တၢ်မၤလိ ၂၇
ဘၣ်မနုၤအဃိ ပကဘၣ်ပျံၤ ယဟိဝၤယွၤလဲၣ်
“ပှၤလၢအပျံၤ ယဟိဝၤယွၤန့ၣ် အိၣ်ဒီးတၢ်ရ့လိာ်သးဒီးအီၤ ဘူးဘူးတံၢ်တံၢ်.”—စံးထီၣ်ပတြၢၤ ၂၅:၁၄.
တၢ်သးဝံၣ် ၈ ယဟိဝၤမ့ၢ်ပတၢ်ပူၤဖျဲးလီၢ်
တၢ်မၤလိအံၤ အတၢ်တိာ်ပာ်a
၁-၂. ဒ်သိး ပကကဲဘၣ် ယဟိဝၤယွၤ အသကီး ဘူးဘူးတံၢ်တံၢ်အဂီၢ် စံးထီၣ်ပတြၢၤ ၂၅:၁၄ ပာ်ဖျါဝဲလၢ ပကဘၣ်မၤ မနုၤလဲၣ်.
နမ့ၢ်ဘၣ်သး ဒီသကီးဒီးပှၤတဂၤထီဘိန့ၣ် နကဘၣ်အိၣ်ဒီး တၢ်ပာ်သူၣ်ပာ်သးဒ်လဲၣ်. ဘၣ်သ့ၣ်သ့ၣ် နကတဲလၢ နကဘၣ် အဲၣ်လိာ်သး ဒီးမၤစၢၤလိာ်သး. ဒီးနကဒီသကီးဒီး ပှၤတဂၤအဂီၢ် နကဘၣ်ပျံၤအီၤန့ၣ် ဘၣ်သ့ၣ်သ့ၣ် နတဆိမိၣ်ဘၣ်ဘၣ်. ဘၣ်ဆၣ် ဒ်လံာ်စီဆှံအဆၢ လၢတၢ်မၤလိအံၤအဂီၢ် ပာ်ဖျါဝဲအသိး ပှၤလၢအဘၣ်သးကဲ ယဟိဝၤယွၤ အသကီး ဘူးဘူးတံၢ်တံၢ်န့ၣ် အကဘၣ် “ပျံၤ ယဟိဝၤယွၤ.”—ဖး စံးထီၣ်ပတြၢၤ ၂၅:၁၄.
၂ ပမၤယဟိဝၤယွၤအတၢ်မၤ မ့ၢ်ယံာ်ထဲလဲၣ်နာ်က့ ပဝဲခဲလၢာ်န့ၣ် ပကဘၣ် ဆဲးပာ်ကဲ ယဟိဝၤယွၤ ဒီးပျံၤအီၤ. ပပျံၤကစၢ်ယွၤန့ၣ် အဲၣ်ဒိးတဲဝဲ အခီပညီဒ်လဲၣ်. ပမၤအါထီၣ် တၢ်ပျံၤယဟိဝၤယွၤ လၢအဂ့ၤတကလုာ် ကသ့ဒ်လဲၣ်. ဒီးဘၣ်ဃးဒီး တၢ်ပျံၤကစၢ်ယွၤန့ၣ် ပမၤလိန့ၢ်တၢ်လၢ စီၤဧိၤဘါဒယၤ, ပှၤလုၢ်တၢ်ခိၣ် အဒိၣ်ကတၢၢ် စီၤယဟိၤယဒါ ဒီးစီၤပၤယိၤအၣ်အအိၣ် ကသ့ဒ်လဲၣ်.
ပပျံၤကစၢ်ယွၤန့ၣ် အဲၣ်ဒိးတဲဝဲ အခီပညီဒ်လဲၣ်
၃. ပပျံၤမနုၤလဲၣ် ဒီးတၢ်ပျံၤ လၢအဂ့ၤတကလုာ်အံၤ ကမၤစၢၤပှၤဒ်လဲၣ်.
၃ တၢ်ပျံၤကစၢ်ယွၤန့ၣ် အခီပညီမ့ၢ်ဝဲ ပပျံၤလၢ ပကမၤဘၣ်ဒိဘၣ် ကစၢ်ယွၤအသး. ပမ့ၢ်ပျံၤတၢ်န့ၣ် ဖျါလၢအတဂ့ၤဘၣ် ဘၣ်ဆၣ် တၢ်ပျံၤန့ၣ် ကမၤစၢၤပှၤလၢ ပကအိၣ်ပလီၢ်သး ဒီးဆၢတဲာ်တၢ်လၢအဘၣ်. အဒိ ဖဲပထီၣ်ကစၢၢ်ဖးထီအခါ ပပျံၤလၢ ပကလီၤတဲာ်လၢ တၢ်တြီၤပူၤအဃိ ပတဟးလၢ ကစၢၢ်အနၢၣ်ထံးဘၣ်. ဒီးတၢ်အိၣ်သးလၢ အလီၤဘၣ်ယိၣ် မ့ၢ်ကဲထီၣ်န့ၣ် ပပျံၤလၢ ပကဘၣ်ဒိအဃိ ပဟးထီၣ်ကွံာ်ဖဲန့ၣ်တဘျီဃီ. ပဘၣ်ယိၣ် ဒီးပပျံၤလၢ ပတၢ်ရ့လိာ်သးဒီး ပှၤတဂၤဂၤ ကဟးဂီၤကွံာ်အဃိ ပတတဲတၢ်လၢ ကမၤဆါအသး ဒီးပတမၤတၢ်လၢ ကမၤဘၣ်ဒိအီၤဘၣ်.
၄. မုၣ်ကီၤလံၢ် ဘၣ်သးလၢ ပကထံၣ်ယဟိဝၤယွၤ ဒ်လဲၣ်.
၄ မုၣ်ကီၤလံၢ် ဘၣ်သးလၢ ပှၤဟီၣ်ခိၣ်ဖိ ကပျံၤယဟိဝၤယွၤ လၢအတဂ့ၤတကလုာ် ဒီးရ့ဒီးယဟိဝၤယွၤ တဘူၣ်ဘၣ်. စီၤအလံဖးစး အတၢ်ကတိၤ ပာ်ဖျါထီၣ်ဝဲလၢ မုၣ်ကီၤလံၢ် ဘၣ်သးလၢ ပကဆိမိၣ်လၢ ယဟိဝၤယွၤန့ၣ် အကဲပှၤလၢအသးဒိၣ်, အဘၣ်သး စံၣ်ညီၣ်ပှၤ ဒီးပမၤတၢ်တမံၤဂ့ၤတမံၤဂ့ၤနာ်က့ တဘၣ်အသးနီတဘျီဘၣ်. (ယိၤဘး ၄:၁၈, ၁၉) တကးဒံးဘၣ် မုၣ်ကီၤလံၢ် ဘၣ်သးလၢ ပကပျံၤယဟိဝၤယွၤ ဒိၣ်တလၢ တုၤလၢ ပမၤအတၢ်မၤ တဘူၣ်လၢၤဘၣ်. ဘၣ်ဆၣ် ဒ်သိးပတလီၤဘၣ်လၢ မုၣ်ကီၤလံၢ် အပျံၤသကွီၤတဂ့ၤအဂီၢ် ပကဘၣ်အိၣ်ဒီး တၢ်ပျံၤယဟိဝၤယွၤ လၢအဂ့ၤတကလုာ်.
