တၢ်ဖီၣ်ဃာ် တၢ်ကလုၢ် —နကသူအီၤဒ်လဲၣ်

၁. လံာ်လဲၢ်သ့ၣ်တဖၣ် ဘၣ်တၢ်ထုးထီၣ်အါထီၣ်အီၤအဃိ ပဒိးန့ၢ်ဘၣ်အဘျုးအဖှိၣ်ဒ်လဲၣ်.

^၁ ပှၤအါဂၤသူဝဲ jw.org လၢကဖးဝဲ လံာ်စီဆှံအတၢ်မ့ၢ်တၢ်တီတဖၣ်အဂီၢ်လီၤ. (စံၣ်. ၁၂:၁၀) ဘၣ်ဆၣ်ဒီး တၢ်ဖီၣ်ဃာ် တၢ်ကလုၢ်န့ၣ် မ့ၢ်နသူအီၤတဘျီဘျီဧါ. လၢပပှာ်ယဲၤသန့ (website) အပူၤ တၢ်ဂ့ၢ်အိၣ်ဝဲအါမးလၢပက ဒိကနၣ်အီၤအဂီၢ်လီၤ. တၢ်ဖီၣ်ဃာ် တၢ်ကလုၢ်အံၤန့ၣ် ကကဲဘျုးကဲဖှိၣ်လၢပဂီၢ်ဒ်လဲၣ်.

၂. ပကသူတၢ်ဖီၣ်ဃာ် တၢ်ကလုၢ်အံၤ လၢပနီၢ်ကစၢ်တၢ်မၤလိလံာ်စီဆှံဒီး ပဟံၣ်ဖိဃီဖိတၢ်မၤလိလံာ်စီဆှံအဂီၢ် ဒ်လဲၣ်.

^၂ လၢပနီၢ်ကစၢ်တၢ်မၤလိလံာ်စီဆှံအဂီၢ်ဒီး လၢပဟံၣ်ဖိဃီဖိတၢ်မၤလိလံာ်စီဆှံအဂီၢ်– ဖဲပဟးထီၣ်ဟးလီၤအခါ မ့တမ့ၢ် ဖဲပမၤတၢ်အခါ ပမ့ၢ်ဒိကနၣ်တၢ်ဖီၣ်ဃာ် တၢ်ကလုၢ်လၢ အဘၣ်ဃးဒီးလံာ်စီဆှံ, မဲးကစံတဖၣ် မ့တမ့ၢ် လံာ်လဲၢ်တဖၣ်န့ၣ် မ့ၢ်ပသူတၢ်ဆၢကတီၢ်လၢ အဂ့ၤကတၢၢ်န့ၣ်လီၤ. (အ့း. ၅:၁၅, ၁၆) ဖဲပမၤဟံၣ်ဖိဃီဖိ တၢ်မၤလိလံာ်စီဆှံအခါ ပဒိကနၣ်တၢ်ဖီၣ်ဃာ် တၢ်ကလုၢ်ဒီး ပလူၤကွၢ်လၢလံာ်ပူၤသ့ဝဲလီၤ. ဖဲပမၤနီၢ်ကစၢ် တၢ်မၤလိလံာ်စီဆှံအခါ ဒ်သိးပကမၤဂ့ၤထီၣ်ပတၢ်ဖးလံာ် မ့တမ့ၢ် ပကမၤလိကျိာ်အဂၤအဂီၢ်န့ၣ် သူတၢ်ဖီၣ်ဃာ် တၢ်ကလုၢ်န့ၣ်တက့ၢ်.

၃. လၢပဟီၣ်ကဝီၤအပူၤ မ့ၢ်မတၤသ့ၣ်တဖၣ် ကဒိးန့ၢ်ဘၣ်တၢ်အဘျုးလၢ တၢ်ဖီၣ်ဃာ်တၢ်ကလုၢ်အံၤလဲၣ်.

