မၤဂ့ၤထီၣ်က့ၤ နတၢ်ရ့လိာ်သးဒီး ယဟိဝၤယွၤ
ကိးနံၣ်ဒဲးန့ၣ် သိလၢအလုၢ်ဒိၣ်ပှ့ၤဒိၣ်အါမး ဘၣ်တၢ်တူၢ်လိာ်က့ၤအီၤလၢ တၢ်အိၣ်ဖှိၣ်ပူၤလီၤ. ထံၣ်တမှံကွၢ် ဖဲပှၤဟဲက့ၤကဒါက့ၤလၢ ယဟိဝၤယွၤအအိၣ်အခါ “လၢမူခိၣ်န့ၣ် တၢ်သးခု” ဖးဒိၣ်အိၣ်ထီၣ်ဝဲ. (လူၤကၣ် ၁၅:၇, ၁၀) နမ့မ့ၢ်ပှၤလၢ ဘၣ်တၢ်တူၢ်လိာ်က့ၤအီၤလၢ တၢ်အိၣ်ဖှိၣ်ပူၤန့ၣ် နနာ်သ့လၢ ယ့ၣ်ၡူး, မူခိၣ်ကလူးဒီးယဟိဝၤယွၤ သးခုဒိၣ်မးလၢ အထံၣ်နဟဲက့ၤကဒါက့ၤ လၢတၢ်မ့ၢ်တၢ်တီအပူၤ အဃိလီၤ. ဘၣ်ဆၣ် ဖဲနမၤဂ့ၤထီၣ် နတၢ်ရ့လိာ်သးဒီး ယဟိဝၤယွၤအခါ နကထံၣ်ဘၣ် တၢ်ကီတၢ်ခဲတဖၣ်လီၤ. တၢ်ကီတၢ်ခဲတဖၣ်န့ၣ် မ့ၢ်မနုၤလဲၣ် ဒီးတၢ်မနုၤကမၤစၢၤနၤလဲၣ်.
တၢ်ကီတၢ်ခဲတဖၣ်န့ၣ် မ့ၢ်မနုၤလဲၣ်
ဖဲပှၤအါဂၤဟဲက့ၤကဒါက့ၤလၢ တၢ်အိၣ်ဖှိၣ်ပူၤအခါ အဝဲသ့ၣ်အိၣ်ဒီး တၢ်တူၢ်ဘၣ်လၢ အတမုာ်ဘၣ်တဖၣ်ဒံးလီၤ. စီၤပၤဒၤဝံးစ့ၢ်ကီး ဘၣ်တြီဆၢကွံာ် အတၢ်တူၢ်ဘၣ်လၢ အတမုာ်ဘၣ်တဖၣ်လီၤ. ယဟိဝၤယွၤပျၢ်ကွံာ် အတၢ်ကမၣ်ဝံၤလံ သနာ်က့ အတဲဝဲလၢ “ယတၢ်ဒဲးဘးလူၤချုးန့ၢ်ယၤ” လီၤ. (စံးထီၣ်ပတြၢၤ ၄၀:၁၂; ၆၅:၃) ဖဲပှၤတဂၤဟဲက့ၤကဒါက့ၤလၢ ယဟိဝၤယွၤအအိၣ် ဝံၤအလီၢ်ခံ အကမဲာ်ဆှး ဒီးကတူၢ်ဘၣ်ဝဲလၢ အတၢ်ကမၣ်အိၣ်ဒံးဝဲလီၤ. ဒီပုၢ်ဝဲၢ်မုၣ်အံးစဘဲ လၢဘၣ်တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်အပူၤ အိၣ်ဝဲအနံၣ် ၂၀ ဘျဲၣ်န့ၣ်a တဲဝဲလၢ “ယတူၢ်ဘၣ်လၢ အကီဒိၣ်မးလၢ ယကတူၢ်လိာ်လၢ ယဟိဝၤယွၤသးအိၣ်ပျၢ်ကွံာ် ယတၢ်ကမၣ်.” နမ့ၢ်သးဟးဂီၤန့ၣ် နတၢ်ရ့လိာ်သးဒီး ယဟိဝၤယွၤဟးဂီၤ ကဒါက့ၤသ့လီၤ. (ကတိၤဒိ ၂၄:၁၀) အဃိ တဘၣ်ပျဲ တၢ်တူၢ်ဘၣ်ဒ်အံၤ ကဒိၣ်စိလၢ နဖီခိၣ်တဂ့ၤ.
