တၢ်ဖး” န့ၣ်ပထံၣ်ဘၣ် တဘျုးဘျီညါလီၤ. (၁ မိၤ. ၈:၂၁; ၁၇:၁၇; ကတိၤ. ၂:၁၀; ၡါ. ၁၄:၁၃) ဒီးတၢ်ဂ့ၢ်အဂၤတမံၤန့ၣ် ဖဲမးသဲဟံးန့ၢ်က့ၤဝဲတၢ်ဂ့ၢ်ဖဲ ၅ မိၤ. ၆:၅ အခါလၢ ‘ဂံၢ်ဘါ [မ့တမ့ၢ် “vital force,” ftn.]’ အလီၢ်န့ၣ် ထဲနုာ်က့ၤဝဲ “တၢ်ကူၣ်တၢ်ဖး” လီၤ. ဘၣ်သ့ၣ်သ့ၣ်ဧ့ၤဘြံၤအတၢ်ကတိၤလၢအမ့ၢ် ‘ဂံၢ်ဘါ’ န့ၣ်အခီပညီ ကပၣ်ဃုာ်ဒီး တၢ်ဂံၢ်တၢ်ဘါလၢ နီၢ်ခိတခီ ဒီးတၢ်ဆိကမိၣ် မ့တမ့ၢ် တၢ်သ့ၣ်ညါလီၤ. ဒ်လဲၣ်ဂ့ၤဒ်လဲၣ်ဂ့ၤ ခီဖျိလၢ ဧ့ၤဘြံၤအတၢ်ကတိၤအံၤဒီး ကြံး(စ်) အတၢ်ကတိၤအံၤ အခီပညီလီၤဂာ်လိာ်အသးအဃိ ပှၤကွဲးလံာ်တဂၤအံၤ ဘၣ်မနုၤအဃိ တသူဝဲတၢ်ကတိၤ တဖျၢၣ်ဃီလဲၣ်န့ၣ် ပနၢ်ပၢၢ်သ့လီၤ.
(မးသဲ ၂၂:၃၉) ဒီးခံထံၣ်တထံၣ်န့ၣ်, လီၤဂာ်လၢအီၤလီၤ. အဲၣ်ပှၤလၢနဃၢၤ ဒ်နအဲၣ်လီၤနသးဒၣ်နဲအသိးန့ၣ်တက့ၢ်.
nwtsty တၢ်မၤနီၣ် မး. ၂၂:၃၉
ခံထံၣ်တထံၣ်– ဖဲ မး. ၂၂:၃၇ န့ၣ်ယ့ၣ်ၡူးစံးဆၢဝဲ ဖၤရံၤၡဲအတၢ်သံကွၢ်ဝံၤ တကးဒံးဘၣ် တဲစ့ၢ်ကီးဝဲ တၢ်မၤလိာ်ခံထံၣ်တထံၣ်အဂ့ၢ် (၃ မိၤ. ၁၉:၁၈) ဒီးသိၣ်လိဝဲလၢ တၢ်မၤလိာ်ခံထံၣ်အံၤ ဘၣ်ထွဲလိာ်အသးတခါဒီးတခါ, ဒီးမ့ၢ်ဒၣ် စီၤမိၤၡ့အတၢ်သိၣ်တၢ်သီ ဒီးဝံအကလုၢ်တဖၣ် အတၢ်ဂ့ၢ်မိၢ်ပှၢ်န့ၣ်လီၤ.—မး. ၂၂:၄၀.
ပှၤလၢနဃၢၤ– ကြံး (စ်) အတၢ်ကတိၤလၢအမ့ၢ် “ပှၤလၢနဃၢၤ” (“ပှၤလၢအဘူးဒီးနၤ”) န့ၣ် ကပၣ်ဃုာ်အါန့ၢ်ဒံး ပှၤလၢအအိၣ်ဘူးဒီးနၤဒံး. ကပၣ်ဃုာ်ဒီး ပှၤကိးဂၤဒဲးလၢ နတဲသကိး, မၤသကိး, လဲၤသကိးဒီးအီၤတဖၣ်လီၤ.—လူၤ. ၁၀:၂၉-၃၇; ရိ. ၁၃:၈-၁၀.
(မးသဲ ၂၂:၄၀) တၢ်လၢတၢ်မၤလိာ်ခံထံၣ်အံၤ, ဝံအကလုၢ်ဒီး တၢ်သိၣ်တၢ်သီ, လီၤစဲၤဝဲလၢအီၤခဲလၢာ်လီၤ.
nwtsty တၢ်မၤနီၣ် မး. ၂၂:၄၀
ဝံအကလုၢ် . . . တၢ်သိၣ်တၢ်သီ– “တၢ်သိၣ်တၢ်သီ” န့ၣ်အဲၣ်ဒိးစံးဝဲ ၁ မိၤၡ့ တုၤလၢ ၅ မိၤၡ့လီၤ. “ဝံအကလုၢ်” န့ၣ်အဲၣ်ဒိးစံးဝဲ ဝံအလံာ်တဖၣ်လၢ အအိၣ်ဖဲ လံာ်စီဆှံလၢဧ့ၤဘြံၤကျိာ်တကတြူၢ် အပူၤလီၤ. ပှၤမ့ၢ်သူဃုာ် တၢ်ကတိၤလၢအမ့ၢ် ဝံကလုၢ်ကထါဒီး တၢ်သိၣ်တၢ်သီန့ၣ် ကအဲၣ်ဒိးစံးဝဲ လံာ်စီဆှံလၢဧ့ၤဘြံၤကျိာ်ဒီတကတြူၢ်န့ၣ်လီၤ.—မး. ၇:၁၂; ၂၂:၄၀; လူၤ. ၁၆:၁၆.
လီၤစဲၤ– ကြံး (စ်) အတၢ်ကတိၤလၢအမ့ၢ် “လီၤစဲၤ” န့ၣ်အခီပညီအိၣ်လၢ “ဒိးသန့ၤထီၣ်, တၢ်အဂံၢ်ခီၣ်ထံး” လီၤ. ယ့ၣ်ၡူးပာ်ဖျါထီၣ်ဝဲလၢ စီၤမိၤၡ့အတၢ်မၤလိာ်အဘီတဆံ တကးဒံးဘၣ် လံာ်စီဆှံလၢဧ့ၤဘြံၤကျိာ်ဒီတကတြူၢ်န့ၣ် ဒိးသန့ၤထီၣ်အသးလၢ တၢ်အဲၣ်လီၤ.—ရိ. ၁၃:၉.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(မးသဲ ၂၂:၂၀, ၂၁) အဝဲသ့ၣ်စံးဘၣ်အီၤ, ကဲစၢ်အတၢ်လီၤ. တုၤနုၤတစု ယ့ၣ်ၡူးစံးဘၣ်အီၤ, အကူၢ်မ့ၢ်ဒ်န့ၣ်ဒီး, ဟ့ၣ်ကဲစၢ်လၢကဲစၢ်အတၢ်, ဒီးယွၤလၢ ယွၤအတၢ်တက့ၢ်.
nwtsty တၢ်မၤနီၣ် မး. ၂၂:၂၁
ကဲစၢ်လၢကဲစၢ်အတၢ်– ယ့ၣ်ၡူးအတၢ်စံးဆၢအံၤ ဘၣ်တၢ်ကွဲးနီၣ်အီၤဖဲ မၢ်. ၁၂:၁၇ ဒီး လူၤ. ၂၀:၂၅ အပူၤစ့ၢ်ကီးလီၤ. လံာ်စီဆှံ သၢဆၢလၢာ်အံၤ အဲၣ်ဒိးစံးဝဲ ရိမ့ၤအစီၤပၤလီၤ. “ကဲစၢ်အတၢ်” န့ၣ်ပၣ်ဃုာ်ဒီး ပှၤကဘၣ်ဟ့ၣ်တၢ်ခိတၢ်သွဲလၢ ပဒိၣ်ပပှၢ်ခီဖျိ အမၤန့ၢ်တၢ်လၢပဂီၢ်, ပကဘၣ် ဒိကနၣ်အီၤ ဒီးမၤလၤကပီၤအီၤ ဖဲအကြၢးအဘၣ်န့ၣ်လီၤ.—ရိ. ၁၃:၁-၇.
ယွၤလၢ ယွၤအတၢ်– တၢ်အံၤပၣ်ဃုာ်ဒီး ပကဘၣ်ဘူၣ်ထီၣ်ဘါထီၣ်ယွၤလၢ ပသးဒီဖျၢၣ်, အဲၣ်အီၤလၢ ပသူၣ်ကံၢ်သးလဲ, ဒီးဒိကနၣ်အကလုၢ်လၢ တၢ်သးတီအပူၤလီၤ.—မး. ၄:၁၀; ၂၂:၃၇, ၃၈; မၤတၢ်. ၅:၂၉; ရိ. ၁၄:၈.
