တၢ်မၤဂ့ၤထီၣ် ပတၢ်သ့တၢ်ဘၣ်လၢ တၢ်သးခုကစီၣ်တၢ်မၤအပူၤ—တၢ်စံၣ်တဲၤတဲလီၤတၢ်ဆူ ပှၤလၢအကတိၤကျိာ်အဂၤ

ဘၣ်မနုၤအဃိ အရ့ဒိၣ်လဲၣ်– ယဟိဝၤယွၤအဲၣ်ဒိးလၢ “ပှၤကိးကလုာ်ဒဲး” ကအိၣ်ဒီးတၢ်ရ့လိာ်အသးဒီးအီၤ ဘူးဘူးတံၢ်တံၢ်န့ၣ်လီၤ. (မၤတၢ် ၁၀:၃၄, ၃၅) လၢတၢ်န့ၣ်အဃိ ယ့ၣ်ၡူးပာ်ဖျါထီၣ်ဝဲလၢ တၢ်သးခုကစီၣ်န့ၣ် ကဘၣ်တၢ်စံၣ်တဲၤတဲလီၤအီၤဆူ “ပှၤကလုာ်ခဲလၢာ်” လၢ “ဟီၣ်ခိၣ်ဒီဘ့ၣ်ညါ” န့ၣ်လီၤ. (မး. ၂၄:၁၄) ဝံစကၤရယၤတဲဆိပာ်ဝဲလၢ ပှၤလၢအ “ကတိၤဝဲကျိာ်အကလုာ်ကလုာ်” လၢကယဲၢ်ပှၤကလုာ်တဖၣ်အကျါန့ၣ် ကဒိကနၣ်ဝဲလီၤ. (ကၤ. ၈:၂၃, nwt) ဒ်တၢ်မၢဖိယိၤဟၣ် အတၢ်ထံၣ်လၢညါခီပာ်ဖျါထီၣ်ဝဲအသိး ပှၤလၢကပူၤဖျဲးလၢ တၢ်နးတၢ်ဖှီၣ်ဖးဒိၣ်န့ၣ် ပၣ်ဃုာ်ဒီးပှၤလၢအဟဲလၢ “ကယဲၢ်ပှၤကလုာ်, ဒီးကယဲၢ်ပှၤအဒူၣ်, ဒီးကယဲၢ်ပှၤဂီၢ်မုၢ်, ဒီးကယဲၢ်ပှၤကတိၤတၢ်အကျိာ် အကလုာ်ကလုာ်အကျါ” န့ၣ်လီၤ. (လီၣ်. ၇:၉, ၁၃, ၁၄) ပမ့ၢ်ကွၢ်တၢ်ပာ်ဖျါလၢထးတဖၣ်န့ၣ် ပသ့ၣ်ညါဘၣ်လၢ ပမ့ၢ်ထံၣ်ဘၣ်ပှၤတဂၤဂၤ လၢအကတိၤဝဲကျိာ်အဂၤလၢ ပတၢ်စံၣ်တဲၤတဲလီၤတၢ်ဟီၣ်ကဝီၤအပူၤန့ၣ် ကြၢးလၢပဂုာ်ကျဲးစၢး တဲဘၣ်အီၤတၢ်သးခုကစီၣ်န့ၣ်လီၤ.

