တၢ်မၤလိ ၁၀
ဃုထံၣ်န့ၢ်တၢ်ဘါအမ့ၢ်အတီသ့ဒ်လဲၣ်အဂ့ၢ်
နသးမ့ၢ်အိၣ်လၢ နကကဲထီၣ်ယွၤအတံၤသကိးတဂၤန့ၣ် နကဘၣ်လူၤမၤသကိးတၢ်ဒီး တၢ်ဘါလၢအဘၣ်ယွၤအသးန့ၣ်လီၤ. ယ့ၣ်ၡူးစံးဝဲဒၣ်လၢ “ပှၤဘါတၢ် နီၢ်နီၢ်တဖၣ်” န့ၣ် ကဘၣ်ဘါယွၤဒ် “တၢ်မ့ၢ်တၢ်တီ” အိၣ်ဝဲအသိးန့ၣ်လီၤ. (ယိၤဟၣ် ၄:၂၃, ၂၄) တၢ်ဘူၣ်ထီၣ်ဘါထီၣ်ယွၤအကျဲတီကျဲဘၣ် အိၣ်ဒၣ်ထဲတဘိလီၤ. (အ့းဖ့းစူး ၄:၄-၆) တၢ်ဘူၣ်တၢ်ဘါအအမ့ၢ်အတီန့ၣ် ဆှၢပှၤဆူတၢ်မူအထူအယိာ်ဒီး တၢ်ဘူၣ်ကမၣ်ဘါကမၣ်န့ၣ် ဆှၢပှၤဆူတၢ်ဟးဂီၤလီၤ.—မးသဲ ၇:၁၃, ၁၄.
နသ့ၣ်ညါနီၤဖး တၢ်ဘူၣ်တၢ်ဘါအမ့ၢ်အတီသ့လၢ တၢ်ကွၢ်ထံကွၢ်ဆး ပှၤလၢအိၣ်မူဝဲဒ်တၢ်ဘါဝဲန့ၣ်အသိးတဖၣ်န့ၣ်လီၤ. ယဟိဝၤအံၤ မ့ၢ်ယွၤလၢအဂ့ၤဒိၣ်မးအဃိ ပှၤလၢအဘူၣ်ထီၣ်ဘါထီၣ်အီၤနီၢ်နီၢ်တဖၣ် ကဘၣ်မ့ၢ်ပှၤဂ့ၤတဖၣ်န့ၣ်လီၤ. ဒ်စူၢ်ဝံၣ်ထူၣ်လၢအဂ့ၤတထူၣ်န့ၣ် သၣ်ထီၣ်စူၢ်ဝံၣ်သၣ်လၢအဂ့ၤတဖၣ်အသိး တၢ်ဘူၣ်တၢ်ဘါအမ့ၢ်အတီစ့ၢ်ကီး မၤကဲထီၣ်ပှၤဂ့ၤတဖၣ်န့ၣ်လီၤ.—မးသဲ ၇:၁၅-၂၀.
ယဟိဝၤအတံၤသကိးတဖၣ်န့ၣ် ပာ်လ့ၢ်ပာ်ကါလံာ်စီဆှံ ဒိၣ်မးန့ၣ်လီၤ. အဝဲသ့ၣ် သ့ၣ်ညါလၢ လံာ်စီဆှံအံၤ ဟဲလၢယွၤအအိၣ်န့ၣ်လီၤ. အဝဲသ့ၣ်ဟ့ၣ်အခွဲးလၢ လံာ်စီဆှံအတၢ်ပာ်ဖျါထီၣ်တဖၣ် ကထုးစုနဲၣ်ကျဲအတၢ်အိၣ်မူ, ကဟ့ၣ်တၢ်အစၢလၢ အတၢ်ကီတၢ်ခဲတဖၣ်အဂီၢ် ဒီးကမၤစၢၤအီၤလၢ ကသ့ၣ်ညါနၢ်ပၢၢ်ကစၢ်ယွၤအဂ့ၢ် န့ၣ်လီၤ. (၂ တံၤမသ့း ၃:၁၆, ၁၇) အဝဲသ့ၣ် ဂုာ်ကျဲးစၢးအိၣ်မူဝဲ ဒ်အစံၣ်တဲၤတဲလီၤဝဲသ့ၣ်အသိးန့ၣ်လီၤ.