(မးသဲ ၂၃:၂၄) ပှၤမဲာ်ဘျီၣ်လၢအဒုးနဲၣ်ကျဲသ့ၣ်ဧၢ, သုပှံၢ်ကွံာ်နိာ်ကံာ်တဘိ, ဒီးသုယူၢ်လီၤကီၤလၤအူးတဒုလီၤ. (တၢ်ဖိဃၢ်, ခ့ခါစှီၤကျိာ်)
nwtsty တၢ်မၤနီၣ် မး. ၂၃:၂၄
သုပှံၢ်ကွံာ်နိာ်ကံာ်တဘိ, ဒီးသုယူၢ်လီၤကီၤလၤအူးတဒု– လၢပှၤအံၣ်စရ့လးဖိတဖၣ်အဂီၢ်န့ၣ် နိာ်ကံာ် မ့ၢ်တၢ်ဖိဃၢ်လၢ အဆံးကတၢၢ် ဒီးကီၤလၤအူးမ့ၢ် ဆၣ်ဖိကီၢ်ဖိလၢ အဒိၣ်ကတၢၢ်လၢ အတကဆှီဘၣ်န့ၣ်လီၤ. (၃ မိၤ. ၁၁:၄, ၂၁-၂၄) ယ့ၣ်ၡူးသူဝဲတၢ်ကတိၤအံၤ ဘၣ်ဃးဒီးပှၤဖၤရံၤၡဲတဖၣ်လီၤ. အဝဲသ့ၣ် ပှံာ်ကွံာ်ဝဲ နိာ်ကံာ်တဘိန့ၣ် အဲၣ်ဒိးစံးဝဲလၢ တၢ်ဆံးဆံးဖိတခါလၢ အရ့တဒိၣ်ဘၣ်ဒၣ်လဲာ်န့ၣ် အဝဲသ့ၣ်မၤဝဲလီၤ. ဘၣ်ဆၣ်, အဝဲသ့ၣ်ယူၢ်လီၤကီၤလၤအူးတဒုန့ၣ် အဲၣ်ဒိးစံးဝဲ တၢ်အရ့ဒိၣ်လၢ အဝဲသ့ၣ်ကဘၣ်မၤဝဲန့ၣ် ကွၢ်ကပာ်ဝဲလီၤ.
တၢ်ဖးလံာ်စီဆှံ
(မးသဲ ၂၂:၁-၂၂) ဒီးယ့ၣ်ၡူးကတိၤဆၢတၢ်ဒီးစံးဘၣ်ကဒီးအီၤလၢ တၢ်ကတိၤဒိတဖၣ်, ဒီးစံးဝဲဒၣ်, ၂ မူခိၣ်အဘီအမုၢ်မၤသးဒ် စီၤပၤလၢအမၤမူးလၢ အဖိခွါအဂီၢ်အသိးန့ၣ်လီၤ. ၃ ဒီးမၢအကုၢ်အပှၤလဲၤကိးပှၤလၢ အဘၣ်တၢ်ကိးပာ်ဝဲန့ၣ် ဆူမူးပူၤလီၤ. ဒီးဟဲဝဲန့ၣ်, အသးတအိၣ်ဘၣ်လီၤ. ၄ မၤကဒီးတစု, မၢအကုၢ်အပှၤအဂၤတဖၣ်လဲၤဝဲ ဒီးစံးဝဲဒၣ်, စံးဘၣ်ပှၤလၢအဘၣ်တၢ်ကိးပာ်တဖၣ်န့ၣ်, ကွၢ်ကွၢ်, ယကတဲာ်ကတီၤလံ ယတၢ်အီၣ်တၢ်အီလံ, ယမၤသံလံယဂီၤဘုၣ်ဂီၤဖံး, ဒီးတၢ်ဖိတၢ်လံၤအဘီၣ်တဖၣ်လံ, တၢ်အိၣ်ကတဲာ်ကတီၤလံ ကိးမံၤဒဲးလံ. ဟဲဆူမူးပူၤတက့ၢ်. ၅ ဘၣ်ဆၣ်ဒီး, တပာ်ဘၣ်ဝဲလၢတၢ်နီတမံၤဘၣ်. ဒီးလဲၤဝဲတဂၤဆူအစံာ်အပှဲၤ, တဂၤဆူအပနံာ်တၢ်ကၤလီၤ. ၆ ဒီးပှၤအိၣ်လီၤတဲာ်တဖၣ်န့ၣ်, ဟံးဃာ်အကုၢ်အပှၤ, ဒီးမၤအၢမၤနးအီၤ, ဒီးမၤသံအီၤလီၤ. ၇ ဒီးတုၤစီၤပၤနၢ်ဟူတၢ်န့ၣ်ဒီး, အသးဒိၣ်ထီၣ်, ဒီးမၢအပှၤသုးမုၢ်လဲၤမၤသံကွံာ်ပှၤလၢ အမၤသံပှၤကညီတဖၣ်န့ၣ်, ဒီးဆူးထီၣ်ကွံာ်အခူအဝ့ၢ်လီၤ. ၈ တုၤနုၤတဘျီစံးဘၣ် အကုၢ်အပှၤ, မူးန့ၣ်အိၣ် ကတဲာ်ကတီၤပာ်လံအသးလံ, မ့မ့ၢ်ပှၤလၢအဘၣ်တၢ်ကိးပာ်တဖၣ်န့ၣ်, တကြၢးဘၣ်ဝဲဘၣ်. ၉ မၤသးဒ်န့ၣ်ဒီး, လဲၤဆူကျဲဖးဒ့အခီၣ်ထံး, ဒီးဖဲဒၣ်ပှၤလၢသုထံၣ်န့ၢ်တဖၣ်န့ၣ်, ကိးန့ၢ်အီၤဆူမူးပူၤတက့ၢ်. ၁၀ ဒီးအကုၢ်အပှၤတဖၣ်န့ၣ်, လဲၤဝဲဆူကျဲဧိၤကပူၤဧိၤ, ဒီးဖဲဒၣ်ပှၤလၢအထံၣ်န့ၢ်ဝဲခဲလၢာ်, ပှၤအအၢမ့ၢ်ဂ့ၤ, ပှၤအဂ့ၤမ့ၢ်ဂ့ၤ, ဒုးအိၣ်ဖှိၣ်ဝဲ, ဒီးမူးန့ၣ်ပှဲၤဒီးပှၤမူးဖိတဖၣ်လီၤ. ၁၁ ဒီးတုၤစီၤပၤဟဲနုာ်ကွၢ်ပှၤမူးဖိတဖၣ်ဒီး, ထံၣ်ပှၤတကူတသိးဘၣ်ပှၤမူးဖိအကူအသိးဘၣ်တဂၤဖဲန့ၣ်လီၤ. ၁၂ ဒီးစံးဝဲဒၣ်, တခွါဧၢ, နတကူတသိးဘၣ်ပှၤမူးဖိအကူအသိးဘၣ်ဒီး, နဟဲနုာ်ဖဲအံၤဒ်လဲၣ်, ဒီးအိၣ်ဝဲဘှီၣ်ကလာ်လီၤ. ၁၃ တုၤနုၤတစု, စီၤပၤစံးဘၣ်အခ့အပှၤ, စၢဃာ်အစုအခီၣ်ဒီးတ့ၢ်လီၤကွံာ်အီၤဆူ တၢ်ခံးကျါလၢခိတက့ၢ်. တၢ်ဘၣ်ဟီၣ်တၢ်ဘၣ်ယၢၤ, တၢ်မဲအ့ၣ်စဃံးကအိၣ်ဝဲဖဲန့ၣ်လီၤ. ၁၄ အဂ့ၢ်ဒ်အံၤ, ပှၤလၢတၢ်ကိးအီၤတဖၣ်အိၣ်အါဂၤ, မ့မ့ၢ်ပှၤလၢတၢ်ဃုထၢအီၤတဖၣ်အိၣ်စှၤဂၤလီၤ. ၁၅ တုၤနုၤတစု, ပှၤဖၤရံၤၡဲ သ့ၣ်တဖၣ်ဟးထီၣ်ကွံာ်ဒီး ကူၣ်ထီၣ် ဖးလီၤဝဲ ဒ်သိး အကတုၢ်န့ၢ် အတၢ်ကတိၤန့ၣ်လီၤ. ၁၆ ဒီးမၢလီၤအပျဲၢ်အဘီၣ်ဒီးပှၤဟ့ၤရိာ်ဖိတဖၣ်ဆူအအိၣ်, ဒီးစံးဝဲဒၣ်, သရၣ်ဧၢ, ပသ့ၣ်ညါလၢနမ့ၢ်ပှၤအတီ, ဒီးနသိၣ်လိတၢ်လၢယွၤအကျဲတီတီ, ဒီးနတပျံၤဘၣ်ပှၤနီတဂၤဘၣ်. အဂ့ၢ်ဒ်အံၤနတကွၢ်မဲာ် ပှၤကညီဘၣ်. ၁၇ မၤသးဒ်န့ၣ်ဒီး, စံးဘၣ်ပှၤတက့ၢ်. နဆိကမိၣ်ဒ်လဲၣ်, ပဟ့ၣ်သွဲလၢကဲစၢ်မ့ၢ်အကြၢးဧါ, မ့ၢ်အတကြၢးဘၣ်လဲၣ်. ၁၈ ဒီးယ့ၣ်ၡူးသ့ၣ်ညါ အတၢ်အၢတၢ်သီ, ဒီးစံးဝဲဒၣ်, ပှၤလီတၢ်ဖိသ့ၣ်ဧၢ, ဘၣ်မနုၤလၢသုလ့ပစီယၤလဲၣ်. ၁၉ ဒုးနဲၣ်ယၤလၢသွဲအစ့တဘ့ၣ်တက့ၢ်. ဒီးဟဲစိာ်စ့ဒန့ၤရံၤတဘ့ၣ်ဆူအအိၣ်လီၤ. ၂၀ ဒီးယ့ၣ်ၡူးစံးဘၣ်အီၤ, အအံၤမ့ၢ်မတၤအက့ၢ်အဂီၤ, ဒီးမ့ၢ်မတၤအတၢ်ကွဲးအသးလၢအလိၤလဲၣ်. ဒီးအဝဲသ့ၣ်စံးဘၣ်အီၤ, ကဲစၢ်အတၢ်လီၤ. ၂၁ တုၤနုၤတစု ယ့ၣ်ၡူးစံးဘၣ်အီၤ, အကူၢ်မ့ၢ်ဒ်န့ၣ်ဒီး, ဟ့ၣ်ကဲစၢ်လၢကဲစၢ်အတၢ်, ဒီးယွၤလၢ ယွၤအတၢ်တက့ၢ်. ၂၂ ဒီးတုၤအဝဲသ့ၣ်နၢ်ဟူဒီး, ကမၢကမၣ်ဝဲ, ဒီးဟးထီၣ်ကွံာ်လၢ အအိၣ်ဒီးက့ၤဝဲလီၤ.
