တၢ်မၤလိ ၂၂
တၢ်လီၤလးဖဲပီၣ်လဲၣ်ဂီၤ
ဖဲပှၤအံၣ်စရ့လးဖိတဖၣ် ဟးထီၣ်လၢ ကီၢ်အဲၤကူပတူးအပူၤ ဝံၤအလီၢ်ခံ စီၤပၤဖၤရိၤ အသးဆီတလဲဝဲ. ဖၤရိၤတဲဘၣ် အပှၤသုးဖိတဖၣ်လၢ ‘ကတဲာ်ကတီၤထီၣ် လ့ၣ်ကဟၣ်ခဲလၢာ် ဒီးပကလဲၤလူၤ ပှၤအံၣ်စရ့လးဖိတဖၣ်. ပပျၢ်လီၤအဝဲသ့ၣ်န့ၣ် ကမၣ်လံ.’ စီၤပၤဖၤရိၤ ဒီးအပှၤသုးဖိတဖၣ် စးထီၣ်လဲၤလူၤဝဲ ပှၤအံၣ်စရ့လးဖိတဖၣ်.
ယဟိဝၤယွၤ သူဝဲတၢ်အၢၣ်ထူၣ် လၢမုၢ်ဆါ ဒီးသူဝဲမ့ၣ်အူထူၣ် လၢမုၢ်နၤ ဒ်သိး ကဆှၢဝဲ ပှၤအံၣ်စရ့လးဖိတဖၣ်အဂီၢ်. ကစၢ်ယွၤ ဆှၢပှၤအံၣ်စရ့လးဖိဆူ ပီၣ်လဲၣ်ဂီၤအကၢၢ်နံၤ ဒီးမၢအဝဲသ့ၣ် အိၣ်ကတီၢ်ဝဲဖဲန့ၣ်.
ဝံၤဒီး ဖဲပှၤအံၣ်စရ့လးဖိတဖၣ် ကွၢ်လီၤလၢ အလီၢ်ခံအခါ ထံၣ်စိဝဲစီၤပၤဖၤရိၤ ဒီးအပှၤသုးဖိတဖၣ် ဟဲလူၤအဝဲသ့ၣ်. မ့မ့ၢ်လၢ အဝဲသ့ၣ်မဲာ်ညါန့ၣ် အိၣ်ဒီးပီၣ်လဲၣ်ဂီၤ. အဃိ အဝဲသ့ၣ် ကိးပသူထီၣ်တၢ်ဆူ စီၤမိၤၡ့အအိၣ်လၢ ‘ပကသံလၢာ်လီၤ. နမ့ၢ်ပာ်တ့ၢ်ပှၤလၢ ကီၢ်အဲၤကူပတူးအပူၤန့ၣ် ကဂ့ၤဒံး.’ ဘၣ်ဆၣ် စီၤမိၤၡ့တဲဘၣ်အဝဲသ့ၣ်လၢ ‘ပျံၤတၢ်တဂ့ၤ. ယဟိဝၤယွၤ ကမၤပူၤဖျဲးပှၤ, ခိးကွၢ်သၢၤ.’ စီၤမိၤၡ့ နာ်ယဟိဝၤယွၤလၢ အသးဒီဖျၢၣ်.
ယဟိဝၤယွၤတဲဘၣ် ပှၤအံၣ်စရ့လးဖိလၢ အဝဲသ့ၣ် ကဘၣ်ဆဲးလဲၤတၢ်ဆူညါ. ဖဲနၤအဝဲန့ၣ် ယဟိဝၤယွၤ သုးဝဲတၢ်အၢၣ်ထူၣ် ဒီးပာ်လီၤဝဲလၢ ပှၤအံၣ်စရ့လးဖိ ဒီးပှၤအဲၤကူပတူး အသုးဖိတဖၣ် အဘၢၣ်စၢၤ. လၢပှၤအဲၤကူပတူး အသုးဖိတဖၣ် အအိၣ်တကပၤန့ၣ် တၢ်ခံးဝဲ. မ့မ့ၢ်လၢ ပှၤအံၣ်စရ့လးဖိ အအိၣ်တခီန့ၣ် တၢ်ကပီၤဝဲ.
