လၢခါဆူညါအဂီၢ် တၢ်ဟံးစုနဲၣ်ကျဲလၢ နနာ်န့ၢ်အီၤသ့န့ၣ် နဃုထံၣ်န့ၢ်အီၤ ကသ့ဖဲလဲၣ်

တၢ်ဂ့ၢ်လၢအပူၤကွံာ်တဖၣ် ပာ်ဖျါထီၣ်ဝဲလၢ ပှၤအါဂၤန့ၣ် ဒ်သိးအဝဲသ့ၣ် ကအိၣ်မူဘၣ် တၢ်အိၣ်မူလၢအဂ့ၤအဂီၢ် အဝဲသ့ၣ် နာ်န့ၢ်ဝဲ တၢ်ဟဲဝံ, ဃုဝဲတၢ်ကူၣ်ဘၣ်ကူၣ်သ့လၢ အပတီၢ်ထီ, တၢ်ထူးတၢ်တီၤ ဒီးဂုာ်ကျဲးစၢး ကဲပှၤလၢအဂ့ၤ. ဘၣ်ဆၣ် နမ့ၢ်သန့ၤသးလၢ တၢ်သ့ၣ်တဖၣ်အံၤန့ၣ် အကလီၤဂာ်ဒ်သိးဒီး နလဲၤလၢ တၢ်လီၢ်လၢ နတသ့ၣ်ညါဘၣ်တတီၤ ဒီးနမၢပှၤလၢ အလဲၤကျဲတဘၣ်ဘၣ်တဂၤ လဲၤဆှၢနၤလီၤ. အဃိ လၢတၢ်အိၣ်မူလၢ ခါဆူညါအဂီၢ် တၢ်ဟံးစုနဲၣ်ကျဲလၢ ပနာ်န့ၢ်အီၤသ့န့ၣ် အိၣ်ဒံးဧါ. အိၣ်ဝဲလီၤ.

တၢ်ဟံးစုနဲၣ်ကျဲလၢ အဂ့ၤကတၢၢ်

တချုးလၢ ပမၤတၢ်ဆၢတဲာ်ဒံးဘၣ်အခါ ညီနုၢ်န့ၣ် ပဃ့တၢ်ဟ့ၣ်ကူၣ်လၢ ပှၤလၢအသးပှၢ်န့ၢ်ပှၤ ဒီးပှၤလၢ အအိၣ်ဒီးတၢ်လဲၤခီဖျိ အါန့ၢ်ဒံးပှၤတဖၣ်အအိၣ်. ဒ်န့ၣ်အသိး လၢပတၢ်အိၣ်မူလၢ ခါဆူညါအဂီၢ် တၢ်ဟံးစုနဲၣ်ကျဲလၢ ပနာ်န့ၢ်အီၤသ့န့ၣ် ပဒိးန့ၢ်ဘၣ်အီၤလၢ ပှၤတဂၤလၢ အသးပှၢ်ဒိၣ်န့ၢ်ဒံးပှၤ ဒီးအတၢ်လဲၤခီဖျိ အိၣ်အါန့ၢ်ဒံးပှၤ အအိၣ်သ့. အတၢ်ဟ့ၣ်ကူၣ်တဖၣ်အံၤ အိၣ်ဝဲလၢ လံာ်တဘ့ၣ်လၢ ပှၤစးထီၣ်ကွဲးဝဲ လၢအပူၤကွံာ် အနံၣ် ၃,၅၀၀ ဃၣ်ဃၣ် အပူၤ. လံာ်တဘ့ၣ်အံၤ မ့ၢ်ဝဲ လံာ်တဘ့ၣ် လၢအဟဲလၢ ကစၢ်ယွၤအအိၣ် ဒီးပှၤကိးဝဲလၢ လံာ်စီဆှံ.