လါမၢ်ၡး ၁၉–၂၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | မးသဲ ၂၄
“ဖဲမုၢ်နံၤခံကတၢၢ်အဆၢကတီၢ် ဆိးသီလၢနီၢ်သးတခီ”
(မးသဲ ၂၄:၁၂) ဒီးမ့ၢ်တၢ်တတီတလိၤဘၣ်ကအါထီၣ်ဒီး, ပှၤအါဂၤအတၢ်အဲၣ်တၢ်ကွံကစှၤလီၤဝဲလီၤ.
it-2 ကဘျံးပၤ ၂၇၉ အဆၢ ၆
တၢ်အဲၣ်တၢ်ကွံ
တၢ်အဲၣ်တၢ်ကွံကစှၤလီၤ. ဖဲယ့ၣ်ၡူး တဲဘၣ်ဝဲ အပျဲၢ်အဘီၣ်တဖၣ် ဘၣ်ဃးဒီး တၢ်ကမၤအသးခါဆူညါအဂ့ၢ်အခါ တဲဖျါဝဲလၢ ပှၤအါတက့ၢ်လၢအစံးလီၤအသးလၢ အနာ်ယွၤတဖၣ် အတၢ်အဲၣ်တၢ်ကွံ (a·gaʹpe) ကစှၤလီၤဝဲလီၤ. (မး. ၂၄:၃, ၁၂) တၢ်မၢဖိပီလူး စံးတ့ၢ်ဝဲလၢ ဆၢကတီၢ်ကီခဲအတီၢ်ပူၤ ပှၤကညီတဖၣ် ကကဲထီၣ် “ပှၤသးကွံစ့” လီၤ. (၂ တံၤ. ၃:၁, ၂) လၢတၢ်န့ၣ်အဃိ ပသ့ၣ်ညါဘၣ်လၢ ပှၤတဂၤ အတၢ်ထံၣ်လၢ အကြၢးအဘၣ် လီၤမၢ်ကွံာ်ဝဲသ့ ဒီးအတၢ်အဲၣ်တၢ်ကွံစ့ၢ်ကီး လီၤမၢ်ကွံာ်ဝဲသ့လီၤ. တၢ်ကတိၤသ့ၣ်တဖၣ်အံၤ ပာ်ဖျါဝဲလၢ ပကဘၣ်မၤဒိၣ်ထီၣ်အါထီၣ် တၢ်အဲၣ်တၢ်ကွံန့ၣ် မ့ၢ်တၢ်လၢအရ့ဒိၣ်မးလီၤ. ပမၤအီၤသ့ ခီဖျိတၢ်ဆိကမိၣ်ထံ ယွၤအကလုၢ်ကထါဒီး အိၣ်မူဒ်ယွၤအတၢ်ဟံးစုနဲၣ်ကျဲအသိးန့ၣ်လီၤ.—အ့း. ၄:၁၅, ၂၂-၂၄.
(မးသဲ ၂၄:၃၉) ဒီးတသ့ၣ်ညါဘၣ် တုၤလီၤလၢ ထံလုၢ်ဘၢတၢ်ဟဲ, ဒီးစိာ်ကွံာ်အီၤခဲလၢာ်အသိးန့ၣ်, တုၤပှၤကညီဖိခွါအံၤဟဲလီၤဒီး, တၢ်ကမၤအသးဒ်န့ၣ်အသိးလီၤ.
တၢး၉၉ ၁၁/၁၅ ကဘျံးပၤ ၁၉ အဆၢ ၅
ဒ်ယွၤဃ့နၤအသိး နမၤလံဧါ
၅ ဘၣ်ဃးဒီး ပဆၢကတီၢ်လၢအကီအခဲအံၤန့ၣ် ယ့ၣ်ၡူးစံးဝဲလၢ “ဒ်တၢ်မၤအသးလၢ စီၤနိအၤ အမုၢ်နံၤတဖၣ်အသိးန့ၣ်, တုၤပှၤကညီဖိခွါအံၤဟဲလီၤဒီး, တၢ်ကမၤအသးဒ်န့ၣ်အသိးလီၤ. အဂ့ၢ်ဒ်အံၤ, ဒ်မုၢ်နံၤမုၢ်နၤလၢ ထံတချုးလုၣ်ဘၢဒံးဘၣ်တၢ်န့ၣ်ဒီး, ပှၤအီၣ်တၢ်ဒီးအီတၢ်, န့ၢ်မါန့ၢ်ဝၤ, တုၤလီၤလၢမုၢ်တနံၤလၢ စီၤနိအၤလဲၤနုာ်လၢကဘီပူၤ, ဒီးတသ့ၣ်ညါဘၣ် တုၤလီၤလၢ ထံလုၢ်ဘၢတၢ်ဟဲ, ဒီးစိာ်ကွံာ်အီၤခဲလၢာ်အသိးန့ၣ်, တုၤပှၤကညီဖိခွါအံၤဟဲလီၤဒီး, တၢ်ကမၤအသးဒ်န့ၣ်အသိးလီၤ.” (မးသဲ ၂၄:၃၇-၃၉) မုၢ်မဆါတနံၤအံၤ တၢ်အီၣ်တၢ်, အီတၢ် ဒီးတၢ်ဆီဟံၣ်ဆီဃီန့ၣ် တကမၣ်ဘၣ်. မ့ၢ်လၢတၢ်သ့ၣ်တဖၣ်အံၤ ကစၢ်ယွၤဒုးအိၣ်ထီၣ်ဝဲလီၤ. (၁ မိၤၡ့ ၂:၂၀-၂၄) ဘၣ်ဆၣ် ပမ့ၢ်သ့ၣ်ညါလီၤပသးလၢ မုၢ်ဆ့ၣ်မုၢ်ဂီၤ အတၢ်လိၣ်ဘၣ်တဖၣ်အံၤ ကဲထီၣ်တၢ်အရ့ဒိၣ်ကတၢၢ် လၢပဂီၢ်န့ၣ် ပကြၢးဃ့ဘါထုကဖၣ်ဆူ ကစၢ်ယွၤအအိၣ် ဘၣ်ဃးဒီးတၢ်ဂ့ၢ်အံၤ တမ့ၢ်ဘၣ်ဧါ. ဒ်သိးပကပာ်ဆိ ယွၤအဘီအမုၢ်, မၤတၢ်အဘၣ် ဒီးမၤလၢပှဲၤပမူဒါလၢ ယဟိဝၤယွၤဟ့ၣ်ပှၤတဖၣ်ကန့ၢ်အဂီၢ် ကစၢ် မၤစၢၤပှၤသ့လီၤ.—မးသဲ ၆:၃၃; ရိမ့ၤ ၁၂:၁၂; ၂ ကရံၣ်သူး ၁၃:၇.
