တၢ်ဒုးတၢ်ယၤ ဒီးတၢ်ထီဒုၣ်ထီဒါ အိၣ်ဝဲဘၣ်ဆၣ် နအိၣ်ဒီး တၢ်သူၣ်မံသးမုာ်သ့
ကဲရံၤ လၢအကဲတ့ၢ် ပှၤသုးဖိန့ၣ် တဲဝဲလၢ “ဘၣ်မနုၤအဃိ တၢ်အၢတၢ်သီ, တၢ်တတီတလိၤ ဒီးတၢ်ကီတၢ်ခဲ အိၣ်လၢဟီၣ်ခိၣ် အါမးလဲၣ်န့ၣ် ယတသ့ၣ်ညါဘၣ်. ယမၤလိဘၣ် လံာ်စီဆှံအဃိ ယသ့ၣ်ညါထီၣ်တၢ်စံးဆၢ ဒီးခဲအံၤ ယအိၣ်ဒီး တၢ်သူၣ်မံသးမုာ်လံ. ယသ့ၣ်ညါလၢ ယဟိဝၤယွၤ ကဒုးအိၣ်ထီၣ် တၢ်ဘံၣ်တၢ်ဘၢ လၢဟီၣ်ခိၣ်ချၢ နီၢ်ကီၢ်.”
ပှၤလၢ အတူၢ်ဘၣ်တၢ် ဒ်သိးဒီး ကဲရံၤန့ၣ် အိၣ်ဝဲအါမး. ဘၣ်ဆၣ် လံာ်စီဆှံ မၤစၢၤအဝဲသ့ၣ် ဒ်လဲၣ်န့ၣ် ဖးကွၢ်လၢ တၢ်လဲၤခီဖျိတဖၣ်အံၤ.
လံာ်စီဆှံ တဲဝဲဒ်လဲၣ်– “ယဟိဝၤယွၤဧၢ, နမ့ၢ်ပှၤလၢအဂ့ၤ ဒီးပျၢ်ကွံာ်တၢ်ကမၣ်ညီလီၤ.”—စံးထီၣ်ပတြၢၤ ၈၆:၅.
အကဲဘျုးဒ်လဲၣ်– ဝ့လမၤ လၢအအိၣ်လၢ ခိၤလါဘံၤယၤ တဲဝဲလၢ “လံာ်စီဆှံ တဆၢအံၤ မၤမုာ်ထီၣ်ယသး ဒီးဒုးသ့ၣ်ညါယၤလၢ ယဟိဝၤယွၤန့ၣ် အအိၣ်ဒီး တၢ်သးကညီၤ. လၢညါ ဖဲယဒုးတၢ်အခါ တၢ်ကမၣ်လၢ ယမၤတ့ၢ်တဖၣ်န့ၣ် ယသ့ၣ်ညါလၢ ယဟိဝၤယွၤ သးအိၣ်ပျၢ်ကွံာ်ဝဲ.”
လံာ်စီဆှံ တဲဝဲဒ်လဲၣ်– “ယကတ့လီၤ မူခိၣ်အသီ ဒီးဟီၣ်ခိၣ်အသီလီၤ. ဒီးတၢ်အလီၢ်လံၤတဖၣ်န့ၣ် ပှၤတသ့ၣ်နီၣ်ထီၣ်က့ၤအီၤလၢၤဘၣ် ဒီးတၢ်သ့ၣ်တဖၣ်န့ၣ် တဟဲအိၣ်ထီၣ်လၢ ပှၤသးပူၤလၢၤဘၣ်.”—ယၡါယၤ ၆၅:၁၇.
အကဲဘျုးဒ်လဲၣ်– စၤဖံရၤ လၢအအိၣ်လၢ ကီၢ်အမဲရကၤန့ၣ် တဲဝဲလၢ “လၢညါ ယမၤဘၣ်တၢ်လၢ သုးကျါ ဒီးတၢ်လၢ ယလဲၤခီဖျိဘၣ် လၢအပူၤကွံာ်န့ၣ် ယထံၣ်တမှံက့ၤ, ယအိၣ်ဒီး တၢ်သးလီၤစၢ်တၢ်ဆါ ဒီးယဘၣ်တူၢ်တၢ်နးမး. သနာ်က့ လံာ်စီဆှံ တဆၢအံၤ ဒုးသ့ၣ်နီၣ်ထီၣ်ယၤလၢ တယံာ်လၢၤဘၣ်န့ၣ် ယဟိဝၤယွၤ ကမၤစၢၤယၤဒ်သိး ယကသးပ့ၤနီၣ်ကွံာ် တၢ်လဲၤခီဖျိလၢ အလီၤပျံၤလီၤဖုး တဖၣ်အံၤ. တၢ်တူၢ်ဘၣ်လၢ အတဂ့ၤဘၣ်တဖၣ်အံၤ ကလီၤမၢ်ကွံာ် လီၤထူလီၤယိာ်အဃိ လီၤသးခုညါ.”
