Yoane me bongisa nzila

Yoane, mwana ya Zakari na Elizabeti kumaka mbikudi ntangu yandi kulaka. Yehova filisaka Yoane samu na kulonga bantu ti Masiya ke na kwizaka. Kasi Yoane vanda longaka ve na basinagoge to na bambanza, yandi vanda longaka na ntoto ya kuyuma. Bantu ya Yeruzalemi mpe bantu ya Zude nyonso vanda kwizaka samu na kuwa yandi. Yandi longaka bawu ti samu ba sepelisa Nzambi ba me lunga kubika mambu ya yimbi. Na manima ya kuwa yandi, bantu mingi balulaka ntima mpe yandi botikaka bawu na Nzadi ya Yordani.

Yoane vanda sosaka ve bima mingi na luzingu ya yandi. Yandi vanda lwataka bilele yina ba salaka na bansuki ya mpusu ya shamo. Yandi vanda kudyaka makonko na myele. Bantu vanda sosaka kuzaba nani yandi kele. Ata bantu ya lulendo mutindu Bafarize mpe Basaduse kwizaka samu na kutala yandi. Yoane zonzaka na bawu: ‘Beno bika mambu ya yimbi mpe beno balula ntima. Beno kukanisa ve ti beno me lutila mfunu na bantu ya nkaka samu beno me zonza ti beno ke bana ya Abrahami. Ya zola zonza ve ti beno kele bana ya Nzambi.’

Bantu mingi kwizaka na sika ya Yoane mpe yufulaka yandi: ‘Yinki beto me bonga kusala samu na kusepelisa Nzambi?’ Yoane zonzaka na Bazwife yango: ‘Kana nge ke na bilele zole, pesa mosi na muntu yina ke ve na yawu.’ Nge me zaba samu na yinki yandi zonzaka mutindu yina? Yandi vanda sosa kulonga na bilandi ya yandi ti samu ba sepelisa Nzambi, ba me fwana kuzola bantu.

Yoane zonzaka na bantu yina ke lokotaka mpaku: ‘Beno kusala ve bamambu na mayuya, beno kuyiba ve ata muntu.’ Yandi zonzaka na basoda: ‘Beno kundima ve madeso ya bana mpe beno kuvuna ve.’

Banganga-nzambi na balevi mpe kwizaka tala yandi, ba yufulaka yandi: ‘Nani nge kele? Bantu nyonso ke na sosaka kuzaba yawu.’ Yoane vutulaka: ‘Mu ke ndinga yina ke na zonzaka na ntoto ya kuyuma, yina ke na nataka bantu na sika ya Yehova, mutindu Izayi bikulaka yawu.’

Bantu zolaka bamambu yina Yoane longaka bawu. Bantu mingi vanda yufula kana Yoane vandaka Masiya. Kasi yandi zonzaka na bawu: ‘Muntu yina lutila munu ke na kwizaka. Mu me lunga ve kukatula ata mapapa ya yandi. Mu ke na botikaka bantu na maza, kasi yandi ke botika bantu na mpeve ya santu.’