အိၣ်ခိးဝဲသ့ၣ်လၢဝ့ၢ်ယရူၤၡလ့ၣ် အဂ့ၢ်

ပှၤတဖၣ်လၢအဖျါလၢ တၢ်ဂီၤပူၤအံၤန့ၣ် မ့ၢ်ဝဲပှၤပိာ်ခရံာ်အခံတဖၣ်လီၤ. အဝဲသ့ၣ်ဒိကနၣ်ယ့ၣ်ၡူးအတၢ်ကတိၤဒီး အိၣ်ဝဲဆိးဝဲသ့ၣ်လၢ ဝ့ၢ်ယရူၤၡလ့ၣ်အပူၤန့ၣ်လီၤ. ဖဲအဝဲသ့ၣ်ခိးဝဲဒ်အံၤအခါ တၢ်ကလုၢ်တခါ လုာ်ဘၢကွံာ်ဟံၣ်ဒီဖျၢၣ်ညါန့ၣ်လီၤ. တၢ်အံၤ လီၤဂာ်လၢ ကလံၤမုၢ်လီၤန့ၣ်လီၤ. ဒီးမ့ၣ်အူလၣ်လၢ အဒ်သိးဒီးတၢ်အပျ့ၤတဖၣ် ဟဲလီၤတုၤလၢ အပျဲၢ်တဂၤစုာ်စုာ်အဖီခိၣ်န့ၣ်လီၤ. လၢအဝဲသ့ၣ်တဂၤစုာ်စုာ်အဖီခိၣ်န့ၣ် မ့ၢ်သုထံၣ် မ့ၣ်အူလၣ်ဧါ. တၢ်အံၤ အခီပညီမ့ၢ်ဒ်လဲၣ်.

တၢ်န့ၣ် မ့ၢ်တၢ်လီၤလးတခါသၢၣ်. ယ့ၣ်ၡူးန့ၣ် က့ၤတုၤကဒါဆူမူခိၣ် ဖဲအပၢ်အိၣ်အလီၢ်, ဒီးလူလီၤဂၢ်လီၤဝဲဒၣ် ယွၤအသးစီဆှံ ဆူပှၤပိာ်အခံတဖၣ်အလိၤန့ၣ်လီၤ. သးစီဆှံဝဲအံၤ မၤစၢၤအဝဲသ့ၣ်လၢ ကမၤမနုၤအဂီၢ်လဲၣ်န့ၣ် သုသ့ၣ်ညါစ့ၢ်ကီးဧါ. အဝဲသ့ၣ်ခဲလၢာ် ကတိၤထီၣ် တၢ်ကတိၤအကျိာ် အကလုာ်ကလုာ်န့ၣ်လီၤ.

ပှၤအါဒံအါဂၤလၢ ဝ့ၢ်ယရူၤၡလ့ၣ်ပူၤတဖၣ် နၢ်ဟူဝဲသ့ၣ်တၢ်သီၣ်တၢ်သဲ ဒ်သိးကလံၤမုၢ်ဖးဒိၣ်အူဖှီးတၢ်ဒီး ဟဲကွၢ်ဝဲသ့ၣ်တၢ်မနုၤမၤအသးလဲၣ်န့ၣ်လီၤ. လၢပှၤတဖၣ်န့ၣ်အကျါန့ၣ် ပၣ်ဃုာ်ဒီး ပှၤကလုာ်အဂၤတဖၣ် လၢအဟဲထီၣ်ပှၤအံၣ်စရ့လးဖိအဘူၣ်လဲၤကပာ် စ့ၢ်ကီးန့ၣ်လီၤ. ဝ့ၢ်အံၤအပှၤတမှံၤတဖၣ် ကမၢကမၢ်ဘၣ်ဝဲသ့ၣ်လီၤ. နၢ်ဟူဘၣ်ဝဲသ့ၣ် ယ့ၣ်ၡူးအပျဲၢ်အဘီၣ်တဖၣ် ကတိၤ တၢ်လီၤလးတဖၣ်လၢ ယွၤမၤတ့ၢ်အဂ့ၢ် လၢအပှၤကလုာ်ဒၣ်ဝဲအတၢ်ကတိၤ အဃိန့ၣ်လီၤ.

တမှံၤတဖၣ်တခီစံးဝဲသ့ၣ်လၢ ‘ပှၤတဖၣ်အံၤ, မ့ၢ်ထဲပှၤကၤလံၤလါဖိသ့ၣ်တဖၣ်လီၤ. ကတိၤဝဲသ့ၣ်တၢ်လၢ ပထံပကီၢ်အတၢ်ကတိၤတဖၣ်သ့ဒ်လဲၣ်’ န့ၣ်လီၤ.

အဃိဒီး, ပ့းတရူး ဂဲၤဆၢထၢၣ်ဒီး ကတိၤနၢ်ပၢၢ် အဝဲသ့ၣ်န့ၣ်လီၤ. ပှၤတဖၣ်မၤသံဝဲယ့ၣ်ၡူးဒ်လဲၣ်အဂ့ၢ်, ယဟိဝၤမၤမူထီၣ်က့ၤအီၤဒ်လဲၣ်အဂ့ၢ်တဖၣ်န့ၣ် ကတိၤကျိးထံန့ၢ်ဝဲလၢ အကလုၢ်ဖးဒိၣ်န့ၣ်လီၤ. ‘မ့မ့ၢ်ခဲအံၤ, ယ့ၣ်ၡူးန့ၣ်က့ၤတုၤဆူမူခိၣ်လံ ဒီးအိၣ်လၢယွၤအစုထွဲန့ၣ်လီၤ. ဒီးဒ်အစံးပာ်ဝဲအသိးန့ၣ် လူလီၤ ဂၢ်လီၤဝဲဒၣ် သးစီဆှံန့ၣ်လီၤ. လၢတၢ်အံၤအဃိ သုထံၣ်ဘၣ် တၢ်လီၤလးဒ်အံၤအသိးသ့ၣ်တဖၣ်လီၤသၢၣ်.’

မ့ၢ်လၢပ့းတရူးစံးဘၣ်အဝဲသ့ၣ်ဒ်အံၤအဃိ, ပှၤတဖၣ်အံၤ အသးတမုာ်ဝဲသ့ၣ်ဒိၣ်မးလၢ တၢ်လၢယ့ၣ်ၡူးတူၢ်ဘၣ်တ့ၢ်တဖၣ်အဃိန့ၣ်လီၤ. ဒီးသံကွၢ်ဝဲသ့ၣ်လၢ ‘ပကဘၣ်မၤမနုၤလဲၣ်’ န့ၣ်လီၤ. ပ့းတရူးစံးဘၣ်အဝဲသ့ၣ်လၢ ‘သုကဘၣ်ဆီတလဲ သုတၢ်အိၣ်မူ ဒီးသုဘၣ်ဒိးဘျၢသုသးလၢထံန့ၣ်လီၤ.’ တုၤနုၤတစု တနံၤဃီန့ၣ် ပှၤ ၃,၀၀၀ ဒိးဘျၢအသးဝံၤ ဟဲကဲထီၣ် ပှၤပိာ်ယ့ၣ်ၡူးအခံန့ၣ်လီၤ.