တၢ်မၤလိ ၅
ပကလဲၤတၢ်ဒီးသု
“ပကလဲၤတၢ်ဒီးသုလီၤ. အဂ့ၢ်ဒ်အံၤ, ပနၢ်ဟူလၢ ကစၢ်အိၣ်ဝဲဒီးသုလီၤ.”—စကၤရယၤ ၈:၂၃.
တၢ်သးဝံၣ် ၂၆ သုမၤတၢ်လၢယဂီၢ်
တၢ်မၤလိအံၤ အတၢ်တိာ်ပာ်a
သိလၢအဂုၤအဂၤတဖၣ် (“ပှၤဆံဆဲၣ်ဂၤ”) ဘၣ်တၢ်မၤလၤကပီၤအီၤ ခီဖျိအန့ၢ်ဘၣ် တၢ်ခွဲးတၢ်ယာ်လၢကဘူၣ်ထီၣ်ဘါထီၣ်ဘၣ် ယဟိဝၤယွၤ ဃုာ်ဒီးပှၤလၢ အဘၣ်တၢ်ဒိးဖှူအီၤတဖၣ် (“ပှၤယူဒၤဖိတဂၤ”) (ကွၢ်လံာ်အဆၢ ၁-၂)
၁. ယဟိဝၤယွၤ တဲဝဲလၢ တၢ်မနုၤ ကမၤအသး လၢပစိၤအံၤလဲၣ်.
ယဟိဝၤယွၤ တဲဝဲလၢ ဖဲပစိၤအံၤန့ၣ် “ပှၤဆံဆဲၣ်ဂၤလၢ ပှၤကလုာ်ခဲလၢာ်အကျါန့ၣ် ကဟံးဃာ်တၢ်, ကဟံးဃာ်ဒၣ်လဲာ် ပှၤယူဒၤဖိတဂၤ အဆ့အသရ့ၤ, ဒီးစံး, ပကလဲၤတၢ်ဒီးသုလီၤ. အဂ့ၢ်ဒ်အံၤ, ပနၢ်ဟူလၢ ကစၢ်အိၣ်ဝဲဒီးသုလီၤ.” (စကၤရယၤ ၈:၂၃) “ပှၤယူဒၤဖိ” တဂၤန့ၣ် ဒိလီၤဝဲ ပှၤလၢကစၢ်ယွၤဒိးဖှူအီၤလၢ သးစီဆှံလီၤ. အဝဲသ့ၣ် ဘၣ်တၢ်ကိးစ့ၢ်ကီးအီၤလၢ “ယွၤအအံၣ်စရ့လး” လီၤ. (ကလၤတံ ၆:၁၆) ပှၤဆံဆဲၣ်ဂၤန့ၣ် ဒိလီၤဝဲ ပှၤလၢအအိၣ်ဒီးတၢ်မုၢ်လၢ်လၢ ကအိၣ်မူဘၣ်လၢ ဟီၣ်ခိၣ်ချၢ လီၤထူလီၤယိာ်လီၤ. အဝဲသ့ၣ် သ့ၣ်ညါဝဲလၢ ယဟိဝၤယွၤဆိၣ်ဂ့ၤ ပှၤဘၣ်တၢ်ဒိးဖှူအီၤ တဖုအံၤ ဒီးအဝဲသ့ၣ် တူၢ်ဘၣ်ဝဲလၢ အဘူၣ်ထီၣ်ဘါထီၣ်ဘၣ်တၢ် တပူၤဃီဒီး ပှၤလၢအဘၣ်တၢ်ဒိးဖှူအီၤတဖၣ်န့ၣ် မ့ၢ်ဝဲတၢ်ခွဲးတၢ်ယာ်တခါလီၤ.
၂. “ပှၤဆံဆဲၣ်ဂၤ” “လဲၤတၢ်ဒီး” ပှၤလၢအဘၣ်တၢ်ဒိးဖှူအီၤတဖၣ် ဒ်လဲၣ်.
၂ မုၢ်မဆါတနံၤအံၤ ပှၤလၢအအိၣ်ဒီး တၢ်မုၢ်လၢ်လၢ ကအိၣ်မူဘၣ်လၢ ဟီၣ်ခိၣ်ချၢတဖၣ် မ့ၢ်တသ့ၣ်ညါဝဲ ပှၤလၢအဘၣ်တၢ်ဒိးဖှူအီၤ တဂၤစုာ်စုာ်အမံၤb သနာ်က့ အဝဲသ့ၣ် “လဲၤတၢ်ဒီး” ပှၤလၢအဘၣ်တၢ်ဒိးဖှူအီၤတဖၣ် ကသ့ဒ်လဲၣ်. လံာ်စီဆှံ တဲဝဲလၢ “ပှၤဆံဆဲၣ်ဂၤ” က “ဟံးဃာ်တၢ်, ကဟံးဃာ်ဒၣ်လဲာ် ပှၤယူဒၤဖိတဂၤ အဆ့အသရ့ၤ, ဒီးစံး, ပကလဲၤတၢ်ဒီးသုလီၤ. အဂ့ၢ်ဒ်အံၤ, ပနၢ်ဟူလၢ ကစၢ်အိၣ်ဝဲဒီးသုလီၤ.” လံာ်စီဆှံ တဆၢအံၤ တဲဝဲလၢ ပှၤယူဒၤဖိတဂၤ ဘၣ်ဆၣ် တဲကဒီးဝဲလၢ “သု” လီၤ. အဃိ ပသ့ၣ်ညါဘၣ်လၢ လံာ်စီဆှံတဆၢအံၤ အဲၣ်ဒိးတဲဝဲ ပှၤအါန့ၢ်ဒံးတဂၤလီၤ. ပှၤယူဒၤဖိတဂၤန့ၣ် တမ့ၢ်ထဲ ပှၤတဂၤဘၣ်, မ့ၢ်ပှၤဘၣ်တၢ်ဒိးဖှူအီၤ ဒီတဖုလီၤ. ပှၤလၢအတဘၣ် တၢ်ဒိးဖှူအီၤတဖၣ်န့ၣ် မၤသကိး ယဟိဝၤယွၤ အတၢ်မၤဒီး ပှၤလၢအဘၣ်တၢ်ဒိးဖှူအီၤတဖၣ်လီၤ. ဘၣ်ဆၣ် အဝဲသ့ၣ် တထံၣ်ဝဲ ပှၤလၢအဘၣ်တၢ်ဒိးဖှူအီၤတဖၣ် ဒ်အခိၣ်အနၢ်အသိးဘၣ်. လၢတၢ်န့ၣ်အလီၢ် အဝဲသ့ၣ် သ့ၣ်ညါဝဲလၢ ယ့ၣ်ၡူးမ့ၢ် အဝဲသ့ၣ်အခိၣ်လီၤ.—မးသဲ ၂၃:၁၀.
