ကွၢ်ကဒါက့ၤ တၢ်ဂ့ၢ်မိၢ်ပှၢ် လၢအရ့ဒိၣ်

နသးပ့ၤနီၣ် တၢ်လၢနမၤလိဘၣ်န့ၣ် အိၣ်တဘျီဘျီဧါ. ပဝဲကိးဂၤဒဲးန့ၣ် တဘျီတခီၣ် ပကသးပ့ၤနီၣ် တၢ်လၢပမၤလိဘၣ်တဖၣ်. အဃိ တၢ်မ့ၢ်ကဲထီၣ်သး ဒ်န့ၣ်န့ၣ် ပကဘၣ်မၤဒ်လဲၣ်. ပကဘၣ် ကွၢ်ကဒါက့ၤ တၢ်ဂ့ၢ်မိၢ်ပှၢ် လၢအရ့ဒိၣ်လၢ ပမၤလိဘၣ်တဖၣ်.

ဖဲနမၤလိတၢ်အခါ ဟံးန့ၢ်တၢ်ဆၢကတီၢ် တစိၢ်ဖိ ဒီးဆိကမိၣ်ထံ တၢ်ဂ့ၢ်လၢ နမၤလိအီၤတခါန့ၣ်. တၢ်မၢဖိပီလူး ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါလၢ အဖးအလံာ်ပရၢတဖၣ်လၢ ကမၤဝဲဒ်န့ၣ်. အဟ့ၣ်ကူၣ်အဝဲသ့ၣ်လၢ ကဆိကမိၣ်ထံ “တၢ်ဂ့ၢ်မိၢ်ပှၢ်.” (ဧ့ၤ ၈:၁) စီၤပီလူး မၢအဝဲသ့ၣ် မၤဝဲဒ်အံၤန့ၣ် ဒ်သိးကမၤစၢၤ အဝဲသ့ၣ်လၢ ကနၢ်ပၢၢ်ထီၣ် တၢ်ဂ့ၢ်လၢ အအဲၣ်ဒိးတဲဝဲ ဒီးတၢ်လၢအတဲဝဲန့ၣ် ဘၣ်ထွဲလိာ်သး တခါဘၣ်တခါဒ်လဲၣ်.

ဖဲနမၤလိတၢ် ဝံၤအလီၢ်ခံ ဟံးန့ၢ်တၢ်ဆၢကတီၢ်ထဲ အမံးနံးတဆံ လၢနကဆိကမိၣ်ထံက့ၤ တၢ်လၢနမၤလိဘၣ်တဖၣ်. နမ့ၢ်တနီၣ်ဘၣ် တၢ်ဂ့ၢ်မိၢ်ပှၢ်လၢ အရ့ဒိၣ်ခဲလၢာ်ဘၣ်န့ၣ် ဒ်သိး နကနီၣ်ဘၣ်က့ၤ တၢ်ဂ့ၢ်အဂီၢ် ကွၢ်ကဒါက့ၤ တၢ်ဂ့ၢ်ခိၣ်တီဖိ ဝံၤဒီးဖးလံာ်ကျိၤ အဆိကတၢၢ်တကျိၤ လၢလံာ်အဆၢ ကိးဆၢဒဲး. နမ့ၢ်မၤလိဘၣ် တၢ်ဂ့ၢ်အသီ တမံၤမံၤန့ၣ် တဲဖျါထီၣ်က့ၤလၢ နနီၢ်ကစၢ်တၢ်ကတိၤ. နမ့ၢ်ကွၢ်ကဒါက့ၤ တၢ်ဂ့ၢ်မိၢ်ပှၢ် လၢအရ့ဒိၣ်တဖၣ်န့ၣ် ကမၤစၢၤနၤလၢ နကနီၣ်ဘၣ်က့ၤ တၢ်ဂ့ၢ်လၢ နမၤလိဘၣ်တဖၣ် ဒီးနကသ့ၣ်ညါထီၣ်လၢ နကဘၣ်မၤထွဲအီၤလၢ နတၢ်အိၣ်မူပူၤဒ်လဲၣ်.