ပှၤလၢအသးအိၣ်ဟ့ၣ်တၢ်န့ၣ် မ့ၢ်ပှၤလၢအသးခု
“ဟ့ၣ်တၢ်န့ၣ် ဘၣ်တၢ်ဆိၣ်ဂ့ၤအါန့ၢ် ဒိးန့ၢ်တၢ်” လီၤ.—မၤတၢ် ၂၀:၃၅.
၁. ယဟိဝၤယွၤသးအိၣ်ဟ့ၣ်တၢ်န့ၣ် ပသ့ၣ်ညါဘၣ်ဒ်လဲၣ်.
တချုးလၢ ယဟိဝၤယွၤတ့လီၤတၢ်နီတမံၤဒံးဘၣ်အခါ အဝဲအိၣ်ထဲတဂၤဧိၤလီၤ. ဘၣ်ဆၣ်လၢခံ အဝဲတ့လီၤဝဲ တၢ်သးသမူလၢ မူခိၣ်ဒီးတၢ်သးသမူလၢ ဟီၣ်ခိၣ်န့ၣ်လီၤ. ယဟိဝၤယွၤလၢအမ့ၢ် “တၢ်သးခုကစၢ်” န့ၣ်အဝဲသးအိၣ်ဟ့ၣ်ပှၤ တၢ်လၢအဂ့ၤကတၢၢ်လီၤ. (၁ တံၤမသ့း ၁:၁၁, nwt; ယၤကိာ် ၁:၁၇) ယဟိဝၤယွၤအဲၣ်ဒိးလၢ ပကသးခုအဃိ အဝဲသိၣ်လိပှၤဒ်သိး ပကသးအိၣ် ဟ့ၣ်တၢ်လီၤ.—ရိမ့ၤ ၁:၂၀.
၂, ၃. (က) ဘၣ်မနုၤအဃိ ပမ့ၢ်သးအိၣ်ဟ့ၣ်တၢ်န့ၣ် ပကသးခုလဲၣ်. (ခ) လၢတၢ်မၤလိအံၤအပူၤ ပကမၤလိဘၣ်တၢ်ဂ့ၢ်မနုၤလဲၣ်.
၂ ကစၢ်ယွၤတ့လီၤ ပှၤဟီၣ်ခိၣ်ဖိ ဒ်အဂီၤဒၣ်ဝဲအသိးလီၤ. (၁ မိၤၡ့ ၁:၂၇) အခီပညီန့ၣ် ဖဲယဟိဝၤယွၤတ့လီၤပှၤအခါ တ့လီၤဝဲဃုာ်ဒီး အတၢ်ဂ့ၤတၢ်ဝါတဖၣ်လီၤ. လၢတၢ်န့ၣ်အဃိ ပမ့ၢ်ကွၢ်လိမၤဒိး ယဟိဝၤယွၤန့ၣ် ပကအိၣ်ဒီးတၢ်သးခုနီၢ်ကီၢ် ဒီးပကဒိးန့ၢ်ဘၣ်အတၢ်ဆိၣ်ဂ့ၤလီၤ. ပကဘၣ်သးအိၣ်ပှၤဂၤနီၢ်ကီၢ် ဒီးသးအိၣ်ဟ့ၣ်တၢ်လီၤ. (ဖံလံးပံၤ ၂:၃, ၄; ယၤကိာ် ၁:၅) ဘၣ်မနုၤအဃိ ပဘၣ်မၤဒ်န့ၣ်လဲၣ်. ခီဖျိလၢယဟိဝၤယွၤတ့လီၤပှၤဒ်န့ၣ်အဃိလီၤ. ပတလၢတပှဲၤသနာ်က့ ပကွၢ်လိမၤဒိးယဟိဝၤယွၤ ဒီးသးအိၣ်ဟ့ၣ်တၢ်သ့ဝဲလီၤ.
၃ ပဟ့ၣ်တၢ်လၢ တၢ်သူၣ်အိၣ်သးအိၣ်အပူၤ ကသ့ဒ်လဲၣ်န့ၣ် လံာ်စီဆှံပာ်ဖျါထီၣ်ဝဲလီၤ. လၢတၢ်မၤလိအံၤအပူၤ ပကမၤလိဘၣ်လၢ ပမ့ၢ်သးအိၣ်ဟ့ၣ်တၢ်န့ၣ် ဘၣ်မနုၤအဃိ ယဟိဝၤယွၤသးခုဝဲလဲၣ်. ဒီးတၢ်သးအိၣ်ဟ့ၣ်တၢ်န့ၣ် မၤစၢၤပှၤလၢ ပကမၤမူဒါလၢ ယဟိဝၤယွၤဟ့ၣ်ပှၤဒ်လဲၣ် ဒီးပမ့ၢ်ဟ့ၣ်တၢ်လၢ တၢ်သးအိၣ်န့ၣ် ဘၣ်မနုၤအဃိ ပကသးခုလဲၣ်. ဒီးပကတဲသကိးစ့ၢ်ကီး ဘၣ်မနုၤအဃိ ပကဘၣ်ဆဲး ဟ့ၣ်တၢ်လၢတၢ်သးအိၣ်န့ၣ်လဲၣ်.
ဖဲပသးအိၣ်ဟ့ၣ်တၢ်အခါ ယဟိဝၤယွၤ သးခု
၄, ၅. ယဟိဝၤယွၤ ဒီးယ့ၣ်ၡူး သးအိၣ်ဟ့ၣ်တၢ်န့ၣ် ပသ့ၣ်ညါဘၣ်ဒ်လဲၣ် ဒီးဘၣ်မနုၤအဃိ ပကြၢးကွၢ်လိမၤဒိးအီၤလဲၣ်.