ပှၤဂၤတနီၤ ဆိကမိၣ်ဝဲလၢ အမၤဂ့ၤထီၣ်ကဒီး အတၢ်ရ့လိာ်သးဒီး ယဟိဝၤယွၤတန့ၢ်ဘၣ်. ဖဲဒီပုၢ်ဝဲၢ်ခွါအဲထိနံၤ အဘၣ်တၢ်တူၢ်လိာ်က့ၤအီၤလၢ တၢ်အိၣ်ဖှိၣ်ပူၤ ဝံၤအလီၢ်ခံ အတဲဝဲလၢ “ယတူၢ်ဘၣ်လၢ ယသးပ့ၤနီၣ်ကွံာ် ခရံာ်ဖိအတၢ်အိၣ်မူခဲလၢာ်.” ခီဖျိလၢပှၤတနီၤ အတၢ်အိၣ်သးအိၣ်ဒ်အံၤအဃိ အဝဲသ့ၣ်တဂုာ်ကျဲးစၢး မၤယဟိဝၤယွၤအတၢ်မၤ လၢအဂ့ၤကတၢၢ်လၢၤဘၣ်.
အဒိ, ကလံၤမုၢ်လီၤဖးဒိၣ်အဃိ ပှၤတဂၤအဟံၣ်ဟးဂီၤကွံာ်ဝဲ ဒီးဖဲအဆိကမိၣ်ထီၣ်လၢ အကဘၣ်တ့ထီၣ်က့ၤအဟံၣ်ဒီး ဘၣ်သူတၢ်ဆၢကတီၢ်ထဲလဲၣ်အခါ အသးကဟးဂီၤဝဲ. ဒ်န့ၣ်အသိး ခီဖျိလၢ နမၤဘၣ်တၢ်ကမၣ်ဖးဒိၣ်အဃိ နတၢ်ရ့လိာ်သးဒီး ယဟိဝၤယွၤမ့ၢ်ဟးဂီၤန့ၣ် နကတူၢ်ဘၣ်လၢ နကဘၣ်ဂုာ်ကျဲးစၢး သပှၢ်ကတၢၢ်ဒ်သိး နကမၤဂ့ၤထီၣ်က့ၤ နတၢ်ရ့လိာ်သးဒီး ယဟိဝၤယွၤလီၤ. ဘၣ်ဆၣ် နတလိၣ်မၤထဲ တဂၤဧိၤဘၣ်.
ယဟိဝၤယွၤကွဲမုာ်ပှၤလၢ “ဟဲမီၣ်, . . . စံးကတိၤလိာ်သကိးပသးတက့ၢ်.” (ယၡါယၤ ၁:၁၈) နဂုာ်ကျဲးစၢး လၢအဂ့ၤကတၢၢ် လၢနက “စံးကတိၤလိာ်” သးအဂီၢ်လံ. ယဟိဝၤယွၤအဲၣ်နၤဒီး ထံၣ်ဝဲနတၢ်ဂုာ်ကျဲးစၢးလီၤ. ဆိကမိၣ်ကွၢ် ခီဖျိလၢနဟဲက့ၤကဒါက့ၤလၢ ယဟိဝၤယွၤအအိၣ်အဃိ ယဟိဝၤယွၤ ပာ်ဖျါထီၣ်ဝဲလၢ မုၣ်ကီၤလံၢ်မ့ၢ်ပှၤလီတၢ်သ့လီၤ.—ကတိၤဒိ ၂၇:၁၁.
