ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိတၢ်ဂ့ၢ်ဘျးစဲ
© 2024 Watch Tower Bible and Tract Society of Pennsylvania
လါမ့ၤ ၆-၁၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၃၆-၃၇
“တဘၣ်သးတံာ်တာ်လၢ ပှၤအၢပှၤသီတဖၣ် အဃိတဂ့ၤ”
ကစၢ်ယွၤအဘီမုၢ် မ့ၢ်ဟဲန့ၣ် တၢ်မနုၤကလီၤမၢ်ကွံာ်ဝဲလဲၣ်
၄ ပှၤအၢပှၤသီတဖၣ် မၤဘၣ်ဒိပှၤဒ်လဲၣ်. စီၤပီလူးတဲဝဲလၢ မုၢ်နံၤခံကတၢၢ် အဆၢကတီၢ်န့ၣ် “မ့ၢ်တၢ်ဆၢကတီၢ်လၢ အကီအခဲ” လီၤ. ဒီးအဝဲတဲစ့ၢ်ကီးဝဲလၢ– “ပှၤအၢပှၤသီဒီး ပှၤလီတၢ်ဝ့ၤတၢ်တဖၣ်န့ၣ် . . . ကအၢလီၤဝဲ နးထီၣ်နးထီၣ်လီၤ.” (၂ တံၤမသ့း ၃:၁-၅, ၁၃) တၢ်သ့ၣ်တဖၣ်အံၤ ဟဲကဲထီၣ်ဝဲန့ၣ် မ့ၢ်နထံၣ်ဘၣ်လၢ နမဲာ်လံဧါ. ပှၤအၢပှၤသီတဖၣ်အဃိ ပှၤအါဂၤတူၢ်ဘၣ်ဝဲ တၢ်မၤနၢၤအီၣ်ဃီၣ်, တၢ်ကွၢ်တလီၤလိာ်သး ဒီးတၢ်မၤအၢမၤသီတဖၣ်လီၤ. အဝဲသ့ၣ်တနီၤန့ၣ် မၤတၢ်အၢတၢ်သီဒူဒူလီၤ. မ့မ့ၢ်အဂၤတနီၤန့ၣ် ပာ်မၤအသးဒ်သိးဒီး အမ့ၢ်ပှၤဂ့ၤလၢအမၤစၢၤပှၤဂၤ ဘၣ်ဆၣ်မၤတၢ်အၢတၢ်သီလီၤ. ပှၤအၢပှၤသီတဖၣ် မ့ၢ်တမၤပှၤတၢ်နီတမံၤဒၣ်လဲာ် ပသးဘၣ်ဒိလၢ အဝဲသ့ၣ်အတၢ်ဖံးတၢ်မၤအဃိလီၤ. ဖဲပနၢ်ဟူဘၣ်လၢ အဝဲသ့ၣ်မၤအၢမၤနး ပှၤဖိသၣ်, ပှၤသးပှၢ် ဒီးပှၤလၢအဂံၢ်စၢ်ဘါစၢ်တဖၣ်အခါ ပသးဘၣ်ဒိဒိၣ်မးလီၤ. ပှၤအၢပှၤသီတဖၣ်အံၤ အတၢ်ပာ်သူၣ်ပာ်သးန့ၣ် လီၤဂာ်ဒ်ဆၣ်ဖိကီၢ်ဖိ ဒီးတၢ်ဝံတၢ်နါတဖၣ်လီၤ. (ယၤကိာ် ၃:၁၅) ဘၣ်ဆၣ် မ့ၢ်လၢယဟိဝၤယွၤ အကလုၢ်ကထါ ဟ့ၣ်ပှၤတၢ်မုၢ်လၢ်အဃိ ပသးခုဒိၣ်မးလီၤ.
ယဟိဝၤယွၤ ဆိၣ်ဂ့ၤ ပှၤလၢ အပျၢ်ကွံာ် ပှၤဂၤအတၢ်ကမၣ်
၁၀ ပမ့ၢ်စၢဃာ်ပှၤဂၤအတၢ်ကမၣ်န့ၣ် အိၣ်ဒၣ် ကမၤဘၣ်ဒိပှၤ. ပမ့ၢ်တစၢဃာ် ပှၤဂၤအတၢ်ကမၣ်ဘၣ်န့ၣ် လီၤဂာ်ဒ် ပတၢ်ဝံတၢ်ယိာ် ကလီၤဖှံ ဒီးယဟိဝၤယွၤဘၣ်သးလၢ ပကတူၢ်ဘၣ်ဒ်န့ၣ်. (ဖး အ့းဖ့းစူး ၄:၃၁, ၃၂.) အဃိ ယဟိဝၤယွၤဟ့ၣ်ဂံၢ်ဟ့ၣ်ဘါပှၤလၢ “ဆိတ့ၢ်လၢတၢ်သးထီၣ်န့ၣ်, ဒီးလဲၤသဒၣ် တၢ်သးကဲၤထီၣ်န့ၣ်တက့ၢ်.” (စံးထီၣ်ပတြၢၤ ၃၇:၈) ဒီးပမ့ၢ်မၤထွဲ တၢ်ဟ့ၣ်ကူၣ်တခါအံၤန့ၣ် အကကဲဘျုးလၢပဂီၢ်. ခီဖျိလၢ ပမ့ၢ်စၢဃာ်ပှၤဂၤ တၢ်ကမၣ်န့ၣ် အိၣ်ဒၣ်အကမၤဘၣ်ဒိ ပတၢ်အိၣ်ဆူၣ်အိၣ်ချ့, ဒီးကမၤဆါပခိၣ်နူာ်. (ကတိၤဒိ ၁၄:၃၀) အဒိ ပမ့ၢ်အီ တၢ်စုၣ်တၢ်ပျၢ် အထံန့ၣ် အိၣ်ဒၣ်ကမၤဘၣ်ဒိပှၤလီၤ, အတမၤဘၣ်ဒိပှၤဂၤဘၣ်. ဒ်န့ၣ်အသိး ပမ့ၢ်စၢဃာ် ပှၤဂၤအတၢ်ကမၣ်န့ၣ် အိၣ်ဒၣ် ကမၤဘၣ်ဒိပှၤလီၤ, တမ့ၢ်လၢ ကမၤဘၣ်ဒိပှၤဂၤဘၣ်. အဃိ ပမ့ၢ်ပျၢ်ကွံာ် ပှၤဂၤအတၢ်ကမၣ်န့ၣ် ကကဲဘျုးလၢ ပနီၢ်ကစၢ်အဂီၢ်. (ကတိၤဒိ ၁၁:၁၇) အကကဲဘျုးဒ်လဲၣ်န့ၣ် အဒိ ပကအိၣ်ဒီး တၢ်သူၣ်မံသးမုာ် ဒီးပဆဲးမၤ ယဟိဝၤယွၤတၢ်မၤလၢ တၢ်သးခုပူၤသ့.
တၢး၀၃ ၁၂/၁ ၁၃ ¶၂၀
“သးခုဖးဒိၣ်လၢ ယဟိဝၤယွၤအပူၤ”
၂၀ လံာ်စီဆှံတဲဝဲလၢ “ပှၤလၢအဆီၣ်လီၤသးန့ၣ် ကန့ၢ်သါဘၣ် ဟီၣ်ခိၣ်လီၤ.” (စံးထီၣ်ပတြၢၤ ၃၇:၁၁) “ပှၤလၢအဆီၣ်လီၤသး” တဖၣ်အံၤ မ့ၢ်ပှၤဒ်လဲၣ်တဖၣ်လဲၣ်. ဧ့ၤဘြံၤအတၢ်ကတိၤလၢ ဘၣ်တၢ်ကွဲးကျိာ်ထံက့ၤအီၤလၢ “ဆီၣ်လီၤသး” န့ၣ်အခီပညီ မ့ၢ်စ့ၢ်ကီး “မၤအၢမၤနး, ဘၣ်တၢ်မၤ မဲာ်ဆှးအီၤ.” “ပှၤလၢအဆီၣ်လီၤသးန့ၣ်” အဝဲသ့ၣ် မ့ၢ်ထံၣ်ဘၣ် တၢ်တတီတလိၤ သနာ်က့ အဝဲသ့ၣ် အိၣ်ဒီးတၢ်ဆီၣ်လီၤသး ဒီးအိၣ်ခိးဝဲ ယဟိဝၤယွၤ လၢကမၤဘၣ်ဂီၢ်န့ၢ်အီၤ တၢ်တတီတလိၤတဖၣ်. “အဝဲသ့ၣ် ကသးခုဝဲဒိၣ်မး မ့ၢ်လၢ တၢ်ဃူတၢ်ဖိး ကအိၣ်ဝဲအါမးအဃိလီၤ.” (စံးထီၣ်ပတြၢၤ ၃၇:၁၁) ဆၢကတီၢ်ခဲအံၤ ပအိၣ်ဘၣ်လၢ နီၢ်သးပၤရဒံစူးအဃိ ပထံၣ်ဘၣ် တၢ်ဃူတၢ်ဖိးအါမး လၢဒီပုၢ်ဝဲၢ်မုၣ်ခွါတဖၣ်အကျါ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-2 ၄၄၅
ကစၢၢ်, ကစၢၢ်ကလိ
တၢ်လၢအအိၣ်ဂၢၢ်အိၣ်ကျၢၤ, တၢ်လၢအအိၣ်လီၤထူလီၤယိာ် မ့တမ့ၢ် တၢ်လၢအဒိၣ်အထီ. တၢ်တခါလၢ အအိၣ်ဂၢၢ်အိၣ်ကျၢၤ ဒီးအိၣ်လီၤထူလီၤယိာ်န့ၣ် ဘၣ်တၢ်ဒိလီၤအီၤ လၢကစၢၢ်ကလိ. (ၡါ ၅၄:၁၀; ဃဘး ၃:၆; ထိၣ်သတြီၤဒီး စံး ၄၆:၂.) အဃိ ဖဲပှၤကွဲးထါ စံးထီၣ်ပတြၢၤတဂၤ တဲဝဲလၢ ယဟိဝၤယွၤ အတၢ်တီတၢ်လိၤန့ၣ် လီၤဂာ်ဒ် “ကစၢ်ယွၤ အကစၢၢ်တဖၣ်” အခါ (စံး ၃၆:၆) ဘၣ်သ့ၣ်သ့ၣ် အအဲၣ်ဒိးတဲဝဲလၢ ယဟိဝၤယွၤ အတၢ်တီတၢ်လိၤန့ၣ် တဆီတလဲဘၣ်. မ့တမ့ၢ် ခီဖျိလၢ ကစၢၢ်န့ၣ် အကစီၤထီၣ်ထီဝဲအဃိ ဘၣ်သ့ၣ်သ့ၣ် အကအဲၣ်ဒိးတဲဝဲလၢ ကစၢ်ယွၤ အတၢ်တီတၢ်လိၤန့ၣ် အပတီၢ်ထီန့ၢ်ဒံး ပှၤဟီၣ်ခိၣ်ဖိတဖၣ် အတၢ်တီတၢ်လိၤဒံး. (ထိၣ်သတြီၤဒီး ၡါ ၅၅:၈, ၉.) ဘၣ်ဃးဒီး တၢ်လူလီၤ ကစၢ်ယွၤ အတၢ်သးဒိၣ်ထီၣ် အလီခီဖျၢၣ် နွံဖျၢၣ် အဂ့ၢ်န့ၣ် လီၣ်ဖျါ ၁၆:၂၀ တဲဝဲလၢ “ကစၢၢ်တဖၣ်န့ၣ် လီၤမၢ်ကွံာ်ဝဲ.” အဃိ အဲၣ်ဒိးတဲဝဲလၢ ကစၢ်ယွၤ မ့ၢ်သးဒိၣ်ထီၣ်တၢ်န့ၣ် တၢ်လၢ အဒိၣ်အထီဝဲ ဒ်သိးဒီးကစၢၢ်ဒၣ်လဲာ် တပူၤဖျဲးဝဲဘၣ်.—ထိၣ်သတြီၤဒီး ယံး ၄:၂၃-၂၆.
ijwbv ၄၅
စံးထီၣ်ပတြၢၤ ၃၇:၄ န့ၣ်အဲၣ်ဒိးတဲဝဲ အခီပညီ ဒ်လဲၣ်.
ပှၤကွဲးထါ စံးထီၣ်ပတြၢၤ ဟ့ၣ်ဂံၢ်ဟ့ၣ်ဘါဝဲ ပှၤလၢအဘူၣ်ထီၣ်ဘါထီၣ် ကစၢ်ယွၤလၢ အဝဲသ့ၣ် ကဃုထံၣ်န့ၢ် တၢ်သးခု ခီဖျိအိၣ်ဒီးတၢ်ရ့လိာ်သးဒီး ယဟိဝၤယွၤ. ပှၤလၢအတၢ်ရ့လိာ်သးဒီး ယဟိဝၤယွၤဂ့ၤန့ၣ် အဝဲသ့ၣ် နာ်ဝဲသ့သပှၢ်ကတၢၢ်လၢ ယဟိဝၤယွၤ ကမၤလၢပှဲၤအဝဲသ့ၣ် အတၢ်လိၣ်ဘၣ်.
“သးခုဖးဒိၣ်လၢ ယဟိဝၤယွၤအပူၤတက့ၢ်.” တၢ်ကတိၤအံၤ အခီပညီ အိၣ်စ့ၢ်ကီးလၢ သးခုဒိၣ်ကတၢၢ်လၢ ယဟိဝၤယွၤအပူၤ” မ့တမ့ၢ် “သးခုလၢ ကစၢ်ယွၤအတၢ်မၤပူၤ” မ့တမ့ၢ် “သးခုလၢ ကစၢ်ယွၤ အတၢ်အၢၣ်လီၤအပူၤ.” ပမ့ၢ်တဲယိယိဖိန့ၣ် ပကြၢး “သးခုဖးဒိၣ်လၢ တၢ်ဘူၣ်ထီၣ်ဘါထီၣ်” ယွၤလၢအမ့ၢ်အတီအပူၤ. (စံးထီၣ်ပတြၢၤ ၃၇:၄) ဘၣ်မနုၤအဃိလဲၣ်.
ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် အအိၣ်ဒီးတၢ်ထံၣ် ဒ်သိးဒီးယဟိဝၤယွၤ. အဝဲသ့ၣ် သ့ၣ်ညါ ကစၢ်ယွၤ တကးဒံးဘၣ် အနာ်ဝဲလၢ အဝဲသ့ၣ် မ့ၢ်ဒိကနၣ် ကစၢ်ယွၤ အကလုၢ်န့ၣ် မ့ၢ်ဝဲ တၢ်လၢအအိၣ်ဒီး တၢ်ကူၣ်သ့. အဃိ မၤစၢၤအဝဲသ့ၣ် ဒ်သိးဒီး အကအိၣ်ဒီး သးလၢအသ့ၣ်ညါဒၣ်တၢ် လၢအကဆှီ ဒီးအတၢ်ဆၢတဲာ် တကမၣ်တဂ့ၤအဂီၢ်. (ကတိၤဒိ ၃:၅, ၆) အဒိ ဖဲအဝဲသ့ၣ် ထံၣ်ဝဲလၢ ပှၤလၢအအိၣ်ဒီး တၢ်သူၣ်လီသးကွံ ဒီးအမၤတၢ် တတီတလိၤတဖၣ် ကဲဒိၣ်ထီၣ်အခါ အဝဲသ့ၣ် တသးထီၣ်တၢ် မ့တမ့ၢ် တသးက့ၣ်တၢ်ဘၣ်. (စံးထီၣ်ပတြၢၤ ၃၇:၁, ၇-၉) ဒီးအဝဲသ့ၣ် သ့ၣ်ညါဝဲလၢ တယံာ်လၢၤဘၣ်န့ၣ် ကစၢ်ယွၤ ကမၤကတၢၢ်ကွံာ် တၢ်တတီတလိၤ ဒီးကဆိၣ်ဂ့ၤဝဲ ပှၤလၢအအိၣ်ဒီး တၢ်သးတီတဖၣ် အဃိ အဝဲသ့ၣ် သးခုဒိၣ်မး. (စံးထီၣ်ပတြၢၤ ၃၇:၃၄) တကးဒံးဘၣ် အဝဲသ့ၣ် သ့ၣ်ညါဝဲလၢ အပၢ်အိၣ်လၢမူခိၣ် ဘၣ်သူၣ်ဘၣ်သး အဝဲသ့ၣ်အဃိ အဝဲသ့ၣ်သးခုဒိၣ်မး.—စံးထီၣ်ပတြၢၤ ၅:၁၂; ကတိၤဒိ ၂၇:၁၁.
“အဝဲကမၤလၢပှဲၤန့ၢ်နၤ တၢ်လၢနလီကီတဖၣ်လီၤ.” တၢ်ကတိၤအံၤ ပှၤကွဲးကျိာ်ထံစ့ၢ်ကီးဝဲလၢ “အဝဲကစံးဆၢ နတၢ်ဃ့ထုကဖၣ်” မ့တမ့ၢ် “အဝဲကဟ့ၣ်နၤ တၢ်လၢ နလီကီအဒိၣ်ကတၢၢ်.” ဘၣ်ဆၣ် တဘျီတခီၣ် တမ့ၢ်လၢ ကစၢ်ယွၤကဟ့ၣ်ပှၤ တၢ်လၢပဃ့အီၤကိးမံၤဒဲးဘၣ်. ဒ်မိပါတဖၣ် သ့ၣ်ညါတၢ်အဂ့ၤကတၢၢ်လၢ အဖိအဂီၢ်အသိး ယဟိဝၤယွၤ သ့ၣ်ညါတၢ်အဂ့ၤကတၢၢ် လၢပဂီၢ်. ဒ်သိးကစၢ်ယွၤ ကစံးဆၢ ပတၢ်ထုကဖၣ်အဂီၢ် ပတၢ်ထုကဖၣ် ဒီးပတၢ်အိၣ်မူသကဲာ်ပဝးန့ၣ် ကဘၣ်လီၤပလိာ်ဒီး အတၢ်သိၣ်တၢ်သီ ဒီးအတၢ်ဘၣ်သး. (ကတိၤဒိ ၂၈:၉; ယၤကိာ် ၄:၃; ၁ ယိၤဟၣ် ၅:၁၄) ပမ့ၢ်မၤဒ်န့ၣ်န့ၣ် ဖဲပဃ့ထုကဖၣ်လၢ “ပှၤလၢအဒိကနၣ် တၢ်ထုကဖၣ်” အအိၣ်အခါ ပနာ်သ့သပှၢ်ကတၢၢ်လၢ အဝဲကဒိကနၣ်ပှၤ.—စံးထီၣ်ပတြၢၤ ၆၅: ၂; မးသဲ ၂၁:၂၂.
