တၢ်အဘၣ် ဒီးတၢ်အကမၣ်– လံာ်စီဆှံ အိၣ်ဒီးတၢ်ဟ့ၣ်ကူၣ်လၢ ပနာ်န့ၢ်အီၤသ့ သပှၢ်တၢၢ်
ပမ့ၢ်ဆၢတဲာ်တၢ် ဒ်ပတၢ်ဆိကမိၣ် ဒီးတၢ်တူၢ်ဘၣ် အိၣ်ဝဲအသိး ဒီးဆၢတဲာ်တၢ်ဒ် ပှၤဂၤဆၢတဲာ်ဝဲအသိးန့ၣ် အကကဲဘျုးဧါ တကဲဘျုးဧါန့ၣ် ပတဲလီၤတံၢ် တသ့ဘၣ်. ဘၣ်မနုၤအဃိ ပတဲဒ်န့ၣ်လဲၣ်န့ၣ် လံာ်စီဆှံ ပာ်ဖျါထီၣ်န့ၢ်ပှၤ. တကးဒံးဘၣ် လံာ်စီဆှံန့ၣ် အအိၣ်ဒီး တၢ်ဟ့ၣ်ကူၣ်လၢ ပနာ်န့ၢ်အီၤသ့ သပှၢ်တၢၢ်. လံာ်စီဆှံ အတၢ်ဟ့ၣ်ကူၣ်န့ၣ် ကမၤစၢၤပှၤဒ်သိး ပကဆၢတဲာ် တၢ်လၢအဘၣ် လၢကဟ့ၣ်ပှၤ တၢ်သးခု.
တၢ်ဟ့ၣ်ကူၣ်လၢ ပလိၣ်ဘၣ် သပှၢ်တၢၢ်
လၢလံာ်စီဆှံပူၤန့ၣ် ယဟိဝၤယွၤa တဲဝဲလၢ ပှၤဟီၣ်ခိၣ်ဖိ လိၣ်ဘၣ် ကစၢ်ယွၤ အတၢ်မၤစၢၤ ဒီးအဝဲသ့ၣ် ဟံးစုနဲၣ်ကျဲလီၤအသး တသ့ဘၣ်. (ယံးရမံယၤ ၁၀:၂၃) အဃိ လၢလံာ်စီဆှံပူၤန့ၣ် ယဟိဝၤယွၤ မၢပှၤကွဲးလီၤစ့ၢ်ကီး တၢ်ဟ့ၣ်ကူၣ် လၢအဂ့ၤအါမး. ယဟိဝၤယွၤ အဲၣ်ပှၤဟီၣ်ခိၣ်ဖိ ဒီးအတဘၣ်သးလၢ ပကဆၢတဲာ်တၢ်လၢ ကမၤဘၣ်ဒိပှၤ ဒီးထံၣ်ဘၣ် တၢ်ကီတၢ်ခဲလၢ ပတၢ်ဆၢတဲာ်အဃိဘၣ်. (၅ မိၤၡ့ ၅:၂၉; ၁ ယိၤဟၣ် ၄:၈) တကးဒံးဘၣ် ယဟိဝၤယွၤကဲဝဲ ပတၢ်ဘၣ်တ့ကစၢ်အဃိ အအိၣ်ဒီး တၢ်ကူၣ်သ့ ဒီးတၢ်သ့ၣ်ညါ အါမး ဒီးအဟ့ၣ်ပှၤ တၢ်ဟ့ၣ်ကူၣ် လၢအဂ့ၤကတၢၢ်သ့. (စံးထီၣ်ပတြၢၤ ၁၀၀:၃; ၁၀၄:၂၄) သနာ်က့ ယဟိဝၤယွၤ တမၢဆူၣ်ပှၤလၢ ပကမၤထွဲ အတၢ်သိၣ်တၢ်သီတဖၣ်ဘၣ်.
