တူၢ်လိာ် ယဟိဝၤယွၤ အတၢ်မၤစၢၤ ခီဖျိတၢ်ထုကဖၣ်

ယဟိဝၤယွၤ မ့ၢ်ကစၢ်လၢအဒုးမဲထီၣ်​ တၢ်မ့ၢ်တၢ်တီအချံ ဒီးဒုးဒိၣ်ထီၣ်ထီထီၣ်ဝဲလၢ ပှၤတဂၤအသးပူၤလီၤ. (၁ ကရံၣ်. ၃:၆-၉) အဃိ, ပတၢ်စံၣ်တဲၤတဲလီၤတၢ်မၤ ကကဲထီၣ်လိၣ်ထီၣ်အဂီၢ် ပကဘၣ်သန့ၤပသးလၢ ယဟိဝၤယွၤ ဒ်သိးကမၤစၢၤပှၤ ဒီးပပှၤမၤလိ လံာ်စီဆှံဖိအဂီၢ်လီၤ.

နကဘၣ်​ ဃ့ဘါထုကဖၣ်​ ဒ်သိးယဟိဝၤယွၤ ကမၤစၢၤ နပှၤမၤလိလံာ်စီဆှံဖိ ဒ်သိးလဲၤခီဖျိဝဲ တၢ်ဆီၣ်သနံး ဒီးတၢ်ကီတၢ်ခဲတဖၣ်​ ကန့ၢ်အဂီၢ်လီၤ. (ဖံလံး. ၁:၉, ၁၀) ဃုတၢ်ဂ့ၢ်လီၤတံၢ်လီၤဆဲး ဒီးဃ့လၢ သးစီဆှံ ကဟံးစုနဲၣ်ကျဲ နတၢ်ဆိကမိၣ်​ ဒီးနတၢ်မၤတဖၣ်တက့ၢ်. (လူၤ. ၁၁:၁၃) သိၣ်လိနပှၤမၤလိ လံာ်စီဆှံဖိလၢ ကဘၣ်ဃ့ထုကဖၣ်ဒ်လဲၣ်​ ဒီးဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကဃ့ထုကဖၣ်တက့ၢ်. ဃ့ဘါထုကဖၣ်​ ဒီးနပှၤမၤလိလံာ်စီဆှံဖိ, ဃ့တၢ်လၢအဂီၢ် ဒီးဖဲနဃ့ထုကဖၣ်တၢ်အခါ ကိးထီၣ်အမံၤတက့ၢ်.

ကွၢ်တၢ်ဂီၤမူလၢအမ့ၢ် ဒ်သိးနကအိၣ်ဒီး တၢ်သူၣ်ခုသးခုလၢ တၢ်လဲၤဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်အဂီၢ်—တူၢ်လိာ်ယဟိဝၤယွၤ အတၢ်မၤစၢၤ— တၢ်ဃ့ထုကဖၣ်​ ဒီးစံးဆၢတၢ်သံကွၢ်တဖၣ်အံၤ–

• ဖဲနံထၣ်​ သိၣ်လိဖီဒ့ၣ်ညါ လံာ်စီဆှံအခါ အဝဲထံၣ်ဘၣ်​ တၢ်ကီတၢ်ခဲဒ်လဲၣ်.

• ၁ ကရံၣ်သူး ၃:၆ န့ၣ်​ မၤစၢၤ နံထၣ်ဒ်လဲၣ်.

• နံထၣ်အတၢ်ကီတၢ်ခဲ ဘၣ်ဂီၢ်က့ၤဒ်လဲၣ်.