လါမ့ၤ ၁၃-၁၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၃၈-၃၉
တဘၣ်သးအုး လၢနတၢ်ကမၣ် လၢအပူၤကွံာ်အဃိ အါတလၢတဂ့ၤ
“ကွၢ်တၢ်လိၤလိၤ” ဆူခါဆူညါတက့ၢ်
၁၂ ဖး ၁ ယိၤဟၣ် ၃:၁၉, ၂၀ တက့ၢ်. တဘျီတခီၣ် ပတူၢ်ဘၣ်လၢ ပတၢ်ကမၣ်အိၣ်ဒံးဝဲလီၤ. အဒိ ပှၤတနီၤတူၢ်ဘၣ်လၢ အတၢ်ကမၣ်အိၣ်ဒံးဝဲ ခီဖျိအမၤတ့ၢ် တၢ်ကမၣ်လၢအပူၤကွံာ် ဖဲအတချုး ဒိးဘျၢထံဒံးဘၣ် အခါန့ၣ်လီၤ. မ့မ့ၢ်အဂၤတနီၤန့ၣ် မၤကမၣ်ဘၣ်တၢ် ဖဲအဒိးဘျၢထံဝံၤအလီၢ်ခံ အဃိ အတူၢ်ဘၣ်ဝဲလၢ တၢ်ကမၣ်အိၣ်ဒံးဝဲလီၤ. တၢ်တူၢ်ဘၣ်သ့ၣ်တဖၣ်န့ၣ် ကဲထီၣ်အသးသ့လီၤ. (ရိမ့ၤ ၃:၂၃) ပဝဲခဲလၢာ်န့ၣ် ပအဲၣ်ဒိးမၤတၢ်လၢအဘၣ်လီၤ. ဘၣ်ဆၣ် ပဝဲခဲလၢာ် “ပမၤကမၣ်တၢ်အါမံၤ” အါဘျီလီၤ. (ယၤကိာ် ၃:၂; ရိမ့ၤ ၇:၂၁-၂၃) ပမၤကမၣ်ဘၣ်တၢ်န့ၣ် ပတူၢ်ဘၣ်တမုာ်ဘၣ် ဘၣ်ဆၣ်အမၤစၢၤပှၤသ့လီၤ. ဘၣ်မနုၤပတဲဒ်န့ၣ်လဲၣ်. မ့ၢ်လၢအမၤစၢၤပှၤဒ်သိး ပကဘှီဂ့ၤထီၣ်ပသး ဒီးပတက့ၤမၤကဒါက့ၤ တၢ်ကမၣ်ဒ်အလီၢ်လီၢ်အသိး လၢၤတဂ့ၤအဃိလီၤ.—ဧ့ၤဘြံၤ ၁၂:၁၂, ၁၃.
၁၃ ပပီၢ်ယၢ်လီၤက့ၤပသးဒီး ယဟိဝၤယွၤပျၢ်ကွံာ် ပတၢ်ကမၣ်လံ သနာ်က့ တဘျီတခီၣ် ပကဆဲးတူၢ်ဘၣ်လၢ ပတၢ်ကမၣ်အိၣ်ဒံးလီၤ. ပမ့ၢ်တူၢ်ဘၣ်ဒ်န့ၣ်န့ၣ် လီၤဘၣ်ယိၣ်ဝဲလီၤ. (စံးထီၣ်ပတြၢၤ ၃၁:၁၀; ၃၈:၃, ၄) ဘၣ်မနုၤအဃိလဲၣ်. ပကကွၢ်သကိး ဒီပုၢ်ဝဲၢ်မုၣ်တဂၤအဂ့ၢ်လီၤ. လၢအပူၤကွံာ်န့ၣ် အမၤဘၣ်တၢ်ကမၣ်အဃိ အဝဲဆဲးတူၢ်ဘၣ်လၢ အတၢ်ကမၣ်အိၣ်ဒံးဝဲလီၤ. အတဲဝဲလၢ “ယတူၢ်ဘၣ်လၢ ယမ့ၢ်ဂုာ်ကျဲးစၢးမၤအီၤလၢ အဂ့ၤကတၢၢ်ထဲလဲၣ် သနာ်က့ အဘျုးတအိၣ်ဘၣ်. ဒ်လဲၣ်ဂ့ၤဒ်လဲၣ်ဂ့ၤ တမ့ၢ်လၢယကန့ၢ်ဘၣ် တၢ်အုၣ်က့ၤခီၣ်က့ၤဘၣ်.” ပဝဲအါဂၤ ပကတူၢ်ဘၣ် ဒ်သိးဒီးအီၤလီၤ. အဃိ ပကဘၣ်ပလီၢ်ပသး ဒ်သိးပသုတဆဲးတူၢ်ဘၣ်လၢ ပတၢ်ကမၣ်အိၣ်ဒံးဝဲန့ၣ်တဂ့ၤ. ဘၣ်မနုၤအဃိလဲၣ်န့ၣ် ယဟိဝၤယွၤအဲၣ်ပှၤဒီး အဝဲပျၢ်ကွံာ်ပတၢ်ကမၣ်လီၤ. ဘၣ်ဆၣ် ပမ့ၢ်ဆဲးအိၣ်ဒီး တၢ်တူၢ်ဘၣ်ဒ်န့ၣ်န့ၣ် မုၣ်ကီၤလံၢ်ကသးခုဝဲဒိၣ်မးလီၤ.—ထိၣ်သတြီၤဒီး ၂ ကရံၣ်သူး ၂:၅-၇, ၁၁ တက့ၢ်.
တၢး၀၂ ၁၁/၁၅ ၂၀ ¶၁-၂
ဖဲပအိၣ်မူဒံးအခါ ပအိၣ်မူလၢအဂ့ၤကတၢၢ် လၢကစၢ်ယွၤအမဲာ်ညါ ကသ့ဒ်လဲၣ်
ပသးသမူန့ၣ် ဖုၣ်ဖုၣ်ဖိ ဒီးပတၢ်အိၣ်မူန့ၣ် လဲၤပူၤကွံာ်အသးချ့မး. အဃိ ဖဲစီၤဒၤဝံး ဆိကမိၣ်ထံဝဲ ပှၤဟီၣ်ခိၣ်ဖိတဖၣ်အိၣ်မူဘၣ် ဖုၣ်ဖုၣ်ဖိအဂ့ၢ်အခါ အဝဲကွဲးဝဲလၢ “အိ ယဟိဝၤယွၤဧၢ, မၤစၢၤယၤ ဒ်သိးယကသ့ၣ်ညါလၢ ယတၢ်အိၣ်မူန့ၣ် ကဖုၣ်ဒိၣ်မးန့ၣ်တက့ၢ်. ဒီးမၤစၢၤယၤ ဒ်သိး ယကသ့ၣ်ညါလၢ တစိၢ်ဖိဒီး ယကျဲကကတၢၢ် ဒီးယတၢ်အိၣ်မူ ကလဲၤပူၤကွံာ်အသး ချ့မးန့ၣ်တက့ၢ်. နဟ့ၣ်လီၤယၤ တၢ်အိၣ်မူဖုၣ်ဖုၣ်ဖိ ဒီးလၢနမဲာ်ညါန့ၣ် ယတၢ်အိၣ်မူအကတီၢ် ယံာ်ထဲလဲၣ်န့ၣ် တမ့ၢ်တၢ်နီတမံၤဘၣ်.” စီၤဒၤဝံး ပာ်ဖျါထီၣ်ဝဲလၢ အအိၣ်မူဝဲဒ် ကစၢ်ယွၤ အတၢ်ဘၣ်သးအသိး ခီဖျိ အတၢ်စံးတၢ်ကတိၤ ဒီးအတၢ်ဖံးတၢ်မၤ. အဃိ အဝဲတဲဝဲလၢ “ထဲနၤတဂၤန့ၣ် နမ့ၢ်ယတၢ်မုၢ်လၢ်.” (စံးထီၣ်ပတြၢၤ ၃၉:၄, ၅, ၇) ယဟိဝၤယွၤ ဒိကနၣ်ဝဲ စီၤဒၤဝံး အတၢ်ဃ့ထုကဖၣ်. အဃိ အဝဲကွၢ်ဝဲ တၢ်လၢစီၤဒၤဝံး မၤဝဲတဖၣ် ဒီးဆိၣ်ဂ့ၤ စီၤဒၤဝံး.
ပတၢ်မၤ အါဒိၣ်မးအဃိ တနံၤဘၣ်တနံၤန့ၣ် ပအိၣ်ဘှံးတချုးဘၣ် ဒီးတနံၤဘၣ်တနံၤ လဲၤတလၢကွံာ်ဝဲချ့မး. တကးဒံးဘၣ် ပဘၣ်လဲၤခီဖျိတၢ်အါမး ဒီးတၢ်လၢပဘၣ်မၤအီၤ အိၣ်ဝဲအါမး သနာ်က့ ပတၢ်ဆၢကတီၢ်လၢ ကမၤအီၤန့ၣ် တအိၣ်အါအါဘၣ်အဃိ ပဘၣ်ယိၣ်တၢ်. မ့ၢ်ပအဲၣ်ဒိး အိၣ်မူဒ် ကစၢ်ယွၤအတၢ်ဘၣ်သး ဒ်သိးဒီးစီၤဒၤဝံးဧါ. ယဟိဝၤယွၤ သးအိၣ်ပဝဲတဂၤစုာ်စုာ် ဒီးကွၢ်ဝဲတၢ်လၢပမၤတဖၣ်. လၢအပူၤကွံာ်အနံၣ် ၃,၆၀၀ န့ၣ်စီၤယိၤဘး လၢအမ့ၢ် ပှၤလၢအပျံၤယွၤန့ၣ် အဝဲအၢၣ်လီၤတူၢ်လိာ်ဝဲလၢ ယဟိဝၤယွၤထံၣ်ဝဲ တၢ်လၢအမၤဝဲ. ဒီးစီၤယိၤဘး တဲဝဲလၢ “ဖဲအသံကွၢ်သံဒိးယၤအခါ ယစံးဆၢအီၤ ကသ့ဒ်လဲၣ်.” (ယိၤဘး ၃၁:၄-၆, ၁၄) ဖဲပအိၣ်မူဒံးအခါ ဒ်သိးပကကဲထီၣ် ပှၤလၢကစၢ်ယွၤ ပာ်လုၢ်ပာ်ပှ့ၤဝဲအဂီၢ် ပကဘၣ်ပာ်ကစၢ်ယွၤ အတၢ်ဖံးတၢ်မၤလၢ နီၣ်ဂံၢ်တၢ, မၤထွဲ အတၢ်မၤလိာ် ဒီးသူပတၢ်ဆၢကတီၢ်လၢ တၢ်ကူၣ်သ့အပူၤ. ပကဃုသ့ၣ်ညါအါထီၣ် ဘၣ်ဃးဒီး တၢ်ဂ့ၢ်အဝဲအံၤ.
မၤဂ့ၤထီၣ်က့ၤ နတၢ်ရ့လိာ်သးဒီး ယဟိဝၤယွၤ
တဲတၢ်ဒီး ယဟိဝၤယွၤထီဘိ. နတူၢ်ဘၣ်လၢ နတၢ်ကမၣ်အိၣ်အဃိ နကဃ့ဘါထုကဖၣ်လၢ အအိၣ် တညီဝဲဘၣ်န့ၣ် ယဟိဝၤယွၤ နၢ်ပၢၢ်ဝဲ. (ရိမ့ၤ ၈:၂၆) ဘၣ်ဆၣ် နကဘၣ် “ဆဲးဃ့ဘါထုကဖၣ်တၢ် ထီဘိ” ဒီးတဲဘၣ်အီၤလၢ နအဲၣ်ဒိးကဲထီၣ် အတံၤသကိး သပှၢၢ်ကတၢၢ်. (ရိမ့ၤ ၁၂:၁၂) ဒီပုၢ်ဝဲၢ်ခွါအဲၤဒြံ တဲဝဲလၢ “ယတူၢ်ဘၣ်လၢ ယအိၣ်ဒီး တၢ်ကမၣ်ဖးဒိၣ် ဒီးယမဲာ်ဆှးညါ. ဘၣ်ဆၣ် ဖဲယဃ့ဘါထုကဖၣ် ဝံၤအလီၢ်ခံ ယတၢ်တူၢ်ဘၣ်တဖၣ်အံၤ တအိၣ်လၢၤဘၣ်. ယသးမုာ်ထီၣ်က့ၤဒီး ယပာ်ယသး မုာ်မုာ်ခုၣ်ခုၣ်သ့.” နကဘၣ် ပာ်ဖျါထီၣ် နတၢ်တူၢ်ဘၣ်ဒ်လဲၣ်န့ၣ် နမ့ၢ်တသ့ၣ်ညါဘၣ်န့ၣ် ဆိကမိၣ်ထီၣ်က့ၤ စီၤပၤဒၤဝံး အတၢ်ပီၢ်ယၢ်လီၤက့ၤသး အတၢ်ထုကဖၣ် လၢအအိၣ်လၢ စံးထီၣ်ပတြၢၤ အဆၢဒိၣ် ၅၁ ဒီး ၆၅ တက့ၢ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ဂုာ်ကျဲးစၢးကဲထီၣ် ပှၤလၢပှၤနာ်န့ၢ်အီၤသ့
၁၆ ပမ့ၢ်အဲၣ်ဒိးလၢ ပှၤဂၤကနာ်န့ၢ်ပှၤန့ၣ် အရ့ဒိၣ်ဒိၣ်မးလၢ ပကဘၣ်အိၣ်ဒီး တၢ်ပၢၤသူၣ်ပၢၤသး. ဖဲပအဲၣ်ဒိးတဲဖျါထီၣ် တၢ်ဂ့ၢ်ခူသူၣ်တမံၤမံၤအခါန့ၣ် တၢ်ပၢၤသူၣ်ပၢၤသးတခါအံၤန့ၣ် ကမၤစၢၤပှၤလၢ ပကပၢၤပထးခိၣ်. (ဖး ကတိၤဒိ ၁၀:၁၉.) ဖဲပသူအ့ၤထၢၤနဲၣ်အခါန့ၣ် တဘျီတခီၣ် ကီလၢပကအိၣ်ဒီး တၢ်ပၢၤသး. ပမ့ၢ်တပလီၢ်သးဘၣ်န့ၣ် ဘၣ်သ့ၣ်သ့ၣ် ပကတဲဖျါထီၣ်ဘၣ် တၢ်ဂ့ၢ်ခူသူၣ် အဃိ ပှၤအါဂၤကသ့ၣ်ညါဝဲ. ဒီးပမ့ၢ်တဲဖျါထီၣ်ဘၣ် တၢ်ဂ့ၢ်ခူသူၣ်လၢ အ့ၤထၢၤနဲၣ်အပူၤလံန့ၣ် ပမၤလီၤမၢ်က့ၤအီၤ တသ့လၢၤဘၣ်. တၢ်ဂ့ၢ်လၢပတဲအီၤန့ၣ် ကဒုးအိၣ်ထီၣ် တၢ်ကီတၢ်ခဲထဲလဲၣ်န့ၣ် ပတသ့ၣ်ညါဘၣ် ဒီးပမၤတဘၣ်လၢၤဘၣ်. တကးဒံးဘၣ် ပှၤလၢအထီဒါပှၤတဖၣ် မ့ၢ်အဲၣ်ဒိးလၢ ပကတဲဖျါထီၣ် တၢ်ဂ့ၢ်ခူသူၣ်လၢ ကမၤဘၣ်ဒိ ပဒီပုၢ်ဝဲၢ်မုၣ်ခွါတဖၣ်န့ၣ် ပမ့ၢ်အိၣ်ဒီး တၢ်ပၢၤသူၣ်ပၢၤသးန့ၣ် ပတတဲဖျါထီၣ် တၢ်ဂ့ၢ်သ့ၣ်တဖၣ်န့ၣ်ဘၣ်. ပမ့ၢ်အိၣ်ဘၣ်တၢ်လီၢ်လၢ ပှၤတြီဃာ်ပတၢ်စံၣ်တဲၤတဲလီၤတၢ်မၤ မ့တမ့ၢ် ပဒိၣ်တဟ့ၣ်အခွဲးနီတစဲးဘၣ်န့ၣ် ပလံးတဖၣ် ကမၢပတဲဖျါထီၣ် တၢ်ဂ့ၢ်ခူသူၣ်သ့. အဃိ ဖဲန့ၣ်အဆၢကတီၢ်မ့ၢ်ဂ့ၤ, လၢတၢ်အိၣ်သးလၢအဂၤတနီၤမ့ၢ်ဂ့ၤ ပမၤထွဲလံာ်စီဆှံ အတၢ်ဟံးစုနဲၣ်ကျဲဒီး ပ “ပၢၤဃာ်[ပ]ထးခိၣ်” သ့. (စံးထီၣ်ပတြၢၤ ၃၉:၁) အဃိ လၢဟံၣ်ဖိဃီဖိအကျါမ့ၢ်ဂ့ၤ, လၢပသကီးအကျါမ့ၢ်ဂ့ၤ, လၢပဒီပုၢ်ဝဲၢ်မုၣ်ခွါ အကျါမ့ၢ်ဂ့ၤ ဒီးလၢပှၤတဂၤဂ့ၤတဂၤဂ့ၤ အကျါမ့ၢ်ဂ့ၤ ပအဲၣ်ဒိး ဂုာ်ကျဲးစၢးကဲထီၣ် ပှၤလၢပှၤနာ်န့ၢ်အီၤသ့. ဒီးဒ်သိးပကကဲထီၣ် ပှၤလၢပှၤနာ်န့ၢ်အီၤသ့အဂီၢ်န့ၣ် ပကဘၣ်အိၣ်ဒီး တၢ်ပၢၤသူၣ်ပၢၤသး.
လါမ့ၤ ၂၀-၂၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၄၀-၄၁
ဘၣ်မနုၤအဃိ ပမၤစၢၤပှၤဂၤလဲၣ်
ပှၤလၢအသးအိၣ်ဟ့ၣ်တၢ်န့ၣ် မ့ၢ်ပှၤလၢအသးခု
၁၆ ပှၤလၢအသးအိၣ်ဟ့ၣ်တၢ်န့ၣ် တမုၢ်လၢ်ဝဲလၢ ကဒိးန့ၢ်ဘၣ်က့ၤ တၢ်တမံၤမံၤဘၣ်. ယ့ၣ်ၡူးတဲဝဲလၢ “တုၤနမၤတၢ်အီၣ်တၢ်အီဒီး, ကိးပှၤအဖှီၣ်အယာ်, ပှၤအစုဟးဂီၤ, ပှၤအခီၣ်ဟးဂီၤ, ပှၤအမဲာ်ဘျီၣ်သ့ၣ်တဖၣ်န့ၣ်တက့ၢ်. ဒီးနကဘၣ်တၢ်ဆိၣ်ဂ့ၤလီၤ. အဂ့ၢ်ဒ်အံၤ, အဝဲသ့ၣ်တဖၣ်န့ၣ် ဟ့ၣ်ကၣ်နၤတသ့ဘၣ်. အဂ့ၢ်ဒ်အံၤ, တုၤပှၤအတီအလိၤဂဲၤဆၢထၢၣ်က့ၤဒီး, တၢ်ကဟ့ၣ်ကၣ်နၤလီၤ.” (လူၤကၣ် ၁၄:၁၃, ၁၄) လံာ်စီဆှံတဲဝဲလၢ “ပှၤလၢအဟံးစုကွၢ်မဲာ်တၢ်န့ၣ် ကဘၣ်တၢ်ဆိၣ်ဂ့ၤလီၤ.” ဒီး “ပှၤလၢအမၤပှၤဖှီၣ်ဖိယာ်ဖိ ဒီးတၢ်ကူၣ်သ့န့ၣ် ဘၣ်ဆိၣ်ဂ့ၤဝဲလီၤ.” (ကတိၤဒိ ၂၂:၉; စံးထီၣ်ပတြၢၤ ၄၁:၁) ပကြၢးဟ့ၣ်တၢ် ခီဖျိလၢ ပအဲၣ်ဒိးမၤစၢၤပှၤဂၤအဃိလီၤ.