၄ ယဟိဝၤယွၤ အဲၣ်ဒိးလၢ ပကကွၢ်လိမၤဒိးအီၤလီၤ. လၢတၢ်န့ၣ်အဃိ ဖဲပသးအိၣ်ဟ့ၣ်တၢ်အခါ အဝဲသးခုဒိၣ်မးလီၤ. (အ့းဖ့းစူး ၅:၁) ခီဖျိလၢယဟိဝၤယွၤ တ့လီၤပှၤဃုာ်ဒီးတၢ်ဂ့ၤတၢ်ဝါတဖၣ် ဒီးတ့လီၤန့ၢ်ပှၤ ဟီၣ်ခိၣ်လၢ အဃံလၤ ဒီးတၢ်ခဲလၢာ်လၢ ကမၤသးခုပှၤအဃိ ပသ့ၣ်ညါဘၣ်လၢ ယဟိဝၤယွၤ အဲၣ်ဒိးလၢ ပကသးခုလီၤ. (စံးထီၣ်ပတြၢၤ ၁၀၄:၂၄; ၁၃၉:၁၃-၁၆) လၢတၢ်န့ၣ်အဃိ ဖဲပဂုာ်ကျဲးစၢးမၤသးခုပှၤဂၤအခါ မ့ၢ်ဝဲပမၤလၤကပီၤယဟိဝၤယွၤလီၤ.
၅ ယ့ၣ်ၡူး ပာ်လီၤန့ၢ်ပှၤတၢ်ဒိဂ့ၤတဲာ်ဘၣ် ဘၣ်ဃး ပှၤဟီၣ်ခိၣ်ဖိတဖၣ် ဟ့ၣ်တၢ်လၢတၢ်သးအိၣ်ကသ့ဒ်လဲၣ်န့ၣ်လီၤ. လၢတၢ်န့ၣ်အဃိ ပကွၢ်လိမၤဒိးအီၤသ့ဝဲလီၤ. ယ့ၣ်ၡူးတဲဝဲလၢ “ဒ်န့ၣ်အသိး, ပှၤကညီဖိခွါအံၤ တဟဲဘၣ်ဒ်သိးပှၤကမၤအီၤလၢ အခ့အပှၤအတၢ်မၤဘၣ်. မ့ၢ်ဒ်သိးအကမၤ တၢ်အခ့အပှၤအတၢ်မၤ, ဒီးဟ့ၣ်လီၤအသးလၢ ပှၤကညီအါဂၤအပှ့ၤန့ၣ်လီၤ.” (မးသဲ ၂၀:၂၈) ဒီးတၢ်မၢဖိ ပီလူး ဟ့ၣ်ဂံၢ်ဟ့ၣ်ဘါဝဲ ခရံာ်ဖိတဖၣ်လၢ “သးတမံၤလၢ အအိၣ်လၢ ယ့ၣ်ၡူးခရံာ်အပူၤန့ၣ် မ်အအိၣ်စ့ၢ်ကီးလၢ သုပူၤတက့ၢ်. . . . ညိကွံာ်အလၤအကပီၤ, . . . ဒီးဒိန့ၢ်ကုၢ်အက့ၢ်အဂီၤလီၤ.” (ဖံလံးပံၤ ၂:၅, ၇) ပသံကွၢ်လီၤပသးဒ်အံၤ သ့ဝဲလီၤ. ‘မ့ၢ်ယကွၢ်လိမၤဒိးအါထီၣ် ယ့ၣ်ၡူးကသ့ဧါ.’—ဖး ၁ ပ့းတရူး ၂:၂၁ တက့ၢ်.
၆. ယ့ၣ်ၡူးဟ့ၣ်တၢ်အဒိဘၣ်ဃးဒီး ပှၤၡၤမရံဖိအဂ့ၢ်န့ၣ် သိၣ်လိပှၤတၢ်ဂ့ၢ်မနုၤလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၆ ယဟိဝၤယွၤဒီး ယ့ၣ်ၡူးန့ၣ် မ့ၢ်ပှၤလၢအဒိဂ့ၤတဲာ်ဘၣ်ကတၢၢ်လီၤ. အဃိပမ့ၢ် ကွၢ်လိမၤဒိး အဝဲသ့ၣ်န့ၣ် ယဟိဝၤယွၤသးခုဝဲလီၤ. ပကွၢ်လိမၤဒိးအဝဲသ့ၣ် ခီဖျိ ပသူၣ်အိၣ်သးအိၣ်ပှၤဂၤ ဒီးဃုကျဲလၢ ကမၤစၢၤပှၤဂၤန့ၣ်လီၤ. ပကမၤဒ်န့ၣ်အဂီၢ် မ့ၢ်တၢ်လၢအရ့ဒိၣ်ထဲလဲၣ်န့ၣ် ယ့ၣ်ၡူးပာ်ဖျါထီၣ်ဝဲခီဖျိလၢ ဟ့ၣ်ဝဲတၢ်အဒိ ဘၣ်ဃးဒီး ပှၤၡၤမရံဖိအဂ့ၢ်န့ၣ်လီၤ. (ဖး လူၤကၣ် ၁၀:၂၉-၃၇ တက့ၢ်.) ယ့ၣ်ၡူးသိၣ်လိပှၤပိာ်အခံတဖၣ်လၢ ပှၤတဂၤမ့ၢ်အိၣ်ဟဲလၢ တၢ်လီၢ်ဖဲလဲၣ်ဂ့ၤ ဖဲလဲၣ်ဂ့ၤ မ့မ့ၢ် ပှၤဒ်လဲၣ်ဂ့ၤဒ်လဲၣ်ဂ့ၤ အဝဲသ့ၣ်ကဘၣ်မၤစၢၤဝဲလီၤ. ဘၣ်မနုၤအဃိ ယ့ၣ်ၡူးဟ့ၣ်ဝဲ တၢ်အဒိလၢအဘၣ်ဃးဒီး ပှၤၡၤမရံဖိလဲၣ်န့ၣ် မ့ၢ်နနီၣ်ဘၣ်ဒံးဧါ. မ့ၢ်လၢ ပှၤယူဒၤဖိတဂၤ သံကွၢ်အီၤလၢ “ပှၤလၢယဃၢၤန့ၣ် မ့ၢ်မတၤတဂၤလဲၣ်” အဃိလီၤ. ယ့ၣ်ၡူး အတၢ်စံးဆၢအံၤ သိၣ်လိပှၤလၢ ပမ့ၢ်အဲၣ်ဒိးလၢ ယဟိဝၤယွၤ ဘၣ်သူၣ်ဘၣ်သးပှၤန့ၣ် ပကဘၣ်သးအိၣ်ဟ့ၣ်တၢ် ဒ်ပှၤၡၤမရံဖိအံၤအသိးလီၤ.