၃. လၢတၢ်မၤလိအံၤအပူၤ ပကတဲသကိး တၢ်သံကွၢ်မနုၤတဖၣ်လဲၣ်.
၃ မုၢ်မဆါတနံၤအံၤ မ့ၢ်လၢပှၤလၢ အဘၣ်တၢ်ဒိးဖှူအီၤတနီၤ အိၣ်ဒံးလၢ ကစၢ်ယွၤ အခ့အပှၤတဖၣ် အကျါအဃိ ပှၤတနီၤနီၤ ကဆိကမိၣ်ဘၣ်ဝဲလၢ (၁) ပှၤလၢအဘၣ်တၢ်ဒိးဖှူအီၤတဖၣ်န့ၣ် ကြၢးထံၣ်လီၤအသး ဒ်လဲၣ်. (၂) ပှၤတဂၤဂၤ မ့ၢ်စးထီၣ်အီၣ်ကိၣ် ဒီးအီစပံးထံန့ၣ် ပကြၢးရ့ဒီးအီၤ ဒ်လဲၣ်. (၃) ဖဲပထံၣ် ပှၤလၢအအီၣ်ကိၣ် အီစပံးထံတဖၣ် အနီၣ်ဂံၢ်အါထီၣ်အခါ မ့ၢ်ပကြၢး သူၣ်ကိၢ်သးဂီၤဧါ. တၢ်မၤလိအံၤ ကပာ်ဖျါထီၣ် တၢ်သံကွၢ်တဖၣ်အံၤ အတၢ်စံးဆၢလီၤ.
ပှၤလၢအဘၣ်တၢ်ဒိးဖှူအီၤတဖၣ်န့ၣ် ကြၢးထံၣ်လီၤအသးဒ်လဲၣ်
၄. ဒ် ၁ ကရံၣ်သူး ၁၁:၂၇-၂၉ ပာ်ဖျါထီၣ်ဝဲအသိး ပှၤဘၣ်တၢ်ဒိးဖှူအီၤတဖၣ် ကြၢးဆိကမိၣ် တၢ်မနုၤလဲၣ် ဒီးဘၣ်မနုၤအဃိလဲၣ်.
၄ ပှၤလၢအဘၣ်တၢ်ဒိးဖှူအီၤတဂၤ ကြၢးဆိကမိၣ် တၢ်ဟ့ၣ်ပလီၢ်လၢ ၁ ကရံၣ်သူး ၁၁:၂၇-၂၉ န့ၣ်လီၤ. (ဖးတက့ၢ်.) ပှၤလၢဘၣ်တၢ်ဒိးဖှူအီၤတဂၤ ကဲထီၣ်ပှၤလၢအ “တဂ့ၤတဘၣ်ဘၣ်” လၢကအီၣ်ကိၣ်ဒီးအီစပံးထံ လၢတၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံအမူးအဂီၢ် သ့ဒ်လဲၣ်. အဝဲမ့ၢ်တပၢၤဃာ် အတၢ်ရ့လိာ်သးဒီးယဟိဝၤယွၤ လၢအဂ့ၤ, ဒီးမ့ၢ်တတီဒီးအီၤဘၣ်န့ၣ် ဖဲအဝဲအီၣ်ကိၣ် အီစပံးထံ အဆၢကတီၢ် မ့ၢ်တၢ်လၢ အတဂ့ၤတဘၣ်ဘၣ်လီၤ. (ဧ့ၤဘြံၤ ၆:၄-၆; ၁၀:၂၆-၂၉) တၢ်ဟ့ၣ်ပလီၢ်လၢ အဆူၣ်အံၤ ဒုးသ့ၣ်နီၣ်ထီၣ်က့ၤ ပှၤဘၣ်တၢ်ဒိးဖှူအီၤတဖၣ်လၢ အဝဲသ့ၣ်မ့ၢ်အဲၣ်ဒိး “န့ၢ်ဘၣ်တၢ်ဘျုးဘၣ်ဃးဒီး ယွၤအတၢ်ကိးထီၣ်ထီလၢ ယ့ၣ်ၡူးခရံာ်အပူၤ” န့ၣ်ကဘၣ်ဆဲးတီဒီးယွၤလီၤ.—ဖံလံးပံၤ ၃:၁၃-၁၆.
၅. ပှၤဘၣ်တၢ်ဒိးဖှူအီၤတဖၣ် ကြၢးထံၣ်လီၤ အနီၢ်ကစၢ်အသး ဒ်လဲၣ်.