(မးသဲ ၂၄:၄၄) မၤသးဒ်န့ၣ်ဒီး အိၣ်ကတဲာ်ကတီၤ စ့ၢ်ကီးသုသးတက့ၢ်. အဂ့ၢ်ဒ်အံၤ, နၣ်ရံၣ်လၢသုတဆိကမိၣ်ဘၣ်န့ၣ်, ပှၤကညီဖိခွါအံၤကဟဲဝဲလီၤ.
jy ကဘျံးပၤ ၂၅၉ အဆၢ ၅
တၢ်မၢဖိတဖၣ် အဲၣ်ဒိးသ့ၣ်ညါ တၢ်ပနီၣ်
အဝဲတဲဝဲလၢ အပျဲၢ်အဘီၣ်တဖၣ် ကဘၣ်အိၣ်စီၣ်မဲာ်စီၣ်နါ, ကဘၣ်အိၣ်ဆိးသီ ဒီးအိၣ်ကတဲာ်ကတီၤအသးလီၤ. ယ့ၣ်ၡူး သူဝဲတၢ်အဒိတခါ ဒီးဟ့ၣ်ပလီၢ်ဝဲလၢ “ဘၣ်ဆၣ်ဒီးသ့ၣ်ညါတၢ်အံၤတက့ၢ်. တၢ်ဟုၣ်တၢ်ဘျၣ်ကဟဲလၢပှၤပၢၤတၢ် အကတီၢ်ဖဲလဲၣ်ဖဲလဲၣ်န့ၣ်, ဟံၣ်ကစၢ်မ့ၢ်သ့ၣ်ညါဒီး, ကဆိးသီတ့ၢ်ဝဲ, ဒီးတပျဲတၢ်ဘၢၣ်ဖျိအဟံၣ်ဘၣ်. မၤသးဒ်န့ၣ်ဒီး အိၣ်ကတဲာ်ကတီၤ စ့ၢ်ကီးသုသးတက့ၢ်. အဂ့ၢ်ဒ်အံၤ, နၣ်ရံၣ်လၢသုတဆိကမိၣ်ဘၣ်န့ၣ်, ပှၤကညီဖိခွါအံၤကဟဲဝဲလီၤ.”—မးသဲ ၂၄:၄၃, ၄၄.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(မးသဲ ၂၄:၈) တၢ်န့ၣ်တဖၣ်ခဲလၢာ် မ့ၢ်တၢ်နးတၢ်ဖှီၣ်အခီၣ်ထံးလီၤ.
nwtsty တၢ်မၤနီၣ် မးသဲ ၂၄:၈
တၢ်နးတၢ်ဖှီၣ်– ကြံးစ်အတၢ်ကတိၤအံၤ အဲၣ်ဒိးစံးဝဲ တၢ်ဟၢဖၢဆါလၢ ပိာ်မုၣ်တူၢ်ဘၣ်ဝဲဖဲ တချုးအိၣ်ဖျဲၣ်အဖိအခါန့ၣ်လီၤ. တၢ်ကတိၤလၢ ဘၣ်တၢ်သူအီၤအံၤ အဲၣ်ဒိးစံးဝဲတၢ်ကိၢ်တၢ်ဂီၤ, တၢ်အဆါ, ဒီးတၢ်ဘၣ်တူၢ်တၢ်လီၤ. ဘၣ်သ့ၣ်သ့ၣ် ကအဲၣ်ဒိးစံးဝဲလၢ ဒ်ပှၤဟုးဆါအသိး တၢ်ကီတၢ်ခဲဒီး တၢ်နးတၢ်ဖှီၣ်တဖၣ် ကဒံးယံာ်ဒံးအါထီၣ် ဒီးဒံးယံာ်ဒံးနးထီၣ်ဖဲ တၢ်နးတၢ်ဖှီၣ်လၢ မး. ၂၄:၂၁ တချုးဘၣ်ဒံး ဒီးဘၣ်ဝဲ အဆၢကတီၢ်န့ၣ်လီၤ.
(မးသဲ ၂၄:၂၀) ဒီးဒ်သိးသုဃ့ၢ်တၢ်န့ၣ် အသုတဘၣ်လၢတၢ်ဂိၢ်အကတီၢ်မ့ၢ်ဂ့ၤ, လၢအိၣ်ဘှံးအနံၤမ့ၢ်ဂ့ၤ, တဂ့ၤဒီး, ဘါထုကဖၣ်တၢ်တက့ၢ်.
nwtsty တၢ်မၤနီၣ် မးသဲ ၂၄:၂၀
တၢ်ဂိၢ်အကတီၢ်– အကတီၢ်ဖဲန့ၣ် တၢ်စူၤဖးဒိၣ်, ထံဒိၣ် ဒီးတၢ်ဂိၢ်ဒိၣ်မးအဃိ ပှၤကလဲၤတၢ်က့ၤတၢ်, ကဃုအီၣ်ဃုအီ ဒီးကဃုတၢ်အိၣ်တၢ်ဆိးအလီၢ်အဂီၢ် ကီဝဲဒိၣ်မးလီၤ.—ဧ့. ၁၀:၉, ၁၃.
အိၣ်ဘှံးအနံၤ– တၢ်လီၢ်ဒ်သိးဒီး ကီၢ်ယူဒၤအပူၤန့ၣ် မုၢ်အိၣ်ဘှံးနံၤ အတၢ်သိၣ်တၢ်သီတဖၣ်ဃံးဒိၣ်မးအဃိ ကီခဲလၢ ပှၤကလဲၤတၢ်လၢအယံၤ ဒီးစိာ်ဃုာ်တၢ်ဝံတၢ်ယိးတဖၣ်အဂီၢ်လီၤ. တကးဒံးဘၣ် မုၢ်အိၣ်ဘှံးနံၤန့ၣ် ဝ့ၢ်အပဲတြီကးတံာ်ဃာ်အသးလီၤ. —ကွၢ် မၤတၢ်. ၁:၁၂, ခ့ခါစှီၤကျိာ် ဒီး App. B12.