၅. ပပျံၤကစၢ်ယွၤန့ၣ် အဲၣ်ဒိးတဲဝဲ အခီပညီဒ်လဲၣ်.
၅ ပှၤလၢအအိၣ်ဒီး တၢ်ပျံၤယဟိဝၤယွၤ လၢအဂ့ၤတကလုာ်န့ၣ် အအဲၣ်ယဟိဝၤယွၤ ဒီးအတဘၣ်သးမၤ တၢ်လၢကမၤဟးဂီၤ အတၢ်ရ့လိာ်သးဒီး ယဟိဝၤယွၤ နီတမံၤဘၣ်. ယ့ၣ်ၡူးန့ၣ်အ “ပျံၤကစၢ်ယွၤ” ဒ်န့ၣ်. (ဧ့ၤဘြံၤ ၅:၇) အဃိ ယ့ၣ်ၡူးအိၣ်ဒီး တၢ်ပျံၤယဟိဝၤယွၤ လၢအဂ့ၤတကလုာ်. (ယၡါယၤ ၁၁:၂, ၃) ယ့ၣ်ၡူး အဲၣ်ယဟိဝၤယွၤ ဒီးအဒိကနၣ် ယဟိဝၤယွၤ အကလုၢ်. (ယိၤဟၣ် ၁၄:၂၁, ၃၁) ဒ်ယ့ၣ်ၡူးအသိး ပပျံၤဒီးပပာ်ကဲ ယဟိဝၤယွၤ ခီဖျိလၢ ယဟိဝၤယွၤန့ၣ် အကဲ တၢ်အဲၣ်တၢ်ကွံ, အအိၣ်ဒီး တၢ်ကူၣ်သ့, တၢ်တီတၢ်လိၤ ဒီးတၢ်စိတၢ်ကမီၤ. တကးဒံးဘၣ် ပသ့ၣ်ညါလၢ ယဟိဝၤယွၤ အဲၣ်ပှၤဒိၣ်မးအဃိ ပမၤထွဲ အတၢ်ဟံးစုနဲၣ်ကျဲဧါ တမၤထွဲဘၣ်ဧါန့ၣ် အဘၣ်သးသ့ၣ်ညါဝဲ. အဃိ တၢ်လၢပမၤန့ၣ် အမၤသးအုး ယဟိဝၤယွၤအသးသ့ မ့တမ့ၢ် အမၤသးခု ယဟိဝၤယွၤအသးသ့.—စံးထီၣ်ပတြၢၤ ၇၈:၄၁; ကတိၤဒိ ၂၇:၁၁.
ပမၤအိၣ်ထီၣ် တၢ်ပျံၤယဟိဝၤယွၤ လၢအဂ့ၤတကလုာ် ကသ့ဒ်လဲၣ်
၆. ပမၤအိၣ်ထီၣ် တၢ်ပျံၤယဟိဝၤယွၤ ကသ့ဒ်လဲၣ်. (စံးထီၣ်ပတြၢၤ ၃၄:၁၁)
၆ ပတအိၣ်ဖျဲၣ်ထီၣ်ဃုာ်ဒီး တၢ်ပျံၤယဟိဝၤယွၤဘၣ် အဃိ ပကဘၣ်မၤအိၣ်ထီၣ် တၢ်ပျံၤယဟိဝၤယွၤ လၢပနီၢ်ကစၢ်. (ဖး စံးထီၣ်ပတြၢၤ ၃၄:၁၁.) ပမၤအိၣ်ထီၣ် တၢ်ပျံၤယဟိဝၤယွၤ သ့ခီဖျိ ပဆိမိၣ်ထံ ကစၢ်ယွၤတၢ်ဘၣ်တ့အဂ့ၢ်. ဖဲပဆိမိၣ်ထံ “တၢ်လၢ အတ့လီၤဝဲတဖၣ်” အခါ ပထံၣ်ဘၣ် ကစၢ်ယွၤ အတၢ်ကူၣ်သ့, အတၢ်စိကမီၤ ဒီးအတၢ်အဲၣ်လၢ ပဖီခိၣ် အဃိ ပပာ်ကဲအီၤအါထီၣ် ဒီးပအဲၣ်အီၤဒိၣ်ထီၣ်. (ရိမ့ၤ ၁:၂၀) ဒီပုၢ်ဝဲၢ်မုၣ်အဲဒြံၤ တဲဝဲလၢ “ဖဲယကွၢ် ယဟိဝၤယွၤ အတၢ်ဘၣ်တ့အခါ ယထံၣ်ဘၣ် ယဟိဝၤယွၤအတၢ်ကူၣ်သ့ အဃိ ယသ့ၣ်ညါလၢ တၢ်လၢအဂ့ၤကတၢၢ်လၢ ယဂီၢ်မ့ၢ်မနုၤလဲၣ်န့ၣ် ယဟိဝၤယွၤ သ့ၣ်ညါဝဲ.” ခီဖျိလၢ ဒီပုၢ်ဝဲၢ်မုၣ်အံၤ ဆိမိၣ်ထံ ယဟိဝၤယွၤအတၢ်ဘၣ်တ့ အဂ့ၢ်မၢ်မၢ်အဃိ အတဲဝဲလၢ “ယဟိဝၤယွၤဟ့ၣ်လီၤယၤ သးသမူအဃိ တၢ်လၢကမၤဘၣ်ဒိ ယတၢ်ရ့လိာ်သးဒီး ယဟိဝၤယွၤန့ၣ် ယတဘၣ်သးမၤနီတမံၤဘၣ်.” အဃိ နၤစ့ၢ်ကီးမ့ၢ်သ့န့ၣ် တနွံအံၤ ပာ်လီၤဃာ် တၢ်ဆၢကတီၢ်လၢ နကဆိမိၣ်ထံ ဘၣ်ဃးဒီး ကစၢ်ယွၤတၢ်ဘၣ်တ့အဂ့ၢ်. နမ့ၢ်မၤဒ်န့ၣ်န့ၣ် နကပာ်ကဲအါထီၣ် ယဟိဝၤယွၤ ဒီးနကအဲၣ်အီၤဒိၣ်ထီၣ်.—စံးထီၣ်ပတြၢၤ ၁၁၁:၂, ၃.