လံာ်စီဆှံန့ၣ် ဘၣ်မနုၤအဃိ ပနာ်န့ၢ်အီၤသ့လဲၣ်. ပနာ်န့ၢ်အီၤသ့ ခီဖျိလၢ ပှၤလၢအဒုးအိၣ်ထီၣ် လံာ်စီဆှံတဂၤအံၤန့ၣ် လၢမူခိၣ်ဒီးဟီၣ်ခိၣ်န့ၣ် အကဲပှၤလၢ အတၢ်လဲၤခီဖျိ အါကတၢၢ် ဒီးအသးပှၢ်ကတၢၢ်. အဝဲမ့ၢ် ပှၤတဂၤလၢ အအိၣ်ပာ်စၢၤ “လၢပျၢၤလံၤလံၤ” ဒီးအအိၣ်မူဝဲ “အစိၤစိၤအဃၣ်ဃၣ်လီၤ.” (ဒၤနံးယ့လး ၇:၉; စံးထီၣ်ပတြၢၤ ၉၀:၂) အဝဲမ့ၢ် ကစၢ်ယွၤလၢ အမ့ၢ်အတီ, “ယွၤလၢအတ့လီၤမူခိၣ်” ဒီး “ယွၤလၢအတ့လီၤဟီၣ်ခိၣ် . . . ဒီးဒုးအိၣ်ကျၢၤအီၤလီၤ.” (ယၡါယၤ ၄၅:၁၈) အဝဲတဲပှၤလၢ အမံၤန့ၣ်မ့ၢ်ဝဲ ယဟိဝၤ.—စံးထီၣ်ပတြၢၤ ၈၃:၁၈.

လံာ်စီဆှံန့ၣ် အဟဲလၢ တၢ်ဘၣ်တ့ကစၢ်လၢ အတ့လီၤပှၤဟီၣ်ခိၣ်ဖိခဲလၢာ် တဂၤန့ၣ်အအိၣ် အဃိ လံာ်စီဆှံ တတဲဝဲလၢ ကလုာ်ဒူၣ်တဒူၣ်ဒူၣ် မ့တမ့ၢ် အတၢ်ဆဲးတၢ်လၤတခါခါ ဂ့ၤဒိၣ်န့ၢ်ဒံး ကလုာ်ဒူၣ်လၢ အဂၤတဖၣ်ဘၣ်. လံာ်စီဆှံ အတၢ်ဟ့ၣ်ကူၣ်န့ၣ် ကဲဘျုးဝဲထီဘိ ဒီးအကဲဘျုးဝဲလၢ ပှၤလၢအအိၣ်လၢ တၢ်လီၢ်ကိးပူၤဒဲးအဂီၢ်. တကးဒံးဘၣ် လံာ်စီဆှံအံၤ ပှၤထုးထီၣ်ရၤလီၤအီၤလၢ ကျိာ်အါမး အါန့ၢ်ဒံး လံာ်အဂၤတဖၣ်a အဃိ ပှၤအိၣ်လၢ တၢ်လီၢ်ဖဲလဲၣ်ဂ့ၤ ဖဲလဲၣ်ဂ့ၤ ဖးဘၣ်ဝဲသ့ ဒီးအဒိးန့ၢ်ဘၣ် တၢ်ဟံးစုနဲၣ်ကျဲလၢ အအိၣ်လၢ လံာ်စီဆှံအပူၤသ့. တၢ်အုၣ်သးတဖၣ်အံၤ အလီၤပလိာ်ဒီး တၢ်လၢလံာ်စီဆှံ တဲဝဲလၢ–

“ကစၢ်ယွၤ တကွၢ်ဒိၣ်ဆံး အါစှၤတၢ်ဘၣ်. မ့မ့ၢ် ပှၤကိးကလုာ်ဒဲးလၢ အပျံၤအီၤ ဒီးမၤတၢ်လၢ အဘၣ်န့ၣ် အဝဲတူၢ်လိာ်ဝဲလီၤ.”—မၤတၢ် ၁၀:၃၄, ၃၅.

ဒ်မိပါတဖၣ် အဲၣ်ဝဲဒီးမၤစၢၤဝဲအဖိအသိး ယဟိဝၤယွၤစ့ၢ်ကီး မ့ၢ်ဝဲ ပၢ်လၢအပှဲၤဒီး တၢ်အဲၣ်တၢ်ကွံ ဒီးအသးအိၣ်မၤစၢၤပှၤ ခီဖျိအကလုၢ်ကထါ လံာ်စီဆှံ. (၂ တံၤမသ့း ၃:၁၆) ခီဖျိလၢ ကစၢ်ယွၤ တ့လီၤပှၤ ဒီးအသ့ၣ်ညါ တၢ်လၢအဂ့ၤကတၢၢ် လၢပဂီၢ်အဃိ ပနာ်န့ၢ် အကလုၢ်ကထါသ့.