၅ ယဟိဝၤယွၤအသးစီဆှံ မၤစၢၤအခ့အပှၤတဖၣ် ဒ်သိးကအိၣ်ဒီး တၢ်ဆီၣ်လီၤသးအဂီၢ်လီၤ. တမ့ၢ်လၢ ကပာ်ထီၣ်ထီအသး အဂီၢ်ဘၣ်. (အ့းဖ့းစူး ၄:၁-၃; ကလီးစဲ ၃:၁၀, ၁၂) လၢတၢ်န့ၣ်အဃိ ပှၤဘၣ်တၢ်ဒိးဖှူအီၤတဖၣ် တဆိကမိၣ်လီၤအသးလၢ အဂ့ၤန့ၢ်ပှၤဂၤဘၣ်. အဝဲသ့ၣ် သ့ၣ်ညါဝဲလၢ ယဟိဝၤယွၤတဟ့ၣ်လီၤ သးစီဆှံလၢ ပှၤဘၣ်တၢ်ဒိးဖှူအီၤတဖၣ် အါန့ၢ်ဒံး အခ့အပှၤအဂၤတဖၣ်ဘၣ်. ဒီးအဝဲသ့ၣ် တဆိကမိၣ်ဝဲလၢ အသ့ၣ်ညါနၢ်ပၢၢ် လံာ်စီဆှံတၢ်မ့ၢ်တၢ်တီ အါန့ၢ်ဒံး ပှၤဂၤဘၣ်. ပှၤဘၣ်တၢ်ဒိးဖှူအီၤတဖၣ် တဘၣ်တဲပှၤဂၤလၢ အဝဲသ့ၣ်စ့ၢ်ကီး ဘၣ်တၢ်ဒိးဖှူအီၤ ဒီးကြၢးစးထီၣ်အီၣ်ကိၣ်ဒီး အီစပံးထံဘၣ်. လၢတၢ်န့ၣ်အလီၢ် အဝဲသ့ၣ် ကဘၣ်ဆီၣ်လီၤအသး ဒီးနၢ်ပၢၢ်ဝဲလၢ ထဲယဟိဝၤယွၤတဂၤဧိၤ ဃုထၢပှၤလၢ အကလဲၤထီၣ်ဆူ မူခိၣ်န့ၣ်လီၤ.
၆. ဒ် ၁ ကရံၣ်သူး ၄:၇, ၈ ပာ်ဖျါထီၣ်ဝဲအသိး ပှၤလၢအဘၣ် တၢ်ဒိးဖှူအီၤတဖၣ်န့ၣ် တကြၢးမၤ တၢ်မနုၤလဲၣ်.
၆ ပှၤလၢအဘၣ်တၢ်ဒိးဖှူအီၤတဖၣ် ဒိးန့ၢ်ဘၣ် တၢ်ခွဲးတၢ်ယာ် လီၤဆီတခါ ခီဖျိလၢ အဝဲသ့ၣ် ဘၣ်တၢ်ဃုထၢထီၣ်အီၤလၢ ကထီၣ်ဆူ မူခိၣ်လီၤ. ဘၣ်ဆၣ် အဝဲသ့ၣ် တမုၢ်လၢ်ဝဲလၢ ပှၤဂၤကဘၣ်ပာ်ဒိၣ်အီၤ လီၤလီၤဆီဆီဘၣ်. (ဖံလံးပံၤ ၂:၂, ၃) အဝဲသ့ၣ် သ့ၣ်ညါစ့ၢ်ကီးဝဲလၢ ဖဲယဟိဝၤယွၤ ဒိးဖှူအဝဲသ့ၣ်အခါ အတဒုးသ့ၣ်ညါ ပှၤကိးဂၤဒဲးဘၣ်. လၢတၢ်န့ၣ်အဃိ ပှၤတနီၤနီၤ မ့ၢ်တနာ်အီၤ တဘျီဃီလၢ အဝဲဘၣ်တၢ်ဒိးဖှူအီၤ သနာ်က့ အဝဲတကမၢကမၣ်ဘၣ်. အဝဲသ့ၣ်ညါဝဲလၢ လံာ်စီဆှံတဲဝဲလၢ ပတဘၣ်နာ်ညီ ပှၤလၢအတဲလၢ ယွၤဟ့ၣ်အီၤ မူဒါလၢအလီၤဆီန့ၣ်ဘၣ်. (လီၣ်ဖျါ ၂:၂) မ့ၢ်လၢ ပှၤဘၣ်တၢ်ဒိးဖှူအီၤတဖၣ်န့ၣ် တမုၢ်လၢ်ဝဲလၢ ပှၤဂၤကသးစၢၢ်ဆၢ အဝဲသ့ၣ် အါတလၢဘၣ်အဃိ ဖဲအဝဲသ့ၣ် ထံၣ်လိာ်အသးဒီးပှၤဂၤ အဆိကတၢၢ်တဘျီန့ၣ် အဝဲသ့ၣ် တတဲဘၣ်ပှၤဂၤလၢ အမ့ၢ်ပှၤဘၣ်တၢ်ဒိးဖှူအီၤဘၣ်. ဒီးဘၣ်ဃးဒီး တၢ်ဂ့ၢ်အံၤန့ၣ် အဝဲသ့ၣ် တဟးတဲဂ့ၤလီၤအသး လၢပှၤဂၤအမဲာ်ညါဘၣ်.—ဖး ၁ ကရံၣ်သူး ၄:၇, ၈ တက့ၢ်.
၇. ပှၤလၢအဘၣ် တၢ်ဒိးဖှူအီၤတဖၣ်န့ၣ် ကဟးဆှဲးဝဲ တၢ်မနုၤလဲၣ် ဒီးဘၣ်မနုၤအဃိလဲၣ်.
၇ ပှၤလၢဘၣ်တၢ်ဒိးဖှူအီၤတဖၣ် တဆိကမိၣ်လီၤအသးလၢ အဝဲသ့ၣ် မ့ၢ်ပှၤလီၤဆီ တကရူၢ်လၢ ကဘၣ်ရ့လိာ်အသးထဲ ပှၤလၢအဘၣ်တၢ်ဒိးဖှူအီၤ ကဒဲကဒဲဘၣ်. ဒီးအဝဲသ့ၣ် တဂုာ်ကျဲးစၢး ဃုပှၤလၢ အဘၣ်တၢ်ဒိးဖှူအီၤအဂၤတဖၣ် ဒ်သိးကအိၣ်ဖှိၣ်ရိဖှိၣ် လီၤလီၤဆီဆီတကရူၢ် လၢကမၤလိလံာ်စီဆှံအဂီၢ် မ့တမ့ၢ် ကတဲသကိး အဝဲသ့ၣ် ဘၣ်တၢ်ဒိးဖှူအီၤအဂ့ၢ်န့ၣ်ဘၣ်. (ကလၤတံ ၁:၁၅-၁၇) ပှၤလၢအဘၣ်တၢ်ဒိးဖှူအီၤတဖၣ် မ့ၢ်မၤဝဲဒ်အံၤန့ၣ် ကမၤဘၣ်ဒိ တၢ်အိၣ်ဖှိၣ် အတၢ်ဃူတၢ်ဖိးလီၤ. တကးဒံးဘၣ် ကမ့ၢ်တၢ်လၢ အထီဒါ သးစီဆှံ လၢအမၤစၢၤ ယွၤအပှၤဂီၢ်မုၢ် လၢကအိၣ်ဒီး တၢ်ဃူတၢ်ဖိး ဒီးတၢ်မုာ်တၢ်ခုၣ်အဂီၢ်န့ၣ်လီၤ.—ရိမ့ၤ ၁၆:၁၇, ၁၈.