၇. တၢ်ဃ့ထုကဖၣ် မၤစၢၤပှၤလၢ ပကအိၣ်ဒီး တၢ်ပျံၤယဟိဝၤယွၤ လၢအဂ့ၤတကလုာ်ဒ်လဲၣ်.
၇ ပမ့ၢ်ဃ့ထုကဖၣ် ထီဘိန့ၣ် ကမၤစၢၤပှၤလၢ ပကမၤအိၣ်ထီၣ် တၢ်ပျံၤယဟိဝၤယွၤ စ့ၢ်ကီး. ဒီးဖဲပဃ့ထုကဖၣ်လၢ ယဟိဝၤယွၤအအိၣ် တဘျီဂ့ၤတဘျီဂ့ၤန့ၣ် ပကသ့ၣ်ညါအါထီၣ် ယဟိဝၤယွၤအဂ့ၢ်. ဒ်သိး ပလဲၤခီဖျိတၢ်မၤကွၢ်ကန့ၢ်အဂီၢ် ပဃ့ယဟိဝၤယွၤလၢ ကဟ့ၣ်ပှၤ တၢ်ဂံၢ်တၢ်ဘါ ဒီးဖဲန့ၣ်အခါ ပနီၣ်ဘၣ်လၢ ယဟိဝၤယွၤအိၣ်ဒီး တၢ်စိတၢ်ကမီၤဖးဒိၣ်. ဒီးဖဲပစံးဘျုးက့ၤ ယဟိဝၤယွၤလၢ အဟ့ၣ်လီၤပှၤ အဖိခွါခါန့ၣ် ပနီၣ်ဘၣ်က့ၤလၢ ယဟိဝၤယွၤအဲၣ်ပှၤဒိၣ်မး. တကးဒံးဘၣ် ဖဲပဃ့ကညး ယဟိဝၤယွၤလၢ ကမၤစၢၤပှၤဒ်သိး ပကလဲၤခီဖျိ တၢ်ကီတၢ်ခဲအခါ ပကနီၣ်ဘၣ်လၢ ယဟိဝၤယွၤန့ၣ် အကူၣ်တၢ်သ့ဒိၣ်ကတၢၢ်. ပမ့ၢ်ဃ့ထုကဖၣ် ဒ်န့ၣ်န့ၣ် ကမၤစၢၤပှၤလၢ ပတၢ်အဲၣ် ဒီးပတၢ်ပာ်ကဲ ယဟိဝၤယွၤ ကအိၣ်အါထီၣ်. တကးဒံးဘၣ် အကမၤစၢၤပှၤလၢ ပကဟးဆှဲး တၢ်ကီးမံၤဒဲးလၢ ကမၤဟးဂီၤ ပတၢ်ရ့လိာ်သးဒီး ယဟိဝၤယွၤ.
၈. ဒ်သိး ပကဆဲးအိၣ်ဒီး တၢ်ပျံၤယဟိဝၤယွၤအဂီၢ် ပကဘၣ်မၤဒ်လဲၣ်.
၈ ပဆဲးအိၣ်ဒီး တၢ်ပျံၤယဟိဝၤယွၤ သ့ခီဖျိ ပမၤလိလံာ်စီဆှံ. ဒီးဖဲပမၤလိ လံာ်စီဆှံအခါ ပအိၣ်ဒီးဖီတၢၣ်လၢ ပကဟံန့ၢ် တၢ်မၤလိလၢ ပှၤလၢအပာ်လီၤ အဒိအတဲာ် လၢအဂ့ၤ ဒီးလၢအတဂ့ၤဘၣ်အအိၣ်. ခဲအံၤ ပကတဲသကီး ယဟိဝၤယွၤအခ့အပှၤလၢ အသးတီခံဂၤလၢအမ့ၢ် စီၤဧိၤဘါဒယၤ လၢအကွၢ်ထွဲ စီၤပၤအၤဃာ်အဟံၣ် ဒီးပှၤလုၢ်တၢ်ခိၣ် အဒိၣ်ကတၢၢ် စီၤယဟိၤယဒါအဂ့ၢ်. ဝံၤဒီး ပကတဲသကီး ယူဒၤအစီၤပၤယိၤအၣ် အဂ့ၢ်. ခီၣ်ထံးခါန့ၣ် စီၤပၤယိၤအၣ် မၤယဟိဝၤယွၤအတၢ်မၤ ဘၣ်ဆၣ်လၢခံ အတမၤယဟိဝၤယွၤ အတၢ်မၤလၢၤဘၣ်. ဒီးပကန့ၢ်ဘၣ် တၢ်မၤလိလၢ အအိၣ်ဒ်လဲၣ်.
အိၣ်ဒီးတၢ်သးဒူ ဒ်သိးဒီး စီၤဧိၤဘါဒယၤ
၉. စီၤဧိၤဘါဒယၤ ပျံၤယဟိဝၤယွၤအဃိ မၤစၢၤအီၤဒ်လဲၣ်. (၁ စီၤပၤ ၁၈:၃, ၁၂)
၉ ဖဲလံာ်စီဆှံ တဲဖျါထီၣ် စီၤဧိၤဘါဒယၤb အဂ့ၢ်အခါ အတဲဝဲလၢ “စီၤဧိၤဘါဒယၤ မ့ၢ်ပှၤလၢ အပျံၤ ယဟိဝၤယွၤ ဒိၣ်မး.” (ဖး ၁ စီၤပၤ ၁၈:၃, ၁၂.) စီၤဧိၤဘါဒယၤ ပျံၤယဟိဝၤယွၤ အဃိ အမၤတၢ်တီတီလိၤလိၤ ဒီးအကဲပှၤလၢ ပှၤနာ်န့ၢ်အီၤသ့. တကးဒံးဘၣ် စီၤပၤပာ်ထီၣ်အီၤလၢ အကတီခိၣ်ရိၤမဲတၢ်လၢ စီၤပၤအနီပူၤ. (ထိၣ်သတြီၤဒီး နဃ့မယၤ ၇:၂.) စီၤဧိၤဘါဒယၤ ပျံၤယဟိဝၤယွၤအဃိ မၤစၢၤအီၤလၢ အကအိၣ်ဒီးတၢ်သးဒူ. ဒီးခီဖျိလၢ အအိၣ်မူဘၣ်ဖဲ စီၤပၤအၤဃာ် လၢအမ့ၢ်ပှၤအၢတဂၤ ပၢတၢ်အစိၤ ဒီး “ယဟိဝၤယွၤ ထံၣ်ဝဲလၢ . . . စီၤအၤဃာ်န့ၣ် အအၢဒိၣ်န့ၢ်ဒံး ပှၤလၢအပၢတၢ်လၢ အမဲာ်ညါခဲလၢာ်” အဃိ စီၤဧိၤဘါဒယၤ ကဘၣ်အိၣ်ဒီး တၢ်သးဒူနီၢ်ကီၢ်. (၁ စီၤပၤ ၁၆:၃၀) တကးဒံးဘၣ် စီၤအၤဃာ်အမါ နီၢ်အံၤစ့ဘ့ၤလးန့ၣ် အဘါထီၣ် ဘဧၤလး ဒီးအသးဟ့ ယဟိဝၤယွၤဖးဒိၣ်အဃိ လၢကလံၤစိး အံၣ်စရ့လး အဒူၣ်တဆံအဘီမုၢ်န့ၣ် အကျဲးစၢး မၤဝဲဒ်သိး ပှၤတဘူၣ်ထီၣ်ဘါထီၣ် ယဟိဝၤယွၤ လၢၤတဂ့ၤ. ဒီးအမၤသံစ့ၢ်ကီး ယဟိဝၤယွၤအဝံဒီဒူၣ်. (၁ စီၤပၤ ၁၈:၄) အဃိ ပထံၣ်ဘၣ်လၢ စီၤဧိၤဘါဒယၤ အိၣ်မူဘၣ် တၢ်ဆၢကတီၢ်လၢ အကီခဲနီၢ်ကီၢ် သနာ်က့ အဆဲးဘူၣ်ထီၣ်ဘါထီၣ် ယဟိဝၤယွၤဒံး.
