တၢ်စံၣ်တဲၤတဲလီၤတၢ် အလ့ၣ်ဆီၣ်လၢ “တၢ်အုၣ်အသးလၢ ပှၤကလုာ်ခဲလၢာ် အဂီၢ်”

လၢတၢ်စံၣ်တဲၤတဲလီၤတၢ်မၤအပူၤ ပသူဝဲတၢ်စံၣ်တဲၤတဲလီၤတၢ် အလ့ၣ်ဆီၣ်န့ၣ် အိၣ်ဝဲဖးယံာ်လံ. ဒီးလ့ၣ်ဆီၣ်တဖၣ်အံၤန့ၣ် ထုးန့ၢ်ပှၤသးဒိၣ်မး. လၢတၢ်လီၢ်တတီၤဂ့ၤတတီၤဂ့ၤ ပှၤမ့ၢ်ထံၣ်လ့ၣ်ဆီၣ်တဖၣ်အံၤန့ၣ် ပှၤသ့ၣ်ညါတဘျီဃီလၢ အကဲဝဲ ယဟိဝၤပှၤအုၣ်သးတဖၣ်အတၢ်. လ့ၣ်ဆီၣ်တဖၣ်အံၤန့ၣ် တမ့ၢ်ထဲ အထုးန့ၢ်ပှၤသးဘၣ် နသူဘၣ်အီၤညီစ့ၢ်ကီး. ဘၣ်သ့ၣ်သ့ၣ် နကတူၢ်ဘၣ်ဒ် ဒီပုၢ်ဝဲၢ်မုၣ် အစဲနထၤ လၢအအိၣ်လၢ ဖိလဲတဂၤ တဲဝဲအသိး. အဝဲတဲဝဲလၢ “လ့ၣ်ဆီၣ်တဖၣ်အံၤန့ၣ် အဖျါယိယိဘၣ်ဆၣ် အထုးန့ၢ်ပှၤသးဒိၣ်မး. ဒီးပှၤသူဘၣ်အီၤညီ ဒီးစိာ်ထီၣ်စိာ်လီၤဘၣ်အီၤ ညီဒိၣ်မး.”

ပှၤတ့ထီၣ်ဝဲ လ့ၣ်ဆီၣ်အံၤဒ်လဲၣ်န့ၣ် နဆိကမိၣ်ဘၣ် တဘျီဘျီဧါ

ပှၤတ့ထီၣ်လ့ၣ်ဆီၣ် တဆီဘၣ်တဆီဒ်လဲၣ်

ဖဲ ၂၀၀၁ န့ၣ်ပှၤပၢဆှၢတၢ် ကမံးတံာ် ဟ့ၣ်အခွဲးလၢ ဒီပုၢ်ဝဲၢ်လၢ ကီၢ်ဖြၣ်စ့ၣ်တဖၣ် ကမၤကွၢ်ဝဲ ကျိၤကျဲအကလုာ်ကလုာ် ဖဲအဝဲသ့ၣ် မၤတၢ်စံၣ်တဲၤတဲလီၤတၢ် လၢကမျၢၢ်အမဲာ်ညါအခါ. လၢအကျါန့ၣ် ပၣ်ဃုာ်ဒီး အဝဲသ့ၣ် ကသူကွၢ်ဝဲ တၢ်စံၣ်တဲၤတဲလီၤတၢ် အလ့ၣ်ဆီၣ်. အဝဲသ့ၣ် သူကွၢ်ဝဲ လ့ၣ်ဆီၣ်အမၠိမၠိ. အဒိ အဝဲသ့ၣ် ဘှီဘၣ်ထီၣ်က့ၤဝဲ ထၢၣ်တွံၢ်တၢ် ဒီးလ့ၣ်ဆီၣ်လၢ ပှၤဟးပှ့ၤတၢ်အဂီၢ် ဒ်သိးကဟးစိာ်ဝဲ လံာ်လဲၢ်တဖၣ် ဒီးဒုးသ့ၣ်ညါပှၤဂၤအဂီၢ်. လၢခံန့ၣ် ဖြၣ်စ့ၣ်အဝဲၤတြၢ် ဃုထၢဝဲလၢ ကသူဝဲလ့ၣ်ဆီၣ်ထဲတခါ ဒီးလ့ၣ်ဆီၣ်တခါအံၤန့ၣ် ပှၤစံၣ်တဲၤတဲလီၤတၢ်ဖိတဖၣ် သူဝဲအိၣ်လံအနံၣ်အါမးလံ.

