Yesu me kuma Masiya

Yoane vanda samunaka: ‘Muntu ya kulutila munu ke na kwizaka.’ Ntangu Yesu kumaka na bamvula 30, yandi katukaka na Galile mpe kwendaka na Nzadi ya Yordani, kisika yina Yoane vanda botika bantu. Yesu zolaka ti Yoane botika yandi, kasi Yoane zonzaka na yandi: ‘Mu lenda botika ve nge. Ni nge me bonga kubotika munu.’ Yesu zonzaka na yandi: ‘Yehova me zola ti nge botika munu.’ Na yawu, ba kotaka na Nzadi ya Yordani, mpe Yoane botikaka Yesu yandi nyonso na kati ya maza.

Ntangu Yesu basikaka na maza, yandi sambilaka. Na mbala mosi, zulu fungukaka, mpe mpeve ya Nzambi kulumukaka na zulu ya yandi mutindu dibembe. Na manima, Yehova zonzaka katuka na mazulu: “Nge ke mwana ya munu yina mu ke zolaka mingi. Mu me ndima nge.”

Ntangu mpeve ya Yehova kulumukaka na zulu ya Yesu, yandi kumaka Kristo, to Masiya. Ntangu lungaka samu yandi banda kisalu yina Yehova filisaka yandi awa na ntoto.

Kaka na manima ya kuzwa mbotokolo, Yesu kwendaka na ntoto ya kuyuma mpe yandi lutisaka bilumbu 40 kuna. Ntangu yandi vutukaka, yandi kwendaka tala Yoane. Ntangu Yesu vanda kwiza pene-pene ya Yoane, Yoane zonzaka: ‘Yayi mwana ya Dimeme ya Nzambi yina ke katula disumu ya yinza.’ Yandi zonzaka mutindu yayi, samu bantu zaba ti Yesu ke Masiya. Nge zaba yinki kuminaka Yesu ntangu yandi vandaka na ntoto ya kuyuma? Bika beto tala yawu na disolo yina ke landa.