တၢ်ဟံးစုနဲၣ်ကျဲလၢ ပနာ်န့ၢ်အီၤသ့

တၢ်လၢ လံာ်စီဆှံ တဲဝဲဘၣ်ဃးဒီး ခါဆူညါအဂ့ၢ်န့ၣ် ပနာ်န့ၢ်အီၤသ့ ခီဖျိလၢ တၢ်လၢလံာ်စီဆှံ တဲပာ်စၢၤဝဲလၢ အပူၤကွံာ် အနံၣ် ၂,၀၀၀ ဃၣ်ဃၣ်န့ၣ် ပထံၣ်ဘၣ်လၢ အဟဲလၢထီၣ်ပှဲၤထီၣ် လၢပစိၤခဲအံၤ.

တၢ်လၢလံာ်စီဆှံ တဲဝဲလၢ အကဟဲကဲထီၣ်သးတဖၣ်

“ပှၤကလုာ် တဒူၣ်ဒီးတဒူၣ် ကဒုးလိာ်အသး ဒီးဘီမုၢ်တဘ့ၣ် ဒီးတဘ့ၣ် ကဒုးလိာ်အသးလီၤ. ဒီးဟီၣ်ခိၣ် ကဟူးဝဲဖးဒိၣ်, တၢ်သၣ်ဝံၤလီၤဒိ ဒီးတၢ်ဆါသံသတြိာ်တဖၣ် ကအိၣ်ထီၣ်ဝဲလၢ တၢ်လီၢ်တတီၤ ဝံၤတတီၤ.”—လူၤကၣ် ၂၁:၁၀, ၁၁.

တၢ်လၢလံာ်စီဆှံ တဲဝဲဘၣ်ဃးဒီး ပှၤဟီၣ်ခိၣ်ဖိ အတၢ်ပာ်သူၣ်ပာ်သး

“လၢမုၢ်နံၤခံကတၢၢ်တဖၣ်အပူၤန့ၣ် တၢ်ဆၢကတီၢ်လီၤဆီလၢ အကီအခဲသပှၢ်ကတၢၢ်န့ၣ် ကဘၣ်ဝဲ မ့ၢ်လၢ ပှၤဟီၣ်ခိၣ်ဖိ ကအဲၣ်လီၤထဲအသး, ကအဲၣ်ကျိၣ်အဲၣ်စ့, ကပတြၢၤလီၤအသး, ကပာ်ထီၣ်ထီအသး, ကကတိၤထီဒါ ယွၤဒီးပှၤဂၤ, တဒိကနၣ်အမိၢ်အပၢ် အကလုၢ်ဘၣ်, တသ့ၣ်ညါ တၢ်စံးဘျုးစံးဖှိၣ်ဘၣ်, တတီဘၣ်, တအဲၣ်ပှၤကညီဘၣ်, ကမ့ၢ်ပှၤလၢအခိၣ်ကိၤ, ကတဲဟးဂီၤပှၤဂ့ၢ်, တအိၣ်ဒီး တၢ်ပၢၤသူၣ်ပၢၤသးဘၣ်, ကမ့ၢ်ပှၤလၢ အစုဆူၣ်ခီၣ်တကး, တအဲၣ်တၢ်လၢအဂ့ၤဘၣ်, ကမ့ၢ်ပှၤလၢ အဟ့ၣ်လီၤကွံာ်ပှၤဂၤ, ပှၤလၢအမၤဖဲအသး, ပှၤလၢ အပာ်ကဖၢလၢအသး ဒီးလၢကအဲၣ် ကစၢ်ယွၤအလီၢ် ကအဲၣ်ဝဲ တၢ်မုာ်တၢ်ပၠီၣ်လီၤ.”—၂ တံၤမသ့း ၃:၁-၄.

တၢ်လၢလံာ်စီဆှံ တဲပာ်စၢၤဝဲတဖၣ်န့ၣ် အဟဲလၢထီၣ်ပှဲၤထီၣ်ဝဲ လီၤတံၢ်လီၤဆဲး သ့လၢကျဲဒ်လဲၣ်. ပိာ်ခွါတဂၤလၢ အမံၤမ့ၢ် လိၤအဲ လၢအအိၣ်လၢ ဟီၣ်ကီၣ်န့ၣ် တဲဝဲလၢ “တၢ်လၢ လံာ်စီဆှံ တဲဆိပာ်စၢၤဝဲတဖၣ်န့ၣ် ပှၤကွဲးပာ်စၢၤဝဲလၢ အနံၣ်အါမးလံ. ပှၤဟီၣ်ခိၣ်ဖိ တဂၤမး တဲဆိပာ်စၢၤတၢ် လီၤတံၢ်လီၤဆဲးဒ်အံၤန့ၣ် တသ့ဘၣ်. အဃိ လံာ်စီဆှံန့ၣ် ကဘၣ်ဟဲလၢ ပှၤလၢအတၢ်လဲၤခီဖျိ အိၣ်အါန့ၢ်ဒံးပှၤ တဂၤန့ၣ် အအိၣ်.” ဘၣ်သ့ၣ်သ့ၣ် နၤစ့ၢ်ကီး နကဆိကမိၣ် ဒ်န့ၣ်လီၤ.