တၢ်ဖးလံာ်စီဆှံ
(မးသဲ ၂၄:၁-၂၂) ဒီးယ့ၣ်ၡူးလဲၤထီၣ်, ဒီးဟးထီၣ်ကွံာ်လၢတၢ်လုၢ်ဟံၣ်ပူၤ, ဒီးအပျဲၢ်အဘီၣ်တဖၣ် ဟဲဆူအအိၣ် ဒ်သိးအကဒုးနဲၣ်အီၤလၢတၢ်လုၢ်ဟံၣ်အဖျၢၣ်တဖၣ်လီၤ. ၂ ဒီးယ့ၣ်ၡူးစံးဘၣ်အီၤ, တၢ်တဖၣ်အံၤခဲလၢာ်သုထံၣ်တမ့ၢ်ဘၣ်ဧါ. ယစံးဘၣ် တဲဘၣ်သုတီတီအံၤ, လၢၢ်လၢလၢၢ် အဖီခိၣ်လၢ တၢ်တမၤလီၤပှီၢ်ကွံာ်ဘၣ်န့ၣ်, တၢ်တပာ်လီၤတဲာ်ဘၣ်ဖဲအံၤနီတဖျၢၣ်ဘၣ်. ၃ ဒီးဆ့ၣ်နီၤဝဲလၢ ကစၢၢ်သ့ၣ်စၤယံးအလိၤ အဖၢမုၢ်ဒီး, အပျဲၢ်အဘီၣ်ဟဲဆူအအိၣ်လၢတၢ်တဒၢ ဒီးစံးဝဲဒၣ်, တၢ်န့ၣ်တဖၣ် ဆံးယံာ်ကမၤအသးလဲၣ်, ဒီးနဟဲလီၤဒီးဟီၣ်ခိၣ်အကတၢၢ်န့ၣ် အတၢ်ပနီၣ်, ကမၤအသးလၢ မနုၤတမံၤလဲၣ်န့ၣ်, စံးဘၣ်တဲဘၣ်ပှၤတက့ၢ်. ၄ ဒီးယ့ၣ်ၡူးစံးဆၢတၢ်ဒီးစံးဘၣ်အီၤ, ဒ်သိးပှၤသုတလီန့ၢ်သု နီတဂၤတဂ့ၤဒီး, ပလီၢ်သုးသးတက့ၢ်. ၅ အဂ့ၢ်ဒ်အံၤ, ပှၤအါဂၤကဟဲလၢယမံၤ, ဒီးကစံး, ယဲဒၣ်အံၤ, ယမ့ၢ်ခရံာ်လီၤ. ဒီးကလီန့ၢ်ပှၤအါဂၤလီၤ. ၆ ဒီးသုကနၣ်ဟူတၢ်ဒုးသုးဒုးသံၣ်တဖၣ်အဂ့ၢ်, ဒီးတၢ်ဒုးသုးဒုးသံၣ်တဖၣ်အကစီၣ်လီၤ. ပလီၢ်သုသးတက့ၢ်. သုတသူၣ်ကိၢ်သးဂီၤတဂ့ၤ. အဂ့ၢ်ဒ်အံၤ, တၢ်န့ၣ်တဖၣ်ဘၣ်မၤအသးခဲလၢာ်လီၤ. ဘၣ်ဆၣ်ဒီး, တၢ်အကတၢၢ် တအိၣ်ဒံးဘၣ်ဝဲဘၣ်. ၇ အဂ့ၢ်ဒ်အံၤ, ပှၤကညီတကလုာ်ကထီဒါပှၤကညီတကလုာ်, ဒီးတဘီတမုၢ်ကထီဒါတဘီတမုၢ်လီၤ. ဒီးတၢ်အိၣ်ဝံၤအိၣ်ဃဲၤတဖၣ်, ဒီးတၢ်ဆါသံသတြိာ်တဖၣ် ကအိၣ်ထီၣ်, ဒီးဟီၣ်ခိၣ်ကဟူးဝးဆှဲးဆှိးဝဲ လၢအံၤတပူၤလၢနုၤတပူၤလီၤ. ၈ တၢ်န့ၣ်တဖၣ်ခဲလၢာ် မ့ၢ်တၢ်နးတၢ်ဖှီၣ်အခီၣ်ထံးလီၤ. ၉ တုၤနုၤတစု, ပှၤကဟ့ၣ်လီၤကွံာ် သုဆူတၢ်နးတၢ်ဖှီၣ်အပူၤ, ဒီးသုကဘၣ်တၢ်မၤသံသုလီၤ. ဒီးကယဲၢ်ပှၤကလုာ်ခဲလၢာ် ကသးဟ့သုလၢယမံၤအဃိလီၤ. ၁၀ တုၤနုၤတစု, ပှၤအသးကဟးဂီၤဝဲအါဂၤ, ဒီးကဟ့ၣ်လီၤ ကွံာ်လိာ်အသး, ဒီးကသးဟ့လိာ်အသးလီၤ. ၁၁ ဒီးဝံအဘျၣ်ကအိၣ် ထီၣ်ဝဲအါဂၤ, ဒီးကလီ န့ၢ်ပှၤကညီအါဂၤလီၤ. ၁၂ ဒီးမ့ၢ်တၢ်တတီတလိၤဘၣ်ကအါထီၣ်ဒီး, ပှၤအါဂၤအတၢ်အဲၣ်တၢ်ကွံကစှၤလီၤဝဲလီၤ. ၁၃ မ့မ့ၢ်ပှၤလၢအအိၣ်ဂၢၢ် ဆိးကျၢၤဝဲ တုၤအကတၢၢ်န့ၣ်, ကတုၤလၢတၢ်အုၣ်က့ၤခီၣ်က့ၤအီၤလီၤ. ၁၄ ဒီးဘီမုၢ်အတၢ်သးခုအကစီၣ်အံၤ, ကဘၣ်တၢ်စံၣ်တဲၤတဲလီၤအီၤလၢ ဟီၣ်ခိၣ်ဒီဘ့ၣ်ညါ, လၢတၢ်အုၣ်အသးလၢ ပှၤကလုာ်ခဲလၢာ်အဂီၢ်လီၤ. တုၤနုၤတစု တၢ်အကတၢၢ်န့ၣ် ကဟဲဘၣ်ဝဲလီၤ. ၁၅ မၤသးဒ်န့ၣ်ဒီး, တုၤသုထံၣ်တၢ်သးဘၣ်အၢ ဘၣ်ဃးဒီးတၢ်မၤသယုၢ်, လၢဝံဒၤနံးယ့လးကတိၤတၢ်လၢအဂ့ၢ်န့ၣ်, ဆၢထၢၣ်လၢတၢ်အလီၢ်စီဆှံအပူၤဒီး, (ပှၤလၢအဖးလံာ်န့ၣ် မ်အနၢ်ပၢၢ်တက့ၢ်), ၁၆ ပှၤအိၣ်လၢကီၢ်ယူဒၤတဖၣ်, မ်အဃ့ၢ်ဆူကစၢၢ် ကလိတက့ၢ်. ၁၇ ဒီးပှၤလၢအအိၣ်လၢဟံၣ်ခိၣ်န့ၣ်, ဒ်သိးအကဟံးန့ၢ်အတၢ်တမံၤမံၤလၢအဟံၣ်ပူၤဒီး, မ်အသုတယုၢ်လီၤတဂ့ၤ. ၁၈ ဒီးပှၤအိၣ်ဝဲလၢစံာ်ပူၤပှဲၤပူၤန့ၣ်, ဒ်သိးအကဟံးန့ၢ် အကူအသိးဒီး, မ်အသုတက့ၤကဒါက့ၤဆူအလီၢ်ခံတဂ့ၤ. ၁၉ ဒီးပှၤလၢအဒၢထီၣ်, ဒီးပှၤလၢအဒုးအီၣ်နုၢ်အဖိ, လၢမုၢ်နံၤတဖၣ်န့ၣ်, ဘၣ်အဖှီၣ်လီၤ. ၂၀ ဒီးဒ်သိးသုဃ့ၢ်တၢ်န့ၣ် အသုတဘၣ်လၢတၢ်ဂိၢ်အကတီၢ်မ့ၢ်ဂ့ၤ, လၢအိၣ်ဘှံးအနံၤမ့ၢ်ဂ့ၤ, တဂ့ၤဒီး, ဘါထုကဖၣ်တၢ်တက့ၢ်. ၂၁ အဂ့ၢ်ဒ်အံၤ, အခါဖဲန့ၣ်တၢ်နးတၢ်ဖှီၣ်ဖးဒိၣ် ကအိၣ်ဝဲလီၤ. တၢ်ဒ်န့ၣ်အသိးလၢ ဟီၣ်ခိၣ်ကဲထီၣ်သီတုၤခဲကနံၣ်အံၤ, တအိၣ်ဘၣ်နီတခီၣ်ဘၣ်. ဒီးလၢခံလၢလာ်န့ၣ်, တအိၣ်ထီၣ်လၢၤဘၣ်ဝဲဘၣ်. ၂၂ ဒီးတၢ်မ့ၢ်တမၤစှၤလီၤဘၣ်မုၢ်နံၤတဖၣ်န့ၣ်ဒီး, တၢ်ဖံးတၢ်ညၣ် တတုၤဘၣ်လၢ တၢ်အုၣ်က့ၤခီၣ်က့ၤ နီတဂၤဘၣ်. မ့မ့ၢ်တၢ်ကမၤစှၤလီၤမုၢ်နံၤတဖၣ်န့ၣ်, လၢပှၤဘၣ်တၢ်ဃုထၢအီၤတဖၣ် အဃိလီၤ.
လါမၢ်ၡး ၂၆–လါအ့ဖြ့ၣ် ၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | မးသဲ ၂၅
“ဆိးသီတက့ၢ်”
(မးသဲ ၂၅:၁-၆) တုၤနုၤတဘျီ, မူခိၣ်အဘီအမုၢ်ကဘၣ်တၢ်ဒိလီၤအီၤ လၢပှၤမုၣ်ကနီၤဆံဆဲၣ်ဂၤ, လၢအဟံးန့ၢ်အမ့ၣ်အူဒၢ, ဒီးလဲၤဝဲဒ်သိး အကသဂၢၢ်ဘၣ် တလးမူး ပိာ်ခွါန့ၣ်လီၤ. ၂ ဒီးပှၤဟးဂီၤဖိအိၣ်ဝဲယဲၢ်ဂၤ, ဒီးပှၤကူၣ်တၢ်သ့အိၣ်ဝဲယဲၢ်ဂၤလီၤ. ၃ ပှၤဟးဂီၤဖိတဖၣ်န့ၣ်, ဟံးန့ၢ်အမ့ၣ်အူဒၢ, ဒီးတဟံးန့ၢ်ဘၣ် သိလၢအသိးဘၣ်. ၄ မ့မ့ၢ်ပှၤကူၣ်တၢ်သ့တဖၣ်န့ၣ်, ဟံးန့ၢ်သိလၢအလီခီပူၤအိၣ်ဒီးအမ့ၣ်အူဒၢလီၤ. ၅ ဒီးတလးမူးပိာ်ခွါန့ၣ် မၤယံာ်မၤနီၢ်အသးအဖၢမုၢ်ဒီး, အဝဲသ့ၣ်မံခ့ဝဲ, ဒီးမံသပ့ၤဝဲခဲလၢာ်လီၤ. ၆ ဒီးလၢဖးဖီမုၢ်န့ၣ်, တၢ်ကိးပသူထီၣ်ဝဲ, ကွၢ်ကွၢ်, တလးမူးပိာ်ခွါဟဲလံ, လဲၤထီၣ်သဂၢၢ်အီၤတက့ၢ်.