လၢတၢ်စံၣ်တဲၤတဲလီၤတၢ်လၢ ကမျၢၢ်အမဲာ်ညါန့ၣ် ဒီပုၢ်ဝဲၢ်လၢ ကီၢ်ဖြၣ်စ့ၣ်တဖၣ် မၤကွၢ်ဝဲလၢ ကျဲဒ်န့ၣ်တဖၣ် ဒီးဒိးန့ၢ်ဘၣ်ဝဲအဘျုး အဃိအဝဲသ့ၣ် သးခုဒိၣ်မး. ဒီးဖဲ ၂၀၁၁ န့ၣ်ပှၤပၢဆှၢတၢ်ကမံးတံာ် ဟ့ၣ်အခွဲးလၢ ပှၤကစးထီၣ်မၤကွၢ်ဝဲ တၢ်စံၣ်တဲၤတဲလီၤတၢ်လၢကမျၢၢ်အမဲာ်ညါ လၢအမဲရကၤ, ဝ့ၢ်နူယီးအပူၤ. မ့မ့ၢ်လၢ ဝ့ၢ်နူယီးအပူၤဟီဒု လၢတၢ်စံၣ်တဲၤတဲလီၤတၢ်လၢကမျၢၢ် အမဲာ်ညါန့ၣ် ပှၤသူကွၢ်ဝဲ လ့ၣ်ဆီၣ် ဒီးစီၢ်နီၤခိၣ်. ပှၤလဲၤလၢညါလၢ အပၣ်ဃုာ်လၢ တၢ်ရဲၣ်တၢ်ကျဲၤတခါအံၤန့ၣ် ထံၣ်ဘၣ်ဝဲလၢ ပှၤသူဝဲ လ့ၣ်ဆီၣ်န့ၣ် အကဲဘျုးဒိၣ်မး ဒီးလ့ၣ်ဆီၣ်တဖၣ်န့ၣ် ပှၤသုးထီၣ်သုးလီၤဘၣ်အီၤ ညီဝဲဒိၣ်မး. တကးဒံးဘၣ် အဝဲသ့ၣ် ဟ့ၣ်ကူၣ်ဝဲလၢ ပှၤကဘၣ်မၤဂ့ၤထီၣ်လ့ၣ်ဆီၣ် ဒ်သိးပှၤသူအီၤ ကညီဒိၣ်ထီၣ်အဂီၢ်ဒ်လဲၣ်. လၢအပူၤကွံာ် လ့ၣ်ဆီၣ်န့ၣ် ပှၤတ့အီၤလၢသ့ၣ်အဃိ အဃၢတစဲး ဒီးပှၤမ့ၢ်ဘၣ်ထီၣ်စံၣ်လီၤဃီန့ၣ် အကီတစဲး. အဃိ လ့ၣ်ဆီၣ်တဖၣ်န့ၣ် ပှၤတ့ဖှံထီၣ်အီၤတစဲး. သနာ်က့ ကလံၤမ့ၢ်ဟဲန့ၣ် ပှၤဘၣ်ယိၣ်လၢ ကလီၤတကူၢ်အဃိ ပှၤတတ့အီၤ ဖှံတလၢဘၣ်. ဒီးလ့ၣ်ဆီၣ်အပၣ်တဖၣ်န့ၣ် ပှၤမၤဒိၣ်ထီၣ်အီၤ ဒီးပှၤမၤကျၢၤထီၣ်အီၤအဃိ ကျဲမ့ၢ်တမုာ်နာ်က့ နဟးတွံၢ်ဘၣ်အီၤညီ. တကးဒံးဘၣ် လ့ၣ်ဆီၣ်န့ၣ် အိၣ်ဒီးအကအိတခါလၢ ပှၤကစိာ်အါထီၣ် လံာ်လဲၢ်အဂီၢ်.