^၃ လၢတၢ်သးခုကစီၣ်တၢ်မၤအဂီၢ်– ပှၤလၢအိၣ်လၢပဟီၣ်ကဝီၤအပူၤတဖၣ် အတၢ်မၤအါဝဲအဃိ တၢ်ဆၢကတီၢ်တအိၣ်လၢ ကဖးလံာ်အဂီၢ်ဘၣ်. ဘၣ်သ့ၣ်သ့ၣ်အဝဲသ့ၣ်ကအဲၣ်ဒိးဒိကနၣ်ဝဲ တၢ်ဖီၣ်ဃာ် တၢ်ကလုၢ်အံၤန့ၣ်လီၤ. မ့တမ့ၢ် ပမ့ၢ်သူတၢ်ဖီၣ်ဃာ် တၢ်ကလုၢ်လၢ ပှၤဂၤကနၢ်ဟူဘၣ်ဝဲ ဘီမုၢ်တၢ်သးခုကစီၣ်လၢ အဝဲသ့ၣ် “အကလုၢ်ဒၣ်ဝဲ” န့ၣ် ဘၣ်သ့ၣ်သ့ၣ် အဝဲသ့ၣ်အသးကအိၣ်တူၢ်လိာ် ဘီမုၢ်တၢ်သးခုကစီၣ်အါထီၣ်န့ၣ်လီၤ. (မၤတၢ် ၂:၆-၈) လၢကလုာ်ဒူၣ်တနီၤနီၤအဂီၢ် တၢ်ဒိကနၣ်တၢ်န့ၣ် မ့ၢ်တၢ်လၢအရ့ဒိၣ်တခါလီၤ. အဒိ, မိကလုာ်ဒူၣ် (Hmong) အလုၢ်အလၢ်န့ၣ် အဝဲသ့ၣ်တဲဘၣ်ပှၤသးစၢ်တဖၣ်လၢ ဘၣ်ဃးဒီးမိၢ်လုၢ်ပၢ်လၢ်အတၢ်စံၣ်စိၤတဲစိၤန့ၣ်လီၤ. ဒီးပှၤသးစၢ်တဖၣ်စ့ၢ်ကီး ဒိကနၣ်ဝဲဂ့ၤဂ့ၤဒီး တိၢ်နီၣ်ဖံးဃာ်ဝဲ န့ၢ်ဂ့ၤဂ့ၤလီၤ. ဒီးပှၤအၤဖြံၤကၤဖိ (African) အါတက့ၢ်န့ၣ် ဘၣ်သူၣ်ဘၣ်သးဝဲ တၢ်မၤလိလၢ ပှၤသိၣ်လိအီၤဒ် ပှၤတဲပူအသိးန့ၣ်လီၤ.

၄. ဖဲပမၤစၢၤပှၤဂၤ ဘၣ်ဃးဒီးတၢ်မ့ၢ်တၢ်တီလၢ ပဟီၣ်ကဝီၤအပူၤအခါန့ၣ် ပသံကွၢ်လီၤက့ၤပသးလၢ တၢ်သံကွၢ်မနုၤသ့လဲၣ်.

^၄ လၢပဟီၣ်ကဝီၤအပူၤ, ပမ့ၢ်သူတၢ်ဖီၣ်ဃာ် တၢ်ကလုၢ်ဒီး အိးထီၣ်ပၠးဟံၣ်ကစၢ်လၢ ကဒိကနၣ်ဝဲလၢ အကျိာ်ဒၣ်ဝဲန့ၣ် ကကဲဘျုးလၢအဝဲသ့ၣ်အဂီၢ်ဒ်လဲၣ်. ပမ့ၢ်ဆှၢတၢ်ဖီၣ်ဃာ် တၢ်ကလုၢ်အံၤဆူ ပှၤဂၤအအိၣ်ခီဖျိ အံမ့ (e-mail) န့ၣ်ကကဲဘျုးလၢအဝဲသ့ၣ်အဂီၢ်ဒ်လဲၣ်. မ့ၢ်နဒီလိး (download) တၢ်ဖီၣ်ဃာ် တၢ်ကလုၢ်ဒီး ဖၢနုာ်အီၤဆူ CD အပူၤ ဒီးဟ့ၣ်လီၤဟံၣ်ကစၢ်လၢ အသးအိၣ်တၢ်မ့ၢ်တၢ်တီန့ၣ်ကသ့ဧါ. မ့ၢ်သ့န့ၣ်ဟ့ၣ်ဃုာ်အီၤဒီးလံာ်လဲၢ်တဘျီဃီကသ့ဧါ. ဒီးအံၣ်လဲးထြီနံး (electronic) လံာ်လဲၢ်, ဘရိၣ်ခၠၣ်, မဲးကစံ မ့တမ့ၢ် လံာ်ဖိတဖၣ်လၢ ပဒီလိးအီၤ ဒီးဆှၢအီၤဆူပှၤဂၤအအိၣ်ခီဖျိ အံမ့န့ၣ် ပဂံၢ်အီၤလၢ ပတၢ်စံၣ်တဲၤတဲလီၤ အတၢ်မၤနီၣ်လံာ်က့ သ့ဝဲလီၤ. တၢ်ဖီၣ်ဃာ် တၢ်ကလုၢ်သ့ၣ်တဖၣ်န့ၣ် ဘၣ်တၢ်ကတဲာ်ကတီၤအီၤဒ်သိး ကမၤစၢၤပှၤဘၣ်ဃးဒီး ပနီၢ်ကစၢ်တၢ်မၤလိလံာ်စီဆှံဒီး ကဖှံလီၤဘီမုၢ်တၢ်မ့ၢ်တၢ်တီအဂီၢ်န့ၣ်လီၤ.—၁ ကရံၣ်. ၃:၆.