၁၀. စီၤဧိၤဘါဒယၤ ပာ်ဖျါထီၣ်လၢ အအိၣ်ဒီး တၢ်သးဒူနီၢ်ကီၢ်ဒ်လဲၣ်.
၁၀ စီၤဧိၤဘါဒယၤ ပာ်ဖျါထီၣ်လၢ အအိၣ်ဒီး တၢ်သးဒူနီၢ်ကီၢ်ဒ်လဲၣ်. အဒိ ဖဲနီၢ်အံၤစ့ဘ့ၤလး ဃုမၤသံ ယဟိဝၤယွၤအဝံတဖၣ်အခါန့ၣ် စီၤဧိၤဘါဒယၤ ပာ်ခူသူၣ်ဝဲ ဝံအဂၤ ၁၀၀ လၢလ့ကိပူၤ ဒီးအပာ်ဝဲ “တပူၤ အဂၤ ၅၀ တပူၤ အဂၤ ၅၀ ဒီးဒုးအီၣ်ဒုးအီ အဝဲသ့ၣ် ကိၣ်ဒီးထံ.” (၁ စီၤပၤ ၁၈:၁၃, ၁၄) စီၤဧိၤဘါဒယၤ အိၣ်ဒီးတၢ်သးဒူနာ်က့ တၢ်လၢအမၤဝဲန့ၣ် နီၢ်အံၤစ့ဘ့ၤလး မ့ၢ်သ့ၣ်ညါဒု နီၢ်အံၤစ့ဘ့ၤလး ကမၤသံအီၤဒၣ်ဟီ. စီၤဧိၤဘါဒယၤ ကပျံၤတၢ် ဒီးအတဘၣ်သးသံစ့ၢ်ကီးဘၣ်. သနာ်က့ အအဲၣ်ယဟိဝၤယွၤ ဒီးအအဲၣ် ပှၤလၢအမၤ ယဟိဝၤယွၤအတၢ်မၤ ဒိၣ်န့ၢ်ဒံး အအဲၣ်လီၤအသးဒံး.
ပဒိၣ်တဖၣ်တြီဃာ် ပတၢ်ဖံးတၢ်မၤနာ်က့ ဒီပုၢ်ဝဲၢ်ခွါတဂၤ အိၣ်ဒီးတၢ်သးဒူ ဒီးအမၤစၢၤတၢ်လၢ ကဆှၢန့ၢ်ဝဲ ပတၢ်ကရၢကရိ လံာ်လဲၢ်လၢ ပဒီပုၢ်ဝဲၢ်မုၣ်ခွါအအိၣ် (ကွၢ်လံာ်အဆၢ ၁၁)c
၁၁. ယဟိဝၤယွၤအခ့အပှၤလၢ ဆၢကတီၢ်ခဲအံၤန့ၣ် အိၣ်ဒီးတၢ်သးဒူ ဒ်သိးဒီး စီၤဧိၤဘါဒယၤဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၁ ဆၢကတီၢ်ခဲအံၤ ယဟိဝၤယွၤ အခ့အပှၤအါဂၤ အိၣ်လၢတၢ်လီၢ်လၢ ပဒိၣ်တြီဃာ် ပတၢ်ဖံးတၢ်မၤ. ပဒီပုၢ်ဝဲၢ်မုၣ်ခွါတဖၣ်န့ၣ် အတၢ်အိၣ်သး လီၤဂာ်ဒ်သိးဒီး စီၤဧိၤဘါဒယၤ. အဝဲသ့ၣ်ထံၣ်ဘၣ် တၢ်ကီတၢ်ခဲနာ်က့ အဆဲးဘူၣ်ထီၣ်ဘါထီၣ် ယဟိဝၤယွၤ ဒီးအဝဲသ့ၣ်ဆဲးပာ်ကဲ ပဒိၣ်တဖၣ်ဒံး. (မးသဲ ၂၂:၂၁) အဝဲသ့ၣ်ပာ်ဖျါထီၣ်လၢ အပျံၤကစၢ်ယွၤ ခီဖျိ အကနၣ် ကစၢ်ယွၤအကလုၢ် အါန့ၢ်ဒံး အကနၣ် ပှၤကညီအကလုၢ်ဒံး. (မၤတၢ် ၅:၂၉) အဃိ အဝဲသ့ၣ် ဆဲးစံၣ်တဲၤတဲလီၤ တၢ်သးခုကစီၣ် ဒီးဆဲးထီၣ်တၢ်အိၣ်ဖှိၣ်တပူၤဃီ လၢတၢ်ကူၣ်သ့အပူၤ. (မးသဲ ၁၀:၁၆, ၂၈) ပဒီပုၢ်ဝဲၢ်မုၣ်ခွါတဖၣ်အံၤ ကျဲးစၢးမၤစၢၤလိာ်သး ဒ်သိးအဝဲသ့ၣ် ကန့ၢ်ဘၣ်နီၢ်သးတၢ်အီၣ် ဒီးကဆဲးအိၣ်ဒီး တၢ်ရ့လိာ်သးဒီး ယဟိဝၤယွၤလၢအဂ့ၤ. ပကကွၢ်သကီး ဒီပုၢ်ဝဲၢ်ခွါဟဲနရံၤ လၢအအိၣ်လၢ အၤဖြံၤကၤတၢ်လီၢ်. တၢ်လီၢ်လၢအအိၣ်ဝဲန့ၣ် လၢအပူၤကွံာ် ပဒိၣ်တြီဃာ် ပတၢ်ဖံးတၢ်မၤ. ဖဲပဒိၣ်တြီဃာ် ပတၢ်ဖံးတၢ်မၤအခါ ဒီပုၢ်ဝဲၢ်ခွါဟဲနရံၤ မၤစၢၤတၢ်လၢ ကဆှၢန့ၢ်ဝဲ ပတၢ်ကရၢကရိ လံာ်လဲၢ်လၢ ပဒီပုၢ်ဝဲၢ်မုၣ်ခွါအအိၣ်. အတဲဝဲလၢ “ယကဲပှၤလၢအမဲာ်ဆှးသ့. သနာ်က့ ခီဖျိလၢ ယပာ်ကဲယဟိဝၤယွၤဒိၣ်မး အဃိ ယနာ်သပှၢ်တၢၢ်လၢ ယဟိဝၤယွၤ ဟ့ၣ်ယၤတၢ်သးဒူလၢ ယလိၣ်ဘၣ်.” နၤစ့ၢ်ကီး နအိၣ်ဒီးတၢ်သးဒူ ဒီးနမၤအါထီၣ် တၢ်ပျံၤကစၢ်ယွၤ လၢအဂ့ၤတကလုာ် ဒ်သိးဒီး ဒီပုၢ်ဝဲၢ်ခွါဟဲနရံၤသ့.