ပှၤမၤကွၢ်ဝဲ တၢ်စံၣ်တဲၤတဲလီၤတၢ်လၢကမျၢၢ်အမဲာ်ညါန့ၣ် ကဲထီၣ်လိၣ်ထီၣ်ဝဲ. အဃိ ဖဲ ၂၀၁၂ န့ၣ် ပှၤပၢဆှၢတၢ်ကမံးတံာ် ဟ့ၣ်အခွဲးလၢ ပှၤကသူဝဲ တၢ်စံၣ်တဲၤတဲလီၤတၢ် အလ့ၣ်ဆီၣ် လၢဟီၣ်ခိၣ်ဒီဘ့ၣ်. ဒီးဒီပုၢ်ဝဲၢ်တဖၣ်န့ၣ် ထံၣ်န့ၢ်ဝဲ ပှၤလၢကထုးထီၣ်န့ၢ်အဝဲသ့ၣ် လ့ၣ်ဆီၣ်အဖျၢၣ်အါအါဂီၢ်ဂီၢ်.

ဒီးလၢခံန့ၣ် ပှၤမၤဂ့ၤဒိၣ်ထီၣ် လ့ၣ်ဆီၣ်တဖၣ်အံၤ. အဒိ ဖဲ ၂၀၁၅ န့ၣ်ပှၤတ့ထီၣ်ဝဲ လ့ၣ်ဆီၣ်အဒၢ လၢပလးစတ့းအဆှံတကလုာ် ဒ်သိးမူခိၣ်မ့ၢ်စူၤန့ၣ် အသုတဘၣ်စီၣ်တဂ့ၤအဂီၢ်. ဒံနၤ လၢအအိၣ်လၢ ကၠီၣ်ကၠံယၢၣ်န့ၣ် အဘၣ်သူၣ်ဘၣ်သးဝဲ လ့ၣ်ဆီၣ်လၢ ပှၤမၤဂ့ၤထီၣ်အီၤတခါအံၤဒိၣ်မး. အဝဲတဲဝဲလၢ “လ့ၣ်ဆီၣ်အံၤန့ၣ် အအိၣ်ဒီး အဆ့ကၤမိကၢ်ကၠးနး. အဃိ လံာ်လဲၢ်တဖၣ် တဘၣ်စီၣ်လၢၤဘၣ်.” ဖဲ ၂၀၁၇ န့ၣ် လၢကျိာ်တနီၤန့ၣ် ပှၤမၤထီၣ်ဝဲ ဖိးစထၢၤ (poster) လၢပှၤကျးလီၤအီၤလၢ ထးနါ. ဒီပုၢ်ဝဲၢ်ခွါ ထိမါစ လၢအအိၣ်လၢ ဖိလဲန့ၣ် တဲဝဲလၢ “ဖဲပသူ ဖိးစထၢၤလၢ ပှၤကျးဘုးတာ်အီၤအခါ ပမ့ၢ်ဘၣ်ဆီတလဲအီၤန့ၣ် တညီဘၣ်. ဘၣ်ဆၣ် ပသူဝဲ ဖိးစထၢၤလၢ ပှၤကျးအီၤလၢ ထးနါန့ၣ် အညီထီၣ်ဝဲဒိၣ်မး.” ဖဲ ၂၀၁၉ န့ၣ်ပသူက့ၤ တၢ်ပီးတၢ်လီအဂၤ ဒီးတၢ်တ့ထီၣ်လ့ၣ်ဆီၣ်အကျိၤအကျဲ လၢအဂၤ ဒ်သိး လ့ၣ်ဆီၣ်တဖၣ်အံၤ ကတူၢ်ယံာ်အဂီၢ်.