ယဟိဝၤအတံၤသကိးတဖၣ်န့ၣ် ပာ်ဖျါထီၣ်တၢ်အဲၣ်တၢ်ကွံ လၢတဂၤဒီးတဂၤအဘၢၣ်စၢၤန့ၣ်လီၤ. ယ့ၣ်ၡူးန့ၣ် ပာ်ဖျါထီၣ် အတၢ်အဲၣ်တၢ်ကွံ လၢပှၤတဖၣ်အလိၤ ခီဖျီလၢသိၣ်လိမၤယုၤန့ၣ်ပှၤ ယွၤအဂ့ၢ်အကျိၤ ဒီးမၤဘျါက့ၤန့ၢ်ပှၤဆူးပှၤဆါတဖၣ်န့ၣ်လီၤ. ပှၤလၢအအိၣ်မူ ဒ်တၢ်ဘုၣ်တၢ်ဘါအမ့ၢ်အတီတဖၣ်စ့ၢ်ကီး ပာ်ဖျါအတၢ်အဲၣ်တၢ်ကွံလၢပှၤဂၤအလိၤန့ၣ်လီၤ. ဒ်ယ့ၣ်ၡူးအသိး အဝဲသ့ၣ်တဆိကမိၣ်ဆံး ပှၤဖှီၣ်ဖိယာ်ဖိတဖၣ်, ဒီး ပှၤကလုာ်အဂၤတဖၣ်စ့ၢ်ကီးဘၣ်. ယ့ၣ်ၡူးစံးဝဲဒၣ် ပှၤကသ့ၣ်ညါအပျဲၢ်အဘီၣ်လၢ အဝဲသ့ၣ်အတၢ်အဲၣ်လိာ်အသးအဃိန့ၣ်လီၤ.—ယိၤဟၣ် ၁၃:၃၅.
ယွၤအတံၤသကိးတဖၣ်န့ၣ် မၤလၤမၤကပီၤယွၤအမံၤ လၢအမ့ၢ် ‘ယဟိဝၤ’ န့ၣ်လီၤ. ပှၤတဂၤဂၤလၢ တအဲၣ်ဒိးကိးဝဲသူဝဲနမံၤန့ၣ်, ကဲထီၣ်နတံၤသကိးလၢအတံၢ်နီၢ်ဒီးနၤ ကသ့စ့ၢ်ကီးဧါ? ကဲထီၣ်တသ့ဘၣ်. ပမ့ၢ်အိၣ်ဒီးပတံၤသကိးတဂၤန့ၣ် ပကသူအမံၤဒီး ပကစံးဘၣ်တဲဘၣ်ပှၤဂၤ ဘၣ်ဃးအတၢ်ဂ့ၤတၢ်ဝါတဖၣ် န့ၣ်လီၤ. လၢတၢ်န့ၣ်အဃိ ပှၤလၢသးအိၣ်ကဲထီၣ် ကစၢ်ယွၤအတံၤသကိးတဖၣ်န့ၣ် ကြၢးသူဝဲကစၢ်အမံၤ ဒီးကြၢးစံးဘၣ်တဲဘၣ်ပှၤဂၤ ကစၢ်အဂ့ၢ်န့ၣ်လီၤ. ယဟိဝၤအဲၣ်ဒိးဝဲလၢ ပကမၤဒ်န့ၣ်လီၤ.—မးသဲ ၆:၉; ရိမ့ၤ ၁၀:၁၃, ၁၄.
ယွၤအတံၤသကိးတဖၣ်န့ၣ် သိၣ်လိန့ၣ်ပှၤဂၤ ယွၤအဘီအမုၢ်အဂ့ၢ် ဒ်ကစၢ်ယ့ၣ်ၡူးအသိးန့ၣ်လီၤ. ယွၤအဘီအမုၢ်န့ၣ် မ့ၢ်မူခိၣ်အတၢ်ပၢတၢ်ပြး လၢကမၤကဲထီၣ်ဟီၣ်ခိၣ်အံၤပၤရဒံစူးန့ၣ်လီၤ. ယွၤအတံၤသကိးတဖၣ်န့ၣ် ရၤလီၤ တၢ်သးခုကစီၣ်ဘၣ်ဃးယွၤအဘီအမုၢ်အံၤ ဆူပှၤဂၤအိၣ်လီၤ.—မးသဲ ၂၄:၁၄.
ယဟိဝၤအပှၤအုၣ်အသးတဖၣ်အံၤ ဂုာ်ကျဲးစၢးဝဲသ့ၣ်လၢ ကကဲထီၣ်ယွၤအတံၤသကိးတဖၣ်န့ၣ်လီၤ. အဝဲသ့ၣ်န့ၣ် ပာ်လ့ၢ်ပာ်ကါလံာ်စီဆှံဒီး ပာ်ဖျါတၢ်အဲၣ်တၢ်ကွံ လၢတဂၤဒီးတဂၤအဘၢၣ်စၢၤလီၤ. ကစၢ်ယွၤအမံၤန့ၣ် အဝဲသ့ၣ်သူဝဲ ဒီးပာ်ဒိၣ်မၤလၤကပီၤဝဲ, ဒီးသိၣ်လိသီလိန့ၣ်ပှၤဂၤ ယွၤအဘီအမုၢ်အဂ့ၢ်န့ၣ်လီၤ. မုၢ်မဆါတနံၤအံၤ ယဟိဝၤအပှၤအုၣ်အသးတဖၣ် လၢဟီၣ်ခိၣ်ချၢအံၤန့ၣ် အိၣ်မူဝဲသ့ၣ် ဒ်တၢ်ဘူၣ်တၢ်ဘါအမ့ၢ်အတီအသိးလီၤ.