တၢ်ကတိၤအိးထီၣ် အကူာ် ၁၁
အကူာ် တဆံတၢအံၤ ကပာ်ဖျါထီၣ်ဝဲ လံာ်စီဆှံအတၢ်ဂ့ၢ် လၢကြံးကျိာ်တကတြူၢ်. ယ့ၣ်ၡူး ဟဲအိၣ်ဖျဲၣ်ထီၣ်လၢ ဟံၣ်ဖိဃီဖိ လၢအမ့ၢ် ပှၤမုၢ်ဆ့ၣ်မုၢ်ဂီၤဖိ ဒီးအဝဲသ့ၣ်အိၣ်လၢ ဝ့ၢ်ဆံးဆံးဖိတဖျၢၣ်အပူၤ. ယ့ၣ်ၡူးမၤတၢ်ဒီးအပၢ် ဒ်ပှၤစုသ့ဖိတဂၤအသိး. ယ့ၣ်ၡူး မ့ၢ်ပှၤတဂၤလၢ ကအုၣ်က့ၤခီၣ်က့ၤ ပှၤဟီၣ်ခိၣ်ဖိ ဒီးယဟိဝၤယွၤ ဃုထၢထီၣ်အီၤ လၢမူခိၣ်ဘီမုၢ်အစီၤပၤ. ခီဖျိလၢ ယဟိဝၤယွၤ အဲၣ်ယ့ၣ်ၡူးအဃိ အအဲၣ်ဒိးဝဲလၢ ယ့ၣ်ၡူး ကဒိၣ်ထီၣ်ဘၣ်လၢ ဟံၣ်ဖိဃီဖိလၢ အပှဲၤဒီးတၢ်အဲၣ်တၢ်ကွံ ဒီးအအဲၣ်ယွၤ. သုမ့မ့ၢ်မိပါန့ၣ် မၤစၢၤသုဖိဒ်သိး ကနၢ်ပၢၢ်ထီၣ်ဝဲ တၢ်ဂ့ၢ်အံၤ. ယဟိဝၤယွၤ ဒီသဒၢယ့ၣ်ၡူးလၢ စီၤပၤဟ့ၤရိာ်အစုပူၤ ဒီးတၢ်မနုၤမး မၤဟးဂီၤ ကစၢ်ယွၤအတၢ်တိာ်ပာ် တန့ၢ်ဘၣ် အဂ့ၢ်န့ၣ် တဲနၢ်ပၢၢ်သုဖိတဖၣ်. ယဟိဝၤယွၤ မၢပှၤဘျၢတၢ်စီၤယိၤဟၣ် ကတဲာ်ကတီၤန့ၢ် ကျဲလၢယ့ၣ်ၡူး အဂီၢ်ဒ်လဲၣ်န့ၣ် ဃုသ့ၣ်ညါကွၢ်. စးထီၣ်လၢ ယ့ၣ်ၡူးမ့ၢ်ဒံး ပှၤသးစၢ်အခါန့ၣ် အတဒိးသန့ၤထီၣ်အသးလၢ အနီၢ်ကစၢ် အတၢ်သ့ၣ်ညါ အဖီခိၣ်ဘၣ်. အသးအိၣ်တူၢ်လိာ်ဝဲ တၢ်ဟ့ၣ်ကူၣ် လၢအဟဲလၢ ယဟိဝၤယွၤအအိၣ်.