လိာ်အမါ ကွၢ်တရံးက့ၤအလီၢ်ခံ အဂ့ၢ်

လိာ်ဒီးအပှၤဟံၣ်ဖိဃီဖိန့ၣ် အိၣ်ဒီးအၤဘြၤဟၣ်လၢ ကီၢ်ကနၤဧၣ်ဒ်သိးသိးန့ၣ်လီၤ. ဘၣ်မုၢ်တနံၤန့ၣ် အၤဘြၤဟၣ်တဲဘၣ်လိာ်လၢ, ‘ပဆၣ်ဖိကီၢ်ဖိတဖၣ်အဂီၢ် တၢ်လီၢ်အံၤန့ၣ်အံၣ်ကဲၣ်ဆိးလီၤ. မ်ပအိၣ်လီၤဖးတက့ၢ်. နမ့ၢ်လဲၤလၢကျဲတဘိဒီး, ယကလဲၤလၢကျဲအဂၤတဘိန့ၣ်လီၤ.’

လၢတၢ်န့ၣ်အဃိ လိာ်ကွၢ်စိဃီၤဝဲတၢ်လီၢ်ဝးဝးဒီး ထံၣ်ဝဲဒၣ်တၢ်လီၢ်တကဝီၤ လၢအအိၣ်ဒီးထံ, ဒီးနီၣ်ဂ့ၤဂ့ၤတဖၣ်လၢ ဆၣ်ဖိကီၢ်ဖိတဖၣ်အဂီၢ်န့ၣ်လီၤ. တၢ်လီၢ်အဝဲန့ၣ်မ့ၢ် ယၣ်ဒ့ၣ်ကီၢ်ဆၣ်လီၤ. ဒ်န့ၣ်အဃိ လိာ်ဒီးအပှၤဟံၣ်ဖိဃီဖိ ဒီးအဆၣ်ဖိကီၢ်ဖိတဖၣ် သုးအသးဖဲန့ၣ်လီၤ. လၢခံန့ၣ် သူၣ်လီၤဝဲသ့ၣ် အလီၢ်ဖဲဝ့ၢ်စဒိၣ်န့ၣ်လီၤ.

ပှၤစဒိၣ်ဖိတဖၣ် အၢဒိၣ်မးန့ၣ်လီၤ. လၢတၢ်န့ၣ်အဃိ, လိာ်သးအုးဝဲဒၣ်န့ၣ်လီၤ. အဝဲမ့ၢ်ပှၤဂ့ၤတမ့ၢ်ဘၣ်ဧါ. ယွၤစ့ၢ်ကီးအသးတမုာ်ဘၣ်. လၢခံန့ၣ် ယွၤဆှၢလီၤမူခိၣ်ကလူးခံဂၤ ဆူအအိၣ် ဒ်သိးကဟ့ၣ်ပလီၢ်အသးလၢ ယွၤကမၤဟးဂီၤကွံာ်ဝ့ၢ်စဒိၣ် ဒီးဝ့ၢ်အိၣ်လၢအဃိၣ်အဃၢၤ ဂမိရၤ, လၢအဝဲသ့ၣ်အတၢ်အၢတၢ်သီအဃိန့ၣ်လီၤ.

မူခိၣ်ကလူးတဖၣ်စံးဘၣ်လိာ်, ‘ဆၢထၢၣ်ချ့ချ့, ကိးနမါဒီးနဖိမုၣ်ခံဂၤဝံၤ ဃ့ၢ်ဟးထီၣ်လၢ တၢ်လီၢ်အံၤတက့ၢ်.’ လိာ်ဒီးအပှၤဟံၣ်ဖိဃီဖိတဖၣ်န့ၣ် မၤဃၢမၤယံာ်အသးန့ၣ်လီၤ. တၢ်န့ၣ်အဃိ မူခိၣ်ကလူးတဖၣ် ထုးအဝဲသ့ၣ်အစုဒီး ကိးဟးထီၣ်အီၤဆူဝ့ၢ်ချၢန့ၣ်လီၤ. ဝံၤဒီး မူခိၣ်ကလူးတဂၤစံးဝဲဒၣ် ‘ဃ့ၢ်ပူၤဖျဲးလၢသုသးသမူအဂီၢ်တက့ၢ်. ကွၢ်ကဒါက့ၤသုလီၢ်ခံတဂ့ၤ. ဃ့ၢ်ဆူကစၢၢ်ခိၣ်. ဒ်န့ၣ်မးသုသးသမူကပူၤဖျဲးဝဲန့ၣ်လီၤ.’

လိာ်ဒီးအဖိမုၣ်တဖၣ် ဒိကနၣ်တၢ်ကတိၤဒီး ဃ့ၢ်ဟးထီၣ်လၢစဒိၣ်န့ၣ်လီၤ. တအိၣ်ဘှံးဝဲတစိၢ်ဖိဒၣ်လဲာ်ဘၣ်. ဒီးတကွၢ်ကဒါက့ၤအလီၢ်ခံဘၣ်. ဘၣ်ဆၣ်သနာ်က့ မ့မ့ၢ်လိာ်အမါတခီ တဒိကနၣ်တၢ်ကတိၤဘၣ်. တုၤအယံၤစီၤစုၤထီၣ်ဒိၣ်တစဲးဒီးဝ့ၢ်စဒိၣ်အခါ အိၣ်ကတီၢ်ဝဲဒီး ကွၢ်တရံးက့ၤဝဲလီၤ. ထဲန့ၣ်ဒီးကဲထီၣ်ဝဲဒၣ် အံသၣ်ထူၣ်န့ၣ်လီၤသၢၣ်. လၢတၢ်ဂီၤပူၤန့ၣ် သုထံၣ်အီၤဧါ.

လၢတၢ်မၤအသးအံၤအပူၤ ပမၤန့ၢ်တၢ်မၤလိအဂ့ၤသ့တခါလီၤ. ယွၤအုၣ်က့ၤခီၣ်က့ၤ ပှၤလၢအဒိကနၣ် အတၢ်ကတိၤန့ၣ်လီၤ. မ့မ့ၢ်ပှၤလၢ တဒိကနၣ်အတၢ်ကတိၤတဖၣ်န့ၣ်တခီ အသးသမူကတုၤတၢ်ဟးဂီၤန့ၣ်လီၤ.