ပှၤသံတဖၣ်န့ၣ် ကသမူထီၣ်က့ၤဒံးဧါ
နကစံးဆၢဒ်လဲၣ် . . .
ကသမူထီၣ်က့ၤ.
တသမူထီၣ်က့ၤလၢၤဘၣ်.
ဘၣ်သ့ၣ်သ့ၣ် ကသမူထီၣ်က့ၤ.
လံာ်စီဆှံတဲဝဲဒ်လဲၣ်
“ပှၤတီပှၤလိၤဒီး ပှၤတတီတလိၤ လၢအသံသ့ၣ်တဖၣ် ကဂဲၤဆၢထၢၣ် သမူထီၣ်က့ၤ.”—မၤတၢ် ၂၄:၁၅, ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ.
လံာ်စီဆှံတဆၢအံၤ အကဲဘျုးလၢနဂီၢ်ဒ်လဲၣ်
ဖဲပှၤလၢနအဲၣ်ဘၣ်အီၤတဂၤ သံဝဲအခါ တၢ်မုၢ်လၢ်တခါအံၤ မၤမုာ်ထီၣ်နသးသ့.—၂ ကရံၣ်သူး ၁:၃, ၄.
တလိၣ်လၢနပျံၤ တၢ်သံလၢၤဘၣ်.—ဧ့ၤဘြံၤ ၂:၁၅.
နအိၣ်ဒီး တၢ်မုၢ်လၢ်လၢ နကထံၣ်ဘၣ်က့ၤ ပှၤသံလၢ နအဲၣ်ဘၣ်အီၤတဖၣ်.—ယိၤဟၣ် ၅:၂၈, ၂၉.
တၢ်လၢလံာ်စီဆှံတဲဝဲန့ၣ် ပနာ်အီၤသ့ သပှၢ်ကတၢၢ်ဧါ
ပနာ်အီၤသ့ခီဖျိလၢ တၢ်ဂ့ၢ်လၢ တၢ်ဖီလာ်အဃိ.
ကစၢ်ယွၤမ့ၢ် တၢ်ဘၣ်တ့ကစၢ်. လံာ်စီဆှံကိးဝဲ ယဟိဝၤယွၤလၢ “တၢ်မူအဂံၢ်ခီၣ်ထံး.” (စံးထီၣ်ပတြၢၤ ၃၆:၉; မၤတၢ် ၁၇:၂၄, ၂၅) ယဟိဝၤယွၤ တ့လီၤတၢ်သးသမူခဲလၢာ်အဃိ အဝဲမၤသမူထီၣ်က့ၤ ပှၤသံသ့ဝဲ သပှၢ်တၢၢ်.
လၢညါန့ၣ် ကစၢ်ယွၤမၤသမူထီၣ်က့ၤ ပှၤဟီၣ်ခိၣ်ဖိတနီၤ. အဒိ လံာ်စီဆှံပာ်ဖျါထီၣ်ဝဲလၢ ကစၢ်ယွၤမၤသမူထီၣ်က့ၤ ပှၤဟီၣ်ခိၣ်ဖိ အိၣ်ဝဲဃိးဂၤ. အဝဲသ့ၣ် ပၣ်ဃုာ်ဒီးပှၤသးစၢ်, ပှၤသးပှၢ်, ပိာ်မုၣ် ဒီးပိာ်ခွါတဖၣ်. ပှၤသ့ၣ်တဖၣ်အံၤတနီၤန့ၣ် သံဝဲထဲတစိၢ်ဖိ ဘၣ်ဆၣ် လၢအဝဲသ့ၣ်အကျါတဂၤန့ၣ် အိၣ်လၢ တၢ်သွၣ်ခိၣ်အပူၤ ယံာ်ဝဲလွံၢ်သီ ဝံၤဒီး သမူထီၣ်က့ၤဝဲ.—ယိၤဟၣ် ၁၁:၃၉-၄၄.
ကစၢ်ယွၤ သးအိၣ်မၤသမူထီၣ်က့ၤ ပှၤသံတဖၣ်. ယဟိဝၤယွၤ တဘၣ်သးလၢ ပှၤကသံနီတဂၤဘၣ်. အဝဲထံၣ်ဝဲတၢ်သံဒ်သိးဒီး ဒုၣ်ဒါတဂၤ. (၁ ကရံၣ်သူး ၁၅:၂၆) ကစၢ်ယွၤအဲၣ်ဒိးမၤနၢၤဒုၣ်ဒါအဝဲအံၤ ဒီးအဝဲကမၤနၢၤအီၤ ခီဖျိလၢ အကမၤသမူထီၣ်က့ၤ ပှၤသံသ့ၣ်တဖၣ်. တကးဒံးဘၣ် ပှၤသံတဖၣ်န့ၣ် ကစၢ်ယွၤတိၢ်နီၣ် အဝဲသ့ၣ်အဂ့ၢ်အကျိၤဘၣ်ဝဲလီၤတံၢ်လီၤဆဲး ဒီးအသးအိၣ်မၤသမူထီၣ်က့ၤ အဝဲသ့ၣ်လၢ ဟီၣ်ခိၣ်ချၢ.—ယိၤဘး ၁၄:၁၄, ၁၅.
ဆိကမိၣ်ကွၢ်
ဘၣ်မနုၤအဃိ ပသးပှၢ်ထီၣ် ဒီးဘၣ်သံဝဲလဲၣ်.
လံာ်စီဆှံ ပာ်ဖျါထီၣ်ဝဲတၢ်စံးဆၢဖဲ ၁ မိၤၡ့ ၃:၁၇-၁၉ ဒီး ရိမ့ၤ ၅:၁၂ အပူၤ.