အိၣ်ဒီးတၢ်သးတီ ဒ်သိးဒီး ပှၤလုၢ်တၢ်ခိၣ် အဒိၣ်ကတၢၢ် စီၤယဟိၤယဒါ
၁၂. ပှၤလုၢ်တၢ်ခိၣ် အဒိၣ်ကတၢၢ် စီၤယဟိၤယဒါ ဒီးအမါန့ၣ် ပာ်ဖျါထီၣ်လၢ အသးတီဒီး ယဟိဝၤယွၤဒ်လဲၣ်.
၁၂ ပှၤလုၢ်တၢ်ခိၣ် အဒိၣ်ကတၢၢ် စီၤယဟိၤယဒါန့ၣ် အပျံၤယဟိဝၤယွၤ အဃိ အသးတီဒီး ယဟိဝၤယွၤ. တကးဒံးဘၣ် အဟ့ၣ်ဂံၢ်ဟ့ၣ်ဘါ ဒီးမၤစၢၤပှၤဂၤလၢ ကဘူၣ်ထီၣ်ဘါထီၣ် ယဟိဝၤယွၤ. ဖဲနီၢ်အံၤစ့ဘ့ၤလး အဖိမုၣ် နီၢ်ဧသၤလယၤ ဂုာ်န့ၢ်ဝဲ ယူဒၤစီၤပၤအလီၢ်အခါ ပထံၣ်ဘၣ်လၢ စီၤယဟိၤယဒါန့ၣ် အကဲပှၤလၢ အပျံၤယဟိဝၤယွၤနီၢ်ကီၢ်. ပှၤဂီၢ်မုၢ်တဖၣ်ပျံၤဝဲ နီၢ်ဧသၤလယၤ ဒိၣ်မး ခီဖျိလၢ နီၢ်ဧသၤလယၤန့ၣ် အအၢအသီ ဒီးအလီကီ တၢ်စိတၢ်ကမီၤ အဃိ အမၤသံကွံာ် စီၤပၤအစၢၤအသွဲၣ်ခဲလၢာ် ဃုာ်ဒီးအလံၤခွါတဖၣ်. (၂ ကွဲးနီၣ်တၢ် ၂၂:၁၀, ၁၁) မ့မ့ၢ်လၢ အလံၤခွါ စီၤယိၤအၣ်န့ၣ် စီၤယဟိၤယဒါအမါ နီၢ်ယဟိၤၡ့ဘၤ မၤပူၤဖျဲးအီၤ ဒီးပာ်ခူသူၣ်အီၤ. ဖဲန့ၣ်အခါ စီၤယိၤအၣ် ကဲဖိသၣ်ဒံးလီၤအဃိ နီၢ်ယဟိၤၡ့ဘၤဒီးအဝၤ ကွၢ်ထွဲက့ၤ စီၤယိၤအၣ်. ခီဖျိလၢ စီၤယဟိၤယဒါ ဒီးနီၢ်ယဟိၤၡ့ဘၤ မၤဝဲဒ်အံၤအဃိ စီၤဒၤဝံးအစၢၤအသွဲၣ်လၢ ကကဲထီၣ်စီၤပၤန့ၣ် တလီၤမၢ်ကွံာ်ဝဲဘၣ်. စီၤယဟိၤယဒါ သးပှၢ်လံနာ်က့ အသးတီဒီး ယဟိဝၤယွၤ အဃိ အမၤတၢ်လၢအဘၣ် ဒီးအတပျံၤ နီၢ်ဧသၤလယၤဘၣ်.—ကတိၤဒိ ၂၉:၂၅.
၁၃. ဖဲစီၤယိၤအၣ် အိၣ်နွံနံၣ်အခါ စီၤယဟိၤယဒါ ပာ်ဖျါထီၣ်လၢ အသးတီဒီးယဟိဝၤယွၤ ဒ်လဲၣ်.