(မးသဲ ၂၅:၇-၁၀) တုၤနုၤတစု, ပှၤမုၣ်ကနီၤတဖၣ်ဂဲၤဆၢထၢၣ်ခဲလၢာ်, ဒီးမၤဂ့ၤထီၣ်က့ၤ အမ့ၣ်အူဒၢလီၤ. ၈ ဒီးပှၤဟးဂီၤဖိတဖၣ် စံးဘၣ်ပှၤကူၣ်တၢ်သ့တဖၣ်န့ၣ်, ဟ့ၣ်ပှၤလၢသုသိတနီၤတက့ၢ်. အဂ့ၢ်ဒ်အံၤ, ပမ့ၣ်အူဒၢလီၤပံာ်ကွံာ်လီၤ. ၉ ဒီးပှၤကူၣ်တၢ်သ့တဖၣ်န့ၣ်, စံးဆၢတၢ်ဒီးစံးဝဲဒၣ်, ပဂီၢ်ဒီးသုဂီၢ်အံၤ, သိတလၢဘၣ်ဘၣ်ဖုးလီၤ. ဂ့ၤန့ၢ် အန့ၣ်လဲၤဆူပှၤဆါတၢ်အအိၣ်, ဒီးပှ့ၤတၢ်လၢသုဂီၢ်ဒၣ်သုဝဲတက့ၢ်. ၁၀ ဒီးလဲၤပှ့ၤတၢ်အဖၢမုၢ်ဒီး, တလးမူးပိာ်ခွါန့ၣ် ဟဲတုၤဝဲ, ဒီးပှၤလၢအအိၣ်ကတဲာ်ကတီၤအသးန့ၣ်, လဲၤနုာ်ဝဲဒီးအီၤဆူမူးပူၤ, ဒီးတၢ်ကးတံာ်ဃာ်တြဲၤလီၤ.
(မးသဲ ၂၅:၁၁, ၁၂) ဒီးလၢခံက့ၤန့ၣ်, ပှၤမုၣ်ကနီၤလၢအအိၣ်လီၤတဲာ်တဖၣ်န့ၣ်, ဟဲဒီးစံးဝဲဒၣ်, ကစၢ်ဧၢ, ကစၢ်ဧၢ, အိးထီၣ်န့ၢ်ပှၤတက့ၢ်. ၁၂ ဘၣ်ဆၣ်ဒီး အဝဲဒၣ်စံးဆၢတၢ်ဒီးစံးဝဲဒၣ်, ယစံးဘၣ်တဲဘၣ်သုတီတီအံၤ, ယတသ့ၣ်ညါဘၣ်သုဘၣ်.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(မးသဲ ၂၅:၃၁-၃၃) ဒီးတုၤပှၤကညီဖိခွါအံၤကဟဲဒီးအလၤကပီၤ, ဒီးကလူးခဲလၢာ်အိၣ်ဒီးအီၤဒီး, ကဆ့ၣ်နီၤဝဲလၢ အလီၢ်ပစိာ်ကဟုကညီၢ်အဖီခိၣ်, ၃၂ ဒီးကယဲၢ်ပှၤကလုာ်ခဲလၢာ် ကအိၣ်ဖှိၣ်ရိဖှိၣ်လၢ အမဲာ်ညါလီၤ. ဒီးကနီၤဖးအဆၢ ဒ်ပှၤပှၤကွၢ်သိတဂၤနီၤဖးသိဒီး မဲာ်တဲးလဲးအဆၢ အသိးန့ၣ်လီၤ. ၃၃ ဒီးကပာ်သိလၢအစုထွဲတခီ, မ့မ့ၢ်မဲာ်တဲးလဲးကပာ်ဝဲလၢစုစ့ၣ်တခီလီၤ.
တၢး၁၅ ၃/၁၅ ကဘျံးပၤ ၂၇ အဆၢ ၇
ဆီၣ်ထွဲမၤစၢၤ ခရံာ်ဖိဒီပုၢ်ဝဲၢ်တဖၣ်လၢ တၢ်သးတီအပူၤ
၇ မုၢ်မဆါတနံၤအံၤ ဘၣ်ဃးဒီး သိဒီးမဲာ်တဲးလဲး တၢ်အဒိအံၤ ပနၢ်ပၢၢ်ထီၣ်ဂ့ၤဂ့ၤလီၤ. ပသ့ၣ်ညါဘၣ်လၢ ယ့ၣ်ၡူးမ့ၢ် “ပှၤကညီဖိခွါ” စီၤပၤလီၤ. ပှၤလၢအဘၣ်တၢ်ကိးအီၤလၢ “ယဒီပုၢ်ဝဲၢ်” တဖၣ်မ့ၢ်ဝဲ ပှၤပိာ်မုၣ်ဒီးပိာ်ခွါလၢ အဘၣ်တၢ်ဒိးဖှူအီၤ လၢကပၢတၢ်ဒီးယ့ၣ်ၡူးလၢ မူခိၣ်လီၤ. (ရိ. ၈:၁၆, ၁၇) “သိ” ဒီး “မဲာ်တဲးလဲး” ဒိလီၤဝဲလၢ ပှၤတဂၤစုာ်စုာ်လၢ ထံကီၢ်ခဲလၢာ်တဖၣ်အပူၤလီၤ. အဝဲသ့ၣ်တဖၣ် တဘၣ်တၢ်ဒိးဖှူအီၤလၢ သးစီဆှံဘၣ်. တၢ်နီၤဖး သိဒီးမဲာ်တဲးလဲးကဘၣ် အဆၢကတီၢ်ဖဲလဲၣ်. ကဘၣ်ဖဲ တၢ်နးတၢ်ဖှီၣ်ဖးဒိၣ် ဘူးက ကတၢၢ်အခါလီၤ. ဒီးပှၤဟီၣ်ခိၣ်ဖိတဖၣ် ကဘၣ်တၢ်စံၣ်ညီၣ်အီၤလၢ အမ့ၢ်သိ မ့တမ့ၢ် မဲာ်တဲးလဲး လၢတၢ်ဂ့ၢ်မနုၤအဖီခိၣ်လဲၣ်. ကဒိးသန့ၤထီၣ်အသးလၢ အဝဲသ့ၣ် အတၢ်ဆီၣ်ထွဲမၤစၢၤ ခရံာ်ဖိလၢ ဘၣ်တၢ်ဒိးဖှူအီၤလၢ အအိၣ်လၢဟီၣ်ခိၣ်ချၢတဖၣ် အဖီခိၣ်န့ၣ်လီၤ. ဒ်တၢ်အကတၢၢ် ဟဲဘူးထီၣ်ဝဲအသိး ပသးခုဒိၣ်မးလၢ ယဟိဝၤယွၤ ဒုးနၢ်ပၢၢ်အါထီၣ်ပှၤ တၢ်အဒိအံၤဒီး တၢ်အဒိလၢ ဘၣ်တၢ်ပာ်ဖျါအီၤလၢ မးသဲ အဆၢဒိၣ် ၂၄ ဒီး ၂၅ အပူၤန့ၣ်လီၤ.
(မးသဲ ၂၅:၄၀) ဒီးစီၤပၤကစံးဆၢတၢ်ဒီးစံးဘၣ်အီၤ, ယစံးဘၣ်တဲဘၣ်သုတီတီအံၤ, မ့ၢ်သုမၤပှၤအဆံး ကတၢၢ်တဂၤ လၢယဒီပုၢ်ဝဲၢ်အကျါအံၤဒီး, မ့ၢ်သုမၤယၤလီၤ.