၁၇ ဖဲစီၤပီလူး ယၢၤထီၣ်ဝဲ ယ့ၣ်ၡူးအတၢ်ကတိၤလၢအမ့ၢ် “ဟ့ၣ်တၢ်န့ၣ်ဘၣ် တၢ်ဆိၣ်ဂ့ၤအါန့ၢ် ဒိးန့ၢ်တၢ်တက့ၢ်” အခါ အဝဲတအဲၣ်ဒိးတဲဝဲထဲ ပဘၣ်ဟ့ၣ်တၢ်ထူးတၢ်တီၤတခါဧိၤဘၣ်. အဲၣ်ဒိးတဲစ့ၢ်ကီးဝဲလၢ ပကဘၣ် ဟ့ၣ်ဂံၢ်ဟ့ၣ်ဘါပှၤဂၤ, ဟ့ၣ်ကူၣ်အဝဲသ့ၣ်လၢ လံာ်စီဆှံအပူၤ ဒီးမၤစၢၤပှၤလၢ အလိၣ်ဘၣ်တၢ်မၤစၢၤတဖၣ်န့ၣ်လီၤ. (မၤတၢ် ၂၀:၃၁-၃၅) စီၤပီလူးအတၢ်ကတိၤ ဒီးတၢ်လၢအမၤဝဲတဖၣ်န့ၣ် သိၣ်လိပှၤလၢ ပကဘၣ်သးအိၣ်ဟ့ၣ်လီၤ ပတၢ်ဆၢကတီၢ်, တၢ်ဂံၢ်တၢ်ဘါ, တၢ်ကဟုကယာ် ဒီးတၢ်အဲၣ်တၢ်ကွံန့ၣ် မ့ၢ်တၢ်လၢအရ့ဒိၣ်လီၤ.
၁၈ ပှၤလၢအဃုသ့ၣ်ညါ ပှၤဟီၣ်ခိၣ်ဖိ အတၢ်ပာ်သူၣ်ပာ်သးတဖၣ် ထံၣ်ဘၣ်ဝဲလၢ ပမ့ၢ်ဟ့ၣ်တၢ်န့ၣ် ကမၤသးခုပှၤလီၤ. တၢ်မၤလိတခါ ပာ်ဖျါထီၣ်ဝဲလၢ ပှၤအါဂၤန့ၣ်ဖဲအဝဲသ့ၣ်မၤဂ့ၤတၢ်လၢ ပှၤဂၤအဖီခိၣ်အခါ အဝဲသ့ၣ်သးခုဒိၣ်မးလီၤ. ဒီးပှၤလၢအဃုသ့ၣ်ညါတၢ်တဖၣ် တဲဝဲလၢ ပမ့ၢ်မၤစၢၤပှၤဂၤန့ၣ် ပတူၢ်ဘၣ်လၢ ပတၢ်အိၣ်မူန့ၣ်ကဲဘျုးဝဲ ဒီးပှဲၤဒီးတၢ်သးခုလီၤ. ဒီးပှၤဃုသ့ၣ်ညါတၢ်တဖၣ် ဟ့ၣ်ကူၣ်ဝဲလၢ ပှၤဟီၣ်ခိၣ်ဖိတဖၣ် ဒ်သိးအတၢ်အိၣ်ဆူၣ်အိၣ်ချ့ကဂ့ၤထီၣ် ဒီးအတၢ်သးခုကအါထီၣ်အဂီၢ် အဝဲသ့ၣ်ကဘၣ်မၤ မုာ်သးမၤကလီတၢ်လီၤ. ထီဘိန့ၣ် ပပၢ်ယဟိဝၤယွၤ လၢအမ့ၢ်တၢ်ဘၣ်တ့ကစၢ် လၢအပှဲၤဒီး တၢ်အဲၣ်တၢ်ကွံန့ၣ် တဲပာ်စၢၤဝဲလၢ ပမ့ၢ်ဟ့ၣ်တၢ်န့ၣ် ပကဒိးန့ၢ်ဘၣ်တၢ်သးခုလီၤ. လၢတၢ်န့ၣ်အဃိ ဖဲပနၢ်ဟူဘၣ် ပှၤကူၣ်ဘၣ်ကူၣ်သ့တဖၣ်အံၤ အတၢ်ကတိၤအခါ တမ့ၢ်တၢ်လၢအလီၤကမၢကမၣ်လၢ ပဂီၢ်ဘၣ်.—၂ တံၤမသ့း ၃:၁၆, ၁၇.
တၢး၁၅ ၁၂/၁၅ ၂၄ ¶၇
ယဟိဝၤယွၤကမၤစၢၤနၤ
၇ နမ့ၢ်ဆိးက့န့ၣ် ယဟိဝၤယွၤ ကမၤမုာ်ထီၣ်နၤဒီးမၤစၢၤနၤ ဒ်ကစၢ်မၤစၢၤတ့ၢ်အပျဲၢ်အဘီၣ်လၢညါတဖၣ်အသိးန့ၣ်လီၤ. စီၤပၤဒၤဝံး ကွဲးဝဲလၢ– “ပှၤလၢအဆိကမိၣ်တၢ်လၢ ပှၤဖှီၣ်ဖိယာ်ဖိအဂီၢ်န့ၣ် ဘၣ်ဆိၣ်ဂ့ၤဝဲလီၤ. ယွၤကမၤပူၤမၤဖျဲးအီၤ လၢတၢ်ကိၢ်တၢ်ဂီၤအမုၢ်တနံၤန့ၣ်လီၤ. ယွၤကကဟုဘံၣ်ကယာ်ဘၢအီၤဒီး ဒုးမူအီၤန့ၣ်လီၤ.” (စံးထီၣ်ပတြၢၤ ၄၁:၁, ၂, ခ့ခါစှီၤကျိာ်) ဖဲန့ၣ်အဆၢကတီၢ် စီၤဒၤဝံး တအဲၣ်ဒိးစံးဝဲလၢ ပှၤတဂၤလၢအဆိကမိၣ်တၢ်လၢ ပှၤဖှီၣ်ဖိယာ်ဖိအဂီၢ်န့ၣ် ကစၢ်ယွၤကပာ်မူအီၤ လီၤထူလီၤယိာ်ဘၣ်. မ့မ့ၢ်ဒ်န့ၣ်ဒီး ကစၢ်ယွၤမၤစၢၤ ပှၤလၢအဂ့ၤတဂၤအံၤဒ်လဲၣ်. စီၤဒၤဝံး တဲနၢ်ပၢၢ်ပှၤလၢ– “ယွၤကမၤစၢၤအီၤ လၢတၢ်ဆူးတၢ်ဆါအလီၢ်မံပူၤလီၤ. နကတဲာ်ကတီၤ အလီၢ်မံလၢအဘၣ်တၢ်ဆါအဖၢမုၢ်လီၤ.” (စံးထီၣ်ပတြၢၤ ၄၁:၃) တၢ်လၢယဟိဝၤယွၤ အခ့အပှၤတူၢ်ဘၣ်ဝဲတဖၣ်န့ၣ် ယဟိဝၤယွၤသ့ၣ်ညါဝဲ လီၤတံၢ်လီၤဆဲး ဒီးတသးပ့ၤနီၣ်အဝဲသ့ၣ်နီတဘျီဘၣ်. တကးဒံးဘၣ် ယဟိဝၤယွၤ တ့လီၤပှၤဟီၣ်ခိၣ်ဖိ အက့ၢ်အဂီၤဂ့ၤဂ့ၤအဃိ မ့ၢ်ဘၣ်ဒိဘၣ်ထံးသနာ်က့ ဘျါက့ၤဒၣ်အတၢ်သ့ဝဲလီၤ.
ကွၢ်လိမၤဒိး ယဟိဝၤယွၤ အတၢ်သးကညီၤတက့ၢ်
၁၇ ပပာ်ဖျါထီၣ်တၢ်သးကညီၤန့ၣ် ကဲဘျုးလၢပဂီၢ်ဘၣ်ဆၣ် တၢ်ဂ့ၢ်ခိၣ်သ့ၣ်န့ၣ်မ့ၢ် ပအဲၣ်ဒိးကွၢ်လိမၤဒိး ယဟိဝၤယွၤဒီးမၤလၤကပီၤအီၤလီၤ. ယဟိဝၤယွၤ မ့ၢ်တၢ်အဲၣ်တၢ်ကွံ ဒီးတၢ်သးကညီၤအဂံၢ်ခီၣ်ထံးလီၤ. (ကတိၤဒိ ၁၄:၃၁) အဝဲပာ်ဖျါထီၣ် တၢ်ဒိဂ့ၤတဲာ်ဘၣ်လၢပဂီၢ်လီၤ. လၢတၢ်န့ၣ်အဃိ မ်ပကကွၢ်လိမၤဒိးအီၤ ခီဖျိပာ်ဖျါထီၣ် တၢ်သးကညီၤလၢ ပှၤဂၤအဖီခိၣ်န့ၣ်တက့ၢ်. ပမ့ၢ်မၤဒ်န့ၣ်န့ၣ် ပကဘူးဒိၣ်ထီၣ်ဒီး ပဒီပုၢ်ဝဲၢ်မုၣ်ဒီပုၢ်ဝဲၢ်ခွါတဖၣ် ဒီးပတၢ်ရ့လိာ်သးဒီး ပှၤလၢပခိၣ်ပဃၢၤတဖၣ်ကဂ့ၤဝဲလီၤ.—ကလၤတံ ၆:၁၀; ၁ ယိၤဟၣ် ၄:၁၆.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-2 ၁၆
ယဟိဝၤ
လံာ်စီဆှံဒီတဘ့ၣ်န့ၣ် အပာ်ဖျါထီၣ်ဝဲ ဘၣ်ဃးဒီး ယဟိဝၤယွၤပၢတၢ်အခွဲး, ယဟိဝၤယွၤ အတၢ်တိာ်ပာ်လၢအခီၣ်ထံး ဒီးယဟိဝၤယွၤ အမံၤကဘၣ်တၢ်ပာ်စီဆှံအီၤအဂီၢ်. ဒ်သိး ကစၢ်ယွၤအမံၤ ကဘၣ်တၢ်ပာ်စီဆှံအီၤအဂီၢ် တၢ်လၢအဒုၣ်ဒွဲၣ်စံးအၢအီၤခဲလၢာ် ကဘၣ်လီၤမၢ်ကွံာ်ဝဲ. တကးဒံးဘၣ် တၢ်ဘၣ်တ့လၢအအိၣ်လၢ မူခိၣ်မ့ၢ်ဂ့ၤ လၢဟီၣ်ခိၣ်မ့ၢ်ဂ့ၤ ကဘၣ်မၤလၤကပီၤဝဲ ကစၢ်ယွၤအမံၤ. အဃိ ပှၤကဘၣ် တူၢ်လိာ် ဒီးပာ်ကဲ ယဟိဝၤယွၤ ပၢတၢ်အခွဲးလၢ တၢ်သူၣ်အိၣ်သးအိၣ်အပူၤ, ဘူၣ်ထီၣ်ဘါထီၣ်အီၤ ဒီးမၤအတၢ်ဘၣ်သး ခီဖျိလၢ ပှၤအဲၣ်အီၤအဃိ. စီၤဒၤဝံးအတၢ်ဃ့ထုကဖၣ်ဖဲ စံးထီၣ်ပတြၢၤ ၄၀:၅-၁၀ န့ၣ် ပာ်ဖျါထီၣ်ဝဲလၢ စီၤဒၤဝံးအိၣ်ဒီး တၢ်ပာ်သူၣ်ပာ်သး ဒ်န့ၣ် ဒီးအပာ်စီဆှံဝဲ ယဟိဝၤယွၤ အမံၤနီၢ်ကီၢ်. (ပာ်သူၣ်ပာ်သးလၢ ဖဲတၢ်မၢဖိ တဲဘၣ်ဃးဒီး ယ့ၣ်ၡူးခရံာ်အဂ့ၢ်ဖဲ ဧ့ၤဘြံၤ ၁၀:၅-၁၀ အခါ အက့ၤတဲက့ၤဝဲ တၢ်ကတိၤလၢ စံးထီၣ်ပတြၢၤ အဆၢအံၤအပူၤတနီၤ.)
လါမ့ၤ ၂၇–လါယူၤ ၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၄၂-၄၄
မၤထွဲ ယဟိဝၤယွၤ အတၢ်ဟံးစုနဲၣ်ကျဲ
တၢး၀၆ ၆/၁ ၉ ¶၄
လံာ်စီဆှံ အတၢ်ပာ်ဖျါလၢ လံာ်စံးထီၣ်ပတြၢၤ ခံဘ့ၣ်တဘ့ၣ်အဂီၢ်
၄၂:၄, ၅, ၁၁; ၄၃:၃-၅. တဘျီတခီၣ် လၢတၢ်အိၣ်သးအဖီခိၣ် ပမ့ၢ်ဘၣ်အိၣ်ယံၤဒီး တၢ်အိၣ်ဖှိၣ် တစိၢ်တလီၢ်န့ၣ် ပမ့ၢ်သ့ၣ်နီၣ်ထီၣ်က့ၤ တၢ်ဆၢကတီၢ်ဖဲ ပရ့လိာ်သးဒီး ဒီပုၢ်ဝဲၢ်မုၣ်ခွါတဖၣ်အခါ ပကဒိးန့ၢ်ဘၣ် တၢ်ဂံၢ်တၢ်ဘါ. လၢအခီၣ်ထံးန့ၣ် ဘၣ်သ့ၣ်သ့ၣ် ပကတူၢ်ဘၣ်လၢ ပအိၣ်သယုၢ်သညိ. ဖဲန့ၣ်အဆၢကတီၢ် ပကဘၣ်သ့ၣ်နီၣ်ထီၣ်လၢ ယဟိဝၤယွၤ မ့ၢ်ပတၢ်ပူၤဖျဲးအလီၢ်အဃိ ပကဘၣ် မုၢ်လၢ်တၢ်လၢအအိၣ် ဒ်သိး ပသးကမုာ်ထီၣ်အဂီၢ်.
တၢး၁၂ ၁/၁၅ ၁၅ ¶၂
ဒ်သိး နမၤနီၢ်ကစၢ် တၢ်မၤလိလံာ်စီဆှံ ကမုာ်ဒိၣ်ထီၣ် ဒီးနကဒိးန့ၢ်ဘၣ်အဘျုး အါထီၣ်အဂီၢ် နကဘၣ်မၤဒ်လဲၣ်
၁ ဃ့ထုကဖၣ်– တချုးလၢပမၤနီၢ်ကစၢ် တၢ်မၤလိလံာ်စီဆှံဒံးဘၣ်န့ၣ် ပကဘၣ်ဃ့ထုကဖၣ်. (စံး ၄၂:၈) ဘၣ်မနုၤအဃိလဲၣ်. မ့ၢ်လၢတၢ်မၤလိ လံာ်စီဆှံန့ၣ် အကဲဝဲ တၢ်ဘူၣ်ထီၣ်ဘါထီၣ် ကစၢ်ယွၤ. အဃိ ပကဘၣ် ဃ့ယဟိဝၤယွၤ ဒ်သိးကဟ့ၣ်ပှၤ အသးစီဆှံ ဒီးကမၤစၢၤပှၤဒ်သိး ပသးစၢၢ်ဆၢတၢ်ကန့ၢ်အဂီၢ်. (လူၤကၣ် ၁၁:၁၃) ဒီပုၢ်ဝဲၢ်မုၣ် ဘါဘရၤ လၢအကဲ မံၤၡၢၤနရံၤ န့ၢ်ဖးယံာ်လံတဂၤ တဲဝဲလၢ “တချုးလၢ ယဖး မ့တမ့ၢ် ယမၤလိလံာ်စီဆှံ ဒံးဘၣ်န့ၣ် ယဃ့ထုကဖၣ် လၢယဟိဝၤယွၤအအိၣ်ထီဘိ. ယဃ့ထုကဖၣ် မ့ၢ်ဝံၤန့ၣ် ယတူၢ်ဘၣ်လၢ ယဟိဝၤယွၤ အိၣ်ဒီးယၤ ဒီးအဝဲဘၣ်သူၣ်ဘၣ်သးဝဲ တၢ်လၢယမၤတဖၣ်.” တချုးလၢ ပမၤလိလံာ်စီဆှံဒံးဘၣ်အခါ ပမ့ၢ်ဃ့ထုကဖၣ်န့ၣ် ကမၤစၢၤပှၤဒ်သိး ပကနၢ်ပၢၢ် ဒီးတူၢ်လိာ် နီၢ်သးတၢ်အီၣ်လၢ ယဟိဝၤယွၤ ကတဲာ်ကတီၤန့ၢ်ပှၤတဖၣ်.
“မ်နစုအဂံၢ်အဘါန့ၣ် သုတစၢ်လီၤတဂ့ၤ”
၁၁ ယဟိဝၤယွၤ မၤစၢၤစ့ၢ်ကီးပှၤ ခီဖျိ တၢ်ဟံးစုနဲၣ်ကျဲလၢ ပဒိးန့ၢ်ဘၣ်လၢ ကိးနွံဒဲးတၢ်အိၣ်ဖှိၣ်ရိဖှိၣ်, ကဝီၤတၢ်အိၣ်ဖှိၣ်, တၢ်အိၣ်ဖှိၣ်ဖးဒိၣ် ဒီးတကးဒံးဘၣ် လၢကၠိတဖၣ်န့ၣ်လီၤ. တၢ်ဟံးစုနဲၣ်ကျဲတဖၣ်အံၤ မၤစၢၤပှၤဒ်သိး ပကမၤယွၤအတၢ်မၤလၢ တၢ်သူၣ်ဆူၣ်သးဆူၣ်ဒီး, ပကပာ်လီၤဖီတၢၣ် ဒီးပကမၤလၢပှဲၤ ခရံာ်ဖိအမူဒါတဖၣ် ကသ့အဂီၢ်န့ၣ်လီၤ. (စံးထီၣ်ပတြၢၤ ၁၁၉:၃၂) ဒ်သိး နသးကဆူၣ်ထီၣ်အဂီၢ် နဒိးန့ၢ်ဘၣ်ယဟိဝၤယွၤ အတၢ်ဟံးစုနဲၣ်ကျဲအဃိ မ့ၢ်နသူၣ်ခုသးခုဧါ.