၇. ပနာ်လၢ တၢ်လၢယဟိဝၤယွၤမၤဝဲတဖၣ် မ့ၢ်ကျဲလၢအဂ့ၤကတၢၢ်န့ၣ် ပပာ်ဖျါထီၣ်အီၤသ့လၢ ကျဲဒ်လဲၣ်, တဲဖျါထီၣ်တက့ၢ်.
၇ ဘၣ်မနုၤအဃိ ပကြၢးသးအိၣ်ဟ့ၣ်တၢ်လဲၣ်န့ၣ် တၢ်ဂ့ၢ်လၢအဂၤအိၣ်ဒံးဝဲတခါလီၤ. လၢဧ့ၤဒ့ၣ်တၤသၣ်လီၢ်န့ၣ် မုၣ်ကီၤလံၢ် တဲဘၣ် နီၢ်အံၣ်အုဒီးစီၤအၤဒၣ်လၢ အဝဲသ့ၣ်မ့ၢ်တဒိကနၣ် ယဟိဝၤယွၤအကလုၢ်ဘၣ် ဒီးမ့ၢ်ဆိကမိၣ်ထဲအနီၢ်ကစၢ်အဂီၢ်န့ၣ် အဝဲသ့ၣ်ကသးခုအါထီၣ်ဝဲလီၤ. နီၢ်အံၣ်အုအဲၣ်လီၤထဲ အနီၢ်ကစၢ်သးဒီး အဲၣ်ဒိးလီၤဂာ်ဒီးကစၢ်ယွၤလီၤ. ဒီးမ့မ့ၢ် စီၤအၤဒၣ်န့ၣ် အဲၣ်လီၤအနီၢ်ကစၢ်အသး ဒီးအဲၣ်ဒိးမၤသးခုနီၢ်အံၣ်အုအသး ဒိၣ်န့ၢ်ဒံး အဲၣ်ဒိးမၤသးခု ကစၢ်ယွၤအသးန့ၣ်လီၤ. (၁ မိၤၡ့ ၃:၄-၆) လၢတၢ်န့ၣ်အဃိ တၢ်ကီတၢ်ခဲအိၣ်ထီၣ်ဝဲလီၤ. ဖဲအံၤပသ့ၣ်ညါဘၣ်လီၤတံၢ်လီၤဆဲးလၢ ပှၤလၢအအဲၣ်လီၤထဲအနီၢ်ကစၢ်အသးန့ၣ် အိၣ်ဒီးတၢ်သးခုတသ့ဘၣ်. ဘၣ်ဆၣ် ပမ့ၢ်တအဲၣ်လီၤထဲပနီၢ်ကစၢ်အသးဘၣ် ဒီးပမ့ၢ်သးအိၣ်ဟ့ၣ်တၢ်န့ၣ် မ့ၢ်ဝဲပပာ်ဖျါထီၣ်လၢ ပနာ်လၢ တၢ်လၢယဟိဝၤယွၤမၤဝဲတဖၣ်န့ၣ် မ့ၢ်ကျဲလၢအဂ့ၤကတၢၢ်လီၤ.
မၤလၢပှဲၤမူဒါလၢ ယဟိဝၤယွၤ ဟ့ၣ်လီၤပှၤန့ၣ်တက့ၢ်
၈. ဘၣ်မနုၤအဃိ နီၢ်အံၣ်အု ဒီးစီၤအၤဒၣ် ကြၢးဆိကမိၣ်န့ၢ်တၢ်လၢ ပှၤဂၤအဂီၢ်လဲၣ်.
၈ နီၢ်အံၣ်အုဒီးစီၤအၤဒၣ်အိၣ်လၢ ဧ့ၤဒ့ၣ်တၤသၣ်အလီၢ်ပူၤ ထဲခံဂၤသနာ်က့ အဝဲသ့ၣ်ကြၢးဆိကမိၣ်န့ၢ်တၢ်လၢ ပှၤဂၤအဂီၢ်လီၤ. ဘၣ်မနုၤအဃိလဲၣ်. ယဟိဝၤယွၤ ဟ့ၣ်အဝဲသ့ၣ် တၢ်မၤလၢ အကဘၣ်မၤဝဲတဖၣ်လီၤ. ယဟိဝၤယွၤမၢအဝဲသ့ၣ် မၤပှဲၤဟီၣ်ခိၣ်ဒီဘ့ၣ် ပှဲၤဒီးအဖိတဖၣ် ဒီးမၤကဲထီၣ်ဟီၣ်ခိၣ်လၢ ပၤရဒံစူးလီၤ. (၁ မိၤၡ့ ၁:၂၈) ယဟိဝၤယွၤအဲၣ်ဒိးလၢ ပှၤဟီၣ်ခိၣ်ဖိခဲလၢာ် ကပှဲၤဒီး တၢ်သူၣ်ခုသးခုလီၤ. ဒ်န့ၣ်အသိး နီၢ်အံၣ်အု ဒီးစီၤအၤဒၣ်စ့ၢ်ကီး ကြၢးဆိကမိၣ်န့ၢ်တၢ်လၢ အဖိအလံၤတဖၣ်လၢ ကဟဲအိၣ်ဖျဲၣ်ထီၣ်လၢခါဆူညါ အဂီၢ်န့ၣ်လီၤ. ကစၢ်ယွၤအဲၣ်ဒိးဝဲလၢ နီၢ်အံၣ်အုဒီး စီၤအၤဒၣ်အဖိအလံၤခဲလၢာ် ကအိၣ်ဒီးတၢ်သူၣ်ခုသးခုလီၤ. တကးဒံးဘၣ် အဝဲအဲၣ်ဒိးဝဲလၢ အဝဲသ့ၣ်ကမၤသကိးတၢ်ဒီး မၤကဲထီၣ်ဟီၣ်ခိၣ်လၢ ပၤရဒံစူးလီၤ. တၢ်လၢအဝဲသ့ၣ်ကဘၣ်မၤဝဲန့ၣ် မ့ၢ်ဝဲ မူဒါဖးဒိၣ်တခါလီၤ.
