တၢ်ပှ့ၤဒိၣ်ထီၣ်အဃိ ပကြၢးမၤဒ်လဲၣ်
သးအိၣ် ဟ့ၣ်မၤစၢၤတၢ်
ခီဖျိလၢ တၢ်ပှ့ၤဒိၣ်ထီၣ်အဃိ ဘၣ်သ့ၣ်သ့ၣ် နကဆိကမိၣ်လၢ နကဟ့ၣ်မၤစၢၤပှၤဂၤန့ၣ် အတညီဘၣ်. တၢ်ပှ့ၤဒိၣ်ထီၣ် သနာ်က့ ပမ့ၢ်သးအိၣ် ဟ့ၣ်မၤစၢၤပှၤဂၤန့ၣ် ပကဒိးန့ၢ်ဘၣ်အဘျုး. ပဂုာ်ကျဲးစၢး သူစ့သ့သ့ဘၣ်ဘၣ် သနာ်က့ ပဟ့ၣ်မၤစၢၤပှၤဂၤ သ့ဒံး.
ဘၣ်မနုၤအဃိ ပဘၣ်သးအိၣ် ဟ့ၣ်မၤစၢၤပှၤဂၤလဲၣ်
ပဟ့ၣ်တၢ် မ့ၢ်န့ၢ်ထဲ တစဲးဖိ သနာ်က့ ပမ့ၢ်သးအိၣ် ဟ့ၣ်မၤစၢၤပှၤဂၤန့ၣ် ပကသးခု ဒီးပှၤဂၤစ့ၢ်ကီး ကသးခု. ဘၣ်ဃးဒီး တၢ်ဂ့ၢ်အံၤန့ၣ် ကသံၣ်သရၣ်တနီၤ တဲဝဲလၢ ပမ့ၢ်သးအိၣ် ဟ့ၣ်တၢ်န့ၣ် ကဂ့ၤလၢ ပတၢ်အိၣ်ဆူၣ်အိၣ်ချ့ ဒီးပသးအတၢ်တူၢ်ဘၣ် အဂီၢ်. အဒိ ပတၢ်ဘၣ်ယိၣ်, တၢ်သူၣ်ကိၢ်သးဂီၤ, သွံၣ်ထီၣ်တၢ်ဆါ, တၢ်အ့ၣ်စိၢ်အ့ၣ်ထုး ဒီးတၢ်တကံတကး ကလီၤစှၤ. ဒီးဘၣ်သ့ၣ်သ့ၣ် ပမံကန့ၢ်အါထီၣ်.
ဖဲပှၤဂၤလိၣ်ဘၣ် တၢ်မၤစၢၤအခါ ပမၤစၢၤအဝဲသ့ၣ် လၢကျိၣ်စ့ မ့တမ့ၢ် တၢ်အဂၤသ့. ပမ့ၢ်မၤဒ်န့ၣ်န့ၣ် လၢခံ ဖဲပထံၣ်ဘၣ် တၢ်ကီတၢ်ခဲအခါ ညီလၢပကတူၢ်လိာ် ပှၤဂၤအတၢ်မၤစၢၤ. ပိာ်ခွါတဂၤ လၢအမံၤမ့ၢ် ဟါဝၤ ဒီးအအိၣ်လၢ ကီၢ်အဲကလံးန့ၣ် အတဲဝဲလၢ “ယၤဒီးယမါန့ၣ် ပဃုကျဲလၢ ပက ဟ့ၣ်တၢ် ဒီးမၤစၢၤပှၤဂၤ. အဃိ လၢခံ ဖဲပလိၣ်ဘၣ်တၢ်မၤစၢၤ ဒီးပှၤဂၤမၤစၢၤက့ၤပှၤအခါ ညီလၢပကတူၢ်လိာ် ပှၤဂၤတၢ်မၤစၢၤ.” ပှၤလၢ အသးအိၣ် ဟ့ၣ်မၤစၢၤတၢ် နီၢ်ကီၢ်န့ၣ် အတမုၢ်လၢ်ဝဲလၢ အကန့ၢ်ဘၣ်က့ၤ တၢ်တမံၤမံၤလၢ ပှၤအိၣ်ဘၣ်. ဘၣ်ဆၣ် ခီဖျိလၢ အဝဲသ့ၣ် သးအိၣ်ဟ့ၣ်တၢ်အဃိ အဒိးန့ၢ်ဘၣ် သကိးနီၢ်ကီၢ်. ဒီးဖဲအဝဲသ့ၣ် လိၣ်ဘၣ်တၢ်မၤစၢၤအခါ အသကိး မၤစၢၤက့ၤအီၤ.