၁၃ ဖဲစီၤယိၤအၣ် အိၣ်နွံနံၣ်အခါ စီၤယဟိၤယဒါ ပာ်ဖျါထီၣ်လၢ အသးတီဒီးယဟိဝၤယွၤ တဘျီကဒီး. စီၤယဟိၤယဒါ ရဲၣ်ကျဲၤဝဲလၢ စီၤယိၤအၣ်လၢ အကဲစီၤဒၤဝံး အစၢၤအသွဲၣ်န့ၣ် ကကဲထီၣ်စီၤပၤ. တၢ်ရဲၣ်တၢ်ကျဲၤအံၤ မ့ၢ်ကဲထီၣ်န့ၣ် စီၤယိၤအၣ် ကကဲထီၣ်စီၤပၤ ဘၣ်ဆၣ် တၢ်ရဲၣ်တၢ်ကျဲၤအံၤ မ့ၢ်တကဲထီၣ်ဘၣ်န့ၣ် ဘၣ်သ့ၣ်သ့ၣ် ပှၤကမၤသံ စီၤယဟိၤယဒါ. သနာ်က့ ပထံၣ်ဘၣ်လၢ ယဟိဝၤယွၤ ဆိၣ်ဂ့ၤ စီၤယဟိၤယဒါ အတၢ်ရဲၣ်တၢ်ကျဲၤ အဃိ ပှၤအခိၣ်တဖၣ် ဒီးပှၤလ့ၤဝံဖိ ဆီၣ်ထွဲမၤစၢၤအီၤ. စီၤယိၤအၣ် ကဲထီၣ်စီၤပၤ ဒီးပှၤမၤသံကွံာ် နီၢ်ဧသၤလယၤ. (၂ ကွဲးနီၣ်တၢ် ၂၃:၁-၅, ၁၁, ၁၂, ၁၅; ၂၄:၁) လၢခံ စီၤယဟိၤယဒါ “ဒုးအိၣ်ထီၣ် တၢ်အၢၣ်လီၤအီလီၤ လၢယဟိဝၤယွၤ ဒီးစီၤပၤ ဒီးပှၤဂီၢ်မုၢ်အဘၢၣ်စၢၤ လၢအဝဲသ့ၣ် ကဆဲးကဲဝဲ ယဟိဝၤယွၤ အပှၤဂီၢ်မုၢ်.” (၂ စီၤပၤ ၁၁:၁၇) တကးဒံးဘၣ် စီၤယဟိယဒါ “ဆီလီၤစ့ၢ်ကီး ပှၤခိးတြဲၤဖိတဖၣ် ဖဲယဟိဝၤယွၤ အဟံၣ်တြဲၤတဖၣ် အခီၣ်ထံး ဒ်သိးပှၤလၢ အတကဆှီဘၣ်တဖၣ် လဲၤနုာ်ဖဲန့ၣ် သုတန့ၢ် နီတဂၤတဂ့ၤအဂီၢ်.”—၂ ကွဲးနီၣ်တၢ် ၂၃:၁၉.
၁၄. စီၤယဟိၤယဒါန့ၣ် အမၤလၤကပီၤ ယဟိဝၤယွၤအဃိ အန့ၢ်ဘၣ် တၢ်လၤကပီၤဒ်လဲၣ်.
၁၄ ယဟိဝၤယွၤ တဲဝဲလၢ “ပှၤလၢအပာ်ဖျါထီၣ် တၢ်ပာ်ကဲလၢ ယဖီခိၣ်န့ၣ် ယကပာ်ဖျါထီၣ် တၢ်ပာ်ကဲလၢ အဝဲသ့ၣ်အဖီခိၣ်.” ပထံၣ်ဘၣ်လၢ ယဟိဝၤယွၤ ဆိၣ်ဂ့ၤ စီၤယဟိၤယဒါ သပှၢ်တၢၢ်. (၁ ၡမူၤအ့လး ၂:၃၀) အဒိ ယဟိဝၤယွၤ မၢပှၤကွဲးလီၤ ပှၤလုၢ်တၢ်ခိၣ် အဒိၣ်ကတၢၢ် စီၤယဟိၤယဒါအဂ့ၢ်လၢ လံာ်စီဆှံအပူၤ ဒ်သိးပကမၤလိန့ၢ်တၢ်လၢအအိၣ်. (ရိမ့ၤ ၁၅:၄) စီၤယဟိၤယဒါန့ၣ် “အမၤတ့ၢ် တၢ်ဂ့ၤလၢ အံၣ်စရ့လးအပူၤ ဘၣ်ဃးဒီး ယွၤလၢအမ့ၢ်အတီ ဒီးကစၢ်ယွၤအဟံၣ်အဃိ” ဖဲအသံအခါ အန့ၢ်ဘၣ် တၢ်ခွဲးတၢ်ယာ်လီၤဆီလၢ ပှၤလဲၤခူၣ်လီၤအီၤ “တပူၤဃီဒီး စီၤပၤတဖၣ် လၢစီၤဒၤဝံးအဝ့ၢ်ပူၤ.”—၂ ကွဲးနီၣ်တၢ် ၂၄:၁၅, ၁၆.
ဒ်သိးဒီး ပှၤလုၢ်တၢ်ခိၣ် အဒိၣ်ကတၢၢ် စီၤယဟိၤယဒါန့ၣ် ပတၢ်ပျံၤကစၢ်ယွၤ ကမၤစၢၤပှၤလၢ ပကမၤစၢၤပဒီပုၢ်ဝဲၢ်မုၣ်ခွါ လၢတၢ်သးတီအပူၤ (ကွၢ်လံာ်အဆၢ ၁၅)d
၁၅. ပန့ၢ်ဘၣ် တၢ်မၤလိလၢ စီၤယဟိၤယဒါ အအိၣ်ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၅ စီၤယဟိၤယဒါ အဂ့ၢ်န့ၣ် မၤစၢၤပှၤလၢ ပကမၤအါထီၣ် တၢ်ပျံၤကစၢ်ယွၤ. တၢ်အိၣ်ဖှိၣ်သးပှၢ်တဖၣ် ကွၢ်လိ စီၤယဟိၤယဒါ သ့ခီဖျိ အဝဲသ့ၣ် ကွၢ်ထွဲဒီးဒီသဒၢ ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်ပူၤ. (မၤတၢ် ၂၀:၂၈) ဒီပုၢ်ဝဲၢ်လၢအသးပှၢ်တဖၣ်န့ၣ် ကွၢ်လိ စီၤယဟိၤယဒါ သ့ခီဖျိ အပျံၤယဟိဝၤယွၤ ဒီးဆဲးတီဒီးအီၤ အဃိ ယဟိဝၤယွၤ သူအဝဲသ့ၣ်လၢ ကမၤလၢပှဲၤအတၢ်တိာ်ပာ်သ့. ဒီးယဟိဝၤယွၤတပာ်တ့ၢ် အဝဲသ့ၣ်နီတဘျီဘၣ်. ယဟိဝၤယွၤရ့ဒီး စီၤယဟိၤယဒါ ဂ့ၤဂ့ၤအဃိ ပှၤသးစၢ်တဖၣ် မ့ၢ်ကွၢ်လိ ယဟိဝၤယွၤန့ၣ် အဝဲသ့ၣ် ကရ့ဒီး ဒီပုၢ်ဝဲၢ်လၢအသးပှၢ်ဂ့ၤဂ့ၤ ဒီးပာ်ကဲအဝဲသ့ၣ်. လီၤဆီဒၣ်တၢ် ဒီပုၢ်ဝဲၢ်သးပှၢ်လၢ အသးတီ ဒီးအမၤတ့ၢ် ယဟိဝၤအတၢ်မၤ ဖးယံာ်လံန့ၣ် ပကဘၣ်ရ့ဒီး အဝဲသ့ၣ်ဂ့ၤဂ့ၤ. (ကတိၤဒိ ၁၆:၃၁) တကးဒံးဘၣ် ပဝဲခဲလၢာ် ပကွၢ်လိ ပှၤအခိၣ်တဖၣ် ဒီးပှၤလ့ၤဝံဖိလၢ အဆီၣ်ထွဲမၤစၢၤ စီၤယဟိၤယဒါ သ့ခီဖျိ ပဆီၣ်ထွဲ “ပှၤလၢအတီခိၣ်ရိၤမဲတၢ်” ဒီးပကနၣ် အဝဲသ့ၣ်ကလုၢ်.—ဧ့ၤဘြံၤ ၁၃:၁၇.