၁၂ ယဟိဝၤယွၤ မၤစၢၤ အပှၤဂီၢ်မုၢ်တဖၣ် ဒ်သိးအဝဲသ့ၣ်ကမၤနၢၤဝဲ ပှၤဧ့ၤမၤလ့းဖိဒီး ပှၤအံးသံးယိဖၠံယါဖိတဖၣ်န့ၣ်လီၤ. ဒီးအဝဲမၤစၢၤစ့ၢ်ကီး စီၤနဃ့မယၤဒီး ပှၤယူဒၤဖိတဖၣ် ဒ်သိး အဝဲသ့ၣ်မၤဝံၤက့ၤ ဝ့ၢ်ခိၣ်ဒူတဖၣ်ကန့ၢ်အဂီၢ်လီၤ. ဒ်န့ၣ်အသိး ပအိၣ်ဒီးတၢ်သူၣ်ကိၢ်သးဂီၤ, တၢ်တြီမၤတံာ်တာ်ပှၤ ဒီးပှၤတသးအိၣ်ဒိကနၣ်ပှၤသနာ်က့ ပဆဲးစံၣ်တဲၤတဲလီၤတၢ်ကသ့အဂီၢ် ကစၢ်ယွၤကဟ့ၣ်ပှၤတၢ်ဂံၢ်တၢ်ဘါလီၤ. (၁ ပ့းတရူး ၅:၁၀) ယဟိဝၤယွၤတသူဝဲ တၢ်လီၤလးဒ်သိးကမၤလီၤမၢ် ပတၢ်ကီတၢ်ခဲတဖၣ်ဘၣ်. လၢတၢ်န့ၣ်အလီၢ် ဒ်သိးပတၢ်ကီတၢ်ခဲသ့ၣ်တဖၣ် ကလီၤမၢ်အဂီၢ် ပနီၢ်ကစၢ်စ့ၢ်ကီး ပကဘၣ်ဂုာ်ကျဲးစၢးလီၤ. ပဂုာ်ကျဲးစၢးကသ့ဒ်လဲၣ်. ပကဘၣ်ဖး လံာ်စီဆှံကိးနံၤဒဲး, ကတဲာ်ကတီၤဒီး လဲၤထီၣ်တၢ်အိၣ်ဖှိၣ်ရိဖှိၣ်ကိးနွံဒဲး, မၤနီၢ်ကစၢ်တၢ်မၤလိလံာ်စီဆှံဒီး ဟံၣ်ဖိဃီဖိတၢ်မၤလိလံာ်စီဆှံထီဘိ ဒီးသန့ၤပသးလၢယဟိဝၤယွၤ ခီဖျိတၢ်ထုကဖၣ်လီၤ. တၢ်သ့ၣ်တဖၣ်အံၤ မ့ၢ်ဝဲကျဲလၢကစၢ်ယွၤ ဟ့ၣ်ဆူၣ်ထီၣ်ပဂံၢ်ပဘါလီၤ. လၢတၢ်န့ၣ်အဃိ ဒ်သိးပကမၤတၢ်သ့ၣ်တဖၣ်အံၤအဂီၢ် ပတဘၣ်ပျဲ တၢ်ဟဲမၤတံာ်တာ်ပှၤနီတမံၤဘၣ်. တၢ်သ့ၣ်တဖၣ်အံၤအကျါ နမၤမ့ၢ်တထီၣ်ဘးတမံၤမံၤန့ၣ် ဃ့တၢ်မၤစၢၤလၢ ကစၢ်ယွၤအအိၣ်တက့ၢ်. နမ့ၢ်မၤဒ်န့ၣ်န့ၣ် နကထံၣ်ဘၣ် ယွၤအသးစီဆှံ အတၢ်မၤစၢၤဒ်သိး ‘နသးကအိၣ်, ဒီးဒ်သိးနကမၤတၢ်’ အဂီၢ်န့ၣ်လီၤ. (ဖံလံးပံၤ ၂:၁၃) မ့ၢ်နဟ့ၣ်ဂံၢ်ဟ့ၣ်ဘါ ပှၤအဂၤကသ့စ့ၢ်ကီးဧါ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၁၂၄၂
ထွံၣ်မံၤ
လံာ်စီဆှံ ပာ်ဖျါထီၣ်ဝဲ တၢ်အဒိ ဘၣ်ဃးဒီး ထွံၣ်မံၤအဂ့ၢ်အါမး. အဒိ ဖဲစီၤယိၤဘး သူၣ်အုးသးအုးဒိၣ်မးအခါ အဝဲတဲဝဲလၢ အကဲထီၣ် “ထွံၣ်ဟီၣ်ခိၣ် အဒီပုၢ်ဝဲၢ်.” (ယိၤဘး ၃၀:၂၉) ဘၣ်ဃးဒီး ကစၢ်ယွၤ အပှၤဂီၢ်မုၢ်တဖၣ် ဘၣ်တၢ်မၤနၢၤအီၤအဂ့ၢ်န့ၣ် လၢတၢ်သူၣ်အုးသးအုးအပူၤ ပှၤကွဲးထါ စံးထီၣ်ပတြၢၤ တဲဝဲလၢ “နမၤသဘှံးပှၤလၢ ထွံၣ်မံၤအီၣ်တၢ်အလီၢ်.” ဘၣ်သ့ၣ်သ့ၣ် အဝဲအဲၣ်ဒိး ဒိလီၤဝဲ ထွံၣ်မံၤအီၣ်တၢ်အလီၢ်န့ၣ်လၢ တၢ်ဒုးပျီ. (ထိၣ်သတြီၤဒီး စံး ၆၈:၂၃; စံး ၄၄:၁၉) ဖဲ ချ.ခ.န. ၆၀၇ န့ၣ်ပှၤဟဲကဝီၤဃာ်ဝဲ ဝ့ၢ်ယရူၤၡလ့ၣ်. ဖဲန့ၣ်အခါ တၢ်လီၤဒိသၣ်ဝံၤ အိၣ်ထီၣ်ဝဲ နးမးအဃိ မိတဖၣ် တသးကညီၤဘၣ် အဖိတဖၣ်လၢၤဘၣ်. အဃိ ဝံယံးရမံယၤ တဲဝဲလၢ “ယပှၤဂီၢ်မုၢ်” န့ၣ်အသးအၢ ဒိၣ်န့ၢ်ဒံး ထွံၣ်မံၤတဖၣ်လၢ အကွၢ်ထွဲအဖိဒံး.—သး ၄:၃, ၁၀.
lmd တၢ်ဂ့ၢ်ဘၣ်ထွဲလိာ်သး က တၢ်ဂ့ၢ် ၄
ပှၤကိးဂၤဒဲး အတၢ်အိၣ်ဆူၣ်အိၣ်ချ့ကဂ့ၤ.—ၡါ ၃၃:၂၄; ၃၅:၅, ၆.
လါယူၤ ၃-၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၄၅-၄၇
တၢ်သးဝံၣ် ဘၣ်ဃးဒီး စီၤပၤတဂၤ အတၢ်ဖျီ
တၢး၁၄ ၂/၁၅ ၉-၁၀ ¶၈-၉
သူၣ်ဖှံသးညီလၢ သိဖိအတၢ်ဖျီ
၈ ဖး စံးထီၣ်ပတြၢၤ ၄၅:၁၃, ၁၄. လၢစီၤပၤအတၢ်ဖျီန့ၣ် တလးမူးပိာ်မုၣ်ဖျါ “ကပြုၢ်ကပြီၤဒိၣ်မး.” လီၣ်ဖျါ ၂၁:၂ တဲဝဲလၢ တလးမူးပိာ်မုၣ်န့ၣ် အလီၤဂာ်ဒီး ဝ့ၢ်ယရူၤၡလ့ၣ်အသီဒီး “မၤဃံမၤလၤထီၣ်အသးလၢ အဝၤအဂီၢ်.” ဝ့ၢ်လၢမူခိၣ်တဖျၢၣ်အံၤ အိၣ်ဒီး “ကစၢ်ယွၤအလၤကပီၤ” ဒီးအဖျါ “လီၤဂာ်ဒ် လၢၢ်လၢ အလုၢ်ဒိၣ်ပှ့ၤဒိၣ်, ဒ်တၢ်မျၢ်နကၤသွဲး လၢအကပြုၢ်ကပြီၤဝဲဆှံဆှံ ဒ်လၢၢ်ဖျါကလၤအသိး.” (လီၣ် ၂၁:၁၀, ၁၁) ဝ့ၢ်ယရူၤၡလ့ၣ်အသီ အတၢ်ဃံတၢ်လၤန့ၣ် ဘၣ်တၢ်ပာ်ဖျါထီၣ်အီၤဖဲ လံာ်လီၣ်ဖျါအပူၤ. (လီၣ် ၂၁:၁၈-၂၁) အဃိ ပှၤကွဲးထါစံးထီၣ်ပတြၢၤ တဲဝဲလၢ တလးမူးပိာ်မုၣ်န့ၣ် “ကပြုၢ်ကပြီၤဒိၣ်မး” ဒီးစီၤပၤအတၢ်ဖျီအံၤ ကဘၣ်တၢ်မၤအီၤ လၢမူခိၣ်.
၉ တလးမူးပိာ်မုၣ်န့ၣ် ဘၣ်တၢ်ဟဲကိးအီၤလၢ တလးမူးပိာ်ခွါ စီၤပၤမ့းၡံအၤ အအိၣ်. တလးမူးပိာ်မုၣ်န့ၣ် တလးမူးပိာ်ခွါ “သ့စီအီၤလၢထံ ခီဖျိ ယွၤအကလုၢ်ကထါ” ဝံၤလံ အဃိ တလးမူးပိာ်မုၣ်န့ၣ် “စီဆှံ” ဒီး “တၢ်လီၤတူာ်လီၤကာ်” တအိၣ်ဘၣ်. (အ့း ၅:၂၆, ၂၇) တလးမူးပိာ်မုၣ်န့ၣ် ဘၣ်ကူထီၣ်သိးထီၣ် တၢ်ကူတၢ်ကၤလၢ အကြၢးဝဲဘၣ်ဝဲဒီး တၢ်ဖျီအမူး. “အတၢ်ကူတၢ်ကၤန့ၣ် ဘၣ်တၢ်မၤဃံမၤလၤထီၣ်အီၤဒီး လုၣ်ထူ” ဒီး “အဝဲကကူကၤဝဲ ဒီးတၢ်ကူတၢ်ကၤလၢ အဘၣ်တၢ်ထါအီၤ ဃံဃံလၤလၤ ဒီးကဘၣ်တၢ်လဲၤကိးအီၤလၢ စီၤပၤအအိၣ်.” လၢသိဖိအတၢ်ဖျီ အပူၤန့ၣ် “အတလးမူးပိာ်မုၣ်န့ၣ် တၢ်ပျဲအီၤလၢ အကကၤဝဲ တၢ်ကူတၢ်ကၤဝါလၢ အညၣ်ဂ့ၤ, လၢအကဆှီ ဒီးကပြုၢ်ကပြီၤလီၤ. တၢ်လၢ တၢ်ကူတၢ်ကၤဝါလၢ အညၣ်ဂ့ၤန့ၣ် အဲၣ်ဒိးတဲဝဲ ပှၤစီဆှံတဖၣ်အတၢ်မၤ လၢအတီအလိၤတဖၣ်လီၤ.”—လီၣ်ဖျါ ၁၉:၈.
လံာ်လီၣ်ဖျါ ပာ်ဖျါထီၣ်န့ၢ်ပှၤ ပတၢ်အိၣ်မူလၢ ခါဆူညါအဂီၢ်ဒ်လဲၣ်
၁၀ ဖဲပှၤကလုာ်တဖၣ် ပာ်ဖှိၣ်ထီၣ်သး လၢကထီဒါ ယဟိဝၤယွၤ အပှၤဂီၢ်မုၢ်အခါ ယဟိဝၤယွၤ အသးကမၤအသးဒ်လဲၣ်. ယဟိဝၤယွၤ တဲဘၣ်ပှၤလၢ “ယတၢ်သးဒိၣ်ကကဲၤထီၣ်ဝဲ.” (ယဃ့းစက့လး ၃၈:၁၈, NWT, ၂၁-၂၃) ဝံၤဒီး တၢ်ကမၤအသးဒ်လဲၣ်န့ၣ် လီၣ်ဖျါ အဆၢဒိၣ် ၁၉ ပာ်ဖျါထီၣ်န့ၢ်ပှၤ. ဖဲန့ၣ် ပထံၣ်ဘၣ်လၢ ယဟိဝၤယွၤ ကဆှၢလီၤအဖိခွါ လၢကဒီသဒၢ အပှၤဂီၢ်မုၢ် ဒီးကမၤနၢၤကွံာ်ဝဲ အဒုၣ်အဒါတဖၣ်. ယ့ၣ်ၡူးဒီးအ “သုးမုၢ်သံၣ်ဘိလၢမူခိၣ်” ကဒုးဝဲ ဒုၣ်ဒါတဖၣ်အံၤ. သုးမုၢ်သံၣ်ဘိ လၢမူခိၣ်န့ၣ် အဲၣ်ဒိးတဲဝဲ မူခိၣ်ကလူး လၢအသးတီတဖၣ် ဒီးပှၤ ၁၄၄,၀၀၀. (လီၣ်ဖျါ ၁၇:၁၄; ၁၉:၁၁-၁၅) ဖဲတၢ်ဒုးအံၤ ကဲထီၣ်အခါ တၢ်ကရၢကရိ ဒီးပှၤဟီၣ်ခိၣ်ဖိ လၢအထီဒါ ယဟိဝၤယွၤန့ၣ် ကဟးဂီၤကွံာ်ဝဲခဲလၢာ်.—ဖး လီၣ်ဖျါ ၁၉:၁၉-၂၁.
၁၁ ဖဲကစၢ်ယွၤ မၤဟးဂီၤကွံာ် အဒုၣ်အဒါအခါ ပှၤလၢအသးတီတဖၣ် ပူၤဖျဲးဝဲအဃိ အဝဲသ့ၣ် ကသးခုထဲလဲၣ်န့ၣ် ထံၣ်တမှံကွၢ်. ဖဲန့ၣ်အခါ ပှၤကိးဂၤဒဲး ကသးခုဝဲဒိၣ်မး. တကးဒံးဘၣ် ဖဲဘၤဘူၤလိၣ်ဖးဒိၣ် ဟးဂီၤကွံာ်အခါ ပှၤအိၣ်လၢမူခိၣ်တဖၣ် ကသးခုဒိၣ်မး. ဘၣ်ဆၣ် တၢ်လၢကမၤသးခု အဝဲသ့ၣ်အသးန့ၣ် ကအိၣ်တမံၤဒံး. (လီၣ်ဖျါ ၁၉:၁-၃) တၢ်သးခုတခါအံၤ ကဲဝဲ “သိဖိအတၢ်ဖျီ” ဒီးတၢ်ဖျီအံၤ ကဲဝဲ တၢ်ဂ့ၢ်လၢ အရ့ဒိၣ်ကတၢၢ် လၢလံာ်လီၣ်ဖျါအပူၤ.—လီၣ်ဖျါ ၁၉:၆-၉.
၁၂ တချုးလၢ အၢ်မက့းဒိၣ်တၢ်ဒုး စးထီၣ်ဒံးဘၣ်န့ၣ် ပှၤ ၁၄၄,၀၀၀ ကအိၣ်လၢ မူခိၣ်ခဲလၢာ်. ဘၣ်ဆၣ် ဖဲန့ၣ်အခါ သိဖိအတၢ်ဖျီအမူး တစးထီၣ်သးဒံးဘၣ်. (ဖး လီၣ်ဖျါ ၂၁:၁, ၂.) အဃိ သိဖိအတၢ်ဖျီ အမူးတခါအံၤ ကစးထီၣ်သး အခါဖဲလဲၣ်. အၢ်မက့းဒိၣ်တၢ်ဒုး မ့ၢ်ဝံၤ ဒီးကစၢ်ယွၤအဒုၣ်အဒါ ဟးဂီၤကွံာ် ခဲလၢာ်ဝံၤမၣ် သိဖိအတၢ်ဖျီအမူး ကစးထီၣ်အသး.—စံးထီၣ်ပတြၢၤ ၄၅:၃, ၄, ၁၃-၁၇.
it-2 ၁၁၆၉
တၢ်ဒုးတၢ်ယၤ
ကစၢ်ယွၤ မၤကတၢၢ်ကွံာ် တၢ်ဒုးတၢ်ယၤ မ့ၢ်ဝံၤန့ၣ် ဟီၣ်ခိၣ် ကပှဲၤဝဲဒီး တၢ်မုာ်တၢ်ခုၣ် အနံၣ်တကထိ. စံးထီၣ်ပတြၢၤ တဲဝဲလၢ “[ယဟိဝၤယွၤ] “ကမၤကတၢၢ်ကွံာ် တၢ်ဒုးတၢ်ယၤလၢ ဟီၣ်ခိၣ်ချၢလီၤ. အဝဲမၤကၢ်ကွံာ်ချံၣ် ဒီးမၤဟးဂီၤကွံာ်ဘီ ဒီးအဝဲ ဒွဲၣ်အူထီၣ်ကွံာ် လ့ၣ်ကဟၣ်သုးတဖၣ်.” လံာ်စီဆှံ တဆၢအံၤ ဟဲလၢထီၣ်ပှဲၤထီၣ်ဝဲ အဆိကတၢၢ်တဘျီဖဲ ကစၢ်ယွၤ မၤဟးဂီၤကွံာ်ဝဲ ပှၤအံၣ်စရ့လးဖိ အဒုၣ်အဒါတဖၣ် အစုကဝဲၤအခါ အဝဲသ့ၣ် အိၣ်ဘၣ်ဝဲမုာ်မုာ်ခုၣ်ခုၣ်. ဒီးလၢခံ ခရံာ်မၤနၢၤတၢ်လၢ အၢ်မက့းဒိၣ် မ့ၢ်ဝံၤန့ၣ် ဟီၣ်ခိၣ်ဒီဘ့ၣ် ကပှဲၤဝဲဒီး တၢ်မုာ်တၢ်ခုၣ် လၢလၢပှဲၤပှဲၤ. (စံးထီၣ်ပတြၢၤ ၄၆:၈-၁၀) ဒီးပှၤလၢ အကအိၣ်မူဘၣ် ဖဲန့ၣ်တဖၣ်န့ၣ် အဝဲသ့ၣ် “ကပိာ်က့ၤအနးလၢ ထဲၣ်ကနၣ် ဒီးကပိာ်က့ၤ အဘီလၢ ထါဂဲာ်လီၤ.” ဒီးအဝဲသ့ၣ် “တမၤလိအသး လၢတၢ်ဒုးလၢၤဘၣ်.” “တၢ်သုးမုၢ်ဂီၢ်မုၢ် အကစၢ်ယဟိဝၤယွၤ တဲဝဲဒ်န့ၣ်.”—ယၡါယၤ ၂:၄; မံကၤ ၄:၃, ၄.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ကစၢ်ယွၤအဘီမုၢ် မ့ၢ်ဟဲန့ၣ် တၢ်မနုၤကလီၤမၢ်ကွံာ်ဝဲလဲၣ်
၉ တၢ်ကရၢကရိလၢ အမၤတၢ်တတီတလိၤတဖၣ် မ့ၢ်ဟးဂီၤကွံာ်န့ၣ် ကစၢ်ယွၤကပာ်လီၤ တၢ်မနုၤလၢအလီၢ်လဲၣ်. အၢ်မက့းဒိၣ် မ့ၢ်ဝံၤန့ၣ် လၢဟီၣ်ခိၣ်ချၢ တၢ်ကရၢကရိအဂၤ ကအိၣ်ဒံးဧါ. လံာ်စီဆှံ စံးဝဲလၢ– “ပကွၢ်လၢ်မူခိၣ်အသီ, ဒီးဟီၣ်ခိၣ်အသီ, ဖဲတၢ်တီတၢ်လိၤ အိၣ်ဝဲဆိးဝဲလၢအပူၤန့ၣ်လီၤ.” (၂ ပ့းတရူး ၃:၁၃) မူခိၣ်အလီၢ်လံၤန့ၣ် မ့ၢ်ဝဲတၢ်ပၢတၢ်ပြးလၢ အတတီတလိၤန့ၣ်လီၤ. ဒီးဟီၣ်ခိၣ်အလီၢ်လံၤန့ၣ် မ့ၢ်ဝဲပှၤအၢပှၤသီလၢ မုၣ်ကီၤလံၢ်ပၢဝဲတဖၣ်န့ၣ်လီၤ. တၢ်သ့ၣ်တဖၣ်အံၤ မ့ၢ်လီၤမၢ်ကွံာ်ဝဲန့ၣ် တၢ်မနုၤကအိၣ်က့ၤလၢ အဝဲသ့ၣ်အလီၢ်လဲၣ်. “မူခိၣ်အသီ, ဒီးဟီၣ်ခိၣ်အသီ” ကအိၣ်က့ၤလၢ အဝဲသ့ၣ်အလီၢ်လီၤ. မူခိၣ်အသီန့ၣ် မ့ၢ်ဝဲတၢ်ပၢတၢ်ပြးအသီ လၢယ့ၣ်ၡူးဒီးပှၤ ၁၄၄,၀၀၀ ပၢဝဲန့ၣ်လီၤ. ဟီၣ်ခိၣ်အသီန့ၣ် မ့ၢ်ဝဲပှၤလၢအဒိးပၢအသးလၢ ယွၤအဘီမုၢ်အဖီလာ်တဖၣ်န့ၣ်လီၤ. ယ့ၣ်ၡူးဒီးပှၤလၢအပၢဃုာ်တၢ်ဒီးအီၤတဖၣ် ကကွၢ်လိမၤဒိးဝဲ ယဟိဝၤယွၤအဃိ တၢ်ခဲလၢာ်ကလဲၤအသးလၢ အဂ့ၢ်အဝီလီၤ. (၁ ကရံၣ်သူး ၁၄:၃၃) ဒီး “ဟီၣ်ခိၣ်အသီ” အံၤ ကဘၣ်တၢ်ကရၢကရိထီၣ်အီၤဂ့ၤဂ့ၤအဃိ ပှၤတီပှၤလိၤတဖၣ်အံၤ ကအံးထွဲကွၢ်ထွဲဝဲဟီၣ်ခိၣ်ဂ့ၤဂ့ၤလီၤ. (စံးထီၣ်ပတြၢၤ ၄၅:၁၆) ယ့ၣ်ၡူးဒီးပှၤ ၁၄၄,၀၀၀ ကဟံးစုနဲၣ်ကျဲအဝဲသ့ၣ်လီၤ. ဖဲန့ၣ်အဆၢကတီၢ် တၢ်ကရၢကရိလၢ အမၤတၢ်တတီတလိၤတဖၣ် တအိၣ်လၢၤဘၣ် ဒီးကအိၣ်က့ၤဝဲထဲ တၢ်ကရၢကရိလၢ အတီအလိၤတဖုဧိၤလီၤ.
ijwbv ၂၆
စံးထီၣ်ပတြၢၤ ၄၆:၁၀ န့ၣ်အဲၣ်ဒိးတဲဝဲ တၢ်မနုၤလဲၣ်
ကစၢ်ယွၤ ဟ့ၣ်ဂံၢ်ဟ့ၣ်ဘါဝဲပှၤလၢ ပကဘူၣ်ထီၣ်ဘါထီၣ်အီၤ ဒီးတူၢ်လိာ်လၢ အဝဲအိၣ်ဒီး တၢ်ခွဲးတၢ်ယာ်လၢ ကပၢဟီၣ်ခိၣ်ဒီဘ့ၣ်. ပှၤလၢအအဲၣ်ဒိး အိၣ်မူလီၤထူလီၤယိာ် ကိးဂၤဒဲးန့ၣ် အကဘၣ်တူၢ်လိာ်ဝဲ ကစၢ်ယွၤ အတၢ်စိတၢ်ကမီၤ ဒီးအတၢ်ပၢအခွဲး.—လီၣ်ဖျါ ၄:၁၁.