ပကြၢးရ့ဒီး ပှၤလၢအဘၣ် တၢ်ဒိးဖှူအီၤတဖၣ် ဒ်လဲၣ်
ပတကြၢးရ့ဒီး ပှၤလၢအဘၣ်တၢ်ဒိးဖှူအီၤတဂၤ မ့တမ့ၢ် ပှၤလၢ အတီခိၣ်ရိၤမဲတၢ်တဂၤဂၤ ဒ်ပှၤလၢအမံၤဟူသၣ်ဖျါအသိးဘၣ် (ကွၢ်လံာ်အဆၢ ၈)f
၈. ဖဲနရ့လိာ်သးဒီး ပှၤလၢအအီၣ်ကိၣ် အီစပံးထံတဖၣ်အခါ ဘၣ်မနုၤအဃိ နကဘၣ်ပလီၢ်နသးလဲၣ်. (ကွၢ်တၢ်ဂ့ၢ်အဘျဲၣ်တက့ၢ်.)
၈ နကြၢးရ့ဒီး ဒီပုၢ်ဝဲၢ်လၢ အဘၣ်တၢ်ဒိးဖှူအီၤတဖၣ် ဒ်လဲၣ်. ပှၤတဂၤလၢ အမ့မ့ၢ်ခရံာ်အဒီပုၢ်ဝဲၢ် လၢအဘၣ်တၢ်ဒိးဖှူအီၤဒၣ်လဲာ် ပမ့ၢ်ပာ်ဒိၣ်အီၤ အါတလၢန့ၣ် မ့ၢ်တၢ်လၢ အကမၣ်လီၤ. (မးသဲ ၂၃:၈-၁၂) လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢပက “မၤထွဲ” တၢ်အိၣ်ဖှိၣ်သးပှၢ်တဖၣ် “အတၢ်နာ်အခံ” လီၤ. ဘၣ်ဆၣ် တတဲဝဲလၢ ပပာ်ပှၤဟီၣ်ခိၣ်ဖိ လၢပခိၣ်ပနၢ် သ့န့ၣ်ဘၣ်. (ဧ့ၤဘြံၤ ၁၃:၇) လံာ်စီဆှံ တဲဝဲလၢ ပှၤတနီၤနီၤ “ဂ့ၤန့ၢ်ဘၣ် တၢ်ယူးယီၣ်ခံစး” လီၤ. ဘၣ်ဆၣ် လံာ်စီဆှံ တတဲဝဲလၢ ပှၤသ့ၣ်တဖၣ်အံၤ ကြၢးဒိးန့ၢ်ဘၣ် တၢ်ယူးယီၣ်ခံစး ခီဖျိလၢ အဝဲသ့ၣ် မ့ၢ်ပှၤဘၣ်တၢ်ဒိးဖှူအီၤအဃိဘၣ်. လၢတၢ်န့ၣ်အလီၢ် အဝဲသ့ၣ် ကြၢးဒိးန့ၢ် တၢ်ယူးယီၣ်ဒ်အံၤ ခီဖျိလၢ အဝဲသ့ၣ်မ့ၢ်ပှၤ “ကွၢ်တၢ်ဂ့ၤဂ့ၤဘၣ်ဘၣ်” ဒီး “စံၣ်တဲၤတဲလီၤ တၢ်အကလုၢ်အကထါ, ဒီးသိၣ်က့ၤသီက့ၤတၢ်” အဃိလီၤ. (၁ တံၤမသ့း ၅:၁၇) ပမ့ၢ်စံးပတြၢၤ ဒီးသးစၢၢ်ဆၢ ပှၤဘၣ်တၢ်ဒိးဖှူအီၤ အါတလၢန့ၣ် ကကဲထီၣ် တၢ်မဲာ်ဆှး လၢအဝဲသ့ၣ်အဂီၢ်လီၤ.c တကးဒံးဘၣ် ဘၣ်သ့ၣ်သ့ၣ် ကကဲထီၣ်လၢ ပဟ့ၣ်ဂံၢ်ဟ့ၣ်ဘါအီၤ ဒ်သိးအကအိၣ်ဒီး တၢ်ပာ်ထီၣ်ထီသးအဂီၢ်လီၤ. (ရိမ့ၤ ၁၂:၃) ပတအဲၣ်ဒိးမၤတၢ်လၢ အကမၤလီၤဃံၤ ခရံာ်အဒီပုၢ်ဝဲၢ် လၢအဘၣ်တၢ်ဒိးဖှူအီၤတဖၣ်အံၤ နီတမံၤဘၣ်.—လူၤကၣ် ၁၇:၂.
၉. ပပာ်ဖျါထီၣ် တၢ်ပာ်ကဲလၢ ပှၤဘၣ်တၢ်ဒိးဖှူအီၤတဂၤ အဖီခိၣ် ကသ့ဒ်လဲၣ်.