ပမၤကသ့ဒ်လဲၣ်–

ကတဲာ်ကတီၤပာ်စၢၤတက့ၢ်. ဖဲနလဲၤစံၣ်တဲၤတဲလီၤတၢ်အခါလဲၤစိာ်လံာ်လၢအမ့ၢ် လူမျိုးအပေါင်းမှ လူတို့အတွက် သတင်းကောင်း န့ၣ်တက့ၢ်. ဒီးဖးဆိပာ်စၢၤ တၢ်နဲၣ်လိလၢ လံာ်ဘူဖိအံၤအခီၣ်ထံးတက့ၢ်. တချုးပဟးစံၣ်တဲၤတဲလီၤတၢ်န့ၣ် ပကဘၣ်ဆိကမိၣ်ဆိပာ်စၢၤလၢ ပကထံၣ်လိာ်သးဒီး ပှၤလၢအကတိၤကျိာ်မနုၤတဖၣ်လဲၣ်န့ၣ်တက့ၢ်. ဃုကွၢ်လၢ jw.org ဒီးဒီလိး တၢ်ဂီၤမူ မ့တမ့ၢ် လံာ်လဲၢ်လၢကျိာ်သ့ၣ်တဖၣ်အံၤဆူ နလီတဲစိ မ့တမ့ၢ် ထဲးဘလဲးအပူၤတက့ၢ်. ဒ်သိးပမၤလိတၢ်ကတိၤတနီၤနီၤလၢကျိာ်အဂၤကသ့အဂီၢ်န့ၣ် ပသူ JW Language app သ့လီၤ. တၢ်အိၣ်ဖှိၣ်တဖၣ်လၢ သူကျိာ်လီၤဆီလိာ်သး မ့ၢ်လဲၤစံၣ်တဲၤတဲလီၤတၢ် တဟံၣ်ဘၣ်တဟံၣ်လၢ တၢ်လီၢ်တတီၤဃီန့ၣ် တဘၣ်လဲၤစိာ်လံာ်လဲၢ်လၢ ကျိာ်လၢတၢ်အိၣ်ဖှိၣ်အဂၤတဖုသူဝဲန့ၣ်တဂ့ၤ. ဘၣ်ဆၣ် နမ့ၢ်လဲၤစံၣ်တဲၤတဲလီၤတၢ်လၢ ကမျၢၢ်အမဲာ်ညါန့ၣ် နကြၢးလဲၤစိာ် လံာ်လဲၢ်လၢကျိာ်လၢ ပှၤအိၣ်ဖဲန့ၣ်တဖၣ်သူဝဲန့ၣ်လီၤ.
ဖဲနထံၣ်ဘၣ် ပှၤတဂၤဂၤလၢ အကတိၤကျိာ်အဂၤအခါ တသ့ဖဲအသ့ ဂုာ်ကျဲးစၢးမၤစၢၤအီၤ ဒ်သိးအဝဲကသ့ၣ်ညါ “ယွၤအတၢ်လီၤလိၢ်လီၤလး” လၢအနီၢ်ကစၢ်အကျိာ်န့ၣ်တက့ၢ်. (မၤတၢ် ၂:၁၁) ဒုးနဲၣ်အီၤလၢ jw.org ဒ်သိးအဝဲဃုသ့ၣ်ညါအါထီၣ် တၢ်ဂ့ၢ်လၢအနီၢ်ကစၢ်အကျိာ်ကသ့အဂီၢ်န့ၣ်တက့ၢ်. အဝဲမ့ၢ်ပာ်ဖျါထီၣ် တၢ်သးအိၣ်န့ၣ် မၤပှဲၤလံာ်လၢအမ့ၢ် ကျေးဇူးပြု၍ ဆက်လိုက်ပေးပါ (S-43) တဘျီဃီဒီး ဟ့ၣ်လီၤနဲၣ်ရွဲၣ်တက့ၢ်. နကြၢးလဲၤကဒီးဆူ ပှၤလၢအသးအိၣ်တၢ်မ့ၢ်တၢ်တီတဂၤအံၤအအိၣ် တုၤလၢပှၤစံၣ်တဲၤတဲလီၤတၢ်ဖိလၢအကတိၤဝဲကျိာ်ဒ်သိးဒီးအီၤ ဆဲးကျိးအီၤအဆၢကတီၢ်န့ၣ်လီၤ.

မၤကွၢ်တၢ်အံၤ လၢတလါညါအံၤအတီၢ်ပူၤတက့ၢ်–

လၢခံတဘျီ ဖဲနဟံၣ်ဖိဃီဖိတဖၣ် မၤဝဲတၢ်မၤလိလံာ်စီဆှံလၢဟါခီန့ၣ် မၤတၢ်အဒိအတဲာ်လၢ နစံၣ်တဲၤတဲလီၤတၢ်ဒီး ပှၤလၢအကတိၤကျိာ်အဂၤတက့ၢ်.