“ဆီၣ်လီၤသုသး ဒီးသ့ၣ်ညါလၢ ယမ့ၢ်ကစၢ်ယွၤတက့ၢ်.” တၢ်ကတိၤလၢ အမ့ၢ် “ဆီၣ်လီၤသုသး” န့ၣ်ပှၤကွဲးကျိာ်ထံ လံာ်စီဆှံတနီၤ တဲဝဲလၢ “အိၣ်ဘှီၣ်” အဃိ ပှၤတနီၤ နၢ်ပၢၢ်ကမၣ်ဝဲလၢ ပှၤကဘၣ်အိၣ်ဘှီၣ်ဝဲဖဲ ပှၤလဲၤလၢတၢ်ဘါသရိာ်အခါ. ဘၣ်ဆၣ် ဧ့ၤဘြံၤအတၢ်ကတိၤလၢ ပှၤကွဲးကျိာ်ထံအီၤလၢ “ဆီၣ်လီၤသုသး ဒီးသ့ၣ်ညါလၢ ယမ့ၢ်ကစၢ်ယွၤတက့ၢ်” န့ၣ်မ့ၢ်ဝဲ ယဟိဝၤယွၤ ဟ့ၣ်ဂံၢ်ဟ့ၣ်ဘါဝဲ ပှၤကိးကလုာ်ဒဲး ဒ်သိးအဝဲသ့ၣ် တထီဒါအီၤလၢၤတဂ့ၤ ဒီးကဘူၣ်ထီၣ်ဘါထီၣ် ထဲအီၤတဂၤအဂီၢ်.
တၢ်ကတိၤ ဟ့ၣ်ဂံၢ်ဟ့ၣ်ဘါအံၤန့ၣ် ပထံၣ်န့ၢ်အီၤလၢ စံးထီၣ်ပတြၢၤ အဆၢဒိၣ် ၂ အပူၤစ့ၢ်ကီး. ဖဲန့ၣ်န့ၣ် ကစၢ်ယွၤ တဲဝဲလၢ ပှၤလၢအထီဒါအီၤန့ၣ် အဝဲကထီဒါက့ၤဝဲ. မ့မ့ၢ် ပှၤလၢ အတူၢ်လိာ်ဝဲ ကစၢ်ယွၤ အတၢ်စိတၢ်ကမီၤန့ၣ် အဝဲသ့ၣ် သန့ၤအသးလၢ ကစၢ်ယွၤအအိၣ် ဒ်သိး အကဒိးန့ၢ်ဘၣ် တၢ်ဟံးစုနဲၣ်ကျဲ, တၢ်ဂံၢ်တၢ်ဘါ ဒီးတၢ်ကူၣ်သ့. အဝဲသ့ၣ် သန့ၤအသးလၢ ကစၢ်ယွၤအဃိ ဖဲအထံၣ်ဘၣ်ဒီး တၢ်ကီတၢ်ခဲအခါဒၣ်လဲာ် အအိၣ်ဒီးတၢ်သးခု ဒီးတဘၣ်ယိၣ်တၢ် အါတလၢဘၣ်.—စံးထီၣ်ပတြၢၤ ၂:၉-၁၂.
“ယကဘၣ် တၢ်ပာ်ထီၣ်ထီယၤလၢ ပှၤကလုာ်တဖၣ်အကျါ ဒီးယကဘၣ် တၢ်ပာ်ထီၣ်ထီယၤလၢ ဟီၣ်ခိၣ်ချၢလီၤ.” လၢအပူၤကွံာ်န့ၣ် ဖဲယဟိဝၤယွၤ သူဝဲအတၢ်စိတၢ်ကမီၤ လၢကဒီသဒၢဝဲ အပှၤဂီၢ်မုၢ်တဖၣ်အခါ အဝဲ ဘၣ်တၢ်ပာ်ထီၣ်ထီအီၤ. (၂ မိၤၡ့ ၁၅:၁-၃) ခါဆူညါ ဖဲပှၤကိးဂၤဒဲး တူၢ်လိာ်ဝဲ အတၢ်ပၢ ဒီးဘူၣ်ထီၣ်ဘါထီၣ်အီၤအခါ အဝဲကဘၣ် တၢ်ပာ်ထီၣ်ထီၣ်အီၤ အါန့ၢ်အန့ၣ်စၢၢ်တလၢၢ်.—စံးထီၣ်ပတြၢၤ ၈၆:၉, ၁၀; ယၡါယၤ ၂:၁၁.
ijwyp ၅၉
လံာ်စီဆှံတဲဝဲဒ်လဲၣ်
ပှၤတၢ်ဆဲးတၢ်လၤတခါဒီးတခါ ဒီးပှၤတစိၤဒီးတစိၤန့ၣ် အတၢ်ထံၣ်ဘၣ်ဃးဒီး ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါ အတၢ်မံဃုာ်န့ၣ် လီၤဆီဝဲလီၤ. ဘၣ်ဆၣ် ခရံာ်ဖိလၢ အမ့ၢ်အတီတဖၣ် တနာ်မူသူ ဒီးတနာ်ကြီတၢ် ဒ်ပှၤအါဂၤအသိးဘၣ် ဒီးအဝဲသ့ၣ်တ “ဘၣ်တၢ်ဆှၢကဒံ ဆှၢကဒါအီၤ ခီဖျိလၢ တၢ်သိၣ်လိ အကလုာ်ကလုာ် လၢအလီၤဂာ်ဒ် ကလံၤအသိး” ဘၣ်. (အ့းဖ့းစူး ၄:၄) အဃိ ဘၣ်ဃးဒီး ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါ အတၢ်မံဃုာ်မ့ၢ်ဂ့ၤ, လုၢ်လၢ်သကဲာ်ပဝးလၢ အဂၤတဖၣ်မ့ၢ်ဂ့ၤ ခရံာ်ဖိလၢ အမ့ၢ်အတီတဖၣ် အတၢ်ထံၣ်န့ၣ် ဒိးသန့ၤထီၣ်အသးလၢ လံာ်စီဆှံအတၢ်သိၣ်တၢ်သီ အဖီခိၣ်လီၤ.
ဘၣ်ဃးဒီး ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါ အတၢ်မံဃုာ်န့ၣ် လံာ်စီဆှံအတၢ်သိၣ်တၢ်သီ ပာ်ဖျါန့ၢ်ပှၤ ၡဲၡဲဖိလီၤ. လံာ်စီဆှံ တဲဝဲလၢ—
●“နတဘၣ် မံဃုာ်ဒီး ပှၤပိာ်ခွါ ဒ်နမံဃုာ်ဒီး ပှၤပိာ်မုၣ် အသိးန့ၣ်တဂ့ၤ.”—၃ မိၤၡ့ ၁၈:၂၂.
●“ကစၢ်ယွၤဟ့ၣ် အဝဲသ့ၣ်အခွဲးလၢ ကမၤဝဲဒ် အဝဲသ့ၣ် အတၢ်သူၣ်လီသးကွံ . . . ဟ့ၣ်အခွဲးလၢ အဝဲသ့ၣ် အတၢ်သးကတၢလၢ အလီၤမဲာ်ဆှးန့ၣ် ကဒိၣ်စိလၢ အဝဲသ့ၣ်အဖီခိၣ်လီၤ. ဒီးပိာ်မုၣ်လၢ အဝဲသ့ၣ်အကျါန့ၣ် တအိၣ်မူဝဲဒ် ပိာ်မုၣ်အန့ဆၢၣ် အိၣ်ဝဲအသိးလၢၤဘၣ်.”—ရိမ့ၤ ၁:၂၄, ၂၆.
●“တဘၣ်လံၣ်န့ၢ်လီန့ၢ်လီၤ သုနီၢ်ကစၢ်အသးတဂ့ၤ. ပှၤလၢ အမၤကမၣ်မုၣ်ကမၣ်ခွါ မ့ၢ်ဂ့ၤ, ပှၤဘါတၢ်ဂီၤတၢ်ဖှီၣ်မ့ၢ်ဂ့ၤ, ပှၤအဲၣ်ဘၢမါ အဲၣ်ဘၢဝၤမ့ၢ်ဂ့ၤ, ပိာ်ခွါလၢ အဟ့ၣ်အခွဲးလၢ ပိာ်ခွါကဒဲကဒဲ ကမၤအီၤလၢ လုၢ်လၢ်လၢ အထီဒါလိာ်သးဒီး န့ဆၢၣ်မ့ၢ်ဂ့ၤ, ပိာ်ခွါလၢအမံဃုာ်ဒီး ပိာ်ခွါကဒဲကဒဲမ့ၢ်ဂ့ၤ, ပှၤလၢ အဟုၣ်တၢ်မ့ၢ်ဂ့ၤ, ပှၤလၢ အသးကွံတၢ်မ့ၢ်ဂ့ၤ, ပှၤလၢ အအီမူၤသံးမ့ၢ်ဂ့ၤ, ပှၤလၢ အဒုၣ်ဒွဲၣ်စံးအၢပှၤဂၤမ့ၢ်ဂ့ၤ, ပှၤလၢ အဟံးန့ၢ်ဆူၣ် ပှၤဂၤအတၢ်မ့ၢ်ဂ့ၤ တန့ၢ်သါဘၣ် ကစၢ်ယွၤအဘီအမုၢ်ဘၣ်.”—၁ ကရံၣ်သူး ၆:၉, ၁၀.
ပိာ်ခွါလၢအအဲၣ်ဒိးအဲၣ်ပိာ်ခွါမ့ၢ်ဂ့ၤ ပိာ်ခွါလၢအအဲၣ်ဒိးအဲၣ်ပိာ်မုၣ်မ့ၢ်ဂ့ၤ ပဝဲကိးဂၤဒဲး ပကဘၣ်မၤထွဲကစၢ်ယွၤအတၢ်သိၣ်တၢ်သီ. ဒ်လဲၣ်ဂ့ၤဒ်လဲၣ်ဂ့ၤ လုၢ်လၢ်သကဲာ်ပဝး လၢကစၢ်ယွၤ တဘၣ်သူၣ်ဘၣ်သးတဖၣ် မ့ၢ်အိၣ်ထီၣ်လၢ ပသးပူၤန့ၣ် အရ့ဒိၣ်လၢ ပကဘၣ်ပၢၤ ပသးလီၤ.—ကလီးစဲ ၃:၅.
လံာ်စီဆှံအဲၣ်ဒိးတဲဝဲ အခီပညီဒ်လဲၣ်
မ့ၢ်လံာ်စီဆှံအဲၣ်ဒိးတဲဝဲ ပကဘၣ်သးဟ့ ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါလၢ အအဲၣ်လိာ်အသးတဖၣ်ဧါ.
တမ့ၢ်ဒ်န့ၣ်ဘၣ်. လံာ်စီဆှံတအဲၣ်ဒိးလၢ ပကသးဟ့ ပှၤနီတဂၤဘၣ် အဃိ ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါလၢ အအဲၣ်လိာ်သးမ့ၢ်ဂ့ၤ ပှၤအဂၤတဖၣ်မ့ၢ်ဂ့ၤ ပတဘၣ်သးဟ့အဝဲသ့ၣ်ဘၣ်. ဒီးလံာ်စီဆှံတဲပှၤလၢ ပှၤတဂၤအမ့မ့ၢ် ပှၤဒ်လဲၣ်ဂ့ၤဒ်လဲၣ်ဂ့ၤ ပကဘၣ် “ဂုာ်ကျဲးစၢး အိၣ်ဃူအိၣ်ဖိးဒီး ပှၤခဲလၢာ်.” (ဧ့ၤဘြံၤ ၁၂:၁၄) အဃိ ပတဘၣ်ရ့ဒီး ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါလၢ အအဲၣ်လိာ်အသးတဖၣ် အၢအၢသီသီဘၣ်, ပတဘၣ်မၤနၢၤအီၣ် အဝဲသ့ၣ်ဘၣ် ဒီးပတဘၣ်သးဟ့ အဝဲသ့ၣ်ဘၣ်.
ပဒိၣ်အတၢ်သိၣ်တၢ်သီမ့ၢ်အိၣ်လၢ အတူၢ်လိာ် ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါ အတၢ်ဒိးတ့ဒိးဖျီန့ၣ် ခရံာ်ဖိလၢ အမ့ၢ်အတီတဖၣ် ကြၢးထီဒါဝဲဧါ.
လံာ်စီဆှံပာ်ဖျါထီၣ်န့ၢ်ပှၤလၢ ကစၢ်ယွၤအတၢ်သိၣ်တၢ်သီ အိၣ်ထဲဒၣ်လၢ ပိာ်မုၣ်တဂၤ ဒီးပိာ်ခွါတဂၤ ဒိးတ့ဒိးဖျီအသးသ့. (မးသဲ ၁၉:၄-၆) ဒီးမ့ၢ်လၢ ပဒိၣ်ထုးထီၣ်တၢ်သိၣ်တၢ်သီလၢ ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါလၢ အဒိးတ့ဒိးဖျီအသးသ့ အဃိတၢ်ဂ့ၢ်အံၤန့ၣ် အဘၣ်ထွဲလိာ်သးဒီး ထံဂ့ၢ်ကီၢ်ဂ့ၢ်. လံာ်စီဆှံတဲဝဲလၢ ခရံာ်ဖိလၢအမ့ၢ်အတီတဖၣ်န့ၣ် တဘၣ်မၤဘၣ်ထွဲလိာ်အသးဒီး ထံဂ့ၢ်ကီၢ်ဂ့ၢ်ဘၣ်. (ယိၤဟၣ် ၁၈:၃၆) အဃိ ပဒိၣ်တၢ်သိၣ်တၢ်သီလၢ အဘၣ်ဃးဒီး ပိာ်မုၣ်သကီးပိာ်မုၣ် ပိာ်ခွါသကီးပိာ်ခွါ အတၢ်ဒိးတ့ဒိးဖျီမ့ၢ်ဂ့ၤ ဒီးပှၤလၢအိၣ်ဒီးလုၢ်လၢ်သကဲာ်ပဝးဒ်န့ၣ်တဖၣ်မ့ၢ်ဂ့ၤ ခရံာ်ဖိလၢအမ့ၢ်အတီတဖၣ် တဆီၣ်ထွဲဝဲ တၢ်သိၣ်တၢ်သီအံၤဘၣ် ဒီးတထီဒါဝဲစ့ၢ်ကီးဘၣ်.
လါယူၤ ၁၀-၁၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၄၈-၅၀
မိၢ်ပၢ်သ့ၣ်ဧၢ မၤစၢၤနဟံၣ်ဖိဃီဖိတဖၣ် ဒ်သိးအတၢ်နာ်န့ၢ် ယဟိဝၤယွၤ အတၢ်ကရၢကရိ ကဟဲအါထီၣ်
တၢ်ဘူၣ်ထီၣ်ဘါထီၣ်လၢ အမ့ၢ်အတီန့ၣ် ကမၤအါထီၣ်နတၢ်သးခု
၁၁ ဖဲပမၤလိ ကစၢ်ယွၤအကလုၢ်ကထါ ဒီးသိၣ်လိပဖိလၢ ကစၢ်ယွၤအဂ့ၢ်အခါ မ့ၢ်ဝဲကျဲတဘိလၢ ပဘူၣ်ထီၣ်ဘါထီၣ် ယဟိဝၤယွၤ. ဖဲမုၢ်အိၣ်ဘှံးနံၤန့ၣ် ပှၤအံၣ်စရ့လးဖိတဖၣ် တမၤတၢ်ဘၣ် ဒီးဖဲတၢ်တနံၤန့ၣ် အဝဲသ့ၣ်ဟံးန့ၢ် တၢ်ဆၢကတီၢ်လၢ ကမၤဂၢၢ်ကျၢၤထီၣ် အတၢ်ရ့လိာ်သးဒီး ယဟိဝၤယွၤ. (၂ မိၤၡ့ ၃၁:၁၆, ၁၇) ပှၤလၢအအိၣ်ဒီးတၢ်သးတီ ဒ်အံၤတဖၣ်န့ၣ် အဝဲသ့ၣ်သိၣ်လိအဖိလၢ ယဟိဝၤယွၤအဂ့ၢ် ဒီးအတၢ်ဂ့ၤတၢ်ဝါတဖၣ်အဂ့ၢ်. ဆၢကတီၢ်ခဲအံၤစ့ၢ်ကီး ပကြၢးဟံးန့ၢ် တၢ်ဆၢကတီၢ်လၢ ပကဖးကစၢ်ယွၤအကလုၢ်ကထါ ဒီးမၤလိအီၤ. ပမ့ၢ်မၤဒ်အံၤန့ၣ် မ့ၢ်ဝဲကျဲတဘိလၢ ပဘူၣ်ထီၣ်ဘါထီၣ် ယဟိဝၤယွၤ ဒီးကမၤစၢၤပှၤဒ်သိး ပကဘူးထီၣ်ဒီးအီၤ. (စံးထီၣ်ပတြၢၤ ၇၃:၂၈) ဒီးပမ့ၢ်မၤလိသကိး ဟံၣ်ဖိဃီဖိ တၢ်မၤလိလံာ်စီဆှံဒီး ပဖိတဖၣ်န့ၣ် မ့ၢ်ဒၣ်ပမၤစၢၤအဝဲသ့ၣ် ဒ်သိးအဝဲသ့ၣ် ကမၤဂၢၢ်ကျၢၤထီၣ် အတၢ်ရ့လိာ်သးဒီး ပပၢ်အိၣ်လၢမူခိၣ်လၢ အပှဲၤဒီးတၢ်အဲၣ်တၢ်ကွံတဂၤလီၤ.—ဖး စံးထီၣ်ပတြၢၤ ၄၈:၁၃.
