တၢ်မၤလိ ၉၄
ယ့ၣ်ၡူးအပျဲၢ်အဘီၣ်တဖၣ် ဒိးန့ၢ်ဘၣ်သးစီဆှံ
ဖဲ ခ.န. ၃၃ ဘူၣ်ယဲၢ်ဆံအနံၤန့ၣ် ပှၤအိၣ်လၢတၢ်လီၢ်အါတီၤ ဟဲဝဲလၢ ဝ့ၢ်ယရူၤၡလ့ၣ်အပူၤ ဒ်သိး ကမၤဝဲဘူၣ်အံၤအဂီၢ်. ယ့ၣ်ၡူးအပျဲၢ်အဘီၣ်အဂၤ ၁၂၀ ဃၣ်ဃၣ် ပာ်ဖှိၣ်ထီၣ်အသးလၢ ဒၢးတဖျၢၣ်လၢဟံၣ်ဖီခိၣ် ဒီးဖဲန့ၣ်အဆၢကတီၢ် ယ့ၣ်ၡူးအပျဲၢ်အဘီၣ်တဖၣ် ဒိးန့ၢ်ဘၣ်ဝဲ သးစီဆှံ. ဝံၤဒီး တၢ်လီၤလး ဟဲကဲထီၣ်အသးတခါ. တၢ်လၢအလီၤဂာ်ဒ် မ့ၣ်အူလၣ် အိၣ်ဖျါထီၣ်လၢ ယ့ၣ်ၡူးအပျဲၢ်အဘီၣ် တဂၤစုာ်စုာ်အခိၣ်လိၤ. ဒီးအဝဲသ့ၣ်ခဲလၢာ် စးထီၣ်တဲဝဲ ကျိာ်လၢအဂၤ. တၢ်သီၣ်လီၤဝဲ သတူၢ်ကလာ်လၢမူခိၣ် ပှဲၤဟံၣ်ပူၤ ဒ်ကလံၤမုၢ် ဟဲသီၣ်ဝဲအသိး. တၢ်မၤအသးတဖၣ်အံၤ ကဲထီၣ်အသးဖဲ ယ့ၣ်ၡူးက့ၤထီၣ်ဆူမူခိၣ် အသီတဆံ ဝံၤအလီၢ်ခံ.
ပှၤတမှံၤလၢ ထံကီၢ်အဂၤတဖၣ်န့ၣ် ဟဲဝဲလၢ ဝ့ၢ်ယရူၤၡလ့ၣ်. ဖဲအဝဲသ့ၣ် နၢ်ဟူတၢ်ကလုၢ်သီၣ်အခါ အဝဲသ့ၣ် လဲၤဃ့ၢ်ဆူ ဟံၣ်တဖျၢၣ်န့ၣ် ဒ်သိးကထံၣ်ဝဲ တၢ်မနုၤကဲထီၣ်အသးလဲၣ်. ဖဲအဝဲသ့ၣ်နၢ်ဟူ ယ့ၣ်ၡူးအပျဲၢ်အဘီၣ်တဖၣ် ကတိၤတၢ်လၢ အဝဲသ့ၣ် အကျိာ်အခါ အဝဲသ့ၣ် ကမၢကမၣ်ဝဲဒိၣ်မး. အဝဲသ့ၣ်တဲဝဲလၢ ‘ပှၤသ့ၣ်တဖၣ်အံၤ အိၣ်ဟဲလၢကၤလံၤလါ ဘၣ်ဆၣ် အဝဲသ့ၣ်တဲပကျိာ်ဘၣ်ဒ်လဲၣ်.’
ဝံၤဒီး စီၤပ့းတရူး ဒီးတၢ်မၢဖိအဂၤတဖၣ် ဂဲၤဆၢထၢၣ်လၢ ကမျၢၢ်အမဲာ်ညါ. စီၤပ့းတရူး တဲနၢ်ပၢၢ် အဝဲသ့ၣ်လၢ ယ့ၣ်ၡူးန့ၣ် ဘၣ်တၢ်မၤသံအီၤဒ်လဲၣ် ဒီးယဟိဝၤယွၤ မၤသမူထီၣ်က့ၤအီၤ ဒ်လဲၣ်အဂ့ၢ်. ဒီးစီၤပ့းတရူး တဲဘၣ်အဝဲသ့ၣ်လၢ ‘ခဲအံၤ ယ့ၣ်ၡူးအိၣ်လၢမူခိၣ်, ဆ့ၣ်နီၤလၢ ကစၢ်ယွၤအစုထွဲတခီ ဒီးဟ့ၣ်လီၤပှၤသးစီဆှံ ဒ်အအၢၣ်လီၤပာ်ဝဲအသိး. အဃိ သုထံၣ်ဒီးနၢ်ဟူဘၣ် တၢ်လီၤလးတဖၣ်အံၤလီၤ.’
စီၤပ့းတရူး အတၢ်ကတိၤအံၤ ထုးန့ၢ် ပှၤဂီၢ်မုၢ်အသးဒိၣ်မး. အဝဲသ့ၣ်သံကွၢ် စီၤပ့းတရူးလၢ “ပကဘၣ်မၤဒ်လဲၣ်.” စီၤပ့းတရူး တဲဘၣ်အဝဲသ့ၣ်လၢ ‘ပီၢ်ယၢ်လီၤက့ၤသုသး ဒီးဒိးဘျၢထံလၢ ယ့ၣ်ၡူးခရံာ်အမံၤတက့ၢ်. ဒီးသုကဒိးန့ၢ်ဘၣ် တၢ်ဟ့ၣ်လၢအမ့ၢ် သးစီဆှံ.’ ဖဲတၢ်တနံၤန့ၣ် ပှၤအဂၤ ၃,၀၀၀ ဃၣ်ဃၣ် ဒိးဘျၢအသးလၢထံ. စးထီၣ်ဖဲန့ၣ်ဝံၤအလီၢ်ခံ ယ့ၣ်ၡူးအပျဲၢ်အဘီၣ်တဖၣ်လၢ ဝ့ၢ်ယရူၤၡလ့ၣ်အပူၤန့ၣ် အနီၣ်ဂံၢ်အါထီၣ်ဝဲ ချ့ဒိၣ်မး. ခီဖျိလၢ သးစီဆှံ အတၢ်မၤစၢၤအဃိ တၢ်မၢဖိတဖၣ် ဒုးအိၣ်ထီၣ်ဝဲ တၢ်အိၣ်ဖှိၣ်တဖၣ်. ဒီးတၢ်မၢဖိတဖၣ် သိၣ်လိ ယ့ၣ်ၡူးအပျဲၢ်အဘီၣ်တဖၣ် ကယဲၢ်တၢ်လၢ ယ့ၣ်ၡူး မၤလိာ်တ့ၢ်အဝဲသ့ၣ်.
“လၢပှၤဂၤအမဲာ်ညါ နမ့ၢ်အၢၣ်လီၤလၢ နထးခိၣ်လၢ ယ့ၣ်ၡူးမ့ၢ်ဝဲကစၢ် ဒီးလၢနသးပူၤ နမ့ၢ်နာ်လၢ ကစၢ်ယွၤ ဒုးဂဲၤဆၢထၢၣ်က့ၤအီၤလၢ တၢ်သံန့ၣ် နကဒိးန့ၢ်ဘၣ် တၢ်အုၣ်က့ၤခီၣ်က့ၤ.”—ရိမ့ၤ ၁၀:၉