ဂုာ်ကျဲးစၢးလၢ တၢ်စံၣ်တဲၤတဲလီၤတၢ်မၤအပူၤ | နတၢ်သးခု ကအါထီၣ်လၢ တၢ်သးခုကစီၣ်တၢ်မၤအပူၤအဂီၢ်
မၤစၢၤနပှၤမၤလိလံာ်စီဆှံဖိလၢ ကပာ်တ့ၢ်ကွံာ် လုၢ်လၢ်သကဲာ်ပဝးလၢအတဂ့ၤ
ပှၤလၢအသကဲာ်ပဝး မ့ၢ်ဂ့ၤမး အတၢ်ရ့လိာ်သးဒီး ယဟိဝၤယွၤ ကဂ့ၤဝဲလီၤ. (၁ ပ့း. ၁:၁၄-၁၆) ပှၤမၤလိလံာ်စီဆှံဖိတဂၤ မ့ၢ်ပာ်တ့ၢ်ကွံာ်ဝဲ လုၢ်လၢ်သကဲာ်ပဝးလၢ အတဂ့ၤတဖၣ်န့ၣ် ကကဲဘျုးလၢ အဟံၣ်ဖိဃီဖိ, အနီၢ်ကစၢ် အတၢ်အိၣ်ဆူၣ်အိၣ်ချ့ ဒီးကျိၣ်စ့ တၢ်လၢာ်ဘူၣ်လၢာ်စ့ၤအဂီၢ်လီၤ.
တဲနၢ်ပၢၢ်အီၤ ယဟိဝၤယွၤ အတၢ်ဘျၢလၢဘၣ်ဃးဒီး တၢ်သကဲာ်ပဝး, ဘၣ်မနုၤအဃိ ယဟိဝၤယွၤ ပာ်လီၤတၢ်ဘျၢလၢ အဝဲသ့ၣ်အဂီၢ်လဲၣ် ဒီးအဝဲသ့ၣ် မ့ၢ်မၤထွဲဝဲန့ၣ် ကကဲဘျုးလၢအဂီၢ်ဒ်လဲၣ်. သးစၢၢ်ဆၢလၢ နကမၤစၢၤနပှၤမၤလိလံာ်စီဆှံဖိလၢ ကဆီတလဲအတၢ်ဆိကမိၣ် ဒ်သိးအဝဲသ့ၣ်မၤဝဲ တၢ်လၢယဟိဝၤယွၤ အဲၣ်ဒိးလၢအမၤဝဲတဖၣ် ကန့ၢ်အဂီၢ်တက့ၢ်. (အ့း. ၄:၂၂-၂၄) ဒုးနာ်န့ၢ်အဝဲသ့ၣ်လၢ ဒ်သိးပာ်ပတုာ်ဝဲ တၢ်သကဲာ်ပဝးလၢ အမၤတ့ၢ်ဝဲယံာ်တ့ၢ်မးလံတဖၣ် ကန့ၢ်အဂီၢ် ယဟိဝၤယွၤ မၤစၢၤအဝဲသ့ၣ်သ့န့ၣ်တက့ၢ်. (ဖံလံး. ၄:၁၃) သိၣ်လိအဝဲသ့ၣ်လၢ ဖဲအထံၣ်ဘၣ် တၢ်ဆီၣ်သနံးလၢ ကမၤတၢ်ကမၣ်အခါ ကဃ့ကညး ယဟိဝၤယွၤလၢ ကမၤစၢၤအီၤအဂီၢ်တက့ၢ်. ဒ်သိးအဝဲသ့ၣ်မၤဝဲ တၢ်လၢအဘၣ်ကန့ၢ်အဂီၢ် မၤစၢၤအဝဲသ့ၣ်လၢ ကသ့ၣ်ညါ ဒီးဟးဆှဲး တၢ်အိၣ်သးလၢအတဂ့ၤတဖၣ်အဂီၢ်တက့ၢ်. အဝဲသ့ၣ် ပာ်တ့ၢ်ကွံာ် လုၢ်လၢ်သကဲာ်ပဝးလၢ အတဂ့ၤတဖၣ်ကန့ၢ်အဂီၢ် ဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကမၤတၢ်တမံၤမံၤလၢ ကကဲဘျုးလၢအဂီၢ်တက့ၢ်. ဖဲနထံၣ်ဘၣ်လၢ နပှၤမၤလိလံာ်စီဆှံဖိ ဆီတလဲအသးန့ၢ် ခီဖျိလၢ ယဟိဝၤယွၤ အတၢ်မၤစၢၤအခါ နကသးခုဒိၣ်မးလီၤ.
ကွၢ်တၢ်ဂီၤမူလၢအမ့ၢ် မၤစၢၤနပှၤမၤလိလံာ်စီဆှံဖိလၢ ကပာ်တ့ၢ်ကွံာ် လုၢ်လၢ်သကဲာ်ပဝးလၢအတဂ့ၤ ဒီးစံးဆၢ တၢ်သံကွၢ်တဖၣ်အံၤ–
တၢ်အိၣ်ဖှိၣ်သးပှၢ်တဖၣ် ဒီးနံထၣ် နာ်န့ၢ်ဝဲ ဖီဒ့ၣ်ညါန့ၣ် ပာ်ဖျါထီၣ်ဝဲဒ်လဲၣ်.
နံထၣ် မၤစၢၤဝဲ ဖီဒ့ၣ်ညါလၢ ကျဲဒ်လဲၣ်.
ဖီဒ့ၣ်ညါ ဃုယဟိဝၤယွၤ အတၢ်မၤစၢၤလၢ ကျဲဒ်လဲၣ်.