တၢး၁၁ ၃/၁၅ ၁၉ ¶၅-၇
ပကြၢးအိၣ်ဒီးတၢ်သးခု
“ဟးတရံး စံယိၣ်ဝးဝး ဒီးဂံၢ်အတၢးထီတဖၣ်တက့ၢ်. ကွၢ် အတၢ်ဒူၣ်လၢအကျၢၤတဖၣ် ထံထံဆးဆး ဒီးသမံသမိး အတၢးလၢအကျၢၤတဖၣ် ဒ်သိးသုကတဲဘၣ် ပှၤလၢစိၤလၢခံတဖၣ် အဂီၢ်န့ၣ်တက့ၢ်.” (စံးထီၣ်ပတြၢၤ ၄၈:၁၂, ၁၃) ပှၤကွဲးထါ စံးထီၣ်ပတြၢၤ ဟ့ၣ်ဂံၢ်ဟ့ၣ်ဘါဝဲ ပှၤအံၣ်စရ့လးဖိတဖၣ်လၢ ကလဲၤကွၢ်ဝဲ ဝ့ၢ်ယရူၤၡလ့ၣ် ဘူးဘူး. ထံၣ်တမှံကွၢ်လၢ ပှၤအံၣ်စရ့လးဖိ လၢပျၢၤတဖၣ်န့ၣ် အဝဲသ့ၣ် အဟံၣ်ဖိဃီဖိ လဲၤဝဲလၢ ဝ့ၢ်ယရူၤၡလ့ၣ် တနံၣ်တဘျီ လၢကလဲၤမၤဝဲဘူၣ် ဒီးဖဲန့ၣ် အဝဲသ့ၣ် ထံၣ်ဘၣ်ဝဲ တၢ်လုၢ်ဟံၣ် အတၢ်ဃံတၢ်လၤတဖၣ်. အဃိ အဝဲသ့ၣ် သးခုဒိၣ်မး ဒီးထိၣ်ဟူးထိၣ်ဂဲၤထီၣ် အဝဲသ့ၣ်လၢ “ကတဲဘၣ် ပှၤလၢစိၤလၢခံတဖၣ်.”
ၡဘၤ အနီၢ်ပၤမုၣ်န့ၣ် ဖဲအဝဲနၢ်ဟူဘၣ် ပှၤတဲအီၤ ဘၣ်ဃးဒီး စီၤၡလိၤမိၤ အတၢ်ပၢ ဒီးအတၢ်ကူၣ်သ့ အဂ့ၢ်အခါ အဝဲတနာ်ဝဲဘၣ်. ဘၣ်ဆၣ်လၢခံ ဘၣ်မနုၤအဃိ အဝဲနာ်ဝဲလဲၣ်. အဝဲတဲဝဲလၢ “တချုးလၢ ယဟဲဒံးဘၣ်န့ၣ် ယတနာ် တၢ်ကစီၣ်လၢ ပှၤတဲယၤဘၣ်. ဒီးခဲအံၤ ယထံၣ်လၢ ယနီၢ်ကစၢ်အမဲာ်.” (၂ ကွဲး ၉:၆) အဃိ တၢ်လၢပထံၣ်ဘၣ်လၢပ “နီၢ်ကစၢ်အမဲာ်” န့ၣ် အထိးဘၣ် ပသူၣ်ပာ်သ့.
ဒ်သိးနဖိတဖၣ် ကထံၣ်ဘၣ်ဝဲ တၢ်လၢယဟိဝၤယွၤ အတၢ်ကရၢကရိ မၤဝဲတဖၣ် လၢအဝဲသ့ၣ် “နီၢ်ကစၢ်အမဲာ်” အဂီၢ် နမၤစၢၤအဝဲသ့ၣ် ကသ့ဒ်လဲၣ်. နမ့ၢ်အိၣ်ဘူးဒီး ယဟိဝၤပှၤအုၣ်အသးတဖၣ် အဝဲၤတြၢ်န့ၣ် ဂုာ်ကျဲးစၢး ဟံးန့ၢ်တၢ်ဆၢကတီၢ်လၢ ကလဲၤဟးဂုၤအဝဲသ့ၣ်. အဒိ မဲဒံၤ ဒီး ဘဲသနံးန့ၣ် အဝဲသ့ၣ် အိၣ်တၢ်လီၢ်န့ၣ် ယံၤဝဲဒီး ဝဲၤတြၢ် အမံးလာ် ၉၀၀ (၁,၅၀၀ ကံလိမံထၢၣ်). သနာ်က့ ဖဲအဝဲသ့ၣ် ဒိၣ်ထီၣ်အခါ အမိအပါ ဂုာ်ကျဲးစၢး ရဲၣ်ကျဲၤဝဲ ဒ်သိးကလဲၤ ဟးကွၢ်ကီဘၣ်တၢ်လၢ ဝဲၤတြၢ်အါဘျီ. အဝဲသ့ၣ် တဲဝဲလၢ “တချုးလၢ ပလဲၤဟးကွၢ်ကီတၢ်လၢ ဝဲၤတြၢ်ဒံးဘၣ်အခါ ပဆိကမိၣ်လၢ ဝဲၤတြၢ်န့ၣ် အိၣ်ထဲ ပှၤသးပှၢ်တဖၣ်လီၤ. သနာ်က့ တုၤပလဲၤဟးဘျီ ပထံၣ်ဘၣ်လၢ ဖဲန့ၣ် အိၣ်ဝဲဒီး ပှၤသးစၢ်လၢ အမၤတၢ်ဆူၣ်ဆူၣ်လၢ ယဟိဝၤယွၤအဂီၢ် ဒီးအဝဲသ့ၣ် ပှဲၤဒီးတၢ်သးခု. ဒီးပထံၣ်ဘၣ်လၢ ယဟိဝၤ အတၢ်ကရၢကရိန့ၣ် တအိၣ်ထဲပဟီၣ်ကဝီၤ ဆံးဆံးဖိဖိတခါဘၣ်. အအိၣ်လၢ တၢ်လီၢ်ကိးပူၤဒဲးလီၤ. တကးဒံးဘၣ် ပလဲၤဟးလၢ ဝဲၤတြၢ်မ့ၢ်ဝံၤန့ၣ် ပနီၢ်သးဆူၣ်ထီၣ် မၣ်မၣ်လီၤ.” မဲဒံၤ ဒီး ဘဲသနံးန့ၣ် အဝဲသ့ၣ် လဲၤထံၣ်ဘၣ် ကစၢ်ယွၤ အတၢ်ကရၢကရိ အတၢ်မၤတဖၣ် လၢအနီၢ်ကစၢ် အဃိ ထိၣ်ဟူးထိၣ်ဂဲၤထီၣ် အဝဲသ့ၣ်လၢ အကမၤ ပှၤလဲၤလၢညါ ဒီးလၢခံ ပှၤကွဲမုာ် အဝဲသ့ၣ်လၢ ကလဲၤမၤစၢၤတၢ်လၢ ဝဲၤတြၢ်တစိၢ်တလီၢ်လီၤ.
တၢး၁၂ ၈/၁၅ ၁၂ ¶၅
ဆဲးအိၣ်မူဒ် ယွၤအဘီအမုၢ် ထံဖိကီၢ်ဖိတဂၤအသိး
၅ မၤလိ တၢ်စံၣ်စိၤတဲစိၤအဂ့ၢ်. ပှၤတဂၤ အမ့ၢ်အဲၣ်ဒိးကဲထီၣ် ထံကီၢ်တဘ့ၣ်ဘ့ၣ် အထံဖိကီၢ်ဖိန့ၣ် ဘၣ်သ့ၣ်သ့ၣ် အဝဲကဘၣ်မၤလိဝဲ ထံကီၢ်တဘ့ၣ်န့ၣ် အတၢ်စံၣ်စိၤတဲစိၤအဂ့ၢ်. ဒ်န့ၣ်အသိး ပှၤလၢအအဲၣ်ဒိးကဲထီၣ် ယွၤအဘီအမုၢ် အထံဖိကီၢ်ဖိတဖၣ်န့ၣ် တသ့ဖဲအသ့ အဝဲသ့ၣ် ဂုာ်ကျဲးစၢး မၤလိဝဲ ယွၤအဘီအမုၢ်အဂ့ၢ်. စီၤကိၤရးအဖိခွါတဖၣ် ဒီးပှၤအံၣ်စရ့လးဖိလၢ အဘူၣ်ထီၣ်ဘါထီၣ် ကစၢ်ယွၤန့ၣ် ပာ်လီၤတၢ်အဒိလၢအဂ့ၤဒိၣ်မး. အဝဲသ့ၣ် ဘၣ်သူၣ်ဘၣ်သးဝဲ ဝ့ၢ်ယရူၤၡလ့ၣ် ဒီးတၢ်ဘူၣ်ထီၣ်ဘါထီၣ်အလီၢ် ဒိၣ်မးအဃိ အဝဲသ့ၣ် တဲဘၣ်ပှၤဂၤလၢ ဝ့ၢ်အံၤ ဒီးအတၢ်ဘူၣ်ထီၣ်ဘါထီၣ်အလီၢ် အတၢ်စံၣ်စိၤတဲစိၤအဂ့ၢ်. အဝဲသ့ၣ် အဲၣ်ဒိးတဲဘၣ်ပှၤဂၤလၢ တၢ်ဂ့ၢ်တဖၣ်အံၤန့ၣ် မ့ၢ်လၢ ဝ့ၢ်အံၤ မ့ၢ်ဝဲ ယဟိဝၤယွၤ လၢအမ့ၢ် “စီၤပၤဖးဒိၣ်အဝ့ၢ်” ဒီး တၢ်ဘူၣ်တၢ်ဘါစီဆှံ အလီၢ်ခၢၣ်သးအဃိ. ဒီးဖဲန့ၣ် မ့ၢ်ဝဲ တၢ်လီၢ်လၢ ပှၤသိၣ်လိ ယဟိဝၤယွၤ အတၢ်သိၣ်တၢ်သီ. ဒီးစီၤပၤလၢအပၢ ဝ့ၢ်ယရူၤၡလ့ၣ်န့ၣ် မ့ၢ်ဝဲ စီၤပၤလၢ ယဟိဝၤယွၤ ဘၣ်သူၣ်ဘၣ်သးဝဲ. (ဖး စံးထီၣ်ပတြၢၤ ၄၈:၁, ၂, ၉, ၁၂, ၁၃) နၤမီၤ နအဲၣ်ဒိးမၤလိ ဒီးတဲဘၣ်ပှၤဂၤလၢ ယဟိဝၤယွၤ အတၢ်ကရၢကရိလၢဟီၣ်ခိၣ် အတၢ်စံၣ်စိၤတဲစိၤအဂ့ၢ် ဒ်စီၤကိၤရးအဖိခွါ ဒီးပှၤအံၣ်စရ့လးဖိလၢညါ လၢအဘူၣ်ထီၣ်ဘါထီၣ် ယဟိဝၤယွၤန့ၣ်ဧါ. နမ့ၢ်မၤလိ ကစၢ်ယွၤ အတၢ်ကရၢကရိအဂ့ၢ် ဒီးကစၢ်ယွၤ မၤစၢၤအခ့အပှၤတဖၣ် ဒ်လဲၣ်အဂ့ၢ်န့ၣ် နတၢ်နာ်လၢ ကစၢ်ယွၤအဘီအမုၢ် အဖီခိၣ် ကဂၢၢ်ကျၢၤဒိၣ်ထီၣ်. ဒီးနကသးဆူၣ် ဒိၣ်ထီၣ်လၢ ကစံၣ်တဲၤတဲလီၤ ဘီမုၢ်တၢ်သးခုကစီၣ်.—ယံး ၉:၂၄; လူၤကၣ် ၄:၄၃.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-2 ၈၀၅
တၢ်ထူးတၢ်တီၤ
ပှၤအံၣ်စရ့လးဖိန့ၣ် အမ့ၢ်ကလုာ်ဒူၣ်လၢ အထူးအတီၤတဒူၣ်အဃိ အဝဲသ့ၣ် အီၣ်ဘၣ်အီဘၣ် လၢလၢပှဲၤပှဲၤ. (၁ စီၤ ၄:၂၀; စံၣ် ၅:၁၈, ၁၉) အဝဲသ့ၣ် အတၢ်ထူးတၢ်တီၤတဖၣ် ဒီသဒၢ ဒီးမၤစၢၤအဝဲသ့ၣ် ဒ်သိးအဝဲသ့ၣ် တထံၣ်ဘၣ် တၢ်ကီတၢ်ခဲ ဒီးတၢ်ဖှီၣ်တၢ်ယာ် တဂ့ၤအဂီၢ်. (ကတိၤ ၁၀:၁၅; စံၣ် ၇:၁၂) ယဟိဝၤယွၤ အဲၣ်ဒိးလၢ ပှၤအံၣ်စရ့လးဖိတဖၣ် ကမၤတၢ်ဆူၣ်ဆူၣ် ဒီးအိၣ်ဘၣ် မုာ်မုာ်. (ထိၣ်သတြီၤဒီး ကတိၤ ၆:၆-၁၁; ၂၀:၁၃; ၂၄:၃၃, ၃၄) သနာ်က့ ယဟိဝၤယွၤ သ့ၣ်ညါစ့ၢ်ကီးဝဲလၢ အဝဲသ့ၣ် မ့ၢ်ပာ်ဒိၣ် တၢ်ထူးတၢ်တီၤ ဒီးနာ်န့ၢ်တၢ်ထူးတၢ်တီၤ အါတလၢန့ၣ် အဝဲသ့ၣ် ကသးပ့ၤနီၣ်ကွံာ် ကစၢ်ယွၤ. (၅ မိၤ ၈:၇-၁၇; စံး ၄၉:၆-၉; ကတိၤ ၁၁:၄; ၁၈:၁၀, ၁၁; ယံး ၉:၂၃, ၂၄) အဃိ ကစၢ်ယွၤ ဒုးသ့ၣ်နီၣ်ထီၣ်အဝဲသ့ၣ်လၢ တၢ်ထူးတၢ်တီၤတဖၣ်န့ၣ် ကအိၣ်ဝဲတစိၢ်တလီၢ်လီၤ. (ကတိၤ ၂၃:၄, ၅) ဒီးတၢ်ထူးတၢ်တီၤတဖၣ် ပှ့ၤက့ၤအဝဲသ့ၣ်လၢ တၢ်သံဒ်ကစၢ်ယွၤ မၤဝဲအသိးတသ့ဘၣ် ဒီးမၤထီထီၣ်အဝဲသ့ၣ် အသးသမူတသ့ဘၣ်. (စံး ၄၉:၆, ၇, ၁၆, ၁၇; စံၣ် ၅:၁၅) အဝဲသ့ၣ် မ့ပာ်ဒိၣ် တၢ်ထူးတၢ်တီၤ အါတလၢန့ၣ် လၢခံအဝဲသ့ၣ် ကဘၣ်မၤတၢ်တတီတလိၤဘၣ် ဒီးယဟိဝၤယွၤ တဘၣ်သူၣ်ဘၣ်သး အဝဲသ့ၣ်လၢၤဘၣ်. (ကတိၤ ၂၈:၂၀; ထိၣ်သတြီၤဒီး ယံး ၅:၂၆-၂၈; ၁၇:၉-၁၁.) အဃိ ကစၢ်ယွၤ ဒုးသ့ၣ်နီၣ်ထီၣ်အဝဲသ့ၣ်လၢက “မၤလၤကပီၤ ယဟိဝၤယွၤ ခီဖျိဟ့ၣ်အီၤ တၢ်လၢအဂ့ၤကတၢၢ် လၢအအိၣ်ဒီး[အဝဲသ့ၣ်].”—ကတိၤ ၃:၉.
လါယူၤ ၁၇-၂၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၅၁-၅၃
ဒ်သိး နတမၤဘၣ် တၢ်ကမၣ်ဖးဒိၣ် တဂ့ၤအဂီၢ် နကဘၣ်မၤ တၢ်မနုၤလဲၣ်
နဒီသဒၢနသး ကသ့ဒ်လဲၣ်
၄ လၢ ကတိၤဒိ ၄:၂၃ အပူၤတၢ်ကတိၤလၢအမ့ၢ် “သး” န့ၣ်အခီပညီအိၣ်စ့ၢ်ကီးလၢ ပတၢ်ဆိကမိၣ်, ပတၢ်တူၢ်ဘၣ်, ပတၢ်သူၣ်ဟူးသးဂဲၤ ဒီးပတၢ်အဲၣ်ဒိးတဖၣ်လီၤ. ဒီးမ့ၢ်ဝဲ တၢ်လၢအအိၣ်လၢပသးပူၤနီၢ်နီၢ် ဒီးတမ့ၢ်ထဲ တၢ်လၢအအိၣ်ဖျါလၢခိန့ၣ်ဘၣ်.
၅ ဆိကမိၣ်ကွၢ် ဒ်သိးပှၤတဂၤ အနီၢ်ခိအတၢ်အိၣ်ဆူၣ်အိၣ်ချ့ ကဂ့ၤအဂီၢ် အဝဲကဘၣ်မၤဝဲ တၢ်မနုၤလဲၣ်. အဝဲကဘၣ်အီၣ် တၢ်အီၣ်တၢ်အီလၢ အန့ၢ်ဂံၢ်န့ၢ်ဘါဒီး ကဘၣ်မၤ နီၢ်ခိအတၢ်ဟူးတၢ်ဂဲၤထီဘိလီၤ. ဒ်န့ၣ်အသိး ပနီၢ်သးအတၢ်အိၣ်ဆူၣ်အိၣ်ချ့ ကဂ့ၤအဂီၢ် ပကဘၣ်အီၣ် နီၢ်သးအတၢ်အီၣ်တၢ်အီလၢ အန့ၢ်ဂံၢ်န့ၢ်ဘါ ဒီးမၤဂၢၢ်ကျၢၤထီၣ် ပတၢ်နာ်ယဟိဝၤယွၤလီၤ. ပမၤဂၢၢ်ကျၢၤထီၣ် ပတၢ်နာ်ယဟိဝၤယွၤသ့ခီဖျိ ပမၤထွဲ တၢ်လၢပမၤလိဘၣ်အီၤတဖၣ် ဒီးတဲဘၣ်ပှၤဂၤလၢ ပတၢ်နာ်အဂ့ၢ်န့ၣ်လီၤ. (ရိမ့ၤ ၁၀:၈-၁၀; ယၤကိာ် ၂:၂၆) ဒီးအဂၤတမံၤန့ၣ် ပမ့ၢ်ကွၢ်လၢ ပနီၢ်ခိအက့ၢ်အဂီၤန့ၣ် ဘၣ်သ့ၣ်သ့ၣ် ကဖျါလၢ ပအိၣ်ဆူၣ်အိၣ်ချ့ဘၣ်ဆၣ် နီၢ်နီၢ်လၢပကိပူၤန့ၣ် အိၣ်တဆူၣ်ဘၣ်. ဒ်န့ၣ်အသိး ပမ့ၢ်ကွၢ်လၢပမၤ နီၢ်သးအတၢ်ဖံးတၢ်မၤတဖၣ်န့ၣ် ဘၣ်သ့ၣ်သ့ၣ် ပကဆိကမိၣ်ဘၣ်လၢ ပတၢ်နာ်ဂၢၢ်ကျၢၤဘၣ်ဆၣ် လၢပသးပူၤန့ၣ် အိၣ်ပှဲၤဒီးတၢ်ဆိကမိၣ်လၢ အတဂ့ၤတဖၣ်သ့လီၤ. (၁ ကရံၣ်သူး ၁၀:၁၂; ယၤကိာ် ၁:၁၄, ၁၅) ပကဘၣ်သ့ၣ်နီၣ်ထီၣ်လၢ မုၣ်ကီၤလံၢ် အဲၣ်ဒိးလၢပကဆိကမိၣ်တၢ် ဒ်အဝဲအသိးလီၤ. အဝဲဂုာ်ကျဲးစၢးမၤဝဲဒ်လဲၣ် ဒီးပဒီသဒၢလီၤပသး ကသ့ဒ်လဲၣ်.