၉. လၢအပူၤကွံာ် ပှၤဟီၣ်ခိၣ်ဖိတဖၣ် မ့ၢ်မၤကဲထီၣ်ဘၣ် ဟီၣ်ခိၣ်လၢပၤရဒံစူးန့ၣ် ဘၣ်မနုၤအဃိ အဝဲသ့ၣ်ကပှဲၤဒီတၢ်သူၣ်ခုသးခုလဲၣ်.
၉ ဒ်သိးဟီၣ်ခိၣ်ကကဲထီၣ်ပၤရဒံစူး ဒီးကစၢ်ယွၤအတၢ်ဘၣ်သး ကလၢထီၣ်ပှဲၤထီၣ်အဂီၢ် ပှၤဟီၣ်ခိၣ်ဖိလၢ အလၢအပှဲၤတဖၣ် ကဘၣ်မၤသကိးတၢ်ဒီး ယဟိဝၤယွၤ ဘူးဘူးတံၢ်တံၢ်လီၤ. အဝဲသ့ၣ်မ့ၢ်မၤဝဲဒ်န့ၣ်န့ၣ် အဝဲသ့ၣ်ကနုာ်လီၤဘၣ်လၢ ယွၤအတၢ်အိၣ်ဘှံးအပူၤလီၤ. (ဧ့ၤဘြံၤ ၄:၁၁) ဆိကမိၣ်ကွၢ် တၢ်မၤအံၤကမုာ်ထဲလဲၣ်န့ၣ်တက့ၢ်. ပှၤဟီၣ်ခိၣ်ဖိတဖၣ် မ့ၢ်တကွၢ်တၢ်ထဲအနီၢ်ကစၢ်အဂီၢ်ဘၣ် ဒီးမ့ၢ်ကွၢ်တၢ်လၢ ပှၤဂၤအဂီၢ်န့ၣ် ယဟိဝၤယွၤကဆိၣ်ဂ့ၤအဝဲသ့ၣ် ဒီးအဝဲသ့ၣ်ကပှဲၤဒီးတၢ်သူၣ်ခုသးခုလီၤ.
၁၀, ၁၁. ဒ်သိး ပကစံၣ်တဲၤတဲလီၤတၢ် ဒီးလဲၤဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်အဂီၢ် တၢ်မနုၤကမၤစၢၤပှၤလဲၣ်.
၁၀ မုၢ်မဆါတနံၤအံၤ ယဟိဝၤယွၤ ဟ့ၣ်လီၤပှၤ မူဒါလီၤဆီတခါလီၤ. အဝဲအဲၣ်ဒိးလၢ ပကစံၣ်တဲၤတဲလီၤတၢ် ဒီးဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်လီၤ. ဒ်သိးတၢ်မၤအံၤ ကကဲထီၣ်လိၣ်ထီၣ်အဂီၢ် ပကဘၣ်သူၣ်အိၣ်သးအိၣ်ပှၤဂၤ နီၢ်ကီၢ်လီၤ. ပမ့ၢ်အိၣ်ဒီး တၢ်ပာ်သူၣ်ပာ်သးလၢအဂ့ၤမး ပဆဲးမၤတၢ်မၤအံၤကန့ၢ်ဝဲလီၤ. အခီပညီန့ၣ် ပမ့ၢ်အဲၣ်ယဟိဝၤယွၤ ဒီးအဲၣ်ပှၤဂၤမး ပဆဲးမၤတၢ်မၤအံၤကန့ၢ်ဝဲလီၤ.
၁၁ စီၤပီလူးတဲဝဲလၢအဝဲ ဒီးခရံာ်ဖိလၢ တၢ်မၢဖိအစိၤန့ၣ် “မ့ၢ်ယွၤအပှၤမၤသကိးတၢ်” ခီဖျိအဝဲသ့ၣ် စံၣ်တဲၤတဲလီၤတၢ် ဒီးသိၣ်လိပှၤဂၤလၢ တၢ်မ့ၢ်တၢ်တီအဃိလီၤ. (၁ ကရံၣ်သူး ၃:၆, ၉) မုၢ်မဆါတနံၤအံၤ ပဝဲစ့ၢ်ကီး ပကဲထီၣ် “ယွၤအပှၤမၤသကိးတၢ်” သ့ခီဖျိ ပသးအိၣ်ဟ့ၣ်လီၤ ပတၢ်ဆၢကတီၢ်, ပဂံၢ်ပဘါ ဒီးပတၢ်ထူးတၢ်တီၤတဖၣ်ဒ်သိး ကဆီၣ်ထွဲမၤစၢၤ တၢ်စံၣ်တဲၤတဲလီၤတၢ်မၤလၢ ကစၢ်ယွၤဟ့ၣ်လီၤပှၤန့ၣ်လီၤ. တၢ်မၤအံၤ မ့ၢ်ဝဲ တၢ်ခွဲးတၢ်ယာ်လီၤဆီဖးဒိၣ်တခါလီၤ.
ဖဲပမၤစၢၤဘၣ်ပှၤဂၤလၢ ကသ့ၣ်ညါထီၣ် တၢ်မ့ၢ်တၢ်တီအခါ ပသးခုဒိၣ်မး (ကွၢ်လံာ်အဆၢ ၁၂)
၁၂, ၁၃. ဒီပုၢ်ဝဲၢ်မုၣ်ခွါတဖၣ် လဲၤဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်အဃိ ဒိးန့ၢ်ဘၣ်ဝဲ တၢ်ဆိၣ်ဂ့ၤမနုၤလဲၣ်.
