ယ့ၣ်ၡူးခရံာ် ဘၣ်တၢ်မၤသံအီၤ

ယ့ၣ်ၡူး စံၣ်တဲၤတဲလီၤတၢ် ဒီးသိၣ်လိသီလိတၢ် သၢနံၣ်တခီဝံၤအလီၢ်ခံ ကစၢ်သ့ၣ်ညါဝဲလၢ အတၢ်ဆၢကတီၢ်လၢ ဟီၣ်ခိၣ်အံၤ ဘူးကလၢာ်လံ. ပှၤယူဒၤဖိ တၢ်ဘူၣ်တၢ်ဘါ ခိၣ်နၢ်တဖၣ်န့ၣ် ကူၣ်ထီၣ်ဖးလီၤဝဲလၢ ကမၤသံယ့ၣ်ၡူးန့ၣ်လီၤ. ဘၣ်ဆၣ်သနာ်က့ အဝဲသ့ၣ်ဘၣ်ယိၣ်ဝဲလၢကမျၢၢ်တဖၣ်ကမၤတၢထီၣ်တၢလီၤတၢ် ခီဖျိလၢအဝဲသ့ၣ်နာ်ဝဲလၢယ့ၣ်ၡူးမ့ၢ်ဝံတဂၤအဃိလီၤ. ဖဲန့ၣ်အဆၢကတီၢ်န့ၣ် မုၣ်ကီၤလံၢ်လ့ပစီဝဲ စီၤယူဒၤအံၣ်စကၤရံၤအိာ် လၢအပၣ်ဃုာ်လၢယ့ၣ်ၡူးအတၢ်မၢဖိ ၁၂ ဂၤအကျါ ဒ်သိးကဟ့ၣ်လီၤကွံာ် ယ့ၣ်ၡူးအဂီၢ်လီၤ. တၢ်ဘူၣ်တၢ်ဘါခိၣ်နၢ်တဖၣ် ဟ့ၣ်ဝဲစီၤယူဒၤလၢ စ့ညၣ် ၃၀ လၢအဝဲကဆါလီၤကွံာ်ယ့ၣ်ၡူးအဂီၢ်န့ၣ်လီၤ.

ယ့ၣ်ၡူးအတၢ်အိၣ်မူလၢဟီၣ်ခိၣ်ချၢ အလီၢ်ခံကတၢၢ်တနၤန့ၣ် အဝဲအိၣ်ဖှိၣ်ရိဖှိၣ်ဒီးအပျဲၢ်အဘီၣ်တဖၣ် ဒ်သိးကမၤဝဲဘူၣ်လဲၤကပာ်အဂီၢ်န့ၣ်လီၤ. ယ့ၣ်ၡူးဒုးဟးထီၣ်ကွံာ် စီၤယူဒၤဝံၤအလီၢ်ခံ ဒုးအိၣ်ထီၣ်ဝဲမူးပွဲအသီလၢ ဘၣ်တၢ်ကိးအီၤလၢ ကစၢ်အတၢ်အီၣ်လၢဟါအီၣ်န့ၣ်လီၤ. ကစၢ်ဟံးထီၣ်ကိၣ်ဒီး ဃ့ဘါထုကဖၣ်ဝံၤအလီၢ်ခံ ဟ့ၣ်လီၤဝဲဆူတၢ်မၢဖိလၢအအိၣ်တ့ၢ် ၁၁ ဂၤန့ၣ်လီၤ. ဒီးကစၢ်စံးဝဲလၢ “တၢ်အံၤမ့ၢ် ယနီၢ်ခိလၢအဘၣ် တၢ်ဟ့ၣ်လီၤကွံာ်အီၤလၢသုဂီၢ်လီၤ. မၤတၢ်အံၤလၢ သုသ့ၣ်နီၣ်ထီၣ်က့ၤယၤ အဂ့ၢ်န့ၣ်တက့ၢ်.” ဟံးထီၣ်ဝဲစပံးထံအလီခီဒီး ဃ့ဘါထုကဖၣ်ဝံၤစံးဝဲလၢ “လီခီအံၤ မ့ၢ်တၢ်အၢၣ်လီၤအီလီၤ အသီလၢယသွံၣ် လၢအဘၣ်တၢ်ဂၢ်လီၤအီၤလၢ သုဂီၢ်လီၤ.”—လူၤကၣ် ၂၂:၁၉, ၂၀.

နၤအဝဲန့ၣ် ယ့ၣ်ၡူးကဘၣ်ကတိၤတၢ်ဒီး တၢ်မၢဖိတဖၣ်အိၣ်ဒံးအါမးလီၤ. ကစၢ်ဟ့ၣ်တၢ်မၤလိာ်အသီလၢ အဝဲသ့ၣ်ကဒဲကဒဲ ကဘၣ်ပာ်ဖျါထီၣ် တၢ်အဲၣ်လၢတဃုထဲအဘျုးဒၣ်ဝဲဘၣ်. ကစၢ်စံးဝဲ “လၢသုအဲၣ်လိာ်ကွံလိာ် သုသးအဃိဒီး ပှၤခဲလၢာ်ကသ့ၣ်ညါလၢ သုမ့ၢ်ယပျဲၢ်ယဘီၣ်လီၤ.” (ယိၤဟၣ် ၁၃:၃၄, ၃၅) ယ့ၣ်ၡူးဟ့ၣ်ဂံၢ်ဟ့ၣ်ဘါအတၢ်မၢဖိတဖၣ်လၢ ဖဲအဝဲသ့ၣ်မ့ၢ်ထံၣ်ဘၣ်တၢ်မၤအသးလၢ အလီၤသူၣ်အုးသးအုးလၢအကဟဲဝဲအဆၢကတီၢ်န့ၣ် တဘၣ်သးဟးဂီၤတဂ့ၤ. ဒီးယ့ၣ်ၡူး ဃ့ဘါထုကဖၣ်တၢ်လၢ အဝဲသ့ၣ်အဂီၢ် လၢတၢ်သူၣ်ဆူၣ်သးဆူၣ်အပူၤလီၤ. အဝဲသ့ၣ်သးဝံၣ်သကိးတၢ်ဝံၤဒီး လဲၤဝဲဆူက့ၤသစ့းမနၤ တၤသၣ်လီၢ်ဖဲနၤအဝဲန့ၣ်လီၤ.