အဒိ ဒ်သိး နီၢ်အံၣ်အု ဒီးစီၤအၤဒၣ် ကအိၣ်ဒီး တၢ်သးခုနီၢ်ကီၢ်အဂီၢ် ယဟိဝၤယွၤ ဟ့ၣ်အဝဲသ့ၣ် တၢ်လၢအလိၣ်ဘၣ်ဝဲခဲလၢာ်. (၁ မိၤၡ့ ၁:၂၈, ၂၉; ၂:၈, ၁၅) အဟ့ၣ်စ့ၢ်ကီး အဝဲသ့ၣ် တၢ်မၤလိာ် ယိယိဖိတခါ ဒီးအမုၢ်လၢ်ဝဲလၢ အဝဲသ့ၣ် ကဒိကနၣ်ဒီးမၤထွဲဝဲ. သနာ်က့ အဝဲသ့ၣ် ကပာ်လီၤသးလၢ ကဒိကနၣ်ဒီးမၤထွဲ ယဟိဝၤယွၤ အတၢ်မၤလိာ်ဧါ တမၤထွဲဘၣ်ဧါန့ၣ် ယဟိဝၤယွၤ ပျဲအဝဲသ့ၣ် ဆၢတဲာ်လၢ အနီၢ်ကစၢ်. (၁ မိၤၡ့ ၂:၉, ၁၆, ၁၇) ပထံၣ်ဘၣ်လၢ နီၢ်အံၣ်အု ဒီးစီၤအၤဒၣ် ဆၢတဲာ်လီၤသးလၢ တဒိကနၣ်ဒီးမၤထွဲ ယဟိဝၤယွၤ အတၢ်မၤလိာ်ဘၣ် ဒီးဘၣ်သး အိၣ်မူဒ် အနီၢ်ကစၢ် တၢ်ဘၣ်သးအဃိ လီၤသးအုးညါ. (၁ မိၤၡ့ ၃:၆) လၢခံ တၢ်ကဲထီၣ်သးဒ်လဲၣ်. ဘၣ်ဃးဒီး တၢ်အဘၣ် ဒီးတၢ်အကမၣ်န့ၣ် ပှၤဟီၣ်ခိၣ်ဖိ မၤထွဲဝဲ ဒ်အတၢ်ထံၣ်အိၣ်ဝဲအသိး အဃိ အဝဲသ့ၣ် တအိၣ်ဒီး တၢ်သးခုဘၣ်. တကးဒံးဘၣ် တၢ်ဆၢကတီၢ် လဲၤပူၤကွံာ် လၢအနံၣ်တဖၣ် ဒီးပထံၣ်ဘၣ်လၢ ပှၤဟီၣ်ခိၣ်ဖိ တမၤထွဲ ကစၢ်ယွၤ အတၢ်သိၣ်တၢ်သီဘၣ်အဃိ အဝဲသ့ၣ် တအိၣ်ဒီး တၢ်သးခုနီၢ်ကီၢ်ဘၣ်.—စံၣ်တဲၤတဲလီၤတၢ် ၈:၉.
ပအိၣ်တၢ်လီၢ် ဖဲလဲၣ်ဂ့ၤ ဖဲလဲၣ်ဂ့ၤ ပဒိၣ်ထီၣ်ဘၣ် ဒ်လဲၣ်ဂ့ၤ ဒ်လဲၣ်ဂ့ၤ လံာ်စီဆှံ မၤစၢၤပှၤ ဒ်သိး ပကဆၢတဲာ်တၢ် လၢအဘၣ်သ့. (၂ တံၤမသ့း ၃:၁၆, ၁၇; ကွၢ်တၢ်လွံၢ်နၢၣ် လၢအမ့ၢ် “လံာ်တဘ့ၣ်လၢ ပှၤခဲလၢာ်အဂီၢ်.”) လံာ်စီဆှံ မၤစၢၤပှၤ သ့ဒ်လဲၣ်န့ၣ် ဃုသ့ၣ်ညါကွၢ်.