၁၂ ပသးအိၣ်ဟ့ၣ်လီၤ ပတၢ်ဆၢကတီၢ် ဒီးတၢ်ဂံၢ်တၢ်ဘါ လၢတၢ်စံၣ်တဲၤတဲလီၤတၢ်မၤအဂီၢ်အဃိ ပပှဲၤဒီးတၢ်သူၣ်ခုသးခုလီၤ. ဒီပုၢ်ဝဲၢ်မုၣ်ခွါအါဂၤလၢ အအိၣ်ဒီး အပှၤမၤလိလံာ်စီဆှံဖိတဖၣ်န့ၣ် တဲဝဲဒ်အံၤလီၤ. ဖဲပထံၣ်ဘၣ် ပပှၤမၤလိလံာ်စီဆှံဖိတဖၣ် နၢ်ပၢၢ်ထီၣ်လံာ်စီဆှံတၢ်မ့ၢ်တၢ်တီ, အတၢ်နာ်အါထီၣ်, ဆီတလဲအတၢ်အိၣ်မူ ဒီးစးထီၣ်တဲဘၣ်ပှၤဂၤလၢ တၢ်လၢအဝဲသ့ၣ်မၤလိဘၣ်ဝဲတဖၣ်အခါ ပသူၣ်ခုသးခုဒိၣ်မးလီၤ. ဖဲယ့ၣ်ၡူးအပျဲၢ်အဘီၣ်အဂၤ ၇၀ လဲၤစံၣ်တဲၤတဲလီၤတၢ်အခါ အဝဲသ့ၣ် ဒိးန့ၢ်ဘၣ်တၢ်လဲၤခီဖျိလၢအဂ့ၤအဃိ အဝဲသ့ၣ် “ဟဲက့ၤကဒါ အိၣ်ဒီးတၢ်သူၣ်ခုသးခု” လီၤ. ဒီးယ့ၣ်ၡူးစ့ၢ်ကီး ဖဲအဝဲထံၣ်အပျဲၢ်အဘီၣ်တဖၣ် သူၣ်ခုသးခုအခါ အဝဲသးခုစ့ၢ်ကီးလီၤ.—လူၤကၣ် ၁၀:၁၇-၂၁.
၁၃ ပဒီပုၢ်ဝဲၢ်မုၣ်ခွါလၢ တၢ်လီၢ်ကိးပူၤဒဲးန့ၣ် ဖဲအထံၣ်ဘၣ်လၢ လံာ်စီဆှံမၤစၢၤပှၤဂၤဒ်သိး ကဆီတလဲအတၢ်အိၣ်မူအခါ အဝဲသ့ၣ်သူၣ်ခုသးခုဒိၣ်မးလီၤ. အဒိ ဒီပုၢ်ဝဲၢ်မုၣ်သးစၢ် တဂၤအမံၤလၢ အဲနၤန့ၣ် အဝဲအဲၣ်ဒိးမၤအါထီၣ် ယဟိဝၤယွၤအတၢ်မၤလီၤ. a (ကွၢ်တၢ်ဂ့ၢ်အဘျဲၣ်တက့ၢ်.) လၢတၢ်န့ၣ်အဃိ အဝဲလဲၤသုးအသးဆူ ကီၢ်ယူရပၤ မုၢ်ထီၣ်တကပၤ လၢ တၢ်လီၢ်လၢ ပှၤလိၣ်ဘၣ်အါထီၣ် ပှၤစံၣ်တဲၤတဲလီၤတၢ်ဖိန့ၣ်လီၤ. အဝဲကွဲးဝဲလၢ “ဖဲအံၤ တၢ်ခွဲးတၢ်ယာ်လၢ ယကစးထီၣ်မၤလိပှၤဂၤလံာ်စီဆှံန့ၣ် အိၣ်အါမးအဃိ ယစံၣ်တဲၤတဲလီၤတၢ်မုာ်ဒိၣ်မး. တၢ်စံၣ်တဲၤတဲလီၤတၢ်န့ၣ် ဟ့ၣ်ယၤတၢ်သူၣ်ခုသးခုဒိၣ်မး. ဖဲယဟဲက့ၤတုၤလၢဟံၣ်အခါ ယဆိကမိၣ်ထဲ ပှၤလၢယမၤလိအီၤ လံာ်စီဆှံတဖၣ် အတၢ်ကီတၢ်ခဲ ဒီးအတၢ်သူၣ်ကိၢ်သးဂီၤအဂ့ၢ် ဒီးယဂုာ်ကျဲးစၢးဃုကျဲလၢ ကဟ့ၣ်ဂံၢ်ဟ့ၣ်ဘါအဝဲသ့ၣ် ဒီးမၤစၢၤအဝဲသ့ၣ်လီၤ. လၢတၢ်န့ၣ်အဃိ ယဆိကမိၣ် ယနီၢ်ကစၢ်အတၢ်ကီတၢ်ခဲတဖၣ် တချုးလၢၤဘၣ်. ယနာ်နီၢ်ကီၢ်လၢ ‘ဟ့ၣ်တၢ်န့ၣ် ဘၣ်တၢ်ဆိၣ်ဂ့ၤအါန့ၢ် ဒိးန့ၢ်တၢ်လီၤ.’”—မၤတၢ် ၂၀:၃၅
ပှၤဒိကနၣ် ပတၢ်သးခုကစီၣ်ဂ့ၤ တဒိကနၣ်ဂ့ၤ တၢ်စံၣ်တဲၤတဲလီၤတၢ်မၤန့ၣ် မၤသးခုပှၤ
၁၄. ပှၤမ့ၢ်တဒိကနၣ် နတၢ်စံၣ်တဲၤတဲလီၤသနာ်က့ ဘၣ်မနုၤအဃိ နဆဲးအိၣ်ဒီတၢ်သးခုသ့ဝဲလဲၣ်.