၉ ပပာ်ဖျါထီၣ် တၢ်ပာ်ကဲလၢ ပှၤဘၣ်တၢ်ဒိးဖှူအီၤတဂၤ အဖီခိၣ် ကသ့ဒ်လဲၣ်. အဒိ အဝဲသ့ၣ် ဘၣ်တၢ်ဒိးဖှူအီၤလၢ ကျဲဒ်လဲၣ်န့ၣ် ပတသံကွၢ်အီၤဘၣ်. တမ့ၢ်တၢ်လၢ အဘၣ်ဃးဒီးပှၤဘၣ် ဒီးပတကြၢး သ့ၣ်ညါစ့ၢ်ကီးဘၣ်. (၁ သ့းစၤလနံ ၄:၁၁; ၂ သ့းစၤလနံ ၃:၁၁) ပတကြၢးဆိကမိၣ်လၢ အဝဲသ့ၣ် အသးသမူတံၤသကိးမ့ၢ်ဂ့ၤ အမိၢ်ပၢ်မ့ၢ်ဂ့ၤ မ့တမ့ၢ် အဟံၣ်ဖိဃီဖိ အဂၤတဖၣ်မ့ၢ်ဂ့ၤ မ့ၢ်စ့ၢ်ကီး ပှၤလၢအဘၣ်တၢ်ဒိးဖှူအီၤန့ၣ်ဘၣ်. ပှၤတဂၤ တန့ၢ်သါဘၣ် တၢ်မုၢ်လၢ်လၢ ကထီၣ်ဘၣ်ဆူမူခိၣ် ခီဖျိလၢ အဟံၣ်ဖိဃီဖိအဃိဘၣ်. အဝဲဒိးန့ၢ်ဘၣ် တၢ်မုၢ်လၢ်အံၤ လၢကစၢ်ယွၤ အအိၣ်လီၤ. (၁ သ့းစၤလနံ ၂:၁၂) ပတကြၢးသံကွၢ် တၢ်သံကွၢ်တဖၣ်လၢ အကမၤဘၣ်ဒိ ပှၤဂၤအသးန့ၣ်ဘၣ်. အဒိ, ပတကြၢးသံကွၢ် ဒီပုၢ်ဝဲၢ်ခွါလၢ အဘၣ်တၢ်ဒိးဖှူအီၤတဂၤအမါလၢ နမ့ၢ်အိၣ်မူဘၣ် လီၤထူလီၤယိာ်လၢ ဟီၣ်ခိၣ်ချၢဘၣ်ဆၣ် နဝၤမ့ၢ်တအိၣ်ဘၣ်န့ၣ် နကတူၢ်ဘၣ် ဒ်လဲၣ်. ပနာ်သ့သပှၢ်ကတၢၢ်လၢ လၢဟီၣ်ခိၣ်သီအပူၤန့ၣ် ယဟိဝၤယွၤ ကဟ့ၣ်လီၤ “ကယဲၢ်တၢ်သးအဆၢတၢ်” တဖၣ်န့ၣ်လီၤ.—စံးထီၣ်ပတြၢၤ ၁၄၅:၁၆.
၁၀. ပမ့ၢ်ဟးဆှဲးတၢ် “ကွၢ်ပတြၢၤပှၤဂၤအမဲာ်” န့ၣ်မ့ၢ်ဝဲ ပဒီသဒၢလီၤပနီၢ်ကစၢ် ဒ်လဲၣ်.
၁၀ ပမ့ၢ်တပာ်ဒိၣ် ပှၤဘၣ်တၢ်ဒိးဖှူအီၤ လီၤလီၤဆီဆီဘၣ်န့ၣ် မ့ၢ်ပဒီသဒၢလီၤပသးစ့ၢ်ကီးလီၤ. လၢကျဲဒ်လဲၣ်. လံာ်စီဆှံတဲဝဲလၢ ပှၤလၢအဘၣ်တၢ်ဒိးဖှူအီၤတနီၤန့ၣ် တအိၣ်ဒီးတၢ်သးတီဒီး ကစၢ်ယွၤလၢၤဘၣ် သ့ဝဲလီၤ. (မးသဲ ၂၅:၁၀-၁၂; ၂ ပ့းတရူး ၂:၂၀, ၂၁) ဘၣ်ဆၣ်သနာ်က့ ပမ့ၢ်ဟးဆှဲးတၢ် “ကွၢ်ပတြၢၤ ပှၤဂၤအမဲာ်” န့ၣ်မ့ၢ်ဝဲ ပဒီသဒၢလီၤပသး ဒ်သိးပှၤသ့ၣ်တဖၣ်အံၤ သုတထုးယံၤထီၣ်ပှၤလၢ တၢ်မ့ၢ်တၢ်တီအပူၤ တဂ့ၤအဂီၢ်လီၤ. အဃိလၢခံ ပှၤလၢအဘၣ်တၢ်ဒိးဖှူအီၤမ့ၢ်ဂ့ၤ ပှၤလၢအဘၣ်တၢ်သ့ၣ်ညါအီၤ အါမ့ၢ်ဂ့ၤ ပှၤလၢအမၤယွၤအတၢ်မၤ ယံာ်တ့ၢ်မးမ့ၢ်ဂ့ၤ မ့ၢ်မၤကမၣ်တၢ် မ့တမ့ၢ် မ့ၢ်ဟးထီၣ်ကွံာ်လၢ တၢ်အိၣ်ဖှိၣ်ပူၤသနာ်က့ ပတၢ်နာ် တလီၤမၢ်ကွံာ်ဘၣ် ဒီးပတပတုာ် မၤကစၢ်ယွၤ အတၢ်မၤဘၣ်.—ယူဒၤ ၁၆.
ဘၣ်ဃးဒီး ပှၤဘၣ်တၢ်ဒိးဖှူအီၤတဖၣ် အနီၣ်ဂံၢ်န့ၣ် ပဘၣ်ယိၣ်တၢ်အလီၢ်အိၣ်ဧါ
၁၁. ဘၣ်ဃးဒီး ပှၤအီၣ်ကိၣ်ဒီးအီစပံးထံတဖၣ် အနီၣ်ဂံၢ်န့ၣ် ပသ့ၣ်ညါဘၣ် တၢ်မနုၤလဲၣ်.
၁၁ လၢအပူၤကွံာ် ပှၤလၢအအီၣ်ကိၣ်ဒီးအီစပံးထံ ဖဲတၢ်သ့ၣ်နီၣ်ထီၣ်က့ၤယ့ၣ်ၡူး အတၢ်သံအမူးန့ၣ် အနီၣ်ဂံၢ်စှၤလီၤဝဲ အိၣ်အနံၣ်အါမးလီၤ. သနာ်က့ ပူၤကွံာ်တယံာ်ဒံး ဘၣ်တုၤခဲအံၤ ပထံၣ်ဘၣ်လၢ တနံၣ်ဘၣ်တနံၣ်န့ၣ် အဝဲသ့ၣ် အနီၣ်ဂံၢ် အါထီၣ်ဝဲလီၤ. ဘၣ်ဆၣ် ပတလိၣ်သူၣ်ကိၢ်သးဂီၤတၢ် ဘၣ်ဃးဒီး တၢ်ဂ့ၢ်အံၤဘၣ်. ဘၣ်မနုၤအဃိလဲၣ်.