တၢး၁၅ ၆/၁၅ ၁၉ ¶၅-၆
ပအိၣ်စီဆှံသ့လီၤ
၅ ပမ့ၢ်ဃ့တၢ်မၤစၢၤလၢ ယဟိဝၤယွၤအအိၣ်ထီဘိ န့ၣ်အဝဲကမၤစၢၤပှၤ ဒ်သိးပထီဒါ တၢ်ဆိကမိၣ်လၢ ဘၣ်ဃး တၢ်မၤကမၣ်မုၣ်ကမၣ်ခွါ ကန့ၢ်အဂီၢ်န့ၣ်လီၤ. ကစၢ်ယွၤဟ့ၣ်ပှၤ အသးစီဆှံအဃိ ပအိၣ်ဒီးတၢ်ဂံၢ်တၢ်ဘါ ဒ်သိး ပကအိၣ်စီဆှံအဂီၢ်န့ၣ်လီၤ. ဖဲပဃ့ဘါထုကဖၣ်အခါ ပတဲဘၣ်ယဟိဝၤယွၤလၢ ပအဲၣ်ဒိးလၢ ပတၢ်ဆိကမိၣ်တဖၣ် ကမၤမုာ်အသးန့ၣ်လီၤ. (စံးထီၣ်ပတြၢၤ ၁၉:၁၄) လၢတၢ်ဆီၣ်လီၤသးအပူၤ ပဃ့ကစၢ်ယွၤ ဒ်သိးကဃုကွၢ်ဝဲ ပတၢ်မိၣ်န့ၢ်သးလီ လၢအလီၤဘၣ်ယိၣ်လၢ ပသးပူၤန့ၣ် မ့ၢ်အိၣ်တမံၤမံၤဧါ. (စံးထီၣ်ပတြၢၤ ၁၃၉:၂၃, ၂၄) ဃ့ကဒီး ယဟိဝၤယွၤ ဒ်သိးကမၤစၢၤနၤလၢ နဂ့ၢ်လိာ် တၢ်မၤကမၣ်မုၣ်ကမၣ်ခွါ ကန့ၢ်အဂီၢ် ဒီးဖဲတၢ်ဆၢကတီၢ် ကီခဲအခါဒၣ်လဲာ် နမၤတၢ်ဘၣ်ယွၤအသး ကန့ၢ်အဂီၢ်တက့ၢ်.—မးသဲ ၆:၁၃.
၆ တချုးပမၤလိ ယဟိဝၤယွၤအဂ့ၢ်ဒံးဘၣ်အခါ ပကမၤဘၣ်ဖုး တၢ်လၢတဘၣ် ကစၢ်ယွၤအသးသ့ဝဲလီၤ. ခဲအံၤစ့ၢ်ကီး ပတၢ်မိၣ်န့ၢ်သးလီလၢ အကမၣ်တဖၣ်အံၤ ကအိၣ်ဒံးအဃိ ပကဘၣ်ဒုးအီၤဒံးလီၤ. ဘၣ်ဆၣ်ယဟိဝၤယွၤ မၤစၢၤပှၤသ့ဒ်သိး ပကဆီတလဲကွံာ် ပတၢ်အိၣ်မူ ဒီးမၤတၢ်လၢ အဘၣ်အသးကသ့အဂီၢ်န့ၣ်လီၤ. အဒိ ဖဲစီၤပၤဒၤဝံး မၤတၢ်မၤကမၣ်မုၣ်ကမၣ်ခွါဒီး နီၢ်ဘၤသၡ့ဘၤ ဝံၤအလီၢ်ခံ ပီၢ်ယၢ်လီၤက့ၤအသး ဒီးဃ့ကညး ယဟိဝၤယွၤလၢ ကဟ့ၣ်လီၤအီၤတၢ် “သူၣ်ကဆှဲသးကဆှီ” ဒီးတၢ်ဒိကနၣ်န့ၣ်လီၤ. (စံးထီၣ်ပတြၢၤ ၅၁:၁၀, ၁၂) လၢအပူၤကွံာ် ပမ့ၢ်အိၣ်ဘၣ်ဒီး တၢ်မၤကမၣ်မုၣ်ကမၣ်ခွါ အတၢ်သးကွံန့ၣ် ပကဆဲးဒုးအီၤဒီး ယဟိဝၤယွၤ ကဟ့ၣ်အါထီၣ်ပှၤဂံၢ်ဘါ ဒ်သိးပကဒိကနၣ် အကလုၢ်ဒီး မၤတၢ်အဘၣ်န့ၣ်လီၤ. အဝဲကမၤစၢၤပှၤဒ်သိး ပကပၢၤဃာ် ပတၢ်ဆိကမိၣ်န့ၣ်လီၤ.—စံးထီၣ်ပတြၢၤ ၁၁၉:၁၃၃.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၆၄၄
စီၤဒိအ့း
စီၤဒိအ့းန့ၣ် အမ့ၢ်ဝဲ ပှၤအဒိၣ်ဖိ ဒီးအဝဲမ့ၢ်ဝဲ စီၤစီလူး အပှၤကွၢ်သိ အခိၣ်တဂၤအဃိ အအိၣ်ဒီးမူဒါလၢ ကကွၢ်ထွဲတၢ်. (၁ မူၤ ၂၁:၇; ၂၂:၉) စီၤဒိအ့းန့ၣ် အကဲဝဲ ပှၤကလုာ်ဂၤတဂၤလၢ အဘူၣ်ထီၣ်ဘါထီၣ်က့ၤ ယဟိဝၤယွၤ. ဘၣ်တဘျီ ဘၣ်သ့ၣ်သ့ၣ် ကမ့ၢ်လၢ စီၤဒိအ့းန့ၣ် မၤတၢ်အၢၣ်လီၤတမံၤမံၤ မ့တမ့ၢ် အတကဆှီဘၣ်တမံၤမံၤ မ့တမ့ၢ်ဘၣ်န့ၣ် ပှၤဆိမိၣ်လၢ အအိၣ်ဒီး တၢ်ဆါအၢအဃိ အဝဲဘၣ် “အိၣ်တ့ၢ်ဝဲလၢ ယဟိဝၤယွၤ အမဲာ်ညါ.” ဖဲန့ၣ်အဆၢကတီၢ် အဝဲထံၣ်ဘၣ်ဝဲ ပှၤလုၢ်တၢ်ခိၣ်အဒိၣ်ကတၢၢ် စီၤအဃံၤမ့လ့း ဟ့ၣ်လီၤဝဲ စီၤဒၤဝံးလၢ ကိၣ်လၢ တၢ်လုၢ်ထီၣ်တၢ်အဂီၢ် ဒီးစီၤကၤလယး အနး. လၢခံဖဲစီၤစီလူး တဲဝဲလၢ အခ့အပှၤတဖၣ် ကူၣ်အၢအီၤအခါ စီၤဒိအ့း တဲဖျါထီၣ်ဝဲ တၢ်လၢအထံၣ်ဘၣ်ဝဲလၢ ဝ့ၢ်နိၤဘးအပူၤ. အဃိ စီၤစီလူး ကိးထံၣ်ဝဲ ပှၤလုၢ်တၢ်ခိၣ် အဒိၣ်ကတၢၢ် ဒီးဝ့ၢ်နိးဘး အပှၤလုၢ်တၢ်ဒိၣ်တဖၣ်. ဒီးသံကွၢ်သံဒိးဝဲ ပှၤလုၢ်တၢ်ခိၣ်အဒိၣ်ကတၢၢ် စီၤအဃံၤမ့လ့း. ဝံၤဒီးအမၢဝဲ ပှၤလၢအဒီသဒၢ အသးသမူတဖၣ်လၢ ကမၤသံ ပှၤလုၢ်တၢ်ဒိၣ်တဖၣ်. ဘၣ်ဆၣ် ပှၤသ့ၣ်တဖၣ်အံၤ တမၤဝဲဘၣ်အဃိ စီၤစီလူးမၢဝဲ စီၤဒိအ့းမၤသံဝဲ ပှၤလုၢ်တၢ်ဒိၣ်တဖၣ်. ဒီးတဘျီဃီန့ၣ် စီၤဒိအ့း မၤသံဝဲ ပှၤလုၢ်တၢ်ဒိၣ် ၈၅ ဂၤ. ဝံၤဒီး အဝဲမၤဟးဂီၤဝဲ ဝ့ၢ်နိၤဘး ဒီးမၤသံ ပှၤဝ့ၢ်ဖိခဲလၢာ် ဒီးအဆၣ်ဖိကီၢ်ဖိတဖၣ်.—၁ မူၤ ၂၂:၆-၂၀.
ဖဲ စံးထီၣ်ပတြၢၤ အဆၢဒိၣ် ၅၂ တၢ်ကတိၤအိးထီၣ်န့ၣ် စီၤဒၤဝံး ကွဲးဝဲ စီၤဒိအ့းအဂ့ၢ်. ဒီးဘၣ်ဃးဒီးစီၤဒိအ့းန့ၣ် အဝဲတဲဝဲလၢ “နပျ့ၤလီၤဂာ်ဒ် ဒီလူၤလၢ အကနၣ်အ့ၣ်ဝဲအသိး, နကူၣ်အၢပှၤဂၤ ဒီးနတဲလံၣ်တဲလီတၢ်လီၤ. နအဲၣ်တၢ်အၢ ဒိၣ်န့ၢ်ဒံး တၢ်ဂ့ၤ ဒီးနဘၣ်သး တဲတၢ်လံၣ်တၢ်လီ အါန့ၢ်ဒံး တၢ်တီတၢ်လိၤလီၤ. နတဲလံၣ်တၢ်သ့မး ဒီးနအဲၣ်တၢ်ကတိၤလၢ အမၤဆါတၢ် ကိးထံၣ်ဒဲးလီၤ.”—စံး ၅၂:၂-၄.
လါယူၤ ၂၄-၃၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၅၄-၅၆
ကစၢ်ယွၤ အိၣ်လၢနအိၣ် တကပၤ
တၢး၀၆ ၈/၁ ၂၂ ¶၁၀-၁၁
ပျံၤယွၤ ဒီးအိၣ်ဒီးတၢ်ကူၣ်သ့
၁၀ ဘၣ်တဘျီ စီၤဒၤဝံး လဲၤဃ့ၢ်ပူၤဖျဲးအသးလၢ ပှၤဖလ့ၡသးဖိ အစီၤပၤအၤကံၣ် အအိၣ်လၢ ဝ့ၢ်ကၤသး. ဝ့ၢ်ကၤသးန့ၣ် မ့ၢ်ဝဲ စီၤကၤလယး အိၣ်တၢ်အလီၢ်. (၁ ၡမူၤအ့လး ၂၁:၁၀-၁၅) ဖဲန့ၣ်အခါ စီၤပၤအခ့အပှၤတဖၣ် တဲဝဲလၢ စီၤဒၤဝံးန့ၣ် မ့ၢ်ဝဲ အဝဲသ့ၣ် အဒုၣ်အဒါ. အဃိ စီၤဒၤဝံး မၤဝဲဒ်လဲၣ်. အဝဲဃ့တၢ်မၤစၢၤလၢ ယဟိဝၤယွၤအအိၣ်. (စံးထီၣ်ပတြၢၤ ၅၆:၁-၄, ၁၁-၁၃) စီၤဒၤဝံးန့ၣ် ဒ်သိးအကပူၤဖျဲးအဂီၢ် အဝဲထိၣ်ပျုၢ်အသး. သနာ်က့ စီၤဒၤဝံးသ့ၣ်ညါဝဲလၢ ပှၤလၢအမၤပူၤဖျဲးအီၤန့ၣ် မ့ၢ်ဝဲ ယဟိဝၤယွၤ. စီၤဒၤဝံး သန့ၤအသးလၢ ယဟိဝၤယွၤအအိၣ် လၢအသးဒီဖျၢၣ် ဒီးအနာ်န့ၢ် ယဟိဝၤယွၤအဃိ ပသ့ၣ်ညါဘၣ်လၢ စီၤဒၤဝံးန့ၣ် အမ့ၢ်ပှၤလၢအပျံၤယွၤနီၢ်ကီၢ်.—စံးထီၣ်ပတြၢၤ ၃၄:၄-၆, ၉-၁၁.
၁၁ ယဟိဝၤယွၤ အၢၣ်လီၤဝဲလၢ အကမၤစၢၤပှၤ ဒ်သိးပလဲၤခီဖျိ တၢ်ကီတၢ်ခဲတဖၣ် ကန့ၢ်အဂီၢ်. အဃိ ပပာ်ဖျါထီၣ်လၢ ပပျံၤကစၢ်ယွၤသ့ ခီဖျိ ပနာ်န့ၢ် ကစၢ်ယွၤ အတၢ်အၢၣ်လီၤဒ် စီၤဒၤဝံးအသိး. စီၤဒၤဝံးတဲဝဲလၢ “ပျဲယဟိဝၤယွၤ ဟံးစုနဲၣ်ကျဲနၤတက့ၢ်. သန့ၤနသးလၢအီၤ ဒီးအကမၤစၢၤနၤလီၤ.” (စံးထီၣ်ပတြၢၤ ၃၇:၅) ပကဘၣ် မၤဒ်န့ၣ်န့ၣ် အခီပညီ တမ့ၢ်လၢ ပကဘၣ် ပာ်လီၤတၢ်ကီတၢ်ခဲ ခဲလၢာ်လၢ ကစၢ်ယွၤအစုပူၤ ဒီးအိၣ်ခိးကစၢ်ယွၤ ဒ်န့ၣ်ဘၣ်. ပကဘၣ်မၤ တၢ်လၢပမၤအီၤသ့တဖၣ်စ့ၢ်ကီး. စီၤဒၤဝံးန့ၣ် အဃ့ကစၢ်ယွၤ အတၢ်မၤစၢၤ ဝံၤအတအိၣ်ဃိကဒိ ဒ်န့ၣ်ဘၣ်. အဝဲသူဝဲ အတၢ်သ့တၢ်ဘၣ် ဒီးအခိၣ်နူာ်လၢ ကစၢ်ယွၤဟ့ၣ်လီၤအီၤ ဒီးအမၤဘၣ်ထီၣ်က့ၤ အတၢ်ကီတၢ်ခဲ. စီၤဒၤဝံး သ့ၣ်ညါဝဲလၢ အမၤဘၣ်ဂီၢ်ထီၣ်က့ၤ အနီၢ်ကစၢ် တၢ်ကီတၢ်ခဲ ထဲလၢအနီၢ်ကစၢ် တဂၤန့ၣ် တသ့ဘၣ်. အဃိ ပဝဲစ့ၢ်ကီး ပကြၢးမၤဒ်သိးဒီအီၤ. ပကဘၣ်သန့ၤပသးလၢ ယဟိဝၤယွၤအအိၣ် ဘၣ်ဆၣ် ပကဘၣ်မၤစ့ၢ်ကီး တၢ်လၢပမၤသ့တဖၣ် ခဲလၢာ်. တဘျီတခီၣ် ပမၤတၢ် မ့ၢ်တသ့ နီတမံၤလၢၤဘၣ် သနာ်က့ ပသန့ၤပသးလၢ ယဟိဝၤယွၤအအိၣ်သ့ဒံး. ဖဲန့ၣ် အဆၢကတီၢ် မ့ၢ်ဝဲ တၢ်ခွဲးတၢ်ယာ်လၢ ပကပာ်ဖျါထီၣ်လၢ ပပျံၤယဟိဝၤယွၤ ဒီးပဟံးန့ၢ် တၢ်ဂံၢ်တၢ်ဘါလၢ စီၤဒၤဝံး အတၢ်ကတိၤ သ့ဝဲစ့ၢ်ကီး. စီၤဒၤဝံးတဲဝဲလၢ “ပှၤလၢအပျံၤ ယဟိဝၤယွၤန့ၣ် အိၣ်ဒီးတၢ်ရ့လိာ်သးဒီးအီၤ ဘူးဘူးတံၢ်တံၢ်လီၤ. ဒီးအဝဲဒုးသ့ၣ်ညါ အဝဲသ့ၣ်လၢ အတၢ်အၢၣ်လီၤအီလီၤလီၤ.”—စံးထီၣ်ပတြၢၤ ၂၅:၁၄.
cl ၂၄၃ ¶၉
တၢ်တမံၤဂ့ၤတမံၤဂ့ၤ “မၤလီၤဖးပှၤဒီး ကစၢ်ယွၤအတၢ်အဲၣ်” တသ့ဘၣ်
၉ ယဟိဝၤယွၤ ပာ်လုၢ်ပာ်ပှ့ၤဝဲ ပတၢ်တူၢ်န့ၢ်ခီၣ်ကဲ. (မးသဲ ၂၄:၁၃) မုၣ်ကီၤလံၢ် အဲၣ်ဒိးဝဲလၢ ပပာ်တ့ၢ် ယဟိဝၤယွၤ. အဃိ ပမ့ၢ်တီဒီး ယဟိဝၤယွၤန့ၣ် မ့ၢ်ဝဲ ပပာ်ဖျါထီၣ်လၢ မုၣ်ကီၤလံၢ် တဲတၢ်န့ၣ် တဘၣ်ဘၣ်. (ကတိၤဒိ ၂၇:၁၁) ပကအိၣ်ဒီး တၢ်တူၢ်န့ၢ်ခီၣ်ကဲအဂီၢ် တညီဝဲ ထီဘိဘၣ်. ခီဖျိလၢ ပတၢ်အိၣ်ဆူၣ်အိၣ်ချ့ တဂ့ၤဘၣ်, ကျိၣ်စ့တၢ်ကီတၢ်ခဲ, တၢ်သူၣ်ကိၢ်သးဂီၤ ဒီးတၢ်ဂ့ၢ် လၢအဂၤတဖၣ်အဃိ ကဲထီၣ်တၢ်မၤကွၢ်လၢ ပဂီၢ်သ့. တကးဒံးဘၣ် တၢ်လၢပမုၢ်လၢ်အီၤတဖၣ် ကဟဲကဲထီၣ်အဂီၢ် ပမ့ၢ်ဘၣ်အိၣ်ခိးအီၤ ဖးယံာ်န့ၣ် ပသးဟးဂီၤသ့. (ကတိၤဒိ ၁၃:၁၂) သနာ်က့ ပမ့ၢ်ဆဲးအိၣ်ဒီး တၢ်တူၢ်န့ၢ်ခီၣ်ကဲန့ၣ် ယဟိဝၤယွၤ ပာ်လုၢ်ပာ်ပှ့ၤဝဲဒိၣ်မး. စီၤပၤဒၤဝံး ဃ့ယဟိဝၤယွၤ ဒ်သိးယဟိဝၤယွၤ ကပာ်ဃာ် အမဲာ်ထံလၢ “ထၢၣ်တၢ်ဖံးအပူၤ” ဒီး ‘ကွဲးနီၣ်ဃာ်အီၤလၢ အလံာ်ပူၤ.’ (စံးထီၣ်ပတြၢၤ ၅၆:၈) ခီဖျိလၢ ပတီဒီး ယဟိဝၤယွၤအဃိ ပမဲာ်ထံမ့ၢ်လီၤ ဒီးပမ့ၢ်ထံၣ်ဘၣ်ဒီး တၢ်ကီတၢ်ခဲန့ၣ် ယဟိဝၤယွၤ တိၢ်နီၣ်ဃာ်ဝဲ တၢ်သ့ၣ်တဖၣ်အံၤခဲလၢာ် ဒီးအဝဲ ပာ်လုၢ်ပာ်ပှ့ၤဝဲဒိၣ်မး.