၁၄ ဖဲပစံၣ်တဲၤတဲလီၤတၢ်အခါ မ့ၢ်ဝဲ ပဟ့ၣ်ပှၤဂၤ တၢ်ခွဲးတၢ်ယာ်လၢ ကနၢ်ဟူဘၣ် တၢ်သးခုကစီၣ်လီၤ. လၢတၢ်န့ၣ်အဃိ ဖဲပစံၣ်တဲၤတဲလီၤတၢ်အခါ ပှၤမ့ၢ်တဒိကနၣ် ပတၢ်စံၣ်တဲၤတဲလီၤသနာ်က့ ပအိၣ်ဒီးတၢ်သးခုသ့ဝဲလီၤ. ယဟိဝၤယွၤအဲၣ်ဒိးလၢပကမၤဒ် အဝဲမၢ ဝံယဃ့းစက့လးအသိးလီၤ. အဝဲတဲဝဲလၢ အဝဲသ့ၣ် “ကနၣ်တၢ်မ့ၢ်ဂ့ၤ, ဆိတ့ၢ်မ့ၢ်ဂ့ၤ, စံၣ်တဲၤတဲလီၤအီၤလၢ ယတၢ်ကတိၤတက့ၢ်.” (ယဃ့းစက့လး ၂:၇; ယၡါယၤ ၄၃:၁၀) လၢတၢ်န့ၣ်အဃိ ပှၤဒိကနၣ် ပတၢ်ကစီၣ်ဂ့ၤ တဒိကနၣ်ဂ့ၤ ယဟိဝၤယွၤ ပာ်လုၢ်ပာ်ပှ့ၤ ပတၢ်ထဲးဂံၢ်ထဲးဘါန့ၣ်လီၤ. (ဖး ဧ့ၤဘြံၤ ၆:၁၀ တက့ၢ်) ဘၣ်ဃးဒီးတၢ်စံၣ်တဲၤတဲလီၤတၢ်န့ၣ် ဒီပုၢ်ဝဲၢ်တဂၤ ပာ်ဖျါထီၣ်ဝဲဒ်အံၤလီၤ. “ပသူၣ်လီၤ, ပလူအထံ ဒီးပဃ့ဘါထုကဖၣ်ဒီးမုၢ်လၢ်လၢ ယဟိဝၤယွၤ ကဒုးဒိၣ်ထီၣ်ဝဲ ပှၤလၢ အသးအိၣ်တၢ်တဖၣ်န့ၣ်လီၤ.”—၁ ကရံၣ်သူး ၃:၆.
ဖဲပလဲၤတဟံၣ်ဘၣ်တဟံၣ်လၢ ပဟီၣ်ကဝီၤပူၤအခါ မ့ၢ်ဝဲပအိးဟိထီၣ်န့ၢ်ပှၤဂၤအကျဲ ဒ်သိးအကနၢ်ဟူဘၣ် ဘီမုၢ်တၢ်သးခုကစီၣ် (ကွၢ်လံာ်အဆၢ ၁၄)
ကျဲလၢပကအိၣ်ဒီးတၢ်သးခု
၁၅. ပှၤမ့ၢ်တပာ်လုၢ်ပာ်ပှ့ၤ ပတၢ်ဟ့ၣ်သနာ်က့ ဘၣ်မနုၤအဃိ ပကြၢးဟ့ၣ်တၢ်ဒံးလဲၣ်, တဲဖျါထီၣ်တက့ၢ်.
၁၅ ယ့ၣ်ၡူးအဲၣ်ဒိးလၢ ပကသးအိၣ်ဟ့ၣ်တၢ် မ့ၢ်လၢ ပမ့ၢ်ဟ့ၣ်တၢ်န့ၣ် ပကသးခုအဃိလီၤ. ပမ့ၢ်သးအိၣ်ဟ့ၣ်တၢ်န့ၣ် ပှၤအါဂၤ ကသးအိၣ်ဟ့ၣ်ဆၢက့ၤပှၤစ့ၢ်ကီးလီၤ. လၢတၢ်န့ၣ်အဃိ အဝဲဟ့ၣ်ဂံၢ်ဟ့ၣ်ဘါပှၤလၢ “ဟ့ၣ်တၢ်တက့ၢ်. ဒီးတၢ်ကဟ့ၣ်တၢ်လၢသုလီၤ. ပှၤကဃီၣ်ကစီဒီ, ကဆီၣ်လီၤဃာ်, ကဂံၤဂုၤ, ဒီးကမၤပှဲၤစိတရိၤ, ဒီးကဟ့ၣ်လီၤလၢ သုသးနါပှၢ်လီၤ. အဂ့ၢ်ဒ်အံၤ, ဒ်သုဃီၣ်ဟ့ၣ်တၢ်အသိးန့ၣ်, တၢ်ကဃီၣ်ဟ့ၣ်က့ၤသုလီၤ.” (လူၤကၣ် ၆:၃၈) နမ့ၢ်သးအိၣ်ဟ့ၣ်တၢ်သနာ်က့ တမ့ၢ်လၢပှၤကိးဂၤဒဲး ကပာ်လုၢ်ပာ်ပှ့ၤနတၢ်ဟ့ၣ်ဘၣ်. ဘၣ်ဆၣ် အဝဲသ့ၣ်မ့ၢ်တပာ်လုၢ်ပာ်ပှ့ၤဝဲသနာ်က့ ဆဲးဟ့ၣ်တၢ်တက့ၢ်. ခီဖျိနတၢ်မၤဂ့ၤတခါအဃိ ကကဲဘျုးလၢပှၤဂၤအဂီၢ်ထဲလဲၣ်န့ၣ် နတသ့ၣ်ညါဘၣ်.
၁၆. ပကြၢးသးအိၣ်ဟ့ၣ်တၢ်ဆူ မတၤတဖၣ်လဲၣ် ဒီးဘၣ်မနုၤအဃိလဲၣ်.