တၢ်ထုးထီၣ်ရၤလီၤ တၢ်စံၣ်တဲၤတဲလီၤတၢ် အလ့ၣ်ဆီၣ်

ပှၤလၢအထုးထီၣ်လ့ၣ်ဆီၣ်တဖၣ်အံၤန့ၣ် အိၣ်ထဲတဂၤလီၤ. ဒီးလ့ၣ်ဆီၣ်တဖၣ်အံၤန့ၣ် ပှၤဆှၢဝဲလၢ ဟီၣ်ခိၣ်ဒီဘ့ၣ်. လ့ၣ်ဆီၣ်တခိၣ်န့ၣ် လီၤလၢဝဲ အမဲရကၤအစ့ ၄၃ ဒီၤလၤ. အဝဲန့ၣ်န့ၣ် ပှၤဆှၢထီၣ်ဆှၢလီၤအီၤ ဒီးတၢ်အဂၤအပှ့ၤ တပၣ်ဒံးဘၣ်. လၢလ့ၣ်ဆီၣ်တဖၣ်အံၤအဂီၢ်န့ၣ် ပှၤသူဝဲစ့ အိၣ်လံ အမဲရကၤစ့ဒီၤလၤ ၁၆ ကကွဲၢ်လံ. ဒီးလ့ၣ်ဆီၣ်လၢ ပှၤဆှၢလီၤအီၤလၢ တၢ်အိၣ်ဖှိၣ်လၢဟီၣ်ခိၣ်ဒီဘ့ၣ်န့ၣ် အိၣ်လံ အခိၣ် ၄၂၀,၀၀၀ လံ.

ဒ်သိး တၢ်မၤဘူၣ်တလၢာ်ဂီၤတဂ့ၤအဂီၢ် ပှၤမ့ၢ်မာ်လိာ်လ့ၣ်ဆီၣ်တဘျီန့ၣ် ပှၤမာ်လိာ်ဝဲအါအါ. တကးဒံးဘၣ် တၢ်အိၣ်ဖှိၣ်မၤလိာ်ဝဲ လ့ၣ်ဆီၣ် အကူာ်အခီ လၢအပိာ်တဖၣ်န့ၢ်လံအဃိ လ့ၣ်ဆီၣ်မ့ၢ်ဟးဂီၤန့ၣ် ပှၤတ့ဂ့ၤထီၣ်က့ၤအီၤသ့ ဒီးပှၤတလိၣ် ဆီတလဲအီၤလၢ အသီတဖျၢၣ်ဘၣ်.

ပှၤသူလ့ၣ်ဆီၣ်လၢ တၢ်စံၣ်တဲၤတဲလီၤတၢ်မၤအဂီၢ်

ပှၤစံၣ်တဲၤတဲလီၤတၢ်ဖိ လၢဟီၣ်ခိၣ်ဒီဘ့ၣ်န့ၣ် သူဝဲ တၢ်စံၣ်တဲၤတဲလီၤတၢ် အလ့ၣ်ဆီၣ်မုာ်ဒိၣ်မး. ဒီပုၢ်ဝဲၢ်မုၣ် မၤထံနၤ လၢအအိၣ်လၢ ကီၢ်ကၣ်နၣ်န့ၣ် တဲဝဲလၢ “တၢ်စံၣ်တဲၤတဲလီၤတၢ် အကျိၤအကျဲအါတက့ၢ်န့ၣ် ပဘၣ်လဲၤလၢ ပှၤအိၣ်. ဘၣ်ဆၣ် မ့မ့ၢ် တၢ်စံၣ်တဲၤတဲလီၤတၢ်လၢ လ့ၣ်ဆီၣ်ဟီဒု ပှၤဟဲလၢ ပအိၣ် အဃိယကၠဲးဒိၣ်မး. ဒီးပှၤလၢ အဟဲဖၠးဘၣ်ကျဲတဖၣ်နာ်က့ အိၣ်ဒီးတၢ်ခွဲးတၢ်ယာ်လၢ ကနၢ်ဟူဘၣ် တၢ်သးခုကစီၣ်.”