တၢ်အဲၣ်န့ၣ် မၤစၢၤပှၤလၢ ပမၤလီၤမၢ်ကွံာ် တၢ်ပျံၤတၢ်ဖုးသ့ဒ်လဲၣ်
၁၆ မုၣ်ကီၤလံၢ် သ့ၣ်ညါဝဲလၢ ပပာ်လုၢ်ပာ်ပှ့ၤ ပသးသမူ. အဃိ အတဲဝဲလၢ ပကမၤတၢ်ကိးမံၤဒဲး ဒ်သိး ပကဆဲးအိၣ်မူဘၣ်အဂီၢ်. တၢ်လၢပကမၤအီၤတဖၣ် မ့ၢ်မၤဘၣ်ဒိ ပတၢ်ရ့လိာ်သးဒီး ယဟိဝၤယွၤ သနာ်က့ ပကမၤအီၤဒံး. (ယိၤဘး ၂:၄, ၅) မုၣ်ကီၤလံၢ် တဲတၢ်န့ၣ် ကမၣ်ဖးဒိၣ်ညါ. ဘၣ်ဆၣ် မုၣ်ကီၤလံၢ်န့ၣ် အကဲ “ပှၤလၢအဒုးအိၣ်ထီၣ်တၢ်သံ” ဒီးအဝဲသ့ၣ်ညါလၢ ပပျံၤလၢ ပကသံအဃိ အဝဲဂုာ်ကျဲးစၢးသူဝဲ တၢ်ပျံၤတခါအံၤ ဒ်သိးဒီး ပကပာ်တ့ၢ်ကွံာ် ယဟိဝၤယွၤအဂီၢ်. (ဧ့ၤဘြံၤ ၂:၁၄, ၁၅) တဘျီတခီၣ် မုၣ်ကီၤလံၢ် ကသူဝဲ ပှၤကညီတဖၣ် ဒ်သိး ကမၤပျံၤမၤဖုးပှၤလၢ ပမ့ၢ်တပာ်တ့ၢ်ကွံာ် ပတၢ်စူၢ်တၢ်နာ်ဘၣ်န့ၣ် အဝဲသ့ၣ် ကမၤသံပှၤ. တဘျီတခီၣ် ဖဲပဆိးက့ နးနးအခါ မုၣ်ကီၤလံၢ် ဟံးန့ၢ်တၢ်ခွဲးတၢ်ယာ် ဒ်သိးဒီး ပကမၤကမၣ် ကစၢ်ယွၤ အတၢ်သိၣ်တၢ်သီအဂီၢ်. အဒိ, ကသံၣ်သရၣ် မ့တမ့ၢ် ပဟံၣ်ဖိဃီဖိလၢ အတစူၢ်တနာ်တၢ် သ့ၣ်တဖၣ်န့ၣ် အဝဲသ့ၣ် ကမၢဆူၣ်ပှၤလၢ ပကမၤကမၣ် ကစၢ်ယွၤ အတၢ်သိၣ်တၢ်သီ ဒ်သိး ပကတူၢ်လိာ် တၢ်သွီသွံၣ်. မ့တမ့ၢ် ဘၣ်သ့ၣ်သ့ၣ် ပှၤတဂၤဂၤ ကကွဲန့ၢ်လွဲန့ၢ်ပှၤဒ်သိးဒီး ပကတူၢ်လိာ် တၢ်ကူစါယါဘျါ အကျိၤအကျဲ လၢအထီဒါလိာ်သးဒီး လံာ်စီဆှံတၢ်သိၣ်တၢ်သီ.
၁၇ ပတအဲၣ်ဒိးသံဘၣ် ဘၣ်ဆၣ် ပမ့ၢ်သံသနာ်က့ ပသ့ၣ်ညါလၢ ယဟိဝၤယွၤ အဲၣ်ပှၤဒံး. (ဖး ရိမ့ၤ ၈:၃၇-၃၉.) ယဟိဝၤယွၤ အပှၤဂီၢ်မုၢ်တဖၣ် မ့ၢ်သံဘၣ်ဆၣ် ယဟိဝၤယွၤ သ့ၣ်နီၣ်အဝဲသ့ၣ်ဒံး. လၢအဂီၢ်န့ၣ် လီၤဂာ်ဒ်သိးဒီး အဝဲသ့ၣ်အိၣ်မူဒံး. (လူၤကၣ် ၂၀:၃၇, ၃၈) တကးဒံးဘၣ် ကစၢ်ယွၤအဲၣ်ဒိး မၤမူထီၣ်က့ၤ အဝဲသ့ၣ်သပှၢ်တၢၢ်. (ယိၤဘး ၁၄:၁၅) အဃိ ဒ်သိးပ “ကန့ၢ်ဘၣ် တၢ်မူအထူအယိာ်” အဂီၢ်န့ၣ် ယဟိဝၤယွၤဟ့ၣ်လီၤပှၤ တၢ်ပှ့ၤက့ၤ. (ယိၤဟၣ် ၃:၁၆) ပသ့ၣ်ညါလၢ ယဟိဝၤယွၤ ကဟုကယာ်ပှၤဒီး အဲၣ်ပှၤဒိၣ်မး အဃိ ဖဲပဆိးက့အခါ ဒီးပှၤဂၤမၤပျံၤမၤဖုးပှၤလၢ ကမၤသံပှၤအခါန့ၣ် ပတအဲၣ်ဒိးပာ်တ့ၢ်ကွံာ် ယဟိဝၤယွၤဘၣ်. ဖဲပထံၣ်ဘၣ်ဒီး တၢ်အိၣ်သးဒ်န့ၣ်အခါန့ၣ် ပကသန့ၤပသးလၢ ကစၢ်ယဟိဝၤယွၤအအိၣ် ဒ်သိး ပသးကမုာ်ထီၣ်က့ၤ ဒီးအကဟ့ၣ်ပှၤတၢ်ကူၣ်သ့ ဒီးတၢ်ဂံၢ်တၢ်ဘါအဂီၢ်. ဒီပုၢ်ဝဲၢ်မုၣ်ဘဲလရံၤ ဒီးအဝၤ လၢပပာ်ဖျါထီၣ်အဂ့ၢ် လၢအခီၣ်ထံးန့ၣ် အဝဲသ့ၣ် မၤဝဲဒ်န့ၣ်.—စံးထီၣ်ပတြၢၤ ၄၁:၃.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၈၅၇-၈၅၈
တၢ်သ့ၣ်ညါဆိပာ်စၢၤတၢ်, တၢ်ရဲၣ်ကျဲၤဆိပာ်စၢၤတၢ်
စီၤယူဒၤ အံၣ်စကၤရံၤအိာ် ဆါလီၤကွံာ်ဝဲ ယ့ၣ်ၡူးအဃိ ဝံအတၢ်စံးပာ် လၢထီၣ်ပှဲၤထီၣ်ဝဲ ဒီးအပာ်ဖျါထီၣ်စ့ၢ်ကီးဝဲလၢ ယဟိဝၤယွၤ ဒီးယ့ၣ်ၡူးန့ၣ် သ့ၣ်ညါဆိပာ်စၢၤတၢ်. (စံး ၄၁:၉; ၅၅:၁၂, ၁၃; ၁၀၉:၈; မၤတၢ် ၁:၁၆-၂၀) ဘၣ်ဆၣ် အခီပညီ တမ့ၢ်စ့ၢ်ကီးလၢ ကစၢ်ယွၤ ရဲၣ်ကျဲၤဆိပာ်စၢၤဝဲလၢ စီၤယူဒၤ အံၣ်စကၤရံၤအိာ် ကမၤဝဲဒ်န့ၣ်ဘၣ်. ဝံအတၢ်စံးပာ် ပာ်ဖျါထီၣ်ဝဲလၢ ယ့ၣ်ၡူးအသကိးလၢ အသ့ၣ်ညါအီၤဂ့ၤဂ့ၤတဂၤ ကထီဒါအီၤ သနာ်က့ အသကိး ဖဲလဲၣ်တဂၤလဲၣ်န့ၣ် တပာ်ဖျါထီၣ်ဝဲ လီၤတံၢ်လီၤဆဲးဘၣ်. လံာ်စီဆှံ တၢ်ဟံးစုနဲၣ်ကျဲ ဒုးသ့ၣ်ညါပှၤလၢ ကစၢ်ယွၤ တရဲၣ်ကျဲၤဆိပာ်စၢၤဝဲလၢ စီၤယူဒၤ ကမၤဝဲ ဒ်န့ၣ်ဘၣ်. ဘၣ်ဃးဒီး ယဟိဝၤယွၤ အတၢ်ဘျၢန့ၣ် တၢ်မၢဖိတဂၤ ကွဲးဝဲလၢ “တဘၣ်ပာ်ထီၣ် နစုချ့ချ့လၢ ပိာ်ခွါအလိၤ နီတဂၤတဂ့ၤ. ဒီးတဘၣ် ပၣ်ဃုာ်လၢ ပှၤဂၤ အတၢ်ဒဲးဘးအကျါတဂ့ၤ. အိၣ်စီဆှံ ထီဘိတက့ၢ်.” (၁ တံၤ ၅:၂၂; ထိၣ်သတြီၤဒီး ၃:၆.) တချုးလၢ ယ့ၣ်ၡူးဃုထၢထီၣ် တၢ်မၢဖိ ၁၂ ဂၤဒံးဘၣ်အခါ အဝဲဃ့ထုကဖၣ်လၢ အပါအအိၣ် ဒီတနၤကျၢၤ ဒ်သိးကဃုထၢထီၣ်ဝဲ လၢတၢ်ကူၣ်သ့အပူၤ. (လူၤကၣ် ၆:၁၂-၁၆) ကစၢ်ယွၤ မ့ၢ်ရဲၣ်ကျဲၤဆိပာ်စၢၤဝဲလၢ စီၤယူဒၤ ကထီဒါယ့ၣ်ၡူးန့ၣ် ကလီၤဂာ်ဒ်သိးဒီး အဝဲတမၤထွဲ အနီၢ်ကစၢ် အတၢ်သိၣ်တၢ်သီဘၣ် ဒီးအဝဲကပၣ်ဃုာ်လၢ စီၤယူဒၤ အတၢ်ဒဲးဘးအကျါစ့ၢ်ကီး.
ဖဲပှၤဃုထၢထီၣ် စီၤယူဒၤ အံၣ်စကၤရံၤအိာ် လၢကကဲထီၣ် တၢ်မၢဖိအခါ လီၤဂာ်လၢ အဝဲတအိၣ်ဒီး တၢ်ပာ်သူၣ်ပာ်သးလၢ အအဲၣ်ကျိၣ်အဲၣ်စ့န့ၣ်ဘၣ်. လၢခံ အဝဲဟ့ၣ်အခွဲးလၢ ‘တၢ်အဂံၢ်လၢ အအိၣ်ဒီး တၢ်စုၣ်တၢ်ပျၢ် န့ၣ် ကဟဲအိၣ်ထီၣ်ဝဲ’ လၢအသးပူၤ ဒီးကွဲန့ၢ်လွဲန့ၢ်အီၤ. ဒီးအဝဲတမၤထွဲဝဲ ကစၢ်ယွၤ အတၢ်ဟံးစုနဲၣ်ကျဲဘၣ်, အဝဲပိာ်ဝဲ မုၣ်ကီၤလံၢ် အကျဲ လၢကဆှၢအီၤလၢ အကဟုၣ်တၢ်အဂီၢ်. (ဧ့ၤဘြံၤ ၁၂:၁၄, ၁၅; ယိၤ ၁၃:၂; မၤတၢ် ၁:၂၄, ၂၅; ယၤ ၁:၁၄, ၁၅.) လၢခံ ကယီကယီန့ၣ် ယ့ၣ်ၡူးသ့ၣ်ညါထီၣ်ဝဲ စီၤယူဒၤ အတၢ်ပာ်သူၣ်ပာ်သး ဒီးအတဲဆိဝဲလၢ စီၤယူဒၤ ကထီဒါက့ၤအီၤ.—ယိၤဟၣ် ၁၃:၁၀, ၁၁.
“တၢ်အဲၣ်လၢ ခရံာ်ပာ်ဖျါထီၣ်ဝဲန့ၣ် မ့ၢ်တၢ်လၢ အထိၣ်ဟူးထိၣ်ဂဲၤထီၣ်ပှၤ”
၁၂ တချုးလၢ ယ့ၣ်ၡူးသံဒံးဘၣ်တနၤန့ၣ် အတဲဘၣ် အပျဲၢ်အဘီၣ်တဖၣ်လၢ “လၢဟီၣ်ခိၣ်ချၢအံၤ သုကထံၣ်ဘၣ် တၢ်နးတၢ်ဖှီၣ် ဘၣ်ဆၣ် ယမၤနၢၤဟီၣ်ခိၣ်လံ အဃိအိၣ်ဒီး တၢ်သးဒူတက့ၢ်.” (ဖး ယိၤဟၣ် ၁၆:၃၂, ၃၃.) ဖဲယ့ၣ်ၡူးအဒုၣ်အဒါတဖၣ် မၤပျံၤမၤဖုးအီၤအခါ အတပျံၤတၢ်ဘၣ်. ခီဖျိလၢ အအိၣ်ဒီးတၢ်သးဒူအဃိ အတီဒီးယဟိဝၤယွၤ တုၤလၢအသံ. ယ့ၣ်ၡူး သ့ၣ်ညါဝဲလၢ အပျဲၢ်အဘီၣ်တဖၣ် ကထံၣ်ဘၣ်တၢ်မၤကွၢ် ဒ်သိးဒီးအီၤအဃိ အမၢယဟိဝၤယွၤ ဒီသဒၢအဝဲသ့ၣ်. (ယိၤဟၣ် ၁၇:၁၁) ပသ့ၣ်ညါဘၣ်လၢ ယဟိဝၤယွၤန့ၣ် အဂံၢ်ဆူၣ်ဒိၣ်န့ၢ်ဒံး ပဒုၣ်ပဒါတဖၣ်အဃိ ပအိၣ်ဒီးတၢ်သးဒူ. (၁ ယိၤဟၣ် ၄:၄) တကးဒံးဘၣ် ယဟိဝၤယွၤန့ၣ် အထံၣ်တၢ်ကိးမံၤဒဲး အဃိ ပမ့ၢ်သန့ၤသးလၢအီၤန့ၣ် အကမၤစၢၤပှၤ ဒ်သိး ပကမၤလီၤမၢ်ကွံာ် ပတၢ်ပျံၤတၢ်ဖုး ဒီးပကအိၣ်ဒီး တၢ်သးဒူ.
၁၃ ပကကွၢ်သကီး ပှၤအရံၤမၤသဲဖိ စီၤယိၤသး အဒိအတဲာ်. စီၤယိၤသးအံၤ အကဲ ပှၤယူဒၤဖိ အကွီၢ်ဘျီၣ် လၢအဒိၣ်ကတၢၢ် အပှၤဘၣ်မူဘၣ်ဒါတဂၤ အဃိ ပှၤယူဒၤဖိ ပာ်ကဲအီၤဒိၣ်မး. စီၤယိၤဟၣ် တဲဝဲလၢ ပှၤအရံၤမၤသဲဖိ စီၤယိၤသးအံၤ အကဲ “ယ့ၣ်ၡူး အပျဲၢ်အဘီၣ် ဘၣ်ဆၣ် မ့ၢ်လၢအပျံၤ ပှၤယူဒၤဖိ အဃိ အဝဲတဒုးသ့ၣ်ညါ ပှၤဂၤဘၣ်.” (ယိၤဟၣ် ၁၉:၃၈) အဃိ ပသ့ၣ်ညါဘၣ်လၢ ဖဲယ့ၣ်ၡူး အိၣ်လၢ ဟီၣ်ခိၣ်ချၢခါန့ၣ် အတပိာ်ယ့ၣ်ၡူးအခံဘၣ်. ပှၤအရံၤမၤသဲဖိ စီၤယိၤသးအံၤ အသးအိၣ် ဘီမုၢ်တၢ်သးခုကစီၣ် ဒီးအနာ်ယ့ၣ်ၡူး နာ်က့ အတဲပှၤဂၤတဘူၣ်ဘၣ်. ဘၣ်သ့ၣ်သ့ၣ် အဘၣ်ယိၣ်ဝဲလၢ ပှၤမ့ၢ်သ့ၣ်ညါလၢ အကဲ ယ့ၣ်ၡူးအပျဲၢ်အဘီၣ်န့ၣ် ပှၤတပာ်ကဲအီၤလၢၤဘၣ်. ဘၣ်ဆၣ် လံာ်စီဆှံ တဲဝဲလၢ ယ့ၣ်ၡူးသံဝံၤအလီၢ်ခံ အ “ပာ်ဆူၣ်ထီၣ်အသးဒီး လဲၤဝဲလၢ စီၤပံၤလးအအိၣ် ဒီးဃ့န့ၢ်ဝဲ ယ့ၣ်ၡူးအစိၣ်.” (မၢ်ကူး ၁၅:၄၂, ၄၃) တဘျီအံၤဒု ပှၤအရံၤမၤသဲဖိ စီၤယိၤသး တဲလီၤအသးလၢ အကဲ ယ့ၣ်ၡူးအပျဲၢ်အဘီၣ်ဘူၣ်လံ.
၁၄ နၤမီၤ, နပျံၤပှၤဂၤ ဒ်သိးဒီး ပှၤအရံၤမၤသဲဖိ စီၤယိၤသး ပျံၤဝဲန့ၣ် အိၣ်တဘျီဘျီဧါ. လၢကၠိမ့ၢ်ဂ့ၤ, လၢတၢ်မၤလီၢ်မ့ၢ်ဂ့ၤ နပျံၤလၢ နကတဲပၠးပှၤဂၤလၢ နကဲယဟိဝၤပှၤအုၣ်အသး တဘျီဘျီကၠ့ၤဧါ. ခီဖျိလၢ နဘၣ်ယိၣ်လၢ ပှၤဂၤကထံၣ်နၤ တမံၤမံၤအဃိ နထုးယံာ်တၢ်ဆၢကတီၢ် လၢနကကဲထီၣ် ပှၤစံၣ်တဲၤတဲလီၤတၢ်ဖိ ဒီးဒိးဘျၢထံဧါ. တဘၣ်ပျဲလၢ တၢ်ပျံၤ ဒီးတၢ်ဘၣ်ယိၣ်တဖၣ်အံၤ ကမၤတံာ်တာ်နၤလၢ နကမၤတၢ်လၢအဘၣ်တဂ့ၤ. ဃ့ထုကဖၣ် လၢယဟိဝၤယွၤအအိၣ်ဆူၣ်ဆူၣ် ဒီးဃ့အီၤလၢ အကဟ့ၣ်နၤ တၢ်သးဒူ ဒ်သိးနကမၤ အတၢ်ဘၣ်သး. နမ့ၢ်ထံၣ်ဘၣ်လၢ ယဟိဝၤယွၤ စံးဆၢနတၢ်ထုကဖၣ်န့ၣ် နသးကဆူၣ်ထီၣ် ဒီးနတၢ်သးဒူကအါထီၣ်.—ယၡါယၤ ၄၁:၁၀, ၁၃.