၁၆ ပှၤလၢအသးအိၣ်ဟ့ၣ်တၢ်န့ၣ် တမုၢ်လၢ်ဝဲလၢ ကဒိးန့ၢ်ဘၣ်က့ၤ တၢ်တမံၤမံၤဘၣ်. ယ့ၣ်ၡူးတဲဝဲလၢ “တုၤနမၤတၢ်အီၣ်တၢ်အီဒီး, ကိးပှၤအဖှီၣ်အယာ်, ပှၤအစုဟးဂီၤ, ပှၤအခီၣ်ဟးဂီၤ, ပှၤအမဲာ်ဘျီၣ်သ့ၣ်တဖၣ်န့ၣ်တက့ၢ်. ဒီးနကဘၣ်တၢ်ဆိၣ်ဂ့ၤလီၤ. အဂ့ၢ်ဒ်အံၤ, အဝဲသ့ၣ်တဖၣ်န့ၣ် ဟ့ၣ်ကၣ်နၤတသ့ဘၣ်. အဂ့ၢ်ဒ်အံၤ, တုၤပှၤအတီအလိၤဂဲၤဆၢထၢၣ်က့ၤဒီး, တၢ်ကဟ့ၣ်ကၣ်နၤလီၤ.” (လူၤကၣ် ၁၄:၁၃, ၁၄) လံာ်စီဆှံတဲဝဲလၢ “ပှၤလၢအဟံးစုကွၢ်မဲာ်တၢ်န့ၣ် ကဘၣ်တၢ်ဆိၣ်ဂ့ၤလီၤ.” ဒီး “ပှၤလၢအမၤပှၤဖှီၣ်ဖိယာ်ဖိ ဒီးတၢ်ကူၣ်သ့န့ၣ် ဘၣ်ဆိၣ်ဂ့ၤဝဲလီၤ.” (ကတိၤဒိ ၂၂:၉; စံးထီၣ်ပတြၢၤ ၄၁:၁) ပကြၢးဟ့ၣ်တၢ် ခီဖျိလၢ ပအဲၣ်ဒိးမၤစၢၤပှၤဂၤအဃိလီၤ.
၁၇. ပဟ့ၣ်မၤစၢၤတၢ်သ့လၢ ကျဲဒ်လဲၣ်.
၁၇ ဖဲစီၤပီလူး ယၢၤထီၣ်ဝဲ ယ့ၣ်ၡူးအတၢ်ကတိၤလၢအမ့ၢ် “ဟ့ၣ်တၢ်န့ၣ်ဘၣ် တၢ်ဆိၣ်ဂ့ၤအါန့ၢ် ဒိးန့ၢ်တၢ်တက့ၢ်” အခါ အဝဲတအဲၣ်ဒိးတဲဝဲထဲ ပဘၣ်ဟ့ၣ်တၢ်ထူးတၢ်တီၤတခါဧိၤဘၣ်. အဲၣ်ဒိးတဲစ့ၢ်ကီးဝဲလၢ ပကဘၣ် ဟ့ၣ်ဂံၢ်ဟ့ၣ်ပှၤဂၤ, ဟ့ၣ်ကူၣ်အဝဲသ့ၣ်လၢ လံာ်စီဆှံအပူၤ ဒီးမၤစၢၤပှၤလၢ အလိၣ်ဘၣ်တၢ်မၤစၢၤတဖၣ်န့ၣ်လီၤ. (မၤတၢ် ၂၀:၃၁-၃၅) စီၤပီလူးအတၢ်ကတိၤ ဒီးတၢ်လၢအမၤဝဲတဖၣ်န့ၣ် သိၣ်လိပှၤလၢ ပကဘၣ်သးအိၣ်ဟ့ၣ်လီၤ ပတၢ်ဆၢကတီၢ်, တၢ်ဂံၢ်တၢ်ဘါ, တၢ်ကဟုကယာ် ဒီးတၢ်အဲၣ်တၢ်ကွံန့ၣ် မ့ၢ်တၢ်လၢအရ့ဒိၣ်လီၤ.
၁၈. ဘၣ်ဃးဒီး တၢ်သးအိၣ်ဟ့ၣ်တၢ်န့ၣ် ပှၤဃုသ့ၣ်ညါတၢ်ဖိအါဂၤ တဲဝဲဒ်လဲၣ်.
၁၈ ပှၤလၢအဃုသ့ၣ်ညါ ပှၤဟီၣ်ခိၣ်ဖိ အတၢ်ပာ်သူၣ်ပာ်သးတဖၣ် ထံၣ်ဘၣ်ဝဲလၢ ပမ့ၢ်ဟ့ၣ်တၢ်န့ၣ် ကမၤသးခုပှၤလီၤ. တၢ်မၤလိတခါ ပာ်ဖျါထီၣ်ဝဲလၢ ပှၤအါဂၤန့ၣ်ဖဲအဝဲသ့ၣ်မၤဂ့ၤတၢ်လၢ ပှၤဂၤအဖီခိၣ်အခါ အဝဲသ့ၣ်သးခုဒိၣ်မးလီၤ. ဒီးပှၤလၢအဃုသ့ၣ်ညါတၢ်တဖၣ် တဲဝဲလၢ ပမ့ၢ်မၤစၢၤပှၤဂၤန့ၣ် ပတူၢ်ဘၣ်လၢ ပတၢ်အိၣ်မူန့ၣ်ကဲဘျုးဝဲ ဒီးပှဲၤဒီးတၢ်သးခုလီၤ. ဒီးပှၤဃုသ့ၣ်ညါတၢ်တဖၣ် ဟ့ၣ်ကူၣ်ဝဲလၢ ပှၤဟီၣ်ခိၣ်ဖိတဖၣ် ဒ်သိးအတၢ်အိၣ်ဆူၣ်အိၣ်ချ့ကဂ့ၤထီၣ် ဒီးအတၢ်သးခုကအါထီၣ်အဂီၢ် အဝဲသ့ၣ်ကဘၣ်မၤ မုာ်သးမၤကလီတၢ်လီၤ. ထီဘိန့ၣ် ပပၢ်ယဟိဝၤယွၤ လၢအမ့ၢ်တၢ်ဘၣ်တ့ကစၢ် လၢအပှဲၤဒီး တၢ်အဲၣ်တၢ်ကွံန့ၣ် တဲပာ်စၢၤဝဲလၢ ပမ့ၢ်ဟ့ၣ်တၢ်န့ၣ် ပကဒိးန့ၢ်ဘၣ်တၢ်သးခုလီၤ. လၢတၢ်န့ၣ်အဃိ ဖဲပနၢ်ဟူဘၣ် ပှၤကူၣ်ဘၣ်ကူၣ်သ့တဖၣ်အံၤ အတၢ်ကတိၤအခါ တမ့ၢ်တၢ်လၢအလီၤကမၢကမၣ်လၢ ပဂီၢ်ဘၣ်.—၂ တံၤမသ့း ၃:၁၆, ၁၇.