ခီဖျိလၢ နဟဲက့ၤကဒါက့ၤလၢ ယဟိဝၤယွၤအအိၣ်အဃိ မ့ၢ်ဒၣ်နသုးဘူးနသးလၢ ယဟိဝၤယွၤအအိၣ် ဒီးယဟိဝၤယွၤအၢၣ်လီၤဝဲလၢ အကသုးဘူးအသးလၢနအိၣ်လီၤ. (ယၤကိာ် ၄:၈) ဘၣ်ဆၣ် ထဲပှၤဂၤထံၣ်ဝဲလၢ နဟဲက့ၤကဒါက့ၤလၢ တၢ်အိၣ်ဖှိၣ်အပူၤန့ၣ် တလၢပှဲၤဒံးဘၣ်. နကဘၣ်မၤကျၢၤထီၣ် တၢ်အဲၣ်လၢ ယဟိဝၤယွၤလၢအမ့ၢ် နပၢ်ဒီးနသကိး အဖီခိၣ်လီၤ. နမၤအီၤကသ့ဒ်လဲၣ်.
ပာ်လီၤဖီတၢၣ်လၢ နမၤလၢပှဲၤအီၤသ့တဖၣ်
ဂုာ်ကျဲးစၢးပာ်လီၤဖီတၢၣ်လၢ နမၤလၢပှဲၤအီၤသ့တဖၣ်တက့ၢ်. ဘၣ်သ့ၣ်သ့ၣ် နကသ့ၣ်နီၣ်ထီၣ်က့ၤ တၢ်မ့ၢ်တၢ်တီ အခီၣ်ထံးခီၣ်ဘိလၢ နမၤလိဘၣ်ဃးဒီး ယဟိဝၤယွၤ ဒီးအတၢ်အၢၣ်လီၤ ဘၣ်ဃးဒီး ပၤရဒံစူးလီၤ. ဘၣ်ဆၣ် ခဲအံၤ နကဘၣ်ဒုးအိၣ်ထီၣ်ကဒါက့ၤ ခရံာ်ဖိအတၢ်ဖံးတၢ်မၤ ဒ်သိးဒီး လဲၤစံၣ်တဲၤတဲလီၤတၢ်ထီဘိ, လဲၤထီၣ်တၢ်အိၣ်ဖှိၣ်ရိဖှိၣ် ဒီးရ့ဒီးဒီပုၢ်ဝဲၢ်မုၣ်ခွါတဖၣ်ထီဘိလီၤ. ဆိကမိၣ်ကွၢ် ဖီတၢၣ်တဖၣ်အံၤတက့ၢ်.
တဲတၢ်ဒီး ယဟိဝၤယွၤထီဘိ. နတူၢ်ဘၣ်လၢ နတၢ်ကမၣ်အိၣ်အဃိ နကဃ့ဘါထုကဖၣ်လၢ အအိၣ် တညီဝဲဘၣ်န့ၣ် ယဟိဝၤယွၤ နၢ်ပၢၢ်ဝဲ. (ရိမ့ၤ ၈:၂၆) ဘၣ်ဆၣ် နကဘၣ် “ဆဲးဃ့ဘါထုကဖၣ်တၢ် ထီဘိ” ဒီးတဲဘၣ်အီၤလၢ နအဲၣ်ဒိးကဲထီၣ် အတံၤသကိး သပှၢၢ်ကတၢၢ်. (ရိမ့ၤ ၁၂:၁၂) ဒီပုၢ်ဝဲၢ်ခွါအဲၤဒြံ တဲဝဲလၢ “ယတူၢ်ဘၣ်လၢ ယအိၣ်ဒီး တၢ်ကမၣ်ဖးဒိၣ် ဒီးယမဲာ်ဆှးညါ. ဘၣ်ဆၣ် ဖဲယဃ့ဘါထုကဖၣ် ဝံၤအလီၢ်ခံ ယတၢ်တူၢ်ဘၣ်တဖၣ်အံၤ တအိၣ်လၢၤဘၣ်. ယသးမုာ်ထီၣ်က့ၤဒီး ယပာ်ယသး မုာ်မုာ်ခုၣ်ခုၣ်သ့.” နကဘၣ် ပာ်ဖျါထီၣ် နတၢ်တူၢ်ဘၣ်ဒ်လဲၣ်န့ၣ် နမ့ၢ်တသ့ၣ်ညါဘၣ်န့ၣ် ဆိကမိၣ်ထီၣ်က့ၤ စီၤပၤဒၤဝံး အတၢ်ပီၢ်ယၢ်လီၤက့ၤသး အတၢ်ထုကဖၣ် လၢအအိၣ်လၢ စံးထီၣ်ပတြၢၤ အဆၢဒိၣ် ၅၁ ဒီး ၆၅ တက့ၢ်.
