တၢ်မၤလိ ၁၀
သ့ၣ်နီၣ်ထီၣ်က့ၤ စီၤလိာ်အမါ
စီၤလိာ်အိၣ်တပူၤဃီဒီး အဖါတံၢ်စီၤအၤဘြၤဟၣ်လၢ ကီၢ်ကနၤဧၣ်အပူၤ. မ့ၢ်လၢစီၤအၤဘြၤဟၣ် ဒီးစီၤလိာ် အိၣ်ဒီးဆၣ်ဖိကီၢ်ဖိ အါအါဂီၢ်ဂီၢ်အဃိ တၢ်လီၢ်တလၢ လၢအဝဲသ့ၣ်အဂီၢ်ဘၣ်. အဃိ စီၤအၤဘြၤဟၣ် တဲဘၣ်စီၤလိာ်လၢ ‘ပအိၣ်တၢ်လီၢ်တပူၤဃီ တသ့လၢၤဘၣ်. ဃုထၢတၢ်လီၢ်တတီၤလၢ နအဲၣ်ဒိးအိၣ် ဒီးယကဃုထၢတၢ်လီၢ်လၢ အဂၤတတီၤ.’ ခီဖျိလၢ စီၤအၤဘြၤဟၣ်မၤဝဲဒ်အံၤ အဃိ အဝဲပာ်ဖျါထီၣ်လၢ အတမ့ၢ်ပှၤလၢ အအဲၣ်လီၤထဲ အနီၢ်ကစၢ်အသးဘၣ်.
စီၤလိာ်ထံၣ်ဘၣ်ဝဲ တၢ်လီၢ်လၢ အဂ့ၤတတီၤ လၢအအိၣ်ဘူးဒီးဝ့ၢ်စဒိၣ်. တၢ်လီၢ်အဝဲန့ၣ် အိၣ်ဒီးနီၣ်လါဟ့ ဒီးထံလၢလၢပှဲၤပှဲၤ အဃိ စီၤလိာ်ဃုထၢဝဲ တၢ်လီၢ်တတီၤန့ၣ်. အဝဲဒီးအဟံၣ်ဖိဃီဖိ လဲၤအိၣ်ဝဲဖဲ တၢ်လီၢ်ဝဲန့ၣ်.
ပှၤအိၣ်လၢဝ့ၢ်စဒိၣ် ဒီးဝ့ၢ်ဂမိရၤန့ၣ် မ့ၢ်ပှၤလၢ အအၢအသီဒိၣ်မး. မ့ၢ်လၢ အဝဲသ့ၣ်မၤတၢ်အၢအၢသီသီအဃိ ယဟိဝၤယွၤ ဆၢတဲာ်လီၤအသးလၢ ကမၤဟးဂီၤကွံာ်ဝဲ ဝ့ၢ်တဖၣ်အံၤ. ဘၣ်ဆၣ် ကစၢ်ယွၤအဲၣ်ဒိးမၤပူၤဖျဲး စီၤလိာ်ဒီးအဟံၣ်ဖိဃီဖိ အဃိ ကစၢ်ယွၤ ဆှၢလီၤမူခိၣ်ကလူးခံဂၤ ဒ်သိး ကဟ့ၣ်ပလီၢ် အဝဲသ့ၣ်. မူခိၣ်ကလူး တဲဘၣ်အဝဲသ့ၣ်လၢ ‘ဟးထီၣ်လၢဝ့ၢ်ပူၤချ့ချ့, ယဟိဝၤယွၤကမၤဟးဂီၤ ဝ့ၢ်အံၤလီၤ.’
စီၤလိာ် တဟးထီၣ်လၢ ဝ့ၢ်ပူၤတဘျီဃီဘၣ်. အဝဲ မၤယံာ်မၤနီၢ်အသး. အဃိ မူခိၣ်ကလူးဖီၣ်ဝဲ စီၤလိာ်, အမါ ဒီးအဖိမုၣ်ခံဂၤအစု ဒီးကရီဆှၢထီၣ် အဝဲသ့ၣ်ဆူဝ့ၢ်ချၢ. မူခိၣ်ကလူး တဲဘၣ်အဝဲသ့ၣ်လၢ ‘ဃ့ၢ်ပူၤဖျဲးလၢ သုသးသမူအဂီၢ် ဒီးတဘၣ်ကွၢ်ကဒါက့ၤ လီၢ်ခံတဂ့ၤ. သုမ့ၢ်ကွၢ်ကဒါက့ၤ သုလီၢ်ခံန့ၣ် သုကသံ.’
ဖဲအဝဲသ့ၣ် လဲၤတုၤလၢ ဝ့ၢ်စိၤဧၢ်အခါ ယဟိဝၤယွၤ ဒုးလီၤဝဲ ကးဒီးမ့ၣ်အူ လၢဝ့ၢ်စဒိၣ်ဒီးဂမိရၤအဖီခိၣ်. ဝ့ၢ်ခံဖျၢၣ်အံၤ ဘၣ်တၢ်မၤဟးဂီၤကွံာ်အီၤ ခဲလၢာ်. စီၤလိာ်အမါ တဒိကနၣ် ယဟိဝၤယွၤအကလုၢ် ဒီးဖဲအဝဲကွၢ်ကဒါက့ၤဆူ အလီၢ်ခံအခါ အဝဲကဲထီၣ်ဝဲ အံသၣ်ထူၣ်. ဘၣ်ဆၣ် စီၤလိာ်ဒီးအဖိမုၣ်ခံဂၤန့ၣ် ပူၤဖျဲးဝဲ မ့ၢ်လၢအဝဲသ့ၣ် ဒိကနၣ် ယဟိဝၤယွၤအကလုၢ် အဃိ. မ့ၢ်လၢ စီၤလိာ်အမါ တဒိကနၣ်တၢ်ဘၣ် အဃိ စီၤလိာ်ဒီးအဖိမုၣ် ကသးအုးဝဲဒိၣ်မး. ဘၣ်ဆၣ် ခီဖျိလၢအဝဲသ့ၣ်ဒိကနၣ်ဝဲ ယဟိဝၤယွၤ အတၢ်ဟံးစုနဲၣ်ကျဲ အဃိ အဝဲသ့ၣ်သးခုဝဲ.
“သ့ၣ်နီၣ်ထီၣ်က့ၤ စီၤလိာ်အမါ.”—လူၤကၣ် ၁၇:၃၂