ယွၤအဘီမုၢ်န့ၣ် မ့ၢ်မနုၤလဲၣ်
နကတဲလၢ ယွၤအဘီမုၢ်န့ၣ်မ့ၢ် . . .
တၢ်တမံၤမံၤလၢ အအိၣ်လၢပသးပူၤဧါ
တၢ်လီၢ်တတီၤတီၤလၢ မူခိၣ်ဧါ
တၢ်ပၢတၢ်ပြးတခါ လၢမူခိၣ်ဧါ
လံာ်စီဆှံတဲဝဲဒ်လဲၣ်
“ကစၢ်ယွၤ လၢမူခိၣ် ကသူၣ်ထီၣ် ဘီမုၢ်တဘ့ၣ်လၢ အတဟးဂီၤ နီတဘျီဘၣ်.”—ဒၤနံးယ့လး ၂:၄၄, ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ.
“တၢ်ဟ့ၣ်လီၤအီၤ [ယ့ၣ်ၡူး] တၢ်ပၢတၢ်ပြး, တၢ်လၤတၢ်ကပီၤ ဒီးဘီမုၢ်တဘီမုၢ် . . . အတၢ်ပၢတၢ်ပြးန့ၣ် ကအိၣ်ဝဲလီၤထူလီၤယိာ် ဒီးအဘီမုၢ်န့ၣ် တဟးဂီၤနီတဘျီဘၣ်.”—ဒၤနံးယ့လး ၇:၁၄.
လံာ်စီဆှံအဆၢတဖၣ်အံၤ ကဲဘျုးလၢနဂီၢ်ဒ်လဲၣ်
တၢ်ပၢတၢ်ပြးလၢ အတီအလိၤအံၤ ကကဲဘျုးလၢနဂီၢ်.—ယၡါယၤ ၄၈:၁၇, ၁၈.
လၢဟီၣ်ခိၣ်သီအပူၤန့ၣ် နကသူၣ်ဖှံသးညီ ဒီးနတၢ်အိၣ်ဆူၣ်အိၣ်ချ့ကဂ့ၤ.—လီၣ်ဖျါ ၂၁:၃, ၄.
တၢ်လၢလံာ်စီဆှံတဲဝဲန့ၣ် ပနာ်အီၤသ့ သပှၢ်ကတၢၢ်ဧါ
ပနာ်အီၤသ့ခီဖျိလၢ တၢ်ဂ့ၢ်လၢ တၢ်ဖီလာ်အဃိ.
လၢညါ ယ့ၣ်ၡူး ပာ်ဖျါထီၣ် တၢ်လၢ ယွၤအဘီမုၢ်ကမၤဝဲတဖၣ်. ယ့ၣ်ၡူး သိၣ်လိအပျဲၢ်အဘီၣ်တဖၣ်လၢ အဝဲသ့ၣ်ကဃ့ထုကဖၣ်လၢ ယွၤအဘီမုၢ်ကဟဲ ဒီးယွၤအတၢ်ဘၣ်သး ကဟဲလၢထီၣ်ပှဲၤထီၣ်လၢ ဟီၣ်ခိၣ်ချၢ. (မးသဲ ၆:၉, ၁၀) ဒီးဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အပာ်ဖျါထီၣ်န့ၢ်ပှၤ တၢ်လၢ အကဟဲကဲထီၣ်အသး ဖဲပတၢ်ဃ့ထုကဖၣ်အံၤ လၢထီၣ်ပှဲၤထီၣ်အဆၢကတီၢ်.
အဒိ ဖဲယ့ၣ်ၡူး အိၣ်လၢဟီၣ်ခိၣ်ချၢအခါ အဝဲဒုးအီၣ် ပှၤလၢအလီၤဘဲ, မၤဘျါ ပှၤဆူးပှၤဆါ ဒီးမၤသမူထီၣ်က့ၤ ပှၤသံသ့ၣ်တဖၣ်. (မးသဲ ၁၅:၂၉-၃၈; ယိၤဟၣ် ၁၁:၃၈-၄၄) ခီဖျိလၢ ယ့ၣ်ၡူးမၤဝဲဒ်န့ၣ်အဃိ ပသ့ၣ်ညါဘၣ် တၢ်လၢ ယွၤအဘီမုၢ် ကမၤဝဲလၢ ပှၤဟီၣ်ခိၣ်ဖိတဖၣ်အဂီၢ်. ယ့ၣ်ၡူးမ့ၢ်ယွၤအဘီမုၢ်အစီၤပၤအဃိ ခါဆူညါန့ၣ် အဝဲကပၢဟီၣ်ခိၣ်.—လီၣ်ဖျါ ၁၁:၁၅.
ဟီၣ်ခိၣ် တၢ်အိၣ်သးတဖၣ် ပာ်ဖျါထီၣ်ဝဲလၢ တယံာ်လၢၤဘၣ်န့ၣ် ယွၤအဘီမုၢ်ကဟဲ. ယ့ၣ်ၡူး တဲဆိပာ်စၢၤဝဲလၢ တချုးယွၤအဘီမုၢ် ဒုးအိၣ်ထီၣ်တၢ်ဃူတၢ်ဖိးလၢ ဟီၣ်ခိၣ်ချၢဒံးဘၣ်န့ၣ် တၢ်ဒုးတၢ်ယၤ ဒီးတၢ်သၣ်ဝံၤလီၤဒိ ကအိၣ်ထီၣ် ဒီးဟီၣ်ခိၣ်ကဟူး.—မးသဲ ၂၄:၃, ၇.
မုၢ်မဆါတနံၤအံၤ ပထံၣ်ဘၣ် တၢ်မၤအသးတဖၣ်အံၤ. အဃိ ပနာ်သ့လၢ တယံာ်လၢၤဘၣ်န့ၣ် ယွၤအဘီမုၢ် ကမၤလီၤမၢ်ကွံာ် တၢ်ကီတၢ်ခဲကိးမံၤဒဲး.
ဆိကမိၣ်ကွၢ်
ယွၤအဘီမုၢ် မ့ၢ်ပၢဟီၣ်ခိၣ်န့ၣ် ပတၢ်အိၣ်မူ ကမၤအသးဒ်လဲၣ်.
လံာ်စီဆှံ ပာ်ဖျါထီၣ်ဝဲတၢ်စံးဆၢဖဲ စံးထီၣ်ပတြၢၤ ၃၇:၂၉ ဒီး ယၡါယၤ ၆၅:၂၁-၂၃ အပူၤ.