လၢကီၢ်အၤဖြံၤကၤန့ၣ် ပှၤပိာ်ခွါတဂၤ ဟဲလၢလ့ၣ်ဆီၣ်အိၣ် ဒီးဟံးန့ၢ်ဝဲ လံာ်လဲၢ်တဖၣ်လၢ အနီၢ်ကစၢ်အကျိာ်. ဒီးတနွံဝံၤအလီၢ်ခံ အဝဲဟဲက့ၤကဒါက့ၤ ဒီးတဲဝဲလၢ “ယဖးကွၢ်လံာ်ခဲလၢာ်လံ. တၢ်ဂ့ၢ်လၢလံာ်ပူၤန့ၣ် အရ့ဒိၣ်ဒိၣ်မး. ယကက့ၤတဲဘၣ် ယဟံၣ်ဖိဃီဖိလၢ အအိၣ်လၢယသဝီပူၤ.” အသဝီန့ၣ် ယံၤဝဲ အကံလိမံထၢၣ် ၅၀၀. ဒီးခံလါဝံၤအလီၢ်ခံ အဝဲဟဲက့ၤကဒါက့ၤ ဒီးတဲဝဲလၢ “ပှၤလၢယသဝီပူၤတဖၣ် ဖးကွၢ်ဝဲ လံာ်တဖၣ်အံၤခဲလၢာ်. ဒီးအကၠဲးဝဲ တၢ်ဂ့ၢ်တၢ်ကျိၤတဖၣ်ဒိၣ်မး. အဝဲသ့ၣ် အဲၣ်ဒိးကဲထီၣ် ယဟိဝၤပှၤအုၣ်အသး ဘၣ်ဆၣ် အဝဲသ့ၣ် အိၣ်ဒီးတၢ်သံကွၢ်တဖၣ်ဒံး. အဒိ အဝဲသ့ၣ် နၢ်ပၢၢ်ထီၣ်ဝဲလၢ အကဘၣ်ဒိးဘျၢထံ. ဘၣ်ဆၣ် ပသဝီန့ၣ် တအိၣ်ဘူးဒီးထံကျိဘၣ်. အဃိ ပဘၣ်ဟဲဒိးဘျၢထံ ဖဲအံၤဧါ.” ပှၤစံၣ်တဲၤတဲလီၤတၢ်ဖိခံဂၤ ဆဲးကျိးန့ၢ်အီၤဒီး ပှၤလဲၤလၢညါတဂၤ လၢအတဲအကျိာ်ဘၣ်. စးထီၣ်ဖဲန့ၣ် ပိာ်ခွါတဂၤအံၤ မၤလိလံာ်စီဆှံထီဘိ.

ပထံၣ်ဘၣ်လၢ ပှၤသူဝဲ တၢ်စံၣ်တဲၤတဲလီၤတၢ် အလ့ၣ်ဆီၣ် လၢပှၤကစံၣ်တဲၤတဲလီၤတၢ်လၢ “ဟီၣ်ခိၣ်ဒီဘ့ၣ်ညါ ဒ်သိး ကကဲထီၣ် တၢ်အုၣ်အသးလၢ ပှၤကလုာ်ခဲလၢာ် အဂီၢ်” အဃိ ပသးခုဒိၣ်မး. (မးသဲ ၂၄:၁၄) ပကထုးထီၣ် လ့ၣ်ဆီၣ်တဖၣ်အံၤအဂီၢ် ပမၤန့ၢ်စ့ဖဲလဲၣ်. ပသူဝဲ ဟီၣ်ခိၣ်ဒီဘ့ၣ်တၢ်မၤဘူၣ်. ဒီးပှၤအါဂၤန့ၣ် ဟ့ၣ်လီၤဝဲ တၢ်မၤဘူၣ်လၢ donate.jw.org အပူၤ. တၢ်ဘျုးဒိၣ်မးလၢ သုသးအိၣ်ဟ့ၣ်တၢ်အဃိ.