လံာ်စီဆှံန့ၣ် ပကိးအီၤလၢ “ကစၢ်ယွၤ အကလုၢ်ကထါ.”—၁ သ့းစၤလနံ ၂:၁၃. ဘၣ်မနုၤအဃိ ပကိးအီၤဒ်န့ၣ်လဲၣ်. ဒ်သိး နကသ့ၣ်ညါအဂီၢ် ကွၢ်တၢ်ဂီၤမူ လၢအမ့ၢ် ပှၤလၢအဒုးအိၣ်ထီၣ်လံာ်စီဆှံန့ၣ် မ့ၢ်မတၤတဂၤလဲၣ် လၢ jw.org.
လံာ်စီဆှံ ပာ်ဖျါထီၣ် ကစၢ်ယွၤ အတၢ်ဟံးစုနဲၣ်ကျဲ
ယဟိဝၤယွၤ ရ့ဒီးပှၤဟီၣ်ခိၣ်ဖိ ဒ်လဲၣ်န့ၣ် လံာ်စီဆှံ ပာ်ဖျါထီၣ်ဝဲ လီၤတံၢ်လီၤဆဲး. ဒီးလၢလံာ်စီဆှံပူၤန့ၣ် အိၣ်ဒီး ကစၢ်ယွၤ အတၢ်ထံၣ် ဘၣ်ဃးဒီး တၢ်အဘၣ် ဒီးတၢ်အကမၣ်, အိၣ်ဒီး တၢ်ဟ့ၣ်ပလီၢ် ဒီးတၢ်ဂ့ၢ်လၢ အကဲဘျုးလၢပဂီၢ်. (စံးထီၣ်ပတြၢၤ ၁၉:၇, ၁၁) တၢ်ဟံးစုနဲၣ်ကျဲ လၢပမၤလိဘၣ်တဖၣ်န့ၣ် အဘၣ်ထီဘိ ဒီးအကမၤစၢၤပှၤဒ်သိး ပကဆၢတဲာ် တၢ်လၢအဘၣ် လၢပတၢ်အိၣ်မူ ကိးနံၤဒဲး.
အဒိ ဆိကမိၣ်ကွၢ် တၢ်ဟ့ၣ်ကူၣ်လၢ ပဖးဘၣ်ဖဲ ကတိၤဒိ ၁၃:၂၀. ဖဲန့ၣ်တဲဝဲလၢ “ပှၤလၢ အရ့ဒီး ပှၤကူၣ်တၢ်သ့န့ၣ် ကကဲထီၣ် ပှၤကူၣ်တၢ်သ့, မ့မ့ၢ် ပှၤလၢ အဒီသကိးဒီး ပှၤဟးဂီၤဖိန့ၣ် ကထံၣ်ဘၣ် တၢ်ကီတၢ်ခဲ.” တၢ်ဟံးစုနဲၣ်ကျဲတခါအံၤ လၢညါန့ၣ် အကဲဘျုး ဒီးလၢပစိၤခဲအံၤစ့ၢ်ကီး အကဲဘျုးဒိၣ်မး. လၢလံာ်စီဆှံပူၤန့ၣ် တၢ်ဟံးစုနဲၣ်ကျဲ ဒီးတၢ်ဟ့ၣ်ကူၣ်လၢအဂ့ၤ အိၣ်ဒံးဒီဒူၣ်ညါ.—ကွၢ်တၢ်လွံၢ်နၢၣ် လၢအမ့ၢ် “လံာ်စီဆှံ အတၢ်ဟ့ၣ်ကူၣ်လၢ အကဲဘျုးထီဘိ.”
ဘၣ်သ့ၣ်သ့ၣ် နကဆိကမိၣ်ဘၣ်ဒ်အံၤ– ‘လံာ်စီဆှံ အတၢ်ဟ့ၣ်ကူၣ် မၤစၢၤယၤလၢ ပစိၤခဲအံၤသ့န့ၣ် ယသ့ၣ်ညါ သ့ဒ်လဲၣ်.’ တၢ်ဂ့ၢ်လၢခံတခါ ကပာ်ဖျါထီၣ် တၢ်လဲၤခီဖျိတနီၤ.
a ယဟိဝၤန့ၣ် မ့ၢ်ဝဲ ကစၢ်ယွၤအမံၤ.—စံးထီၣ်ပတြၢၤ ၈၃:၁၈.