၁၂. ဘၣ်ဃးဒီး ပှၤအီၣ်ကိၣ် အီစပံးထံ အနီၣ်ဂံၢ်န့ၣ် ဘၣ်မနုၤအဃိ ပတကြၢး သူၣ်ကိၢ်သးဂီၤတၢ်ဘၣ်လဲၣ်.
၁၂ “ကစၢ်သ့ၣ်ညါပှၤလၢ အမ့ၢ်အတၢ်လီၤ.” (၂ တံၤမသ့း ၂:၁၉) ဒီပုၢ်ဝဲၢ်ခွါတဖၣ်လၢ အဂံၢ်ပှၤလၢ အအီၣ်ကိၣ်ဒီးအီစပံးထံ ဖဲတၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံအမူး အဆၢကတီၢ်န့ၣ် အဝဲသ့ၣ်တလီၤဂာ်ဒီး ယဟိဝၤယွၤဘၣ်. ပှၤလၢအဘၣ်တၢ်ဒိးဖှူအီၤ အနီၢ်ကီၢ် မ့ၢ်မတၤတဖၣ်လဲၣ်န့ၣ် အဝဲသ့ၣ် တသ့ၣ်ညါဝဲဘၣ်. လၢတၢ်န့ၣ်အဃိ အဝဲသ့ၣ် ဂံၢ်ဃုာ်ဒီး ပှၤလၢအဆိကမိၣ်လီၤအသးလၢ အဘၣ်တၢ်ဒိးဖှူအီၤ ဘၣ်ဆၣ် တမ့ၢ်ပှၤဘၣ်တၢ်ဒိးဖှူအီၤ အနီၢ်ကီၢ်ဘၣ်န့ၣ်လီၤ. အဒိ, လၢညါပှၤတနီၤအီၣ်ကိၣ် ဒီးအီစပံးထံဘၣ်ဆၣ် လၢခံန့ၣ် တအီၣ်ဝဲလၢၤဘၣ်. မ့မ့ၢ်ပှၤအဂၤတနီၤနီၤန့ၣ် မ့ၢ်လၢအဝဲသ့ၣ်အိၣ်ဒီး ခိၣ်နူာ်တၢ်ဆါ မ့တမ့ၢ် သးတၢ်ဆါအဃိ နာ်ဝဲလၢ အကလဲၤပၢဃုာ်တၢ်ဒီး ခရံာ်လၢမူခိၣ်လီၤ. လၢတၢ်ဂ့ၢ်သ့ၣ်တဖၣ်အံၤအဃိ ပှၤဘၣ်တၢ်ဒိးဖှူအီၤလၢ အအိၣ်တ့ၢ်လၢ ဟီၣ်ခိၣ်ချၢ ကအိၣ်ပှဲၤဂၤလဲၣ်န့ၣ် ပတသ့ၣ်ညါ လီၤတံၢ်လီၤဆဲးဘၣ်.
၁၃. ဖဲတၢ်နးတၢ်ဖှီၣ်ဖးဒိၣ် စးထီၣ်အခါ ပှၤဘၣ်တၢ်ဒိးဖှူအီၤတဖၣ် ကအိၣ်ဒံးလၢ ဟီၣ်ခိၣ်ချၢ ပှဲၤဂၤလဲၣ်န့ၣ် လံာ်စီဆှံ တဲဝဲဒ်လဲၣ်.
၁၃ ဖဲယ့ၣ်ၡူးဟဲလီၤဒီး ဟံးထီၣ်က့ၤ ပှၤဘၣ်တၢ်ဒိးဖှူအီၤတဖၣ် ဆူမူခိၣ်အခါ အဝဲသ့ၣ်ကအိၣ်လၢ တၢ်လီၢ်အါတီၤလၢ ဟီၣ်ခိၣ်ချၢလီၤ. (မးသဲ ၂၄:၃၁) လံာ်စီဆှံ ပာ်ဖျါထီၣ်ဝဲလၢ ဖဲမုၢ်နံၤခံကတၢၢ် အဆၢကတီၢ်န့ၣ် ပှၤဘၣ်တၢ်ဒိးဖှူအီၤတဖၣ် ကအိၣ်ဒံးလၢ ဟီၣ်ခိၣ်ချၢ စှၤဂၤလီၤ. (လီၣ်ဖျါ ၁၂:၁၇) ဘၣ်ဆၣ် ဖဲတၢ်နးတၢ်ဖှီၣ်ဖးဒိၣ် စးထီၣ်အခါ အဝဲသ့ၣ် ကအိၣ်တ့ၢ် ပှဲၤဂၤလဲၣ်န့ၣ် လံာ်စီဆှံ တပာ်ဖျါဝဲဘၣ်.
ပှၤတဂၤဂၤ မ့ၢ်အီၣ်ကိၣ် အီစပံးထံ လၢတၢ်သ့ၣ်နီၣ်ထီၣ်က့ၤအမူးန့ၣ် ပကြၢးမၤဒ်လဲၣ် (ကွၢ်လံာ်အဆၢ ၁၄)
၁၄. ဒ် ရိမ့ၤ ၉:၁၁, ၁၆ တဲဝဲအသိး ဘၣ်ဃးဒီး ပှၤဘၣ်တၢ်ဒိးဖှူအီၤလၢ ယဟိဝၤယွၤ ဃုထၢထီၣ်ဝဲန့ၣ် ပကဘၣ်နၢ်ပၢၢ် တၢ်မနုၤလဲၣ်.
