တၢ်မၤလိ ၁၀
နသ့ၣ်ညါနီၤဖး တၢ်ဘူၣ်တၢ်ဘါအမ့ၢ်အတီ ကသ့ဒ်လဲၣ်
၁. မ့ၢ်တၢ်ဘူၣ်တၢ်ဘါအမ့ၢ်အတီ အိၣ်ထဲတခါဧိၤလီၤဧါ.
“ပလီၢ်သုသးလၢ ဝံအဘျၣ်လၢအဟဲဆူသုအိၣ်. . . တက့ၢ်.”—မးသဲ ၇:၁၅.
ယ့ၣ်ၡူးသိၣ်လိဝဲ အပျဲၢ်အဘီၣ်တဖၣ်လၢ တၢ်ဘူၣ်တၢ်ဘါအမ့ၢ်အတီန့ၣ် အိၣ်ထဲတခါဧိၤလီၤ. တၢ်ဘူၣ်တၢ်ဘါအမ့ၢ်အတီတခါအံၤ လီၤဂာ်ဒီးကျဲတဘိလၢအဆှၢပှၤဆူ တၢ်မူအထူအယိာ်လီၤ. ယ့ၣ်ၡူးစံးဝဲလၢကျဲအံၤန့ၣ် “ပှၤလၢအထံၣ်န့ၢ်အီၤတဖၣ် အိၣ်စှၤဂၤ” လီၤ. (မးသဲ ၇:၁၄) ယွၤတူၢ်လိာ်ထဲဒၣ် တၢ်ဘူၣ်တၢ်ဘါလၢ ဒိးသန့ၤထီၣ်အသးလၢ အကလုၢ်ကထါ လံာ်စီဆှံအပူၤလီၤ. ပှၤအိၣ်လၢတၢ်ဘူၣ်တၢ်ဘါ အမ့ၢ်အတီအပူၤကိးဂၤဒဲးန့ၣ် အိၣ်ဃူအိၣ်ဖိးလၢ တၢ်နာ်တမံၤဃီအပူၤလီၤ.—ဖး ယိၤဟၣ် ၄:၂၃, ၂၄; ၁၄:၆; အ့းဖ့းစူး ၄:၄, ၅ တက့ၢ်.
ကွၢ်တၢ်ဂီၤမူလၢအမ့ၢ် မ့ၢ်ကစၢ်ယွၤ တူၢ်လိာ် တၢ်ဘူၣ်တၢ်ဘါခဲလၢာ်ဧါ
၂. ဘၣ်ဃးဒီး ခရံာ်ဖိလၢအကမၣ်တဖၣ်န့ၣ် ယ့ၣ်ၡူးစံးဝဲဒ်လဲၣ်.
“ပှၤတဖၣ်န့ၣ်စံးလီၤအသးလၢ သါသ့ၣ်ညါယွၤလီၤ. ဘၣ်ဆၣ်ဒီးသမၢအီၤလၢ အတၢ်ဖံးတၢ်မၤန့ၣ်လီၤ.”—တံတူး ၁:၁၆.
ယ့ၣ်ၡူးဟ့ၣ်ပလီၢ်တ့ၢ်ဝဲလၢ ဝံအဘျၣ်တဖၣ် ကမၤဟးဂီၤကွံာ်ဝဲ ခရံာ်ဖိတၢ်ဘူၣ်တၢ်ဘါ လၢအမ့ၢ်အတီလီၤ. ပမ့ၢ်ကွၢ်လၢအဝဲသ့ၣ်တၢ်အိၣ်ဖျါန့ၣ် လီၤဂာ်ဒ်သိးဒီး ခရံာ်ဖိလၢအမ့ၢ်အတီ ဒီးအဝဲသ့ၣ်စံးလီၤ အသးလၢအမ့ၢ်ခရံာ်ဖိလီၤ. ဘၣ်ဆၣ်အဝဲသ့ၣ်တမ့ၢ် ခရံာ်ဖိလၢအမ့ၢ်အတီဘၣ်န့ၣ် နသ့ၣ်ညါကသ့ဒ်လဲၣ်. ခရံာ်ဖိလၢအမ့ၢ်အတီန့ၣ် နသ့ၣ်ညါနီၤ ဖးအီၤသ့ခီဖျိလၢ အဝဲသ့ၣ်အတၢ်ဂ့ၤတၢ်ဝါဒီး အတၢ်ဖံးတၢ်မၤအကျိၤအကျဲန့ၣ်လီၤ.—ဖး မးသဲ ၇:၁၃-၂၃ တက့ၢ်.