မၤလိလံာ်စီဆှံထီဘိ. နမ့ၢ်မၤဒ်န့ၣ်န့ၣ် ကမၤစၢၤနၤလၢ နတၢ်နာ်ကဂၢၢ်ကျၢၤထီၣ် ဒီးနတၢ်အဲၣ်ယဟိဝၤယွၤ ကဒိၣ်ထီၣ်ဝဲ. (စံးထီၣ်ပတြၢၤ ၁၉:၇-၁၁) ဒီပုၢ်ဝဲၢ်ခွါဖံလံး တဲဝဲလၢ “ခီဖျိလၢ ယတအိၣ်ဒီး တၢ်ရဲၣ်တၢ်ကျဲၤလၢ တၢ်ဖးလံာ်စီဆှံ ဒီးနီၢ်ကစၢ်တၢ်မၤလိလံာ်စီဆှံ အဂီၢ်ဘၣ်အဃိ ယနီၢ်သးဂံၢ်ဘါလီၤစၢ်ဒီး ယမၤဘၣ်ဒိယဟိဝၤယွၤအသး. ဘၣ်ဆၣ် ယတအဲၣ်ဒိးလၢ တၢ်သ့ၣ်တဖၣ်အံၤ ကကဲထီၣ်ကဒီးအသးဘၣ်အဃိ ယဂုာ်ကျဲးစၢးမၤ နီၢ်ကစၢ်တၢ်မၤလိလံာ်စီဆှံထီဘိ.” နၤစ့ၢ်ကီး နမၤဒ်န့ၣ်သ့. နမ့ၢ်လိၣ်ဘၣ်တၢ်မၤစၢၤလၢ နကဃုထၢတၢ်ဂ့ၢ်လၢ နနီၢ်ကစၢ်တၢ်မၤလိလံာ်စီဆှံအဂီၢ်န့ၣ် နဃ့တၢ်မၤစၢၤလၢ နသကိးလၢအအိၣ်ဒီး တၢ်ရ့လိာ်သးဒီးယဟိဝၤယွၤ လၢအဂ့ၤတဖၣ်သ့ဝဲလီၤ.
မၤဂ့ၤထီၣ်က့ၤ နတၢ်ရ့လိာ်သး ဒီးဒီပုၢ်ဝဲၢ်မုၣ်ခွါတဖၣ်. ပှၤလၢတၢ်တူၢ်လိာ်က့ၤအီၤလၢ တၢ်အိၣ်ဖှိၣ်ပူၤန့ၣ် ဘၣ်ယိၣ်ဝဲလၢ ပှၤဂၤကသးထီၣ်အီၤဒံး. ဒီပုၢ်ဝဲၢ်မုၣ်လရံစၤ တဲဝဲလၢ “ယမဲာ်ဆှးဒိၣ်မး. ယတူၢ်ဘၣ်လၢ ယမၤဘၣ်ဒိ ဒီပုၢ်ဝဲၢ်မုၣ်ခွါတဖၣ်အသး. တၢ်တူၢ်ဘၣ်ဒ်အံၤ အိၣ်ဒီးယၤဖးယံာ်ညါ.” နနာ်သ့သပှၢ်ကတၢၢ်လၢ တၢ်အိၣ်ဖှိၣ်သးပှၢ်ဒီး ဒီပုၢ်ဝဲၢ်လၢ အဒိၣ်တုာ်ခိၣ်ပှဲၤတဖၣ် အဲၣ်ဒိးမၤစၢၤနၤ ဒ်သိးနကမၤဂ့ၤထီၣ်က့ၤ နတၢ်ရ့လိာ်သးဒီး ယဟိဝၤယွၤလီၤ. (ကွၢ်တၢ်လွံၢ်နၢၣ်လၢ “တၢ်အိၣ်ဖှိၣ်သးပှၢ်တဖၣ် မၤစၢၤအဝဲသ့ၣ် ကသ့ဒ်လဲၣ်.”) အဝဲသ့ၣ်သးခုလၢ နဟဲက့ၤကဒါက့ၤလၢ တၢ်အိၣ်ဖှိၣ်ပူၤ ဒီးအဝဲသ့ၣ်အဲၣ်ဒိးလၢ နကသးခုစ့ၢ်ကီး.—ကတိၤဒိ ၁၇:၁၇.
