နဆိကမိၣ်လၢ လံာ်စီဆှံန့ၣ် မ့ၢ်လံာ်ဒ်လဲၣ်တဘ့ၣ်လဲၣ်
နကစံးဆၢလၢလံာ်စီဆှံန့ၣ် . . .
မ့ၢ်လံာ်တဘ့ၣ်လၢ ပှၤဟီၣ်ခိၣ်ဖိ ဒုးအိၣ်ထီၣ်ဝဲ.
မ့ၢ်တၢ်တဲမုာ်နၢ်.
မ့ၢ်ကစၢ်ယွၤအကလုၢ်ကထါ.
လံာ်စီဆှံတဲဝဲဒ်လဲၣ်
“တၢ်ကွဲးအသးခဲလၢာ်န့ၣ် ဘၣ်တၢ်ကွဲးအီၤ ခီဖျိလၢ ကစၢ်ယွၤအသးစီဆှံ အတၢ်ဟံးစုနဲၣ်ကျဲ.”—၂ တံၤမသ့း ၃:၁၆, ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ.
လံာ်စီဆှံတဆၢအံၤ အကဲဘျုးလၢနဂီၢ်ဒ်လဲၣ်
ခီဖျိလၢ လံာ်စီဆှံပာ်ဖျါထီၣ် ပတၢ်သံကွၢ်လၢအရ့ဒိၣ်တဖၣ် အတၢ်စံးဆၢအဃိ ပန့ၢ်ဘၣ် တၢ်သူၣ်မံသးမုာ်. —ကတိၤဒိ ၂:၁-၅.
လံာ်စီဆှံ အိၣ်ဒီးတၢ်ဟံးစုနဲၣ်ကျဲလၢ အဂ့ၤကတၢၢ်လၢ ပဂီၢ်.—စံးထီၣ်ပတြၢၤ ၁၁၉:၁၀၅.
လံာ်စီဆှံ ဟ့ၣ်ပှၤ တၢ်မုၢ်လၢ်နီၢ်ကီၢ်.—ရိမ့ၤ ၁၅:၄.
တၢ်လၢလံာ်စီဆှံတဲဝဲန့ၣ် ပနာ်အီၤသ့ သပှၢ်ကတၢၢ်ဧါ
ပနာ်အီၤသ့ခီဖျိလၢ တၢ်ဂ့ၢ်လၢ တၢ်ဖီလာ်အဃိ.
တၢ်ဂ့ၢ်တခါဒီးတခါလၢ လံာ်စီဆှံအပူၤန့ၣ် ဘၣ်လိာ်အသးခဲလၢာ်. လံာ်စီဆှံန့ၣ် ပှၤကွဲးအီၤယံာ်ဝဲ အနံၣ် ၁,၆၀၀ ဘျဲၣ် ဒီးပှၤကွဲးလံာ်စီဆှံန့ၣ် အိၣ်ဝဲအဂၤ ၄၀ ဃၣ်ဃၣ်. ပှၤသ့ၣ်တဖၣ်အံၤ အါတက့ၢ်န့ၣ် တထံၣ်လိာ်သးနီတဘျီဘၣ်. ဘၣ်ဆၣ် တၢ်ဂ့ၢ်တၢ်ကျိၤလၢ အဝဲသ့ၣ်ကွဲးဝဲတဖၣ်န့ၣ် ဘၣ်လိာ်အသးခဲလၢာ် ဒီးအတၢ်ဂ့ၢ်မိၢ်ပှၢ် မ့ၢ်ဒၣ်တမံၤဃီ.
တၢ်ဂ့ၢ်တၢ်ကျိၤ လၢအဘၣ်လီၤတံၢ်လီၤဆဲး. ပှၤလၢအကွဲးဝဲ တၢ်စံၣ်စိၤတဲစိၤတဖၣ်န့ၣ် ညီနုၢ်တကွဲးဖျါထီၣ်ဝဲ အပှၤကလုာ်အတၢ်ကမၣ်တဖၣ်ဘၣ်. ဘၣ်ဆၣ် ပှၤလၢအကွဲးလံာ်စီဆှံန့ၣ် ကွဲးနီၣ်ဃာ်ဝဲ အဝဲသ့ၣ်အနီၢ်ကစၢ် အတၢ်ကမၣ် ဒီးအပှၤကလုာ် အတၢ်ကမၣ်.—၂ ကွဲးနီၣ်တၢ် ၃၆:၁၅, ၁၆; စံးထီၣ်ပတြၢၤ ၅၁:၁-၄.
တၢ်ဂ့ၢ်လၢ လံာ်စီဆှံတဲဆိပာ်စၢၤန့ၣ် ပနာ်အီၤသ့. အဒိ, ပှၤကမၤဟးဂီၤကွံာ် ဝ့ၢ်ဘၤဘူၤလိၣ်န့ၣ် လံာ်စီဆှံတဲဆိပာ်စၢၤဝဲ အနံၣ် ၂၀၀ ဃၣ်ဃၣ်ညါ. (ယၡါယၤ ၁၃:၁၇-၂၂) လံာ်စီဆှံ ပာ်ဖျါထီၣ်ဝဲ ဝ့ၢ်ဘၤဘူၤလိၣ်ကလီၤပှီၢ်ဒ်လဲၣ် တကးဒံးဘၣ် အပာ်ဖျါထီၣ်ဝဲ ပှၤတဂၤလၢ အကမၤနၢၤဝ့ၢ်တဖျၢၣ်အံၤ အမံၤစ့ၢ်ကီး.—ယၡါယၤ ၄၅:၁-၃.
တၢ်ဂ့ၢ်အါမံၤလၢ လံာ်စီဆှံ တဲဆိပာ်စၢၤဝဲန့ၣ် ဟဲလၢထီၣ်ပှဲၤထီၣ် လီၤတံၢ်လီၤဆဲးလံ. လံာ်စီဆှံ ကဲယွၤအကလုၢ်ကထါ အဃိ အကဘၣ် ဟဲလၢထီၣ်ပှဲၤထီၣ်ဒ်အံၤလီၤမ့ၢ်ဧါ.—၂ ပ့းတရူး ၁:၂၁.
ဆိကမိၣ်ကွၢ်
ကစၢ်ယွၤအကလုၢ်ကထါန့ၣ် မၤဂ့ၤထီၣ် နတၢ်အိၣ်မူ ကသ့ဒ်လဲၣ်.
လံာ်စီဆှံ ပာ်ဖျါထီၣ်ဝဲ တၢ်စံးဆၢဖဲ ယၡါယၤ ၄၈:၁၇, ၁၈ ဒီး ၂ တံၤမသ့း ၃:၁၆, ၁၇ အပူၤ.