တၢး၀၉ ၁၀/၁၅ ကဘျံးပၤ ၁၆ အဆၢ ၁၆–၁၈
“သုမ့ၢ်ယတံၤယသကိး”
၁၆ နမ့ၢ်အဲၣ်ဒိး အိၣ်မူလီၤထူလီၤယိာ် လၢဟီၣ်ခိၣ်န့ၣ် နပာ်ဖျါထီၣ်လၢ နဒီတံၤဒီသကိးဒီး ယ့ၣ်ၡူးအဒီပုၢ်ဝဲၢ်တဖၣ်ကသ့ဒ်လဲၣ်. ပကတဲသကိး ကျဲသၢဘိလီၤ. တၢ, ပၣ်ဃုာ်လၢ တၢ်စံၣ်တဲၤတဲလီၤတၢ်မၤအပူၤ လၢနသးဒီဖျၢၣ်တက့ၢ်. ယ့ၣ်ၡူးတဲဘၣ် အဒီပုၢ်ဝဲၢ်တဖၣ်လၢ အဝဲသ့ၣ်ကဘၣ်စံၣ်တဲၤတဲလီၤ တၢ်သးခုကစီၣ်လၢ ဟီၣ်ခိၣ်ဒီဘ့ၣ်လီၤ. (မး. ၂၄:၁၄) အဃိသိလၢအဂုၤအဂၤတဖၣ် မ့ၢ်တမၤစၢၤဝဲ ခရံာ်အဒီပုၢ်ဝဲၢ်လၢ အအိၣ်မူဒံးလၢ ဟီၣ်ခိၣ်ချၢတဖၣ်အံၤန့ၣ် ခရံာ်အဒီပုၢ်ဝဲၢ်တဖၣ်အံၤကမၤလၢပှဲၤ အမူဒါအဂီၢ်န့ၣ် တညီဘၣ်. ပမၤစၢၤဒ်အံၤအဃိ ခရံာ်ဒီး ကုၢ်လၢအတီဒီးအကူၣ်တၢ်သ့တဖၣ် ပာ်လုၢ်ပာ်ပှ့ၤဝဲ ပတၢ်မၤဒိၣ်မးလီၤ.
၁၇ ကျဲခံဘိတဘိလၢ သိလၢအဂုၤအဂၤတဖၣ် မၤစၢၤဝဲခရံာ်အဒီပုၢ်ဝဲၢ်သ့န့ၣ်မ့ၢ်ဝဲ အဝဲသ့ၣ် ဆီၣ်ထွဲမၤစၢၤတၢ်စံၣ်တဲၤတဲလီၤတၢ်မၤလၢ ကျိၣ်စ့တကပၤန့ၣ်လီၤ. ယ့ၣ်ၡူးဟ့ၣ်ဂံၢ်ဟ့ၣ်ဘါဝဲ ပှၤလၢအပိာ်အခံတဖၣ်လၢ ကဒီတံၤဒီသကိးဒီး “စုလီၢ်တတီခီၣ်ခိၣ်တလိၤ” န့ၣ်လီၤ. (လူၤကၣ် ၁၆:၉) တၢ်အံၤအခီပညီတမ့ၢ်လၢ ပပှ့ၤတၢ်ရ့လိာ်သးဒီးယဟိဝၤယွၤဒီး ယ့ၣ်ၡူး န့ၢ်ဝဲန့ၣ်ဘၣ်. ပမ့ၢ်ဆီၣ်ထွဲမၤစၢၤဘီမုၢ်အတၢ်မၤလၢ ပတၢ်ထူးတၢ်တီၤသ့ၣ်တဖၣ်န့ၣ် မ့ၢ်ဒၣ်ပပာ်ဖျါထီၣ်လၢ ပဒီတံၤဒီသကိးဒီး ယ့ၣ်ၡူးဒီး ယဟိဝၤယွၤ တမ့ၢ်ထဲလၢ ပတၢ်ကတိၤဘၣ်လၢ “တၢ်မၤဒီးလၢ တၢ်မ့ၢ်တၢ်တီ” န့ၣ်လီၤ. (၁ ယိၤဟၣ် ၃:၁၆-၁၈) ဖဲပပၣ်ဃုာ်လၢ တၢ်စံၣ်တဲၤတဲလီၤတၢ်မၤအပူၤ, ပဟ့ၣ်တၢ်မၤဘူၣ်လၢ တၢ်သူၣ်ထီၣ်ဘှီထီၣ် ဒီးတၢ်ကွၢ်ထွဲဘှီဂ့ၤထီၣ်က့ၤ ဘီမုၢ်ဘျီၣ်ဒိၣ်တဖၣ်အဂီၢ်, ဒီးပထဲနုာ်တၢ်မၤဘူၣ်လၢ ဟီၣ်ခိၣ်ဒီဘ့ၣ်တၢ်စံၣ်တဲၤတဲလီၤတၢ်မၤ အဂီၢ်အခါ မ့ၢ်ဒၣ်ပဆီၣ်ထွဲမၤစၢၤ ခရံာ်အဒီပုၢ်ဝဲၢ်လၢ တၢ်စုလီၢ်ခီၣ်ခိၣ်န့ၣ်လီၤ. ပတၢ်မၤဘူၣ် မ့ၢ်အါမ့ၢ်ဂ့ၤစှၤမ့ၢ်ဂ့ၤ ယဟိဝၤယွၤဒီး ယ့ၣ်ၡူးပာ်လုၢ်ပာ်ပှ့ၤဝဲ ပတၢ်သးအိၣ်ဟ့ၣ်တၢ်အံၤဒိၣ်မးလီၤ.—၂ ကရံၣ်. ၉:၇.
၁၈ ကျဲသၢဘိတဘိလၢ ပဒီတံၤဒီသကိးဒီး ခရံာ်သ့န့ၣ်မ့ၢ်ဝဲ ပမၤထွဲတၢ်နဲၣ်လိလၢ အဟဲလၢ ပတၢ်အိၣ်ဖှိၣ်သးပှၢ်တဖၣ်အအိၣ်လီၤ. အဝဲသ့ၣ်တဖၣ်န့ၣ် ဘၣ်တၢ်ဃုထၢထီၣ်အီၤလၢသးစီဆှံ လၢယ့ၣ်ၡူးအတၢ်ဟံးစုနဲၣ်ကျဲအဖီလာ်လီၤ. (အ့း. ၅:၂၃) စီၤပီလူးကွဲးဝဲလၢ “ပှၤလၢအကဲထီၣ်သုခိၣ်တဖၣ်န့ၣ်, စူၢ်အကလုၢ်, ဒီးဆီၣ်လီၤသုသးလၢအဖီလာ်တက့ၢ်.” (ဧ့ၤ. ၁၃:၁၇) တၢ်အိၣ်ဖှိၣ်သးပှၢ် မ့ၢ်ဟ့ၣ်ပှၤတၢ်ဟံးစုနဲၣ်ကျဲလၢ လံာ်စီဆှံအပူၤန့ၣ် တဘျီတခီၣ် ပကဒိကနၣ်အီၤအဂီၢ် တညီဘၣ်. မ့ၢ်လၢပသ့ၣ်ညါ အတၢ်လီၤတူာ်လီၤကာ်အဃိ ပကဒိကနၣ် အတၢ်ဟ့ၣ်ကူၣ်အဂီၢ်ကီဝဲလီၤ. ဘၣ်ဆၣ် ခရံာ်လၢအမ့ၢ် တၢ်အိၣ်ဖှိၣ်အခိၣ်န့ၣ် ဆဲးသူဝဲပှၤလၢ အတလၢတပှဲၤတဖၣ်ဒံးလီၤ. အဃိ ပမၤထွဲအဝဲသ့ၣ် အတၢ်ဟံးစုနဲၣ်ကျဲဒ်လဲၣ်ဒ်လဲၣ်န့ၣ် ဘၣ်ထွဲလိာ်အသးဒီး ပတၢ်ရ့လိာ်သးဒီးခရံာ်န့ၣ်လီၤ. ပမ့ၢ်ကွၢ်ကပာ်ကွံာ် တၢ်အိၣ်ဖှိၣ်သးပှၢ်တဖၣ် အတၢ်တလၢတပှဲၤ ဒီးပမ့ၢ်လူၤပိာ်ထွဲ အဝဲသ့ၣ်အတၢ်ဟံးစုနဲၣ်ကျဲလၢ တၢ်သးခုအပူၤန့ၣ် မ့ၢ်ဒၣ်ပပာ်ဖျါထီၣ် ပအဲၣ်ခရံာ်န့ၣ်လီၤ.