ကွၢ်လိ စီၤပၤယိၤအၣ် တဂ့ၤ
၁၆. စီၤပၤယိၤအၣ်န့ၣ် အကဲပှၤလၢ အသးတဂၢၢ်ကျၢၤဘၣ် ဒ်လဲၣ်.
၁၆ စီၤယဟိၤယဒါ မၤစၢၤ စီၤပၤယိၤအၣ် ဒ်သိးအကမၤတၢ်လၢအဂ့ၤ. (၂ စီၤပၤ ၁၂:၂) အဃိ ဖဲစီၤယိၤအၣ်အသးစၢ်ခါန့ၣ် အမၤတၢ်လၢ အဘၣ်ယဟိဝၤယွၤအသး. ဘၣ်ဆၣ် ဖဲစီၤယဟိၤယဒါ သံဝံၤအလီၢ်ခံန့ၣ် စီၤယိၤအၣ် ကနၣ် ပဒိၣ်ဖးဒိၣ်လၢ အထီဒါက့ၤတၢ်မ့ၢ်တၢ်တီတဖၣ် အကလုၢ်. အဃိ အီၤဒီးပှၤဂီၢ်မုၢ်တဖၣ် “ဘူၣ်ထီၣ်ဘါထီၣ်ဝဲ တၢ်စီဆှံအထူၣ်တဖၣ် ဒီးတၢ်ဂီၤတၢ်ဖှီၣ်တဖၣ်.” (၂ ကွဲးနီၣ်တၢ် ၂၄:၄, ၁၇, ၁၈) တၢ်ကဲထီၣ်သးဒ်အံၤအဃိ ယဟိဝၤယွၤ အသးဘၣ်ဒိဒိၣ်မး. သနာ်က့ “ဒ်သိးအဝဲသ့ၣ် ကဟဲက့ၤလၢ ယဟိဝၤယွၤအအိၣ်အဂီၢ် ကစၢ်ယွၤဆှၢလီၤ ဝံတဖၣ်လၢ အဝဲသ့ၣ်အအိၣ် . . . ဘၣ်ဆၣ် အဝဲသ့ၣ် တဒိကနၣ်ဝဲဘၣ်.” အဝဲသ့ၣ်တကနၣ်စ့ၢ်ကီး စီၤယဟိၤယဒါ အဖိခွါ စီၤစကၤရယၤအကလုၢ်ဘၣ်. စီၤစကၤရယၤန့ၣ် အကဲဝဲ ယဟိဝၤယွၤအဝံ ဒီးပှၤလုၢ်တၢ်ဒိၣ် ဒီးအကဲစ့ၢ်ကီး စီၤယိၤအၣ်အတခွါ. စီၤစကၤရယၤ အဟံၣ်ဖိဃီဖိန့ၣ် မၤပူၤဖျဲး စီၤယိၤအၣ် အသးသမူ သနာ်က့ လၢခံ စီၤပၤယိၤအၣ် မၢပှၤမၤသံကွံာ် စီၤစကၤရယၤ.—၂ ကွဲးနီၣ်တၢ် ၂၂:၁၁; ၂၄:၁၉-၂၂.
၁၇. တၢ်ကဲထီၣ်သးဒီး စီၤယိၤအၣ်ဒ်လဲၣ်.
၁၇ စီၤယိၤအၣ်န့ၣ် အတဆဲးအိၣ်ဒီး တၢ်ပျံၤယဟိဝၤယွၤ လၢအဂ့ၤတကလုာ်ဘၣ်. အဃိ လၢခံ အထံၣ်ဘၣ် တၢ်ကီတၢ်ခဲ. ယဟိဝၤယွၤ တဲဝဲလၢ “ပှၤလၢ အဆိကမိၣ်ဆံးယၤန့ၣ် ယတပာ်လုၢ်ပာ်ပှ့ၤ အဝဲသ့ၣ်ဘၣ်.” (၁ ၡမူၤအ့လး ၂:၃၀) ပှၤစူၤရံဖိ အသုးတဖၣ် အိၣ်ထဲစှၤဂၤနာ်က့ အဝဲသ့ၣ် မၤနၢၤကွံာ်ဝဲ စီၤယိၤအၣ်အ “သုးမုၢ်ဖးဒိၣ်တဒူၣ်” ဒီးစီၤယိၤအၣ် “ဘၣ်ဒိဘၣ်ထံးနးမး.” လၢခံဖဲပှၤစူၤရံဖိ က့ၤဝဲအခါန့ၣ် စီၤယိၤအၣ် အခ့အပှၤ မၤသံက့ၤအီၤ ခီဖျိလၢ အမၤသံ စီၤစကၤရယၤ အဃိ. ပှၤထံၣ်ဝဲလၢ စီၤပၤတဂၤအံၤ အအၢအသီအဃိ ပှၤတခူၣ်လီၤအီၤလၢ “စီၤပၤတဖၣ် အတၢ်သွၣ်ခိၣ်အပူၤဘၣ်.”—၂ ကွဲးနီၣ်တၢ် ၂၄:၂၃-၂၅.
၁၈. ဒ်သိး ပတလီၤဂာ်ဒီး စီၤယိၤအၣ်တဂ့ၤအဂီၢ် ယံးရမံယၤ ၁၇:၇, ၈ မၤစၢၤပှၤဒ်လဲၣ်.