လၢလံာ်စီဆှံအပူၤန့ၣ် တၢ်လၢလံာ်စီဆှံ တဲဆိပာ်စၢၤဝဲတဖၣ် ဟဲလၢထီၣ်ပှဲၤထီၣ် အိၣ်ဝဲလၢ အကယၤတဖၣ်လံ.b အဃိ တၢ်သ့ၣ်တဖၣ်အံၤ ပာ်ဖျါထီၣ်ဝဲလၢ လံာ်စီဆှံန့ၣ် မ့ၢ်ဝဲ ကစၢ်ယွၤ အကလုၢ်ကထါနီၢ်ကီၢ်. တကးဒံးဘၣ် ယဟိဝၤယွၤ တဲဝဲလၢ “ယမ့ၢ်ကစၢ် . . . ဒီးတၢ်လီၤဂာ်လၢယၤ တအိၣ်ဘၣ်. လၢအခီၣ်ထံးယဒုးနဲၣ်တၢ်တုၤအကတၢၢ်.” (ယၡါယၤ ၄၆:၉, ၁၀) အဃိ တၢ်လၢလံာ်စီဆှံ တဲဝဲဘၣ်ဃးဒီး ခါဆူညါအဂ့ၢ်န့ၣ် နနာ်န့ၢ်အီၤသ့.

တၢ်ဟံးစုနဲၣ်ကျဲလၢ အကဲဘျုးလၢ ခဲအံၤဒီးလၢခါဆူညါ

နမ့ၢ်အိၣ်မူမၤထွဲ တၢ်ဟံးစုနဲၣ်ကျဲလၢ အအိၣ်လၢ လံာ်လၢပျၢၤ လၢအဟဲလၢ ကစၢ်ယွၤအအိၣ်တဘ့ၣ်န့ၣ် အပူၤန့ၣ် အကကဲဘျုးလၢနဂီၢ်. ပကကွၢ်သကိး တၢ်ဟံးစုနဲၣ်ကျဲ လၢလာ်အံၤတနီၤ.

တၢ်ဟံးစုနဲၣ်ကျဲအဂ့ၤ လၢအဘၣ်ဃးဒီး ကျိၣ်စ့ ဒီးတၢ်ဖံးတၢ်မၤ

“တၢ်အိၣ်ဘှံးပှဲၤပစုတတၢၤဒုၣ်ဂ့ၤန့ၢ် တၢ်ဖံးတၢ်မၤဒီးတၢ် ဂုာ်မၤန့ၢ်ကလံၤ ပှဲၤပစုခံတၢၤဒုၣ်တက့ၢ်လီၤ.” —စံၣ်တဲၤတဲလီၤတၢ် ၄:၆.

ပအိၣ်ဒီး ဟံၣ်မုာ်ဃီပၢၤ ကသ့ဒ်လဲၣ်

“သုဝဲတဂၤစုာ်စုာ် သုကဘၣ်အဲၣ် သုမါဒ်သုအဲၣ်လီၤ သုနီၢ်ကစၢ် အသးအသိးန့ၣ်လီၤ. ဒ်န့ၣ်အသိး မါစ့ၢ်ကီး ကဘၣ်ပာ်ကဲအဝၤ ဒိၣ်မးလီၤ.”—အ့းဖ့းစူး ၅:၃၃.

နဘၣ်ရ့ဒီး ပှၤဂၤဒ်လဲၣ်

“ဒီးလဲၤသဒၣ် တၢ်သးကဲၤထီၣ်န့ၣ်တက့ၢ်. မၤကိၢ်ထီၣ်နသး တုၤနမၤတၢ်အၢန့ၣ်တဂ့ၤ.”—စံးထီၣ်ပတြၢၤ ၃၇:၈.