ယဟိဝၤယွၤ မၢစီၤမိၤၡ့ ယူာ်ထီၣ်အစုလၢ ပီၣ်လဲၣ်ဂီၤ အဖီခိၣ်. ဝံၤဒီး ယဟိဝၤယွၤ ဒုးလီၤကလံၤမုၢ်ဖးဒိၣ် ဒီတနၤညါ. ပီၣ်လဲၣ်သ့ၣ်ဖးဝဲခံခီ ဒီးကဲထီၣ်ဝဲ ကျဲလၢပီၣ်လဲၣ်သးကံၢ်ပူၤ. ဝံၤဒီး ပှၤအံၣ်စရ့လးဖိ လၢအကကွဲၢ်တဖၣ် ဟးဝဲလၢ ဟီၣ်ခိၣ်လိၤ ဒီးခီဂာ်ဝဲ ပီၣ်လဲၣ်ဂီၤ.
စီၤပၤဖၤရိၤ အပှၤသုးဖိတဖၣ် လူၤပိာ်ဝဲ ပှၤအံၣ်စရ့လးဖိတဖၣ်အခံ. ဘၣ်ဆၣ် ယဟိဝၤယွၤ ဒုးအိၣ်ထီၣ်ဝဲ တၢ်ကီတၢ်ခဲလၢ ပှၤသုးဖိတဖၣ်အံၤအကျါ. အဝဲသ့ၣ် အလ့ၣ်ကဟၣ်အပၣ်တဖၣ် ဖျိးထီၣ်ကွံာ်လၢ အလ့ၣ်ကဟၣ်အလိၤ. ပှၤသုးဖိ ကိးပသူထီၣ်လၢ ‘ပကဘၣ်ဃ့ၢ်ထီၣ်ကွံာ်လၢ ပီၣ်လဲၣ်ပူၤခဲအံၤ. ယဟိဝၤယွၤဒုးတၢ်လၢ အပှၤဂီၢ်မုၢ်တဖၣ်အဂီၢ်.’
ယဟိဝၤယွၤ မၢကဒီး စီၤမိၤၡ့လၢ ‘ယူာ်ထီၣ်နစုလၢ ပီၣ်လဲၣ်အဖီခိၣ်.’ တဘျီဃီန့ၣ် ပီၣ်လဲၣ်ဂီၤအထံ ဟဲက့ၤလီၤကဒါက့ၤ ဒီးလုၢ်ဘၢကွံာ်ဝဲ ပှၤအဲၤကူပတူးအသုးဖိတဖၣ်. စီၤပၤဖၤရိၤ ဒီးအပှၤသုးဖိတဖၣ်န့ၣ် သံဝဲခဲလၢာ်.
လၢပီၣ်လဲၣ်ဂီၤ ဝၢ်ဘးခီန့ၣ် ပှၤဂီၢ်မုၢ်တဖၣ် သးဝံၣ်စံးထီၣ်ပတြၢၤ ကစၢ်ယွၤ. အဝဲသ့ၣ် သးဝံၣ်ထီၣ်ဝဲလၢ “သးဝံၣ်ထီၣ် ယဟိဝၤယွၤ, မ့ၢ်လၢ အဘၣ် တၢ်ပာ်ဒိၣ်ပာ်ကဲအီၤ ဒိၣ်မး. အဝဲ ကွံာ်လီၤဝဲ ကသ့ၣ် ဒီးပှၤဒိးကသ့ၣ်ဖိ လၢပီၣ်လဲၣ်ပူၤလီၤ.” ဖဲပှၤဂီၢ်မုၢ်တဖၣ်အံၤ သးဝံၣ်တၢ် အဆၢကတီၢ်န့ၣ် ပှၤပိာ်မုၣ်တဖၣ် ပှီၢ်ထီၣ်ဒၢ ဒီးဂဲၤကလံၣ်ဝဲ. ပှၤဂီၢ်မုၢ်တဖၣ်အံၤ ပူၤဖျဲးဝဲအဃိ အဝဲသ့ၣ် သူၣ်ခုသးခုဝဲဒိၣ်မး.
“အဃိ လၢတၢ်သူၣ်ဒူသးဒူ လၢလၢပှဲၤပှဲၤအပူၤ ပတဲသ့လၢ ‘ယဟိဝၤယွၤ မ့ၢ်ပှၤလၢ အမၤစၢၤယၤအဃိ ယတပျံၤတၢ်ဘၣ်. ပှၤဟီၣ်ခိၣ်ဖိ မၤယၤတၢ်မနုၤကသ့လဲၣ်.’”—ဧ့ၤဘြံၤ ၁၃:၆