ဖဲက့ၤသစ့းမနၤတၤသၣ်လီၢ်အပူၤန့ၣ် ယ့ၣ်ၡူးချံးလီၤအခီၣ် ဒီးဃ့ဘါထုကဖၣ်ဆူယွၤအအိၣ်လၢအသးဒီဖျၢၣ်လီၤ. တယံာ်ဘၣ်ဒီး ပှၤသုးဖိလၢအအိၣ်ဒီးတၢ်စုကဝဲၤ, ပှၤလုၢ်တၢ်အခိၣ် ဒီးပှၤအဂၤတဖၣ်န့ၣ် ဟဲဝဲဒ်သိးကဖီၣ်ယ့ၣ်ၡူးလီၤ. ဒ်သိးကဒုးနဲၣ်အဝဲသ့ၣ်လၢ ယ့ၣ်ၡူးအဂီၢ် စီၤယူဒၤသုးဘူးအသးဆူယ့ၣ်ၡူးအအိၣ် ဒီးနၢမူအီၤန့ၣ်လီၤ. ဖဲသုးဖိတဖၣ်ဖီၣ်ဝဲယ့ၣ်ၡူးအခါ တၢ်မၢဖိတဖၣ်ဃ့ၢ်ကွံာ်ဝဲလီၤ.

ဖဲယ့ၣ်ၡူးဆၢထၢၣ်လၢ ပှၤယူဒၤဖိအကွီၢ်ဘျီၣ်လၢအဒိၣ်ကတၢၢ်အခါန့ၣ် အဝဲစံးဝဲလၢ အဝဲမ့ၢ်ယွၤအဖိခွါလီၤ. ပှၤဘၣ်မူဘၣ်ဒါလၢ ကွီၢ်ဘျီၣ်ပူၤစံၣ်ညီၣ်တဲာ်ဝဲလၢ အဝဲကတိၤကမၣ်ယွၤအဃိ ကြၢးတၢ်မၤသံအီၤလီၤ. လၢခံယ့ၣ်ၡူးဘၣ်တၢ်လဲၤကိးအီၤဆူ ရိမ့ၤအပဒိၣ်ဖးဒိၣ် စီၤပီၣ်တံၤပံၤလးအအိၣ်လီၤ. ပံၤလးသ့ၣ်ညါဝဲလၢ ယ့ၣ်ၡူးအတၢ်ကမၣ်တအိၣ်နီတမံၤဘၣ်သနာ်က့ အဝဲဟ့ၣ်လီၤယ့ၣ်ၡူးဆူပှၤဂီၢ်မုၢ်လၢ အဲၣ်ဒိးမၤသံအီၤ အစုပူၤန့ၣ်လီၤ.

ပှၤဆှၢထီၣ်ယ့ၣ်ၡူးဆူ ကီၤလၤကီၤသါ ဒီးရိမ့ၤအသုးဖိတဖၣ်န့ၣ် ပျၤထီၣ်ယ့ၣ်ၡူးလၢ သ့ၣ်တၢၣ်အလိၤန့ၣ်လီၤ. တၢ်လီၤလးဖးဒိၣ်ကဲထီၣ်အသးတခါဖဲ မုၢ်ဆါခီအကတီၢ်န့ၣ် တၢ်ခံးလီၤဝဲသတူၢ်ကလာ်န့ၣ်လီၤ. ယ့ၣ်ၡူးသံလၢ မုၢ်ဃ့ၢ်လီၤအဆၢကတီၢ် ဒီးဖဲန့ၣ်အခါ ဟီၣ်ခိၣ်ဟူးဝဲနးနးကလဲာ်လီၤ. ကစၢ်အစိၣ်န့ၣ် ဘၣ်တၢ်ပာ်လီၤအီၤလၢ တၢ်သွၣ်ခိၣ်လၢ လၢၢ်အပူၤလီၤ. ဒီးလၢခံတနံၤန့ၣ် ပှၤလုၢ်တၢ်အခိၣ်သ့ၣ်တဖၣ် စဲပနီၣ်ဃာ်လၢၢ်လၢတၢ်ပူၤခိၣ်ထိးဒီး ပာ်ပှၤခိးတၢ်ဖိဖဲန့ၣ်လီၤ. မ့ၢ်ယ့ၣ်ၡူးကအိၣ်ဝဲလၢ တၢ်သွၣ်ခိၣ်အပူၤဖးယံာ်ဧါ. တမ့ၢ်ဘၣ်. တၢ်လီၤလးလၢ အဒိၣ်ကတၢၢ်တခါ ကဟဲကဲထီၣ်ဝဲလီၤ.

​—ဘၣ်တၢ်ဒိးသန့ၤထီၣ်လၢ မးသဲ အဆၢဒိၣ် ၂၆ ဒီး ၂၇; မၢ်ကူး အဆၢဒိၣ် ၁၄ ဒီး ၁၅; လူၤကၣ် အဆၢဒိၣ် ၂၂ ဒီး ၂၃; ယိၤဟၣ် အဆၢဒိၣ် ၁၂ တုၤ ၁၉ န့ၣ်လီၤ.