တၢ်မၤလိ ၁၄

ပာ်ဖျါထီၣ်တၢ်ဂ့ၢ်မိၢ်ပှၢ်ၡဲၡဲတက့ၢ်

ဧ့ၤဘြံၤ ၈:၁

ဘၣ်မၤဒ်လဲၣ်– မၤစၢၤကမျၢၢ်တဖၣ်ဒ်သိး ကသးစၢၢ်ဆၢ နတၢ်စံၣ်တဲၤတဲလီၤတက့ၢ်. ပာ်ဖျါထီၣ်လီၤတံၢ်လီၤဆဲးလၢ တၢ်ဂ့ၢ်အရ့ဒိၣ်တခါစုာ်စုာ်န့ၣ် ဘျးစဲလိာ်သးဒီး တၢ်ဂ့ၢ်တၢ်ကျိၤလၢ နတိာ်ပာ်အီၤလၢနကတဲအီၤ ဒီးတၢ်စံၣ်တဲၤတဲလီၤအခိၣ်တီဒ်လဲၣ်န့ၣ်တက့ၢ်.

မၤဒ်အံၤတက့ၢ်–

အိၣ်ဒီးတၢ်တိာ်ပာ်တမံၤမံၤ. ဖဲနဟ့ၣ်တၢ်စံၣ်တဲၤတဲလီၤအခါ ဆိကမိၣ်ထံပာ်စၢၤ တၢ်ဂ့ၢ်လၢနကတဲတဖၣ်တက့ၢ်. တကးဒံးဘၣ် အိၣ်ဒီးတၢ်တိာ်ပာ်လၢ ကမၤစၢၤနပှၤဒိကနၣ်တၢ်ဖိ ဒ်သိးကသ့ၣ်ညါထီၣ်တၢ်ဂ့ၢ်တမံၤမံၤ, ကနာ်တၢ်လၢနတဲ ဒီးကထိၣ်ဟူးထိၣ်ဂဲၤထီၣ် ပှၤဒိကနၣ်တၢ်ဖိတဖၣ်အသးတက့ၢ်. ဒီးတၢ်ဂ့ၢ်အရ့ဒိၣ်လၢ နတဲအီၤခဲလၢာ်န့ၣ် အဝဲသ့ၣ်ကဘၣ်နၢ်ပၢၢ်ထီၣ်ဝဲ တၢ်လၢနအဲၣ်ဒိးတဲအီၤန့ၣ်တက့ၢ်.

သံကွၢ်လီၤနသးဒ်အံၤတက့ၢ်– ‘ဘၣ်ဃးဒီးတၢ်ဂ့ၢ်တခါအံၤန့ၣ် ယပှၤဒိကနၣ်တၢ်ဖိတဖၣ် အတၢ်သံကွၢ်ကအိၣ်ထီၣ်ဝဲဒ်လဲၣ် မ့တမ့ၢ် အတူၢ်လိာ်ဝဲတသ့ဘၣ် အိၣ်တမံၤမံၤဧါ.’ မ့ၢ်အိၣ်န့ၣ် အဝဲသ့ၣ်ကသံကွၢ်တၢ်ဂ့ၢ်မနုၤလဲၣ် မ့တမ့ၢ် ဘၣ်မနုၤအဃိ အဝဲသ့ၣ်တတူၢ်လိာ်ဝဲဘၣ်လဲၣ်. ဝံၤဒီးရဲၣ်ကျဲၤလီၤ တၢ်ဂ့ၢ်တၢ်ကျိၤသ့ၣ်တဖၣ် တဆီဘၣ်တဆီ ဒ်သိးပှၤဒိကနၣ်တၢ်ဖိတဖၣ် ကနၢ်ပၢၢ်ဝဲဒီး တူၢ်လိာ်ဝဲတၢ်ဂ့ၢ်လၢ နတဲတဖၣ်ကန့ၢ်အဂီၢ်တက့ၢ်.
က့ၤတဲဖျါထီၣ်ကဒါက့ၤ တၢ်စံၣ်တဲၤတဲလီၤအခိၣ်တီ လီၤတံၢ်လီၤဆဲးတက့ၢ်. ဖဲနဟ့ၣ်တၢ်စံၣ်တဲၤတဲလီၤအခါ က့ၤယၢၤထီၣ်ကဒါက့ၤ တၢ်စံၣ်တဲၤတဲလီၤတၢ်အခိၣ်တီ မ့တမ့ၢ် တၢ်ကတိၤလၢအခီပညီ လီၤဂာ်လိာ်အသးဒီး တၢ်စံၣ်တဲၤတဲလီၤတၢ်အခိၣ်တီ တဘျီဝံၤတဘျီတက့ၢ်.
ပာ်ဖျါထီၣ်တၢ်ဂ့ၢ်မိၢ်ပှၢ်ၡဲၡဲဖိ ဒီးလၢပှၤနၢ်ပၢၢ်ဘၣ်အီၤညီတက့ၢ်. ဃုထၢထီၣ်တၢ်ဂ့ၢ်မိၢ်ပှၢ်လၢ အဘျးစဲလိာ်သးဒီး တၢ်ဂ့ၢ်အခိၣ်တီတက့ၢ်. နမ့ၢ်မၤဒ်န့ၣ်န့ၣ် နဟ့ၣ်တၢ်စံၣ်တဲၤတဲလီၤတၢ် ကဝံၤဝဲဒ်တၢ်ဆၢကတီၢ်လၢ ပှၤပာ်ပနီၣ်အီၤအိၣ်ဝဲအသိးလီၤ. ဒ်သိးတၢ်ဂ့ၢ်မိၢ်ပှၢ်ကဖျါၡဲ ဒီးကလဲၤအသးဘျ့ဘျ့ဆှီဆှီအဂီၢ် ဖဲနတဲတၢ်ဂ့ၢ်မိၢ်ပှၢ်တခါစုာ်စုာ်ဝံၤအခါ အိၣ်ပတုာ်တစိၢ်ဖိတက့ၢ်.

ဒ်သိးနပှၤဒိကနၣ်တၢ်ဖိ ကသးစၢၢ်ဆၢ နတၢ်စံၣ်တဲၤတဲလီၤအဂီၢ် ဖဲနစးထီၣ်စံၣ်တဲၤတဲလီၤတၢ်သီသီအခါ တဲဖျါထီၣ်တၢ်စံၣ်တဲၤတဲလီၤခိၣ်တီ ဒ်သိးပှၤဒိကနၣ်တၢ်ဖိတဖၣ် ကသ့ၣ်ညါဝဲအဂီၢ်တက့ၢ်. ဒီးဖဲနဟ့ၣ်တၢ်စံၣ်တဲၤတဲလီၤတၢ် ဘူးထီၣ်ကဝံၤအခါန့ၣ် တဲဖျါထီၣ်ကဒါက့ၤ တၢ်ဂ့ၢ်ခိၣ်တီဒ်သိး ပှၤကမျၢၢ်တဖၣ်တိၢ်နီၣ်ဝဲ ကန့ၢ်အဂီၢ်တက့ၢ်.