တၢ်ဖးလံာ်စီဆှံ
(မးသဲ ၂၅:၁-၂၃) တုၤနုၤတဘျီ, မူခိၣ်အဘီအမုၢ်ကဘၣ်တၢ်ဒိလီၤအီၤ လၢပှၤမုၣ်ကနီၤဆံဆဲၣ်ဂၤ, လၢအဟံးန့ၢ်အမ့ၣ်အူဒၢ, ဒီးလဲၤဝဲဒ်သိး အကသဂၢၢ်ဘၣ် တလးမူး ပိာ်ခွါန့ၣ်လီၤ. ၂ ဒီးပှၤဟးဂီၤဖိအိၣ်ဝဲယဲၢ်ဂၤ, ဒီးပှၤကူၣ်တၢ်သ့အိၣ်ဝဲယဲၢ်ဂၤလီၤ. ၃ ပှၤဟးဂီၤဖိတဖၣ်န့ၣ်, ဟံးန့ၢ်အမ့ၣ်အူဒၢ, ဒီးတဟံးန့ၢ်ဘၣ် သိလၢအသိးဘၣ်. ၄ မ့မ့ၢ်ပှၤကူၣ်တၢ်သ့တဖၣ်န့ၣ်, ဟံးန့ၢ်သိလၢအလီခီပူၤအိၣ်ဒီးအမ့ၣ်အူဒၢလီၤ. ၅ ဒီးတလးမူးပိာ်ခွါန့ၣ် မၤယံာ်မၤနီၢ်အသးအဖၢမုၢ်ဒီး, အဝဲသ့ၣ်မံခ့ဝဲ, ဒီးမံသပ့ၤဝဲခဲလၢာ်လီၤ. ၆ ဒီးလၢဖးဖီမုၢ်န့ၣ်, တၢ်ကိးပသူထီၣ်ဝဲ, ကွၢ်ကွၢ်, တလးမူးပိာ်ခွါဟဲလံ, လဲၤထီၣ်သဂၢၢ်အီၤတက့ၢ်. ၇ တုၤနုၤတစု, ပှၤမုၣ်ကနီၤတဖၣ်ဂဲၤဆၢထၢၣ်ခဲလၢာ်, ဒီးမၤဂ့ၤထီၣ်က့ၤ အမ့ၣ်အူဒၢလီၤ. ၈ ဒီးပှၤဟးဂီၤဖိတဖၣ် စံးဘၣ်ပှၤကူၣ်တၢ်သ့တဖၣ်န့ၣ်, ဟ့ၣ်ပှၤလၢသုသိတနီၤတက့ၢ်. အဂ့ၢ်ဒ်အံၤ, ပမ့ၣ်အူဒၢလီၤပံာ်ကွံာ်လီၤ. ၉ ဒီးပှၤကူၣ်တၢ်သ့တဖၣ်န့ၣ်, စံးဆၢတၢ်ဒီးစံးဝဲဒၣ်, ပဂီၢ်ဒီးသုဂီၢ်အံၤ, သိတလၢဘၣ်ဘၣ်ဖုးလီၤ. ဂ့ၤန့ၢ် အန့ၣ်လဲၤဆူပှၤဆါတၢ်အအိၣ်, ဒီးပှ့ၤတၢ်လၢသုဂီၢ်ဒၣ်သုဝဲတက့ၢ်. ၁၀ ဒီးလဲၤပှ့ၤတၢ်အဖၢမုၢ်ဒီး, တလးမူးပိာ်ခွါန့ၣ် ဟဲတုၤဝဲ, ဒီးပှၤလၢအအိၣ်ကတဲာ်ကတီၤအသးန့ၣ်, လဲၤနုာ်ဝဲဒီးအီၤဆူမူးပူၤ, ဒီးတၢ်ကးတံာ်ဃာ်တြဲၤလီၤ. ၁၁ ဒီးလၢခံက့ၤန့ၣ်, ပှၤမုၣ်ကနီၤလၢအအိၣ်လီၤတဲာ်တဖၣ်န့ၣ်, ဟဲဒီးစံးဝဲဒၣ်, ကစၢ်ဧၢ, ကစၢ်ဧၢ, အိးထီၣ်န့ၢ်ပှၤတက့ၢ်. ၁၂ ဘၣ်ဆၣ်ဒီး အဝဲဒၣ်စံးဆၢတၢ်ဒီးစံးဝဲဒၣ်, ယစံးဘၣ်တဲဘၣ်သုတီတီအံၤ, ယတသ့ၣ်ညါဘၣ်သုဘၣ်. ၁၃ မၤသးဒ်န့ၣ်ဒီးဆိးသီတက့ၢ်. အဂ့ၢ်ဒ်အံၤ, အနံၤအသီမ့ၢ်ဂ့ၤ, အနၣ်ရံၣ်မ့ၢ်ဂ့ၤ, သုတသ့ၣ်ညါဘၣ်. ၁၄ အဂ့ၢ်ဒ်အံၤ, တၢ်မၤအသးဒ်ပှၤတဂၤလၢအလဲၤတၢ်ဆူ တခီထံတခီကီၢ်, ဒီးကိးန့ၢ်အကုၢ်အပှၤဒၣ်ဝဲ, ဒီးဟ့ၣ်လီၤအစုလီၢ်ခီၣ်ခိၣ်လၢအစုပူၤလီၤ. ၁၅ ဒီးဟ့ၣ်လီၤဝဲတဂၤလၢ စ့ယဲၢ်တၤလၣ်, ဒီးတဂၤလၢ ခံတၤလၣ်, ဒီးတဂၤလၢတတၤလၣ်, ဖဲဒၣ်အမၤတၢ်သ့စုာ်စုာ်, ဒီးလဲၤဆူတခီထံတခီကီၢ်လီၤ. ၁၆ ဒီးတကီၢ်ခါပှၤလၢအဒိးန့ၢ်စ့ယဲၢ်တၤလၣ်တဂၤန့ၣ်, လဲၤကၤတၢ်လၢအီၤ, ဒီးန့ၢ်ဘၣ်အဂၤယဲၢ်တၤလၣ်လီၤ. ၁၇ ဒီးဒ်န့ၣ်အသိး, ပှၤလၢအဒိးန့ၢ်ခံတၤလၣ်တဂၤန့ၣ်, န့ၢ်ဘၣ်အဂၤခံတၤလၣ်လီၤ. ၁၈ မ့မ့ၢ်ပှၤလၢအဒိးန့ၢ်စ့တတၤလၣ်တဂၤန့ၣ်, လဲၤခူၣ်လီၤဟီၣ်ခိၣ်, ဒီးပာ်ခူသူၣ်ကွံာ်အကစၢ်အစ့လီၤ. ၁၉ ယံာ်ယံာ်ဒီးကုၢ်တဖၣ်န့ၣ် အကစၢ်ဟဲက့ၤ, ဒီးဟံးန့ၢ်က့ၤအမံၤအသၣ်လီၤ. ၂၀ ဒီးပှၤလၢအဒိးန့ၢ်စ့ယဲၢ်တၤလၣ်တဂၤန့ၣ်, ဟဲဃီၤဝဲဒီးစိာ်စ့အဂၤယဲၢ်တၤလၣ်, ဒီးစံးဝဲဒၣ်, ကစၢ်ဧၢ, နဟ့ၣ်လီၤယၤလၢ စ့ယဲၢ်တၤလၣ်, ဒီးကွၢ်ကွၢ်, ယန့ၢ်ဘၣ်အါထီၣ်အဂၤယဲၢ်တၤလၣ်လၢ အဖီခိၣ်လံလီၤ. ၂၁ ဒီးအကစၢ်စံးဘၣ်အီၤ, ဘၣ်လံ, ကုၢ်လၢအဂ့ၤဒီးအကလုၢ်တီဧၢ, နအိၣ်လၢတၢ်စှၤအဖီခိၣ်ဒီး နကလုၢ်တီလံ. ယကပာ်နၤလၢတၢ်အါအဖီခိၣ်လီၤ. လဲၤနုာ်ဆူနကစၢ်အတၢ်သးခုအပူၤတက့ၢ်. ၂၂ ဒီးပှၤလၢအဒိးန့ၢ်ခံတၤလၣ်တဂၤန့ၣ်, ဟဲဃီၤစ့ၢ်ကီး, ဒီးစံးဝဲဒၣ်, ကစၢ်ဧၢ, နဟ့ၣ်လီၤယၤလၢစ့ခံတၤလၣ်, ဒီးကွၢ်ကွၢ်, ယန့ၢ်အါထီၣ်အဂၤခံတၤလၣ်လၢအဖီခိၣ်လံလီၤ. ၂၃ ဒီးအကစၢ်စံးဘၣ်အီၤ, ဘၣ်လံ, ကုၢ်လၢအဂ့ၤ, ဒီးအကလုၢ်တီဧၢ, နအိၣ်လၢတၢ်စှၤအဖီခိၣ်ဒီး နကလုၢ်တီလံ. ယကပာ်နၤလၢတၢ်အါအဖီခိၣ်လီၤ. လဲၤနုာ်ဆူနကစၢ် အတၢ်သးခုအပူၤတက့ၢ်.