သးအိၣ်ဟ့ၣ်တၢ်ထီဘိတက့ၢ်
၁၉, ၂၀. ဘၣ်မနုၤအဃိ နသးအိၣ်ဟ့ၣ်တၢ်လဲၣ်.
၁၉ ပှၤလၢပခိၣ်ပဃၢၤတဖၣ် ကွၢ်တၢ်ထဲအနီၢ်ကစၢ်အဂီၢ်အဃိ ပကဟ့ၣ်တၢ်လၢ တၢ်သူၣ်အိၣ်သးအိၣ်အဂီၢ် ကကီဝဲလီၤ. ဘၣ်ဆၣ်ယ့ၣ်ၡူးဒုးသ့ၣ်နီၣ်ထီၣ်ပှၤလၢ တၢ်မၤလိာ်လၢ အဒိၣ်ကတၢၢ် ခံထံၣ်န့ၣ် မ့ၢ်ဝဲ ပကဘၣ်အဲၣ် ယဟိဝၤယွၤလၢ ပသူၣ်ကံၢ်သးလဲ, ပသးဒီဖျၢၣ်, ဒီးပတၢ်ကူၣ်တၢ်ဆးတုၤအလၢာ်, ဒီးပဂံၢ်ပဘါခဲလၢာ် ဒီးပကဘၣ်အဲၣ်ပှၤလၢပဃၢၤ ဒ်ပအဲၣ်လီၤပနီၢ်ကစၢ်အသးအသိးလီၤ. (မၢ်ကူး ၁၂:၂၈-၃၁) ဒီးလၢတၢ်မၤလိအံၤအပူၤ ပမၤလိဘၣ်လၢ ပှၤလၢအအဲၣ်ယဟိဝၤယွၤန့ၣ် ကွၢ်လိမၤဒိးအီၤလီၤ. ယဟိဝၤယွၤဒီးယ့ၣ်ၡူးန့ၣ် သးအိၣ်ဟ့ၣ်တၢ်လီၤ. ဒီးအဝဲသ့ၣ်သ့ၣ်ညါဝဲလၢ ပမ့ၢ်သးအိၣ်ဟ့ၣ်တၢ်န့ၣ် ပကဒိးန့ၢ်ဘၣ်တၢ်သးခုနီၢ်ကီၢ်လီၤ. လၢတၢ်န့ၣ်အဃိ အဝဲသ့ၣ်ဟ့ၣ်ဂံၢ်ဟ့ၣ်ဘါပှၤလၢ ပကကွၢ်လိမၤဒိးအီၤလီၤ. ပမ့ၢ်သးအိၣ်ဟ့ၣ်တၢ်လၢ ကစၢ်ယွၤ ဒီးပှၤလၢပဃၢၤတဖၣ်အဂီၢ်န့ၣ် မ့ၢ်ဝဲပမၤလၤကပီၤ ယဟိဝၤယွၤအဃိ ကကဲဘျုးလၢ ပနီၢ်ကစၢ် ဒီးပှၤဂၤအဂီၢ်လီၤ.
၂၀ ဘၣ်သ့ၣ်သ့ၣ် နမ့ၢ်ပှၤလၢ အသးအိၣ်ဟ့ၣ်တၢ် ဒီးမၤစၢၤပှၤဂၤ လီၤဆီဒၣ်တၢ် ဒီပုၢ်ဝဲၢ်မုၣ်ခွါတဖၣ်လီၤ. (ကလၤတံ ၆:၁၀) နမ့ၢ်ဆဲးမၤဒ်န့ၣ်န့ၣ် ပှၤဂၤကစံးဘျုးနၤ ဒီးကအဲၣ်နၤ ဒီးနကသးခုလီၤ. လံာ်စီဆှံတဲဝဲလၢ “ပှၤလၢအဟ့ၣ်တၢ်ညီ ကဘီၣ်ထီၣ်ညီထီၣ်, ဒီးပှၤလၢအဖှိၣ်ထံန့ၣ် ကဒိးဖှိၣ်ထံအကစၢ်ဒၣ်ဝဲလီၤ.” (ကတိၤဒိ ၁၁:၂၅) လၢပတၢ်အိၣ်မူအပူၤ မ့ၢ်ဂ့ၤ လၢပတၢ်စံၣ်တဲၤတဲလီၤတၢ်မၤအပူၤမ့ၢ်ဂ့ၤ ပပာ်ဖျါထီၣ် တၢ်အဲၣ်တၢ်ကွံ ဒီးပဟ့ၣ်တၢ်လၢတၢ်သးအိၣ်အပူၤ သ့လၢကျဲအါဘိလီၤ. တၢ်မၤလိလၢခံတခါန့ၣ် ပကတဲသကိး ကျဲတနီၤလၢ ပဟ့ၣ်တၢ်လၢ တၢ်သးအိၣ်အပူၤသ့ဝဲန့ၣ်လီၤ.
a ပှၤမံၤ ဘၣ်တၢ်ဆီတလဲအီၤလီၤ.