၃. ပှၤအိၣ်လၢတၢ်ဘူၣ်တၢ်ဘါ အမ့ၢ်အတီအပူၤန့ၣ် နသ့ၣ်ညါနီၤဖးအီၤ ကသ့ဒ်လဲၣ်.
ဆိကမိၣ်ကွၢ် တၢ်ပနီၣ်ယဲၢ်မံၤအံၤတက့ၢ်.
ပှၤအိၣ်လၢတၢ်ဘူၣ်တၢ်ဘါ အမ့ၢ်အတီအပူၤန့ၣ် ပာ်ကဲဝဲလံာ်စီဆှံ ဒ်ယွၤအကလုၢ်ကထါအသိးလီၤ. အဝဲသ့ၣ်ကျဲးစၢး အိၣ်မူဝဲဒ်လံာ်စီဆှံတၢ်သိၣ်တၢ်သီအိၣ်ဝဲအသိးလီၤ. လၢတၢ်န့ၣ်အဃိ တၢ်ဘူၣ်တၢ်ဘါအမ့ၢ်အတီန့ၣ် လီၤဆီလိာ်အသးဒီးတၢ်ဘူၣ်တၢ်ဘါလၢ အဒိးသန့ၤထီၣ်အသးလၢ ပှၤဟီၣ်ခိၣ်ဖိအတၢ်ဆိကမိၣ်တဖၣ်လီၤ. (မးသဲ ၁၅:၇-၉) ပှၤအိၣ်လၢတၢ်ဘူၣ်တၢ်ဘါ အမ့ၢ်အတီအပူၤန့ၣ် တဲတမံၤမၤတမၠိတမ့ၢ်ဘၣ်.—ဖး ယိၤဟၣ် ၁၇:၁၇; ၂ တံၤမသ့း ၃:၁၆, ၁၇ တက့ၢ်.
ယ့ၣ်ၡူးအပျဲၢ်အဘီၣ် နီၢ်နီၢ်တဖၣ်န့ၣ် မၤလၤကပီၤ ယွၤအမံၤလၢအမ့ၢ်ယဟိဝၤလီၤ. ယ့ၣ်ၡူးမၤလၤကပီၤယွၤအမံၤခီဖျိ ဒုးသ့ၣ်ညါပှၤဂၤလၢ ကစၢ်အမံၤလီၤ. အဝဲမၤစၢၤပှၤကညီတဖၣ်လၢ ကသ့ၣ်ညါယွၤအဂ့ၢ်ဒီး သိၣ်လိအဝဲသ့ၣ်လၢ ကဃ့ဘါထုကဖၣ်လၢ ယွၤအမံၤကဘၣ် တၢ်ပာ်စီဆှံအီၤအဂီၢ်န့ၣ်လီၤ. (မးသဲ ၆:၉) ဖဲနအိၣ်အလီၢ်န့ၣ် တၢ်ဘူၣ်တၢ်ဘါလၢ အဒုးသ့ၣ်ညါပှၤဂၤလၢယွၤအမံၤန့ၣ် မ့ၢ်တၢ်ဘူၣ် တၢ်ဘါဖဲလဲၣ်တခါလဲၣ်. —ဖး ယိၤဟၣ် ၁၇:၂၆; ရိမ့ၤ ၁၀:၁၃, ၁၄ တက့ၢ်.
ခရံာ်ဖိလၢ အမ့ၢ်အတီတဖၣ်န့ၣ် စံၣ်တဲၤတဲလီၤဝဲ ယွၤအဘီအမုၢ်အဂ့ၢ်လီၤ. ကစၢ်ယွၤဆှၢလီၤ ယ့ၣ်ၡူးလၢ ကစံၣ်တဲၤတဲလီၤ ဘီမုၢ်တၢ်သးခုကစီၣ်အဂီၢ်လီၤ. ယွၤအဘီအမုၢ်န့ၣ် မ့ၢ်တၢ်မုၢ်လၢ်ထဲတမံၤဧိၤလၢ ပှၤဟီၣ်ခိၣ်ဖိအဂီၢ်လီၤ. ယ့ၣ်ၡူးတဲဝဲ ဘီမုၢ်အံၤအဂ့ၢ်တုၤလၢ အသံတစုလီၤ. (လူၤကၣ် ၄:၄၃; ၈:၁; ၂၃:၄၂, ၄၃) အဝဲစံးတ့ၢ်ဝဲလၢ အပျဲၢ်အဘီၣ်တဖၣ်န့ၣ် ကစံၣ်တဲၤတဲလီၤဝဲ ဘီမုၢ်အဂ့ၢ်လီၤ. ပှၤတဂၤဂၤ မ့ၢ်တဲဘၣ်နၤလၢယွၤအဘီအမုၢ်အဂ့ၢ်န့ၣ် အဝဲအတၢ်ဘူၣ်တၢ်ဘါ ကမ့ၢ်တၢ်ဘူၣ်တၢ်ဘါဖဲလဲၣ်တခါလဲၣ်.—ဖး မးသဲ ၂၄:၁၄ တက့ၢ်.