၁၄ ယဟိဝၤယွၤ ကဃုထၢ ပှၤဘၣ်တၢ်ဒိးဖှူအီၤတဖၣ်လၢ အဆၢကတီၢ်ဖဲလဲၣ်န့ၣ် မ့ၢ်ဒၣ်အနီၢ်ကစၢ် အတၢ်ဆၢတဲာ်လီၤ. (ရိမ့ၤ ၈:၂၈-၃၀) ဖဲယ့ၣ်ၡူး ဂဲၤဆၢထၢၣ်သမူထီၣ်က့ၤ ဝံၤအလီၢ်ခံ ယဟိဝၤယွၤ စးထီၣ်ဃုထၢ ပှၤဘၣ်တၢ်ဒိးဖှူအီၤတဖၣ်လီၤ. ခရံာ်ဖိနီၢ်နီၢ် လၢတၢ်မၢဖိအစိၤန့ၣ် ဖျါလၢအဝဲသ့ၣ် ဘၣ်တၢ်ဒိးဖှူအီၤလၢ သးစီဆှံ ကိးဂၤဒဲးလီၤ. ဒီးလၢခံ ပှၤလၢအကိးလီၤသး လၢခရံာ်ဖိ အါတက့ၢ်န့ၣ် တပိာ်ခရံာ်အခံဘၣ်. ဘၣ်ဆၣ် ဖဲနံၣ်သ့ၣ်တဖၣ်န့ၣ် အတီၢ်ပူၤ ယဟိဝၤယွၤ ဒိးဖှူဝဲ ပှၤစှၤဂၤလၢအမ့ၢ် ခရံာ်ဖိနီၢ်နီၢ်လီၤ. ဒ်ယ့ၣ်ၡူးတဲဝဲအသိး ပှၤသ့ၣ်တဖၣ်အံၤ လီၤဂာ်ဒ် ဘုကၠူၣ်လၢ အဒိၣ်ထီၣ်လၢ နီၢ်စံစၢ် အကျါန့ၣ်လီၤ. (မးသဲ ၁၃:၂၄-၃၀) ဖဲမုၢ်နံၤခံကတၢၢ်အတီၢ်ပူၤ ယဟိဝၤယွၤ ဆဲးဃုထၢထီၣ် ပှၤအဂုၤအဂၤတဖၣ်လၢ အပၣ်ဃုာ်လၢပှၤ ၁၄၄,၀၀၀ အကျါလီၤ.d လၢတၢ်န့ၣ်အဃိ ကစၢ်ယွၤ မ့ၢ်ဆၢတဲာ်ဝဲလၢ ကဃုထၢ ပှၤဘၣ်တၢ်ဒိးဖှူအီၤတနီၤ ဖဲတၢ်အကတၢၢ် ဘူးကဘၣ် အဆၢကတီၢ်န့ၣ် ပတကြၢး သးဒ့ဒီလၢ ကစၢ်ယွၤ အတၢ်ကူၣ်သ့ အဖီခိၣ်ဘၣ်. (ဖး ရိမ့ၤ ၉:၁၁, ၁၆ တက့ၢ်.)e ပကဘၣ်ပလီၢ်ပသး ဒ်သိးပသုတလီၤဂာ် ဒ်ပှၤမၤတၢ်ဖိတဖၣ်လၢ ယ့ၣ်ၡူးဟ့ၣ်တၢ်အဒိအပူၤ တဂ့ၤအဂီၢ်လီၤ. အဝဲသ့ၣ် ကဒူးကဒ့ၣ်တၢ် ခီဖျိလၢ အတၢ်မၤကစၢ် ဟ့ၣ်တၢ်အဘူးအလဲလၢ ပှၤလၢအနုာ်လီၤမၤတၢ် လၢခံကတၢၢ် တနၣ်ရံၣ်န့ၣ်လီၤ.—မးသဲ ၂၀:၈-၁၅.
၁၅. ပှၤလၢအဘၣ်တၢ်ဒိးဖှူအီၤ ကိးဂၤဒဲးန့ၣ် ပၣ်ဃုာ်လၢ “တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့” လၢ မးသဲ ၂၄:၄၅-၄၇ ပာ်ဖျါထီၣ်ဝဲန့ၣ်ဧါ. တဲဖျါထီၣ်တက့ၢ်.
၁၅ ပှၤလၢအိၣ်ဒီး တၢ်မုၢ်လၢ်လၢ ကလဲၤထီၣ်ဆူမူခိၣ်န့ၣ် တပၣ်ဃုာ်လၢ “တၢ်အကုၢ်အပှၤလၢအကလုၢ်တီ, ဒီးအကူၣ်တၢ်သ့” အကျါ ကိးဂၤဒဲးဘၣ်. (ဖး မးသဲ ၂၄:၄၅-၄၇ တက့ၢ်.) ဒ်တၢ်မၢဖိအစိၤအသိး မုၢ်မဆါတနံၤအံၤ ယဟိဝၤယွၤ ဒီးယ့ၣ်ၡူးသူဝဲ ပှၤစှၤဂၤလၢ ကလုၢ်အီၣ်လုၢ်အီ မ့တမ့ၢ် သိၣ်လိသီလိ ပှၤအါဂၤအဂီၢ်န့ၣ်လီၤ. လၢတၢ်မၢဖိအစိၤန့ၣ် ထဲပှၤဘၣ်တၢ်ဒိးဖှူအီၤစှၤဂၤ ဘၣ်တၢ်သူအဝဲသ့ၣ်လၢ ကကွဲးဝဲ လံာ်စီဆှံ လၢကြံးကျိာ်တကတြူၢ်လီၤ. ဒီးမုၢ်မဆါတနံၤအံၤစ့ၢ်ကီး ထဲပှၤဘၣ်တၢ်ဒိးဖှူအီၤစှၤဂၤန့ၣ် ဒိးန့ၢ်ဘၣ်မူဒါလၢ “ကဒုးအီၣ်ဒုးအီ” ကစၢ်ယွၤအပှၤဂီၢ်မုၢ်လၢ “အဆၢအကတီၢ်ဘၣ်” န့ၣ်လီၤ.
၁၆. လၢတၢ်မၤလိအံၤအပူၤ နမၤလိန့ၢ် တၢ်မနုၤလဲၣ်.