လံာ်စီဆှံ တဲဝဲဒ်လဲၣ်– “ဖဲအဝဲပၢတၢ်အခါ ပှၤတီပှၤလိၤ ကဒိၣ်ထီၣ်ထီထီၣ်ဒီးတၢ်မုာ်တၢ်ခုၣ် ကအိၣ်ဝဲအါအါဂီၢ်ဂီၢ် ဒီးကအိၣ်ဝဲဖးယံာ် တုၤလၢ လါတအိၣ်လၢၤဘၣ်.”—စံးထီၣ်ပတြၢၤ ၇၂:၇.
အကဲဘျုးဒ်လဲၣ်– အိၤလဲၣ်စဲဒရၣ် လၢအအိၣ်လၢ ကီၢ်ယူၣ်ခြ့န့ၣ် တဲဝဲလၢ “တၢ်ကတိၤ လၢလံာ်စီဆှံ တဆၢအံၤ တဲဝဲန့ၣ် ယဆိကမိၣ်အီၤထီဘိ. တယံာ်လၢၤဘၣ်န့ၣ် တၢ်ဒုးတၢ်ယၤ ဒီးတၢ်လီၤပျံၤလီၤဖုး တအိၣ်လၢၤဘၣ်. ဒီးပှၤလၢ ပအဲၣ်တဖၣ် ကအိၣ်ဘၣ် ပူၤပူၤဖျဲးဖျဲးအဃိ ပတလိၣ် ဘၣ်ယိၣ်တၢ်လၢၤဘၣ်.”
လံာ်စီဆှံ တဲဝဲဒ်လဲၣ်– “နပှၤသံန့ၣ် ကသမူထီၣ်လီၤ. . . . ပှၤလၢအအိၣ်လၢ ဟီၣ်ခိၣ်ကမူၣ်ကျါသ့ၣ်ဧၢ, ပၢၢ်ထီၣ်ဒီး ကိးပသူထီၣ်လၢ တၢ်သးခုအပူၤတက့ၢ်.”—ယၡါယၤ ၂၆:၁၉.
အကဲဘျုးဒ်လဲၣ်– မရံ လၢအအိၣ်လၢ ကီၢ်ရဝၣ်ဒၣ်န့ၣ် တဲဝဲလၢ “ဖဲပှၤဂုာ်ကျဲးစၢး မၤလီၤတူာ် ပှၤတူစံၤဖိအခါ ယဟံၣ်ဖိဃီဖိ သံဘူးကလၢာ်ညါ. ဘၣ်ဆၣ် လံာ်စီဆှံ တဆၢအံၤ မၤစၢၤယၤ ဒ်သိး ယကနာ်လၢ ယကထံၣ်ဘၣ်ဒံး အဝဲသ့ၣ် လၢအသီတဘျီ. ယခိးကွၢ်လၢ်လၢ အဝဲသ့ၣ် ကဂဲၤဆၢထၢၣ် သမူထီၣ်က့ၤ ဒီးနၢ်ဟူဘၣ်က့ၤ အဝဲသ့ၣ်ကလုၢ်လၢ အပှဲၤဒီးတၢ်သးခု.”
လံာ်စီဆှံ တဲဝဲဒ်လဲၣ်– “တစိၢ်ဖိဒီးန့ၣ် ပှၤအၢပှၤသီ တအိၣ်လၢၤဘၣ်. . . . မ့မ့ၢ် ပှၤလၢအဆီၣ်လီၤသးန့ၣ် ကန့ၢ်သါဘၣ် ဟီၣ်ခိၣ်လီၤ. အဝဲသ့ၣ် ကသးခုဝဲဒိၣ်မး မ့ၢ်လၢ တၢ်ဃူတၢ်ဖိး ကအိၣ်ဝဲအါမးအဃိလီၤ.”—စံးထီၣ်ပတြၢၤ ၃၇:၁၀, ၁၁.
အကဲဘျုးဒ်လဲၣ်– ဒါလၢၤ လၢအအိၣ်လၢ ကီၢ်ထးကၠံကံစတါန့ၣ် တဲဝဲလၢ “ဖဲန့ၣ်အခါ တၢ်ဒုးဝံၤလံ သနာ်က့ ခဲအံၤပှၤအၢပှၤသီ ဒီးပှၤမၤတၢ်တတီတလိၤ အိၣ်ဒံး. ဘၣ်ဆၣ် လံာ်စီဆှံ တဆၢအံၤ မၤဆူၣ်ထီၣ် ယဂံၢ်ယဘါဒိၣ်မး. ယဟိဝၤယွၤ ထံၣ်တၢ်ခဲလၢာ် ဒီးအနၢ်ပၢၢ် ယတၢ်အိၣ်သး. အအၢၣ်လီၤဝဲလၢ တယံာ်လၢၤဘၣ်န့ၣ် တၢ်ကီတၢ်ခဲ တအိၣ်လၢၤဘၣ် ဒီးပှၤတသ့ၣ်နီၣ်ထီၣ်က့ၤဝဲ လၢၤဘၣ်.”