ယ့ၣ်ၡူးအပျဲၢ်အဘီၣ်တဖၣ်န့ၣ် တမၤဘၣ်ဃးအသးဒီး ဟီၣ်ခိၣ်အအၢအသီအံၤဘၣ်. အဝဲသ့ၣ်တပၣ်ဃုာ်လၢ ထံဂ့ၢ်ကီၢ်ဂ့ၢ် ဒီးတၢ်ပူထီၣ်တၢ်အကျါဘၣ်. (ယိၤဟၣ် ၁၇:၁၆; ၁၈:၃၆) အါန့ၢ်အန့ၣ် အဝဲသ့ၣ်တကွၢ်လိမၤဒိးဝဲ ဟီၣ်ခိၣ်အလုၢ်လၢ်ဒီး အတၢ်ပာ်သူၣ်ပာ်သးလၢ အလီၤဘၣ်ယိၣ်တဖၣ်ဘၣ်.—ဖး ယၤကိာ် ၄:၄ တက့ၢ်.
ခရံာ်ဖိအမ့ၢ်အတီတဖၣ် အဲၣ်လိာ်အသး တဂၤဒီးတဂၤလီၤ. လၢယွၤအကလုၢ်ကထါအပူၤန့ၣ် အဝဲသ့ၣ်မၤလိဘၣ်ဝဲ လၢကဘၣ်ယူးယီၣ်ပာ်ကဲဝဲ ပှၤကိးကလုာ်ဒဲးန့ၣ်လီၤ. တၢ်ဘူၣ်တၢ်ဘါလၢအကမၣ်တဖၣ် ဆီၣ်ထွဲမၤစၢၤဝဲထံကီၢ်တၢ်ဒုးတၢ်ယၤ လၢတၢ်သူၣ်ဆူၣ်သးဆူၣ်အပူၤသနာ်က့ ပှၤအိၣ်လၢတၢ်ဘူၣ်တၢ်ဘါ အမ့ၢ်အတီအပူၤန့ၣ် တမၤဝဲဒ်န့ၣ်ဘၣ်. (မံကၤ ၄:၁-၃) အါန့ၢ်အန့ၣ် ခရံာ်ဖိအမ့ၢ်အတီတဖၣ်န့ၣ် တဃုထဲအဘျုးဒၣ်ဝဲဘၣ် ဒီးသူဝဲအတၢ်ဆၢကတီၢ်ဒီး တၢ်စုလီၢ်ခီၣ်ခိၣ်လၢ ကမၤစၢၤဒီး ဟ့ၣ်ဂံၢ်ဟ့ၣ်ဘါပှၤဂၤအဂီၢ်လီၤ.—ဖး ယိၤဟၣ် ၁၃:၃၄, ၃၅; ၁ ယိၤဟၣ် ၄:၂၀ တက့ၢ်.
၄. မ့ၢ်နသ့ၣ်ညါနီၤဖးတၢ်ဘူၣ်တၢ်ဘါ အမ့ၢ်အတီသ့လံဧါ.
တၢ်ဘူၣ်တၢ်ဘါလၢ အဒိးသန့ၤထီၣ်အတၢ်သိၣ်လိခဲလၢာ်လၢ ယွၤအကလုၢ်ကထါအပူၤ, မၤလၤကပီၤယွၤအမံၤ, ဒီးဒုးသ့ၣ်ညါပှၤဂၤလၢ ယွၤအဘီအမုၢ် မ့ၢ်ဝဲတၢ်မုၢ်လၢ်ထဲတမံၤဧိၤလၢ ပှၤဟီၣ်ခိဖိတဖၣ်အဂီၢ်န့ၣ် မ့ၢ်တၢ်ဘူၣ်တၢ်ဘါဖဲလဲၣ်တခါလဲၣ်. တၢ်ကရၢကရိလၢ မၤတၢ်လၢတၢ်အဲၣ်ဒီး ဟးဆှဲးတၢ်ဒုးတၢ်ယၤန့ၣ် မ့ၢ်တၢ်ကရၢကရိဖဲလဲၣ်တခါလဲၣ်. နဆိကမိၣ်ဒ်လဲၣ်.—ဖး ၁ ယိၤဟၣ် ၃:၁၀-၁၂ တက့ၢ်.