ဘၣ်မနုၤအဃိ ပှၤအါဂၤ တပာ်ကဲလီၤ အနီၢ်ကစၢ်သး လၢၤဘၣ်လဲၣ်

ဘၣ်မနုၤအဃိ ပကဘၣ် ပာ်ကဲလီၤ ပနီၢ်ကစၢ်သးလဲၣ်

• ပှၤဃုသ့ၣ်ညါတၢ် ပာ်ဖျါထီၣ်ဝဲလၢ ပှၤလၢအတထံၣ်ဂ့ၤလီၤ အသးဘၣ်န့ၣ် အတူၢ်ဘၣ် တၢ်ကိၢ်တၢ်ဂီၤ, တၢ်သးလီၤစၢ် ဒီးအဝဲသ့ၣ်အီၣ်တၢ် တဘၣ်လီၢ်ဘၣ်စးဘၣ်. တကးဒံးဘၣ် အဝဲသ့ၣ် ကဲထီၣ်ပှၤအီသံးဖိ ဒီးပှၤသူကသံၣ်မူၤဘှီး.

• ပှၤလၢအပာ်ကဲလီၤ အနီၢ်ကစၢ်သးန့ၣ် အဝဲသ့ၣ် တထိၣ်သတြီၤအသးဒီး ပှၤဂၤဘၣ်. အဃိ အဝဲသ့ၣ် ရ့ဒီးပှၤဂၤညီ ဒီးအန့ၢ်ဘၣ် သကိးလၢအဂ့ၤ. မ့မ့ၢ်ပှၤအါတက့ၢ်လၢ အတပာ်ကဲလီၤ အနီၢ်ကစၢ်သးဘၣ်န့ၣ် အဝဲသ့ၣ် ဆိကမိၣ်ဆံးပှၤဂၤ ဒီးအတၢ်ရ့လိာ်သးဒီးပှၤဂၤ တဂ့ၤဘၣ်.

• ပှၤလၢအပာ်ကဲလီၤ အနီၢ်ကစၢ်သးန့ၣ် အမ့ၢ်ထံၣ်ဘၣ် တၢ်ကီတၢ်ခဲ သနာ်က့ အဆဲးအိၣ်ဒီး တၢ်တူၢ်န့ၢ်ခီၣ်ကဲ. တကးဒံးဘၣ် တၢ်မၤတံာ်တာ် မ့ၢ်အိၣ်သနာ်က့ ဒ်သိးအဖီတၢၣ် ကလၢပှဲၤထီၣ်အဂီၢ် အတဟ့ၣ်အၡူဘၣ်. မ့မ့ၢ်ပှၤလၢ အတပာ်ကဲလီၤ အနီၢ်ကစၢ်သးဘၣ်န့ၣ် အမ့ၢ်ထံၣ်ဘၣ် တၢ်ကီတၢ်ခဲ ဆံးဆံးဖိသနာ်က့ အထံၣ်ဝဲဒ်သိးဒီး တၢ်ကီတၢ်ခဲဖးဒိၣ်အဃိ အဟ့ၣ်အၡူညီညီဖိ.

နပာ်ကဲလီၤ နနီၢ်ကစၢ်သး ကသ့ဒ်လဲၣ်

ဃုထၢသကိးလၢ အဟ့ၣ်ဂံၢ်ဟ့ၣ်ဘါနၤ. နကဘၣ်ရ့ဒီး ပှၤလၢအအိၣ်ဒီး တၢ်ပာ်ကဲ, ပှၤလၢအကွၢ်န့ၢ်တၢ်လၢ ပှၤဂၤအဂီၢ် ဒီးပှၤလၢကမၤစၢၤနၤ.

မၤစၢၤပှၤဂၤ. ဖဲနသးအိၣ်ပှၤဂၤ ဒီးမၤန့ၢ်တၢ်လၢ ပှၤဂၤအဂီၢ်အခါ နမ့ၢ်တန့ၢ်ဘၣ်က့ၤ တၢ်နီတမံၤဘၣ် သနာ်က့ ခီဖျိလၢ နဟ့ၣ်တၢ်အဃိ နကန့ၢ်ဘၣ်က့ၤ တၢ်သးခုနီၢ်ကီၢ်. ဒီးတၢ်လၢနမၤတဖၣ် ပှၤမ့ၢ်တထံၣ်ဝဲဘၣ် သနာ်က့ နဟ့ၣ်တၢ်အဃိ နကန့ၢ်ဘၣ် တၢ်သးခု ဒီးနကပာ်ကဲလီၤ နနီၢ်ကစၢ်သးအါထီၣ်.

သိၣ်လိနဖိဒ်သိး အကပာ်ကဲလီၤ အနီၢ်ကစၢ်သး. နသိၣ်လိနဖိ သ့ခီဖျိ တသ့ဖဲအသ့ နပျဲလၢ အဝဲသ့ၣ် ကမၤဘၣ်ထီၣ်က့ၤ အနီၢ်ကစၢ် တၢ်ကီတၢ်ခဲ. နမ့ၢ်မၤဒ်န့ၣ်န့ၣ် ဖဲအထံၣ်ဘၣ် တၢ်ကီတၢ်ခဲအခါ အကဘၣ်မၤဝဲ ဒ်လဲၣ်န့ၣ် အကသ့ၣ်ညါထီၣ်ဝဲ ဝံၤဒီးအဝဲသ့ၣ် ကပာ်ကဲလီၤ အနီၢ်ကစၢ်သးအါထီၣ်. တကးဒံးဘၣ် ဖဲအဝဲသ့ၣ် ကဲထီၣ် ပှၤဒိၣ်တုာ်ခိၣ်ပှဲၤအခါ ကကဲထီၣ် တၢ်မၤစၢၤလၢ အဝဲသ့ၣ်အဂီၢ်စ့ၢ်ကီး.