နမၤမနုၤသ့လဲၣ်
ဟ့ၣ်နီၤလီၤပှၤဂၤ တၢ်လၢအအိၣ်ဒီးနၤ. တၢ်လၢ နကဟ့ၣ်ပှၤဂၤန့ၣ် အမ့ၢ်ကဲ တၢ်ယိယိဖိ ဒ်သိးဒီး တၢ်အီၣ်ထဲတခွး ဘၣ်ဆၣ် နဟ့ၣ်နီၤလီၤ ပှၤဂၤသ့ဒံး. ပိာ်ခွါတဂၤ လၢအမံၤမ့ၢ် ဒၢၤခ့ၤ လၢအအိၣ်လၢ ကီၢ်ယူၤကၣ်ဒၣ်ဒီး အဟံၣ်ဖိဃီဖိန့ၣ် အဝဲသ့ၣ်ဖှီၣ် သနာ်က့ အသးအိၣ် ဟ့ၣ်မၤစၢၤတၢ်. ဒၢၤခ့ၤ တဲဝဲလၢ “ဖဲမုၢ်အိၣ်ဘှံးနံၤ ကိးနွံဒဲးန့ၣ် ယၤဒီးယမါ ကွဲမုာ်ပှၤဂၤလၢ ကဟဲအီၣ်မ့ၤလၢ ပဟံၣ်. ပအီၣ်သကိးမ့ၤ ဒီးပတဲသကိးတၢ်မုာ်မး.”
ပသးအိၣ် မၤစၢၤပှၤဂၤ ဘၣ်ဆၣ် ဒ်သိး ပဟံၣ်ဖိဃီဖိ တထံၣ်ဘၣ် တၢ်ကီတၢ်ခဲ အါထီၣ်တဂ့ၤအဂီၢ် ပကဘၣ် ကွၢ်န့ၢ်တၢ်လၢ ပဟံၣ်ဖိဃီဖိ တၢ်လိၣ်ဘၣ် အဂီၢ်စ့ၢ်ကီး.—ဘး ၁၇:၅.
မၤကွၢ်ဒ်အံၤ– ပဖီဒုးအီၣ် ပှၤတဂၤဂၤလၢ တၢ်အီၣ်ယိယိဖိတခွး မ့တမ့ၢ် ဒုးအီအီၤထံချီ မ့တမ့ၢ် တၢ်ဆၢထံသ့. ဒီးတၢ်ဖိတၢ်လံၤလၢ ပတသူလၢၤဘၣ်န့ၣ် ပဟ့ၣ် ပသကိး မ့တမ့ၢ် ပှၤလၢ ပဟံၣ်ခိၣ်ဟံၣ်ဃၢၤသ့.
တၢ်ဟ့ၣ်အဂၤလၢ နဟ့ၣ်ပှၤဂၤသ့. တၢ်ဟ့ၣ်တနီၤလၢ ပကဟ့ၣ်ပှၤဂၤန့ၣ် ပတလိၣ်ပှ့ၤအီၤ လၢစ့ဘၣ်. အဒိ ပဟ့ၣ် ပတၢ်ဆၢကတီၢ် ဒီးပာ်ဖျါထီၣ်လၢ ပကဟုကယာ်ပှၤဂၤ ခီဖျိ ပမၤန့ၢ်အီၤတၢ် တမံၤမံၤ. ဒီးတၢ်ကတိၤ လၢအမုာ်န့ၣ် အလီၤဂာ်ဒ်သိးဒီး တၢ်ဟ့ၣ်တခါစ့ၢ်ကီး. အဃိ ပတဲဘၣ်ပှၤဂၤလၢ ပပာ်လုၢ်ပာ်ပှ့ၤအီၤ ဒီးပအဲၣ်အီၤ ဒိၣ်မးသ့.
မၤကွၢ်ဒ်အံၤ– ပှၤဂၤမ့ၢ်လိၣ်ဘၣ် တၢ်မၤစၢၤန့ၣ် ပလဲၤမၤစၢၤအီၤလၢ ဟံၣ်ဃီတၢ်ဖံးတၢ်မၤ ဒီးဘှီဘၣ်ထီၣ်န့ၢ်အဟံၣ်သ့. တကးဒံးဘၣ် ပမၤစၢၤအီၤ ခီဖျိ ပဆှၢန့ၢ်အီၤခးက့ မ့တမ့ၢ် ကွဲးန့ၢ်အီၤမဲးစ့း ဒီးတဲလၢ ပသ့ၣ်နီၣ်ဘၣ်အီၤသ့.
နမ့ၢ်သးအိၣ် ဟ့ၣ်မၤစၢၤတၢ်န့ၣ် နကဒိးန့ၢ်ဘၣ်အါထီၣ် တၢ်သးခု.