Bamesala nsilulu mosi na Yehova

Bangonda kana zole na manima ya kubima na Ezipito, Bayisaele kumaka na mongo ya Sinai mpe batulaka kan na bau vana. Yehova bokilaka Moize, mpe yandi kuendaka na mongo mpe Yehova tubilaka yandi: ‘Munu mevukisa Bayisaele. Kana bamezitisa munu mpe bamezitisa bansiku na munu, bakekuma bantu na munu mpenza.’ Moize kitaka na mongo mpe yandi tubilaka Bayisaele mambu yina Yehova tubaka. Yinki basalaka? Bapesaka mvutu: ‘Beto kesala mambu nionso yina Yehova metuba.’

Moize kuendaka diaka na mongo. Kuna, Yehova tubaka: ‘Na manima ya bilumbu tatu, munu kesolola na nge. Tubila Bayisaele babika monte na mongo ya Sinai.’ Moize kitaka na mongo mpe yandi tubilaka Bayisaele ti babongama samu na kuwa Yehova.

Na manima ya bilumbu tatu, Bayisaele monaka kukia mpe dituti mosi ya ndombe na mongo. Mpe bakuwaka makelele ya ngolo ya kake mpe makelele ya mpoka. Mpe Yehova kitaka na mongo, na tiya. Bayisaele bangaka ngolo mpe bavuandaka zakama. Mongo ya mvimba bandaka kuningana ngolo mpe yafulukaka na muisi. Makele ya mpoka vuandaka kuma kaka ngolo. Mpe na manima Nzambi tubaka: ‘Munu kele Yehova. Beno fueti sambila banzambi yankaka ve.’

Moize vutukaka na mongo, mpe Yehova pesaka yandi bansiku yina monisaka mutindu bisadi na yandi fueti sambila Yandi mpe bikadulu yina bafueti monisa. Moize sonikaka bansiku yango mpe yandi tangilaka yau Bayisaele. Balakaka ti: ‘Beto kesala mambu nionso yina Yehova metuba.’ Ya kedika, bapesaka Nzambi nsilulu. Kasi bakezitisa yau?