ပကသူ တၢ်ဟ့ၣ်ကူၣ်လၢ ပကတဲသကိးတၢ်ဒီးပှၤဂၤအဂီၢ်ဒ်လဲၣ်

စးထီၣ်လၢ ၂၀၁၈ လါယနူၤအါရံၤန့ၣ်​ ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အကုခိၣ်န့ၣ်​ ပၣ်ဃုာ်ဒီး တၢ်ဟ့ၣ်ကူၣ်လၢ ပကတဲသကိးတၢ်ဒီးပှၤဂၤအဂီၢ်လီၤ. တၢ်သ့ၣ်တဖၣ်အံၤ ပသူအီၤကသ့ဒ်လဲၣ်.

ဖဲပဒိးန့ၢ်ဘၣ်​ ကၠိဖိမူဒါအခါ– ပကြၢးသူ တၢ်သံကွၢ်, လံာ်စီဆှံအဆၢ ဒီးတၢ်သံကွၢ်လၢခံတဘျီအဂီၢ် လၢအအိၣ်လၢ တၢ်ဟ့ၣ်ကူၣ်လၢ ပကတဲသကိးတၢ်ဒီးပှၤဂၤအဂီၢ်အပူၤလီၤ. ဘၣ်ဆၣ်အခီပညီတမ့ၢ်လၢ ပကဘၣ်တဲဒ် တၢ်ဂီၤမူအသိးကိးဖျၢၣ်ဒဲးဘၣ်. နသူ တၢ်ကတိၤအိးထီၣ်, တၢ်ဂ့ၢ်တၢ်ကျိၤ ဒီးတၢ်အဂၤလၢအလီၤဆီလိာ်အသးသ့ဝဲလီၤ. လၢနမူဒါအပူၤ တၢ်ဟံးစုနဲၣ်ကျဲလၢ အလီၤတံၢ်လီၤဆဲး မ့ၢ်တအိၣ်ဘၣ်သနာ်က့ နဟ့ၣ်လီၤလံာ်တဘ့ၣ်ဘ့ၣ်လၢ အအိၣ်လၢ တၢ်ပီးတၢ်လီလၢ တၢ်သိၣ်လိနဲၣ်လိတၢ်အဂီၢ်အပူၤသ့လီၤ.

လၢတၢ်စံၣ်တဲၤတဲလီၤ တၢ်မၤအပူၤ– တၢ်ဟ့ၣ်ကူၣ်လၢ ပကတဲသကိးတၢ်ဒီးပှၤဂၤအဂီၢ်န့ၣ်​ ဘၣ်တၢ်ကတဲာ်ကတီၤအီၤ ဒ်သိးကကဲထီၣ်တၢ်မၤစၢၤလၢပဂီၢ်လီၤ. ပှၤတဂၤမ့ၢ်သးအိၣ်တၢ်နီၢ်နီၢ် ဒီးမ့ၢ်အဲၣ်ဒိးသ့ၣ်ညါအါထီၣ်တၢ်န့ၣ်​ နသူတၢ်ဟ့ၣ်ကူၣ်လၢ တၢ်က့ၤအိၣ်သကိးဟံၣ်ကစၢ်အဂီၢ် ဒီးဆဲးတဲသကိးတၢ်ဒီးအီၤသ့ဝဲလီၤ. တၢ်ဟ့ၣ်ကူၣ်လၢ ပကတဲသကိးတၢ်ဒီးပှၤဂၤအဂီၢ်န့ၣ်​ နဆီတလဲအီၤဖဲအကြၢး မ့တမ့ၢ် နသူတၢ်ဂ့ၢ်တၢ်ကျိၤအဂၤသ့လီၤ. မ့ၢ်ပှၤလၢနဟီၣ်ကဝီၤအပူၤတဖၣ်​ ဘၣ်သူၣ်ဘၣ်သးဝဲ တၢ်ဂ့ၢ်တၢ်ကျိၤလၢ အပူၤကွံာ်တလါ မ့တမ့ၢ် လံာ်စီဆှံအဆၢလၢ အဂၤတဆၢဆၢဧါ. မ့ၢ်ပှၤလၢနဟီၣ်ကဝီၤအပူၤတဖၣ်​ သးစၢၢ်ဆၢဝဲအါလၢ တၢ်မၤအသး မ့တမ့ၢ် တၢ်ကစီၣ်တခါခါလၢ အကဲထီၣ်အသးလၢ လီၢ်ကဝီၤအပူၤန့ၣ်ဧါ. တၢ်ဟ့ၣ်ကူၣ်လၢ ပကတဲသကိးတၢ်ဒီးပှၤဂၤအဂီၢ်အံၤ ပမ့ၢ်သူအီၤ ဒ်လဲၣ်ဂ့ၤဒ်လဲၣ်ဂ့ၤ ပတၢ်တိာ်ပာ်န့ၣ်​ ကြၢးမ့ၢ်ဝဲပက “မၤတၢ်ခဲလၢာ် လၢတၢ်သးခု အကစီၣ်” အဂီၢ်လီၤ.—၁ ကရံၣ်. ၉:၂၂, ၂၃.