နမ့ၢ်အိၣ်မူမၤထွဲ တၢ်လၢလံာ်စီဆှံ တဲဝဲန့ၣ် နကအိၣ်ဒီး တၢ်သးခုလၢခဲအံၤ ဒီးအိၣ်ဒီး တၢ်အိၣ်မူလၢအဂ့ၤ လၢခါဆူညါ. တကးဒံးဘၣ် လၢလံာ်စီဆှံအပူၤန့ၣ် ကစၢ်ယွၤ အၢၣ်လီၤဝဲလၢ ခါဆူညါန့ၣ် အဝဲကမၤန့ၢ်ပှၤ တၢ်လၢလာ်တဖၣ်အံၤ.

တၢ်ဃူတၢ်ဖိး ဒီးတၢ်မုာ်တၢ်ခုၣ်

“မ့မ့ၢ်ပှၤလၢအသးစူၤ ကန့ၢ်ဘၣ်သါထံဧိၤကီၢ်ဧိၤ, ဒီးကမုာ်လၤတၢ်လၢ တၢ်ဃူတၢ်ဖိးအါအါကလဲာ်အပူၤလီၤ.”—စံးထီၣ်ပတြၢၤ ၃၇:၁၁.

ပှၤကိးဂၤဒဲး ကအိၣ်ဒီးအဟံၣ်အဃီ ဒီးကအီၣ်ဘၣ်အီဘၣ်

“ဒီးကသူၣ်ဟံၣ်, ဒီးကအိၣ်ဝဲဆိးဝဲလၢအပူၤ, ဒီးကသူၣ်စပံးအလီၢ်, ဒီးကအီၣ်အတၤသၣ်လီၤ.”—ယၡါယၤ ၆၅:၂၁.

တၢ်ဆူးတၢ်ဆါ ဒီးတၢ်သံ တအိၣ်လၢၤဘၣ်

“တၢ်သံတအိၣ်လၢၤဘၣ်. ဒီးတၢ်သူၣ်အုးသးအုးမ့ၢ်ဂ့ၤ, တၢ်ဟီၣ်တၢ်ယၢၤမ့ၢ်ဂ့ၤ, တၢ်လၢအဆါမ့ၢ်ဂ့ၤ, တအိၣ်လၢၤဘၣ်.”—လီၣ်ဖျါ ၂၁:၄.

ဒ်သိး နကအိၣ်ဒီး တၢ်အိၣ်မူလၢအဂ့ၤ လၢခါဆူညါအဂီၢ် နကဘၣ်မၤဒ်လဲၣ်. တၢ်ဂ့ၢ်လၢခံတခါ ကပာ်ဖျါထီၣ်ဝဲ.

a နမ့ၢ်အဲၣ်ဒိး သ့ၣ်ညါအါထီၣ် ဘၣ်ဃးဒီး ပှၤကွဲးကျိာ်ထံ လံာ်စီဆှံ ဒီးပှၤထုးထီၣ်ရၤလီၤ လံာ်စီဆှံ အဂ့ၢ်န့ၣ် လဲၤနုာ်လီၤကွၢ်လၢ www.jw.org ဒီးကွၢ်လၢ တၢ်ဂ့ၢ်ခိၣ်တီလၢအမ့ၢ် လံာ်စီဆှံ အတၢ်သိၣ်လိတဖၣ် > တၢ်စံၣ်စိၤတဲစိၤ ဒီး လံာ်စီဆှံ.

b နမ့ၢ်အဲၣ်ဒိး သ့ၣ်ညါအါထီၣ် ဘၣ်ဃးဒီး လံာ်စီဆှံအဂ့ၢ်န့ၣ် ကွၢ်လံာ်လၢအမ့ၢ် လံာ်စီဆှံ ကသိၣ်လိပှၤ တၢ်ဂ့ၢ်မနုၤလဲၣ် တၢ်မၤလိ ၂ လၢယဟိဝၤပှၤအုၣ်အသးတဖၣ် ထုးထီၣ်ဝဲ. ဒ်သိး နကဖးအီၤလၢ online အဖီခိၣ်အဂီၢ် လဲၤနုာ်လီၤကွၢ်လၢ www.jw.org. ဒီးကွၢ်လၢ တၢ်ဂ့ၢ်ခိၣ်တီ လၢအမ့ၢ် လံာ်လဲၢ်တဖၣ် > လံာ်တဖၣ် ဒီး ဘရိၣ်ခၠၣ်တဖၣ်.