တၢ်ပာ်ကဲလီၤ နီၢ်ကစၢ်သးန့ၣ် ပထံၣ်လၢ အရ့ဒိၣ်ထဲလဲၣ်

ယဟိဝၤပှၤအုၣ်အသးတဖၣ် အတၢ်အိၣ်ဖှိၣ် ဒီးအတၢ်သိၣ်လိလံာ်စီဆှံ အတၢ်ရဲၣ်တၢ်ကျဲၤန့ၣ် မၤစၢၤပှၤဂၤဒ်သိး အဝဲသ့ၣ် အတၢ်အိၣ်မူကဂ့ၤထီၣ် ဒီးကသ့ၣ်ညါ ပာ်ကဲလီၤ အနီၢ်ကစၢ်သးအါထီၣ်.

ပတၢ်အိၣ်ဖှိၣ် ကိးနွံဒဲး

ကိးနွံဒဲး ဖဲပထီၣ်တၢ်အိၣ်ဖှိၣ်အခါ ပနၢ်ဟူဘၣ် တၢ်စံၣ်တဲၤတဲလီၤတၢ်လၢ အဒိးသန့ၤထီၣ်သး လၢလံာ်စီဆှံ လၢအပၣ်ဃုာ်ဒီး တၢ်ဟ့ၣ်ကူၣ်လၢ ကမၤစၢၤပှၤဒ်သိး ပကဘၣ် ပာ်ကဲလီၤ ပနီၢ်ကစၢ်သးဒ်လဲၣ်. ပတၢ်အိၣ်ဖှိၣ်န့ၣ် ပတထၢ တၢ်မၤဘူၣ်ဘၣ် ဒီးပတူၢ်လိာ် ပှၤကိးဂၤဒဲးလၢ ကဟဲထီၣ် ပတၢ်အိၣ်ဖှိၣ်. အဒိ လၢပတၢ်အိၣ်ဖှိၣ်န့ၣ် နကသ့ၣ်ညါဘၣ်လၢ . . .

• ကစၢ်ယွၤ ထံၣ်နၤဒ်လဲၣ်

• နကအိၣ်ဒီး တၢ်သးခုနီၢ်ကီၢ်အဂီၢ် နကဘၣ်မၤဒ်လဲၣ်

• နမၤဂ့ၤထီၣ် တၢ်ရ့လိာ်သးဒီးပှၤအဂၤ ကသ့ဒ်လဲၣ်

နကထံၣ်လိာ်သးဒီး သကိးအဂ့ၤတဖၣ်လၢ အ “အံးထွဲကွၢ်ထွဲလိာ်သး ကဒဲကဒဲ.”—၁ ကရံၣ်သူး ၁၂:၂၅, ၂၆.

နမ့ၢ်အဲၣ်ဒိး သ့ၣ်ညါအါထီၣ် ဘၣ်ဃးဒီး ပတၢ်အိၣ်ဖှိၣ်န့ၣ် နုာ်လီၤလၢ jw.org အပူၤ ဒီးကွၢ်တၢ်ဂီၤမူ လၢအမ့ၢ် ဖဲဘီမုၢ်ဘျီၣ်ဒိၣ်န့ၣ်ပှၤမၤတၢ်မနုၤလဲၣ်.

တၢ်မၤလိလံာ်စီဆှံ အတၢ်ရဲၣ်တၢ်ကျဲၤ

ပအဲၣ်ဒိးလၢ နကမၤလိသကိးလံာ်စီဆှံဒီးပှၤ ဒီးသူလံာ်လၢအမ့ၢ် အိၣ်မူလီၤထူလီၤယိာ် ပှဲၤဒီးတၢ်သးခု. လံာ်တဘ့ၣ်အံၤ အိၣ်ဒီး လံာ်စီဆှံအဆၢလၢ အရ့ဒိၣ်တဖၣ်, ပာ်ဖျါထီၣ် တၢ်ဂ့ၢ်ၡဲၡဲ, အိၣ်ဒီး တၢ်သံကွၢ်, တၢ်ဂီၤမူ ဒီးတၢ်ဂီၤတဖၣ်. ဒီးနကမၤလိ လံာ်စီဆှံအဂီၢ် နတလိၣ်ဟ့ၣ်စ့ဘၣ်. ပတၢ်မၤလိ လံာ်စီဆှံ အတၢ်ရဲၣ်တၢ်ကျဲၤအံၤ ကမၤစၢၤပှၤဂၤ ဒ်သိးအဝဲသ့ၣ် ကသ့ၣ်ညါ ပာ်ကဲလီၤ အနီၢ်ကစၢ်သး ဒီးအဝဲသ့ၣ် အတၢ်အိၣ်မူ ကဂ့ၤဒိၣ်ထီၣ်အဂီၢ်.

နမ့ၢ်မၤလိလံာ်စီဆှံဒီး ယဟိဝၤပှၤအုၣ်အသးန့ၣ် နကဒိးန့ၢ်ဘၣ် အဘျုးဒ်လဲၣ်. ဒ်သိး နကသ့ၣ်ညါအဂီၢ် နုာ်လီၤလၢ jw.org အပူၤ ဒီးကွၢ်တၢ်ဂီၤမူ လၢအမ့ၢ် ဘၣ်မနုၤအဃိ ဘၣ်မၤလိလံာ်စီဆှံလဲၣ်.