၁၆ လၢတၢ်မၤလိအံၤအပူၤ ပမၤလိန့ၢ် တၢ်မနုၤလဲၣ်. ယဟိဝၤယွၤ ဆၢတဲာ်ဝဲလၢ အကဟ့ၣ်ဝဲ အခ့အပှၤအါတက့ၢ် တၢ်မူအထူအယိာ် လၢဟီၣ်ခိၣ်ချၢလီၤ. ဒီးအဝဲဆၢတဲာ်လီၤအသးလၢ ကဟ့ၣ်အခ့အပှၤစှၤဂၤ လၢတၢ်မူလၢမူခိၣ် ဒီးအဝဲသ့ၣ် ကပၢဃုာ်တၢ်ဒီးခရံာ်လီၤ. ယဟိဝၤယွၤ ကဆိၣ်ဂ့ၤ အခ့အပှၤခဲလၢာ် လၢအမ့ၢ် “ပှၤယူဒၤဖိ” ဒီး “ပှၤဆံဆဲၣ်ဂၤ” န့ၣ်လီၤ. တကးဒံးဘၣ် ကစၢ်ယွၤ မၢအဝဲသ့ၣ် ဒိကနၣ် တၢ်သိၣ်တၢ်သီတမံၤဃီ ဒီးတီဒီးအီၤ တုၤအကတၢၢ်လီၤ. အဝဲသ့ၣ် ကဘၣ်အိၣ်ဒီး တၢ်ဆီၣ်လီၤအသး ကိးဂၤဒဲးလီၤ. အဝဲသ့ၣ် ကဘၣ်မၤအတၢ်မၤ ဒ်သိးသိး ဒီးအိၣ်ဃူအိၣ်ဖိးခဲလၢာ်လီၤ. ဒီးအဝဲသ့ၣ် ကိးဂၤဒဲး ကဘၣ်ပၢၤဃာ် တၢ်အိၣ်ဖှိၣ် အတၢ်ဃူတၢ်ဖိးလီၤ. ဒ်တၢ်အကတၢၢ် ဘူးထီၣ်ဝဲအသိး ပဝဲခဲလၢာ် မ်ပဆဲးမၤ ယဟိဝၤယွၤအတၢ်မၤ ဒီးပိာ်ယ့ၣ်ၡူးခရံာ်အခံဒ် “သိတဖုဃီ” အသိးန့ၣ်တက့ၢ်.—ယိၤဟၣ် ၁၀:၁၆.
a တနံၣ်အံၤ တၢ်သ့ၣ်နီၣ်ထီၣ်က့ၤ ခရံာ်အတၢ်သံအမူးန့ၣ် ပှၤကမၤအီၤဖဲ မုၢ်ခံနံၤ, လါအ့ဖြ့ၣ် ၇ သီလီၤ. ပှၤလၢအအီၣ်ကိၣ် အီစပံးထံဖဲ တၢ်သ့ၣ်နီၣ်ထီၣ်က့ၤအမူးန့ၣ် ပကြၢးထံၣ်အီၤ ဒ်လဲၣ်. ပှၤလၢအအီၣ်ကိၣ် အီစပံးထံတဖၣ် အနီၣ်ဂံၢ် မ့ၢ်အါထီၣ်န့ၣ် မ့ၢ်ပကြၢးသူၣ်ကိၢ်သးဂီၤဧါ. လၢတၢ်မၤလိအံၤအပူၤ ပကတဲသကိး တၢ်သံကွၢ်တဖၣ်အံၤ အတၢ်စံးဆၢလီၤ. တၢ်မၤလိတခါအံၤန့ၣ် ပှၤဟံးန့ၢ် တၢ်ဂ့ၢ်တၢ်ကျိၤလၢ လါယနူၤအါရံၤ, ၂၀၁၆ တၢးထီခိးတၢ် အပူၤလီၤ.
b ဒ် စံးထီၣ်ပတြၢၤ ၈၇:၅, ၆ ပာ်ဖျါထီၣ်ဝဲအသိး, ခါဆူညါန့ၣ် ဘၣ်သ့ၣ်သ့ၣ် ကစၢ်ယွၤ ကပာ်ဖျါထီၣ် ပှၤလၢအပၢတၢ်ဒီးယ့ၣ်ၡူး လၢမူခိၣ် ကိးဂၤဒဲးအမံၤလီၤ.—ရိမ့ၤ ၈:၁၉.
c ကွၢ်တၢ်လွံၢ်နၢၣ်လၢအမ့ၢ် “တၢ်အဲၣ်တၢ်ကွံန့ၣ် ‘တမၤဘၣ် တၢ်တဂ့ၤတဘၣ်န့ၣ်ဘၣ်’” လၢ လါယနူၤအါရံၤ, ၂၀၁၆ တၢးထီခိးတၢ် အပူၤတက့ၢ်.
d မၤတၢ် ၂:၃၃ ပာ်ဖျါထီၣ်ဝဲလၢ သးစီဆှံန့ၣ် ဘၣ်တၢ်လူလီၤ အီၤခီဖျိလၢ ယ့ၣ်ၡူးန့ၣ်လီၤ. ဘၣ်ဆၣ်သနာ်က့ ယဟိဝၤယွၤ မ့ၢ်ပှၤလၢ အဃုထၢထီၣ် ပှၤလၢအကဘၣ်တၢ်ဒိးဖှူအီၤ တဂၤစုာ်စုာ်လီၤ.
e ဃုသ့ၣ်ညါအါထီၣ်တၢ်ဂ့ၢ်လၢ “Questions From Readers” လၢ The Watchtower May 1 2007 တက့ၢ်.
တၢ်သးဝံၣ် ၃၄ လဲၤတၢ်လၢတၢ်တီတၢ်လိၤအပူၤ
f တၢ်တဲဖျါထီၣ်တၢ်ဂီၤ အခီပညီ– ထံၣ်တမှံကွၢ်လၢ ဖဲဝဲၤလီၢ်ခိၣ်သ့ၣ် အပှၤခၢၣ်စးတၢ် ဒီးအမါ ဟဲထီၣ်တၢ်အိၣ်ဖှိၣ်ဖးဒိၣ်အခါ ပှၤမ့ၢ်အိၣ်ဝးတရံးအီၤ ဒီးဒိအဝဲသ့ၣ်အဂီၤန့ၣ် တၢ်ကမၤအသး ဒ်လဲၣ်. ကလီၤဂာ်ဒ်သိး ပှၤတပာ်ကဲ အဝဲသ့ၣ်လီၤ.