၁၈ ပမၤလိန့ၢ်တၢ်လၢ စီၤယိၤအၣ်အအိၣ်ဒ်လဲၣ်. စီၤယိၤအၣ်န့ၣ် အလီၤဂာ်ဒ်သိးဒီး သ့ၣ်တထူၣ်လၢ အဂံၢ်လီၤတယိာ်ဘၣ် ဒီးအလိၣ်ဘၣ် တၢ်တၢၣ်လၢကဖီၣ်ဂၢၢ်အီၤ. အဒိ လၢခံ စီၤယဟိၤယဒါ လၢအလီၤဂာ်ဒ်သိးဒီး တၢ်တၢၣ်လၢအဖီၣ်ဂၢၢ်အီၤန့ၣ် သံကွံာ်ဝဲ. အဃိ စီၤယိၤအၣ် ကနၣ်က့ၤလၢ ပှၤလၢအထီဒါက့ၤတၢ်မ့ၢ်တၢ်တီတဖၣ် အကလုၢ် ဒီးအတဆဲးတီဒီး ယဟိဝၤယွၤလၢၤဘၣ်. တၢ်အဒိအံၤ ပာ်ဖျါထီၣ်ဝဲလၢ ပပျံၤကစၢ်ယွၤန့ၣ် တဘၣ်မ့ၢ်ထဲလၢ ပဟံၣ်ဖိဃီဖိ ဒီးပှၤလၢတၢ်အိၣ်ဖှိၣ်ပူၤ ပာ်လီၤန့ၢ်ပှၤ တၢ်ဒိတၢ်တဲာ် လၢအဂ့ၤအဃိဘၣ်. ဘၣ်ဆၣ် ဒ်သိးပကဆဲးပျံၤကစၢ်ယွၤ ဒီးအိၣ်ဒီးတၢ်ရ့လိာ်သးဒီးအီၤလၢ အဂ့ၤအဂီၢ် ပကဘၣ်မၤအါထီၣ် ပတၢ်အဲၣ်ဒီးတၢ်ပာ်ကဲကစၢ်ယွၤ လၢပနီၢ်ကစၢ်. ပမၤဒ်န့ၣ်သ့ခီဖျိ ပမၤလိလံာ်စီဆှံ, ဆိကမိၣ်ထံ တၢ်ဂ့ၢ်လၢပဖး ဒီးဃ့ထုကဖၣ်ထီဘိ.—ဖး ယံးရမံယၤ ၁၇:၇, ၈; ကလီးစဲ ၂:၆, ၇.
၁၉. ယဟိဝၤယွၤ ဘၣ်သးလၢ ပကမၤမနုၤလဲၣ်.
၁၉ တၢ်လၢ ယဟိဝၤယွၤ ဃ့ပှၤန့ၣ် အတအါတလၢဘၣ်. ဖဲ စံၣ်တဲၤတဲလီၤတၢ် ၁၂:၁၃ န့ၣ်ယဟိဝၤယွၤ တဲဘၣ်ပှၤလၢ ပကဘၣ် “ပျံၤယွၤလၢအမ့ၢ်အတီတဂၤ ဒီးအိၣ်မူမၤထွဲ အတၢ်မၤလိာ်တဖၣ် . . . အဝဲန့ၣ်မ့ၢ်ဝဲ ပှၤဟီၣ်ခိၣ်ဖိ အမူဒါ.” ပမ့ၢ်ပျံၤယဟိဝၤယွၤန့ၣ် ခါဆူညါ ပမ့ၢ်ထံၣ်ဘၣ် တၢ်မၤကွၢ်ဒ်လဲၣ်ဒ်လဲၣ် နာ်က့ ပကဆဲးတီဒီး ယဟိဝၤယွၤ ဒ်သိးဒီး စီၤဧိၤဘါဒယၤ ဒီးစီၤယဟိၤယဒါ. ဒီးတၢ်လၢကမၤဟးဂီၤ ပတၢ်ရ့လိာ်သးဒီး ယဟိဝၤယွၤန့ၣ် တအိၣ်နီတမံၤဘၣ်.
တၢ်သးဝံၣ် ၃ ပတၢ်ဂံၢ်တၢ်ဘါ, ပတၢ်မုၢ်လၢ်, ပတၢ်နာ်န့ၢ်အလီၢ်
a လံာ်စီဆှံ တဲဝဲလၢ ပကဘၣ်ပျံၤ ကစၢ်ယွၤ. အဃိ တၢ်မၤလိတခါအံၤ ကမၤစၢၤပှၤလၢ ပကနၢ်ပၢၢ် တၢ်ပျံၤကစၢ်ယွၤ အခီပညီ ဒီးပမၤအါထီၣ် တၢ်ပျံၤကစၢ်ယွၤ ကသ့ဒ်လဲၣ်. ပကသ့ၣ်ညါဘၣ် စ့ၢ်ကီးလၢ တၢ်ပျံၤကစၢ်ယွၤန့ၣ် ကမၤစၢၤပှၤဒ်သိး ပကမၤ ယဟိဝၤယွၤအတၢ်မၤ လၢတၢ်သးဒူ ဒီးအိၣ်ဒီးတၢ်သးတီ.
b စီၤဧိၤဘါဒယၤတဂၤအံၤ တကဲဝဲ ဝံဧိၤဘါဒယၤ လၢအကွဲး လံာ်ဧိၤဘါဒယၤတဘ့ၣ်န့ၣ်ဘၣ်. ဝံဧိၤဘါဒယၤန့ၣ် အအိၣ်မူလၢ စီၤဧိၤဘါဒယၤ အလီၢ်ခံ အနံၣ်လၢအကယၤတဖၣ်ညါ.
c တၢ်ဂီၤ အခီပညီ– တၢ်ဂီၤအံၤ ပာ်ဖျါထီၣ်က့ၤဝဲ ဖဲပဒိၣ်တြီဃာ် ပတၢ်ဖံးတၢ်မၤအခါ ဒီပုၢ်ဝဲၢ်ခွါတဂၤ မၤစၢၤတၢ်လၢ ကဆှၢန့ၢ်ဝဲ ပတၢ်ကရၢကရိ လံာ်လဲၢ်လၢ ပဒီပုၢ်ဝဲၢ်မုၣ်ခွါအအိၣ်.
d တၢ်ဂီၤ အခီပညီ– ဒီပုၢ်ဝဲၢ်မုၣ်သးစၢ်တဂၤ မၤလိန့ၢ်တၢ်လၢ ဒီပုၢ်ဝဲၢ်မုၣ်သးပှၢ်တဂၤအအိၣ် ဘၣ်ဃးဒီး တၢ်စံၣ်တဲၤတဲလီၤတၢ်လၢ လီတဲစိအပူၤ, ဒီပုၢ်ဝဲၢ်သးပှၢ်တဂၤ အိၣ်ဒီးတၢ်သးဒူ ခီဖျိ အစံၣ်တဲၤတဲလီၤတၢ်လၢ ကမျၢၢ်ကျါ, ဒီပုၢ်ဝဲၢ်ခွါလၢ အအိၣ်ဒီးတၢ်လဲၤခီဖျိတဂၤန့ၣ် အသိၣ်လိက့ၤပှၤဂၤ ဘၣ်ဃးဒီး တၢ်ကွၢ်ထွဲကတီၤ ဘီမုၢ်ဘျီၣ်ဒိၣ်.