ပှၤတနီၤ အတၢ်လဲၤခီဖျိလၢ မဲးကစံ တဘ့ၣ်အံၤ ပာ်ဖျါထီၣ်ဝဲန့ၣ် အကဲပှၤလၢ အပၣ်ဃုာ်လၢ ယဟိဝၤပှၤအုၣ်အသး လၢအကကွဲၢ်တဖၣ်အကျါ. ဒီးပှၤတဖၣ်အံၤ လံာ်စီဆှံ မၤစၢၤအဝဲသ့ၣ်ဒ်သိး ကဒိးန့ၢ်ဘၣ် တၢ်သူၣ်မံသးမုာ်. လံာ်စီဆှံ မၤစၢၤအဝဲသ့ၣ်ဒ်သိး ကမၤနၢၤကွံာ် တၢ်သးဟ့ ဒီးတၢ်ကွၢ်တလီၤ ကလုာ်ဒူၣ် ဒီးတၢ်ဆဲးတၢ်လၤ. (အ့းဖ့းစူး ၄:၃၁, ၃၂) ယဟိဝၤပှၤအုၣ်အသး တဖၣ်န့ၣ် တမၤဘၣ်ဃး အသးဒီး ထံဂ့ၢ်ကီၢ်ဂ့ၢ်ဘၣ် ဒီးတပၣ်ဃုာ်လၢ တၢ်ဒုးတၢ်ယၤဘၣ်.—ယိၤဟၣ် ၁၈:၃၆.
ယဟိဝၤပှၤအုၣ်အသး လၢဟီၣ်ခိၣ်ဒီဘ့ၣ်န့ၣ် အဝဲသ့ၣ် ပာ်ဖျါထီၣ်တၢ်အဲၣ် ဒီးဆီၣ်ထွဲ မၤစၢၤလိာ်သး ဒ်သိးဒီး ဟံၣ်ဖိဃီဖိတဒူၣ်. (ယိၤဟၣ် ၁၃:၃၅) အဒိ အိၤလဲၣ်စဲဒရၣ် လၢပဖးဘၣ်အဂ့ၢ် လၢအခီၣ်ထံးန့ၣ် ခီဖျိလၢ တၢ်ဒုးကဲထီၣ်အဃိ အဘၣ်ဃ့ၢ်ထီၣ်ကွံာ်လၢ ထံကီၢ်အဂၤတဘ့ၣ်. အတဲဝဲလၢ “ဖဲပလဲၤတုၤလၢ ကီၢ်ဆၢအခါ တဘျီဃီန့ၣ် ပထံၣ်လိာ်သးဒီး ယဟိဝၤပှၤအုၣ်အသး လၢအအိၣ်လၢ လီၢ်ကဝီၤဖဲန့ၣ် ဒီးအအိၣ်ခိးကွၢ်လၢ်ပကျဲ. ခီဖျိလၢ အဝဲသ့ၣ် ဆီၣ်ထွဲမၤစၢၤပှၤအဃိ ပကဲပှၤဘၣ်ကီဘၣ်ခဲဖိ သနာ်က့ အညီလၢ ပကစးထီၣ် ပတၢ်အိၣ်မူအသီလၢ ထံကီၢ်အဂၤတဘ့ၣ်အပူၤ.”
ပကွဲမုာ်နၤလၢ နကဟဲထီၣ် ပဝဲယဟိဝၤပှၤအုၣ်အသး အတၢ်အိၣ်ဖှိၣ်. လၢပတၢ်အိၣ်ဖှိၣ်န့ၣ် ပကနၢ်ဟူဘၣ် လံာ်စီဆှံ အတၢ်ကစီၣ်လၢ ကဟ့ၣ်ပှၤ တၢ်သူၣ်မံသးမုာ် ဒီးပကဘၣ်မၤထွဲ တၢ်သိၣ်လိဒ်လဲၣ်အဂ့ၢ်. နုာ်လီၤကွၢ် jw.org ဝဲးပဆဲး ဒီးဃုကွၢ် တၢ်အိၣ်ဖှိၣ်လီၢ်လၢ အအိၣ်ဘူးဒီးနၤ မ့တမ့ၢ် တီၣ်ထီၣ်တၢ်ဂ့ၢ်လၢ ကမၤလိသကိး တၢ်မၤလိလံာ်စီဆှံ လၢတလိၣ်ဟ့ၣ်စ့ဘၣ်ဒီး ယဟိဝၤပှၤအုၣ်အသး တဂၤဂၤ ဒီးသူလံာ် အိၣ်မူလီၤထူလီၤယိာ် ပှဲၤဒီးတၢ်သးခု.