ဒ်သိး နကဘူးထီၣ်ဒီး ဒီပုၢ်ဝဲၢ်မုၣ်ခွါအဂီၢ် တၢ်မနုၤကမၤစၢၤနၤလဲၣ်. နကဘၣ် လဲၤထီၣ်တၢ်အိၣ်ဖှိၣ် အတၢ်ရဲၣ်တၢ်ကျဲၤကိးခါဒဲး ဒီးလဲၤစံၣ်တဲၤတဲလီၤတၢ်ဒီး ဒီပုၢ်ဝဲၢ်မုၣ်ခွါထီဘိ. နမ့ၢ်မၤဒ်အံၤန့ၣ် နကဒိးန့ၢ်ဘၣ်အဘျုးဒ်လဲၣ်. ဒီပုၢ်ဝဲၢ်ခွါဖံလ့း(စ်) တဲဝဲလၢ “ဒီပုၢ်ဝဲၢ်မုၣ်ခွါတဖၣ် အိၣ်ခိးကွၢ်လၢ်ဝဲလၢ ယကဟဲက့ၤကဒါက့ၤ. အဃိ ယတူၢ်ဘၣ်လၢ အဝဲသ့ၣ်အဲၣ်ယၤ. အဝဲသ့ၣ်ခဲလၢာ် မၤစၢၤယၤဒ်သိး ယကကဲထီၣ်ဘၣ်က့ၤ အဟံၣ်ဖိဃီဖိ, ယတူၢ်ဘၣ်လၢ ယဟိဝၤယွၤ ပျၢ်ကွံာ်ယတၢ်ကမၣ် အဃိ ယဆဲးမၤ ယဟိဝၤယွၤအတၢ်မၤန့ၢ်ဝဲ.”—ကွၢ်တၢ်လွံၢ်နၢၣ်လၢ “နမၤကသ့ဒ်လဲၣ်.”
တဘၣ်ဟ့ၣ်ၡူတဂ့ၤ
ဖဲနမၤဂ့ၤထီၣ်က့ၤ နတၢ်ရ့လိာ်သးဒီး ယဟိဝၤယွၤအခါ မုၣ်ကီၤလံၢ်စ့ၢ်ကီး ကဆဲးမၤကီမၤခဲနၤ ဒ်သိးနသးအဂံၢ်ဘါ ကလီၤစၢ်အဂီၢ်. (လူၤကၣ် ၄:၁၃) အဃိ အရ့ဒိၣ်ဒိၣ်မးလၢ နကဘၣ်မၤဂၢၢ်ကျၢၤထီၣ် နတၢ်ရ့လိာ်သးဒီး ယဟိဝၤယွၤလၢဆၢကတီၢ် အခဲအံၤ.
ယဟိဝၤယွၤအၢၣ်လီၤဝဲ အသိတဖၣ်လၢ “ယကဃု တၢ်လၢအဟါမၢ်, ဒီးဒုးဟဲက့ၤတၢ်လၢ တၢ်ဟီထီၣ်ကွံာ်အီၤ, ဒီးယကဘိၣ်ထီၣ် တၢ်လၢအကၢ်, ဒီးယကဒုးဆူၣ်ထီၣ် တၢ်လၢအဆါလီၤ.” (ယဃ့းစက့လး ၃၄:၁၆) ယဟိဝၤယွၤ မၤစၢၤတ့ၢ်ပှၤအါဂၤ လၢအမၤဂ့ၤထီၣ်က့ၤ အတၢ်ရ့လိာ်သးဒီးအီၤ. အဃိ နၤစ့ၢ်ကီး နနာ်သ့လၢ ယဟိဝၤယွၤ အဲၣ်ဒိးမၤစၢၤနၤဒ်သိး နကမၤဂၢၢ်ကျၢၤထီၣ်က့ၤ နတၢ်ရ့လိာ်သးဒီးအီၤလီၤ.
a ပှၤမံၤလၢ တၢ်မၤလိအံၤအပူၤန့ၣ် ဘၣ်တၢ်ဆီတလဲအီၤ.