တၢ်နးတၢ်ဖှီၣ် လီၤမၢ်ကွံာ် ကန့ၢ်ဧါ
နကစံးဆၢဒ်လဲၣ် . . .
ကလီၤမၢ်ကွံာ်.
တလီၤမၢ်ကွံာ်ဘၣ်.
ဘၣ်သ့ၣ်သ့ၣ် ကလီၤမၢ်ကွံာ်.
လံာ်စီဆှံတဲဝဲဒ်လဲၣ်
‘ယွၤကထွါကွံာ် အဝဲသ့ၣ်အမဲာ်ထံခဲလၢာ်လၢအမဲာ်, ဒီးတၢ်သံ တအိၣ်လၢၤဘၣ်, ဒီးတၢ်သူၣ်အုးသးအုးတအိၣ်လၢၤဘၣ်, ဒီးတၢ်ဟီၣ်တၢ်ယၢၤတအိၣ်လၢၤဘၣ်, ဒီးတၢ်ဘှံးသူၣ်ဘှံးသး တအိၣ်လၢၤဘၣ်.’—လီၣ်ဖျါ ၂၁:၃, ၄, မ့ၣ်စံၣ် လံာ်စီဆှံ.
လံာ်စီဆှံတဆၢအံၤ အကဲဘျုးလၢနဂီၢ်ဒ်လဲၣ်
ပနာ်သ့သပှၢ်တၢၢ်လၢ ကစၢ်ယွၤတဒုးအိၣ်ထီၣ် တၢ်နးတၢ်ဖှီၣ်ဘၣ်.—ယၤကိာ် ၁:၁၃.
ပမ့ၢ်ထံၣ်ဘၣ် တၢ်ကီတၢ်ခဲ သနာ်က့ ပသ့ၣ်ညါလၢ ကစၢ်ယွၤသးအိၣ်ပှၤအဃိ ပသးမုာ်ထီၣ်က့ၤ. —၁ ပ့းတရူး ၅:၇.
ပအိၣ်ဒီးတၢ်မုၢ်လၢ်လၢ ပတၢ်ကီတၢ်ခဲတဖၣ် ကလီၤမၢ်ကွံာ်ဝဲ သပှၢ်တၢၢ်.—စံးထီၣ်ပတြၢၤ ၃၇:၉-၁၁.
တၢ်လၢလံာ်စီဆှံတဲဝဲန့ၣ် ပနာ်အီၤသ့ သပှၢ်ကတၢၢ်ဧါ
ပနာ်အီၤသ့ခီဖျိလၢ တၢ်ဂ့ၢ်လၢ တၢ်ဖီလာ်အဃိ.
တၢ်နးတၢ်ဖှီၣ် ဒီးတၢ်တတီတလိၤန့ၣ် ကစၢ်ယွၤတဘၣ်အသးဘၣ်. ဖဲယဟိဝၤယွၤ အပှၤဂီၢ်မုၢ်လၢပျၢၤတဖၣ် ဘၣ်နးဘၣ်ဖှီၣ်အဆၢကတီၢ် ယဟိဝၤယွၤ တူၢ်ဘၣ်ဝဲဒ်လဲၣ်န့ၣ် ဆိကမိၣ်ကွၢ်. အဒိ ဖဲ “ပှၤမၤအၢမၤသီ” ကစၢ်ယွၤအပှၤဂီၢ်မုၢ်အခါ လံာ်စီဆှံပာ်ဖျါထီၣ်ဝဲလၢ ကစၢ်ယွၤ သးအုးဝဲ.—စံၣ်ညီၣ်ကွီၢ် ၂:၁၈.
ပှၤမ့ၢ်မၤဘၣ်ဒိ ပှၤဂၤတဖၣ်န့ၣ် ကစၢ်ယွၤတဘၣ်အသးနီတစဲးဘၣ်. အဒိ, လံာ်စီဆှံတဲဝဲလၢ ကစၢ်ယွၤသးဟ့ဝဲ “စုလၢအမၤသံပှၤလၢ အတၢ်ကမၣ်တအိၣ်” ဘၣ်.—ကတိၤဒိ ၆:၁၆, ၁၇, ခ့ခါစှီၤကျိာ်.
ကစၢ်ယွၤသးအိၣ် ပဝဲတဂၤဒီးတဂၤ. ယဟိဝၤယွၤ “သးအိၣ်” ပှၤအဃိ အဟ့ၣ်ဂံၢ်ဟ့ၣ်ဘါပှၤလၢ ပကတဲဘၣ်အီၤ ပတၢ်ဘၣ်ယိၣ်ဘၣ်ဘှီခဲလၢာ်.—၁ ပ့းတရူး ၅:၇.
တယံာ်လၢၤဘၣ် ယဟိဝၤယွၤအဘီမုၢ် ကမၤလီၤမၢ်ကွံာ် ပတၢ်ကီတၢ်ခဲကိးမံၤဒဲး. (မးသဲ ၆:၉, ၁၀) မုၢ်မဆါတနံၤအံၤစ့ၢ်ကီး ကစၢ်ယွၤမၤမုာ်ထီၣ်က့ၤပှၤလၢ အဃုအီၤလၢ သးဒီဖျၢၣ်.—မၤတၢ် ၁၇:၂၇; ၂ ကရံၣ်သူး ၁:၃, ၄.
ဆိကမိၣ်ကွၢ်
ဘၣ်မနုၤအဃိ ကစၢ်ယွၤဟ့ၣ်အခွဲးလၢ တၢ်နးတၢ်ဖှီၣ် ကဟဲကဲထီၣ်အသးလဲၣ်.
လံာ်စီဆှံ ပာ်ဖျါထီၣ်ဝဲတၢ်စံးဆၢဖဲ ရိမ့ၤ ၅:၁၂ ဒီး ၂ ပ့းတရူး ၃:၉ အပူၤ.